PWONY ME ANYAMA ME 19
WER 22 Ker-ri Dong Tye ka Loc—Wek Obin!
Ngo ma Wangeyo Madok i Kom Kit ma Jehovah Bingolo Kwede Kop?
“[Jehovah] . . . pe mito ni ngat mo orweny woko matwal.”—2 PET. 3:9.
GIN MA WABIPWONYO
Watwero bedo ki gen ni Jehovah bilubo kit ma atir dok pe bingolo kop alenga i kare me anyim ka tye ka ngolo kop i kom dano.
1. Pingo watwero waco ni watye ka kwo i kare ma kite dok pat?
WATYE ka kwo i kare ma lok pa lunebi me Baibul tye ka cobbe ma waneno ki wangwa! Nino ducu, waneno jami ma Baibul otito pire ma tye ka timme ada. Me labolle, watye ka neno kit ma ‘kabaka ma tung kumalo’ ki ‘kabaka ma tung kupiny’ gitye ka tele i kingi kun ngat acel acel mito bedo oteka ma loyo wi lobo. (Dan. 11:40) Watye ka neno bene ka kitito kwena maber me Ker-ri i wi lobo ducu, dok dano milion mapol gumoko tamgi me tic pi Jehovah. (Ic. 60:22; Mat. 24:14) Dok watye ka nongo cam me cwiny madwong adada “i kare ma mitte.”—Mat. 24:45-47.
2. Watwero bedo ki gen i kom gin ango, dok ngo ma omyero waye?
2 Jehovah tye ka medde ki konyowa me niang maber adada jami ma pigi tego ma gibitimme macok cok-ki. (Car. 4:18; Dan. 2:28) Watwero bedo ki gen ni ma peya twon can madit atika-ni ocakke, nongo wangeyo jami ducu ma mitte ni wangegi wek wacung matek, dok wamedde ki tic pi Jehovah. Kadi bed kit meno, omyero waye ni tye jami mogo ma pe wangeyo madok i kom jami ma bitimme macok cok-ki. I pwony man, wabicako ki nyamo pingo watimo alokaloka i kom niangowa madok i kom jami mogo ma bitimme. I nge meno, wabinyamo jami mogo ma wangeyo ma bitimme i anyim kacel ki kit ma Wonwa me polo bidok kwede iye.
JAMI MA PE WANGEYO
3. I kare mukato angec, gin ango ma onongo watamo ni bitimme i kom jo ma gipe ki niye ka twon can madit atika-ni ocakke, dok pingo onongo wawaco kit meno?
3 I kare mukato angec, onongo wawaco ni ka twon can madit atika-ni ocakke, dano pe gibibedo ki kare me keto niye i kom Jehovah wek gubwot ki i lweny me Armagedon. Wawaco kit meno pien onongo watamo ni jami ma otimme i kare me Pii Aluka gicung pi gin ma onongo bitimme i anyim. Me labolle, onongo watamo ni kit ma ngat mo keken onongo pe romo donyo i yeya i nge Jehovah lorone, pe tye ngat mo bene ma biketo niye i kom Jehovah wek kilare i kare me twon can madit atika-ni.—Mat. 24:37-39.
4. Pingo pe dong wawaco ni jami ducu ma otimme i kare pa Nua cung pi jami ma bitimme i karewa-ni.
4 Tika opore me waco ni jami ducu mutimme i kare me Pii Aluka gicung pi jami ma bitimme i anyim? Lagamme tye ni pe. Pingo? Pien pe tye wang Ginacoya mo ma cwako lok meno. a Tye lok ada ni, Yecu oporo “kare pa Nua” ki kare me dwogone. Ento en pe owaco ni jami ducu ma otimme i kare pa Nua gicung pi jami ma bitimme i anyim. Me labolle, en pe otito ni kit ma Jehovah oloro kwede dog yeya onongo cung pi gin mo. Man pe tyen lokke ni, pe watwero nongo pwony mo ki i gin mutimme i kom Nua kacel ki Pii Aluka.
5. (a) Gin ango ma Nua otimo me nyuto niyene ma Pii Aluka peya ocakke? (Jo Ibru 11:7; 1 Petero 3:20) (b) Kit ma Nua otito kwede kwena rom aroma ki wan i kare-ni nining?
5 I kare ma Nua onongo kwena me ciko dano ki bot Jehovah, en onyuto ni etye ki niye ki cako tic me gero yeya. (Kwan Jo Ibru 11:7; 1 Petero 3:20.) I yo acel-lu, jo ma giwinyo kwena me Ker pa Lubanga myero gunyut niye ki keto gin ma gupwonyo i tic. (Tic 3:17-20) Petero owaco ni Nua obedo “latit lok me kit ma atir.” (2 Pet. 2:5) Kadi bed Nua otute ki kerone ducu me tito kwena, kit ma wanyamo kwede i pwony ma okato-ni, Baibul pe waco ni en otito kwena bot dano ducu ma gukwo i wi lobo i kare meno ma peya Pii Aluka ocakke. I kare-ni, watye ka tute me tito kwena bot jo ducu ma i wi lobo-ni, dok watye ka timone ki mit kom madwong. Ento kadi bed watute nining, pe wabio bot dano ducu ki acel acel ma i wi lobo man ma nongo agikki peya oo. Pingo tye kit meno?
6-7. Pingo watwero waco ni pe wabitito kwena bot dano ducu ki acel acel ma nongo agikki peya obino?
6 Nen kong gin ma Yecu owaco madok i kom tic me tito kwena. En otito ni kwena maber-ri kibititone “i wi lobo ducu, me bedo caden bot rok ducu.” (Mat. 24:14) Lok meno tye ka cobbe i kare-ni maloyo kare mo keken. Watye ka tito kwena maber-ri i wi lobo ducu i leb makato 1,000 kulu. Dok ki kony pa kabedowa me Intanet me jw.org, jo mapol i wi lobo i kare-ni gitwero pwonyo lok me kwena maber me Ker pa Lubanga.
7 Ento, Yecu bene otito ki lupwonnyene ni “pe wubiwoto i gangi me Icrael wurumo woko ducu,” nyo ni pe gibitito kwena bot dano ducu, ma nongo en peya odwogo. (Mat. 10:23; 25:31-33) Lok pa Yecu meno tye ka cobbe ada i karewa-ni bene. Jo mapol i karewa-ni gikwo i kabedo ma pe waromo tito iye kwena maber-ri agonya. Medo i kom meno, i dakika acel acel, nongo kitye ka nywalo lutino miya mapol i wi lobo. Watute matek me timo gin ducu ma watwero me tito kwena bot dano me “rok ducu ki kaka ki leb-gu.” (Yabo 14:6) Ento lok ada tye ni, pe wabibedo ki kare me nywako kwena maber-ri ki dano ducu ma gikwo i wi lobo-ni ma nongo agikki peya oo.
8. Lapeny mene ma watwero pennye kwede i kom kit ma Jehovah bingolo kwede kop i anyim? (Nen bene cal.)
8 Ma lubbe ki gin ma dong wanyamo, watwero pennye ni: Jo ma pe gubedo ki kare me winyo kwena maber-ri ma peya twon can madit atika-ni ocakke kono? Jehovah kacel ki Wode, ma en omine twero me ngolo kop, gibitero jo magi nining? (Jon 5:19, 22, 27; Tic 17:31) Ginacoya ma pwony man jenge iye tito ni Jehovah “pe mito ni ngat mo orweny woko matwal.” Me ka meno, en “mito laro jo ducu.” (2 Pet. 3:9; 1 Tem. 2:4) Kadi bed wangeyo lok magi madok i kom Jehovah, ento en peya otito botwa kit ma en bingolo kwede kop i kom jo ma pe gubedo ki kare me winyo lok me kwena maber-ri. Dok ngene kene ni, pe mitte ni en otitiwa gin ducu ma en bitimone.
Jehovah bitero jo ma pe gubedo ki kare me winyo kwena maber-ri ma peya twon can madit atika-ni ocakke nining? (Nen paragraf 8) c
9. Gin ango ma Jehovah otito botwa i Baibul?
9 I Baibul, Jehovah otito botwa jami mogo ma en bitimone. Me labolle, Baibul tittiwa ni Jehovah bicero “jo ma kitgi pe atir,” ma meno aye jo ma pe gubedo ki kare me pwonyo lok me kwena maber ki loko kwogi. (Tic 24:15; Luka 23:42, 43) Man weko wapennye ki lapeny mukene ma pigi tego.
10. Lapeny mene ma watwero pennye kwede?
10 Tika jo ma gibito i kare ma twon madit atika-ni gibito matwal labongo gen me nicer? Ginacoya tito ka maleng ni jo ma gibijemo i kom Jehovah, dok ma Jehovah kacel ki monnye bijwerogi i kare me Armagedon pe kibicerogi. (2 Tec. 1:6-10) Ento jo mukene-ni kono? Me labolle, jo mukene guromo to i kare me twon can madit atika-ni pi peko me two, tiyo, akciden, nyo dano luwotgi oromo nekogi woko. (Latit. 9:11; Jek. 14:13) Tika jo mogo i kingi guromo bedo “jo ma kitgi pe atir” ma kibicerogi i lobo manyen? Lagam pi lapeny meno pe wangeyo.
JAMI MA WANGEYO
11. Gin ango ma bimoko kit ma kibingolo kwede kop i wi ngat moni i kare me Armagedon?
11 Wangeyo jami mapol ma bitimme i anyim. Me labolle, wangeyo ni i kare me lweny me Armagedon, kibingolo kop i kom dano ma lubbe ki kit ma gubedo ka tero kwede omegi Kricito. (Mat. 25:40) Jo ma kibingoligi kop ni gubedo romi, nongo gunyuto cwakgi pi Lukricitayo ma kiwirogi kacel ki Kricito. Wangeyo bene ni omegi Kricito mogo pud gibibedo tye i wi lobo i nge cakke pa twon can madit atika-ni dok pe kibiterogi i polo wang ma lweny me Armagedon dong cok cakke. Ka omegi Kricito pud gitye ka kwo i lobo, ci dano pud gibibedo ki kare me minigi cwak pi tic ma gitye ka timo. (Mat. 25:31, 32; Yabo 12:17) Pingo lok ada magi pigi tek adada?
12-13. Jo mogo guromo dok iye nining i nge neno ka kijwero “Babilon Madit”? (Nen bene cal.)
12 Kadi wa i nge cakke pa twon can madit atika-ni, jo mogo gibineno ka kijwero “Babilon Madit” ci wigi bipo ni Lucaden pa Jehovah gutito wa con ni gin ma kit man bitimme. Tika jo mogo gibiketo niye i kom Jehovah ka guneno kitye ka jwero “Babilon Madit”?—Yabo 17:5; Ejek. 33:33.
13 Ka meno otimme, ci bibedo marom aroma ki gin ma otimme i Ejipt i kare pa Moses. Wi opo ni ‘lwak rok murubbe’ guribbe ki Luicrael i kare ma gua ki i Ejipt. Jo mogo i kingi twero bedo ni gucako dongo niye i kare ma guneno cobbe pa Gemo Apar ma Moses otito pire. (Nia 12:38) Ka gin ma kit man otimme i nge jwero Babilon Madit, tika nyeko bimakowa ni jo mogo gubedo ki kare me ribbe kwedwa ma agikki dong cok dok gibibedo ki kare me donyo i Lobo Manyen? Ngene kene ni pe! Wamito bedo calo Wonwa me polo ma obedo, “Lubanga ma lakica dok maro dano, kiniga pe make oyot, marre ma pe lokke dwong, en lagen mada.” b—Nia 34:6.
Jo mogo gibineno ka kijwero “Babilon Madit” ci wigi bipo ni Lucaden pa Jehovah gutito wa con ni gin ma kit man bitimme (Nen paragraf 12-13) d
14-15. Tika gen me nicer ki kwo pi naka jenge i kom kare ma ngat moni oto iye nyo ka ma en okwo iye? Tit kong. (Jabuli 33:4, 5)
14 I kare mukene, wawinyo ka omege ki lumege mogo giwaco ni, “Onongo bibedo ber ka wadina guto ma peya twon can madit atika-ni ocakke pien nongo gen me nicer mo olo tye pigi.” Ngene kene ni nongo guloko ki cwiny me kica. Ento gen me nicer ki kwo pi naka i lobo paradic pe jenge i kom awene ma ngat moni oto iye. Jehovah ngolo kop atir, dok tam ma en moko kare ducu tye kakare. (Kwan Jabuli 33:4, 5.) Watwero bedo ki geni ni “Langolkop me lobo ducu” bitimo gin ma tye atir.—Acak. 18:25.
15 Watwero bene waco ni gen me nicer ki kwo pi naka ma ngat moni twero bedo kwede pe jenge i kom kabedo ma en kwo iye. Jehovah pe bingolo kop i kom dano milion mapol ni gubedo “dyegi” pien gukwo i kabedo ma oweko pe gunongo kare me pwonyo lok ada me Ker pa Lubanga. (Mat. 25:46) Langolkop ma kite atir me lobo man paro pi jo magi adada. Pe wangeyo kit ma Jehovah bidoro kwede jami ma bitimme i kare me twon can madit atika-ni. Ka jo mogo i kingi guneno jami ma tye ka timme i kare me twon can madit atika-ni, ci gwok nyo man bitugo cwinygi me keto niye i kom Jehovah ka En omiyo nyinge ongene bot dano ducu ma i lobo.—Ejek. 38:16.
I nge cakke pa twon can madit atika-ni, . . . tika jo mogo gibiketo niye i kom Jehovah ka guneno kitye ka jwero “Babilon Madit”?
16. Gin ango ma dong wapwonyo madok i kom Jehovah? (Nen bene cal.)
16 I kwanwa me Baibul, waniang ni kwo pa dano pire tek adada bot Jehovah. En omiyo kwo pa Wode wek wan ducu wabed ki gen me kwo pi naka. (Jon 3:16) Wan ducu waneno mar pa Jehovah i kwowa. (Ic. 49:15) En ngeyo nying wan ducu ki acel acel. En ngeyowa maber ma kadi bed wato woko, en twero cerowa pien wiye po i kom kit ma wanen kwede kacel ki jami ducu ma adamwa po iye! (Mat. 10:29-31) Ki lok ada, watye ki tyen lok ma atir me bedo ki gen ni Wonwa me polo ma lamar-ri bingolo kop i wi ngat acel acel i yo me kica dok ma atir.—Yak. 2:13.
Watye ki tyen lok ma atir me bedo ki gen ni Wonwa me polo bingolo kop i wi ngat acel acel i yo me kica dok ma atir (Nen paragraf 16)
17. Gin ango ma wabinyamo i pwony ma lubo man?
17 Niango magi ma kilokogi-ni, weko ticwa me tito kwena bedo tic ma omyero watim oyotoyot i kare-ni ma loyo kare mo keken. Pingo watwero waco kit meno? Dok gin ango ma twero tugo cwinywa me medde ki tito kwena maber-ri ki mit kom labongo ilo cingwa? Wabinyamo lagam pi lapeny magi i yo matut i pwony ma lubo man.
WER 76 In Iwinyo Nining?
a Me niang matut pingo kitimo alokaloka man, nen pwony ma wiye tye ni “Ipwoyo Kit Yo Macalo Meno” i Wi Lubele me Marci 1, 2015, pot 8-12.
b I nge jwero Babilon Madit, kibitemo lutic pa Jehovah ducu i kare ma Gog me Magog bioto lweny i kom jo pa Lubanga. Dok ngat mo keken ma biribbe ki jo pa Lubanga i nge jwero Babilon Madit bene kibitemo niyene.
c LOK I KOM CAL : Cal adek mapatpat ma nyuto pingo jo mogo pe guromo bedo ki kare me winyo kwena maber-ri: (1) Dako mo ma kwo i lobo ka ma Lukricitayo pe iye dok Lucaden pe gitwero tito iye kwena, (2) luot mo ma gikwo i lobo ka ma cik pa gamente pe ye ni kitit iye kwena maber-ri, (3) laco mo ma kwo i caro ka mabor ma wot me o iye tek adada.
d LOK I KOM CAL: Anyaka mo ma onongo ticce okwe woko wiye opo i kom jami ma en opwonyo madok i kom jwero “Babilon Madit.” En omoko tamme me dwogo cen bot Jehovah dok odok cen bot lunyodone ma Lukricitayo. Ka gin ma kit meno otimme, bimitte ni walub lanen me kica pa Wonwa me polo ma cwinye bedo yom ka labalo ongut ci odwogo cen.
