19 ӰРЕНЕТЕН ЈӦРМӦЛ
22 КОЖОҤ Кудайдыҥ Каандыгы келзин!
Иегова улусты улу тӱбектиҥ ӧйинде канайып јаргылаар?
«[Иегова] кемди де ӧлӱп калбазын... деп кӱӱнзейт» (2 ПЁТР 3:9, ЈТ).
НЕНИ ШӰӰЖЕРИС
Улу тӱбектиҥ ӧйинде Иегованыҥ чыгарган јаргылары чын ла справедливый болор деп нениҥ учун алаҥзыбаска јараар.
1. Бис коркышту кайкамчылу ӧйдӧ јададыс деп нениҥ учун айдарга јараар?
БИС коркышту кайкамчылу ӧйдӧ јададыс! Кажы ла кӱн бойыстыҥ кӧзисле Агару Бичиктеги судурлардыҥ бӱдӱп турганын кӧрӧдис. Темдектезе, «тӱндӱк» ле «тӱштӱк» каандар јаҥ блаажат (Дан. 11:40, сноска). Јердиҥ ӱстинде сӱӱнчилӱ јар оноҥ кӧп јарлалат ла канча миллион улус чындыкты алынат (Иса. 60:22; Матф. 24:14). Анайда ок бис ӧйи-ӧйинде јӱзӱн-јӱӱр кӧгӱс курсак алып јадыс (Матф. 24:45—47).
2. Удабас не болоры керегинде кезик немени билбес те болзоос, неде алаҥзыбай јадыс?
2 Иегова удабас не болорын бир эмештеҥ ачып јат (Укаа 4:18; Дан. 2:28). Је эм тура бис кезик немени билбезис. Андый да болзо, улу тӱбектиҥ алдында бис керектӱ немени ӱзе билер болорыс. Бу биске Кудайга чындык артарга ла јеҥил эмес ол ӧйдӧ ака-эјелерисле бирлик болорго болужар. Бу јӧрмӧлдӧ, озо баштап, улу тӱбек керегинде санаагысты нениҥ учун солыганысты билип аларыс. Анайда ок келер ӧй керегинде ле ол ӧйдӧ теҥеридеги Адабыс нени эдери керегинде нени билеристи шӱӱжерис.
БИС НЕНИ БИЛБЕЗИС
3. Улус Кудайдыҥ албатызына качан кожулып болбос деп сананганыс, нениҥ учун?
3 Алдында ӧйдӧ бис улу тӱбек башталза, Иегованыҥ Керечизи эмес улус Кудайдыҥ албатызына кожулып болбос ло Армагеддонды ӧтпӧс деп айтканыс. Нениҥ учун бис анайып айтканыс? Нениҥ учун дезе Нойдыҥ ӧйинде болгон чайык улу тӱбектиҥ ӧйинде не болорын кӧргӱзип турган деп бодогоныс. Канайып Иегова чайыктыҥ алдында ковчегтиҥ эжигин бӧктӧп ийген, анайып ла улу тӱбектиҥ бажында чындыктыҥ эжигин бӧктӧп ийзе, база кем де аргаданып болбос деп сананганыс (Матф. 24:37—39).
4. Эмди бис чайыктыҥ ӧйи келер ӧйдӧ не болорын кӧргӱзет деп сананадыс па? Јартап беригер.
4 Алдында ӧйдӧ болгон чайыкты келер ӧйдӧ не болорын кӧргӱзип турган деп айдып болорыс па? Јок. Нениҥ учун? Нениҥ учун дезе Агару Бичикте мынайып сананатан тӧзӧлгӧ јок a. Иисус чын ла «Нойдыҥ кӱндерин» бойыныҥ башкаратан ӧйине тӱҥейлеген. Је Иисус чайыктыҥ алдында болгон ӧйди келер ӧйдӧ болотон немени кӧргӱзип турган деп айтпаган. Анайып ла ок ковчегтиҥ эжиги бӧктӧлгӧни улу тӱбектиҥ ӧйинде бӱдетен судур болбой јат. Андый да болзо, Ной ло ковчег керегинде јетирӱлерди тузазы јок деп айтпай јадыс.
5. а) Ной Кудайга бӱдӱп турганын чайыктыҥ алдында канайып кӧргӱскен? (Еврейлерге 11:7; 1 Пётр 3:20). б) Бистиҥ јарлаар ижис Нойдыҥ јарлаганына незиле тӱҥей?
5 Ной Иегованыҥ чайык керегинде айтканын угала, Кудайга бӱдӱп, ковчег туткан. (Еврейлерге 11:7; 1 Пётр 3:20, ЈТ кычырыгар.) Бӱгӱнги де кӱнде Кудайдыҥ Каандыгы керегинде сӱӱнчилӱ јарды уккан улус база Кудайга бӱдӱп, укканы аайынча эдер учурлу (Ап. ижи 3:17—20). Пётр Нойды «чындыктыҥ јарчызы» деп адаган (2 Пётр 2:5, ЈТ). Је ӧткӧн јӧрмӧлдӧ айдылганыла, Ной ол ӧйдӧ јаткан кажы ла кижиге чайык керегинде јарлаган ба, јок по бис билбезис. Бӱгӱнги кӱнде сӱӱнчилӱ јар бастыра телекейде јарлалат. Андый да болзо, бу системаныҥ учы келгелекте, канча да кире албаданзаас, кажы ла кижиге јарлап болбозыс. Нениҥ учун?
6, 7. Бу телекейдиҥ учы келгелекте бис нениҥ учун кажы ла кижиге сӱӱнчилӱ јарды куучындап болбозыс?
6 Бистиҥ јарлаар ижистиҥ сӱреен тыҥыыры керегинде Иисустыҥ сӧстӧрин кӧрӱп ийектер. Ол айткан: «Ончо калыктарга кере болзын деп, Каандык керегинде сӱӱнчилӱ јар јер-ӱстине јарлалар» (Матф. 24:14, ЈТ). Бу судур эҥ ле тыҥ бӱгӱнги кӱндерде бӱдӱп јат. Каандык керегинде јар 1000-наҥ ажыра тилдерге јарлалат, а jw.org сайттыҥ болужыла, бу јар јердиҥ ӱстинде кӧп саба албатыларга једет.
7 Је Иисус ӱренчиктерине слер бастыра «калаларды эбирип тӱгескелегерде» ол эмезе кажы ла кижиле куучындашкалагарда, мен једип келерим деп айткан (Матф. 10:23; 25:31—33). Иисустыҥ сӧстӧри бӱгӱнги де кӱнде бӱдӱп јат. Канча миллион улус бистиҥ ижиске јаан токтодулар тургузылган јерлерде јадат. Анайда ок кажы ла минутта канча јӱс балдар чыгат. Андый да болзо, бис сӱӱнчилӱ јарды «кандый ла укка, ӱйеге, тилге» јарлаарга албаданадыс (Ачыл. 14:6). Је канай да албаданзаас, кажы ла кижиге јарлап болбозыс.
8. Иегованыҥ келер ӧйдӧ эдетен јаргылары аайынча кандый сурактар чыгардаҥ айабас? (Јуруктарды база кӧрӱгер.)
8 Оныҥ учун мындый сурактар чыгат: «Улу тӱбектеҥ озо сӱӱнчилӱ јарды угатан арга болбогон улусла не болор? Иегова ла Иисус олорды канайып јаргылаар?» (Иоанн 5:19, 22, 27; Ап. ижи 17:31). Бу јӧрмӧлдиҥ тӧс ӱлгеринде айдылганыла, Кудай «кемди де ӧлӱп калбазын, карын ончо улусты кинчегин алынзын деп кӱӱнзейт» (2 Пётр 3:9, ЈТ; 1 Тим. 2:4). Андый да болзо, Иегова сӱӱнчилӱ јарды угатан арга болбогон улусты канайып јаргылаарын эм тура бис билбезис. Кудай оны биске ачкалак, је ол оны ачпас та аргалу.
Улу тӱбектеҥ озо сӱӱнчилӱ јарды угатан арга болбогон улусты Иегова канайдар? (8 абзацты кӧрӱгер.) c
9. Иегова Агару Бичик ажыра биске нени ачып салган?
9 Је келер ӧйдӧ Иегова нени эдерге турганыныҥ кезик немелерин бис билерис. Темдектезе, Агару Бичикте сӱӱнчилӱ јарды угатан ла тӱзединетен арга болбогон «акту эмес» улус тирилер деп айдылат (Ап. ижи 24:15; Лука 23:42, 43). Је мыныла колбой база сурактар чыгып келет.
10. База кандый сурактар чыгардаҥ айабас?
10 Иегова улу тӱбектиҥ ӧйинде божогон улусты тиргизер бе, эмезе олор качан да тиргизилбес пе? Агару Бичикте айдылганыла, Армагеддондо јоголтылган улус качан да тирилбес (2 Фес. 1:6—10). Је улу тӱбектиҥ ӧйинде оору-јоболдоҥ божогон, карыйла божогон ол эмезе кандый бир тӱбектеҥ, эмезе кандый бир кижиниҥ колынаҥ божогон улус тирилер бе? (Эккл. 9:11; Зах. 14:13). Бу улус тирилетен «акту эместердиҥ» тоозында болор бо? Бу сурактардыҥ карууларын бис билбезис.
БИС НЕНИ БИЛЕРИС
11. Иисус неге тайанып улусты койлорго ло эчкилерге бӧлиир?
11 Је кезик немени бис билерис. Темдектезе, Иисус улусты оныҥ карындаштарына канайып баштанганына тайанып, эчкилерге ле койлорго бӧлиир (Матф. 25:40). Христоско ло оныҥ карындаштарына јӧмӧшкӧн улус койлордыҥ тоозына кирер. Је анайда ок мындый немени билерис. Христостыҥ кезик карындаштары улу тӱбек башталып калза, кандый да ӧйдиҥ туркунына јерде болор. Олор чек ле Армагеддонныҥ алдында теҥеридӧӧн јӱрӱп калар. Айдарда, акту јӱректӱ улуста, Христостыҥ карындаштары теҥеридӧӧн барганча ла, олорго ло олордыҥ ижине јӧмӧжӧтӧн арга бар ошкош (Матф. 25:31, 32; Ачыл. 12:17).
12, 13. Кезик улус «Улу Вавилонныҥ» аҥтарылганын кӧрӱп, канайдар болор? (Јуруктарды база кӧрӱгер.)
12 Бистиҥ билетенисле улу тӱбек «Улу Вавилонныҥ» јайрадылганынаҥ башталар. Ол ӧйдӧ, байла, кезик улустыҥ санаазына улу тӱбек керегинде Иегованыҥ Керечилери туку ла качаннаҥ бери айдып турганы кире берер. Бу улус чындыкка келер бе? (Ачыл. 17:5; Иез. 33:33).
13 Моисейдиҥ ӧйинде болгон учуралды сананып ийектер. Израиль албаты Египеттеҥ чыгарда, олорло кожо «башка-башка албатылардыҥ кӧп улузы» барган (Чыг. 12:38). Ол улус Моисейдиҥ айткан он кыйын-шыра канай бӱдӱп турганын кӧрӱп, Иеговага бӱде берген болор. Анайып ла ок Улу Вавилон јоголтылган кийнинеҥ кезик улус чек ле Армагеддонныҥ алдында чындыкка једип келзе, бис ачынарыс па? Јок эмей! Бис теҥеридеги Адабыстаҥ тем аларга кӱӱнзейдис. «Иегова, килеҥкей ле буурзак Кудай. Ол чугулданарга меҥдебей јат, чындык сӱӱшле, чындыкла толо» (Чыг. 34:6) b.
Кезик улус «Улу Вавилонныҥ» јоголып јатканын кӧрӱп ийзе, Иегованыҥ Керечилери бу керегинде туку алдынаҥ бери айдат деп, санаазына, байла, кирип келер болор. (12, 13 абзацтарды кӧрӱгер.) d
14, 15. Кижи ӱргӱлјиге јӱрер бе, јок по качан божогонынаҥ ла кайда јатканынаҥ камаанду ба? Јартап беригер (Сарын 33:4, 5).
14 Кезик ака-эјелер мынайда айдат: «Тӧрӧӧним улу тӱбектеҥ озо божоп калган болзо, торт болор эди. Ол тушта ондо тирилетен ижемји болор эди не». Бис аайлап јадыс, кижи мыны јакшы ла сананып айткан деп. Је кижи јажын-чакка јӱрер бе, јок по оныҥ качан божогонынаҥ камаанду эмес. Иегова толо кеминде справедливый Јаргычы. Ол качан да јастыра јаргы этпей јат. (Сарын 33:4, 5 кычырыгар.) Оныҥ учун «јер ӱстиниҥ Јаргычызыныҥ» јаргылары бир де јик јок болор деп алаҥзыбай јадыс (Баш. 18:25).
15 Анайда ок кижи ӱргӱлјиге јӱрер бе, јок по оныҥ кайда јадып турганынаҥ камаанду эмес. Бӱгӱнги кӱнде канча миллион улус Каандык керегинде сӱӱнчилӱ јар угатан арга јок ороондордо јадат. Бистиҥ јалакай Кудайыс ол улусты капшай ла «эчкилердиҥ» тоозына канай кожуп салатан?! (Матф. 25:46). Бастыра јер ӱстиниҥ чындык Јаргычызы олор керегинде бистеҥ тыҥ санааркап јат. Улу тӱбектиҥ ӧйинде Иегова айалгаларды канайып башкарарын бис билбезис. Је Иегованыҥ ады агарулалган тушта ол улустыҥ кезиги ого бӱдӱп, оныҥ јанына туруп алар болор (Иез. 38:16).
Улу тӱбек «Улу Вавилонныҥ» јайрадылганынаҥ башталар... Бу улус чындыкка келер бе?
16. Бис Иегова керегинде нени билерис? (Јурукты база кӧрӱгер.)
16 Бис Агару Бичикти ӱренип турала, Иегова кижиниҥ јӱрӱмин сӱреен тыҥ баалап турган деп билип алганыс. Ол бисти ӱргӱлји јӱрӱм јӱрзин деп, бистер учун бойыныҥ Уулын берген (Иоанн 3:16). Оныҥ чындык сӱӱжин кажыбыс ла сезип јадыс (Иса. 49:15). Иегова бистиҥ кажыбыстыҥ ла ады-јолысты да билер. Кудай бисти чыннаҥ ла сӱреен јакшы билер. Керек дезе божоп то калзаас, ол бисти кандый кижи болгонысты, кандый кылык-јаҥду болгонысты ла санааларысты јаҥыдаҥ орныктырып салар (Матф. 10:29—31). Бис бир де алаҥзыбас аргалу: Иегованыҥ кажы ла кижиге чыгарган јаргызы бийик кеминде болор. Нениҥ учун дезе бистиҥ теҥеридеги Адабыс ойгор, чындык ла килемкей (Иак. 2:13).
Иегова кажы ла кижиге чындык јаргы чыгарар деп, бис бир де алаҥзыбас аргалу. Нениҥ учун дезе бистиҥ теҥеридеги Адабыс сӱреен ойгор, чындык ла килемкей. (16 абзацты кӧрӱгер.)
17. Келер јӧрмӧлдӧ кандый сурактар шӱӱжилер?
17 Чындыктыҥ мынайып јарт ачылганы јарлаар ишти оноҥ тыҥ баалаар керек деп кӧргӱзет. Нениҥ учун мынайып айдарга јараар? Бисти эрчимдӱ јарлаарга не кӱӱнзедип јат? Бу сурактардыҥ каруулары келер јӧрмӧлдӧ шӱӱжилер.
76 КОЖОҤ Нени сезедиҥ?
a 2015 јылдыҥ тулаан айыныҥ 15-чи кӱниниҥ «Каруулчы шибеезинеҥ» 7—11 бӱктериндеги «Так было угодно тебе» деген јӧрмӧлинеҥ кӧптӧдӧ билип аларга јараар.
b Улу Вавилон јоголтылган кийнинеҥ канча да кире ӧй ӧтсӧ, Магог јериниҥ Гогы Кудайдыҥ албатызына табару эдер. Ол ӧйдӧ јӱк ле Иегованыҥ ишчилериниҥ бӱдӱмјизи ченелер эмес, је улу тӱбек башталарда Кудайдыҥ албатызына кожулган да улустыҥ бӱдӱмјизи ченелер.
c ЈУРУКТАРДА. Сӱӱнчилӱ јар бастыра јердиҥ ӱстинде де јарлалып турган болзо, кезик улуста оны угар арга тӱҥей ле болбой јат. Темдектезе мындый шылтактардаҥ улам: 1) ороонныҥ кудай јаҥынаҥ улам Керечилер јарлап болбой турган јерде јаткан ӱй кижи; 2) политический режимнеҥ улам јарлаарга јарабас ороондо јадып турган биле; 3) Иегованыҥ Керечилери једип болбой турган јерде јадып турган эр кижи.
d ЈУРУКТАРДА. Јууннаҥ ырап калган кыс Агару Бичикте «Улу Вавилонныҥ» јоголтылары керегине судурды сананат. Мынаҥ улам ол Иегованаҥ кору аларга, Керечилер болуп турган ада-энезине келет. Иеговага кайра јанып келген улусты кӧрӱп, бис олор учун сӱӱнедис ле олорды теҥеридеги Адабыс чылап килеерге ле оҥдоорго кӱӱнзейдис.
