LALENGOEN LALAKAW 19
RADIW 22 Tomirengayto ko Hongti Kitakit, Nanay Malaˈosi!
Pakayni to Pisawkit ni Yihofa Ano Ikor, o Maanan ko Kafanaˈan Ita Hani?
‘Ci Yihofa . . . cowa ka halamham to sakalaˈafoaw no cecacecay a tamdaw.’—2 PITIRO 3:9.
KALIMLAAN NO LALAKAW
Ngangaˈay kita pakasoˈlin to pisawkit ni Yihofa ano ikor o moecelay ato masadafdafay.
1. O kaˈoripan no mita a lintad hano o mikiriwiˈay saan hani?
ADIHAYAY ko mikowaday to falocoˈ no tamdaw a taˈangayay a demak mafekaday itini tonini lintad ita! To romiˈamiˈad maˈaraway ita ko nika laˈosi no sapairasol no Fangcalay Cudad itini ˈaˈayaw ita. Tinakoen, maˈaraway ita ko nika sasongtol no ‘katimolay hongti’ ato ‘kaˈamisay hongti’, maˈaˈafasay to sapikowanaw to polong no hekal a saaroˈan. (Taniil 11:40 ato roma pihongyak.) Maˈarawayho ita ko ngaˈayay lihaf no Hongti Kitakit no Kawas mikikakaay to itiyaayho ko nika mapatenak, pinaay soˈot a ˈofad tamdaw micadaay tonini ngaˈayay lihaf. (Isaya 60:22; Matay 24:14) Roma i, itiniay kita i ‘matatodongay a tatokian’ milifok to sapahaled to pakasoˈlin no falocoˈ a kakaenen.—Matay 24:45-47.
2. Ngaˈay kita pakasoˈlin to maanan? Kawra mamihayi kita to maanan?
2 Pakayni sadama ni Yihofa, ihkalayto ko nika fanaˈ ita to mamafekad a taˈangayay a demak. (Taneng 4:18; Taniil 2:28) Ngaˈayay pakasoˈlinen ita, ano mifekad ko taˈangayay padiing i, polong o kakafanaˈen ita a demak o mamafanaˈto kita, mihaen itira tora kapasangaran a laliyadan, papakaemem kita, matongal ko nika tanektek. Kawrira, o mamihayi kita pakayni noikoran iraayho ko caay ko kafanaˈan ita. Onini a lalakaw salakat lengoen ita, hano misalof kita to pitadtad to mamafekad a demak noikor, dotoc mamilengo, pakayni noikoran ato sasamaan ko kakarayan a Wama misawkit, o maanan ko kafanaˈan ita.
CAAY KA FANAˈ KITA TO MAANAN
3. Pakayni hahacowa ci Yihofa miˈedef to sakalidong a fawahan, isaˈayaw samaanay ko kafanaˈ ita? O maanan ko lalangian hani?
3 Isaˈayaw sanay kita miharateng, ano mafekadto ko taˈangayay a padiing i, polong cowa pidoko to Kawas a tamdaw awaayto ko hatoki tomireng itini tatihi ni Yihofa, cowa ko mamaˈorip a milakowit to Armakiton. Saka ira ko mahaenay a sowal i, samanen iraay ko paliˈayaway a tatodong no Taˈangayay a Lenlen sanay a miharateng kita, o tatodong nonini kahacecacecay a demak mitaypiyaway to mamafekad a demak noikor. Tinakoen, ˈayaw no ira ko Lenlen i, miˈedefanto ni Yihofa ko fawahan no tamina, telocto awaayto ko ngangaˈay micomod a tamdaw, mihaenay haw i, ano mafekadto ko taˈangayay padiing i, miˈedefanto ni Yihofa ko sakalidong a fawahan, telocto awaayto ko hatoki no tamdaw mipiliˈ a midoko ci Yihofaan a malidong ko ˈorip.—Matay 24:37-39.
4. Nohatini hano awaay ko paliˈayaway a tatodong no Lenlen sa kita miharateng hani?
4 O Lenlen soˈlinay ira ko paliˈayaway a tatodong han? Awaay. Misamaanay hani? Samanen cowa patodicek ko Fangcalay Cudad mihaen ko sowal. a Na somowalay ci Yis, o ‘lintad ni Nowa’ ato kataynian ningra a tatokian iraay ko kalecadan, kawrira cowa ka somowal cingra to iraay ko paliˈayaway a tatodong no Lenlen, cowa ka somowal to piˈedef to fawahan no tamina, mitaypiyaway to mamalecad ko mamifekad a demak noikor. Kawrira, mikitini ci Nowaan ato Lenlen a maˈoningay awaay ko mamananam no mita cowa ka saan.
5. (1) ˈAyaw no aira ko Lenlen, midemakay ci Nowa to maanan? (Hipray 11:7; 1 Pitiro 3:20) (2) O mitosilay a tayal no mita ato i lintaday ni Nowa a pitosil iraay ko maanan kalalecadan hani?
5 Matengil ni Nowa ko saparikec ni Yihofa a lihaf i, tangsolay paihkal to nika pakasoˈlin misatapang a misangaˈ to tamina. (ˈOsien ko Hipray 11:7; 1 Pitiro 3:20.) Malecaday, anini o tamdaw pakatengil to ngaˈayay lihaf no Hongti Kitakit i, tatangsol a patoor a dademak. (Dmak 3:17-20) Cowa ko pisangaˈ aca to tamina, ‘mitenakayho to moecelay’ ci Nowa sanay. (2 Pitiro 2:5) Kawra matira to masowalay i fafekang a lalakaw, cowa ka somowal ko Fangcalay Cudad ˈayaw no aira ko Lenlen mitosilan ni Nowa ko kahacecay a tamdaw hokira. Malecaday, anini fanekfekay kita mirienang to mitosilay a demak, misaˈicel a pasowal to ngaˈayay lihaf i kahacecay tamdaw no hekal, nikawrira ano samaanto ko pisaˈicel ita, ˈayaw no aira ko salikoray a romiˈad, awaay ko hapakayraan ita pasowal to ngaˈayay lihaf i kahacecacecay tamdaw alatek. Misamaanay hani?
6-7. ˈAyaw no hakairaan no salikoray romiˈad, cowa ko mamatosil ita ko kahacecay tamdaw, hano saan ko sowal ita? Tadtaden.
6 Haratengen hena, o aniniay lintad mitosilay a demak ita hahakowa ko kataˈangay, paliˈayaway ci Yis pasowal: ‘O ngaˈayay lihaf nonini Hongti Kitakit o tatenaken i polong no hekal, patengilen ko kasakitakit maemin.’ (Matay 24:14) Anini, malaˈosiayto konini sapairasol, mikikakaay to itiyaayho ko nika taˈangay. Tano mataˈlifay to 1,000 a sasowalen a mapatenak konini ngaˈayay lihaf no Hongti Kitakit. Roma i, pakaynien i jw.org wangcan no mita, ˈalomanay tamdaw i paro no kakarayan pakatengilayto tonini ngaˈayay lihaf.
7 Nikawrira, sowal ni Yis, ˈayaw no aira cingra i, o nisawawaan ningra cowa ko mamalahci a mirakat ko ‘polong a niyaroˈ.’ (Matay 10:23; 25:31-33) Tatodong i, ˈayaw no mamisawkit ci Yis i, cowa ko mamatosil ita ko kahacecay a tamdaw. Soˈlinay haw i, itini kaˈoripan no ˈalomanay tamdaw a kilac, o mitosilay a tayal no mita tahacadaay to pakidemay a sakeceng. Roma i, to ehoehon ˈalomanay ko misofocan a wawa. Mihaenay, soˈlin misarocoday kita pasayra i ‘kasakitakit, kasangasaw, sasowalen’ a tamdaw mitosil, kawra ˈayaw no hakairaan no salikoray romiˈad, cowa ko mamatenak ita i kahacecay tamdaw ko ngaˈayay lihaf.—Paˈarawan 14:6.
8. Pakayni to pisawkit ni Yihofa noikor, alatek iraay ko maanan a salicay ita? (Nengnengen ko coka.)
8 Ikor no pisinanot tora fafekangay a lalakaw i, alatek aira ko cecay a salicay ita: Oya ˈayaw no mafekad ko taˈangayay padiing, cowaho pakatengil to ngaˈayay lihaf a tamdaw sasamaanto hani? Ci Yihofa ato minilnilan Ningra a misawkit a tapang ci Yis sasamaan a micada cangranan hani? (Yohani 5:19, 22, 27; Dmak 17:31) O lalangian a sinael nonini lalakaw sanay ko sowal, ci Yihofa ‘cowa ka halamham to sakalaˈafoaw no cecacecay a tamdaw,’ ao halamhamay to ‘papasasiyor ko tamdamdaw maemin.’ (2 Pitiro 3:9; 1 Timoti 2:4) Soˈliˈlin mafanaˈayto kita siniˈadaay ci Yihofa to tamdaw, kawra anini cowa pakafanaˈ ci Yihofa kitanan, sasamaanen Ningra micada koya co:waho pakatengil to ngaˈayay lihaf a tamdaw. Soˈlinay haw i, awaay ko ˈinorong Ningra pasowal kitaanan.
O romaroma tamdaw ˈayaw no taˈangayay padiing cowa pakatengil to ngaˈayay lihaf, sasamaan ci Yihofa micada cangranan hani? (Nengnengen ko saka 8 fatac) c
9. Itini i Fangcalay Cudad pasowalay ci Yihofa mamidemak Cingra to maanan hani?
9 Itini i Fangcalay Cudad, pasowalay ci Yihofa to mamidemak Cingra to pina a demak noikor. Tinakoen, papatikolen Ningra paˈorip ko ‘cowa ka moecel a tamdaw,’ padama to ˈayawho no patay caay pakatengil to ngaˈayay lihaf a tamdaw, makahi a mifalic, wa irato ko hatoki mipiliˈ mihodop Cingranan. (Dmak 24:15; Luka 23:42, 43) Nikawrira, mikidatay konini to romaroma salicay.
10. Alatek iraay ko masamaanay a salicay ita?
10 Itini taˈangayay padiing a tatokian polong mapatayay a tamdaw awaayto ko hatokel patikol maˈorip han? Ihkalay ko Fangcalay Cudad mitadtad, o polong misaˈadaay ci Yihofaan a tamdaw, hanaca itini Armakiton o mapalaˈafoay ni Yihofa ato coyoh a tamdaw, cowato ko papatikol maˈorip. (2 Tisalonika 1:6-10) Kawra o romaroma mapatayay itini taˈangayay padiing a tamdaw sasamaanto hani? Tinakoen, oya mapatayay i adada, malitengayto anca talifahal sanay mapatay, anca mipatayan no tao a tamdaw. (Patnakay 9:11; Cikariya 14:13) Ilalomaˈ nangra a papinapina tamdaw masaˈosiayto o ‘caay ka moecel a tamdaw,’ noikor itini faelohay hekal papatikol maˈorip han? Caay ka fanaˈ kita.
O MAANAN KO KAFANAˈAN ITA
11. Itini Armakiton, misalalangiay ci Kristo to maanan a misawkit to tamdaw?
11 Pakayni noikoran, mafanaˈay kita to pina a demak. Tinakoen, mafanaˈay kita itini Armakiton, misawkit ci Kristo i, misalalangiay to samaanay ko picada nonini tamdaw to salikaka ni Kristo. (Matay 25:40) Oya midamaay ci Kristoan ato salikaka ni Kristo a tamdaw masaˈosiayto o ‘lopayˈay a siri’ cangra. Mafanaˈayho kita, misatapangto ko taˈangayay padiing i, iraay ko papinapina salikaka ni Kristo maˈoripayho i hekal, ˈayaw no mamafekad ko Armakiton i, o mamacadato cangra tayra i kakarayan. Ano kamayanho i hekal ko salikaka ni Kristo i, o misasoˈlinay ko falocoˈ a tamdaw iraayho ko hatoki a midama cangranan ato tayal nangra. (Matay 25:31, 32; Paˈarawan 12:17) Mafanaˈ tonini a demak misamaanay hano tada masakalimlaan hani?
12-13. O romaroma tamdaw maˈaraw ko nika laˈafo no ‘Taˈangayay Papilon,’ sasamaan ko piharateng nangra alatek? (Nengnengen ko coka.)
12 Misatapang ko taˈangayay padiing ikor, maˈaraw no roma tamdaw malaˈafo ko ‘Taˈangayay Papilon,’ alatek mamaharateng nangra to hati:niay paliˈayaway pasowal ko Misawacayay Tamdaw ni Yihofa tonini demak. Papakasoˈlinto cangra ci Yihofaan hokira?—Paˈarawan 17:5; Icikil 33:33.
13 Ano hatiraay i, o pakayraan mamalecad to i lintaday ni Mosi a pakayraan. Masadak ko Israil nai Icip i, ‘iraay ko taˈangayay ˈopo ˈalafang a tamdaw’ kalacafayay cangranan a miliyas. Ilalomaˈ nangra pinapina tamdaw, na pakaˈaraway to pifekad no paliˈayawan ni Mosi a Moetep Pades alatek, ngaˈ pakasoˈlinayto ci Yihofaan. (Kasadakan 12:38) Mapalaˈafoto ko ‘Taˈangayay a Papilon’ ikor ano mifekad ko malecaday a demak i, sasamaan ko piharateng ita hani? ˈAyaw no mamafekad ko Armakiton, maˈaraw ko satapang sanayho mikihatiya kitaanan midoko ci Yihofaan a tamdaw, ˈarawhan ngaˈay cangra micomod i faelohay hekal i, cowa ka sadafdaf wa saan kita miharateng tonini a demak han? Caay ko mamahaen! Samanen sapitodongaw kita to kakarayan Wama ci Yihofa, o ‘sidaˈitay siniˈadaay to tamdaw a Kawas Cingra, caay ka ranikay a mangolaw, iraay ko madimadiay a olah, soˈlinay ngaˈayay tiˈeren’ a Kawas Cingra. b—Kasadakan 34:6.
O romaroma tamdaw maˈaraw ko nika laˈafo no ‘Taˈangayay Papilon’ i, mamaharateng nangra to halafinayto mihecaan paliˈayaw pasowal ko Misawacayay Tamdaw ni Yihofa tonini a demak (Nengnengen ko saka 12-13 fatac) d
14-15. Ano misaˈosi to aira ko hatokel no tamdaw midaˈoc a maˈorip hokira, ihacowaay tatokian mapatay cingra, anca icowaay ko kaˈoripan ningra ko piˈarawan han? Tadtaden. (ˈOlic 33:4, 5)
14 Alatek tahatengilayto kita, pakayni i caay pihakelong a salawina somowalay ko salikaka, “Nanay ˈayaw no taˈangayay padiing mapatay ko ngaˈay, mihaen i, ngangaˈayto cingra patikol maˈorip.” O mahaenay a sowal mikitiniay i ngaˈayay a harateng. Nikawrira, o aira ko hatokel no tamdaw midaˈoc a maˈorip hokira, cowa ko ihacowaay mapatay cingra ko nika pisaˈosi. Ci Yihofa malefotay a Misawkitay a Tapang, o sasawkit Ningra sahtoay o masadafdafay o moecelay. (ˈOsien ko ˈOlic 33:4, 5.) Ngaˈayay pakasoˈlinen ita, o ‘Misawkitay to polong no hekal a Tatapangan,’ o misaˈosian Ningra sahtoay o matatodongay.—Satapangan 18:25.
15 Roma i, aira ko hatokel no tamdaw midaˈoc a maˈorip hokira, cowa ko icowaay kitiraan ko kaˈoripan ningra ko pisaˈosi. Soˈlinay haw i, itini i romaroma kilac, ˈalomanay tamdaw co:waho pakatengil to ngaˈayay lihaf no Hongti Kitakit, ci Yihofa cowa ko papakayni to itiraay a kilac cangra a misaˈosi tono ‘lotok a siri’ cangra. (Matay 25:46) O ‘Misawkitay to polong a hekal a Tatapangan’ o moecelay, maedeng ikakaay kitaanan ko kaciharateng Ningra to itiraay a tamdaw. Cowa ka fanaˈ kita itini taˈangayay padiing a tatokian, sasamaan ci Yihofa mikayat to nika lingad no demak, alatek o romaroma co:waho pakatengil to ngaˈayay lihaf a tamdaw, itiyato i, wa irato ko hatoki mafanaˈ ci Yihofaan, mihakelong Cingranan, hanaca ano mapatalahkalto ko fangcalay ngangan ni Yihofa i, mamipiliˈ cingra a midama to Kawas.—Icikil 38:16.
Mafekadto ko taˈangayay padiing ikor, o romaroma tamdaw maˈaraw ko mafekaday a demak, mamisatapang pakasoˈlin ci Yihofaan han?
16. Pakayni ci Yihofaan mafanaˈay kita to maanan? (Nengnengen ko coka.)
16 Mikitini Fangcalay Cudad mananamay ita, tada misalimlaay ci Yihofa to ˈorip no tamdaw, hanaca hayi sanay kinafalah to ˈorip no kanonoˈan Wawa Ningra, to hasaka iraaw no hatokel no polong a tamdaw midaˈoc a maˈorip. (Yohani 3:16) Kita maemin matinakoayto ko siniˈada ni Yihofa! (Isaya 49:15) Mafanaˈay Cingra to ngangan no kahacecay tamdaw, cipinangay to kihcod no mita. Soˈlinto mapatay kita, o ngangaˈay Cingra paˈorip kitaanan, patikolen Ningra ko kihcod a pinangan ato niharatengan ita. (Matay 10:29-31) O ciolahay a Wama ita ci Yihofa mafanaˈay to kihcod, masadafdafay ko pidemak, matomesay ko siniˈada. Ngangaˈay pakasoˈlinen ita to malefotay ko pisawkit Ningra to kahacecay tamdaw.—Yakop 2:13.
Ci Yihofa mafanaˈay to kihcod, masadafdafay ko pidemak, matomesay ko siniˈada. Ngangaˈay pakasoˈlinen ita to malefotay ko pisawkit Ningra to kahacecay tamdaw (Nengnengen ko saka 16 fatac)
17. Dotoc a lalakaw mamilengo to maanan?
17 Cipinangayto kita to misalofan a faelohay pitadtad, mamitienec to macalohay harateng mitosil i tamdaw. Misamaanay hani? O manan ko papakalalok kitaanan mikiemel a padadotoc mitenak to ngaˈayay lihaf i tamdaw hani? Ilaenoay a lalakaw mamisongilaˈ milengo tonini a salicay.
RADIW 76 Mahemekay Mitosil
a Sakafanaˈaw hano salofen niyam konini a sapitadtad, nengnengen ko Mikecolay Saka 3 Folad 15, 2015, saka 7-11 fiedac, “O Kahemekan Iso a Pidemak Konini.”
b Mapalaˈafoto ko Taˈangayay Papilon i, polong finawlan ni Yihofa aitini piˈodis no Makok a Kok a mapalifet. Oya mapalaˈafoto ko Taˈangayay Papilon ikor, mikihatiyaay to finawlan ni Yihofa a tamdaw mamapalifet cangra.
c TATODONG NO COKA: Onini tolo a coka paihkalay, misamaanay hano ira ko cowa pakatengil to mitenakan ita i polong no hekal a ngaˈayay lihaf: (1) O kaˈoripan no cecay fafahiyan a kitiraan, o itiraay a kalodoyongan taˈangayay ko piˈemet to finawlan ningra, mitosilay a tayal tada katalawanto, (2) o kaitiraan a kilac no cecay mararamoday, mikecengay ko sifo to mitosilay demak ita, mitosil ko salikaka itira tada katalawan, (3) o cecay faˈinayan itiniay i mara:ayay a pala ko aroˈ, cowa ka ngaˈay tayra ko salikaka a mitosil.
d TATODONG NO COKA: O cecay na miliyasay to soˈlinay kimad a kaemangay fafahiyan maharatengay ko mananamay ningra to mamalaˈafo ko ‘Taˈangayay Papilon.’ Saka misetekay to falocoˈ cingra miliyaw midoko ci Yihofaan, halo minokay tayni i tatihi no Krisciyang a wama wina. Ano ira ko mahaenay a demak mifekad i, tatodongen ita ko kakarayan a Wama ci Yihofa patalahkal to siniˈadaay a falocoˈ, mahemeken to nika pasasiyor no mararaway a tamdaw.
