YIGIL 19
HIÉMBI 22 Ane i ngwéé i ngii: Di mbat le i lo!
Kii di nyi inyu bikééhene Yéhôva a ga lona?
“Yéhôva . . . a nsômbôl bé le mut nye ki nye a tjiba.”—2 PÉTRÔ 3:9.
NLÔM JAM
Di nla ba nkwoog nkaa le i ngéda Yéhôva a ga kéés bôt i dilo di nlo, a ga boñ mam ni telepsép, ni i nya i kôli.
1. Inyuki di nla kal le i ngéda di niñil i yé tôbôtôbô?
I NGÉDA di niñil i yé tôbôtôbô! Hiki kel, di ntehe mbañ i Bibel i nyon i mis més. Kiki hihéga, di ntehe “kiñe ñombok” ni “kiñe nwelmbok” bi njo inyu yi njee a ga kena nkoñ ’isi. (Daniel 11:40) Di ntehe ñañ nlam u ñañlana i likala li mbuma ñañ, didun di bôt di nlo i gwélél Yéhôva. (Yésaya 60:22; Matéô 24:14) Di nkôs yak ngandak bijek bi mbuu i “loñge ngéda.”—Matéô 24:45-47.
2. Di nla ba nkwoog nkaa ni kii, ndi kii di nlama yi?
2 Yéhôva a nke ni bisu i hôla bés i bana nogna ilam i mam ma nlôôha nseñ ma ma ga bôña i dilo di nlo. (Bingéngén 4:18; Daniel 2:28) Di nla ba nkwoog nkaa le ilole njiiha ikeñi i mbôdôl, di ga yi mam momasôna ma ga béda le di yi inyu hônba ikepam lisuk ni tééda adna yés mu i béba ngéda i. Ndi, di nlama neebe le di nyi bé ngim mam mu mam ma ga bôña. Munu yigil ini, di ga tehe ndugi inyuki di nlona mahéñha mu yom di bi bôk di kal inyu ngim mam i i ga bôña i dilo di nlo. I mbus, di ga sima mam mahogi ma di nyi mu mam ma ga bôña, ni kii Tata wés nungingii a ga boñ.
I JAM DI NYI BÉ
3. Kii di bi bôk di niiga inyu bôt ba ba ga yéñ jôp i ntôñ u Yéhôva mamélél ma nkoñ ’isi, kii i bé tinde bés i hoñol hala?
3 I ngéda kôba, di bi kal le i ngeñ njiiha ikeñi i ga bôdôl, mut nye ki nye nu a nhémle bé Yéhôva a ga la ha bé bana pôla i hémle nye ni i pei i Armagédôn. Di bi kal hala inyule di bé hoñol le ñañ u Ntida malép u ga bana biyôñôl bipe dilo di nlo. Di bé hoñol le nlélém kiki Yéhôva a bi yip nwemel u nkuu ilole Ntida malép u mbôdôl, a ga ‘yip nwemel’ u nkoñ ’isi u Satan unu, kayéle mut nye ki nye a ga la ha bé pei i ngéda njiiha ikeñi y’a bôdôl.—Matéô 24:37-39.
4. Baa di ngi hoñlak le ñañ u Ntida malép u nlama bana biyônôl bipe ikété disii di mam i ngéda yés? Toñol.
4 Baa di kôli hoñol le hiki jam li bi tagbe i Ntida malép, li yé titii i ngim jam i ga bôña dilo di nlo? Ndimbhe i yé le, heni. Inyuki? Inyule homa nye kiki nye ikété Bibel a nkal bé hala. a Yésu a bi hégha “dilo di Nôa” ni i ngéda a’ ba ha, ndi a bé sômbôl bé kal le hiki mut tole hiki jam li mpôda mu ñañ u Ntida malép, li bé lama bana ngim binyônôl dilo di nlo. Hala a yé nlélém inyu manwemel ma nkuu, a kal bé yom mu. Ndi hala a ngwés bé kal le di nla bé ôt biniigana mu ñañ u Nôa ni u Ntida malép.
5. (a) Kii Nôa a bé boñ ilole Ntida malép u nlo? (Lôk Héber 11:7; 1 Pétrô 3:20.) (b) Inyu nson likalô, lelaa i mam ma mbôña i len ini ma mpôna ma ma bé i dilo di Nôa?
5 I ngéda Nôa a bi nok Yéhôva a nkal le a ntjé hisi ni Ntida malép, a bi unda le a nhémle i jam li mu kiki a oñ nkuu. (Añ Lôk Héber 11:7; 1 Pétrô 3:20.) Nlélém jam i len ini, i bet ba ñemble ñañ nlam u Ane, ba nlama unda le ba nhémle wo. (Minson mi baôma 3:17-20) Pétrô a sébél Nôa le “ñañal telepsép.” (2 Pétrô 2:5) Kiki di ntehe i yigil i ntagbe, di nyi bé too Nôa a bi pam i tééne i bôt bobasôna ba bé niñ hana ’isi likalô ilole Ntida malép u mbôdôl. Yak i len ini di nyoñ ngaba i soso hônd likalô, di mboñ ki kii yosôna di nla inyu tééne bôt ba nkoñ ’isi wonsôna likalô. Ndi to di mboñ biliya lelaa, di ta bé le di pam i añle hiki mut hana nkoñ ’isi ñañ nlam ilole lisuk li nlo. Inyuki di nkal hala?
6-7. Inyuki di nkal le di ga la bé añle hiki mut hana nkoñ ’isi ñañ nlam ilole lisuk li nlo? Toñol.
6 Di tehe i yom Yésu a bi kal inyu bikeñi bi nson likalô i ngéda yés. A kal i bisu bi ngéda le, ñañ nlam u Ane w’a añlana “ni nkoñ ’isi wonsôna, i ba biloñ gwobisôna mbôgi.” (Matéô 24:14) I mbañ i, i nyon i len ini iloo i ngéda kôba. Ñ, ñañ nlam u ñañlana len ikété iloo 1 000 dilémb, ni njel site yés jw.org, libim li bôt i nkoñ ’isi li nla jôp i site i.
7 Ndi Yésu a bi kal banigil bé le, b’a “mal yaga bé kiiña mu bitison bi Israel gwobisôna,” tole b’a mal bé tééne bôt bobasôna likalô ilole a nlo. (Matéô 10:23; 25:31-33) I yom Yésu a kal bo, i yé maliga yak i len ini. Didun di bôt di niñ i het di gwé bé kunde yo ki yo i téé likalô. U héya hala, ngandak bon i ngwéé hiki linut i nkoñ ’isi. Di mboñ kii yosôna di nla inyu añle bôt ba “hiki loñ, hiki litén, ni hiki hilémb” likalô. (Masoola 14:6) Ndi maliga ma yé le, di ga la bé añle hiki mut ñañ nlam hana ’isi ilole lisuk li nlo.
8. Imbe mbadga di nla badba inyu bikééhene Yéhôva a ga lona dilo di nlo? (Béñge yak titii.)
8 I ngéda di ntehe i yom di ma nigil ipam hana likala lini, di nla badba le: Kii i ga pémél i bôt b’a bana bé nsima i emble ñañ nlam ilole njiiha ikeñi i mbôdôl? Yéhôva bo Man wé nu a nti nson i kéés bôt ba ga boñ lelaa ni bo? (Yôhanes 5:19, 22, 27; Minson mi baôma 17:31) I pes kaat i ñéga i yigil ini i nkal le Yéhôva “a nsômbôl bé le mut nye ki nye a tjiba.” Ndi a nsômbôl le “bôt bobasôna ba pam i hiel miñem.” (2 Pétrô 3:9; 1 Timôtéô 2:4) Tolakii di nyi hala, Yéhôva a yé ngi kal bés lelaa a’ kéés i bôt b’a bana bé pôla i emble ñañ nlam. A ta bé to nyégsaga i kal bés i yom a ma boñ, tole a ga boñ.
Kii Yéhôva a ga boñ ni i bôt ba ba bi bana bé nsima i emble ñañ nlam ilole njiiha ikeñi mbôdôl? (Béñge liben 8) c
9. Kii Yéhôva a nyeelene bés ikété Bibel?
9 Mu bañga yé, Yéhôva a nyeelene bés ngim mam. Kiki hihéga, Bibel i nkal le Yéhôva a ga témbna “bôt ba téé bé sép” i niñ, i bet ba bi bana bé pôla i emble ñañ nlam inyu lona mahéñha i niñ yap. (Minson mi baôma 24:15; Lukas 23:42, 43) Hala a nsuu mambadga mape.
10. Mambe mambadga mape di nla badba?
10 Baa i bôt bobasôna b’a wo i njiiha ikeñi, ba ga bana bé botñem i bitugne? Bibel i ntibil toñol le i bôt ba ñoo Yéhôva, ba Yéhôva ni mintôñ nwé mi gwét ba ga tjé i Armagédôn, ba ga lo bé bitugne. (2 Tésalônika 1:6-10) Ndi mam ma ga ba lelaa inyu i bôt ba ga wo mu ngéda i, inyule ba bé kon, inyule bikuu bi bi kwél bo, ba bôt ba bi nol, tole mpuhge jam u bi pémél, ba wo? (Ñañal 9:11; Sakaria 14:13) Baa bôt bahogi mu ba yé le ba ba i nsoñgi u bôt ba téé bé sép b’a lo bitugne i mbok yondo? I pot maliga, di nyi bé.
I JAM DI NYI
11. I Armagédôn kii i ga hôla i yimbe i bet ba yé mintômba?
11 Di nyi ngandak mam i i ga bôña dilo di nlo. Kiki hihéga, di nyi le ba ga kéés bôt inoñnaga ni maboñok map ipañ lôk kéé i Kristô. (Matéô 25:40) I bet ba bi nit Kristô ni minhook bon ba ga ba mintômba. Di nyi ki le lôk kéé i Kristô ihogi i mba i ngi yii hana ’isi i ngéda njiiha ikeñi i mbôdôl, ba ga bet i ngii ndék ngéda ilole gwét bi Armagédôn bi mbôô. Ntel ngéda wonsôna minhook mi ga ba hana ’isi, bôt ba miñem minlam ba ga bana pôla i unda le ba nit nwo, ba nidik ki nson ba ngwel. (Matéô 25:31, 32; Masoola 12:17) Inyuki i yé nseñ i yi i mam ma?
12-13. Kii bôt bahogi ba ga boñ i mbus le ba ga tehe tjiba i “Babilôn Nunkeñi”? (Béñge yak bititii.)
12 I nla pam le yak i mbus le njiiha ikeñi i mbôdôl, bôt bahogi ba ba ga tehe tjiba i “Babilôn Nunkeñi,” ba ga bigda le Mbôgi Yéhôva i bi bôdôl pôdôl i jam li behee. Baa ngim bôt i i ga tehe mam ma, i ga hiel ñem?—Masoola 17:5; Ézékiel 33:33.
13 Nlélém jam won u bôña i Égiptô dilo di Môsi. Bigda le “limut li bôt likeñi li mintén mi bôt nwominsôna” li bi nyodi i Égiptô ni bon ba Israel. Bebek le ba bi bôdôl hémle Yéhôva i ngéda ba bi tehe le i mam Môsi a bi kal inyu jôm li dimala ma bi yon. (Manyodi 12:38) Ibale nlélém jam u mbôña i ngéda Babilôn Nunkeñi a ga tjiba, baa hala a ga tééñga bés i tehe bôt bape ba nkôndba i nsoñgi u bagwélél ba Yéhôva ilole lisuk li nlo? To jam! Di gwé ngôñ i kôna bilem bi Tata wés nungingii, “Nyambe nu konangoo ni nu ñem ngôô, nu a mpala bé unup, nu a ntéñbe ki i unda ngandak gwéha ni maliga.” b—Manyodi 34:6.
Bôt Bahogi ba ba ga tehe tjiba i “Babilôn Nunkeñi,” ba ga bigda le i mam mana mon Mbôgi Yéhôva i bi kal (Béñge maben 12-13) d
14-15. Baa inyu lona mut bitugne, Nyambe a’ béñge i ngéda a bi wo tole i het a bé a niñ? Toñol. (Tjémbi 33:4, 5)
14 Ngim mangéda di yé di nok bôt bahogi ba nkal le: “Nseñ mut wem lihaa a wo ilole njiiha ikeñi i mbôdôl, kayéle a bana botñem i bitugne.” Di nyi le mahoñol malam mon ma ntinde bés i pot hala. Ndi inyu ti mut niñ boga, Yéhôva a béñge bé imbe ngéda i mut nu a bi wo. Yéhôva a yé Nkéés nu a yé peles, makidik mé ma téé sép ngéda yosôna. (Añ Tjémbi 33:4, 5.) Di nla ba nkwoog nkaa le, “Nkéés nu hisi hiosôna” a ga boñ jam li téé sép.—Bibôdle 18:25.
15 Di kôli hoñol le Yéhôva a gwé bé ngôñ i béñge i het mut a niñik inyu ti nye niñ boga. I ngéda di mbigda njee Yéhôva a yé, di ta bé le di hégda nye a nkit ndik le didun di bôt di yé “minya mi kembee,” inyule di niñik i biloñ i het pôla i bé bé i emble ñañ nlam. (Matéô 25:46) Nkéés nu hisi hiosôna nu a téé sép a ntôñ i bôt ba bobasôna iloo kiki di yé le di boñ. Di nyi bé lelaa Yéhôva a ga kena mam i njiiha ikeñi. I nene le ngim bôt mu nsoñgi wap, i ga bana pôla i nigil njee a yé Yéhôva, i hémle nye, ni i tagbe i pes yé i ngéda a ga lo i pubus jôl jé biloñ gwobisôna bi tehge.—Ézékiel 38:16.
I mbus le njiiha ikeñi i mbôdôl, . . . baa ngim bôt i i ga tehe i mam ma, i ga la hiel ñem?
16. Kii di mpam i yi inyu Yéhôva? (Béñge yak titii.)
16 Yigil yés i Bibel i niiga bés le, Yéhôva a nlôôha gwés bôt ba binam. A bi ti Man wé kiki sesema inyu ti bésbobasôna botñem i niñ i boga ni boga. (Yôhanes 3:16) Ñ, bésbobasôna di nôgda toi le Yéhôva a yôni ni ñem gwéha. (Yésaya 49:15) A nyi hiki wada wés ni jôl jé. I maliga, a nyi bés loñge loñge i nya i yé le, to di nwo, a nla tiimba hek bés ni i mam momasôna di ban-ga ilole di nwo! (Matéô 10:29-31) Ntiik, di nla ba nkwoog nkaa le Tata wés nu gwéha a ga kéés hiki mut i nya i téé sép, lôñni konangoo.—Yakôbô 2:13.
Di yé nkwoog nkaa le Yéhôva a ga kéés hiki mut Lôñni telepsép, ni konangoo. (Béñge liben 16)
17. Kii di ga tehe i yigil i noñ?
17 Biniigana bi mondo bini, bi nhôla bés i nok le nson wés u likalô u nlôôha nseñ i len ini iloo i ngéda kôba. Inyuki? Kii i ntinde bés i ke ni bisu i añal ñañ nlam ni makénd? Di ga timbhe mambadga ma momasôna i yigil i noñ.
HIÉMBI 76 Kii u nôgda mu ñem?
a Inyu nok inyuki di nhéñha nogna yés, béñge Nkum Ntat nu 15 Matumb, 2015, mapep 7-11, i yigil i i gwé ño le “Tu as trouvé bon d’agir ainsi.”
b I mbus le Babilôn Nunkeñi a ga tjiba, bagwélél ba Yéhôva bobasôna ba ga nok ndutu ngandak i ngéda Gôg nu Magôg a ga leñ bo gwét. Yak bôt bape ba ba ga yoñ pes i bagwélél ba Yéhôva i mbus tjiba i Babilôn Nunkeñi, ba ga kôs ndutu ngandak.
c NDOÑI BITITII: Bititii biaa bini, bi ñunda inyuki ngim bôt i ba ngi nok ñañ nlam: (1) Muda wada a niñ i homa base i ñume bé le mut a emble biniigana bipe, (2) babiina ba niñ i het mam ma m’bô ma ñume bé le bôt ba emble ñañ nlam, u noode ba nla yak nol we ni (3) mut wada nu a nlôôha niñ haa ni batéé likalô.
d NDOÑI BITITII: Mañge muda nu a bi ke haa ni maliga a yé bigda i mam a bi nigil inyu tjiba i “Babilôn Nunkeñi.” Hala a ntihba nye, a témb yak bagwal bé ba ba yé bikristen. Ibale i nya mam i i mbôña, ngôñ yés i yé le di kôna Tata wés nungingii nu a yé konangoo, nyonok ni ñem ngôô, inyule a nkon maséé i tehe mboñbéba a nhiel ñem.
