PARSIAJARAN 19
ENDE 22 Tangiakkon ma Asa Ro Harajaonna
Songon dia do Cara ni Jahowa Manguhumi Akka Halak Saleleng Hasusaan Bolon?
‘Dang lomo roha ni Jahowa diripasson manang ise pe.’—2 PTR. 3:9.
NA LAO DIBAHAS
Boi do pos rohatta pasti sittong jala adil do annon cara ni Jahowa manguhumi akka halak saleleng hasusaan bolon.
1. Akka surirang ni Bibel na dia do na saut di jamanta saonari?
PASTI las do rohatta ala boi mangida saut surirang ni Bibel di jamanta saonari. Contohna, boi do taida songon dia “Raja Utara” dohot “Raja Selatan” bersaing ala naeng menguasai portibi on. (Dan. 11:40) Boi do tong taida songon dia barita na uli taringot Harajaon ni Debata dibaritahon sahat tu saluhut portibi on. Jala adong marjuta halak na mamillit gabe naposo ni Jahowa. (Jes. 60:22; Mat. 24:14) Asing ni i godang do tadapot akka publikasi, tudu-tudu, dohot parpunguan na pas “di tikkina”.—Mat. 24:45-47.
2. Aha do na pasti diulahon Jahowa tu naposona di ari na naeng ro? Alai aha ma na ikkon tasadari?
2 Sai diurupi Jahowa do hita asa lam mangattusi akka peristiwa na lao masa haduan. (Poda 4:18; Dan. 2:28) Boi do pos rohatta tikki dimulai hasusaan bolon, taboto annon sude na porlu botootta. Gabe boi ma hita toktong setia tu Jahowa jala marsada dohot akka dongan saleleng hasusaan bolon i. Alai saonari, ikkon tasadari do adong na so taboto taringot ari na naeng ro. Di artikel on, lao tabahas ma boasa ikkon tapadenggan pangattusionta taringot aha na lao masa di ari na naeng ro. Dung i lao tabahas ma, aha na taboto taringot na lao masa di ari na naeng ro jala songon dia annon cara ni Jahowa manguhumi akka halak.
NA SO TABOTO
3. Najolo, songon dia do pangattusionta taringot na lao masa tu akka halak na so porsea tikki hasusaan bolon? Jala boasa tadok songon i?
3 Najolo tadok do, tikki mulai hasusaan bolon dang adong be kesempatan tu akka halak na so porsea lao marpihak tu Jahowa jala dipalua sian Armagedon. Tadok pe songon i alana tarippu akka na masa tikki Aek na Sumar gabe gombaran do tu na lao masa di ari na naeng ro. Contohna, najolo tadok do dung ditutup Jahowa pintu ni parau i, dang adong be na boi masuk tusi. Dos songon i ma ninna rohatta tikki dimulai hasusaan bolon, hira na ditutup Jahowa ma kesempatan tu akka halak na so porsea lao marpihak tu Ibana jala dipalua.—Mat. 24:37-39.
4. Boasa dang boi be tadok akka na masa tikki Aek na Sumar gabe gombaran tu na lao masa di ari na naeng ro? Patorang ma.
4 Boi do tadok akka na masa tikki Aek na Sumar gabe gombaran tu na lao masa di ari na naeng ro? Daong. Boasa? Alana dang adong dipaboa di Bibel songon i. a Memang dipatudos Jesus do akka na masa tikki haroroanna songon na masa “di tikki ni si Noak”. Alai dang adong didok Jesus, tikki ditutup Jahowa pintu ni parau i dohot akka na masa tikki Aek na Sumar, gabe gombaran do i tu na lao masa di ari na naeng ro. Nang pe songon i, dang berarti dang adong parsiajaran na boi tadapot sian pengalaman ni si Noak dohot na masa tikki Aek na Sumar.
5. (a) Songon dia do si Noak patuduhon haporseaonna? (Heber 11:7; 1 Petrus 3:20) (b) Taringot ulaon marbarita, aha do persamaan ni jamanta saonari tu jaman ni si Noak?
5 Tikki dibege si Noak barita panguhuman sian Debata, dibangun ibana do parau lao patuduhon haporseaonna. (Jaha Heber 11:7; 1 Petrus 3:20.) Dos songon i ma nian akka halak na mambege barita na uli taringot Harajaon ni Debata. Ikkon diulahon nasida do aha na diparsiajari nasida lao mambuktihon na porsea nasida tu Jahowa. (Ul. 3:17-20) Memang, didok si Petrus do molo si Noak, “sahalak parbarita na paboahon dalan ni Debata na sittong”. (2 Ptr. 2:5) Alai songon na tabahas di artikel sebelumna, dang adong didok di Bibel nungnga marbarita ibana tu ganup halak di tano on andorang so masa Aek na Sumar. Saonari pe, marsitutu do hita marbarita tu akka halak di portibi on. Alai manang songon dia pe upayatta, dang mungkin boi hita marbarita tu tiap halak andorang so ro Armagedon. Boasa tadok songon i?
6-7. Boasa tadok dang mungkin boi hita marbarita tu tiap halak andorang so ro Armagedon? Patorang ma.
6 Taingot ma aha na didok Jesus taringot ulaon marbarita. Didok ibana, lao dibaritahon ma barita na uli taringot tu Harajaon i “di liat portibi on”. (Mat. 24:14) Saut do surirang on di jamanta saonari. Alana nungnga diterjemahon barita Harajaon on tu lobi sian 1.000 bahasa. Jala ala nungnga dibahen situs jw.org, saonari gabe lam godang ma halak na boi mamboto barita na uli taringot Harajaon ni Debata.
7 Alai didok Jesus do muse tu akka siseanna, “Dang na tardalani hamu sude kota di Israel sahat tu na ro Anak ni jolma i.” (Mat. 10:23; 25:31-33) Lapatanna, dang mungkin boi akka siseanna marbarita tu tiap halak sahat tu na ro muse ibana. Tutu do hata ni Jesus i. Alana godang do halak saonari na tinggal di daerah na mangorai ulaonta marbarita. Ditamba muse, godang do poso-poso na tubu tiap menit. Jadi nang pe nungnga marsitutu hita marbarita tu saluhut bangso, marga, dohot bahasa, alai dang mungkin boi hita marbarita tu tiap halak andorang so ro Armagedon.—Pgk. 14:6.
8. Sukkun-sukkun aha do na gabe ro tu pikkiranta taringot cara ni Jahowa manguhumi halak di ari na naeng ro? (Ida gambar.)
8 Gabe sukkun-sukkun ma rohatta: Songon dia do annon akka halak na so sanga mambege barita na uli andorang so dimulai hasusaan bolon? Boha do cara ni Jahowa dohot Jesus manguhumi nasida? (Joh. 5:19, 22, 27; Ul. 17:31) Ayat tema ni artikel on mandok, ‘dang lomo roha ni Jahowa diripasson manang ise pe’. Gariada lomo do rohana “sude jolma marhamubaon”. (2 Ptr. 3:9; 1 Tim. 2:4) Alai ikkon tasadari do, dang dipaboa Jahowa dope songon dia annon Ibana manguhumi akka halak na so sanga mambege barita na uli. Jala dang wajib dipaboa Jahowa tu hita akka naung diulahon Ibana dohot na lao diulahon Ibana.
Songon dia do annon Jahowa manguhumi akka halak na so sanga mambege barita na uli andorang so dimulai hasusaan bolon? (Ida paragraf 8) c
9. Aha do na dipaboa Jahowa di Bibel?
9 Di Bibel dipaboa Jahowa do piga-piga na lao diulahon Ibana. Contohna, na lao dipahehe Ibana do “halak na jahat”, i ma akka halak na so sanga dope mambege barita na uli jala bertobat. (Ul. 24:15; Luk. 23:42, 43) Alai gabe tubu ma muse sukkun-sukkun na asing.
10. Sukkun-sukkun aha ma muse na ro tu pikkiranta?
10 Songon dia do akka halak na mate saleleng hasusaan bolon, dipahehe do annon nasida? Takkas do dipaboa di Bibel, na lao dihancurhon Jahowa do akka halak na mangalo Ibana dohot akka tentarana. (2 Tes. 1:6-10) Alai boha ma na asing? Misalna halak na mate saleleng hasusaan bolon ala matua, marsahit, na mate alani kecelakaan, manang na dibunu. (Pjm. 9:11; Sak. 14:13) Termasuk do nasida akka halak na jahat na lao dipahehe di tano na imbaru? Dang taboto dope.
NA TABOTO
11. Berdasarhon aha do akka halak diuhumi Jesus?
11 Adong piga-piga na taboto taringot akka na lao masa di ari na naeng ro. Contohna, taboto do lao diuhumi Jesus do akka halak hombar tu na binahen ni nasida tu haha anggina. (Mat. 25:40) Lao dipatudu akka halak na marroha songon biru-biru do, na didukung nasida Kristus dohot akka halak na miniahan. Jala taboto do, adong piga-piga sian haha anggi ni Kristus i na toktong dope di tano on dung dimulai hasusaan bolon. Jala lao nakkok nama nasida tu surgo dang leleng andorang so dimulai porang Armagedon. Jadi, saleleng di tano on dope haha anggi ni Kristus i, adong dope kesempatan di akka halak na marroha songon biru-biru i lao mangurupi nasida mangulahon tugasna. (Mat. 25:31, 32; Pgk. 12:17) Boasa penting taboto on?
12-13. Boha do hira-hira tanggapan ni piga-piga halak dung mangida “Babel na Balga” dihancurhon? (Ida gambar.)
12 Tikki dimulai hasusaan bolon, idaon ni akka halak ma “Babel na Balga” dihancurhon. Olo do ra gabe disadari piga-piga halak na tutu do na didok Saksi Jahowa taringot i saleleng on. Gabe marpihak do annon nasida tu Jahowa ala mangida i?—Pgk. 17:5; Hes. 33:33.
13 Molo songon i do annon na masa gabe sarupa ma situasina songon akka halak di jaman ni si Musa. Di tikki i, “godang do akka halak na sian bangso na asing” mangihutton halak Israel kaluar sian Mesir. (2 Mus. 12:38) Olo do ra piga-piga sian nasida gabe porsea tu Jahowa dung mangida saut na didok si Musa taringot Sappulu Tulah. Tabayakkon ma molo songon i situasina dung dihancurhon Babel na Balga. Gabe jut do rohatta molo adong na boi masuk tu tano na imbaru, hape baru dope nasida marpihak tu Jahowa dang leleng andorang so Armagedon? Unang ma songon i hita. Alai tatiru ma Debata Jahowa ‘na burju, parasi roha, lambat tarrimas, jala gok holong ni roha dohot hasittongan’. b—2 Mus. 34:6.
Idaon ni akka halak ma “Babel na Balga” dihancurhon. Olo do ra gabe disadari piga-piga halak, tutu do na didok Saksi Jahowa taringot i saleleng on (Ida paragraf 12-13) d
14-15. Boasa harapan ni sasahalak lao mangolu salelengna dang bergantung tikki sadihari ibana mate manang didia ibana tinggal? Patorang ma. (Psalmen 33:4, 5)
14 Taringot keluarga na so Saksi naung mate, hea do ra tabege halak mandok, “Tuani ma nungnga mate ibana andorang so hasusaan bolon, alana adong dope harapan di ibana lao dipahehe.” Denggan do ra maksudna mandok songon i. Alai, harapan ni sasahalak lao dipahehe dang bergantung tikki sadihari ibana mate. Taingot ma, Hakim na sempurna do Jahowa. Pasti sittong jala adil do keputusanna. (Jaha Psalmen 33:4, 5.) Jadi, pos ma rohatta sittong do na binahen ni “Hakim ni saluhut tano on”.—1 Mus. 18:25.
15 Alani i, masuk akkal do tong molo tadok harapan ni sasahalak lao mangolu salelengna dang bergantung didia ibana tinggal. Dang mungkin pittor diuhumi Jahowa marjuta halak gabe “hambing” holan ala tinggal nasida di negara na mangorai ulaonta marbarita. Alana, dang hea dibege nasida barita na uli. (Mat. 25:46) Umbalga do holong ni roha ni Jahowa tu nasida sian holong ni rohatta tu nasida. Dang taboto songon dia annon Jahowa mangatur akka na masa saleleng hasusaan bolon. Bisa jadi, adong piga-piga sian halak i na gabe boi mananda Jahowa, marhaporseaon, jala marpihak tu Ibana tikki dipabadia Jahowa goarna di jolo ni akka bangso.—Hes. 38:16.
Tikki dimulai hasusaan bolon, . . . gabe marpihak do annon [piga-piga halak] tu Jahowa?
16. Aha do na taboto taringot Jahowa? (Ida gambar.)
16 Ala nungnga marsiajar Bibel hita, gabe taboto ma na massai arga do hita di adopan ni Jahowa. Buktina, dilehon Ibana do Anakna gabe tobusan tu hita asa boi dapotta hangoluan salelengna. (Joh. 3:16) Holong ni roha ni Jahowa tu hita, jala nungnga tahilala holongna i. (Jes. 49:15) Diboto Ibana do ganup goarta, jala takkas do ditanda Ibana hita. Molo tung pe mate hita, boi do dipahehe Ibana hita jala dipaulak Ibana do kenanganta, alana diingot Ibana do sude taringot hita. (Mat. 10:29-31) Jadi pos ma rohatta pasti sempurna do cara ni Jahowa manguhumi ganup halak. Ala marbisuk Ibana, adil, jala parasi roha.—Jak. 2:13.
Pos ma rohatta pasti sempurna do cara ni Jahowa manguhumi ganup halak, ala marbisuk Ibana, adil, jala parasi roha (Ida paragraf 16)
17. Aha do na lao tabahas di artikel na mangihut?
17 Saonari nga lam denggan be pangattusionta. Alani i gabe tasadari ma, urrikkot do ulaon marbarita di tikkitta saonari sian na sebelumna. Boasa tadok songon i? Jala aha do na mangonjar rohatta asa toktong semangat marbarita na uli? Lao dibahas do akka sukkun-sukkun on di artikel na mangihut.
ENDE 76 Massai Las Rohatta
a Lao mamboto hatorangan taringot boasa dibahen perubahan on, ida ma artikel ‘Inilah yang Diperkenan Olehmu’, di Menara Pengawal 15 Maret 2015, halaman 7-11.
b Dung dihancurhon Babel na Balga, lao diuji do sude naposo ni Jahowa saleleng diserang Gog na sian Magog nasida. Jala dung dihancurhon Babel na Balga, diuji do tong akka halak na bergabung tu naposo ni Jahowa.
c HATORANGAN NI GAMBAR: Tolu gambar na patuduhon boasa adong piga-piga halak na so sanga mambege barita na uli: (1) Dang agama Kristen agama utama di negara ni borua i. Gabe dang aman akka Saksi marbarita disi. (2) Diorai pamaretta do akka Saksi marbarita di negara ni suami istri i. (3) Tinggal di inganan na terpencil do bawa i. Gabe dang boi akka Saksi marbarita tusi.
d HATORANGAN NI GAMBAR: Sahalak donganta borua na so aktif mangingot muse akka na hea diparsiajari ibana taringot “Babel na Balga” na lao dihancurhon. Diputusson ibana ma mulak tu Jahowa, jala mulak tu jabu ni natua-tuana na Saksi Jahowa. Molo songon i annon na masa, tatiru ma Jahowa na burju jala na marasi ni roha. Songon Jahowa, las ma rohatta molo bertobat sahalak pardosa.
