ICIPANDE CA KUSAMBILILAMO 19
ULWIMBO 22 Ubufumu Buleteka—Nabwise!
Finshi Twaishiba pa fyo Yehova ali no Kupingula Abantu?
“Yehova . . . tafwaya umuntu nangu umo akonaike.”—2 PET. 3:9.
IFYO TWALALANDAPO SANA
Kuti twacetekela ukuti ilyo Yehova akapingula abantu takabafyenge.
1. Cinshi twingalandila ukuti tuleikala mu nshita umo ifintu ifingi filecitika?
TULEIKALA mu nshita umo ifintu ifingi filecitika! Cila bushiku tulemona uko amasesemo ya mu Baibo yalefikilishiwa. Ku ca kumwenako, tulamona uko “imfumu ya ku kapinda ka ku kuso” ne “mfumu ya ku kapinda ka ku kulyo” shilelwishanya. Cila mfumu ilafwaya ukukwata amaka pa calo conse. (Dan. 11:40) Imbila nsuma ilebilwa mwi sonde lyonse, kabili abantu abengi balisalapo ukubombela Yehova. (Esa. 60:22; Mat. 24:14) Kabili tulekwata ifya kulya fya ku mupashi ifingi “pa nshita yalinga.”—Mat. 24:45-47.
2. Finshi twingacetekela, lelo finshi tulingile ukusumina?
2 Yehova alitwalilila ukutwafwa pa kuti twingomfwikisha ifintu ifyacindama ifili no kucitika nomba line. (Amapi. 4:18; Dan. 2:28) Kuti twacetekela ukuti ilyo ubucushi bukalamba bushilatendeka, ninshi natwishiba fyonse ifyo tufwile ukwishiba pa kuti twingatwalilila ukushipikisha kabili twingatwalilila ukuba abaikatana. Lelo tufwile ukusumina ukuti kwaliba ifintu ifyo tushaishiba pa fili no kucitika nomba line. Muli cino cipande, twalabalilapo ukulanda pa cilengele twaluke mu fyo twaishibe pali fimo ifikacitika nomba line. Lyena twalalanda pali fimo ifyo twaishiba pa fili no kucitika ku ntanshi, na pa fyo Shifwe wa ku Muulu akacita.
IFYO TUSHAISHIBA
3. Bushe twalanda ukuti ni lilali abantu bashakakwate ishuko lya kucetekela Yehova, kabili mulandu nshi twalandila ifi?
3 Ku numa twalandile ukuti ubucushi bukalamba nga bwatendeka, abantu tabakakwate ishuko lya kucetekela Yehova pa kuti bengapusuka inkondo ya Armagedone. Icalengele tulande ifi nico twaishibe ukuti fyonse ifyalecitika ilyo kwali Ilyeshi, fyalikwete ifyo fyaleimininako ifyali no kucitika ku ntanshi. Ku ca kumwenako, twaletontokanya ukuti nga filya fine kushali uushaingile mu cibwato ca kwa Noa ilyo Yehova “aiseleko iciibi,” e fyo kushakabe umuntu nangu umo uukacetekela Yehova pa kuti engapusuka ilyo ubucushi bukalamba bukatendeka.—Mat. 24:37-39.
4. Bushe na pali ino nshita tumona ukuti fyonse ifyalecitika mu nshiku sha kwa Noa fyalikwata ifyo fimininako muno nshiku? Londololeni.
4 Bushe kuti twalanda ukuti fyonse ifyalecitika ilyo kwali Ilyeshi, fyalikwata ifyo fimininako ifikacitika ku ntanshi? Awe te kuti tulande ifyo. Cinshi tushingalandila ifyo? Pantu te fyo Baibo ilanda. a Kwena Yesu alingenye “inshiku sha kwa Noa” ku nshita akabapo, lelo talandile ukuti fyonse ifyalecitika mu nshiku sha kwa Noa fyalikwete ifyo fyaleimininako ifyali no kucitika ku ntanshi, pamo nga ilyo Yehova aisele iciibi ca cibwato. Lelo ici tacipilibula ukuti te kuti tusambilileko ku lyashi lya kwa Noa na ku Lyeshi.
5. (a) Cinshi Noa acitile ilyo Ilyeshi lishilaisa? (AbaHebere 11:7; 1 Petro 3:20) (b) Bushe umulimo wesu uwa kubila imbila nsuma muno nshiku wapalana shani no mulimo Noa abombele?
5 Noa alilangile ukuti ali ne citetekelo pantu alipangile icibwato. (Belengeni AbaHebere 11:7; 1 Petro 3:20.) Ifi fine e fyo caba, na bantu abomfwa imbila nsuma ya Bufumu bwa kwa Lesa, balingile ukulacita ifyo basambilila. (Imil. 3:17-20) Petro alandile ukuti ‘Noa, aleshimikila abantu pa fyalungama.’ (2 Pet. 2:5) Nomba nga fintu twasambilile mu cipande cafumineko, tatwaishiba nga ca kuti Noa aleshimikila abantu bonse pano isonde ilyo Ilyeshi lishilaisa. Muno nshiku tulebombesha pa kuti tulebila imbila nsuma ku bantu bonse kabili tulaba abacincila ilyo tubomba uyu mulimo. Nomba nangu twingesha na maka yesu yonse, te kuti tubile ku bantu bonse abaikala pano isonde ilyo impela ishilaisa. Cinshi twalandila ifi?
6-7. Cinshi twingalandila ukuti tatwakakumaninshe ukushimikila abantu bonse aba pano isonde? Londololeni.
6 Tontonkanyeni pa fyo Yesu alandile pa uko umulimo wesu uwa kubila imbila nsuma wali no kufika. Asobele ukuti imbila nsuma yali no kubilwa “ku bantu bonse aba pe sonde pa kuti ikabe inte ku nko shonse.” (Mat. 24:14) Ubu busesemo bulefikilishiwa sana muno nshiku. Imbila ya Bufumu ilebilwa ukucila mu ndimi 1,000 kabili pa mulandu na webusaiti yesu iya jw.org, abantu abengi pano calo baleumfwa imbila nsuma ya Bufumu bwa kwa Lesa.
7 Lelo Yesu aebele abasambi bakwe ukuti tabali no kupwisha “ukushinguluka imisumba,” nelyo ukubila ku bantu bonse, ilyo ashilaisa. (Mat. 10:23; 25:31-33) Ifi Yesu alandile fikacitika na mu nshiku shesu. Abantu abengi bekala mu fyalo umushaba ubuntungwa bwa kubila imbila nsuma. Na kabili cila mineti, abana abengi balafyalwa. Tulesha na maka yesu pa kuti tulebila imbila nsuma “ku nko shonse, na ku mitundu yonse, na ku ba ndimi shonse.” (Ukus. 14:6) Lelo icishinka ca kuti tatwakashimikile umuntu onse pano isonde ilyo impela ishilaisa.
8. Cipusho nshi twingepusha pa fyo Yehova akapingula abantu ku ntanshi? (Moneni ne cikope.)
8 Ifi twalandapo kuti fyalenga twaipusha ifipusho fya kuti: Cikaba shani ku bantu aba kuti tabakakwate ishuko lya kukutika imbila nsuma ilyo ubucushi bukalamba bushilatendeka? Bushe Yehova no Mwana wakwe uo apeela umulimo wa kupingula, bakabapingula shani? (Yoh. 5:19, 22, 27; Imil. 17:31) Ilembo apafumine lino isambililo litila Yehova “tafwaya umuntu nangu umo akonaike, lelo afwaya ukuti bonse bakalapile.” (2 Pet. 3:9; 1 Tim. 2:4) Nangu ca kuti twalishiba ifi pali Yehova, tatweba ifyo akapingula abantu abashakakwate ishuko lya kukutika imbila nsuma. Kwena talinga fye no kutweba ifyo acita nelyo ifyo akacita.
Finshi Yehova akacitila abantu aba kuti tabakwete ishuko lyakumfwapo imbila nsuma ilyo ubucushi bukalamba bushilatampa? (Moneni paragrafu 8) c
9. Finshi Yehova atweba mu Baibo?
9 Yehova alitweba mu Cebo cakwe fimo ifyo ali no kucita. Ku ca kumwenako, Baibo yalitweba ukuti Yehova akabuusha abantu “abashalungama” abashakwete ishuko lya kumfwa imbila nsuma pa kuti bengaalula imibele yabo. (Imil. 24:15; Luka 23:42, 43) Ici cilenga twaipusha amepusho na yambi ayacindama.
10. Mepusho nshi yambi twingepusha?
10 Bushe abantu bonse abakafwa mu bucushi bukalamba tabakakwate ishuko lya kubuushiwa? Amalembo yalilanda bwino bwino ukuti bonse abalwisha Yehova abo akepaya na abo abashilika bakwe bakepaya ilyo kukaba inkondo ya Armagedone, tabakabuushiwe. (2 Tes. 1:6-10) Nomba cikaba shani ku bantu aba kuti bakafwa mu bucushi bukalamba pa mulandu wa kulwala, ukukota, abakafwa mu busanso, nelyo abo abantu banabo bakepaya? (Luk. Mil. 9:11; Seka. 14:13) Bushe bamo pali aba bakaba pa “bashalungama” abakabuushiwa mu calo cipya? Tatwaishiba!
IFYO TWAISHIBA
11. Finshi abantu bakapingwilwapo ilyo kukaba inkondo ya Armagedone?
11 Fingi twaishiba pa fikacitika ku ntanshi. Ku ca kumwenako, twalishiba ukuti ilyo kukaba inkondo ya Armagedone, Yehova akapingula abantu ukulingana ne fyo balecitila bamunyina ba kwa Kristu. (Mat. 25:40) Abo bakapingula ukuti ni mpaanga bantu abalanga ukuti balatungilila abasubwa e lyo na Kristu. Twalishiba no kuti bamunyina ba kwa Kristu bamo bakabapo ilyo ubucushi bukalamba bukatendeka, kabili bakabasenda ku muulu ilyo fye inkondo ya Armagedone ishilatendeka. Apo bamunyina ba kwa Kristu bamo bakatwalilila ukuba pe sonde, nalimo abantu bamo bakakwata ishuko lya kubatungilila ne lya kutungilila umulimo babomba. (Mat. 25:31, 32; Ukus. 12:17) Mulandu nshi ifi fishinka ficindamine?
12-13. Bushe abantu bamo nalimo bakacita shani nga bamona “Babiloni Mukalamba” aonaulwa? (Moneni ne cikope.)
12 Na lintu ubucushi bukalamba bukatendeka, abantu bamo abakamona ukuti “Babiloni Mukalamba” naonaulwa bakebukisha ukuti Inte sha kwa Yehova balilandile pali ifi pa myaka iingi. Bushe bamo abakamona ukuti Babiloni Mukalamba nayonaulwa, bakatetekela Yehova?—Ukus. 17:5; Esek. 33:33.
13 Nga ca kuti ifi e fyo cikaba, ninshi cikaba kwati ni filya cali mu Egupti mu nshiku sha kwa Mose. Abantu “abengi nga nshi abashali bena Israele,” bali-ilundile ku bena Israele ilyo abena Israele balefuma mu Egupti. Bamo pali aba bena Egupti nalimo batendeke ukutetekela Yehova ilyo bamwene ifyo Mose alandile pa Finkunka 10 fyafikilishiwa. (Ukufu. 12:38) Nga ca kuti ifya musango uyu fikacitika ilyo Babiloni Mukalamba akonaulwa, bushe tukatontonkanya ukuti Yehova taba no mulinganya, pantu nasuminisha bamo ukuba ku lubali lwesu ninshi kwashala fye panono ukuti impela ise? Awe tatwakatontonkanye ifyo. Pantu tufwaya ukupashanya Shifwe wa ku muulu, “Lesa wa luse kabili uwa nkumbu, uukokola ukukalipa kabili uwaba sana no kutemwa ukushipwa ne cine.” b—Ukufu. 34:6.
Bamo ilyo bakamona ukuti “Babiloni Mukalamba” naonaulwa bakebukishaukuti Inte sha kwa Yehova balilandile pali ifi pa myaka iingi (Moneni paragrafu 12-13) d
14-15. Bushe icikalenga umuntu akabe no mweo wa muyayaya, kuntu akafwila nelyo uko ekala? Londololeni. (Amalumbo 33:4, 5)
14 Inshita shimo tulomfwa aba bwananyina baleti, “kuti cawama nalimo lupwa lwandi afwa ilyo ubucushi bukalamba bushilatendeka, pa kuti nalimo kuti akwata ishuko lyakwisabuushiwa.” Icilenga balelanda ifyo ni co balomfwila balupwa lwabo uluse. Lelo icikalenga umuntu akabuushiwe nelyo ekabuushiwa, te nshita akafwilapo! Yehova ni Kapingula uwapwililika, lyonse alapingula abantu mu bulungami na mu mulinganya. (Belengeni Amalumbo 33:4, 5.) Tatutwishika ukuti “Kapingula wa pano isonde ponse” akacita icalungama.—Ukute. 18:25.
15 Na kabili icifulo uko umuntu ekala te cingalenga aisakwata umweo wa muyayaya. Yehova te kuti apingule abantu abengi ati ni mbushi pa mulandu fye wa kuti bekala mu fyalo umo bashakwata ishuko lya kukutika imbila nsuma. (Mat. 25:46) Kapingula wa pano isonde ponse uwalungama alibika sana amano ku bantu ba musango uyu, ukucila ne fyo twababikako amano. Tatwaishiba ifyo Yehova akalenga ifintu fikabe ilyo kukaba ubucushi bukalamba. Nalimo bamo pali aba bantu bakasambilila pali Yehova, bakamutetekela, bakasalapo ukuba ku lubali lwakwe nga bamona ifyo akalenga abantu bonse pano isonde bamwishiba.—Esek. 38:16.
Ilyo ubucushi bukalambabukatendeka, bushe abantubamo nalimo bakaluka?
16. Finshi twaishiba pali Yehova? (Moneni ne cikope.)
16 Ifyo tusambilila mu Baibo fyalilenga twamona ifyo Yehova acindamika ubumi bwa bantu. Alipeela umweo wa Mwana wakwe pa kuti bonse twingakwata ishuko lya kwisaikala umuyayaya. (Yoh. 3:16) Bushe twalishiba ifyo Yehova atutemwa nga nshi? (Esa. 49:15) Bonse alitwishiba amashina. Na kuba, alitwishiba bwino sana ica kuti nangu twafwa, kuti atubumba cipya cipya pantu alebukisha fyonse pali ifwe kabili kuti alenga twaibukisha fyonse ifyo twaishibe ilyo tushilafwa! (Mat. 10:29-31) Ukwabula no kutwishika Shifwe wa ku Muulu te kuti afyenge umuntu pantu wa mano, alilungama, kabili wa luse.—Yako. 2:13.
Ukwabula no kutwishika Yehova pa kupingula abantu takafyengeumuntu pantu wa mano, akaba no bulungami, e lyo no luse (Moneni paragrafu 16)
17. Fipusho nshi tukasuka mu cipande cikonkelepo?
17 Ifi twa-aluka mu fyo twaishibe fyalenga twaishiba ukuti tufwile ukubomba bwangu umulimo wa kubila imbila nsuma. Mulandu nshi twingalandila ifi? Kabili cinshi cilenga tuleshimikila abantu imbila nsuma ukwabula ukuleka? Tukasuka ifi fipusho mu cipande cikonkelepo.
ULWIMBO 76 Bushe Mumfwa Shani?
a Pa kuti mwishibe ifyalengele twaluke mu fyo twaishibe, moneni icipande icaleti “Ifi e fyo Mwalefwaya” icaba mu Ulupungu lwa kwa Kalinda ulwa March 15, 2015, amabu. 7-11.
b Ilyo Babiloni Mukalamba akonaulwa, ababomfi ba kwa Lesa bonse bakeshiwa ilyo Goge wa ku Magoge akabasansa. Bonse abakasala ukuba ku lubali lwa kwa Lesa ilyo Babiloni Mukalamba akonaulwa nabo bene bakeshiwa.
c UBULONDOLOSHI BWA FIKOPE: Ifikope fitatu ifilelangilila umulandu tushingakumanisha ukubila imbila nsuma ku bantu bonse mwi sonde lyonse: (1) Umwanakashi uwikala mu calo umo pa mulandu ne mipepele yabamo te kuti mushimikile ku banakashi, (2) abaupana abekala mu calo umo ubuteko bwabinda umulimo wa kubila imbila nsuma kabili umo bengaba mu bwafya nga ca kuti ubuteko bwalibasangile, e lyo (3) umwaume uwikala mu cifulo ca kutali sana ukushiya abantu.
d UBULONDOLOSHI BWA CIKOPE: Umwanakashi umwaice uwalekele ukubombela Yehova aibukisha ifyo asambilile pa konaulwa kwa kwa “Babiloni Mukalamba.” Asalapo ukutendeka ukubombela Yehova na kabili, abwelela na ku bafyashi bakwe Abena Kristu. Ifya musango uyu nga fikacitika, tukakabila ukutontonkanya pa fyo Shifwe wa ku muulu aba no luse ne cikuuku kabili tukakabila ukusekelela ukuti uwabembwike nabwelela kuli Yehova.
