ARTIKEL PELAJAREN 19
LAGU 22 Rehlah KerajanNdu!
Kai si Enggo Siteh kerna Penghakimen Jahwe bas Kiniseran si Mbelin?
“Jahwe . . . labo teNa sekalak pe ikernepken.”—2 PET. 3:9.
INTINA
Tek kita penghakimen Jahwe pasti benar ras adil.
1. Engkai banci sikataken maka gundari kita nggeluh bas masa si luar biasa?
GUNDARI kita nggeluh bas masa si luar biasa kel. Tiap wari banci siidah nubuat Pustaka terjadi. Contohna, banci siidah “raja utara” ras “raja selatan” ersaing gelah jadi penguasa doni. (Dan. 11:40) Banci ka siidah berita si meriah kerna Kerajan Dibata iberitaken i sebelang doni, janah jutan kalak dungna nggit nembah Jahwe. (Jes. 60:22; Mat. 24:14) Selain si e, sidat ka mbue kel pangan rohani “bas waktu si tepat.”—Mat. 24:45-47.
2. Kai si banci siteki, janah kai si arus siinget?
2 Lalap isampati Jahwe kita gelah reh jelasna pengangkanta kerna kai si nandangi terjadi. (Kua. 4:18; Dan. 2:28) Tek kita, sanga mulai pagi terjadi kiniseran si mbelin, pasti enggo ipebetehken Jahwe kai si perlu siteh. Emaka, banci kita megenggeng ras tetap ersada bas situasi si sulit e. Tapi, arus siinget maka lit si la siteh kerna masa depan. Bas artikel enda, sibahas kari lebe engkai maka pengangkanta kerna piga-piga peristiwa bas masa depan perlu isesuaiken. Kenca si e, sibahas ka kari kai si enggo siteh kerna masa depan, janah kai si nandangi ilakoken Bapakta Jahwe.
KAI SI LA SITEH?
3. Uga nge mbarenda pengangkanta kerna kalak si la lit kesempatenna nembah Jahwe, janah engkai maka bage ninta?
3 Mbarenda, sikataken maka sanga mulai pagi terjadi kiniseran si mbelin, lanai lit kesempaten kalak guna nembah Jahwe ras selamat bas Harmagedon. Engkai? Perban mbarenda siakap kerina si terjadi sanga Banjir si Mbelin bas jaman Nuah, eme gambaren kerna kai si terjadi bas jamanta. Contohna, sanga itutup Jahwe pintu bahtra sope terjadi Banjir si Mbelin, lanai lit kalak si banci masuk. Emaka siakap, sanga mulai pagi terjadi kiniseran si mbelin, lanai pagi lit kesempaten kalak guna nembah Jahwe ras selamat.—Mat. 24:37-39.
4. Engkai maka lanai cocok adi sikataken kerina si terjadi bas jaman Nuah eme gambaren kerna kai si terjadi bas masa depan? Jelasken.
4 Lanai cocok adi sikataken kerina si terjadi bas jaman Nuah eme gambaren kerna kai si terjadi bas masa depan. Engkai? Perban la lit ikataken Pustaka bage. a Memang pernah ikataken Jesus maka keadan bas jaman Nuah mirip ras keadanta sanga kerehen Jesus. Tapi la pernah ikatakenna maka kerina si terjadi bas “jaman Nuah” eme gambaren kerna sada hal. La ka pernah ikataken Jesus maka sanga itutup Jahwe pintu bahtra, e nggambarken kerna kai si terjadi bas masa depan. Amin pe bage, labo ertina la lit si banci sipelajari arah Nuah ras Banjir si Mbelin.
5. (a) Kai si ilakoken Nuah guna mbuktiken kinitekenna? (Heber 11:7; 1 Petrus 3:20) (b) Kai nge persamanna dahin erberita bas jaman Nuah ras bas jamanta?
5 Kenca begi Nuah perentah arah Jahwe, buktikenna kinitekenna alu mbangun bahtra. (Baca Heber 11:7; 1 Petrus 3:20.) Kalak si enggo megiken berita si meriah pe, arus buktikenna kinitekenna alu ndalanken kai si enggo pelajarina. (Perb. 3:17-20) Ikataken Petrus maka Nuah e “perberita kebenaren.” (2 Pet. 2:5) Tapi bagi si enggo sibahas bas artikel sebelumna, la siteh lit ntah lang aturken Nuah pendahin erberita gelah seh ku kerina kalak sope reh Banjir si Mbelin. Gundari, kita ikut bas pendahin erberita i sebelang doni janah semangat kita ngelakokenca. Tapi, la soal uga belinna usahata, la banci kita erberita man tiap jelma bas doni enda sope reh kedungen e. Engkai?
6-7. Engkai maka la banci kita erberita man kerina jelma sope reh kedungen e?
6 Mari siukuri kai si ikataken Jesus kerna dahin erberita. Ikataken Jesus maka berita si meriah iberitaken pagi “i belang-belang doni guna kesaksin man kerina bangsa.” (Mat. 24:14) Kata-kata Jesus enda enggo terjadi gundari. Berita si meriah enggo tersedia bas lebih 1.000 bahasa. Selain si e, perban lit situs web jw.org, teremen jelma bas doni enda enggo banci erlajar kerna Kerajan Dibata.
7 Tapi, ikataken Jesus ka man murid-muridna maka berita si meriah ‘labo pagi serser iberitaken ku kerina kota,’ ntah pe ku tiap jelma sope kerehenna. (Mat. 10:23; 25:31-33) Enda ertina, murid-murid Jesus la banci erberita man kerina jelma sope Jesus reh ngakimi manusia. Gundari, lit jutan jelma si tading bas daerah si pendahin erberita ilarang. Selain si e, lit ratusen bayi si lahir tiap menit. Memang siusahaken erberita man kerina jelma bas ‘tiap bangsa, suku, ras bahasa.’ (Ket. 14:6) Amin pe bage, labo banci kita erberita si meriah man kerina jelma bas doni enda, sope reh kedungen e.
8. Penungkunen kai saja si banci turah bas pusuhta? (Nen ka gambar.)
8 Banci saja, tersungkun-sungkun kita: Uga kerna kalak si la lit kesempatenna megi berita si meriah sope reh kiniseran si mbelin? Kai nge pagi si lakoken Jahwe bage pe Jesus si enggo ibereken kuasa guna ngakimi kalak e? (Joh. 5:19, 22, 27; Perb. 17:31) Ayat tema bas artikel enda ngataken maka ‘labo ate Jahwe sekalak pe ikernepken.’ AteNa “gelah kerina min ertobat.” (2 Pet. 3:9; 1 Tim. 2:4) Tapi, lenga ikataken Jahwe kai pagi si ilakokenNa man kalak si lenga lit kesempatenna megi berita si meriah. Situhuna, la lit kewajipen Jahwe nuriken man banta kerna kai si enggo ilakokenNa ras kai si nandangi ilakokenNa.
Uga Jahwe ngakimi kalak si la sempat megiken berita si meriah sope reh kiniseran si mbelin? (Nen paragrap 8) c
9. Kai si enggo kataken Jahwe man banta arah Pustaka?
9 Bas Pustaka, lit piga-piga si ituriken Jahwe man banta kerna kai si nandangi ilakokenNa. Contohna, ipekekeNa pagi “kalak si la benar” eme kalak si lenga sempat megi berita si meriah ras lenga ertobat. (Perb. 24:15; Luk. 23:42, 43) Tapi turah ka penungkunen si debanna.
10. Penungkunen kai ka nge si banci saja turah bas pusuhta?
10 Kerina jelma si mate bas kiniseran si mbelin, lanai nge pagi ipekeke? Bas Pustaka jelas ikataken maka kalak si nentang Jahwe lanai pagi ipekeke. Kalak si bage ikernepken Jahwe ras pasukenNa pagi bas Harmagedon. (2 Tes. 1:6-10) Tapi, uga kerna kalak si mate bas kiniseran si mbelin perban penakit, enggo metua, kecelakan, kena bencana, ntah pe ibunuh kalak? (Peng. 9:11; Sak. 14:13) Lit nge arah kalak e si termasuk bas “kalak si la benar” si ipekeke bas doni si mbaru? La siteh kerna si e.
KAI SI ENGGO SITEH?
11. Sekalak jelma ihakimi erpalasken kai?
11 Lit piga-piga situasi kerna masa depan si enggo siteh. Contohna, siteh maka sekalak jelma ihakimi sesuai ras perbahanenna man senina-senina Kristus, eme kalak si ipilih ku surga. (Mat. 25:40) Adi idukung kalak e Kristus ras kalak si ipilih ku surga, ikataken me ia biri-biri. Siteh ka maka piga-piga kalak si erpengarapen ku surga, lit denga pagi i doni sanga kiniseran si mbelin imulai. Kalak e naik ku surga sope perang Harmagedon imulai. Emaka sanga kalak si ipilih ku surga lit denga i doni, lit denga kesempaten man kalak si meteruk ukur guna ndukung kalak e. (Mat. 25:31, 32; Ket. 12:17) Engkai?
12-13. Banci saja uga nge tanggapen piga-piga kalak kenca idahna “Babilon si Mbelin” ikernepken? (Nen ka gambar.)
12 Kenca kiniseran si mbelin imulai, banci saja piga-piga kalak si ngidah “Babilon si Mbelin” ikernepken, ingetna maka Saksi Jahwe enggo ndekah erberita kerna si e. Erkiniteken nge pagi kalak e man Jahwe?—Ket. 17:5; Esek. 33:33.
13 Enda pernah terjadi bas jaman Musa. Sanga kalak Israel ndarat arah Mesir, “enterem ka kalak si deban arah erbage bangsa” si ikut ras kalak Israel. Piga-piga arah kalak e banci saja mulai erkiniteken kenca idahna terjadi Sepuluh Bencana si ikataken Musa. (Kel. 12:38) Kenca Babilon si Mbelin ikernepken, banci saja lit kalak si dungna nembah Jahwe. Kecewa nge kita ngidah kalak e ertobat? Pasti lang! Perban siusih ateta sipat Bapakta si i surga eme “Dibata si perkuah, si mehuli, la nukah merawa, janah dem alu kekelengen si setia ras kebenaren.” b—Kel. 34:6.
Piga-piga kalak si ngidah “Babilon si Mbelin” ikernepken, banci saja ingetna maka Saksi Jahwe enggo ndekah erberita kerna si e (Nen paragrap 12-13) d
14-15. Payo nge sekalak jelma ipekeke ntah lang itentuken ndigan ia mate ntah pe i ja ia tading? Jelasken. (Masmur 33:4, 5)
14 Mon-mon bagenda nina turang seninata kerna keluargana si la Saksi Jahwe, “Pangen ia mate sope kiniseran si mbelin gelah lit denga arapenna ipekeke.” Banci saja perban mehuli ukurna nge maka bage nina. Tapi sekalak jelma ipekeke ntah lang, labo itentuken ndigan ia mate. Siinget maka Jahwe eme Hakim si sempurna, adil, ras benar. (Baca Masmur 33:4, 5.) Emaka tek kita pasti adil perbahanen “Hakim sebelang doni.”—Kej. 18:25.
15 Sekalak jelma ipekeke ntah lang, labo ka itentuken i ja ia tading. Bas piga-piga negara, lit jutan jelma si la lit kesempatenna megiken berita si meriah. Ianggap Jahwe nge kalak e kerina bagi “kambing”? (Mat. 25:46) Adi kita saja pe ermediate man kalak e, apai ka Hakim sebelang doni. Memang la siteh kai saja pagi si ilakoken Jahwe bas kiniseran si mbelin. Banci saja berekenNa kesempaten man kalak e gelah banci nandai Ia, erkiniteken man baNa, janah ndukung Ia sanga ipebadiaNa gelarNa i lebe-lebe kerina bangsa.—Esek. 38:16.
Kenca kiniseran si mbelin imulai, . . . erkiniteken nge pagi kalak e man Jahwe?
16. Kai si enggo siteh kerna Jahwe? (Nen ka gambar.)
16 Kenca sipelajari Pustaka, siteh maka meherga kel akap Jahwe kegeluhenta. Enggo korbankenNa AnakNa gelah lit arapenta nggeluh seh rasa lalap. (Joh. 3:16) Kita kerina pasti pernah nggejapken kekelengen Jahwe. (Jes. 49:15) Iteh Jahwe gelarta, tandaiNa kel kita. TehNa kerinana kerna kita ras kerina si lit bas ingetenta, emaka bicara mate pe kita, banci pekekeNa kita! (Mat. 10:29-31) Emaka tek kita, pasti sempurna penghakimen Jahwe, perban Ia pentar, adil, perkeleng, ras perkuah.—Jak. 2:13.
Tek kita maka Jahwe pasti hakimiNa kerina kalak alu sempurna, perban Ia pentar, adil, perkeleng, ras perkuah (Nen paragrap 16)
17. Kai kari sibahas bas artikel seterusna?
17 Kenca sibahas artikel enda, pasti reh pentingna siakap dahin erberita. Engkai? Kai si ngiahken kita tetap semangat erberita? Sibahas kari jawapenna bas artikel seterusna.
LAGU 76 Meriah Kel Ukurta
a Guna meteh terbuen keterangen engkai maka pengangkanta perlu isesuaiken, nen artikel ”Inilah yang Diperkenan Olehmu” bas Menara Pengawal 15 Maret 2015, hal. 7-11.
b Kenca Babilon si Mbelin ikernepken, kerina umat Jahwe iuji sanga lit serangen Gog arah Magog. Kerina si ndukung umat Dibata pe iuji pagi.
c KETERANGEN GAMBAR: Telu gambar si ncidahken engkai maka piga-piga kalak la lit kesempatenna megiken berita si meriah: (1) Sekalak diberu tading bas negara si agama resmina i je labo Kristen, janah bahaya adi Saksi Jahwe erberita i je, (2) sekalak perbulangen ras ndehara tading bas ingan si pemerentahna ngelarang pendahin erberita janah bahaya adi Saksi Jahwe erberita i je, ras (3) sekalak dilaki tading bas ingan si seh kel dauhna janah la terdahi.
d KETERANGEN GAMBAR: Sekalak diberu si nadingken kebenaren, ingetna kai si enggo pelajarina kerna pengkernepen “Babilon si Mbelin.” Mulihken ia ku Jahwe janah dahina orang tuana si Saksi Jahwe. Adi terjadi pagi si e, siusih ateta Bapakta si i surga si perkuah ras perkeleng. Bagi Jahwe, meriah ukurta ngidah kalak si erdosa ertobat.
