1. Porque kita puede habla que bien bonito el tiempo onde kita ta vivi ahora?

 BIEN bonito el tiempo onde kita ta vivi ahora! Cada dia, ta puede kita mira que ta cumpli el maga profecia na Biblia. Por ejemplo, ta puede kita mira con “el rey del norte” y “el rey del sur” que ta pricura domina con uno y otro. (Dan. 11:40, ftn.) Ta predica tambien con el buen noticia acerca na Reino del Dios na entero mundo y millones el quien ta acepta con ese. (Isa. 60:22; Mat. 24:14) Y ta ricibi kita abundancia de espiritual comida “na justo tiempo.”—Mat. 24:45-47, NWT.

2. Na cosa kita asigurao pero cosa kita debe admiti?

² Ta continua kanaton ayuda si Jehova para mas entende con el maga importante suceso que cerca ya sucede. (Prov. 4:18; Dan. 2:28) Puede kita asigura que si principia ya el grande tribulacion, sabe ya kita si cosa kita necesita hace para aguanta, esta fiel y esta unido. Pero, debe kita admiti que tiene maga cosas que no sabe kita acerca na futuro. Na este articulo, hay discuti kita una si porque kita ya cambia con el cosa kita ya habla de antes acerca na cuanto de ese maga suceso. Despues, man repaso kita con el cuanto cosas que sabe  kita acerca na futuro y si cosa hace el diaton Tata na cielo durante na ese tiempo.

SI COSA KITA NO SABE

3. De antes, cosa kita ya habla que hay sucede con el maga gendeh siervo si principia ya el grande tribulacion y porque se kita ya puede pensa?

³ De antes, ya habla kita que si principia ya el grande tribulacion, nuay mas oportunidad el maga gente para demonstra fe con Jehova y sobrevivi na Armagedon. Ya puede se kita habla cay pensaba kita que el maga suceso durante el Avenida ta representa si cosa sucede na futuro. Por ejemplo, ya pensa kita que igual si paquemodo ya cerra si Jehova con el puerta del arca antes principia el Avenida, “hay cerra tambien le con el puerta” na principio del grande tribulacion. Como resulta, nuay mas otro gente el quien puede salva.—Mat. 24:37-39.

4. Porque gendeh mas kita ta habla ahora que el maga suceso durante el Avenida tiene mas grande cumplimiento na futuro?

⁴ Justo ba para habla que el maga suceso durante el Avenida ta representa si cosa sucede na futuro? Gendeh. Porque? Cay nuay cosa ya habla el Biblia acerca con ese. a Deveras, ya compara si Jesus con el “tiempo de Noe” na tiempo del de suyu presencia. Pero nuay le habla que el todo cosa ya sucede durante el Avenida hay tene mas grande cumplimiento na futuro, igual por ejemplo, cuando ya cerra si Jehova con el arca. Maskin pa ansina, tiene kita cosa puede aprende con Noe y na Grande Avenida.

5. (a) Cosa ya hace si Noe antes el Avenida? (Maga Hebreo 11:7; 1 Pedro 3:20) (b) Si acerca na trabajo predicacion, na cosa manera semejante el diaton situacion ahora na tiempo de Noe?

 ⁵ Cuando ya sabe si Noe acerca na aviso de Jehova, ya dale le mira el de suyu fe cuando ya construi le un arca. (Le con el Maga Hebreo 11:7; 1 Pedro 3:20.) Na igual manera, el maga gente quien ya puede oi con el buen noticia acerca na Reino del Dios debe actua na cosa sila ya aprende. (Act. 3:17-20) Ya habla si Pedro que “ya predica” si Noe. (2 Ped. 2:5, El Nuevo Testamento) Pero, como cosa ya discuti del ya pasa articulo, no sabe kita si ya puede ba predica si Noe con el todo maga gente antes llega el Avenida. Ahora, ta pricura tambien kita predica con el maga gente na entero tierra. Pero maskin paquemodo pa kita pricura, gendeh kita puede predica con el todo gente antes llega el fin. Porque?

6-7. Porque kita puede habla que gendeh kita puede predica con el todo maga gente na tierra antes llega el fin? Explica.

⁶ Considera si cosa ya habla si Jesus acerca na diaton trabajo predicacion. Ya predicta le que hay predica con el buen noticia “na entero mundo, para man testigo con todo el maga nacion.” (Mat. 24:14) Ta cumpli ya gayot ese profecia ahora. Puede obtene con el mensaje del Reino na mas de 1,000 lengguaje y por medio na jw.org website, puede beneficia el mayoria del maga gente na entero mundo.

⁷ Pero, ya habla tambien si Jesus con el de suyu maga dicipulo que gendeh sila puede “acaba visita todo el maga pueblo” o predica con todo antes le vene. (Mat. 10:23; 25:31-33) Deverasan tambien se na diaton tiempo ahora. Millones del maga gente ahora el ta queda na maga lugar donde grabe el restriccion na diaton trabajo predicacion. Mas pa, bien manada el ta nace cada minuto. Ta hace kita el todo para manda sabe el buen noticia na maga gente estaba na “todo nacion, raza, lenguaje y pais.” (Rev. 14:6) Maskin pa ansina, sabe kita que gendeh kita puede predica con el cada individual na tierra antes llega el fin.

8. Cosa kita posible pregunta acerca na maga juzgamiento de Jehova na futuro? (Mira tambien con el maga letrato.)

⁸ Por causa con ese, tiene maga pregunta: Cosa sucede con aquellos quien nuay tene el oportunidad que oi con el buen noticia antes llega el grande tribulacion? Paquemodo kanila juzga si Jehova y de suyu Anak? (Juan 5:19, 22, 27; Act. 17:31) El texto onde yan base este articulo ya habla que “quiere [si Jehova] que noay ni uno quien ay perde.” Mas pa, quierre tambien le que “todo ay arripinti.” (2 Ped. 3:9; 1 Tim. 2:4) Poreso, debe kita acepta que nuay pa revela kanaton si Jehova si cosa le hace con ese maga gente. Mas pa, gendeh tambien le obligao habla kanaton acerca con ese.

9. Cosa ya habla kanaton si Jehova na Biblia?

⁹ Na de suyu Palabra, ya habla kanaton si Jehova el cuanto cosas que hay hace le. Por ejemplo, ya habla kanaton el Biblia que hay resucita si Jehova con el “maga gendeh recto” gente quien nuay tene el oportunidad que aprende acerca na buen noticia y hace maga cambio. (Act. 24:15, NWT; Luc. 23:42, 43) Pero por causa con ese, tiene maga importante pregunta que necesita kita considera.

10. Cosa el otro maga pregunta que puede kita pensa?

¹⁰ El todo ba quien muri durante el grande tribulacion gendeh mas tene el esperanza de resureccion? Ya hace claro el Escritura que gendeh resucita con el maga enemigo de Jehova con quien le hay destroza na Armagedon. (2 Tes. 1:6-10) Pero, quetal el otro quien  ya muri na ese tiempo—por ejemplo por causa na enfermedad, de vejez, accidente o cay ya mata kanila el otro? (Ecl. 9:11; Zac. 14:13) Posible gaha que incluido el cuanto de ese maga gente na “maga gendeh recto” con quien hay resucita na nuevo mundo? No sabe kita el contestacion.

SI COSA KITA SABE

11. Na cosa base el juzgamiento que hay dale na maga gente na Armagedon?

¹¹ Sabe kita con el cuanto cosas acerca na futuro. Por ejemplo, sabe kita que na Armagedon, hay juzga con el maga gente base si paquemodo sila ya trata con el maga hermano del Cristo. (Mat. 25:40) Hay juzga como carnero con aquellos quien ya dale mira el diila suporta na maga iscujido y con el Cristo. Sabe tambien kita que taqui pa na tierra el cuanto del maga hermano del Cristo despues principia el grande tribulacion y hay subi lang sila na cielo corto tiempo antes principia el Armagedon. Mientras taqui pa na tierra el maga hermano del Cristo, tiene pa oportunidad el maga sincero individual que dale mira el diila suporta kanila y na trabajo que ta hace sila. (Mat. 25:31, 32; Rev. 12:17) Porque importante este maga detalle?

12-13. Cosa posible el reaccion del cuanto despues sila mira el destrozo del “Grande Babilonia”? (Mira tambien con el maga letrato.)

¹² Maskin despues principia el grande tribulacion, posible que el cuanto gente quien hay puede mira con el destrozo del “Grande Babilonia” hay acorda que amo se el ya dura ya ta menciona el maga Testigo de Jehova. Posible gaha que el cuanto hay cambia y principia demonstra fe con Jehova?—Rev. 17:5; Eze. 33:33.

¹³ Si ese el cosa sucede, semejante se na cosa ya pasa na Egipto na tiempo de Moises. Acorda que tiene “un grande grupo de maga estranjero” el ya sigui con el maga Israelita cuando ya sale sila na Egipto. El cuanto de este maga persona posible ya principia tene fe cuando ya mira sila que ya sucede el cosa ya habla si Moises acerca na Diez Castigo. (Ex. 12:38) Si ansina el cosa sucede despues  destroza con el Grande Babilonia, hay pensa ba kita que lugi kita cay puede pa el maga gente iscuji el lao de Jehova maskin corto tiempo ya lang antes el Armagedon? Siempre gendeh! Quierre kita imita con el diaton Tata na cielo que “un Dios lastimoso y tiene compasion, gendeh pronto rabia y abundancia de amor leal y verdad.” b—Ex. 34:6.

14-15. El oportunidad ba del un persona para vivi hasta para cuando ta depende si cuando le muri o si onde le ta queda? Explica. (Salmo 33:4, 5)

¹⁴ Tiene vez, posible el cuanto kanaton ta puede pensa acerca na diaton familia que gendeh ta sirvi con Jehova, “Si muri le antes principia el grande tribulacion, tiene pa le el esperanza de resureccion.” Asigurao que gendeh malo el diaton motivo. Pero, gendeh importante si cuando muri el un persona cay gendeh alli ta depende si cosa sucede con ele na futuro. Si Jehova el perfecto Juez poreso pirmi justo el de suyu decision. (Le con el Salmo 33:4, 5.) Puede kita asigura que “el Juez del entero tierra” hay hace si cosa el justo.—Gen. 18:25.

¹⁵ Razonable tambien para habla que gendeh importante si onde ta queda el un persona cay gendeh alli ta depende si cosa sucede con ele na futuro. Asigurao que gendeh dayun juzga si Jehova como “cabrito” con el millones de maga gente quien nuay tene oportunidad que aprende acerca na mensaje del Reino por causa na lugar onde sila ta queda. (Mat. 25:46) Bien interesao el recto Juez del entero  tierra con este maga individual. No sabe kita si cosa exacto hace si Jehova kanila durante el grande tribulacion. Posible que el cuanto de este maga persona hay tene el oportunidad que aprende acerca con Jehova, demonstra fe con ele y iscuji el de suyu lao si hay santifica ya le con el de suyu nombre na todo nacion.—Eze. 38:16.

16. Cosa kita ya aprende acerca con Jehova? (Mira tambien con el letrato.)

¹⁶ Na diaton estudiada del Biblia, ya puede kita aprende que bien valoroso con Jehova el vida del maga gente. Ya dale le el vida del de suyu Anak para todo kita hay tene el oportunidad que vivi hasta para cuando. (Juan 3:16) Ya sinti gayot kita todo el amor de Jehova. (Isa. 49:15) Sabe le el nombre del cada uno kanaton. Gane, bien conoce le kanaton y si muri man kita, puede le crea otravez kanaton que tiene el igual detalle y memoria que tiene kita ahora! (Mat. 10:29-31) Tiene gayot kita buen razon para confia que el diaton amable Tata na cielo hay juzga con el cada individual na balance, justo y lastimoso manera.—Sant. 2:13.

17. Cosa kita discuti na sunod articulo?

¹⁷ Este maga cambio na diaton entendimiento ta ayuda kanaton para entende que bien importante el trabajo predicacion. Porque se kita puede habla? Y cosa ta motiva kanaton para continua predica con el buen noticia? Hay discuti kita con el contestacion de este maga pregunta na sunod articulo.