EKICWEKA C’OKWEGA 19
ECESHONGORO CA 22 Obukama Bwatairweho—Shaba ngu Bwije!
Ni enki eki turi kumanya aha bikwatirine n’emanja ezi Yehova arije kucwa omu biro by’omu misho?
‘Yehova. . . tari kwenda omuntu wena kuhwerecerera.’—2 PET 3:9.
ENTEGO
Omuri eki kicweka twaza kushwijuma oku turi kubasa kwesiga tutari kubanganisa ku emanja ezi Yehova arije kucwa omu biro by’omu misho zirije kuba zihikire kandi zirimu oburinganiza.
1. Ahabw’enki turi kubasa kugamba ku turi omu bwire bw’omutano?
TURI omu bwire bw’omutano! Buri zoba obuhanuzi bw’omuri Bibuli nibugenda buri kuhikirira turi kubyerebera n’amisho gitu. Ecokureberaho: Nitureba oku ‘omugabe w’omu matemba’ n’omugabe w’omu mashuma bari kutura binine ebizibu ahabw’okurwanira kwebembera ensi. (Dan 11:40.) Nitwerebera oku obutumwa burungi bw’Obukama bwa Ruhanga buri kuburirwa omu nsi yona n’oku abantu bingi bari kusharamu kuhereza Yehova. (Isa 60:22; Mat 24:14) Nambwenu, nitutunga ebyokurya by’omwika ebiri kumara ‘omu bwire obuhikire.’—Mat 24:45-47.
2. Ni enki eki tushemerire kwikiriza tutari kubanganisa kandi shi ni enki eki tushemerire kumanya?
2 Yehova nagumizamu kutukwasa kushoborocerwa ebintu by’omugasho ebiri kwenda kubaho juba aha. (Emi 4:18; Dan 2:28) Nitubasa kwesiga tutari kubanganisa ku okubonabona kwingi, kurije kutandika turi kumanya ebintu byona ebi turi kwetenga kugira ngu tugumizemu kuba abesigwa kandi tugumizemu kugira obumwe omuri obwo bwire obugumire. Konka, tushemerire kwijuka ku hariho n’ebindi bintu ebi tutari kumanya ebiri kwenda kubaho juba aha. Omuri eki kicweka, twaza kubanza turebe enshonga twagizire ebi twahindura omu ku twabire turi kureba bimwe omuri ebyo bintu. Bwanyima nitureba bimwe omu bintu ebi turi kumanya ebirije kubaho omu biro by’omu misho, n’oburyo obu Tata w’omu iguru arije kubikoramu.
EBI TUTARI KUMANYA
3. Ni enki eki twabire turi kugamba aha bikwatirine n’obwire obu abantu bariba batacayine oburyo bw’okwiriza Yehova, kandi shi ahabw’enki twabire turi kubitecereza tusyo?
3 Omu bwire bwa kare, tukaba turi kugamba ku aha ntandikiro y’okubonabona kwingi, abatari kwikiriza bariba batacayine oburyo bw’okwikiriza Yehova ngu barokoke Haramagedoni. Tuhika ahari eyo nsharamu ahabw’okuba twabire turi kutecereza ku enkuru y’omwijuro eri obuhanuzi oburi kugamba ebirije kubaho omu biro by’omu misho. Ecokureberaho: Tukaba turi kutecereza ku nk’oku hatine omuntu owabire ori kubasa kutaha omu bwato Yehova ku yamazire kucinga orwigi, ari ko hatine omuntu n’omwe orije kwikiriza Yehova ninga ngu arokoke, okubonabona kwingi ku kurimara kutandika.—Mat 24:37-39.
4. Mbehi tushemerire kugamba ku ebiri kugambwa omu nkuru y’omwijuro ari obuhanuzi bw’ebirije kubaho omu biro by’omu misho? Shoborora.
4 Mbehi tushemerire kureba enkuru y’omwijuro nk’obuhanuzi bw’ebirije kubaho omu biro by’omu misho? Ec’okugarukamu ni ingaha. Ahabw’enki? Ahabw’okuba, Bibuli tihine eki eri kubigambaho. a Ni amazima Yesu akagereranisa obwire bwa Nowa n’obwire obu turimu, konka taragambire ku enkuru y’omwijuro yabire eri obuhanuzi bw’ebiri kwenda kubaho omu biro by’omu misho, harimu nk’okwija kuzibira abantu kamanya amazima nk’oku Yehova yakingire orwigi rw’obwato. Konka eco tikiri kumanyisa ku tutari kubasa kwegera aha nkuru ya Nowa y’omwijuro.
5. (a) Ni kiha kikorwa eki Nowa yakozire hatakabireho omwijuro? (Abaheburayo 11:7; 1 Petero 3:20) (b) Ni bata oku omurimo g’okuburira ogu turi kukora omuri obu bwire turi kubasa kugugereranisa n’ogu Nowa yakozire?
5 Nowa ku yahurire obutumwa bwa Yehova bw’okurabura akereka ku yabire ayine okwikiriza ari kombeka obwato. (Shoma omu Baheburayo 11:7; 1 Petero 3:20.) Ni co kimwe, abantu abantu abari kuhurira obutumwa burungi bw’Obukama, bashemerire kuta omu bikorwa ebi bahurira. Byak 3:17-20) Petero aketa Nowa ‘omuburizi w’okuhikirira.’ (2 Pet 2:5) Konka nk’oku twabyegire omu kicweka ecabandirize eki, tituri kumanya yaba Nowa yakozire kampeyini y’okuburira omu nsi yona, omwijuro gutakatandikire. Omuri obu bwire nitwekwatanisa omu murimo g’okuburira oguri kukorwa omu nsi yona kandi nitugukora n’amani. Konka nabwo, tituri kubasa kuhika ahari buri omwe omu batwire omu nsi kugira ngu tumuburire obutumwa burungi emperu etakizire. Ahabw’enki?
6-7. Ahabw’enki turi kubasa kugamba ku tutari kubasa kuhika ahari buri omwe ngu tumuburire obutumwa burungi emperu etakizire? Shoborora.
6 Tecereza aha bi Yesu yagambire aha bikwatirine n’omurimo gwitu g’okuburira. Akaba yagambire ku obutumwa burungi bwabire buraburirwe ‘omu nsi yona, kugira ngu bubere amahanga obuhamya.’ (Mat 24:14) Obwo buhanuzi burimu kuhikirira omuri obu bwire kukira kare hona. Obutumwa burungi burimu kuburirwa omu ndimi eziri kurenga 1,000, kandi birabire aha rubuga rwa jw.org, nibuhika aha bantu bingi abatwire omu nsi.
7 Konka, nambwenu Yesu akagamba ku abegi beye babire bataramare kuburira ‘etawuni zona’ ninga buri muntu wena, atakizire. (Mat 10:23; 25:31-33) Ebyo bigambo bya Yesu nibyija kuhikirira n’omuri obu bwire. Omuri obu bwire, abantu bingi batwire omu bicweka by’ensi ebi omurimo gwitu gwazibirwemu. Nambwenu, buri dakika nihazarwa abana bingi. Nitukora cona eki turi kubasa ngu tuhisye obutumwa burungi aha bantu b’omu ‘amahanga gona, enganda zona, n’endimi n’abantu.’ (Kush 14:6) Konka mazima, tituri kubasa kuburira buri muntu wena otwire omu nsi obutumwa burungi emperu etakizire.
8. Ni kiha kibuzo eki turi kubasa kwebuza aha bikwatirine n’oku Yehova arije kucwa emanja omu biro by’omu misho? (Nambwenu reba ekishushani.)
8 Ebyo nibibasa kutuma twayebuza ebi bibuzo: Ni enki ekirije kuhika aha bantu abatarije kutunga oburyo bw’okumanya obutumwa burungi, okubonabona kwingi kutakatandikire? Ni bata oku Yehova n’Omwana weye owu yahire omurimo g’okucwa emanja barije kubatwariza? (Yoh 5:19, 22, 27; Byak 17:31) Ecahandikirwe kikuru c’eki kicweka, nikigamba ku Yehova ‘atari kwenda ngu omuntu wena ahwerecerere.’ Ahobwe nayenda ngu ‘bona bahike aha kwehana.’ (2 Pet 3:9; 1 Tim 2:4) Tushemerire kwijuka ku hatine eki Yehova yagambire aha c’okugarukamu c’eco kibuzo. Ni amazima, taratugambire ebintu byona ebi yakozire n’ebi arije kukora.
Ni bata oku Yehova arije kutwariza abantu abataratungire oburyo bw’okuburirwa obutumwa burungi okubonabona kwingi kutakatandikire? (Reba paragurafu ya 8) c
9. Ni enki eki Yehova ari kutushururira birabire ahari Bibuli?
9 Birabire omu Kigambo ceye, Yehova akatugambira ebintu bimwe ebi arije kukora. Ecokureberaho: Bibuli netugambira ku Yehova arije kuzora ‘abatahikirire,’ ni okugamba abantu abataratungire oburyo bw’okuburirwa obutumwa burungi ngu bahindure emitwarize yabo. (Byak 24:15; Luk 23:42, 43) Ebyo nibibasa kutuma twayebuza ebindi bibuzo by’omugasho.
10. Ni biha bindi bibuzo ebi turi kubasa kwebuza?
10 Mbehi abantu bona abarije kucwecerezibwa omu kubonabona kwingi nibija kuba batine amasiko g’okuzoka? Ebyahandikirwe nibyereka ge, ku abari kurwanisa Yehova n’amahe geye barije kucwecerezibwa ahari Haramagedoni kandi ku batarije kuzoka. (2 Tes 1:6-10) Konka shi ni enki ekirije kuhika aha bantu, abarije kwitwa n’ebihikirizi, butandu ninga bakitwa n’abantu omu bwire bw’okubonabona kwingi? (Mub 9:11; Zek 14:13) Mbehi abo bantu nibija kuba bari omu ‘batahikirire abarije kuzoka omu nsi ensya? Mazima eco tituri kukimanya.
EBI TURI KUMANYA
11. Ni enki ekirije kugenderwaho omu kucwera abantu emanja ahari Haramagedoni?
11 Hine ebi turi kumanya aha bikwatirine n’ebirije kubaho omu biro by’omu misho. Ecokureberaho: Nitumanya ku ahari Haramagedoni, abantu barije kucwerwa orubanja hagendirwe aha ku batwarize benetata ba Kristo. (Mat 25:40) Abarije kucwerwa orubanja bakatebwa omu ntama, n’abarije kuba bashagikire abashukirweho omwika hamwe na Kristo. Nambwenu nitumanya ku bamwe omuri benetata ba Kristo barije kuba bacari omu nsi bwanyima kace y’okutandika k’okubonabona kwingi, kandi tibarije kutwarwa omu iguru kuhisa obu hariba hari kuburayo obwire buce ngu Haramagedoni etandike. Omu bwire bwona obu benetata ba Kristo bacari omu nsi, omuntu wena oyine omutima murungi nabasa kutunga oburyo bw’okubashagika omurimo ogu bari kukora. (Mat 25:31, 32; Kush 12:17) Ahabw’enki ebyo bintu biri eby’omugasho?
12-13. Ni bata oku abamwe bari kubasa kwija kutwaza bamara kureba ‘Babuloni orurembo rukuru’ rwamara kucwecerezibwa? (Nambwenu reba ekishushani.)
12 N’omu bwire bw’okubobabona kwingi, abamwe omu barije kureba okucwecerezibwa kwa ‘Babuloni orurembo orukuru’ nibabasa kwija kwijuka oku Abahamya ba Yehova babire bakigambire. Mbehi bamwe omu barije kubireba nibija kuhindura emitima yabo?—Kush 17:5; Ezek 33:33.
13 Ebyo bibireho, bikaba biri kushushana n’ebyabire omuri Egiputa omu bwire bwa Musa. Yijuka ku abantu b’emiringo yona bayekwatanisize n’Abisirayeli obu babire nibaruga omuri Egiputa. Abamwe omuri bo nibabasa kuba batandikire kwikiriza bamara kureba okurabura kwa Musa okukwatirine n’ebibonaboneso ikumi, kwamara kuhikirira. (Kur 12:38) Yaba ebintu nk’ebyo birije kubaho omu bwire bw’okucwecereza Babuloni orurembo rukuru, mbehi nikija kutushasha abantu bamwe batandika kugira okwikiriza hasigire obwire buce ngu emperu ehike? Ingaha mazima! Nitwenda kutoreza Tata witu w’omu iguru, ‘Ruhanga ow’okusaasira n’embabazi, otarahuka kugira ekiniga, oyijwire embabazi n’amazima.’ b—Kur 34:6.
Abamwe ku barije kureba okucwecerezibwa kwa Babuloni orurembo rukuru nibija kwijuka oku Abahamya ba Yehova bakigambire (Reba paragurafu ya 12-13) d
14-15. Ahabw’enki Yehova atarije kuha omuntu amagara agatahwaho akuratize obwire obu yaferiremu ninga ahu yabire atwire? Shoborora. (Zaburi ya 33:4, 5)
14 Hine obu turi kuhurira omuntu yagamba ngu: “Kikabonera munonga abagizire eka yange, bafire okubonabona kwingi kutakatandikire kugira ngu bije kugira amasiko g’okuzoka.” Kandi mazima nitugamba ebigambo nk’ebyo ahabwa rukundo eyi turi kubakunda. Konka, okutunga amagara agatahwaho, tikirije kurugirira aha bwire obu omuntu yaferiremu. Yehova ni Omucwamanja ohikirire kandi ori kukora ensharamu ezirimu oburinganiza. (Shoma omuri Zaburi ya 33:4, 5.) Nitubasa kwesiga tutari kubanganisa ku ‘Omucwi w’emanja zona z’ensi’ arije kukora ebihikire.—Kut 18:25.
15 Nambwenu kihikire kugamba ku omuntu atarije kutunga amagara agatahwaho ahabw’ahantu ahu atwire. Kikaba kitahikire kugamba ku Yehova arije kuta abantu abari kurenga za miliyoni omu kicweka c’abari kugereranisibwa n’‘embuzi,’ ngu ni ahabw’okuba babire batwire omu mahanga agu bataratungire omugisha g’okuburirwa obutumwa burungi bw’Obukama. (Mat 25:46) Omucwamanja ohikirire w’ensi yona, nafa aha bantu kukira oku itwe turi kubitecereza. Tituri kumanya oku Yehova arije kutwaza omu bwire bw’okubonabona kwingi. Konka obu Yehova ariyija kweza izina ryeye omu mahanga gona, bamwe omu bantu nibabasa kwija kutunga oburyo bw’okwega ebiri kumukwataho, bamwikirize kandi baze aha aha rubaju rweye.—Ezek 38:16.
Okubonabona kwingi ku kurimara kutandika, . . . abamwe omu barije kubireba nibija kuhindura emitima yabo?
16. Ni enki eki twamanyire aha biri kukwata ahari Yehova? (Nambwenu reba ekishushani.)
16 Birabire omu kwega Bibuli tukamanya ku Yehova ari kureba amagara g’abantu nk’ag’omuhendo munonga. Akatanga Omwana weye kugira ngu twena tubase kwija kubaho ebiro byona. (Yoh 3:16) Nitwerebera oku Yehova ari kutukunda munonga. (Isa 49:15) Twena namanya amazina gitu. Mazima Yehova natumanya ge, kandi n’obu twakufa nabasa kutuzora, ahakuba nayijuka buri kantu kona akari kutukwataho harimu n’ebi abandi bari kubasa kutwijukiraho! (Mat 10:29-31) Mazima, nitubasa kwesiga tutari kubanganisa ku Yehova arije kucwa emanja ezihikire, ahakuba naringaniza, ahikirire kandi ayine embabazi nyingi.—Yak 2:13.
Nitubasa kwesiga tutari kubanganisa ku Yehova arije kucwera abantu emanja omu buryo burungi, ahakuba naringaniza, ahikirire kandi ayine embabazi nyingi (Reba paragurafu ya 16)
17. Ni enki eki turije kushwijuma omu kicweka ekiri kukurataho?
17 Ebyo bintu bisya ebi twamanyire nibituma twakizaho kukora omurimo g’okuburira kukira kare hona. Ahabw’enki turi kubasa kugamba tusyo? Kandi shi ni enki ekiri kutuma twagumizamu kuburira obutumwa burungi tutari kucweka entege? Nitwija kugarukamu ebyo bibuzo omu kicweka ekiri kukurataho.
ECESHONGORO CA 76 Nikukureetera Kwehurira Ota?
a Yaba ori kwenda kumanya byingi aha nshonga ezatumire twagira ebi twahindura ahari eyi nyegesa, reba ekicweka ekiri kugira ngu: “Ahakuba eco ni co wasimire” omuri w15-E 3/15, p. 7-11.
b Babuloni orurembo rukuru ku erimara kucwecerezibwa, abahereza ba Yehova bona baryagezibwa omu kutahirira kwa Gogi wa Magogi. Omuntu wena oriba ori aha rubaju rw’abahereza ba Ruhanga bwanyima y’okucwecerezibwa kwa Babuloni orurembo rukuru, na we aryagezibwa.
c EKISHUSHANI: Ebishushani bishatu ebiri kwereka enshonga abamwe batari kuhikwaho n’obutumwa obu turi kuburira: (1) Omukazi otwire omu ihanga eritari kwikiriza amadini ga Kikristo, (2) omushija n’omukazi abatwire omu ihanga ahu obutegeki buri kuzibira omurimo g’okuburira kandi bikata amagara omu kabi, (3) omushija otwire omu kacweka ka hare munonga aku tutari kubasa kuhikamu.
d EKISHUSHANI: Omukazi ocari muto owarugire omu mazima yayijuka ebi yayegire aha bikwatirine n’okucwecerezibwa kwa ‘Babuloni orurembo rukuru.’ Yahindura omutima gweye kandi yagaruka aha bazire beye b’Abakristo. Ebintu nk’ebyo ku biri kubaho nituba turi kwenda kutoreza emitwarize ya Tata witu w’omu iguru ori kwesimira abasisi abari kwehana kandi bakamugarukira.
