1. Ninlogela nni wi ninkalawo masaka otikiniha?

 NINKALAWO masaka otikiniha vaddiddi! Malabo otene, ninowona mavuhulo a mBibiliani akwanihedheyaga. Motagiha, ninomona mwene w’o norte na mwene w’o sul awanelaga ottonga elabo. (Dan. 11:40) Ninowona miselu dhapama dha Omwene wa Mulugu dhilaleyiwaga mwilaboni mwetemwene vina attu matxikwi na matxikwi asakulaga omulabela Yehova. (Iza. 60:22; Mt. 24:14) Ninowakela dhoja dhinji dhomuyani “vansakanivá.”—Mt. 24:​45-47.

2. Txini enfwanyelihu okuluvela vina oziwa?

² Yehova onodhowavi anikamihedhaga ononelamo mapadduwo amakamaka anereye mohigonela. (Gano 4:18; Dan. 2:28) Kaninaganyedha wi goyi enddimuwa egaroma, iyo ninele oziwa dhetene dhinfwanyelihu okosa wi niwodhe ovilela vina oviluwa mudhidhi obu worutxa. Mbwenyi ninofwanyela vina oziwa wi dhihikalawo dhilobo dhihinziwa iyo sabwa ya dhinapadduwe musogorho. Mwari mwa nsunzo ntti, vamaromo ninele wona enittukuleli otxinja yalogilihu mwaha wa mapadduwo aba. Vasogorhova ninele wona dhilobo dhina dhinziwa iyo sabwa ya musogorho vina mukalelo onakose Babi wehu wa wirimu dhilobodha.

 EHINZIWA IYO

3. Txini yalogilehu mwaha wa mudhidhi ohinakane attu gari ya omuroromela Yehova, nanda txini yanittukuleli ologa ejuwene?

³ Wale, iyo naloga wi goyi enddimuwa egaroma, attu kagakanile vina gari ya omuroromela Yehova vina oviluwa mu koddoni ya Armagedón. Iyo naloga ejuwene sabwani nobuwela wi mapadduwo ereyile nsaka na Mpulo dhatonyihedha dhilobo dhigapadduwile musogorho. Motagiha, nobuwela wi dhahene ninga mufugile Yehova musuwo wa pangaya Mpulo ohinaroma, omagomo wa goyi enddimuwa, attu kagawodhile omulabela Yehova vina ovuneya.—Mt. 24:​37-39.

4. Sabwaya jani kaninfwanyela ologa wi dhetene dhipadduwile nsaka na Nowé dhigahakwanihedheya mowakwana-mwene musogorho?

⁴ Japama ologa wi elobo modha-modha epadduwile nsaka na Mpulo yatonyihedha dhilobo dhigapadduwile musogorho? Yowakulaya jawi, nne. Sabwaya jani? Sabwani Bibilia kanloga ejuwene. a Yezu ohiladdaniha “masaka a Nowé” na odha waye, mbwenyi iyene kalogile wi dhipadduwile nsaka na Nowé dhigahakwanihedheya musogorho; ninga motagiha mudhidhi ofugile Yehova musuwo wa pangaya. Mbwenyi ejo kintapulela wi iyo kaninsunzavo elobo na nipadduwo na Nowé vina na Mpulo.

5. (a) Elobo gani ekosile Nowé Mpulo ohinatti? (Ahebreu 11:7; 1 Pedro 3:20) (b) Mabasa a olaleya akosile Nowé anladdana dhavi na mabasa ehu olaleya masaka abano?

⁵ Mwewale Nowé muselu wottonga wa Yehova, iyene olagihile nroromelo modhela  omusasanya pangaya. (Kengesa Ahebreu 11:7; 1 Pedro 3:20.) Na mukalelo wakakene, attu anvuruwana miselu dhapama dha Omwene wa Mulugu anofwanyela olagiha nroromelo nawa modhela ovirihamo esile dhinsunzani. (Mer. 3:​17-20) Pedro ohiloga wi Nowé wali muttu wasunziha “[ekalelo] ya muthu womyala murima.” (2 Ped. 2:5) Mbwenyi ninga monile iyo mu nsunzo nivirile, kaninziwa akala Nowé wahisasanyedha mabasa a olaleya wi alaleyele attu akala mwilaboni Mpulo ohinatti. Masaka abano iyo ninozuzumela mabasa a olaleya vina ninovilibihedha walaleya attu a elabo yotene. Masiki nivilibihedhaga venjene, kaninawodhe walaleyela otene miselu dhapama omagomo ohinatti. Sabwaya jani?

6-7. Ninlogela nni wi kaninawodhe walaleya miselu dhapama attu otene a mwilaboni omagomo ohinatti? Katapulela.

⁶ Katanalela elogile Yezu mwaha wa mabasa ehu a olaleya. Iyene wahiloga nottaga wi “miselu esi dhapama dha Omwene dhinele olaleyiwa mwilaboni mwetemwene wi attu otene ewe.” (Mt. 24:14) Masaka abano nivuhulo ntti ninowakwanihedheya opitta wale. Miselu dha Omwene dhinolaleyiwa na dhilogelo opitta 1.000. Vina sabwa ya saiti yehu jw.org attu enjene mwilaboni anosunza mwaha wa Omwene wa Mulugu.

⁷ Mbwenyi Yezu ohawaddela anamafwara aye wi awene “[kagavirile] sidadi dhotedhene,” nne kagalaleyile attu otene, iyene ahinafiya. (Mt. 10:23; 25:​31-33) Masaka abano, ninowona wi mazu a Yezu bebaribari. Attu matxikwi na matxikwi masaka abano ankalawo dhilabo munkoddihiwa mabasa ehu, ottiya ejo kadda mutala onvira anobaliwavi aima enjene. Ninokosa mpaka vanwodhelihu wi nalaleyele miselu dhapama attu “a vilabo dhotene, a mahimo [vina] a vilogelo” dhotene. (Ovuh. 14:6) Ebaribariya jawi kaninawodhe walaleya attu a elabo yotene miselu dhapama omagomo ohinafiya.

8. Mwaha wa mattongelo a Yehova a musogorho nivuzo gani ninfwanyelihu ovikosa? (Koona vina mafoto.)

⁸ Mwa dhahene vanowiteya nivuzo: Kito mwa abale ahinakane gari ya ovuruwana miselu dhapama goyi enddimuwa ehinaroma, Yehova na Mwanaye, odduwene omusakuliye wi attonge nlogo na attu anakose eni na awene? (Jo. 5:​19, 22, 27; Mer. 17:31) Nlebo na nsunzo ntti ninologa wi Yehova “kanfuna orimela wa muthu nne mmodha.” Ottiya ejo, iyene “onfuna wi etene afwanye mudhidhi worugunutxa murima.” (2 Ped. 3:9; 1 Tim. 2:4) Nona ninofwanyela oziwa wi Yehova, kanatti ologa enakosiye wi akule nivuzo ntti. Vina iyene kammageleliwa onaddela ekosiliye obe enakosiye.

9. Txini ennaddela Yehova mBibiliani?

⁹ Mu Nzuni naye, Yehova ononaddela dhilobo dhinakosiye. Motagiha, Bibilia onologa wi Yehova onele wavenyiha “attu abure” ahikanile gari ya ovuruwana miselu dhapama vina otxinja mikalelo dhawa. (Mer. 24:15; Lk. 23:​42, 43) Nona vanowiteya nivuzo nina namakamaka.

10. Mavuzo gani mena aniteya?

¹⁰ Abale anakwe mudhidhi wa goyi enddimuwa anele otolotxiwa na mukalakala ahikanaga njedhelo n’ovenyihiwa mukwani? Malebo anolagiha wi abale amusadduwele Yehova, anatolotxiwe na iyene vamodha na anyakoddo aye kanavenyihiwe mukwani. (2 Tes. 1:​6-10) Kito mwa abale ena, motagiha, ankwa na asidenti vina ampiwa na attu  ena? (Koh. 9:11; Zak. 14:13) Enaya mwa aba anodhaga okosa mpaddi wa “attu abure” anavenyihiwe mukwani mwilaboni eswa? Kaninziwa.

ENZIWEHU

11. Attu mu Armagedón anattongiwe mowiwanana na eni?

¹¹ Ninoziwa dhilobo dhinji mwaha wa mapadduwo a musogorho. Motagiha, ninoziwa wi mukoddoni ya Armagedón attu anattongiwe modhela mukalelo waweddihilani abali a Kristu. (Mt. 25:40) Abale otene anattongiwe ninga mabila ahimukamihedha Kristu vina attikitteliwi. Ninoziwa vina wi abali ena a Kristu anakale velaboni ya vati goyi enddimuwa egaroma, kanattukuleliwe wirimu koddo ya Armagedón ehinaroma. Abali ena a Kristu balivi velaboni ya vati, enowodheya attu apama okana gari ya wakamihedha vina okamihedha mabasa anakosege awene. (Mt. 25:​31, 32; Ovuh. 12:17) Dhilobo esi dhonile iyo dhikalele nni dhamakamaka?

12-13. “Babilónia Munddimuwa” agamala otolotxiwa, txini enakose attu ena? (Koona vina mafoto.)

¹² Enodhaga opadduwa goyi enddimuwa biromile, attu ena anone otolotxiwa wa “Babilónia Munddimuwa” wubuwela wi mwa vyaka dhinji Anamoona a Yehova anloga mwaha wa mapadduwo aba. Ena anone mapadduwo aba anele otxinja monelo wawa?—Ovuh. 17:5; Ezek. 33:33.

¹³ Ejo egapadduwa enele oladdana na ejile epadduwile na akadda Ejipitu masaka a Mizé. Kobuwela wi mudhidhi wabudduwa ana Izrayel mw’Ejipitu vamodha na awene “athimura athu enjene a vilabo dhothiyana-thiyana.” Ena mwa attu aba txino aromile okana nroromelo vonilani wi dhologa dha Mizé mwaha wa Milili Kumi dhihakwanihedheya-wene. (Obud. 12:38) Kito yakakene kopadduwa Babilónia Munddimuwa agamala otolotxiwa, ninele osilidhiwa attu ena agadha ovitaganyiha na iyo mudhidhi mung’onovi omagomo ohinatti? Nne, ejo kinapadduwe! Ninfuna nitagihe mikalelo dha Babi wehu wa wirimu,  “Mulugu wanthebwa, wathagaraga, wovilela, [odhalile okwela woweddeyana vina] wawiwananeyana.” b—Obud. 34:6.

14-15. Muttu onakane egumi yamukalakala musogorho sabwa ya mudhidhi okwileye obe mburho onkaliye? Katapulela. (Masalmo 33:​4, 5)

¹⁴ Masaka mena, ninomwiwa muttu alogaga, “Egahikala yapama munammudhi waga kookwa goyi enddimuwa ehinaroma wi akane njedhelo n’ovenyihiwa mukwani.” Dhihikalawo mwaha dhapama dhinattukulela awene ologa esuwene. Mbwenyi egumi yamukalakala ya muttu musogorho kintanala nsaka nikwileye. Yehova, Namattonga woligana—dila dhotene dhogana dhaye s’apama, s’oligana. (Kengesa Masalmo 33:​4, 5.) Ninofwanyela okuluvela wi “Namathonga wa elabo yotene” onele wira dhapama.—Wita 18:25.

¹⁵ Okalawo wa muttu namukalakala musogorho mpo kuniwanana na mburho onkaliye. Txipo kinwodheya Yehova wattonga attu matxikwi na matxikwi ninga “mbuzi” sabwa ya awene okala dhilabo muhikanilani gari ya ovuruwana miselu dha Omwene. (Mt. 25:46) Namattonga woligana wa elabo yotene onowazuzumela attu aba opitta munazuzumela iyo. Iyo kaninziwa mukalelo oneddihe Yehova mapadduwoya mudhidhi wa goyi enddimuwa. Txino ena mwa attu aba anele okana gari ya osunza mwaha wa Yehova, omuroromela vina osakula okala mpaddi waye mudhidhi onatxenihiye nzina  naye vamentoni va malogo otene.—Ezek. 38:16.

16. Txini edhile iyo oziwa mwaha wa Yehova? (Koona vina foto.)

¹⁶ Sabwa ya omusunza Bibilia, iyo ninoziwa wi Yehova onovaha ttima vaddiddi egumi ya attu. Iyene ohiperheka egumi ya Mwanaye wi iyo notene nikane gari ya okalawo namukalakala. (Jo. 3:16) Iyo notene ninowodha ozinddiyela okwela wa Yehova. (Iza. 49:15) Iyene onomuziwa muttu-muttu wa iyo na nzina naye. Mwebaribari, iyene ononiziwa deretu, nona akala ninokwa iyene onowodha onivenyiha sabwani onowubuwela dhilobo dhotene mwaha wehu vina dhubuwelo dhanihuna! (Mt. 10:​29-31) Nona nihikana mwaha dhapama dhinnittukulela okuluvela wi Babi wehu wokwela wa wirimu onele omuttonga noligana muttu-muttu sabwani iyene ddeziwelo, ddoligana vina ddattagaraga.—Tia. 2:13.

17. Txini enone iyo nsunzo ninfwarela?

¹⁷ Ononelamo oku oswa onottukulela mabasa ehu a olaleya okala anamaguve opitta wale. Ninlogelani ejuwene? Txini ennittukulela odhowavi nizuzumelaga mabasa a olaleya? Nsunzo ninfwarela ninele wona dhowakula dha mavuzo aba.