MUTWE WA KULILONGESA 19
MWASO 22 Wanangana Unayulu—Wize!
Yika Tunanyingika ha Chize Yehova Makapatwila Atu Kulutwe lia Matangwa?
“Yehova . . . kazangile hanga mutu niumwe atoke.”—2 PETU. 3:9.
YIZE MUTULILONGESA
Mutwe uno muutukwasa kupwa ni shindakenyo ngwetu, muze Yehova makapatwila atu kulutwe lia matangwa, iye makachilinga mu jila yalita hamwe ni ululi.
1. Yika yinalingiwa ha matangwa wano tuli?
YETU tuli ha matangwa waze kunalingiwa yuma yinji! Hita tangwa, tunamono kumanunuka cha uprofeto wa mu Mbimbiliya. Ngwe chilweza, tunamono chize “mwanangana wa ku norte” ni “mwanangana wa ku sule” analitachika hanga atale yoze mayula hashi. (Danie. 11:40) Tunamono chize sango jipema ja Wanangana wa Zambi, anajambujola hashi heswe ni kukwasa tununu a tununu twa atu hanga asakule kulingila Yehova. (Iza. 60:22; Mateu 24:14) Chikwo nawa, tunatambula kulia chinji cha ku ufulielo “ha shimbu lialita.”—Mateu 24:45-47.
2. Shindakenyo yika mutuhasa kupwa nayo, alioze yika twatamba kunyingika?
2 Yehova kananungu ni kutukwasa tunyingike yuma yilemu yize kwasala hakehe hanga yilingiwe. (Yishi. 4:18; Danie. 2:28) Mutuhasa kupwa ni shindakenyo ngwetu, muze luyinda munene maputuka, mutukanyingika yize mutulinga hanga tununge ni kushishika kuli Yehova ni kulinunga ni mandumbu jetu. Alioze chili chilemu kunyingika ngwetu, yuma yimwe yize muyikalingiwa kulutwe, kutwayinyingikine. Ha mutwe uno, mutumonaho kwalumuka chize chalingiwa ku malongeso jetu. Hanyima, mba mutumona nawa yuma yize tunanyingika hakutwala ku matangwa a kulutwe ni yize Yehova makalinga.
YUMA YIZE KUTWANYINGIKINE
3. Yika twapwile ni kunyonga ngwetu muyilingiwa kuli atu ha luyinda munene, mumu liaka twapwile ni kunyonga chocho?
3 Kunyima twapwile ni kwamba ngwetu, muze luyinda munene maputuka, atu waze hi Yela ja Yehova ko kechi kapwa ni uhashi wakumuwayila mba akaalamwine ha Armagedone. Twapwile ni kwamba chocho mumu te twakunyonga ngwetu, yize yalingiwile ha sanga lia meya yinalite ni yize muyikalingiwa kulutwe. Ngwe chilweza, te twakunyonga ngwetu, ngwe chizechene niumwe kakanjilile mu ulungu muze Yehova ayikile pito, ha luyinda munene atu waze hi Yela ja Yehova ko niumwe kechi kahasa kulilamwina.—Mateu 24:37-39.
4. Mumu liaka kutushi kuhasa kwamba ngwetu, yuma yize yalingiwile ha matangwa ja Noa te muyipwa nawa ni umwe umanunuko unene kulutwe? Lumbununa.
4 Shina muchilita kwamba ngwetu, hita chuma chalingiwile ha sanga lia meya chinatale ha yize muyikalingiwa kulutwe? Ka. Mumu liaka? Mumu Mbimbiliya kuyishi kwamba chocho. a Tunanyingika ngwetu, Yesu katesele matangwa ja Noa ni shimbu lia kuheta chenyi. Alioze iye kakambile ngwenyi, yuma yeswe yize yalingiwile ha “matangwa ja Noa,” ngwe kuyika pito lia ulungu te muchipwa ni umwe umanunuko unene kulutwe lia matangwa. Chipwe chocho, yetu mutuhasa kulilongesa yuma yinji ha lusango wa Noa, ni ha yize yalingiwile ha sanga lia meya.
5. (a) Kuchi Noa asolwele ufulielo? (A-Hepreu 11:7; 1 Petulu 3:20) (b) Mu mutapu uka kwambujola chize tunalingi musono chinalifu ni chize Noa alingile?
5 Muze Noa evwile utowezo wa Yehova, hazehene yasolola ufulielo, yaputuka kutunga ulungu. (Tanga A-Hepreu 11:7; 1 Petulu 3:20.) Chizechene nawa, muze atu akwivwa sango jipema ja Wanangana, katamba kukaula yize akulilongesa. (Yili. 3:17-20) Petulu kavulukile Noa ngwenyi: “Mukwa-kwambujola ululi.” (2 Petu. 2:5) Alioze, ngwe chize twamonanga ha mutwe wapalika, yetu kutwanyingikine nyi Noa kahashile lume kwambujola kuli atu eswe waze apwile ha mashimbu jacho. Musono, yetu twakuhasa kwambujola kuli atu anji hano hashi; nawa twakuchilinga mu jila yalita. Alioze, chipwe ngwe mutulinga yuma yeswayo, nihindu kutuchi kuhasa kwambulwila atu eswe shimbu songo kanda lichiza. Mumu liaka tunambe chocho?
6-7. Mumu liaka tunambe ngwetu, kutuchi kuhasa kwambujola kuli atu eswe waze atwama hano hashi shimbu songo kanda liza?
6 Tuchinyongenu ha yize Yesu ambile hakutwala ku mulimo wa kwambujola. Iye kambile ngwenyi, sango jipema ja Wanangana “kumakajambujola hashi heswe, jikapwe shindakenyo ku mavungu eswe.” (Mateu 24:14) Uprofeto uno, unamanunuka musono kuhiana ku mashimbu a kunyima. Sango ja Wanangana kanajambujola mu malimi kuhiana 1,000. Chikwo nawa, kupalikila mu site jw.org, atu a hashi heswe mahasa kulilongesa hakutwala ku Wanangana wa Zambi.
7 Alioze, Yesu kalwezele tumbaji twenyi ngwenyi, ayo te kechi kuhasa kuhwisa kwendangana mu mambonge eswe hanji ngwetu, te kechi kuhasa kwambujola kuli atu eswe shimbu iye kanda aheta. (Mateu 10:23; 25:31-33) Maliji wano a Yesu kanatale nawa ha mashimbu jetu. Tununu a tununu twa atu katwama ku yihela kuze yetu kutushi kuhasa kuheta. Chikwo nawa, ana anji kanasemuka ha hita munutu. Yetu twakusa tachi hanga tuwane atu a ku “minyachi yeswe, mavungu eswe ni yifuchi yeswe” ni kwambulwila sango jipema. (Uso. 14:6) Alioze umwenemwene uli ngwo, kutuchi kuhasa kwambujola kuli atu eswe waze atwama hano hashi shimbu songo kanda liza.
8. Yika mutuhasa kulihula hakutwala ku chize Yehova makapatwila atu kulutwe lia matangwa? (Tala nawa yizulie.)
8 Hanyima lia kushimutwina yino yeswe, mutuhasa kulihula ngwetu: Yika muyikalingiwa kuli atu waze keshi ni uhashi wa kwivwa sango jipema, shimbu luyinda munene kanda achiputuka? Yika Yehova ni Mwanenyi, yoze ahele chiteli cha kupatwila atu, makalinga hali ayo? (Yoa. 5:19, 22, 27; Yili. 17:31) Chisoneko chize chinakwate mutwe uno chinambe ngwo: Yehova “kazangile hanga mutu niumwe atoke, alioze kanazange hanga eswe alikonyeke.” (2 Petu. 3:9; 1 Timo. 2:4) Twatamba kunyingika ngwetu, ndo haliapwila Yehova kanda achitulweza chize makapatwila atu waze keshi ni uhashi wa kwivwa sango jipema. Chikwo nawa, yetu kutushi ni ulite wakufupa hanga Yehova atulumbunwine yuma yize alingile hanji yize makalinga kulutwe.
Yika Yehova makalinga kuli atu waze hanji kakapwile ni uhashi wa kwivwa sango jipema muze luyinda munene te kanda achiputuka? (Tala paragrafu 8) c
9. Yika Yehova makalinga kulutwe lia matangwa?
9 Kupalikila mu Mbimbiliya, Yehova kanatulweze yuma yimwe yize makalinga kulutwe. Ngwe chilweza, twakutanga ngwetu, Yehova makahindwisa “yihenge,” hanji ngwetu, atu waze kakapwile ni uhashi wa kwivwa sango jipema ni kwalumuna mwono wo. (Yili. 24:15; Luka 23:42, 43) Yino yinatutwale ku yihula yikwo yilemu.
10. Yihula yikwo yika yize mutuhasa kulihula?
10 Shina atu eswe waze makafwa ha luyinda munene kechi kapwa ni uhashi wa kwahindwisa? Mbimbiliya yakusolola zwalala ngwo, atu eswe waze makalimika ni Yehova, makaanongesa ha Armagedone; atu jacho kechi kaahindwisa. (2 Tesa. 1:6-10) Alioze ha luyinda munene, atu amwe hanji makafwa mumu lia yitela yikwo. Ngwe chilweza, muchihasa kupwa ngwe makafwa mumu lia misongo, ushinakaji, ponde, hanji kwashiha kuli atu ni akwo. Nyi che muchikapwa, yika muyikalingiwa kuli atu jacho? (Chilu. 9:11; Zeka. 14:13) Shina atu jacho makapwa mukachi ka “yihenge” waze makahindwisa mu chifuchi chaha? Kwamba umwenemwene, yetu kutwanyingikine kumbululo lia chihula chino.
YUMA YIZE TUNANYINGIKA
11. Ha jita ya Armagedone atu makaapatwila kulita ni yika?
11 Yetu tunanyingika yuma yimwe yize muyikalingiwa kulutwe. Ngwe chilweza, tunanyingika ngwetu, ha jita ya Armagedone atu makaapatwila kulita ni yize akulinga hali mandumbu ja Kristu. (Mateu 25:40) Atu eswe waze akukwasa Akwa-Kristu akuwayisa ni Yesu, makaapatwila ngwe mapanga. Tunanyingika nawa ngwetu, Akwa-Kristu amwe akuwayisa kumakapwa hano hashi muze luyinda munene maputuka. Ayo makaya wika mu malilu ha amwe mashimbu muze Armagedone kanda yiputuka. Amu Akwa-Kristu amwe akuwayisa makapwa hano hashi ha mashimbu jacho, muchihasa kupwa ngwe atu a mbunge yipema, makapwa ni uhashi wa kwakwasa ha mulimo uze akulinga. (Mateu 25:31, 32; Uso. 12:17) Mumu liaka yuma yino yili yilemu?
12-13. Yika hanji atu amwe makalinga muze makamona kunongesa cha “Babilonia Yinene”? (Tala nawa yizulie.)
12 Muchihasa kupwa ngwe hanyima lia kuputuka cha luyinda munene, atu amwe waze makamona chize “Babilonia Yinene” makayinongesa, makewuluka ngwo ha miaka yinji Yela ja Yehova kapwile ni kutulweza ngwo, yino te muyilingiwa. Shina amwe a kuli atu jacho, makaputuka kufuliela muli Yehova?—Uso. 17:5; Eze. 33:33.
13 Nyi yino ye muyikalingiwa, muyikewulula atu anji yuma yize yalingiwile mu Engitu ha mashimbu ja Mose. Tunanyingika ngwetu, atu anji kakawile A-Izalele ni kutuhuka mu Engitu. Amwe a kuli atu jacho, kota kaputukile kufuliela muli Yehova muze amwene yize Mose apwile ni kwamba hakutwala ku yilungo kumi yize yalingiwile mu Engitu. (Kutuhu. 12:38) Nyi yuma ya mutapu au muyilingiwa hanyima lia kunongesa Babilonia Yinene, shina mutukomoka ni kunyonga ngwetu, kuchalitele atu akwo kulichinga ni yetu shimbu songo kanda liheta? Ka, kutuchi kunyonga chocho! Yetu tunazange kupwa ngwe Yehova, “Zambi mukwa keke, mukwa vumbi, makoke kutenuka, wakulumbama ni utu wa zango ni umwenemwene.” b—Kutuhu. 34:6.
Atu amwe waze makamona kunongesa cha “Babilonia Yinene” makewuluka ngwo, ha miaka yinji kunyima, Yela ja Yehova kapwile ni kuhanjika ha chikuma chacho (Tala maparagrafu 12-13) d
14-15. Shina kutalatala cha kulutwe lia matangwa cha umwe mutu, chinatale ha tangwa lize mafwa, hanji kuze atwama? Lumbununa. (Samu 33:4, 5)
14 Ha mashimbu amwe, twakwivwa mandumbu amwe mamba hakutwala kuli umwe usoko wo ngwo, “Te muchipema iye kufwa, shimbu luyinda munene kanda aputuka hanga akapwe ni uhashi wa kumuhindwisa.” Kanji-kanji, mandumbu kakuhanjika yuma yino ni nyonga lipema. Alioze, kutalatala cha kulutwe lia matangwa cha umwe mutu, kuchatalile ha shimbu lize mafwa. Yehova kali Ngaji mungunu, kashika yiyulo yenyi yalita; nawa yapwa ya ululi. (Tanga Samu 33:4, 5.) Hachino, mutuhasa kupwa ni shindakenyo ngwetu, “Chisopa-milonga wa akwa hashi eswe” manunga ni kulinga yuma yalita mashimbu eswe.—Uputu. 18:25.
15 Mutuhasa nawa kwamba ngwetu, kutalatala cha kulutwe lia matangwa cha umwe mutu, kuchatalile kuze atwama. Yehova kechi kapatwila tununu a tununu twa atu ngwe “pembe” mumu ngwo, kapwile ku yihela kuze sango jipema kujakahetele. (Mateu 25:46) Nyi yetu twakulihulumba hali atu jacho, mba kuchi akwivwa chisopa-milonga wa akwa-hashi eswe yoze wakulinga yuma ni ululi? Yetu kutwanyingikine chize Yehova makatala ha yuma yacho ha luyinda munene. Hanji amwe a kuli atu jacho hanyima lia kumona yize muyikalingiwa ha luyinda munene, makaputuka kufuliela muli Yehova ni kupwa sali lienyi muze iye makahalisa jina lienyi hashi heswe.—Eze. 38:16.
Hanyima lia kuputuka cha luyinda munene, . . . shina atu amwe waze makamona yuma yacho makafuliela muli Yehova?
16. Yika tunanyingika hali Yehova? (Tala nawa chizulie.)
16 Kupalikila mu longeso lia Mbimbiliya, twakulilongesa ngwetu, mutu mweswe kali mulemu kumeso ja Yehova. Iye kahanyine mwono wa Mwanenyi hanga yetu eswe tupwe ni uhashi wa kutwama ni mwono ku miaka yeswe. (Yoa. 3:16) Yetu eswe twakumona zango lize Yehova ali nalio hali yetu. (Iza. 49:15) Iye kananyingika jina lia hita mutu. Kanatunyingika kanawa, kashika chipwe muze mutufwa, Yehova mahasa kutuhindwisa ngwe chizechene twapwa ni kutufunyisa manyonga waze tukwete. (Mateu 10:29-31) Yetu kutwatambile kuhangulula ngwetu, Tata yetu wa zango makapatwila mutu ni mutu mu jila ya ululi, mana ni keke.—Tia. 2:13.
Yetu mutuhasa kupwa ni shindakenyo ngwetu, Yehova makapatwila hita mutu mu jila ya ululi, mana ni keke (Tala paragrafu 16)
17. Yika mutulilongesa ha mutwe uze muuhataho?
17 Amu hitwapwa ni ulumbunwiso uno waha mu malongeso jetu, twamona ngwetu, haliapwila mulimo wa kwambujola twatamba kuulinga ni kawashi. Mumu liaka tunambe chocho? Yika yakututwala mba tununge ni kwambujola sango jipema ni mbunge yeswe? Mutuwana makumbululo a yihula yino ha mutwe uze muuhataho.
MWASO 76 Chize Twakwivwa!
a Mba unyingike nawa mumu liaka twalumuna ulumbunwiso uno, tala chikuma ‘Yino ye Jila yize Yakupemena,’ ha Kaposhi wa Kutalila 15 Março, 2015 mafwo 7-11.
b Hanyima lia kunongesa Babilonia Yinene, tuvumbi twa Yehova eswe makapalika mu cheseko muze makaalukukila kuli Ngoke wa Mangoke. Eswe waze makalichinga ni atu ja Yehova hanyima lia kunongesa Babilonia Yinene, no makapalika mu cheseko chacho.
c ULUMBUNWISO WA YIZULIE: Yizulie yitatu yinasolola chize muchihasa kupwa chikalu sango jipema kuheta kuli atu amwe: (1) Pwo yoze watwama mu chifuchi muze chapwa chikalu kwaluka ni kuya ku mbonge yeka, (2) Lunga ni pwo waze atwama mu chifuchi muze akukanjisa kulilongesa umwenemwene hanji chapwa ponde kuchilinga, ni (3) Lunga yoze watwama kuma kukalu kuheta.
d ULUMBUNWISO WA CHIZULIE: Umwe mukweze yoze wechele kulingila Yehova, kanewuluka yize alilongesele hakutwala ku kunongesa cha “Babilonia Yinene.” Hachino, hatesa kufuna kuli Yehova ni kufupa ukwaso wa yisemi jenyi. Nyi yino muyilingiwa, yetu twatamba kumona Yehova ngwe Tata mukwa-keke, mukwa-zango ni kuwahilila hamuwika ni yivulumunyi waze afuna kuli iye.
