CAWN AWK CAPAR 19
HLA 22 Pennak Dirh A Si Cang—Ra Cang Seh!
Hmailei Jehovah Biaceihnak Kong He Aa Tlaiin Zeidah Kan Hngalh?
“Bawipa [nih]. . . pakhat tlau [hrawh, NWT] hmanh hi a duhmi a si lo.”—2 PET. 3:9.
A BIK IN LANGHTERMI
Jehovah nih hmailei ah mi pawl kha ding te le hmaan tein bia a ceih hna lai tiah kan zumh khawh.
1. Lung cawlcangh awk ngai a simi caan ah kan nung tiah zeicah kan chim khawh?
KANNIH cu lung cawlcangh awk ngai a simi caan ah kan nung. Cucaah nifatin Baibal chimchungbia a tlinmi kha kan hmuh. Tahchunhnak ah, vawleicung nawlngeitu si an duh caah “chaklei siangpahrang” le “thlanglei siangpahrang” pakhat le pakhat an i dohmi kha kan hmuh. (Dan. 11:40, NWT) Vawleicung pumpi ah Pathian Pennak kong chim a simi le mi nuai tampi nih Jehovah biak ding in an i thimmi zong kha kan hmuh. (Isa. 60:22; Matt. 24:14) Cun “a caan hmaan tein” thlarau rawl tampi zong kan hmuh.—Matt. 24:45-47.
2. Zeidah kan zumh khawh, asinain zeidah kan hngalh a hau?
2 Jehovah nih a rauhhlan ah a cang dingmi a biapimi thil kong kha ṭha tein kan hngalhthiam nakhnga a kan bawmh peng. (Ptb. 4:18; Dan. 2:28) Harnak nganpi aa thawk tikah kan hngalh a herhmi thil kha kan hngalh lai i mah harnak caan chung ah zumhfek te le lungrual tein kan um peng lai tiah kan zumh khawh. Asinain hmailei kong he aa tlaiin kan hngalh lomi thil cheukhat a um ti zong kan hngalh a hau. Hi capar ah a cangmi thil sining cheukhat kong he aa tlaiin kan rak fiantermi kong kha zeicah kan remh ṭhan timi kong kan i ruah hmasa hna lai. Cun hmailei kong he aa tlaiin kan hngalhmi thil cheukhat kong le vancung kan Pa nih a tuah dingmi kong zong kan i ruah hna lai.
Zeidah Kan Hngalh Lo
3. Jehovah zumh awkah mi pawl caanṭha an ngeih lai lonak kong he aa tlaiin zeitindah kan rak fianter, zeicah cutin kan rak ruah?
3 A hmasa ah harnak nganpi aa thawk tikah zumlotu pawl cu Jehovah zumh awk le Armageddon in luat awkah caanṭha an ngei lai lo tiah kan rak fianter. Mah cu Buanchuakcho kong nih hmailei ah a cang dingmi kong kha a langhter duhmi a si tiah kan rak ruah caah a si. Tahchunhnak ah, Jehovah nih lawng innka a khar hnuah ahohmanh lawng chung ah an luh khawh ti lo bantuk in harnak nganpi aa thawk tikah ahohmanh nih Jehovah kha an zum kho ti lai lo i an luat kho ti lai lo tiah kan rak ruah.—Matt. 24:37-39.
4. Atu ah Buanchuakcho kong nih hmailei ah a cang dingmi kong kha a langhter duhmi a si tiah kan ruat rih maw? Fianter.
4 Buanchukcho kong kha chimchungbia phun in kan ruah awk a si maw? A si lo. Zeicah? Baibal nih cutin a chim lo caah a si. a Jesuh nih a rat ṭhan lainak caan kha “Noah chan” he a tahchunh. Asinain Jehovah nih lawng innka a khar ti bantuk, Noah chan ah a cangmi thil dihlak in hmailei ah tam deuh in a cang lai tiin cun a chim lo. Asinain Noah kong le Buanchukcho kong in kan cawn khawhmi a um lo tinak a si lo.
5. (a) Noah nih Buanchukcho hlanah zeidah a tuah? (Hebru 11:7; 1 Peter 3:20) (b) Noah phungchimnak le tuchan phungchimnak ah zei aa lawhnak dah a um?
5 Noah nih Jehovah ralrin peknak bia a theih tikah a zumhnak kha lawng a saknak thawng in a langhter. (Hebru 11:7; 1 Peter 3:20 rel.) Cu bantuk in Pathian Pennak kong a theimi hna nih an zumhnak kha an tuahsernak in an langhter a hau. (Lam. 3:17-20) Peter nih Noah kha “dinnak kong a chimtu” tiah a auh. (2 Pet. 2:5) Asinain a hmasa capar ah kan i ruah cang bantuk in Noah nih Buanchukcho hlanah vawleicung ah a ummi hna kip sinah phungchim ding in aa zuam maw, zuam lo ti tu cu kan hngal lo. Tuchan zong ah vawleicung pumpi ah a ummi mi kip sinah phungchim ding in teima tein kan i zuam. Asinain zeitluk in kan i zuam hmanh ah donghnak a phanh hlanah mikip sinah phung cu kan chim kho lai lo. Zeicah?
6-7. Donghnak caan a phanh hlanah vawleicung ah a ummi hna kip sinah thawngṭha kan chim kho lai lo tiah zeicah kan chim khawh?
6 Phungchim rian kong he aa tlaiin Jesuh chimmi kong kha ruathmanh. Jesuh nih “miphun vialte hna ca i tehte si awkah” thawngṭha cu chim a si lai tiah a chimchung. (Matt. 24:14) Mah chimchungbia cu tuchan ah a tling chinchin cang. Pennnak kong thanhnak cauk kha holhphun 1,000 leng in hmuh khawh a si cang. Cun mi tam deuh nih jw.org website in Pathian Pennak kong kha an hlathlai khawh cang.
7 Asinain Jesuh nih a zultu pawl kha mah ni a phanh hlan ah “khua dihlak ah nan rian kha nan liim” kho lai lo asiloah pakhat kip cio sinah phung nan chim kho dih lai lo ti zong in a ti hna. (Matt. 10:23; 25:31-33) Tuchan zong ah Jesuh bia a hmaan kha kan hmuh. Mi nuai tampi cu zalong tein phungchim khawh a si lonak hmun ah an um. Mah leng ah minit kip ah mi tampi cu fa an hring. Cucaah “phun kip ram kip, holh kip” sinah thawngṭha chim ding in kan si khawh chung in kan i zuam. (Biat. 14:6) Asinain donghnak a phanh hlanah mi kip sinah thawngṭha cu kan chim kho lai lo.
8. Jehovah i hmailei biaceihnak kong he aa tlaiin zei biahalnak dah kan i hal khawh men? (Hmanthlak zong zoh.)
8 Cucaah mah biahalnak hi a chuak: Harnak nganpi aa thawk hlanah thawngṭha theihnak caanṭha a ngei lomi hna kong ah tah zeitin? Jehovah le a Fapa nih anmah biaceih awkah ahote dah rian an pek hna lai? (Johan 5:19, 22, 27; Lam. 17:31) Hi capar i cherhchanhmi Baibal caang ah Jehovah nih “pakhat tlau [hrawh, NWT] hmanh hi a duhmi a si lo” tiah a ti. Mikip nih “ngaihchihnak ngei hna seh” ti a duh. (2 Pet. 3:9; 1 Tim. 2:4) Cucaah Jehovah nih mah biahalnak leh awkah zeidah a tuah lai ti kha a kan chim rih lo. Jehovah nih a tuahmi le a tuah dingmi kong kha a kan chimh a hau lo ti cu a hmaan ko.
Harnak nganpi aa thawk hlanah thawngṭha theihnak caanṭha a ngei lomi hna kha Jehovah nih zeitindah bia a ceih hna lai? (Catlangbu 8 zoh) c
9. Jehovah nih Baibal hmang in zeidah a kan chimh?
9 Jehovah nih a tuah dingmi thil cheukhat kong kha Baibal in a kan chimh. Tahchunhnak ah, Jehovah nih thawngṭha ngaih awk le an nunning thlen awkah caanṭha a ngei lomi “a ding lomi” pawl kha a thawhter ṭhan hna lai tiah Baibal nih a ti. (Lam. 24:15; Luka 23:42, 43) Mah ruang ah a dang a biapimi biahalnak zong a chuak.
10. A dang zei biahalnak dah a chuak?
10 Harnak nganpi chung ah a thimi hna cu thawhṭhannak ruahchannak um loin zungzal hrawh an si lai maw? Baibal ah Jehovah nih amah le a ralkap pawl a ralchanhmi hna cu Armageddon ah hrawh an si lai i an tho ṭhan ti lai lo tiah fiang tein a chim. (2 Thes. 1:6-10) Asinain midang kong ah tah zeitin? Tahchunhnak ah, leiser ral, accident le midang kut in an thi kho men. (Pct. 9:11; Zek. 14:13) Vawlei thar ah a tho ṭhan dingmi, “a ding lomi” mi hna lakah an lak i cheukhat cu an i tel ve lai maw? Zeihmanh kan hngal lo.
Zeidah Kan Hngalh
11. Armageddon ah mi pawl cu zei cung ah i hngat in dah biaceih an si lai?
11 Hmailei ah a cang dingmi thil kong kha tampi kan hngalh. Tahchunhnak ah, Armageddon ah mi pawl cu Khrih unau pawl an pehtlaih hna ning in biaceih an si lai ti kha kan hngalh. (Matt. 25:40) Tuu in biaceih a simi hna nih chiti thuhmi hna le Khrih an cohlanmi kha an langhter lai. Harnak nganpi aa thawk hnuah Khrih unau cheukhat cu vawlei ah an um rih lai. Armageddon aa thawk hlante ah vancung ah an kai lai. Cucaah Khrih unau pawl vawlei an um chung cu anmah le an rianṭuannak bawmh awkah caanṭha an ngei lai. (Matt. 25:31, 32; Biat. 12:17) Mah kong cu zeicah a biapi tuk?
12-13. “A Liannganmi Babilon” hrawh a simi an hmuh hnuah cheukhat nih zeitindah an lehrulh khawh? (Hmanthlak zong zoh.)
12 Harnak nganpi aa thawk hnuah mi cheukhat nih “A Liannganmi Babilon” hrawh a simi an hmuh tikah Jehovah Tehte Hna nih cutin a cang lai tiah kan rak chimmi kha an hun hngalh ṭhan lai. Mah thil sining hna an hmuh tikah mi cheukhat cu an lung aa thleng lai maw?—Biat. 17:5; Ezek. 33:33.
13 Moses chan lioah Izipt ram ah a cangmi kong kha ruathmanh. Exodus ah Israel mi pawl Izipt ram in an chuah tikah “midang tampi” zong an sinah an kal ve tiah a ti. An lak i cheukhat nih Jehovah an zumhmi cu Rai Phunhra kong he aa tlaiin Moses ralrin pekmi bia a tlinmi an hmuh caah a si kho men. (Ex. 12:38) A Liannganmi Babilon hrawh a si hnuah cu bantuk thil sining a can ve ahcun donghnak caan a phanh hlan te ah mi pawl cu kanmah he an i fonh caah kan thin a hun awk a si maw? A si lo! ‘Zaangfahnak le vel ngeihnak in a khatmi, fawite in a thin hunter khawh lomi, a fekmi dawtnak tampi mi cung ah a langhter i mi cung ah zumhawk tlak ngaingai a simi’ vancung kan Pa bantuk si kan duh. b—Ex. 34:6.
“A Liannganmi Babilon” hrawh a simi kha cheukhat nih an hmuh tikah Jehovah Tehte Hna nih mah thil sining kong kan rak chimmi kha an theih ṭhan lai. (Catlangbu 12-13 zoh) d
14-15. Mi pakhat zungzal nun ding timi cu zeitik ah a thih asiloah khoika hmun ah dah a um timi cung ah aa hngat maw? Fianter. (Salm 33:4, 5)
14 A caan ah unau pawl nih Jehovah a bia lomi an chungkharmi kong he aa tlaiin hitin an chim men lai: “Harnak nganpi aa thawk hlanah an thih ahcun an caah a ṭha deuh lai. Zeicahtiah an caah thawhṭhannak ruahchannak a um deuh lai.” Cu bantuk in kan chimmi cu zaangfahnak kan ngeih caah a si men lai. Asinain mi pakhat zungzal nun ding timi cu zeitik ah dah a thih timi cung ah aa hngat lo. Jehovah cu a tlingmi Biaceihtu a si caah a biaceihnak cu a zungzal in a hmaan i a ding. (Salm 33:4, 5 rel.) “Vawleicung dihlak bia a ceihtu” nih a hmaanmi thil lawng a tuah lai ti kha kan zumh khawh.—Gen. 18:25.
15 Mi pakhat zungzal nun ding timi cu khoika ah dah a um timi cung zong ah aa hngat lo. Jehovah nih Pennak kong lehrulhnak caanṭha a ngei lomi hna hmun i an um caah nuai tampi kha “meheh” in bia a ceih bal hna lai lo. (Matt. 25:46) Kanmah nih kan ruahpiak khawhmi hna nakin vawleicung dihlak ding tein bia a ceihtu nih a ruahpiak khawh deuh hna. Harnak nganpi chung ah Jehovah nih zei thil hna dah a tuah lai ti cu kan hngal lo. Harnak nganpi chung ah a cangmi thil hna an hmuhmi nih Jehovah kong cawn awk, amah zumh awk le a lei ah ṭan awkah a forh khawh men hna.—Ezek. 38:16.
Harnak nganpi aa thawk hnuah . . . mi cheukhat cu an hmuhmi thil sining ruang ah an lung aa thleng lai maw?
16. Jehovah kong he aa tlaiin zei hna dah kan hun hngalh? (Hmanthlak zong zoh.)
16 Baibal kan hlathlai tikah Jehovah nih mi pawl zeitluk in dah a kan dawt ti kha kan hun hngalh. Zungzal kan nun khawh nakhnga a Fapa nunnak kha a kan pek. (Johan 3:16) Kan dihlak in Jehovah dawtnak kha kan hmuh. (Isa. 49:15) Pakhat cio i kan min kha a hngalh. Kan thih hmanh ah ṭha tein a kan hngalh i kan kong le kan i cinkenmi kong kha a philh lo caah a kan thawhter ṭhan khawh. (Matt. 10:29-31) Cucaah kan dawtmi vancung kan Pa nih pakhat cio kha hmaan tein, ding tein le zaangfahnak in bia a kan ceih lai tiah kan zumh khawh.—Jeim 2:13.
Jehovah nih pakhat cio kha hmaan tein, ding tein le zaangfahnak in bia a kan ceih lai tiah kan zumh khawh (Catlangbu 16 zoh)
17. A hnu capar ah zei kong dah kan i ruah hna lai?
17 Mah hngalhthiamnak kan remhmi nih phungchim rianṭuannak cu a hlan nakin a biapi deuh ti kha a kan hngalhter. Zeicah cutin kan chim khawh? Thawngṭha kha teima tein chim peng awkah zeinihdah a kan forh? Mah biahalnak hna i a phi kha a hnu capar ah kan i ruah hna lai.
HLA 76 Zeitin In Dah Na Um?
a Zeicah thlennak kan tuah timi kong he aa tlaiin 2015, March 15, Vennak Insang, cc. 3-8 ah a ummi ‘Mah cu Na Duhmi a Si’ timi capar ah zoh.
b A Liannganmi Babilon hrawh a si hnuah Jehovah salle vialte cu Magog ram i Gog dohnak chung ah hneksak an si lai. A Liannganmi Babilon hrawh a si hnuah Pathian miphun pawl he a rak i fonhmi pawl zong hneksak an si ve lai.
c HMANTHLAK FIANTERNAK: Vawleicung pumpi ah phung kan chim nain mi cheukhat sinah thawngṭha a phanh lonak a ruang a langhtermi hmanthlak pathum: (1) phungchim rianṭuan awkah a harnak biaknaklei huham nih a iap hnanak hmun ah a ummi nu pakhat, (2) phungchim rianṭuan awkah upadi nih a onh lomi le ṭih a nungmi hmun ah a ummi nuva tuahkhat le (3) A hlatnak le umkal awkah a harmi hmun ah a ummi pa pakhat.
d Hmanthlak Fianternak: Biatak a kal takmi nu pakhat nih “A Liannganmi Babilon” hrawh a sinak kong he aa tlaiin a rak theihmi kong kha a hun hngalh ṭhan. A lung aa thleng i Jehovah Tehte a simi a nu le a pa sinah a kir ṭhan. Cu bantuk thil a can tikah zaangfahnak le zawnruahnak a ngeimi vancung kan Pa kha i zohchunh kan duh i sualnak a tuahmi pakhat a rak kir ṭhan tikah kan i lawm.
