LARTIK LETID 19
KANTIK 22 Rwayonm pe dirize!
Ki nou konnen konsernan lafason ki Zeova pou ziz bann dimoun dan lavenir?
“Zeova . . . pa oule ki personn i ganny detrir.”—2 PYER 3:9.
TOPIK
Nou kapab asire ki ler Zeova i ziz bann dimoun dan lavenir, i pou fer sa ki drwat e zis.
1. Akoz nou kapab dir ki nou pe viv dan en letan ki eksitan?
NOU pe viv dan en letan eksitan! Toulezour, nou vwar bann profesi Labib kot pe ganny akonplir. Par egzanp, nou vwar “lerwa nor” ek “lerwa sid” pe lalit avek kanmarad pour zot kapab domin lemonn. (Dan. 11:40) Nou vwar sa bon nouvel konsernan Rwayonm Bondye pe ganny anonse partou lo later e plizyer milyon dimoun pe swazir pour servi Zeova. (Iza. 60:22; Mat. 24:14) Nou pe osi ganny en kantite manze spirityel “dan sa moman apropriye.”—Mat. 24:45-47.
2. Ki nou kapab asire me ki nou bezwen rekonnet?
2 Zeova i kontinyen ed nou konpran pli byen bann levennman enportan ki pou arive byento. (Prov. 4:18; Dan. 2:28) Nou kapab asire ki ler gran ladetres i konmanse, nou pou konn tou sa ki nou bezwen konnen pour nou kapab andire e reste ini pandan sa letan difisil. Me nou bezwen rekonnet ki i annan serten keksoz ki nou pa konnen konsernan sa ki pou arive byento. Dan sa lartik, nou pou diskit konsernan akoz nou’n fer en azisteman dan sa ki nou ti dir konsernan serten keksoz ki pou arive byento. Apre nou pou diskit lo serten keksoz ki nou konnen konsernan lavenir e lo lafason ki nou Papa ki dan lesyel pou azir.
SA KI NOU PA KONNEN
3. Ki nou ti dir konsernan ler dimoun pou nepli annan sa loportinite pour met lafwa dan Zeova e akoz nou ti dir sa?
3 Dan lepase nou ti dir ki ler gran ladetres i konmanse, dimoun pou nepli annan sa loportinite pour demontre lafwa dan Zeova e sirviv Armagedon. Nou ti dir sa parski nou ti krwar ki sa resi konsernan Deliz ti pe reprezant en keksoz ki ti pou arive dan lavenir. Par egzanp, nou ti krwar ki zis parey Zeova ti ferm laport lars avan Deliz i konmanse, o konmansman gran ladetres, i pou “ferm laport” lo lemonn Satan, setadir dimoun pou nepli annan sa loportinite pour met lafwa dan li pour zot kapab ganny sove.—Mat. 24:37-39.
4. Akoz nou nepli dir ki sa resi konsernan Deliz pe reprezant en keksoz ki pou arive dan lavenir?
4 Eski nou kapab dir ki sa resi konsernan Deliz i reprezant en keksoz ki pou arive dan lavenir? Non. Akoz? Parski Labib pa dir sa. a Menm si Zezi ti konpar “letan Noe” avek sa letan ki i pou la, i pa ti dir ki sak dimoun ek sak levennman ki ti arive ti reprezant en keksoz ki pou arive dan lavenir. Par egzanp, ler Zeova ti ferm laport lars, sa pa ti reprezant en keksoz ki ti pou arive dan lavenir. Me sa pa vedir ki nou pa kapab aprann en keksoz avek sa resi konsernan Noe ek Deliz.
5. (a) Ki mannyer Noe ti montre ki i ti annan lafwa avan Deliz i konmanse? (Ebre 11:7; 1 Pyer 3:20) (b) Ki mannyer sa travay predikasyon ki Noe ti fer i en pe parey avek sa travay predikasyon ki nou, nou fer ozordi?
5 Ler Zeova ti averti Noe konsernan sa ki ti pe al arive, Noe ti montre ki i ti annan lafwa par konstri lars. (Lir Ebre 11:7; 1 Pyer 3:20.) Pareyman, dimoun ki tann sa bon nouvel konsernan Rwayonm Bondye i bezwen montre ki zot annan lafwa par aplik sa ki zot in aprann. (Akt 3:17-20) Pyer ti dir ki Noe ti en zonm ki ti “pres lo ladrwatir.” (2 Pyer 2:5) Me parey nou’n vwar dan sa lartik avan, nou pa konnen si Noe ti esey anons mesaz Bondye avek tou dimoun ki ti pe viv lo later avan Deliz. Ozordi nou fer nou mye pour anons sa bon nouvel avek dimoun partou dan lemonn e nou pe fer sa travay avek devouman. Me kantmenm sa, nou pa pou reisi koz avek tou dimoun lo later konsernan sa bon nouvel avan lafen i arive. Akoz non?
6-7. Akoz nou dir ki nou pa pou reisi anons sa bon nouvel avek tou dimoun lo later avan lafen i arive?
6 Annou vwar sa ki Zezi ti dir konsernan sa travay predikasyon. I ti predir ki sa bon nouvel ti pou ganny anonse “partou lo later pour donn en temwannyaz avek tou nasyon.” (Mat. 24:14) Sa profesi pe ganny akonplir ozordi plis ki zanmen oparavan. Sa mesaz Rwayonm i disponib dan plis ki 1,000 langaz e atraver nou sit Enternet, jw.org, laplipar dimoun lo later i kapab aprann konsernan sa bon nouvel lo Rwayonm Bondye.
7 Me Zezi ti osi dir son bann disip ki zot pa ti pou kapab “fini pres dan tou lavil” oubyen pres avek tou dimoun avan ki i vini. (Mat. 10:23; 25:31-33) Sa ki Zezi ti dir i osi aplik pour nou letan. Ozordi plizyer milyon dimoun i reste dan bann landrwa kot sa travay predikasyon i anba restriksyon. Osi tou le minit, plizyer santenn pti baba i ne. Nou fer nou mye pour koz konsernan sa bon nouvel avek dimoun sorti dan “tou nasyon, tribi [ek] langaz.” (Rev. 14:6) Me kantmenm sa, nou pa pou reisi anons sa bon nouvel avek tou dimoun ki lo later avan lafen i arive.
8. Petet ki kestyon nou kapab demande konsernan lafason ki Zeova pou ziz bann dimoun dan lavenir? (Vwar portre.)
8 Petet nou kapab demann sa kestyon: Ki pou arive avek bann ki petet pa pou ganny sa loportinite pour tann sa bon nouvel avan gran ladetres i konmanse? Ki mannyer Zeova ek son Garson, ki i’n apwente pour ziz bann dimoun, pou ziz bann dimoun koumsa? (Zan 5:19, 22, 27; Akt 17:31) Verse tenm pour sa lartik i dir ki Zeova “pa oule ki personn i ganny detrir.” O kontrer i anvi ki “zot tou zot arive repantir.” (2 Pyer 3:9; 1 Tim. 2:4) Me kantmenm sa, nou bezwen rekonnet ki Zeova pa ankor dir nou ki mannyer i pou ziz bann dimoun ki pa’n zanmen ganny sa loportinite pour tann konsernan sa bon nouvel. Byensir Zeova pa oblize dir nou okenn keksoz konsernan sa ki i’n fer oubyen konsernan sa ki i pou fer.
Ki mannyer Zeova pou ziz bann dimoun ki petet pa pou ganny sa loportinite pour tann sa bon nouvel avan gran ladetres i konmanse? (Vwar paragraf 8) c
9. Ki Zeova in dir nou dan Labib?
9 Dan son Parol, Zeova in dir nou serten keksoz ki i pou fer. Par egzanp, Labib i dir nou ki Zeova pou resisit bann “dimoun . . . move” ki pa’n ganny loportinite pour tann sa bon nouvel e sanz zot konportman. (Akt 24:15; Lik 23:42, 43) Me sa i fer nou demann lezot kestyon enportan.
10. Ki lezot kestyon nou kapab demande?
10 Eski tou dimoun ki mor pandan gran ladetres pou mor e pa pou zanmen ganny resisite? Labib i dir ki bann ki opoz Zeova e ki ganny touye par Zeova ek son larme dan lager Armagedon, pa pou ganny resisite. (2 Tesa. 1:6-10) Me ki pou arive avek lezot dimoun, par egzanp, serten ki mor pandan gran ladetres akoz maladi, lavyeyes oubyen ki’n ganny touye par aksidan oubyen par en lot dimoun? (Ekle. 9:11; Zek. 14:13) Eski petet serten sa bann dimoun pou parmi sa bann “dimoun . . . move” ki pou ganny resisite dan nouvo lemonn? Nou pa konnen.
SA KI NOU KONNEN
11. Dapre kwa ki dimoun pou ganny zize pandan Armagedon?
11 Nou konn plizyer keksoz konsernan sa ki pou arive dan lavenir. Par egzanp, nou konnen ki pandan lager Armagedon bann dimoun pou ganny zize dapre lafason ki zot in tret bann frer Kris. (Mat. 25:40) Bann dimoun ki’n siport bann Kretyen swazir e ki’n siport Kris pou ganny zize konman bann mouton. Nou osi konnen ki serten parmi bann frer Kris pou ankor lo later apre ki gran ladetres i konmanse e zot pou ankor lo later ziska ki zot ganny anmennen dan lesyel pa bokou letan avan lager Armagedon i konmanse. Tan ki bann frer Kris i ankor lo later, bann dimoun ki annan leker senser i ankor annan loportinite pour siport bann frer Kris e siport sa travay ki zot pe fer. (Mat. 25:31, 32; Rev. 12:17) Akoz sa bann lenformasyon i enportan?
12-13. Ki mannyer serten dimoun i kapab reazir apre ki zot in vwar destriksyon “Gran Babilonn”? (Vwar portre.)
12 Menm apre ki gran ladetres i konmanse, i kapab ki serten dimoun ki vwar destriksyon “Gran Babilonn” i rapel ki pour plizyer lannen Temwen Zeova ti koz lo sa levennman. Eski petet serten sa bann dimoun ki vwar destriksyon “Gran Babilonn” pou devlop lafwa dan Zeova?—Rev. 17:5; Ezek. 33:33.
13 Si sa i arive, i pou en pe parey sa ki ti arive Lezip dan letan Moiz. Rapel ki i ti annan “en kantite etranze” ki ti zwenn ansanm avek bann Izraelit ler zot ti kit Lezip. I kapab ki serten sa bann dimoun ti konmans devlop lafwa dan Zeova ler zot ti vwar ki sa ki Moiz ti’n dir konsernan sa Dis Fleo ti’n vin vre. (Egz. 12:38) Si en keksoz en pe parey i arive apre ki Gran Babilonn in ganny detrir, eski nou pou dezapwente si dimoun i kapab zwenn ansanm avek nou avan ki lafen i arive? Non. Nou anvi swiv legzanp nou Papa ki dan lesyel, ki “en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite.” b—Egz. 34:6.
Serten dimoun ki pou vwar destriksyon “Gran Babilonn” pou rapel ki pour plizyer lannen Temwen Zeova ti koz lo sa levennman (Vwar paragraf 12-13) d
14-15. Ki swa en dimoun i ganny en loportinite pour viv pour touzour oubyen non, eski sa i depan lo kan ki i ti mor oubyen lo landrwa ki i ti reste? Eksplike. (Psonm 33:4, 5)
14 Parfwa, nou bann frer ek ser i kapab dir, “I ti pou pli mye si mon fanmir i mor avan gran ladetres i konmanse koumsa i ti pou annan lespwar pour ganny resisite.” Nou konnen ki zot dir sa avek bon lentansyon. Me ki swa en dimoun i ganny resisite oubyen non, sa pa depan lo kan ki i mor. Zeova i sa Ziz parfe. Son bann desizyon i toultan drwat e zis. (Lir Psonm 33:4, 5.) Nou kapab asire ki “sa Ziz lo later antye” pou fer sa ki drwat.—Zen. 18:25.
15 Osi, i rezonnab pour nou dir ki si en dimoun i ganny loportinite pour viv pour touzour, sa pa depan lo kote i reste. Zeova pa pou zanmen konsider plizyer milyon dimoun konman “kabri” zis akoz zot reste dan bann landrwa kot zot pa’n zanmen ganny sa loportinite pour tann sa mesaz konsernan Rwayonm Bondye. (Mat. 25:46) Zeova ki sa Ziz lo later antye i drwat e i kontan sa bann dimoun plis ki nou, nou kapab kontan zot. Nou pa konnen ki mannyer Zeova pou kontrol bann levennman pandan gran ladetres. Petet serten sa bann dimoun pou ganny sa loportinite pour aprann konsernan Zeova e met lafwa dan li ler Zeova i fer tou dimoun lo later konn son non.—Ezek. 38:16.
Apre ki gran ladetres i konmanse, . . . eski petet serten sa bann dimoun ki vwar destriksyon “Gran Babilonn” pou devlop lafwa dan Zeova?
16. Ki nou’n aprann konsernan Zeova? (Vwar portre.)
16 Atraver nou letid Labib, nou’n aprann ki kantite bann dimoun i presye pour Zeova. I ti sakrifye son Garson pour ki nou tou nou ganny sa loportinite pour viv pour touzour. (Zan 3:16) Nou tou nou’n santi lafeksyon ek tandres Zeova. (Iza. 49:15) I konn nou tou par nou non. Anfet Zeova i konn nou sitan byen ki si nou mor, i kapab resisit nou parski i konn sak pti detay konsernan nou e i konn tou nou souvenir. (Mat. 10:29-31) Alor nou annan bon rezon pour annan konfyans ki nou Papa ki dan lesyel ki kontan nou pou ziz sak dimoun dan en fason parfe parski i saz, drwat e i pran pitye.—Zak 2:13.
Nou annan konfyans ki Zeova pou ziz sak dimoun dan en fason parfe parski i saz, drwat e i pran pitye (Vwar paragraf 16)
17. Ki nou pou vwar dan sa lartik ki swiv?
17 Sa bann azisteman dan nou konprenezon i fer nou konpran ki sa travay predikasyon i pli irzan ki zanmen oparavan. Akoz nou dir sa? Kwa ki motiv nou pour kontinyen anons sa bon nouvel avek devouman? Dan sa lartik ki swiv, nou pou vwar larepons sa bann kestyon an detay.
KANTIK 76 Ki mannyer ou santi?
a Pour vwar en leksplikasyon akoz nou’n fer sa azisteman, vwar lartik “This Is the Way You Approved” ki dan Latour Veyer le 15 Mars 2015, paragraf 7-11 an Angle.
b Apre ki Gran Babilonn i ganny detrir, tou bann serviter Zeova pou ganny teste ler Gog sorti Magog i atak zot. Nenport dimoun ki zwenn ansanm avek pep Bondye apre ki Gran Babilonn in ganny detrir pou osi ganny teste.
c LEKSPLIKASYON PORTRE: Trwa portre pe montre rezon akoz serten petet pa pou tann sa bon nouvel ki nou pe anonse partou lo later: (1) En madanm pe reste dan en pei kot sa larelizyon prensipal dan sa pei i fer li danzere pour Temwen Zeova fer predikasyon, (2) en koup pe reste dan en pei kot gouvernman in fer ki i ilegal e danzere pour Temwen Zeova fer predikasyon e (3) en msye pe reste dan en landrwa ki vreman elwannyen e kot dimoun pa kapab arive.
d LEKSPLIKASYON PORTRE: En madanm ki ti’n aret servi Zeova i rapel sa ki i ti aprann konsernan destriksyon “Gran Babilonn.” I deside pour retourn kot Zeova e kot son paran ki Temwen Zeova. Si en keksoz en pe parey i arive, nou anvi swiv legzanp nou Papa ki dan lesyel, ki annan pitye ek konpasyon. Nou pou osi kontan parski en dimoun ki’n fer en pese grav in retourn kot Zeova.
