ARTIKULO KʼAWUAITA 19
TRÃBI 22 Jeowa bʉ Nokʼo zebira
Jeowabara aranʉ sãwũã kʼawua oi ẽbẽrarã
«Jeowaba [ . . . ] kãgaba jʉ̃ãbʉ maraba kayirua obʉta jẽda krĩchamarẽã mawũã bei ẽ baita» (2 PED. 3:9).
KʼÃRẼTA ŨDUDAITA
Aranʉ Jeowaba ẽbẽrarã kʼawua obʉrʉdera ĩjãpanʉ Jeowabara jõma aripe oita.
1. ¿Kʼãrẽa jaraseapanʉ idi berabarinʉmʉra jipade yibiata?
IDI ewade dayirãba kʼãrẽ ũdunʉmʉra jipade yibia. ¿Kʼãrẽa? Dayirãbara ũdu wãna sãwũã Daizeze Bedʼeade propesiaba jarabʉra aripe berabari wãta. Bari jaradaita, akʉpanʉ sãwũã nokʼo nortedebemata adewara nokʼo surdebemaʉ̃me yõpanʉta kʼaiba zokʼaita naʉ̃ drʉara (Dan. 11:40). Maʉ̃ awuara Daizeze Nokʼo ʉ̃rʉ naʉ̃ drʉa jõmaʉ̃nẽ jaradia wãna. Akʉza ẽbẽrarã mejãchaʉta wãpanʉ Daizeze ode (Is. 60:22; Mat. 24:14). Adewara yiko jauredebemata dayirãba nesidabʉde erpanʉ (Mat. 24:45-47).
2. ¿Kʼãrẽta ĩjãnaibara akʉza kʼãrẽta kʼawuapanʉ?
2 Jeowabara kʼarebabʉ dayirãba biʼia ũrĩnamarẽã aranʉ kʼãrẽta sãwũã berabarita (Prov. 4:18; Dan. 2:28). Zʉbʉria zroma zebʉrʉdera biʼia kʼawuapanañi kʼãrẽta odaita, mawũã Jeowaʉ̃me kʼẽrẽpa bʼaita akʉza mebẽrãbawara ãba bʼaita maʉ̃ ewaride. Mamina dayirãbara kʼawuadaibara bʉta nekʼãrẽ dayirãba kʼawua ẽãta nekʼãrẽ ʉ̃ra zei ʉ̃rʉ. Naʉ̃ artikulode kʼawuadayi dayirãbara kʼãrẽa audre ẽza ũrĩbarata, nãã nekʼãrẽ ʉ̃ra zei ʉ̃rʉ ũrĩbadata. Tẽã kʼawuadayi dayirãba nekʼãrẽ kʼawuabʉ ʉ̃rʉ adewara Jeowaba nekʼãrẽ sãwũã oita ʉ̃ra zebʉrʉde.
DAYIRÃBA KʼAWUA ẼÃTA
3. ¿Kʼãrẽta krĩchapanasi ẽbẽrarã ʉ̃rʉ zʉbʉria zroma jʉ̃drʉi nãã akʉza kʼãrẽa mawũã krĩchapanasi?
3 Nããra jarapanasi ẽbẽrarãba zʉbʉria zroma zei nãã Daizeze ʉ̃rʉ ĩjãna ẽ basibʉrʉ, maʉ̃rãra Armagedónʼne beita. Mawũã jarapanasi krĩchapanasi baera Noé ewaride berabaridaba ũdubibasita kʼãrẽta sãwũã berabarita ʉ̃ra zeide. Bari jaraita, abarika Noé ewari baside Jeowaba puerta serrabʉrʉde ẽbẽra eda wãna ẽ bada kĩrãkʼa krĩchapanasi zʉbʉria zroma jʉ̃drʉbʉrʉdera ẽbẽrarã wuara ewari ne ẽ baibasita Daizeze ʉ̃rʉ kʼawuaita (Mat. 24:37-39).
4. ¿Kʼãrẽa kʼawuapanʉ Noé ewaride berabaridara jõma aripe berabari ẽ baita?
4 ¿Biga baika dayirãba jaradaita Noé ewaride nekʼãrẽ jõma berabaridaba ũdubibʉta zʉbʉria zroma berabaribʉrʉde abarika berabarita? Biga ẽ bayi mawũã jaraira, Daizeze Bedʼeaba mawũã berabarita jara ẽ baera. a Jesubara jarasi Noé ewaride berabaridara iyi ewaride abarika berabarita. Mamina maʉ̃bara jarakĩrãkʉa ẽ basi jõma Noé ewaride berabaridara abarika berabarita. Mawũãsidu dayirãbara nekʼãrẽ mejãcha kʼawuaseabʉ Noé ewaride berabaridadeba.
5. (1) ¿Noébara sãwũã ũdubisi wãrĩnu ĩjãbʉta? (Hebreos 11:7; 1 Pedro 3:20). (2) ¿Kʼãrẽne abarikabʉ Noéba jaradiabadata idi dayirãba jaradiabʉme?
5 Noéba ũrĩside Jeowaba ẽbẽrarã jõma makenaita, iya ũdubisi Jeowa ʉ̃rʉ ĩjãbʉta jãba zroma ojʉ̃drʉside (akʉra Hebreos 11:7; 1 Pedro 3:20). Abarika idibema ẽbẽrarãba Daizeze Bedʼea ʉ̃rʉ ũrĩbʉrʉdera ãya nekʼãrẽ obʉdeba ũdubibara Jeowa ʉ̃rʉ ĩjãbʉta (Hech. 3:17-20). Pedrobara jarasi Noébara Daizeze bedʼea jaradiabasita (2 Ped. 2:5). Nãã kʼawuada kĩrãkʼa, dayirãbara bia kʼawuada ẽ Noébara iyi ewaride bada ẽbẽrarã jõmaʉ̃a jaradiasi kʼawuaita Daizeze bedʼea ʉ̃rʉ, kue zroma zei nãã. Abarika Noéba ẽbẽrarã jaradiabada kĩrãkʼa dayirãsida zarea opanʉ ẽbẽrarã naʉ̃ drʉade bʉ jõmaʉ̃a jaradiadaita, mamina kʼawuapanʉ mawũã obeda ẽãta, ¿kʼãrẽa?
6, 7. ¿Kʼãrẽa Daizeze ewari zei nããra ẽbẽra jõmaʉ̃a jaradiabeda ẽ bai? Jara ũrĩbira.
6 Krĩchara Jesuba jaradata Daizeze bedʼea jaradiai ʉ̃rʉ. Iya naʉ̃ta jarasi: «Bedʼea bia Daizeze Nokʼo ʉ̃rʉra jaradiadayi naʉ̃ drʉa jõmaʉ̃nẽ» (Mat. 24:14). Jesuba jaradara idi ewade jõma aripe berabarinʉmʉ. Bari jaraita, internetʼne dayirã pagina jw.org de, kartarata 1.000 bedʼea awuara awuarakabʉ. Naʉ̃ba kʼarebabʉ ẽbẽrarãba ũdukʼawuadamarẽã bedʼea bia Daizeze Nokʼo ʉ̃rʉ.
7 Jesubara jarasi iyi kʼaidubemaraʼa Daizeze bedʼeara naʉ̃ drʉa jõmaʉ̃nẽ jaradiaʉda ẽ baita iyi zei nããra (Mat. 10:23; 25:31-33). Jesuba jaradara idi ewade jõma aripe berabarinʉmʉ. Ʉ̃kʉrʉ ẽbẽrarã bʉ Daizeze Bedʼea idu jaradiabida ẽ mae. Adewara ewariza wũãwũãrãra mejãcha topanʉ. Mawũẽra dayirã mejãcha zarea osidamina Daizeze bedʼea ẽbẽra jõmaʉ̃a jaradiaita Daizeze ewari zei nããra, jõmaʉ̃a jaradiaʉda ẽ bayi (Apoc. 14:6).
8. ¿Dayirãbara kʼãrẽ ʉ̃rʉ widiseapanʉ? (Akʉra potota).
8 Dayirãbara widiseabʉ, ¿Daizeze ewari zei nãã ẽbẽrarã Daizeze ʉ̃rʉ kʼawua ẽ badara kʼãrẽba sãwũãiba? akʉza ¿Jeowaba yi Warraʉ̃meba sãwũã kʼawua oi ãyira? (Juan 5:19, 22, 27;Hech. 17:31. Testo naʉ̃ artikulodebemaba jarabʉ Jeowabara kãga ẽãta mia abaʉta beidamarẽãra, awuarabʉrʉ kãgabʉ ẽbẽraba nãã kayirua obadata wua oda ẽ marẽã, mawũã ãyita beida ẽ marẽã (2 Ped. 3:9; 1 Tim. 2:4). Dayirãba kʼawuabʉmina Jeowaba mawũã ẽbẽrarã bei ẽ marẽã kãgabʉta, iyara dayirã kʼawua jara ẽ ẽbẽrarã iyi ʉ̃rʉ kʼawuada ẽ badara sãwũã kʼawua oira. Adewara Jeowabara dayirã kʼãrẽa jara ũrĩbira neẽ.
¿Jeowabara sãwũã kʼawua oi ẽbẽrarã zʉbʉria zroma jʉ̃drʉi nãã Daizeze ʉ̃rʉ kʼawua ẽ badarãra? (Akʉra parrapo 8). c
9. ¿Jeowabara dayirãʼa kʼãrẽta jaradiabʉ Daizeze Bedʼeadeba?
9 Daizeze Jeowabara dayirã jaradiabʉ kʼãrẽ iyi Bedʼeadeba kʼãrẽta sãwũã oita iyara. Bari jaraita, Daizeze Bedʼeade jarabʉ jẽda piradrʉbita ẽbẽra bia ẽã odapeadarãra, naʉ̃ra ẽbẽrarãbara Daizezeta ũdukʼawua ẽ basi baera akʉza ãya nekayirua obadata idubʉ ẽ basi baera (Hech. 24:15; Luc. 23:42, 43). Dayirãba mawũã kʼawuabʉba bedʼea bio krĩchabibʉ.
10. ¿Adewara kʼãrẽta widiseapanʉ dayirãbara?
10 Dayirãba widiseabʉ, ¿zʉbʉria zroma berabarinʉmʉne ẽbẽrarã beidara jẽda piradrʉika? Daizeze Bedʼeaba jara ũrĩbibʉ ẽbẽrarã Jeowa ʉ̃rʉ bʉta akʉza Armagedónʼne Jeowaba iyi angelerabawaraʉba beabʉrʉra jẽda piradrʉ ẽ baita (2 Tes. 1:6-10). Mamina, ¿jẽda piradrʉika ẽbẽra zʉbʉria zroma zebʉrʉde kayabʉde beidara, asidenta beidara, awuruba beadara, mawũã ẽ bʉrʉ naʉ̃ drʉade neida berabaribʉba beidara? (Ecl. 9:11; Zac. 14:13). ¿Jeowabara naʉ̃ra ẽbẽrarã bia ẽã obebawara jẽda piradrʉbika? Maʉ̃ra kʼawuada ẽ.
DAYIRÃBA KʼAWUAPANɄTA
11. ¿Armagedón zebʉrʉdera Jeowabara sãwũã kʼawua oi ẽbẽrarãra?
11 Dayirãbara wiña kʼawuapanʉ aranʉ kʼãrẽta sãwũã berabarita. Bari jaraita, Armagedón zebʉrʉde ẽbẽrarã kʼawua odaita ãya Daizezeba jidada ẽbẽrarãta sãwũã erbadadeba (Mat. 25:40). Adewara kʼawuapanʉ ẽbẽrarã Jesuarepanʉta akʉza 144.000ra kʼarebapanʉra jaraita ãyira obejarata. Adewara dayirãbara kʼawuapanʉ ʉ̃kʉrʉ 144.000de eda panʉrãra, zʉbʉria zroma jʉ̃drʉi nããra nama egorode bʼaita akʉza jõma ʉ̃tʉ panaita Armagedón jʉ̃drʉi nãã. Maʉ̃ba ẽbẽrarã Daizezeare bakĩrãpanʉrabara naʉ̃ra 144.000rãra kʼarebaseapanʉ akʉza ãya zokʼabʉta oseapanʉ (Mat. 25:31, 32; Apoc. 12:17). ¿Kʼãrẽa yibia maʉ̃ra?
12, 13. Babilonia zroma jõbʉrʉta ũdubʉdadera, ¿kʼãrẽta oi ʉ̃kʉrʉbara? (Akʉra potota).
12 Zʉbʉria zroma jʉ̃drʉda tẽã ʉ̃kʉrʉba ũdubʉdade Babilonia zroma jõma jõbibʉdata kĩrãbedayi Jeowa ʉ̃rʉ Kʼawuabipanʉrãbara mawũã berabarita jaradara dããrabata. ¿Ʉ̃kʉrʉba Babilonia zroma jõma jõbibʉrʉta ũdubʉdade ĩjãnaika Daizeze ʉ̃rʉ? (Apoc. 17:5; Ezeq. 33:33).
13 Naʉ̃ta mawũã berabarira Moisés ewaride berabarida kĩrãkʼa bayi. Israelitara Egiptodeba ẽdrʉsidera, ẽbẽrarã Egiptodebemarasi ãyi kʼaidu wãsi. Moisésba Egiptode 10 plaga berabari ʉ̃rʉ jarada aripe berabarinʉmʉta ũdusidadera, naʉ̃ra ẽbẽrarãbara Daizeze ʉ̃rʉ ĩjãbʉta ũdubisida (Éx. 12:38). Babilonia zroma jõbida tẽã ẽbẽrarãba ũdubidara Daizeze ʉ̃rʉ ĩjãbʉta akʉza Jeowaba iduaribira naʉ̃ra ẽbẽrata iyi pʉwʉrʉde bamarẽã, ¿maʉ̃ kʼareara dayirãbara sãwũã krĩchai? ¿Maʉ̃nera dayirãbara krĩchadaika biga ẽãta? Dayirãbara mawũã krĩcha ẽ baibara, awuarabʉrʉ Daizeze Jeowaba obʉ kĩrãkʼa odaibara. Jeowabara so zʉbʉria akʉbʉ, nebia obʉ, kĩrʉmia ẽ akʉza kãga jõka mejãcha erbʉ akʉza wãrĩnuarata jarabʉ b (Éx. 34:6).
Ẽbẽra mejãchaʉba ũdubʉdade Babilonia zroma jõbʉrʉta, jõmaʉ̃ba kĩrãbedayi Jeowa ʉ̃rʉ Kʼawuabipanʉrãbara mawũã berabarita jarabadara dããrabata. (Akʉra parrapo 12, 13). d
14, 15. (1) ¿Ẽbẽra ewari jõmaʉ̃nẽ bʼaira zʉbʉria zroma zei nãã beibaraka? (2) ¿Ẽbẽra ewari jõmaʉ̃nẽ bʼaira Daizeze Bedʼea jaradia panʉmae baibaraka? Jara ũrĩbira (Salmo 33:4, 5).
14 Bʉa ũrĩbaribaibara mebẽã abaʉba yi mebẽã Jeowa ode bʉ ẽ ʉ̃rʉ jarabʉta: «Biode biga bayi iyita zʉbʉria zroma jʉ̃drʉi nãã beira, mawũãra iyira jẽda baseabʉ baera». Mebẽrãba mawũã krĩchabʉra kayirua ẽ, mamina wãrĩnubaira kʼãrẽ ẽ dayirã sõbede beira. Jeowabʉrʉ kʼawuabʉ kʼaira ẽbẽrata jẽda piradrʉbira. Jeowatrʉ Juez bia baera iya jõma kʼawua aripe oyi (akʉra Salmo 33:4, 5; Gén. 18:25).
15 Adewara krĩchada ẽ baibara dayirã ewari jõma bʼaira ũduita dayi sama chudeba. Maʉ̃ba dayirãbara krĩchada ẽ baibara ẽbẽra abaʉa Daizeze Nokʼo ʉ̃rʉ jaradia jʉ̃ẽna ẽ basi baera, Daizeze Jeowabara maʉ̃ ẽbẽrarã jaraita chibota (Mat. 25:46). Jeowabara mawũã krĩcha ẽ bayi ẽbẽra aba abaka mejãcha kãgabʉ baera. Adewara dayirãbara bia kʼawuada ẽ Jeowabara sãwũã kʼawua oita zʉbʉria zroma berabarinʉmʉnera. Maʉ̃nera ʉ̃kʉrʉbara Daizeze ʉ̃rʉ ĩjãbʉta ũdubiseabʉ. Zʉbʉria zroma berabaribʉrʉde Jeowaba ũdubiyi iyira kʼaita, maʉ̃nera wabida ẽbẽrarãbara Jeowa ʉ̃rʉ kʼawuaseabayi akʉza ĩjãseapanañi (Ezeq. 38:16).
Zʉbʉria zroma jʉ̃drʉda tẽã, ¿ʉ̃kʉrʉba Babilonia zroma jõma jõbibʉrʉta ũdubʉdade ĩjãnaika Daizeze ʉ̃rʉ?
16. ¿Kʼãrẽta ũdubi zebʉrʉ Jeowabara dayirã? (Akʉra potota).
16 Daizeze Bedʼeade kʼawua zebʉda Jeowabara mejãcha kãgabʉta ẽbẽrarãra. Maʉ̃ kʼarea Jeowabara diasi iyi warra ababʉta mawũã dayirã jõmaʉ̃ta ewari jõmaʉ̃nẽ panamarẽã (Juan 3:16). Ũdu zebʉda Jeowabara wãrĩnu kãgata dayirãra (Is. 49:15). Jeowabara dayirã aba abaka bia ũdu kʼawuabʉ baera kʼawuabʉ dayirã trʉ̃ aba abaka, maʉ̃ba dayirã beibʉrʉdera iyara jẽda piradrʉbiyi dayi chuadade (Mat. 10:29-31). Jeowaba jõma aripe obʉ baera, buru bia baera akʉza so zʉbʉria akʉbʉta ũdubibʉ baera ẽbẽrarã iya kʼawua obʉrʉdera jõma aripe oyi (Sant. 2:13).
Dayirãbara ĩjãseapanʉ Jeowabara jõma aripe kʼawua oita, Jeowara buru bia baera, so zʉbʉria akʉbʉ baera akʉza jõma aripe obʉ baera. (Akʉra parrapo 16).
17. ¿Kʼãrẽta kʼawuadai wuarebema artikulodera?
17 Dayirãba kʼãwũã audre bia ẽza ũrĩbʉrʉba kʼawuabibʉ audre yibiata Daizeze bedʼea jaradia wãita, ¿kʼãrẽa mawũã jarapanʉ? ¿Kʼãrẽba kʼarebai Daizeze bedʼea enaʉ̃ ẽã jaradiaita? Naʉ̃ ʉ̃rʉ kʼawuadayi wuarebema artikulode.
TRÃBI 76 Jarada sãwũã sentibʉta
a Audre kʼawuaita kʼãrẽa awuara osidata akʉra La Atalaya 15 marzo 2015debemata, pagina 7-11 bayeda, yi trʉ̃ra «A Jehová le gusta enseñar de forma sencilla».
b Babilonia zroma jõna tẽã Daizeze ode panʉra Gog de Magogba pewãñi. Abarika Babilonia zroma jõna tẽã yi ẽbẽrarã Jeoware panʉrasida iyaba pewãnañi.
c POTOBA ŨDUBIBɄTA: Poto ũbeade ũdubibʉ kʼãrẽa dayirãbara Daizeze bedʼeara ẽbẽra jõmaʉ̃a jaradiaʉda ẽ baita: (1) Ẽbẽra wẽrã aba bʉ religion abaʉde, adewara iyi drʉadera idu jaradiabida ẽ (2) juwa jidapanʉrata bʉ nokʼoraba iduaribi ẽãne religion erbamareã akʉza Daizeze Bedʼea jaradiaita (3) adewara ẽbẽra aba bʉ mio jʉ̃ẽkamae.
d POTOBA ŨDUBIBɄTA: Ẽbẽra wẽrã Daizeze odeba ãĩ wãnaba kĩrãbebʉ Daizeze Bedʼeaba kasea jarabʉta Babilonia zroma ʉ̃rʉ, maʉ̃ kʼarea iya obadata idubʉ kʼãrãpe krĩchabʉ Daizeze pʉwʉrʉeda zeita, mawũã yi mebẽrãbawara bʼaita. Mawũã berabarira dayirãra mejãcha sobia bʼaibara jẽda zesi baera. Mawũãra so zʉbʉria akʉbʉta ũdubidayi Jeowade kĩrãkʼa.
