1. Ananso la wala teŋ na baŋ yelka te be la saŋa ŋa yelseɛlɛ yaga naŋ nyɛrɛ eebo?

 TE BE la saŋa ŋa yelseɛlɛ yaga naŋ nyɛrɛ eebo! Bebiri la bebiri zaa yɛlɛ a Baabole naŋ yelka a na eŋ maŋ nyɛrɛɛ eebo. Aŋa mannoo poɔŋ, te nyɛɛ lɛ “a samun-gɔɔ seŋ naa” ane “a samun-duri seŋ naa” naŋ zɔɔrɔ taa ka ba deɛ a donɛɛ naaŋ kpeɛ̃o. (Daan. 11:40) Te nyɛɛ lɛ ba naŋ moɔlɔ a Naaŋmen Naaloŋ duoro na a gɛrɛ a donɛɛ lombori zaa a gaŋ saŋa zaa naŋ pare, ka noba yaga meŋ sagra a duoro a wa puoro Jehoova. (Aiz. 60:22; Mat. 24:14) Te maŋ nyɛrɛɛ siiloŋ poɔ bondirii yaga meŋ “wagre naŋ seŋ neŋ poɔŋ.”​—Mat. 24:​45-47.

2. Bo yɛlɛ teŋ sagedi peɛlaaŋ, kyɛ bo yɛlɛ meŋ aŋ seŋ ka te baŋ?

² Jehoova maŋ sonnɔ teŋ ka te baŋ yelnimizeere mine naŋ koŋ kɔɔre kyɛ nyɛ eebo yɛlɛ soŋ. (Yeng. 4:18; Daan. 2:28) Te na baŋ sagediŋ peɛlaaŋ ka sɛre ka a dɔgroŋ kpoŋ na piili na, te na baŋɛɛ yelzaa naŋ seŋ ka te baŋ ka lɛ na baŋ soŋ te ka te are kpeɛŋaa a taa noɔreyeni a puoro Jehoova yelmennoŋ poɔŋ. Kyɛ aseŋ ka te baŋ meŋ ka yɛlɛ mine bebeŋ teŋ ba baŋ kyaare nendaare kaŋa yɛlɛ. A zannoo ŋa poɔŋ, te na zanne nyɛɛ ananso teŋ leɛre yɛlɛ teŋ da maŋ yelkyaare yɛlɛ mine naŋ na e nendaare  kaŋa; a kyɛ pãã lɛ nyɛ yɛlɛ na mine te naŋ baŋ kyaare nendaare kaŋa ane lɛ te Saa naŋ be sazuŋ naŋ na e.

YƐLƐ TE NAŊ BA BAŊ

3. Saŋa kaŋa naŋ pare te da maŋ yeleŋ ka bo saŋa ka Jehoova na pigi noba sori ka ba koŋ baŋ lɛ wa puoruu a nyɛ nyɔvore, ka ananso la wala teŋ da maŋ yel lɛ?

³ Saŋa kaŋa naŋ pare, te da maŋ yeleŋ ka ka a dɔgroŋ kpoŋ wa piili neɛzaa koŋ lɛ taa a vuo ka o wa puoro Jehoova a nyɛ nyɔvore Hammagedon poɔŋ. Te da maŋ yelee lɛ bonso te da teɛrɛ ka neɛzaa naŋ da bebe a Kɔmpiiri saŋa na ane yelzaa naŋ da e a lɛ saŋa na are ko la yɛlɛ naŋ na e te saŋa ŋa meŋ. Aŋa mannoo poɔŋ, te da teɛrɛ ka aŋa lɛ na Jehoova naŋ da pɔge a maŋgbori kpoŋ noɔre ka neɛzaa koŋ baŋ lɛ kpɛ sɛre kyɛ ka a Kɔmpiiri piili na, lɛ meŋ la, ka a dɔgroŋ kpoŋ wa piili neɛzaa koŋ baŋ lɛ wa puore Jehoova a nyɛ faabo.​—Mat. 24:​37-39.

4. Bonso teŋ ba maŋ lɛ yelka yelzaa naŋ da e Noowa saŋa na are ko la yɛlɛ naŋ na e nendaare kaŋa?

⁴ Ka lɛ te na baŋ yelka yɛlɛ naŋ da e a Kɔmpiiri saŋa na are ko la yɛlɛ mine naŋ na e nendaare kaŋa bee? Ai. Bonso a Baabole zie zaa ba yel lɛ. a Yezu da de la “Noowa saŋa” na a manne neŋ o leɛ waabo saŋa. Kyɛ o da ba wuli ka a yɛlɛ na zaa naŋ e Noowa saŋa na na nyɛɛ eebo meŋɛmeŋɛ nendaare kaŋa naŋ waana aŋa lɛ na Jehoova naŋ da pɔge a maŋgbori denoɔre na. Kyɛ lɛ ba wuli ka te koŋ baŋ zanne yɛlɛ yi Noowa ane a Kɔmpiiri yɛlɛ na poɔŋ.

5. (a) Bo ka Noowa da e a wuli ka o taa la sagediibu sɛre kyɛ ka a Kɔmpiiri wa? (Hiburu 11:7; 1 Piita 3:20) (b) Sobuo ka Noowa duoro moɔloo na ane a naaŋ moɔloo toma te naŋ tonɔ zenɛ ŋa na yitaa?

 ⁵ Saŋa na Noowa naŋ da wa woŋ Jehoova kpããmo na, o da maalɛɛ a maŋgbori a de wuli ka o taa la sagediibu. (Kanne Hiburu 11:7; 1 Piita 3:20.) Lɛ meŋ la ka noba naŋ wono a Naaŋmen Naaloŋ duorisoŋ seŋ ka ba de gbɛre a kyaare yɛlɛ na ba naŋ woŋ na. (Tom. 3:17-20) Piita da boɔlɛɛ Noowa ka “a mennoŋ yelmanna.” (2 Pit. 2:5) Aŋa lɛ te naŋ zanne a zannoo naŋ pare poɔŋ na, te ba baŋ ka Noowa da toɔ̃ mannɛɛ a Naaŋmen yɛlɛ ko noba naŋ da be a donɛɛ lombori zaa sɛre kyɛ ka a Kɔmpiiri wa bee. Zenɛ ŋa meŋ, te de la eŋnyagroŋ a mɔɔrɔ te moɔbo zaa ka te manne a duorisoŋ ko noba naŋ be a donɛɛ lombori zaa. Moɔbo na zaa te naŋ mɔɔrɔ na, kyɛ te koŋ baŋ moɔle a duorisoŋ ko noba naŋ be a donɛɛ lombori zaa sɛre kyɛ ka a baaroo saŋa ta. Ananso la wala teŋ yel lɛ?

6-7. Bonso teŋ na baŋ yelka te koŋ baŋ moɔle a duorisoŋ ko noba naŋ be a donɛɛ lombori zaa sɛre kyɛ ka a donɛɛ baaroo saŋa ta?

⁶ Leɛteɛre yɛlɛ na Yezu naŋ yelkyaare a te naaŋ moɔloo toma na. O da daŋyeleeŋ ka ba na moɔlɛɛ a duorisoŋ “a tendaa lombori zaa ka a e sieree ko a paalonne noba zaa.” (Mat. 24:14) Ana daŋyelbo ŋa nyɛrɛɛ eebo te zenɛ ŋa a gaŋ saŋa zaa naŋ pare. Ba leɛrɛɛ a Naaloŋ duorisoŋ eŋ kɔkɔɛ naŋ pare 1,000 poɔŋ. Noba yaga zie zaa naŋ be a donɛɛ lombori zaa maŋ gaa la te intanɛt toma zie na jw.org a te zanne Naaŋmen Naaloŋ yɛlɛ.

⁷ Yezu da yelko la o potuuribo na ka “yɛ koŋ baŋ kyɔle a Izerayɛl tenne zaa,” bee a moɔle a duorisoŋ ko neɛzaa sɛre kyɛ ka o wa. (Mat. 10:23; 25:31-33) Yezu yelbie ŋa na nyɛɛ eebo zenɛ ŋa meŋ. Noba yaga kpeɛrɛ ziiri mine teŋ koŋ baŋ moɔle a duorisoŋ beŋ. Ane meŋ bebiri la bebiri zaa noba dɔgrɛɛ biiri yaga. Te maŋ mɔɔrɛɛ te moɔbo zaa ka te moɔle a duorisoŋ ko “tenne zaa, bale zaa, [ane] kɔkɔɛ zaa.” (Yel. 14:6) Kyɛ a yelmeŋɛ la ka te koŋ baŋ moɔle a duorisoŋ a ko noba naŋ be a donɛɛ lombori zaa sɛre kyɛ ka a donɛɛ baaroo saŋa ta.

8. Bo soorebiri la teŋ na baŋ soore a kyaare lɛ Jehoova naŋ na di noba sɛrɛɛ nendaare kaŋa na? (Kaa a fotori meŋ.)

⁸ A kyaare yɛlɛ na te naŋ zanne pampana ŋa na, kaapɔge ho na sooreŋ ka: Ka noba na meŋ naŋ ba nyɛ a vuo a woŋ a duorisoŋ sɛre kyɛ ka a dɔgroŋ kpoŋ piili na meŋ? Sobuo ka Jehoova ane o Bidɔɔ o naŋ kaa iri na na di ba sɛrɛɛ? (Gyn. 5:​19, 22, 27; Tom. 17:31) Aŋa lɛ a zannoo ŋa yelzu naŋ yele na, “a ba e [Jehoova] . . . boɔbo ka neɛzaa nyɛ sããmmo.” Kyɛ o boɔbo la ka “neɛzaa toɔ̃ leɛre o eebo.” (2 Pit. 3:9; 1 Tim. 2:4) Aneazaa ka te baŋɛɛ a yɛlɛ ŋa a kyaare Jehoova, kyɛ o ba wuli te lɛ o naŋ na di noba na naŋ ba nyɛ a vuo ka ba woŋ a duorisoŋ na sɛrɛɛ. Kyɛ a ba e ferebo ka o yele yɛlɛ o naŋ e ane yɛlɛ o naŋ na e a ko te.

9. Bo yɛlɛ ka Jehoova vɛŋ teŋ baŋ a yi a Baabole poɔŋ?

⁹ A Baabole poɔŋ, Jehoova yelko teŋ yɛlɛ na mine o naŋ na e. Aŋa mannoo poɔŋ, a Baabole yelko teŋ ka Jehoova na seŋɛɛ “noba naŋ ba e sontuuribo,” ba na la noba naŋ ba nyɛ a vuo ka ba woŋ a duorisoŋ a leɛre ba eebo. (Tom. 24:15; Luk. 23:​42, 43) A yɛlɛ ŋa tagɛɛ te teɛroŋ gaaneŋ soorebie mine naŋ e nimizeɛ eŋɛŋ.

10. Bo soorebie mine la teŋ taa?

¹⁰ Noba na zaa naŋ na kpi a dɔgroŋ kpoŋ saŋa na, na nyɛ la saammo kpɛlɛŋkpɛlɛŋ ka kũũ leɛ-iruu tamaa zaa kyebe ko ba bee? A Baabole vɛŋɛɛŋ aŋ pɛle ka noba na naŋ iri zɔɔrɔ neŋ Jehoova ka o neŋ o malekere na sãã ba Hammagedon zɔɔre na poɔŋ, koŋ nyɛ kũũ leɛ-iruu. (2 Tɛs. 1:​6-10) Ka a noba  na aminekaŋaŋ baaloŋ, bee yelfaa kaŋa naŋ pɔge ba baŋ kpi a dɔgroŋ kpoŋ saŋa na meŋ, ba na nyɛ la kũũ leɛ-iruu bee? (Ikil. 9:11; Zek. 14:13) A noba ŋa mine na baŋ poɔ la “noba naŋ ba e sontuuribo” naŋ na nyɛ kũũ leɛ-iruu a donpaalaa poɔŋ bee? Te ba baŋ te baare.

YƐLƐ TE NAŊ BAŊ

11. Bo yɛlɛ baŋ na kaa kyɛ di noba sɛrɛɛ a Hammagedon zɔɔre na saŋa?

¹¹ Te baŋɛɛ yɛlɛ yaga a kyaare yɛlɛ naŋ na e nendaare kaŋa. Aŋa mannoo poɔŋ, te baŋɛɛŋ ka Hammagedon zɔɔre na poɔŋ, Jehoova na di la noba sɛrɛɛ kyaare lɛ baŋ da e ba yɛlɛ, ka ba da soŋɛɛ Krista yɔɔmine na bee ka ba da ba e lɛ. (Mat. 25:40) Noba na baŋ na di ba sɛrɛɛ ka ba eɛ peere na wuleeŋ ka, ba na yɛŋ da soŋɛɛ Krista ane noba na ba naŋ sɔ sazu naaloŋ kãã na. Te lɛ baŋɛɛŋ meŋ ka Krista yɔɔmine na kyɛlɛɛ na be la a donɛɛ zuŋ kyɛ a dɔgroŋ kpoŋ saŋa, kyɛ sɛre ka a Hammagedon zɔɔre na piili na, ba na de la ba zaa gaaneŋ sazu. A Krista yɔɔmine na kyɛlɛɛ na be la a donɛɛ ŋa zuŋ, azuŋ noba mine na nyɛ la a vuo ka ba soŋ ba ane toma na ba naŋ tonɔ na. (Mat. 25:​31, 32; Yel. 12:17) Bonso ka a yɛlɛ ŋa zaa yɛlɛ e nimizeɛ?

12-13. Wala ka noba mine na e ba yɛlɛ ka ba naŋ wa nyɛ ka ba sãã la “Baabilɔŋ Kpoŋ” baare? (Kaa a fotori meŋ.)

¹² Aminekaŋaŋ ka noba mineŋ wa nyɛ ba naŋ saana “Baabilɔŋ Kpoŋ” sɛre kyɛ ka a dɔgroŋ kpoŋ na piili na, ba na leɛteɛreŋ ka Jehoova Sieree Deme da yelee a yɛlɛ ŋa naŋ erɛ na saŋa zaa. Ka lɛ noba na mine naŋ na nyɛ ka ba sããnɛɛ Baabilɔŋ Kpoŋ na na leɛrɛɛ ba eebo bee?— Yel. 17:5; Izik. 33:33.

¹³ Ka lɛ ka yɛlɛ na e yɛŋ, lɛ yɛŋ yɛlɛ na naŋ da e Igyipiti paaloŋ Moosis saŋa na neŋ a yɛlɛ ŋa na yi la taa. Ka hooŋ nyɛ, “noba yaga naŋ ba e Izerayɛl biiri” da poɔ la a Izerayɛl biiri poɔŋ baŋ yi Igyipiti. Aminekaŋaŋ a noba ŋa mine da wa taa la sagediibu saŋa na baŋ da wa nyɛ ka, a Dɔgɛɛ Pie na zaa Moosis naŋ da yelka a na wa la a Igyipiti noba eŋɛŋ naŋ da nyɛ eebo na. (Yiib. 12:38) Ka ba naŋ wa sãã Baabilɔŋ Kpoŋ baare ka noba mine meŋ lɛ wa poɔ te poɔŋ a na nyɛ nyɔvore naŋ ba taa baaraa, lɛ na vɛŋeŋ ka te poɔ sãã bee? Ai! Te na mɔɔŋ  kyɛ tɔgle te Saa naŋ be sazuŋ na, o eɛ “nembazo ane nimibaaloŋ Naaŋmen, o suuri ba ire wieoŋ, kyɛ o paalɛɛŋ neŋ yelmeŋɛ nɔmmo ane yelmennoŋ.” b​—Yiib. 34:6.

14-15. Saŋa neɛ naŋ kpi bee zie o naŋ kpeɛrɛ la na wuli ka o na nyɛ la nyɔvore naŋ ba taa baaraa bee? Wuli a muni. (Yieme 33:​4, 5)

¹⁴ Saŋa kaŋa, te maŋ woŋee te yɔɔdɔba bee te yɔɔpɔgeba mine naŋ yele kyaara ba dɔgrɔ kaŋa naŋ ba puoro Jehoova ka, “ka o naŋ da kpi sɛre kyɛ ka a dɔgroŋ kpoŋ piili lɛ na somaŋ, aminekaŋaŋ o na baŋ lɛ nyɛɛ kũũ leɛ-iruu.” Nɔkpeɛne zaa kyebe ka teɛroŋ soŋ la baŋ maŋ de yel lɛ. Kyɛ, saŋa neɛ naŋ kpi naaneŋ na wuli ka o na nyɛɛ nyɔvore bee o koŋ nyɛ. Jehoova eɛ Sɛreŋmaara naŋ pɛgeyi—o sɛrɛɛ diibu zaa ane o gbɛ-deree zaa maŋ toriŋ. (Kanne Yieme 33:4, 5.) Te na baŋ taa la sagediibu ka “a tendaa zaa Sɛreŋmaara” na eɛ yɛlɛ naŋ tori.—Mun. 18:25.

¹⁵ Aseŋ ka te baŋ meŋ ka zie neɛ naŋ kpeɛrɛ naaneŋ na wuli ka a soba na nyɛɛ nyɔvore naŋ ba taa baaraa bee o koŋ nyɛ. Jehoova daŋ koŋ di noba turituri mine sɛrɛɛ ka ba eɛ “buuri” ba naŋ kpeɛrɛ paaloŋ kaŋa poɔŋ aŋ e kpeɛŋaa ka ba woŋ a Naaloŋ duoro na zuŋ. (Mat. 25:46) A tendaa zaa Sɛreŋmaara na pɛgeyieŋ, o naŋ meŋ taa a noba ŋa yɛlɛŋ yaga zaa a gaŋ te. Te ba baŋ te baare lɛ Jehoova naŋ na e yɛlɛ zaa te baare a dɔgroŋ kpoŋ saŋa. Aminekaŋaŋ a noba ŋa mine naŋ na nyɛ yɛlɛ na naŋ na erɛ a dɔgroŋ kpoŋ saŋa na na wa zannɛɛ Jehoova yɛlɛ, a wa puoruu yelmennoŋ poɔŋ a are o puoriŋ saŋa na oŋ na wa  vɛŋ ka a paalonne zaa baŋ o yuori na.​—Izik. 38:16.

16. Bo yɛlɛ teŋ wa baŋ kyaare Jehoova? (Kaa a fotori meŋ.)

¹⁶ Te zannɛɛ a Baabole a wa nyɛ ka nensaalaa nyɔvore eɛ tegroŋ yaga zaa a ko Jehoova. O de la o Bidɔɔ nyɔvore iri sareka ka te zaa na baŋ nyɛ a vuo ka te nyɛ nyɔvore naŋ ba taa baaraa. (Gyn. 3:16) Te zaa nyɛɛŋ ka Jehoova wuli teŋ nɔmmo meŋɛmeŋɛ. (Aiz. 49:15) O baŋ la te kaŋa la kaŋa zaa yuori. O baŋ teŋ yaga zaa, ka teneeŋ gbaŋ kpi kyɛ o na baŋ lɛ seŋ teŋ ka te waa lɛ na meŋɛ teŋ da waa na, a na baŋ lɛ teɛrɛ yɛlɛ zaa naŋ da be te teɛroŋ poɔŋ! (Mat. 10:29-31) Te na baŋ sagediŋ kpɛlɛŋkpɛlɛŋ ka, Jehoova na di la neɛzaa sɛrɛɛ sori naŋ tori, aseŋ neŋ, ane nimibaaloŋ poɔŋ.​—Gyi. 2:13.

17. Bo teŋ na zanne a zannoo naŋ tɔnne na poɔŋ?

¹⁷ A wuli paala ŋa teŋ leɛ zanne na soŋ teŋ teŋ leɛ nyɛ lɛ a naaŋ moɔloo naŋ e nimizeɛ yaga zaa a gaŋ saŋa zaa naŋ pare. Ananso la wala teŋ yel lɛ? Ka boŋ maŋ soŋ te teŋ moɔlɔ a duorisoŋ kpeɛŋaa kpeɛŋaa? Te na zannɛɛ a soorebie ŋa nɔɛ iribo yɛlɛ gaa tɔɔre a zannoo naŋ tɔnne na poɔŋ.