TANE MEKUN 19
NYIMA 22 Cile Hë La Baselaia —Epi Traqa Pi!
Itre Hne Së Hna Atre Göne La Aqane Ameköti Ewekë i Iehova Elany
“Xele kö [Iehova] troa apatrene la ketre e nyipunie.”—2 PET. 3:9.
MEKUN KA TRU
Xecie koi së ka hape, ka meköt la aqane ameköti ewekë i Iehova elany.
1. Pine nemene matre easa melën la ketre hneijine ka ketrepengön?
EASA melën la ketre hneijine ka ketrepengön! E nöjei drai, easa öhne la itre hna perofetane hnei Tusi Hmitrötr a eatr. Easa öhne enehila la “joxu ne kolopi” me “joxu ne kolojë” a isi pi mus. (Dan. 11:40) Ketre, alanyimu la itre atr ka kapa la maca ka loi ne la Baselaia i Akötresie hna cainöjën ngöne la fen asë. (Isa. 60:22; Mat. 24:14) Nge the qaja palaha la xen hne së hna kapa qaathei Iehova “ngöne la nyipi ijin.”—Mat. 24:45-47.
2. Nemene la ka xecie koi së, ngo nemene la hne së hna thatre?
2 Iehova palahi a amamane koi së la itre ewekë ka tru ka troa traqa. (It. Ed. 4:18; Dan. 2:28) Ngo xecie koi së ka hape, ame hë la kola nyiqane la akötr atraqatr, ke atre hë së la nyine tro sa kuca matre mele nyipici, me catre easenyi Iehova ngöne la ijine cili. Ame pe, hetre ewekë hne së hna thatre ka troa traqa ngöne la ijine cili. Ame ngöne la tane mekune celë, tro sa ce wang la itre kepine matre hnei easë hna saze la aqane trotrohnine së ekö la itre ewekë ka troa traqa ngöne la ijine akötr atraqatr. Tro mina fe sa ce wang la itre ewekë hne së hna atre göne la itre drai elany, memine la itre hnei Iehova hna troa kuca.
ITRE HNE SË HNA THATRE
3. Nemene la mekuna i easë ekö göne la itre ka tha nyihlue i Iehova qëmekene troa nyiqane la akötr atraqatr? Nge pine nemene matre easa mekune tun?
3 Ame ekö, easa mekun ka hape, ame hë la kola nyiqane la akötr atraqatr, tha ijije hë kowe la itre atr troa hane ië Iehova, me mel ngöne la ijine Amagedro. Ame la kepin matre easë lo a mekun tun, ke ame koi së, ame la itre atr me itre ewekë ka traqa ekö ngöne la Iwë Atraqatr, ke kola qajaqaja la itre ewekë ka troa traqa elany. Easa mekun ekö ka hape, tune la aqane thinge Iehova la qëhnelö ne la aka qëmeken troa traqa la Iwë Atraqatr, tro fe Nyidrëti a thingijën la itre atr ka xele ma drei Iehova, ngöne la kola nyiqane la akötr atraqatr. Nge ame e cili, ame pë hë la itre atr ka tha lapaune koi Iehova, ke ka luzi pë hë angatr.—Mat. 24:37-39.
4. Pine nemene matre tha tro kö sa mekun ka hape, ame la itre ewekë ka traqa ngöne la hneijine i Noa ke, kola qajaqaja la itre ewekë ka troa traqa elany?
4 Hapeu, ame la itre ewekë ka traqa ekö ngöne la ijine Iwë, kolo kö a qajaqaja la itre ewekë ka troa traqa elany? Waea. Pine nemen? Ke pëkö hna qaja hnei Tusi Hmitrötr. a Nyipici laka, hnei Iesu hna aceitunëne “la hneijine i Noa” memine la ijine nyidrëti hë la. Ngo tha ase kö nyidrëti qaja ka hape, ame la itre ewekë ka traqa ngöne la ijine la Iwë Atraqatr, tune lo Iehova a thing la qëhnelö ne la aka, ke kola qajaqaja la itre ewekë ka troa traqa elany. Ngo tha kolo kö lai a hape, pëkö ini nyine tro sa xom qa ngöne la hna melën hnei Noa memine la Iwë Atraqatr.
5. (a) Tune kaa la aqane amamane Noa la lapaune i angeic qëmeken troa traqa la Iwë Atraqatr? (Heberu 11:7; 1 Peteru 3:20) (b) Nemene la ewekë ka ceitu ngöne la hneijine i Noa me easë enehila?
5 Thupene la Iehova a qaja koi Noa la ewekë ka troa traqa, hnei Noa hna amamane la lapaune i angeic, me cane la aka. (E jë la Heberu 11:7; 1 Peteru 3:20.) Ketre tun enehila, nyipiewekë tro la itre atr ka dreng la maca ka loi ne la Baselaia a amamane la lapaune i angatr jëne la itre huliwa i angatr. (It. Hu. 3:17-20) Hnei Peteru hna qeje Noa ka hape, “atre cainöjëne la meköt.” (2 Pet. 2:5) Ngo tune la hne së hna ce wang ngöne la tane mekun ka ase hë, thatre kö së ka hape, hnei Noa kö hna cainöj kowe la nöjei atr asë qëmekene troa traqa la Iwë. Ame enehila, easa isine troa catre cainöj kowe la itre atr e cailo fen. Ngacama easa nue trengecatr, ngo tha ijiji së kö troa cainöj kowe la itre atr asë, qëmekene troa traqa la pun. Pine nemen?
6-7. Pine nemene matre thatreine kö së troa qaja la maca ka loi kowe la nöjei atr ka mel e celë fen, qëmekene troa traqa la pun?
6 Pane mekune jë lo hnei Iesu hna qaja göne la aqane troa kökötre la huliwa ne cainöj. Öni nyidrëti ka hape, tro ha cainöjëne la maca ka loi “e cailo fen nyine anyipicine kowe la nöjei nöj.” (Mat. 24:14) Kola eatre hnyawa enehila la hna perofetane cili. Eje hi, kola mama la maca ne la Baselaia ngöne la 1 000 lao qene hlapa nge hetre munën, nge jëne la site së jw.org, ijije hi tro la itre atr e cailo fen a atre la maca cili.
7 Ngo hnei Iesu fe hna qaja kowe la itretre drei nyidrë laka, “tha umuthe pala kö [angatr] la huliwa ne cainöj ngöne la nöjei traon me hunahmi asë” la nyidrëti a traqa. (Mat. 10:23; 25:31-33) Matre qëmekene tro Iesu a traqa troa amekötine la itre atr, tha ijiji së ju kö troa cainöj kowe la itre atr asë. Eje hi, itre milio lao atr enehila ka mel ngöne la itre nöj laka, hna wathebone la hmi së. Ketre, traqa koi itre hadredr lao medreng hna hnahon e nöjei menetr. Ame pe, easa kuca la hne së hna atrein matre troa cainöj kowe la nöjei atr ne la “nöjei nöj, me nöjei tribu, me nöjei qene hlapa, me nöjei atr.” (Hna Am. 14:6) Matre trotrohnine hi së laka, thatreine kö së troa qaja la maca ka loi kowe la nöjei atr ka mel e celë fen, qëmekene troa traqa la pun.
8. Nemene la hne së hna hnyingën göne la aqane tro Iehova a ameköti ewekë elany? (Goeëne ju fe la itre iatr.)
8 Ngo easa hnying ka hape: Nemene la ka troa traqa kowe la itre atr ka tha hane dreng la maca ka loi qëmekene troa nyiqane la akötr atraqatr? Tune kaa la aqane tro Iehova me Iesu, lo hnei Nyidrëti hna acile troa ameköti ewekë, a ameköti angatr? (Ioa. 5:19, 22, 27; It. Hu. 17:31) Kola qaja ngöne la xötr ka nyitane la tane mekune celë ka hape, “xele kö Nyidrë troa apatrene la ketre e nyipunie.” Ngo aja i Nyidrëti pe tro “nyipunieti asë a ietra.” (2 Pet. 3:9; 1 Tim. 2:4) Ngo tha ase palakö Nyidrë qaja koi së la aqane tro Nyidrëti a ameköti angatr. Qanyi Nyidrëti kö wang ka hape, tro kö Nyidrëti a qaja koi së maine waea.
Nemene la aqane tro Iehova a amekötin la itre atr ka tha hane dreng la maca ka loi qëmekene troa nyiqane la akötr atraqatr? (Wange ju la paragarafe 8) c
9. Nemene la hnei Iehova hna qaja koi së ngöne la Tusi Hmitrötr?
9 Ame ngöne la Tusi Hmitrötr, hnei Iehova hna qaja koi së la itre xaa ewekë hnei Nyidrëti hna troa kuca elany. Ej a qaja ka hape, tro Iehova a amelene hmaca la itre “ka tha meköti kö,” kolo itre atr ka tha hane dreng la maca ka loi me saze. (It. Hu. 24:15; Luka 23:42, 43) Ngo kolo fe a amejëne la itre xaa hnying ka tru.
10. Nemene la itre xaa hnyinge së?
10 Hapeu, tro kö a amelene hmaca la itre ka troa mec ngöne la ijine akötr atraqatr? Tusi Hmitrötr a qaja hnyawan ka hape, ame la itre ka icilekeu me Iehova me itre trongene isi Nyidrë ngöne la ijine Amagedro, ke troa apatrenyi angatr, nge pëkö melehmaca ka ijij. (2 Thes. 1:6-10) Ngo tune kaa fe kowe la itre ka mec hnei wezipo, maine ka qatr, maine ka aksida, maine hna humuth hnene la ketre atr, ngöne la ijine cili? (A. Cai. 9:11; Zaka. 14:13) Hapeu, tro fe kö angatr a hane sine lo itre “ka tha meköti kö” me melehmaca ngöne la fen ka hnyipixe? Thatre kö së.
ITRE HNE SË HNA ATRE
11. Nemene la aqane troa amekötine la itre atr ngöne la ijine Amagedro?
11 Hetre hne së hna atre göne la itre ewekë ka troa traqa. Atre hi easë laka, ame ngöne la ijine Amagedro, troa amekötine la itre atr thenge la aqane ujë i angatr kowe la itre trejine me Keriso. (Mat. 25:40) Troa amekötine la itre xan ka hape, mamoe, e hnei angatr hna xatuan la itre trejin hna iën, me xatua Keriso. Ketre, atre hi së ka hape, thupene la kola nyiqane la akötr atraqatr, hetre trejin hna iën palakö e celë fen. Nge tro hi a xomi angatr a tro hnengödrai, qëmekene troa nyiqane la isi Amagedro. Pine laka, hetre trejin hna iën palahi e celë fen, ijije palakö tro la itre atr a xatua angatr me cilëgöline la itre huliwa i angatr. (Mat. 25:31, 32; Hna Am. 12:17) Pine nemene matre ka nyipiewekë la itre mekune cili?
12-13. Nemene la aqane tro la itre xan a ujë la angatr a öhne la kola lep apatrenyi “Babulona Atraqatr”? (Goeëne ju fe la itre iatr.)
12 Ame ngöne la ijine akötr atraqatr, thupene la kola lepe apatrenyi “Babulona Atraqatr,” maine jë, tro la itre xan a mekun hmaca lo ijine itre Temoë Iehova a cainöjëne la ijine cili. Tro kö angatr a mejiune koi Iehova thupene la angatr a öhne la itre ewekë ka traqa?—Hna Am. 17:5; Ezek. 33:33.
13 Kola amekunë së la ewekë ka traqa e Aigupito ngöne la hneijine i Mose. Ame la angetre Isaraela a tro qa Aigupito, “ala nyimu fe la itre xa atr, ka hane xötrethenge angatr.” Maine jë, hnene la itre xa atr ka xötrethenge la angetre Isaraela hna nyiqane lapaune koi Iehova, la angatr a öhne la kola lep la nöje Aigupito hnene lo 10 lao akötr, hna qaja hnei Mose. (Eso. 12:38) Maine troa traqa la ewekë cili thupen la kola apatrenyi Babulona Atraqatr, tro kö sa wesitr la kola hane ce tro me easë hnene la itre xaa atre ne fen, qëmekene troa traqa la pun? Waea! Aja së pe troa nyitipune la itre thiina i Iehova Keme së, “Akötresie ka utipin nge ka itrotrohni, nge ka hmitre troa elëhni, nge ka tru trenge ihnimi nyipici, me nyipici.” b—Eso. 34:6.
Ame hë la kola öhne la kola apatrenyi “Babulona Atraqatr,” hetre itre xan ka troa mekun hmaca lo hna cainöjën hnene la itre Temoë Iehova qane hë ekö (Wange ju la paragarafe 12-13) d
14-15. Tro kö Iehova a amelene la itre atr thenge la ijine angatr a mec, maine götrane hnei angatr hna mele ngön? Qejepengöne jë. (Salamo 33:4, 5)
14 Ame itre xaa ijin, easa dreng la itre xan a qaja ka hape, “Ma ka loi kö koi angeic troa mec qëmekene troa nyiqane la akötr atraqatr. Matre troa hane amele angeic elany.” Trotrohnine hi së la aqane mekune cili. Ngo tha Iehova kö a amelene la ketre atr thenge la ijine angeic a mec. Iehova la Atre Iameköti ka tru. Ka meköti palahi la itre mekun hnei Nyidrëti hna xom. (E jë la Salamo 33:4, 5.) Matre xecie koi së laka, tro kö la “Atre Iameköti e cailo fen a kuca la ka meköt.”—Gen. 18:25.
15 Ketre, tha tro kö sa mekun ka hape, tro Iehova a amelene la itre atr thenge la götrane hnei angatr hna mele ngön. Thatreine kö së mekun ka hape, tro Iehova a amekötine la itre milio lao atr hna hape, “nani,” ke angatr a mel ngöne la itre nöj laka, tha hane kö traqa e cili la maca ne la Baselaia. (Mat. 25:46) Tru catr la hnei Iehova, Atre Iameköti e cailo fen, hna mekun la itre atre cili. Thatre kö së la aqane tro Nyidrëti a ameköti ewekë ngöne la ijine akötr atraqatr. Maine jë, tro la itre atre cili a hane atre Iehova, me mejiune koi Nyidrë me nue mele koi Nyidrë ngöne la Nyidrëti a troa mama kowe la nöjei nöj.—Ezek. 38:16.
Thupene la kola nyiqane la akötr atraqatr, hapeu, tro kö la itre xaa atr a lapaun koi Iehova la angatr a öhne la kola apatrenyi Babulona Atraqatr?
16. Nemene la hne së hna atre göi Iehova jëne la hne së hna ini Tusi Hmitrötr? (Wange ju fe la iatr.)
16 Jëne la hne së hna ini Tusi Hmitrötr, easa trotrohnine laka, ka tru koi Iehova la mele ne la atr. Hnei Nyidrëti hna nue xecie la mele ne la nekö i Nyidrë, matre tro sa hetrenyi la mel ka pë pun. (Ioa. 3:16) Isa drenge hi së la trenge ihnimi Nyidrë. (Isa. 49:15) Atre kö Nyidrë la isa ëje së isa ala cas. Pine laka, atre hnyawa kö Nyidrë la pengö së, matre e meci pi së elany, atreine kö Nyidrë xupi së hmaca memine la itre thiina me mekuna së! (Mat. 10:29-31) Celë hi matre, xecie koi së laka, tro kö a mama la lolo me meköt, me utipine ngöne la aqane ameköti ewekë i Iehova, Keme së ka tru ihnimin.—Iako. 2:13.
Xecie koi së laka, tha ka tria kö, ka loi nge ka lolo la aqane ameköti ewekë i Iehova (Wange ju la paragarafe 16)
17. Nemene la lue hnyinge hne së hna troa ce wang ngöne la tane mekun e thupen?
17 Kola amamane hnene la itre ini ka hnyipixe laka, enehila hi la ijine tro sa catre cainöj. Pine nemen? Nge nemene la ka uku së tro palahi a catre cainöjëne la maca ka loi? Troa sa la lue hnyinge celë ngöne la tane mekun e thupen.
NYIMA 76 Nemene La Ewekë Ka Ej e Kuhu Hni Eö?
a Maine epuni a ajan troa atre la kepin matre kola amamane la ini ka hnyipixe göi Iwë Atraqatr, wange ju la tane mekun “Meköti Hi Lai Koi Enëtilai” ngöne la Ita Ne Thup ne 15 Maac 2015 g. 7-11.
b Thupene la hna apatrenyi Babulona Atraqatr, troa tupath la lapaun ne la itre hlue i Iehova ngöne la kola isi hnei Gog atre Magog. Tro fe a tupath la lapaun ne la itre atr ka ce xöle memine la nöje i Akötresie, thupene la kola lep apatrenyi Babulona Atraqatr.
c ITRE FOTO: Kola amamane hnene la köni iatre celë laka, thelejëne ju hë së troa cainöjën la maca ka loi ngöne la fen asë, ngo thatreine jë kö së troa ketr la nöjei atr asë: (1) Ketre föe a mel ngöne la ketre nöj laka, ka jole catre troa cainöj, ke catrecatre kö la hmi ka thoi e cili, (2) lue trefën a mel ngöne la ketre nöj laka, musi a wathebone la huliwa ne cainöj, me akötrëne la itre trejin, nge (3) ketre trahmanyi a mel ngöne la ketre götran gaa nany catr, nge thatreine kö së troa tro e cili.
d ITRE FOTO: Ketre föe hmae a mekune hmaca la hnei angeic hna inin göne la ijine troa lep apatrenyi “Babulona Atraqatr.” Angeic a mekun troa bëek hmaca koi Iehova, me thele ixatua thene la keme me thine i angeic ka Temoë. E traqa ju la itre ewekë ka tune lai elany, loi e tro sa nyitipune la utipin me ihnim ne la Keme së, me madrin la kola bëeke hmaca hnene la ketre trejin hna upetröneë.
