1. Saide u sa taki aini wan simpan ten we libi?

 AINI wan simpan ten we libi nownow. Ibii dei we si fa den polofeititoli fu Beibel e kon tuu. We si fa a kownu fu zuid anga a kownu fu noord e sitee anga denseefi, bika ala den tu man wani tii a hii goontapu (Dan. 11:40). We si fa a bun nyunsu fu Gadu Kownukondee e peleiki na a hii goontapu tu. Boiti dati, we si fa omen sama e kon dini Yehofa (Yes. 60:22; Mat. 24:14). We fende leli na a yuu di wi abi den fanowdu tu.​—Mat. 24:45-47.

2. Saw sabi taki o pasa? Saw mu holi a pakisei?

² Yehofa e yeepi u fu fusutan kiin sowtu pelensipali sani o pasa dyonson (Odo 4:18; Dan. 2:28). U sa biibi taki na a ten fu a gaan banowtu, ala wo sabi san wi abi fanowdu fu man holidoo. Wo sabi saw mu du tu fu libi na a wan aini a taanga ten de. Ma u mu holi a pakisei taki wan sani de ete di wa sabi fu a ten di e kon. Aini a artikel ya, wo luku saide we fusutan son sani di o pasa taa fasi nownow. Bakadati, wo luku wantu fu den sani di u sabi te a abi fu du anga a ten di e kon anga fa Yehofa o du sani.

SAN WA SABI

3. Saw be e taki fu te a gaan banowtu o bigin? Saide u be e denki so?

³ Aini a ten di pasa u be taki te a gaan banowtu o bigin, sama naw fende a okasi moo fu kon dini Yehofa.  Den naw poi pasa a feti fu Alimakedon. U be taki a sani ya fu di u be e denki taki den sani di pasa na a ten fu a fuudu e soi san be o pasa aini a ten di e kon. U be e taki leti enke fa Yehofa be tapu a doo fu a ark fosi a fuudu kon, a letiso sama naw man kon dini Yehofa moo na a ten fu a gaan banowtu.​—Mat. 24:37-39.

4. Saide u nai taki moo taki den sani di be pasa na a ten fu Nowa o kon tuu a wan moo gaan fasi aini a ten ya?

⁴ Den sani di be pasa aini a ten fu Nowa e soi go a wan sani di o pasa aini a ten di e kon? Nono. Saide? Bika Beibel nai taki fu a sani ya. a A tuu taki Yesesi be maiki ‘a ten fu Nowa’ anga a ten di a be o kon. Ma aa taki ala den sani di be pasa na a ten fu Nowa o kon tuu a wan moo gaan fasi aini a ten di e kon. Aa be taki sani o waka leti enke fa Yehofa be tapu a doo fu a ark. Ma a sani ya á wani taki wa poi leli wan sani fu Nowa anga a Fuudu.

5. (a) San Nowa du fosi a fuudu kon? (Hebrewsama 11:7; 1 Peitilisi 3:20) (b) Fa den sani di e miti u aini a peleikiwooko e kai anga den sani di be e miti Nowa di a be e peleiki?

⁵ Di Nowa yee san Yehofa taigi en, a soi taki a be abi biibi di a meke a ark. (Leisi Hebrewsama 11:7; 1 Peitilisi 3:20.) A so den sama di e yee a bun nyunsu fu Gadu Kownukondee mu soi taki den e du den sani di den leli (Toli 3:17-20). Peitilisi kai Nowa ‘wan man  di be e peleiki taki sama mu libi a wan letifasi’ (2 Peit. 2:5). Enke faw si aini a artikel di pasa, da wa sabi efu Nowa be meke moiti fu peleiki gi ala sama a hii goontapu fosi a fuudu kon. Aini a ten ya, we meke moiti fu peleiki gi ala sama a hii goontapu. U de kabakaba fu du a sani ya tu. Winsi we meke ala moiti, toku u sabi taki u naw poi peleiki gi ala sama fosi a kaba doo. Saide?

6-7. Saide u naw poi paati a bun nyunsu gi ala sama fosi a kaba doo?

⁶ Pakisei a sani di Yesesi be taki fu a peleikiwooko. A be taki a bun nyunsu be ‘o paati na a hii goontapu fu ala sama yee’ (Mat. 24:14). A polofeititoli ya e moo kon tuu aini a ten ya. A Kownukondee bosikopu de aini moo enke 1000 tongo. Boiti dati, fu di wi abi a jw.org website nownow, meke omen sama man yee a bun nyunsu fu Gadu Kownukondee fosi a kaba doo.

⁷ Yesesi be taigi den disipel fi en taki den ‘naw poi kaba a wooko na ala den foto’ efuso peleiki gi ala sama fosi a kon fu kuutu libisama (Mat. 10:23; 25:31-33). A sani di Yesesi taki ya e kon tuu aini a ten ya. A omen sama e tan a peesi pe lanti tapu a wooko fu u. Aini wan miniti, a omen ondoo pikin e meke tu. Winsi fa we meke moiti fu peleiki gi ala sama ‘fu ala nasi, lo anga tongo’, toku u naw poi peleiki gi ala sama fosi a kaba kon.​—Openb. 14:6

8. San we akisi useefi te we taki fu a fasi fa Yehofa o kuutu sama aini a ten di e kon? (Luku a fowtow tu.)

⁸ Kande ye akisi iseefi taki: Da saw pasa anga den sama di á yee a bun nyunsu fosi a gaan banowtu bigin? Fa Yehofa anga en Manpikin o kuutu den sama ya? (Yoh. 5:19, 22, 27; Toli 17:31) A tekisi fu a artikel ya e taki Yehofa ‘á wani nawan sama dede’. A wani ‘ala sama fende a okasi fu tapu anga den sondu fu den’ (2 Peit. 3:9; 1 Tim. 2:4). Winsi faw sabi den sani di Yehofa o du, toku aa taigi u ete fa aw kuutu den sama di á fende a okasi fu yee a bun nyunsu. A naabi fu taigi u ala den sani di aw du tu.

9. San Yehofa meke sama sikiifi aini Beibel?

⁹ Beibel e soi u wantu sani di Yehofa o du aini a ten di e kon. Ai soi u taki Gadu o weki den sama di á be ‘libi a wan letifasi’. Den sama di á be libi a wan letifasi a den sama di á be fende a okasi fu yee a bun nyunsu (Toli 24:15; Luk. 23:42, 43). A sani ya meke wi abi moo akisi.

10. San a wantu taa sani di we akisi useefi?

¹⁰ Na ala den sama di o dede na a pisiten fu a gaan banowtu o dede fu teego? Den sama ya naw weki baka noh? Beibel e soi u kiin taki den sama di Yehofa anga den suudati fi en o kii na a feti fu Alimakedon naw kon a libi moo (2 Tes. 1:6-10). Ma saw pasa anga den sama di dede na a ten fu a gaan banowtu fu di den be siki? Saw pasa anga den sama di dede fu di den kisi gaan mankei? Saw pasa anga den sama di taa sama kii? (Ek. 9:11; Sak. 14:13) Son wan fu den sama ya de aini a kulu fu den sama ‘di á be libi a wan letifasi’ di o kon a libi baka aini a nyun goontapu? Fu taki en kiin, wa sabi ye.

 SAW SABI

11. San Yehofa o luku te aw kuutu sama na a ten fu Alimakedon?

¹¹ A omen sani u sabi fu a ten di e kon. U sabi taki na a ten fu Alimakedon na a fasi fa sama libi anga den baala fu Kelestesi, a so Yehofa o kuutu den (Mat. 25:40). Den sama di den o kuutu enke sikapu, a den sama di holibaka gi den salufu Kelesten anga Kelestesi. U sabi tu taki son salufu baala o de a goontapu ete di a gaan banowtu o bigin. Den o go a hemel fosi a feti fu Alimakedon bigin. Solanga den salufuwan de a goontapu ya ete, sama o abi a okasi ete fu holibaka gi den anga a wooko di den e du (Mat. 25:31, 32; Openb. 12:17). Saide a sani ya pelensipali?

12-13. San son sama o du te den si fa a ‘Gaan Babilon’ kisi poli? (Luku a fowtow tu.)

¹² Fosi a gaan banowtu bigin, kande son sama di o si fa a Gaan Babilon kisi poli o membee taki den Yehofa Kotoigi be taki omen yali a fesi taki a sani ya be o pasa. I si enke den sama di o si fa a Gaan Babilon kisi poli na a ten fu a gaan banowtu o wani kon dini Yehofa?​—Openb. 17:5; Eseik. 33:33.

¹³ Na a sani ya be pasa na a ten fu Mosesi. ‘A omen taa kondee sama’ be gwe anga den Islayelisama di den be e komoto a Egepte. Kande sowan fu den sama ya be kon dini Yehofa baka di den si fa Mosesi be wasikoi den fu den Tin ogii di be pasa aini a kondee (Ek. 12:38). Efu aseefi sani ya pasa baka di a Gaan Babilon o kisi poli, daw mu fii booko-saka taki den sama ya kon dini Yehofa fosi Alimakedon? Nono. U wani de enke u Dda a hemel. Yehofa ‘a wan Gadu di abi tyali-ati. A abi switifasi. En ati nai boon gaw. Ai du bun ala yuu. Ai du ala san a taki’. b​—Ek. 34:6.

14-15. A pe wan sama dede efuso pe ai tan o meke a fende teego libi? (Psalm 33:4, 5)

 ¹⁴ Son yuu son baala efuso sisa e taki fu wan sama aini a famii fu den di nai dini Yehofa taki: ‘A moo bun efu a dede fosi a gaan banowtu bigin ye, bika kande aw kon a libi baka.’ Te wan sama taki so, a sani ya e soi taki ai booko en ede anga a famii fi en. Ma fu man libi fu teego, a sani ya naabi fu du anga on ten wan sama dede. Yehofa na a moo bun Kuutuman. Ala yuu ai du sani a wan letifasi. (Leisi Psalm 33:4, 5.) U sa biibi taki ‘a Sama di e koti kuutu a hii goontapu’ o du sani a wan letifasi.​—Gen. 18:25.

¹⁵ A de kiin tu taki a ná a ten efuso pe wan sama e tan o meke a fende teego libi. Noiti Yehofa o kuutu omen miliyun sama enke ‘kaabita’ fu di den be e tan a wan peesi pe den á fende a okasi fu yee a bun nyunsu fu a Kownukondee (Mat. 25:46). A Sama di e kuutu sani a wan letifasi a hii goontapu e booko en ede anga den sama ya moo enke san we denki. Wa sabi fa Yehofa o seeka sani na a pisiten fu a gaan banowtu. Kande te den sama ya o si saw pasa na a ten fu a gaan banowtu, den o teke a okasi de fu kon dini Yehofa te aw meke ala sama a goontapu sabi a nen fi en.​—Eseik. 38:16.

16. Saw kon sabi fu Yehofa? (Luku a fowtow tu.)

¹⁶ Aini a artikel ya, u si taki ná pikin lobi Yehofa lobi sama. A meke en Manpikin  kon dede giw fu ala u sa fende a okasi fu libi fu teego (Yoh. 3:16). Ala we fii taki Yehofa lobi u tuutuu (Yes. 49:15). A sabi ala u nen. A sabi u te taki winsi u dede seefi, a sa meke u kon a libi baka. A sabi ala den sani di u be e pakisei (Mat. 10:29-31). Ala den sani di u luku aini a artikel ya e soi taki u sa biibi taki u Dda a hemel o kuutu ala sama enke fa a mu kuutu den, bika a koni, ai du sani a wan letifasi. A abi tyali-ati tu.​—Yak. 2:13.

17. San wo luku aini a taa artikel?

¹⁷ Now di u kon sabi den sani ya, u kon si taki a peleikiwooko e kon moo pelensipali dei fu dei. Saide u taki so? Sai yeepi u fu tan paati a bun nyunsu anga u hii ati? Wo luku den piki fu den akisi ya aini a taa artikel.