BAROKUN KALANTA KAFO KƆNƆ 19
DƆNKILI 22 Masaya be sen kan: A ka na!
Jehova bena mɔgɔw kiti cogo min na sini ma, an be mun lo lɔn o koo la?
“Matigi . . . t’a fɛ mɔgɔ si ka halaki.”—2 PIYƐRI 3:9.
BAROKUN KƆNƆNAKOW
An be se ka la a la ko Jehova bena mɔgɔw kiti ni tilenninya ye.
1. Mun na an be se k’a fɔ ko an be wagati kɛrɛnkɛrɛnnin lo la?
AN BE wagati kɛrɛnkɛrɛnnin lo la! Loon o loon, Bibulu ka kiraya kumaw be dafa an ɲɛɛ na. Misali la, an ɲɛɛ b’a la ko “kɔgɔdugu [o kɔrɔ saheli] ɲafan fɛ masacɛ” ani “worodugu ɲafan fɛ masacɛ” be ɲɔgɔn kɛlɛla duniɲa ka kuntigiya kama (Dan. 11:40). An ɲɛɛ b’a la fana ko Ala ka Masaya kibaro diiman be fɔra duniɲa kuru bɛɛ kɔnɔ ani ko mɔgɔ miliyɔn caaman b’a latigɛra ka Jehova bato (Ezayi 60:22; Mat. 24:14). Alako ta fan fɛ fana, an be dumuni caaman sɔrɔla wagati bɛnnin na.—Mat. 24:45-47.
2. An be se ka la mun lo la? Nka an ka ɲi ka sɔn mun lo ma?
2 Koo jɔnjɔn minw bena kɛ yanni dɔɔni, Jehova bele b’an dɛmɛna k’o faamu ka ɲɛ (Talenw 4:18; Dan. 2:28). Walisa ka muɲuli kɛ kantigiya la ani an kaan bɛnnin ka to n’an balimaw ye tɔɔrɔba wagati la, an be se ka la a la ko sanni o wagati gwɛlɛ ka daminɛ, an mako b’a la ka min lɔn, Jehova bena an dɛmɛ k’u bɛɛ faamu. Nka, an ka ɲi ka sɔn a ma ko an tɛ siniko dɔw lɔn. An tun ye min fɔ siniko dɔw la, barokun nin na, an bena kɔn k’a ye fɛɛn min kama an y’an ka faamuyali yɛlɛma o koo la. O kɔ, an be siniko minw lɔn, an bena u dɔw lajɛ ani an bena a ye an sankolola Faa bena koow kɛ cogo min na.
AN TƐ MIN LƆN
3. Minw tɛna Jehova bato ka kɔn tɔɔrɔba wagati ɲɛ, fɔlɔ la an tun be mun lo miiri olu koo la ani mun na an tun b’o miiri?
3 Fɔlɔ la, an tun b’a fɔ ko ni tɔɔrɔba daminɛna, dannabali si tɛna sababu sɔrɔ tugun ka kɛ Jehova batobaga dɔ ye ani ka kisi Arimagedɔn kɛlɛ la. An tun b’o fɔ sabu an tun b’a jati ko mɔgɔ minw tun be yen sanjiba tuma na ani koo minw kɛra o wagati la, u kelen kelen bɛɛ ye siniko dɔw lo tagamasiɲɛ ye. Misali la, tuma min na Jehova ye kurun datugu, mɔgɔ si tun tɛ se ka don a kɔnɔ tugun. An tun b’a miiri ko o cogo kelen na, ni tɔɔrɔba daminɛna, mɔgɔ si tɛna se ka limaniya Jehova la ani ka kisi.—Mat. 24:37-39.
4. Koo minw kɛra sanjiba tuma na, yala an bele b’a miiri ko o ye koo dɔw lo tagamasiɲɛ ye an ka wagati la? A ɲɛfɔ.
4 Yala a bɛnnin lo an k’a miiri ko koo minw kɛra sanjiba wagati la, u kelen kelen bɛɛ ye siniko dɔw lo tagamasiɲɛ ye wa? Ayi, a bɛnnin tɛ. Mun na do? Sabu Bibulu t’o fɔ. a Wagati min na Yezu tun bena kɛ masaya la, a y’o suma ni “Nuhun ka tile” ye. Nka, a ka kumaw kɔrɔ tɛ ko mɔgɔ minw tun be yen ani koo minw kɛra sanjiba tuma na, u kelen kelen bɛɛ ye siniko dɔw lo tagamasiɲɛ ye. A m’a fɔ fana ko kurun datuguli ye koo dɔ lo tagamasiɲɛ ye. Nka, o kɔrɔ tɛ ko an tɛ se ka kalan sɔrɔ Nuhun ani sanjiba koo la.
5. a) Nuhun ye mun lo kɛ ka kɔn sanjiba ɲɛ? (Eburuw 11:7; 1 Piyɛri 3:20). b) Mun na an ka waajuli baara bɔnin be Nuhun ta ma?
5 Tuma min na Nuhun ye Jehova ka lasɔmini kuma mɛn, a y’a yira ko a limaniyanin lo a kɛtɔ ka kurun lɔ (Eburuw 11:7; 1 Piyɛri 3:20 kalan). O cogo kelen na, mɔgɔ minw be Ala ka Masaya kibaro diiman mɛn, u ka ɲi k’a yira k’u limaniyanin lo u kɛtɔ ka koow kɛ ka kɛɲɛ n’o ye (Kɛw. 3:17-20). Piyɛri ko Nuhun “tun be tilenninyako fɔ.” (2 Piyɛri 2:5). Nka, i ko an y’a ye barokun tɛmɛnin na cogo min na, an t’a lɔn ni Nuhun y’a jija ka dugukolo kan mɔgɔ kelen kelen bɛɛ waaju ka kɔn sanjiba ɲɛ. Bi, an b’an jijara ka kibaro diiman lase mɔgɔw ma dugukolo kuru bɛɛ kan ni kisɛya ye. Nka, an mana an jija cogo o cogo, an tɛna se ka kibaro diiman lase mɔgɔ kelen kelen bɛɛ ma dugukolo kan sanni laban ka se. Mun na do?
6-7. Mun na an be se k’a fɔ ko an tɛna se ka kibaro diiman lase mɔgɔ kelen kelen bɛɛ ma dugukolo kan sanni laban ka se?
6 Miiri k’a filɛ Yezu ye min fɔ an ka waajuli baara koo la. A ko kibaro diiman bena fɔ “diɲɛ yɔrɔ bɛɛ la, waasa Alalɔnbaliw bɛɛ k’a koo mɛn.” (Mat. 24:14). O kiraya kuma be dafara bi ka tɛmɛ sanga ni wagati bɛɛ kan. Masaya kibaro diiman be sɔrɔ kaan 1000 ni kɔ la ani duniɲamɔgɔw fanba be se ka kibaro diiman lɔn an ka site jw.org sababu fɛ.
7 Nka, Yezu y’a fɔ a ka kalandenw ye fana ko u tɛna “duguw bɛɛ kɛ ɲɔgɔn kan ka ban” o kɔrɔ, ka mɔgɔ kelen kelen bɛɛ waaju, sanni ale ka kɔsegi ka na (Mat. 10:23; 25:31-33). Yezu ye min fɔ, o ɲɛsinna an fana ma bi. Mɔgɔ miliyɔn caaman be yɔrɔ minw na, bali sigira an ka waajuli baara kan. Denɲɛnin caamanba lo be wolo fana miniti kelen kelen bɛɛ la. An b’an seko fisaman kɛra ka kibaro diiman lase “diɲɛ mɔgɔw bɛɛ ma, jamanaw kɔnɔ siyaw bɛɛ ma.” (Yir. 14:6). Nka, an tɛna se ka kibaro diiman lase mɔgɔ kelen kelen bɛɛ ma sanni laban ka se.
8. Jehova bena mɔgɔw kiti cogo min na sini ma, an be se k’an yɛrɛ ɲininga mun lo la o koo la? (jaaw lajɛ fana).
8 O la, an be k’an yɛrɛ ɲininga ko: Minw ma sababu sɔrɔ ka kibaro diiman mɛn sanni tɔɔrɔba ka daminɛ, mun lo bena olu sɔrɔ do? Jehova ye kitiko kalifa a Dencɛ lo ma. Ale n’a Dencɛ bena o mɔgɔw kiti cogo di? (Zan 5:19, 22, 27; Kɛw. 17:31). Barokun nin ka vɛrise jɔnjɔn b’a fɔ ko Jehova “t’a fɛ mɔgɔ si ka halaki.” Nka, “a b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9; 1 Tim. 2:4). Hali n’an b’o kala ma, mɔgɔ minw ma sababu sɔrɔ ka kibaro diiman mɛn, Jehova m’a fɔ an ye fɔlɔ a bena u kiti cogo min na. A ye koo minw kɛ ani a bena minw kɛ, waajibi tɛ a k’o bɛɛ fɔ an ye.
Mɔgɔ minw ma sababu sɔrɔ ka kibaro diiman mɛn ka kɔn tɔɔrɔba ɲɛ, Jehova bena olu kiti cogo di? (dakun 8nan lajɛ). c
9. Jehova ye mun lo fɔ an ye Bibulu kɔnɔ?
9 Jehova bena koo minw kɛ, a y’u dɔw kofɔ an ye a ka Kuma kɔnɔ. Misali la, Bibulu b’a fɔ ko Jehova bena “mɔgɔ tilenbaliw” suu kunu, olu minw ma sababu sɔrɔ ka kibaro diiman mɛn ani k’u kɛcogo yɛlɛma (Kɛw. 24:15, Bible senuma; Luka 23:42, 43). O b’a to an b’an yɛrɛ ɲininga koo kɔrɔtanin wɛrɛw la.
10. An b’an yɛrɛ ɲininga koo wɛrɛ jumanw lo la?
10 Minw bɛɛ bena sa tɔɔrɔba wagati la, yala olu ta banna ani u suu tɛna kunu wa? Bibulu b’a yira ka gwɛ ko Jehova n’a ka kɛlɛbolo bena a kɛlɛbaga minw halaki Arimagedɔn kɛlɛ la, olu suu tɛna kunu (2 Tes. 1:6-10). Nka mɔgɔ tɔɔw do? Misali la tɔɔrɔba tuma na, n’a sɔrɔ dɔw bena sa bana, kɔrɔya wala kasara dɔ kosɔn. Mɔgɔ wɛrɛw bena dɔw faga fana (Waaj. 9:11; Zak. 14:13). O mɔgɔ minw bena sa, yala u dɔw bena kɛ “mɔgɔ tilenbaliw” cɛma minw suu bena kunu duniɲa kura kɔnɔ wa? Tiɲɛn na, an t’o lɔn.
AN BE MIN LƆN
11. Arimagedɔn tuma na, Jehova bena mɔgɔw kiti ka kɛɲɛ ni mun lo ye?
11 An be koo caaman lɔn ka ɲɛsin sinikow ma. Misali la, mɔgɔw ye Krista balimaw minɛ cogo min na, u bena kiti ka kɛɲɛ n’o lo ye Arimagedɔn tuma na (Mat. 25:40). Minw ye kerecɛn mɔlenw ani Krista dɛmɛ, olu bena jati sagaw ye. An b’a lɔn fana ko Krista balima dɔw bena kɛ dugukolo kan tɔɔrɔba daminɛnin kɔ ani u bena ta ka taga sankolo la dɔɔni ka kɔn Arimagedɔn kɛlɛ ɲɛ. Ka Krista balimaw to dugukolo kan, mɔgɔ kɔnɔgwɛw bena sababu sɔrɔ k’u dɛmɛ ani ka waajuli baara kɛ (Mat. 25:31, 32; Yir. 12:17). Mun na o kɔrɔtanin lo?
12-13. N’a sɔrɔ dɔw bena mun lo kɛ Babilonɛba halakinin kɔ? (jaaw lajɛ fana).
12 Tɔɔrɔba daminɛnin kɔ yɛrɛ, n’a sɔrɔ minw bena a ye u be Babilonɛba halakira, u dɔw hakili bena jigi ko Jehova Seerew tun y’o koo fɔ kabi wagatijan. Minw bena o ye, yala u dɔw bena limaniya Jehova la wa?—Yir. 17:5; Ezek. 33:33.
13 N’o kɛra, o bena kɛ komi mɔgɔ dɔw ye min kɛ Musa ka tile la. A to i hakili la ko Israɛldenw bɔtɔ Ezipiti, “siya wɛrɛ caaman bɔra n’u ye.” N’a sɔrɔ u dɔw y’a daminɛ ka limaniya Jehova la tuma min na u y’a ye ko Musa tun y’u lasɔmi tɔɔrɔ tan minw koo la, o dafara (Ɛkiz. 12:38). N’o koo ɲɔgɔn kɛra Babilonɛba halakinin kɔ, yala an dusu bena tiɲɛ sabu mɔgɔ dɔw farala an kan dɔɔni ka kɔn laban tuma ɲɛ wa? Ayi! An b’a fɛ k’an sankolola Faa ladegi, ale min ye “makaritigi, hinɛbaga Ala [ye]. A te dimi joona, a ka ɲumanya n’a ka kantigiya ka bon.” b—Ɛkiz. 34:6.
Minw bena a ye u be Babilonɛba halakira, u dɔw hakili bena jigi ko Jehova Seerew tun y’o koo fɔ kabi wagatijan (dakun 12-13nan lajɛ). d
14-15. Mɔgɔ sara tuma min na wala a be ɲɛnamaya kɛ yɔrɔ min na, yala o lo bena a to a be ɲɛnamaya banbali sɔrɔ wa? A ɲɛfɔ (Zaburuw 33:4, 5).
14 Tuma dɔw la, dɔw b’a fɔ ko: “A ka fisa n’ somɔgɔ ka sa sanni tɔɔrɔba ka daminɛ. O la, a bena kɛ ni sukununi jigiya ye.” Siga t’a la minw b’o fɔ, u be ni ŋaniya ɲuman ye. Nka, mɔgɔ sara tuma min na, o lo t’a to a be ɲɛnamaya banbali sɔrɔ. Jehova ye Kititigɛla dafanin ye. A be koo o koo latigɛ, o bɛɛ tilennin lo (Zaburuw 33:4, 5 kalan). An be se ka la a la ko ale “min be adamadenw bɛɛ kiti,” a bena koo tilennin kɛ.—Zɛnɛzi 18:25.
15 A bɛnnin lo an k’a fɔ ko mɔgɔ ye ɲɛnamaya kɛ yɔrɔ min na, o lo t’a to a be ɲɛnamaya banbali sɔrɔ. Mɔgɔ miliyɔn caaman be jamana dɔw la, yɔrɔ minw na u ma sababu sɔrɔ ka ye ka Masaya kibaro diiman mɛn. An tɛ se k’a miiri ko Jehova bena sin k’o mɔgɔw jati “baaw” ye (Mat. 25:46). Kititigɛla tilennin min be adamadenw bɛɛ kiti, ale b’a janto kosɔbɛ o mɔgɔw kelen kelen bɛɛ la ka tɛmɛ anw kan. An m’a lɔn Jehova bena koow kɛ cogo min na tɔɔrɔba wagati la. Koo minw bena kɛ o wagati la, n’o mɔgɔ dɔw y’o ye, n’a sɔrɔ o bena u lasun ka limaniya Jehova la tuma min na a bena a tɔgɔ saniya dugukolo kan mɔgɔw bɛɛ ɲɛɛ na.—Ezek. 38:16.
Tɔɔrɔba daminɛnin kɔ . . . minw bena o ye, yala u dɔw bena limaniya Jehova la wa?
16. An be mun lo lɔn Jehova koo la? (jaa lajɛ fana).
16 An ka Bibulu kalan sababu fɛ, an y’a faamu ko adamaden niin koo ka gwɛlɛ kosɔbɛ Jehova ma. A y’a Dencɛ niin di walisa an bɛɛ ka sababu sɔrɔ ka ɲɛnamaya kɛ fɔɔ abada! (Zan 3:16). An bɛɛ y’a ye ko Jehova b’an kanu yɛrɛ le! (Ezayi 49:15). A b’an kelen kelen bɛɛ tɔgɔ lɔn. A b’an lɔn koɲuman fɔɔ n’an sara, a be se k’an lakunu sabu a hakili b’an ka miiriya n’an ka koo kelen kelen bɛɛ la (Mat. 10:29-31). Tiɲɛn na, a bɛnnin lo an k’a miiri ko an sankolola Faa kanutigi bena bɛɛ kelen kelen kiti cogo dafanin na sabu hakilitigi lo, a tilennin lo ani a be makari.—Zaki 2:13.
An be se ka la a la ko Jehova bena bɛɛ kelen kelen kiti cogo dafanin na sabu hakilitigi lo, a tilennin lo ani a be makari (dakun 16nan lajɛ).
17. An bena mun lo lajɛ barokun nata la?
17 An ka faamuyali gwɛra Jehova ka kitikow la minkɛ, an b’a faamu ko an ka waajuli baara ye kɔrɔtɔko ye sisan ka tɛmɛ sanga ni wagati bɛɛ kan. Mun na an be se k’o fɔ? Mun lo b’an lasun an ka to ka kibaro diiman fɔ mɔgɔw ye ni kisɛya ye? An bena o ɲiningaliw jaabi k’u pereperelatigɛ barokun nata la.
DƆNKILI 76 O be mun kɛ i la?
a Walisa k’a lɔn fɛɛn min kama an y’an ka faamuyali yɛlɛma, barokun nin lajɛ: “Tu as trouvé bon d’agir ainsi.” A be sɔrɔ saan 2015, marisikalo tile 15nan ka Kɔrɔsili Sangaso ɲɛɛ 7-11 kan.
b Babilonɛba halakinin kɔ, Jehova sagokɛlaw bɛɛ ka limaniya bena kɔrɔbɔ tuma min na Gɔgi min be Magɔgi bena wuli u kama. Mɔgɔ o mɔgɔ bena fara Ala sagokɛlaw kan Babilonɛba halakinin kɔ, olu fana ka limaniya bena kɔrɔbɔ.
c JAA ƝƐFƆLI: Kuun minw kama n’a sɔrɔ kibaro diiman tɛna se bɛɛ ma duniɲa kuru bɛɛ kɔnɔ, u dɔw yirala jaa saba nunu kan: 1) Muso dɔ be jamana min na, mɔgɔw fanba be diinan min kɔnɔ, o b’a to farati b’a la ka kibaro diiman fɔ yen. 2) Cɛɛ dɔ n’a muso be jamana dɔ la yɔrɔ min na faamanw ye bali sigi an ka baara kan ani farati b’a la ka kibaro diiman fɔ yen. 3) Cɛɛ dɔ be dugukolo logologo dɔ la, yɔrɔ min na a ka gwɛlɛ kosɔbɛ ka se yen.
d JAA ƝƐFƆLI: Muso dɔ ye Jehova sago kɛli dabila ani a tun ye min kalan Babilonɛba halakili koo la, a hakili jigira o la. A y’a latigɛ ka kɔsegi Jehova ma ani a bangebagaw fɛ minw ye Jehova Seerew ye. N’o koo ɲɔgɔn kɛra, an b’a fɛ k’an sankolola Faa ladegi, ale min be makari ani ka ninsɔndiya k’o jurumukɛla kɔsegira Jehova ma.
