1. Ebɛnadze ntsi na yebotum aka dɛ nsɛm pii risisi wɔ hɛn aber yi do?

 NSƐM pii risisi wɔ hɛn aber yi do. Da biara da, yehu dɛ Bible nkɔnhyɛ reba mu. No mu bi nye dɛ, ndɛ yehu dɛ ‘etsifi afamu hen’ no nye ‘anaafo afamu hen’ no nye hɔnho ridzi esi osiandɛ hɔn mu biara pɛ dɛ ɔgye wiadze yi bɔ do. (Dan. 11:40) Afei so, yɛreka Nyankopɔn n’Ahendzi ho asɛmpa wɔ wiadze yi mu beebiara, na iyi ama nyimpa mpempem pii robɔsom Jehovah. (Isa. 60:22; Matt. 24:14) Bio so, ndzɛmba a ɔbɛma yɛnye Jehovah ntamu ayɛ papa no ebu do, na hɛn nsa so ka “wɔ ber a ɔsɛ mu.”—Matt. 24:​45-47.

2. Ebɛn awerɛhyɛmu na yɛwɔ, naaso ebɛn asɛm na ɔsɛ dɛ yɛma ɔtsena hɛn adwen mu?

² Nsɛm akɛseakɛse a ɔrennkyɛr obesisi no, Jehovah gu do ara roboa hɛn ma yɛatse ase yie. (Mbɛ. 4:18; Dan. 2:28) Yebotum enya awerɛhyɛmu dɛ ɔntɔ ara dɛ ahohiahia kɛse no bɛhyɛ ase no, nna biribiara a ɔsɛ dɛ yehu ama yeetum dze nokwardzi na koryɛ asom Jehovah wɔ dɛm ɔhaw ber no mu dze, nna yeehu. Naaso, ɔsɛ dɛ yɛtse ase dɛ nsɛm ahorow a ɔrennkyɛr obesisi no, no mu bi wɔ hɔ a yɛyɛ dɛn ara mpo a, yennyim. Dza yɛaka afa dɛm nsɛm ahorow a obesisi daakye no mu bi ho no, yɛasesa no. Ntsi adzesua yi mu no, yebedzi kan ahwɛ siantsir a yɛayɛ dɛm nsesa ahorow no. Ɔno ekyir no, nsɛm ahorow a  yenyim fa daakye ho nye dza hɛn sor Egya no bɛyɛ afa ho no, yebosusu no mu bi ho.

DZA YENNYIM

3. Nkan no, yɛkaa dɛ ebɛn aber na nkorɔfo rinnya hokwan mmbɛyɛ Jehovah n’asomfo, na ebɛnadze ntsi na yɛkaa dɛm?

³ Mber bi a wɔabɛsen kɔ no, yɛkaa dɛ sɛ obi ammbɔsom Jehovah ansaana ahohiahia kɛse no ahyɛ ase a, orinnya hokwan mmbɔsom no wɔ ahohiahia kɛse no mu. Afei so orinnya nkwa wɔ Amagedon. Nna yesusu dɛ nsɛm a osisii wɔ Noah n’aber do no gyina hɔ ma biribi a obesi daakye, ntsi na yɛkaa dɛm no. Ntsi nsɛm a yɛkae no bi nye dɛ, dɛ mbrɛ Jehovah toow adaka no n’abow no mu ansaana Nsuyirii no rehyɛ ase no, dɛmara so na Jehovah ‘bɔtow nkwagye abow no mu’ ansaana ahohiahia kɛse no ahyɛ ase. Ntsi obiara a ɔnnyɛ no somfo dɛm aber no rinnya nkwa.—Matt. 24:​37-39.

4. Dza osii wɔ Noah n’aber do, ndɛ yɛgye dzi dɛ ogyina hɔ ma biribi a obesi daakye anaa? Kyerɛkyerɛ mu.

⁴ Nna Nsuyirii no gyina hɔ ma asɛm bi a obesi daakye anaa? Oho. Ebɛnadze ntsi na yɛreka dɛm? Osiandɛ asɛm biara nnyi Kyerɛwnsɛm no mu a yebotum egyina do aka dɛm. a Ɔwɔ mu dɛ Jesus dze ne mbae no totoo “Noah nda no” ho dze, naaso ɔannka dɛ biribiara a osii wɔ Noah n’aber do no gyina hɔ ma biribi a nna obesi daakye. Na dɛmara so na ber a Jehovah dze toow adaka no n’abow no mu no so nngyina hɔ mma biribiara. Naaso iyi nnkyerɛ dɛ yerunntum nnsua biribi mmfi Noah n’asɛm no nye Nsuyirii a ɔbae wɔ n’aber do no mu.

5. (a) Ebɛn anamɔn na Noah tui ansaana Nsuyirii no reba? (Hebrewfo 11:7; 1 Peter 3:20) (b) Ebɛn kwan do na asɛnka edwuma a yɛreyɛ no ndɛ no tse dɛ Noah n’aber do dze no?

 ⁵ Aber a Noah tsee dza Jehovah rebɛyɛ no ho asɛm no, ɔyɛɛ adaka dze kyerɛɛ dɛ ɔwɔ gyedzi. (Kenkan Hebrewfo 11:7; 1 Peter 3:20.) Dɛmara so na ɔtse ndɛ. Ɔsɛ dɛ hɔn a wɔtse Nyankopɔn n’Ahendzi no ho asɛmpa no tu ho anamɔn. (Andw. 3:​17-20) Ɔsomafo Peter kaa Noah ho asɛm dɛ nna ɔyɛ “tsenenee sɛnkafo.” (2 Pet. 2:5) Naaso, dɛ mbrɛ yeedzi kan aka ho asɛm wɔ adzesua a odzi iyi enyim mu no, ansaana Nsuyirii no reba no, sɛ Noah kaa asɛm no kyerɛɛ nyimpa a nna wɔwɔ asaase no do nyinara o, sɛ ɔannyɛ dɛm o, yennyim. Ndɛ so, yɛrobɔ mbɔdzen dɛ yɛbɛka asɛmpa no akyerɛ nkorɔfo wɔ wiadze yi mu beebiara, na yɛdze nsi na ahokeka na yɛdze reyɛ dɛm. Naaso hɛn mbɔdzembɔ nyina ekyir no, obiara runntum nntse asɛmpa no ansaana ewiei no aba. Ebɛnadze ntsi na yɛreka dɛm?

6-7. Ebɛnadze ntsi na yebotum aka dɛ yerunntum nnka asɛmpa no nnkyerɛ nyimpa biara a ɔwɔ asaase yi do ansaana ewiei no aba? Kyerɛkyerɛ mu.

⁶ Ɔwodze yembisa o, Jesus kaa dɛ yɛbɛyɛ asɛnka edwuma no dɛn? Sɛ yɛbɛkaa a, ɔkae too hɔ dɛ wɔbɛka asɛmpa no “wɔ wiadze nyina dze edzi amanaman nyina dase.” (Matt. 24:14) Dɛm nkɔnhyɛ no rinya ne mbamu ndɛ kyɛn aber biara a abɛsen kɔ. Wɔreka asɛmpa no wɔ kasa bɔbor 1,000 mu. Afei so, osian jw.org wɛbsaet no ntsi, nyimpa pii a wɔwɔ wiadze nyina no retse asɛmpa no.

⁷ Naaso, Jesus sanee kaa kyerɛɛ n’esuafo no dɛ ‘worunntum nnkɔ nkurow nyina do nnwie,’ anaa wɔnnka asɛmpa no nnkyerɛ obiara ansaana ɔaba. (Matt. 10:23; 25:​31-33) Hɛn aber yi do so, asɛm a Jesus kae yi bɛba mu. Ndɛ, mbea a nyimpa ɔpepem pii tse no, wɔmma kwan koraa ma yɛnnka asɛmpa no bi wɔ hɔ. Ɔno da nkyɛn a, adze rekye a adze resa yi, wo ara na nkorɔfo rowo. Yɛreyɛ dza yebotum biara aka asɛm no akyerɛ nkorɔfo a wofi “aman nye mbusuakuw nye kasa” ahorow nyinara mu. (Nyi. 14:6) Naaso nokwasɛm nye dɛ, yerunntum nnka asɛmpa no nnkyerɛ nyimpa biara a ɔwɔ asaase yi do ansaana ewiei no aba.

8. Ebɛn asɛm na bi a yebebisa afa mbrɛ Jehovah besi ebu nkorɔfo atsɛn daakye no ho? (Hwɛ mfonyin ahorow no so.)

⁸ Dɛm dze a, nna ɔno yembisa dɛ: Ebɛn asɛm bɔto hɔn a wɔrenntse asɛmpa no ansaana ahohiahia kɛse no ahyɛ ase no? Jehovah na ne Ba no a ɔdze atsɛmbu ahyɛ ne nsa no, ebɛnadze na wɔdze bɛyɛ hɔn? (John 5:​19, 22, 27; Andw. 17:31) Kyerɛwsɛm a adzesua yi gyina do no ka dɛ Jehovah ‘mmpɛ dɛ obiara bɛsɛɛ.’ Mbom ɔpɛ dɛ nyimpa nyina ‘nu hɔnho.’ (2 Pet. 3:​9, Ahyɛmu Fofor; 1 Tim. 2:4) Aber a dɛm asɛm yi wɔ hɛn tsirmu no, ɔsɛ dɛ yɛtse ase dɛ dza Jehovah dze bɛyɛ dɛm nkorɔfo no dze, yennyae nnhunii. Nokwasɛm nye dɛ, ɔnnyɛ nnhyɛ dɛ ɔbɛka dza ɔayɛ nye dza ɔpɛ dɛ ɔyɛ biara ho asɛm kyerɛ hɛn.

9. Ebɛnadze na Jehovah ama yeehu wɔ Bible no mu?

⁹ Jehovah aka ndzɛmba bi a ɔbɛyɛ ho asɛm akyerɛ hɛn wɔ Bible no mu. Bi nye dɛ obenyan “hɔn a wɔnntsen.” Dɛm nkorɔfo no nye hɔn a osiandɛ wɔanntse asɛmpa no ntsi woenntum annsesa hɔn abrabɔ no. (Andw. 24:15; Luke 23:​42, 43) Iyi ma asɛmbisa fofor a no ho hia so soɛr.

10. Ebɛn nsɛmbisa afofor na yɛwɔ?

¹⁰ Hɔn a wɔnntsen a wobowuwu wɔ ahohiahia kɛse no mu no, wɔbɛsɛɛ hɔn koraa a worinnya owusoɛr ho enyidado biara anaa? Kyerɛwnsɛm no ma no mu da hɔ pefee dɛ nyimpa a wɔgye hɔn enyim ara soɛr tsia Jehovah no, Jehovah nye no sor dɔm no bɛsɛɛ hɔn wɔ Amagedon na worinnya owusoɛr.  (2 Thess. 1:​6-10) Na nkorɔfo a nyimpa bi boku hɔn, anaa osian yarba, mpanyinyɛ anaa akwanhyia ntsi wobowuwu wɔ ahohiahia kɛse no mu no so ɛ? (Ɔsɛnk. 9:11; Zech. 14:13) Dɛm nkorɔfo yi bi botum aka “hɔn a wɔnntsen” a wobenyan hɔn wɔ wiadze fofor no mu no ho anaa? Ɔno dze yennyim.

DZA YENYIM

11. Ebɛn adze na wobegyina do dze ebu nkorɔfo atsɛn wɔ Amagedon?

¹¹ Yenyim nsɛm a obesisi daakye no ho nsɛm kakra. Bi nye dɛ, yenyim dɛ wɔ Amagedon no, wobegyina dza nkorɔfo yɛe dze boaa Christ no nuanom no do dze ebu hɔn atsɛn. (Matt. 25:40) Atsɛmbu no mu no, nguan no bɛyɛ hɔn a wɔboaa Christ nye hɔn a wɔasera hɔn no. Yɛsan so nyim dɛ ahohiahia kɛse no bɛba abɔto Christ no nuanom no bi wɔ asaase yi do, na wɔaka kakra ma Amagedon ko no ahyɛ ase no, wɔbɛfa hɔn akɔ sor. Dɛm aber no, osiandɛ Christ no nuanom no bi da ho ara wɔ asaase yi do ntsi, obotum aba dɛ nyimpa akomapafo binom benya hokwan ayɛ biribi dze aboa hɔn na wɔaabɛyɛ edwuma a wɔreyɛ no bi. (Matt. 25:​31, 32; Nyi. 12:17) Ebɛnadze ntsi na dɛm nsɛm a yenyim yi ho hia paa?

12-13. Sɛ binom hu dɛ wɔasɛɛ “Babylon Kɛse” no a, bi a wɔbɛyɛ dɛn? (Hwɛ mfonyin ahorow no so.)

¹² Ahohiahia kɛse no mu no, obotum aba dɛ hɔn a wobohu dɛ wɔasɛɛ “Babylon Kɛse” no mu bi bɛkaa dɛ nna Jehovah Adasefo aka ato hɔ dadaada dɛ biribi a ɔtse dɛm besi. Nyimpa binom a wobohu nsɛm a obesisi no bɛba abɔsom Jehovah anaa?—Nyi. 17:5; Ezek. 33:33.

¹³ Sɛ biribi a ɔtse dɛm si a, ɔbɛyɛ tse dɛ asɛm a osii wɔ Moses n’aber do wɔ Egypt no. Sɛ yɛbɛkaa a, aber a Israelfo no rifi Egypt no, nna “aforafora dɔm” bi ka hɔn ho. Obotum aba dɛ aber a Egyptfo binom hun dɛ ɔhaw du a Moses bɔɔ hɔn kɔkɔ wɔ ho no risisi no, ɔmaa wɔgyee Jehovah dzii. (Ex. 12:38) Sɛ biribi a ɔtse dɛm si wɔ ahohiahia kɛse no mu a, ɔbɛyɛ hɛn yaw dɛ binom abɛka hɛnho aber a wɔaka kakraabi ma ewiei no aba anaa? Dabida! Ebɛnadze ntsi a? Osiandɛ yɛpɛ dɛ yesuasua hɛn sor Egya no. Ɔyɛ “Nyankopɔn a  ayamuhyehye nye adom ahyɛ no ma, ɔfa ebufuw nyaa, na no mbɔbɔrhu nye no nokwar dɔɔ so.” b—Ex. 34:6.

14-15. Sɛ obi botum atsena ase daa a, obegyina ber a owui anaa beebi a nna ɔtse do anaa? Kyerɛkyerɛ mu. (Ndwom 33:​4, 5)

¹⁴ Ɔtɔ da a, ɔyɛ a binom ka dɛ, “Sɛ mo busuanyi bi a ɔnnsom Jehovah no wu ansaana ahohiahia kɛse no ahyɛ ase, oye. Osiandɛ ɔba no dɛm a, obotum enya owusoɛr.” Ɔyɛ a, adwen pa na wɔdze ka dɛm. Naaso sɛ obi botum atsena ase daa a, onngyina ber a dɛm nyimpa no bowu no do. Jehovah dze, ɔyɛ Ɔtsɛmbuafo a asɛm biara nnyi n’atsɛmbu ho. Sɛ ɔka dɛ obi edzi fɔ a, oedzi fɔ na ɔka dɛ edzi bem so a, ɔyɛ nokwar. (Kenkan Ndwom 33:​4, 5.) Ntsi yebotum enya awerɛhyɛmu dɛ ‘asaase nyinara Ɔtsɛmbuafo’ no bɛyɛ dza ɔtsen aber nyina.—Gen. 18:25.

¹⁵ Bio so, yebotum aka dɛ, sɛ obi benya hokwan atsena ase daa a, onngyina beebi a ɔtse do. Jehovah rummbu nyimpa ɔpepem pii a osian beebi a nna wɔtse ntsi woennya hokwan anntse Ahendzi ho asɛm no atsɛn dɛ wɔyɛ “mpɔnkye” da. (Matt. 25:46) Asaase nyinara Ɔtsɛmbuafo a ɔtsen no dwen dɛm nkorɔfo yi ho kyɛn hɛn koraa. Yennyim mbrɛ Jehovah bɛdandan ndzɛmba wɔ ahohiahia kɛse no mu. Bi a sɛ Jehovah wosow noho dze tsew ne dzin ho ma amanaman nyina hu a, ɔno bɛma binom esua no  ho adze, wɔaagye no edzi, na woeekegyina n’afa.—Ezek. 38:16.

16. Ebɛnadze na yenyim fa Jehovah ho? (Hwɛ mfonyin no so.)

¹⁶ Bible no a yeesua no ama yeehu dɛ, Jehovah nndzi nyimpa no nkwa ho agor koraa. Ɔmaa ne Ba no bowui maa hɛn ama hɛn nyina enya enyidado dɛ daakye bi yebotum atsena ase daa. (John 3:16) Jehovah ayɛ biribi ama hɛn mu biara ehu dɛ ɔdwen hɛn ho paa. (Isa. 49:15) Afei so, onyim hɛn mu biara ne dzin. Nokwasɛm nye dɛ, onyim hɛn mu biara yie paa. Ntsi sɛ yewu mpo a, obotum asan enyan hɛn a hɛnho biribi ketseketse biara mpo rennka, na ɔbɛsan so ama yaakaa biribiara a nna ɔwɔ hɛn adwen mu no! (Matt. 10:​29-31) Nyew, sɛ yenya hɛn sor Egya a ɔdɔ hɛn no mu awerɛhyɛmu dɛ obobu nyimpa biara atsɛn dɛ mbrɛ ɔfata a, yɛnntoow hɛnho nnkyenee. Osiandɛ onyim nyansa, ɔtsen na ɔwɔ ehumbɔbɔr so.—Jas. 2:13.

17. Ebɛnadze na yebosusu ho wɔ adzesua a odzi hɔ no mu?

¹⁷ Nkyerɛkyerɛmu ahorow a yeenya yi ama yeehu dɛ ndɛ paa nye ber a ɔsɛ dɛ yɛyer hɛnho ka asɛm no. Ebɛnadze ntsi na yebotum aka dɛm? Afei so, ebɛnadze na ɔma yɛkɔ do ka asɛmpa no a yenngyaa? Yebosusu dɛm nsɛmbisa yi ho akɔ ekyir wɔ adzesua a odzi hɔ no mu.