XÓTA NǓKPLƆ́NKPLƆ́N TƆN 19
HAN 22 Axɔ́súɖuto ɔ ko jɔ, é ní wá!
Étɛ́ mǐ ka tuun dó hwɛ e Jexóva ná ɖɔ xá gbɛtɔ́ lɛ́ ɖo malínmálín mɛ é wú?
“Jexóva. . . jló ɖɔ è ní sú mɛ ɖěbǔ sín kún dó ǎ.”—2 PI. 3:9.
XÓNUSƆ́ÐÓTE
Mǐ sixú kú d’é jí ɖɔ hwɛ e Jexóva ná ɖɔ ɖo malínmálín mɛ é ná nyí hwɛ jlɔ́jlɔ́ bo lɛ́ sɔgbe.
1. Étɛ́wú è ka sixú ɖɔ ɖɔ hwenu e sɔ́ akpakpa mɛ é ɖé nɔ gbɛ ɖe wɛ mǐ ɖe?
HWENU e sɔ́ akpakpa mɛ é ɖé mɛ nɔ gbɛ ɖe wɛ mǐ ɖe! Gbe bǐ gbe ɔ, mǐ nɔ mɔ bɔ nǔɖɔɖayǐ Biblu tɔn lɛ́ nɔ ɖo jijɛnu wɛ. Ði kpɔ́ndéwú ɔ, mǐ nɔ mɔ bɔ “axɔ́sú totaligbé tɔn ɔ” kpó “axɔ́sú tofɔligbé tɔn ɔ” kpó nɔ ɖo agba hwlɛ́n xá yěɖée wɛ, ɖó yě mɛ ɖokpó ɖokpó ɖo biba wɛ bo ná kpa acɛ dó gbɛ ɔ jí. (Dan. 11:40.) Mǐ mɔ bɔ è ɖo Axɔ́súɖuto Mawu tɔn sín wɛn ɖagbe jlá wɛ gbɔn ayǐkúngban ɔ bǐ jí, bɔ gbɛtɔ́ lǐvi mɔ̌kpán ko wá gbeta ɔ kɔn bo ɖo Jexóva sɛn wɛ. (Eza. 60:22; Mat. 24:14) Gɔ́ ná ɔ, mǐ nɔ mɔ nǔɖuɖu gbigbɔ tɔn b’ɛ nɔ túnflá “dó hwetɔnnu.”—Mat. 24:45-47.
2. Étɛ́ jí mǐ ka sixú kú dó? Étɛ́ mǐ ka ɖó ná tuun?
2 Jexóva kpo ɖo alɔ dó mǐ wɛ bɔ mǐ nɔ ɖó nukúnnúmɔjɛnǔmɛ hú gǎn dó nǔ tawun tawun e ɖo nǎ jɛ wɛ ɖo malínmálín mɛ lɛ́ é wú. (Nǔx. 4:18; Dan. 2:28) Mǐ sixú kú d’é jí ɖɔ hwenu e wǔvɛ́ ɖaxó ɔ ná bɛ́ é ɔ, mǐ ná tuun nǔ e mǐ ɖó ná tuun bo ná dɛ kpó gbejíninɔ kpó bo lɛ́ kpo ɖo bǔ ɖo hwenu vɛ́ wǔ énɛ́ mɛ lɛ́ é bǐ. Amɔ̌, mǐ ɖó ná yí gbe ɖɔ nǔɖé lɛ́ tíin bɔ mǐ kún ko tuun dó nǔ e ɖo nǎ jɛ wɛ ɖo malínmálín mɛ lɛ́ é wú ó kpowun bɔ xó fó. Ðo xóta élɔ́ mɛ ɔ, mǐ ná to ɖɔ xó dó nǔ e wú mǐ vɔ́ nǔ e mǐ ko ɖɔ dó nǔ énɛ́ lɛ́ ɖé lɛ́ wú é gbéjé kpɔ́n é wú hwɛ̌. Énɛ́ gúdo ɔ, mǐ ná vɔ́ nǔ ɖěɖěe mǐ tuun dó sɔgúdo wú lɛ́ é kpó lěe Tɔ́ mǐtɔn jǐxwé tɔn ɔ ná wa nǔ gbɔn é kpó ɖé lɛ́ gbéjé kpɔ́n.
NǓ ÐĚÐĚE MǏ MA TUUN Ǎ LƐ́ É
3. Ð’ayǐ ɔ, étɛ́ mǐ ka lin ɖɔ é ná jɛ dó nǔmaɖitɔ́ lɛ́ jí hwenu e wǔvɛ́ ɖaxó ɔ ná bɛ́ é? Aniwú mǐ ka wá gbeta énɛ́ kɔn?
3 Ð’ayǐ ɔ, mǐ ɖɔ ɖɔ nú wǔvɛ́ ɖaxó ɔ bɛ́ ɔ, mɛ e ma nyí nǔɖitɔ́ ǎ lɛ́ é ɖě kún sɔ́ ná kpé wú bo ɖi nǔ nú Jexóva lobo xo Aamagedɔ́ni zlɛ́ ó. Mǐ wá gbeta énɛ́ kɔn ɖó mǐ lin ɖɔ tan e kunkplá Sinvɔgbɛ ɔ é nɔ te nú nǔ e ná wá jɛ ɖo nukɔnmɛ é ɖé. Ði kpɔ́ndéwú ɔ, mǐ nɔ lin ɖ’ayǐ ɖɔ lěe mɛ ɖěbǔ ma sɔ́ kpé wú bo byɔ́ tɔjíhún ɔ mɛ hwenu e Jexóva sú hɔn ɔ gúdo gbɔn é ǎ é ɔ, mɔ̌ wɛ mɛ ɖěbǔ ma sɔ́ ná kpé wú bo ɖi nǔ nú Jexóva, lobo gán hwenu e wǔvɛ́ ɖaxó ɔ ná ko bɛ́ gúdo gbɔn é ǎ é nɛ́.—Mat. 24:37-39.
4. Étɛ́wú mǐ ma ka sɔ́ nɔ lin din ɖɔ nǔ ɖěɖěe jɛ ɖo Nɔwée hwenu lɛ́ é ɖo jijɛ wɛ ɖo ali e gbló ada é ɖé nu ɖo égbé ǎ?
4 Mǐ ka ɖó ná lin ɖɔ tan e kunkplá Sinvɔgbɛ ɔ é nɔ te nú nǔ e ná wá jɛ ɖo nukɔnmɛ é ɖé wɛ a? Éǒ wɛ nyí xósin ɔ. Étɛ́wú? Ðó Biblu ɖɔ mɔ̌ ǎ. a Jezu jlɛ́ “Nɔwée hwenu” dó fí ɖiɖe tɔn wú, amɔ̌, é xlɛ́ ɖɔ Sinvɔgbɛ ɔ nɔ te nú nǔ e ná wá jɛ ɖo nukɔnmɛ é ɖé, bɔ mɛ ɖokpó ɖokpó kpó nǔ e jɛ lɛ́ é ɖokpó ɖokpó kpó sɔgbe xá nǔ e ná wá jɛ ɖo sɔgúdo lɛ́ é ǎ; mɔ̌ jɛ́n é ma ka lɛ́ ɖɔ ɖɔ hɔn tɔjíhún ɔ tɔn e è sú é nɔ te nú nǔ e ná wá jɛ ɖo sɔgúdo é ɖé ǎ é nɛ́. Amɔ̌, énɛ́ ɖo xlɛ́xlɛ́ wɛ ɖɔ tan e ɖɔ xó dó Nɔwée kpó Sinvɔgbɛ ɔ kpó wú é kún sixú kplɔ́n nǔ mǐ ó ǎ.
5. (a) Nɛ̌ Nɔwée ka ɖe nǔɖiɖi xlɛ́ jɛ nukɔn nú Sinvɔgbɛ ɔ gbɔn? (Eblée lɛ́ 11:7; 1 Piyɛ́ɛ 3:20) (b) Nɛ̌ ninɔmɛ mǐtɔn égbé tɔn ka cí Nɔwée hwenu tɔn ɖɔhun ɖo wɛnɖagbejíjlázɔ́ ɔ linu gbɔn?
5 Hwenu e Nɔwée se wɛn akpágbanúmɛ tɔn Jexóva tɔn é ɔ, é gbá tɔjíhún ɔ dó xlɛ́ ɖɔ émí ɖó nǔɖiɖi. (Xa Eblée lɛ́ 11:7; 1 Piyɛ́ɛ 3:20.) Ðo ali ɖokpó ɔ nu ɔ, mɛ ɖěɖěe nɔ se Axɔ́súɖuto Mawu tɔn sín wɛn ɖagbe ɔ lɛ́ é, ɖó ná wa nǔ sɔgbe xá nǔ e yě se lɛ́ é. (Mɛ. 3:17-20) Piyɛ́ɛ ɖɔ ɖɔ Nɔwée “nyí mɛɖé bo nɔ jlá nǔjlɔ́jlɔ́wiwa.” (2 Pi. 2:5) Amɔ̌, lěe mǐ ko ɖɔ gbɔn ɖo xóta e wá yi é mɛ é ɔ, mǐ tuun nú Nɔwée tɛ́n kpɔ́n bo jlá wɛn ɔ mɛ e ɖo ayǐkúngban ɔ jí lɛ́ é bǐ, alǒ gbɔ cóbɔ Sinvɔgbɛ ɔ bɛ́ ǎ. Égbé ɔ, mǐ ɖo tíntɛ́nkpɔ́n wɛ bo ná jlá wɛn ɔ mɛ e gbɔn awa vovo gbɛ ɔ tɔn xwé lɛ́ é bǐ, lobo nɔ wa mɔ̌ kpó kanɖódónǔwú kpó. É ɖo mɔ̌ có, ényí mǐ ná bo dó gǎn gbɔn ɖěbǔ ɔ, mǐ sixú kpé wú bo jlá wɛn ɖagbe ɔ mɛ e gbɔn ayǐkúngban ɔ jí lɛ́ é bǐ cóbónú vivɔnu ɔ ná wá ǎ. Étɛ́wú?
6-7. Étɛ́wú mǐ ka sixú wá gbeta ɔ kɔn ɖɔ mǐ kún ná kpé wú bo jlá wɛn ɖagbe ɔ gbɛtɔ́ e ɖo ayǐkúngban ɔ jí lɛ́ é bǐ cóbónú vivɔnu ɔ ná wá ó?
6 Lin tamɛ dó nǔ e Jezu ɖɔ dó wɛnɖagbejíjlázɔ́ mǐtɔn wú é wú. É ɖɔ ɖ’ayǐ ɖɔ è ná jlá wɛn ɖagbe ɔ “gbɔn ayǐkúngban ɔ bǐ jí, bónú é ná nyí kúnnuɖiɖe nú akɔta lɛ́ bǐ.” (Mat. 24:14) Nǔɖɔɖayǐ énɛ́ ɖo jijɛnu wɛ din hú ɖ’ayǐ tɔn. Mǐ nɔ jlá wɛn ɖagbe ɔ dó gbe 1000 jɛjí mɛ, bɔ tɛn Ɛntɛnɛ́ti tɔn jw.org ko zɔ́n bɔ gěgé gbɛtɔ́ e ɖo gbɛ ɔ mɛ lɛ́ é tɔn sixú se wɛn ɖagbe ɔ.
7 Amɔ̌, Jezu lɛ́ ɖɔ nú ahwanvú tɔn lɛ́ ɖɔ yě kún ná ‘ko gbɔn toxo lɛ́ bǐ mɛ,’ alǒ jlá wɛn ɔ mɛ lɛ́ bǐ cóbónú émí ná wá ó. (Mat. 10:23; 25:31-33) Énɛ́ ɖo xlɛ́xlɛ́ wɛ ɖɔ ahwanvú tɔn lɛ́ kún ná jlá wɛn ɔ gbɛtɔ́ lɛ́ bǐ có hwenu e é ná ɖɔ hwɛ xá gbɛtɔ́ lɛ́ dó é ná su ó. Gbɛtɔ́ lǐvi mɔ̌kpán nɔ nɔ xá ɖěɖěe mɛ è ɖó dogbó syɛ́nsyɛ́n lɛ́ nú wɛnɖagbejíjlázɔ́ mǐtɔn ɖe lɛ́ é ɖo égbé. Gɔ́ ná ɔ, vǐ kanweko mɔ̌kpán wɛ è nɔ ji ɖo cɛ́jú ɖokpó ɖokpó mɛ. Mǐ nɔ wa nǔ e wú mǐ kpé é bǐ bo ná jlá wɛn ɖagbe ɔ “to bǐ, akɔta bǐ, gbe bǐ.” (Nǔɖe. 14:6) Amɔ̌, nǔgbó ɔ wɛ nyí ɖɔ, mǐ ná kpé wú bo ná jlá wɛn ɖagbe ɔ mɛ e ɖo ayǐkúngban ɔ jí lɛ́ é bǐ ɖokpó ɖokpó cóbɔ vivɔnu ɔ ná wá ǎ.
8. Étɛ́ mǐ ka sixú kanbyɔ́ mǐɖée dó hwɛ e Jexóva ná ɖɔ ɖo sɔgúdo é wú? (Kpɔ́n fɔtóo lɛ́ lɔmɔ̌.)
8 Énɛ́ fɔ́n nǔkanbyɔ́ ɖé nyi te: Bɔ mɛ ɖěɖěe ali ɔ ma ná hun ná bɔ yě ná se wɛn ɖagbe ɔ, cóbɔ wǔvɛ́ ɖaxó ɔ ná bɛ́ ǎ lɛ́ é ka lo? Nɛ̌ Jexóva kpó Vǐ tɔn e é sɔ́ hwɛɖiɖɔ ɔ d’así ná é kpó ka ná ɖɔ hwɛ yětɔn gbɔn? (Jaan 5:19, 22, 27; Mɛ. 17:31) Wěmafɔ e jí xóta élɔ́ jínjɔ́n é ɖɔ ɖɔ Jexóva kún “jló ɖɔ è ní sú mɛ ɖěbǔ sín kún dó” ó. Loɔ, é jló ɖɔ “ali ní hun nú mɛ lɛ́ bǐ, bónú hwɛ yětɔn lɛ́ ní vɛ́ nú yě.” (2 Pi. 3:9; 1 Tim. 2:4) Mǐ tuun nǔ énɛ́ lɛ́ dó Jexóva wú có, é ko ɖɔ lěe é ná ɖɔ hwɛ xá mɛ ɖěɖěe ali ɔ ma hun ná gbeɖé nú yě ná se wɛn ɖagbe ɔ ǎ lɛ́ é gbɔn é nú mǐ ǎ. Nǔgbó ɔ, é nyí dandan wɛ é ná ɖɔ nǔ lɛ́ bǐ nú mǐ dó nǔ e é ko wa wá yi lɛ́ é, alǒ nǔ e é ná wá wa lɛ́ é wú nú mǐ ǎ.
Mɛ ɖěɖěe ali ɔ ma hun ná bónú yě se wɛn ɖagbe ɔ cóbónú wǔvɛ́ ɖaxó ɔ ná bɛ́ ǎ lɛ́ é ɔ, nɛ̌ Jexóva ka ná wa nǔ xá yě gbɔn? (Kpɔ́n akpáxwé 8) c
9. Étɛ́ lɛ́ Jexóva ka ɖe xlɛ́ mǐ ɖo Biblu mɛ?
9 Jexóva ɖe nǔ ɖěɖěe é ná wá wa lɛ́ é ɖé lɛ́ xlɛ́ mǐ ɖo Xó tɔn mɛ. Ði kpɔ́ndéwú ɔ, Biblu ɖɔ nú mǐ ɖɔ Jexóva ná fɔ́n “nǔagɔwatɔ́” ɖěɖěe ali ɔ ma hun ná bɔ yě se wɛn ɖagbe ɔ bo lɛ́ kɔ sín gbɛ e zán wɛ yě ɖe é gúdo ǎ lɛ́ é wá gbɛ. (Mɛ. 24:15; Luk. 23:42, 43) Énɛ́ fɔ́n nǔkanbyɔ́ tají ɖěvo lɛ́ nyi te.
10. Nǔkanbyɔ́ ɖěvo tɛ́ lɛ́ ka fɔ́n nyi te?
10 Mɛ ɖěɖěe ná kú ɖo wǔvɛ́ ɖaxó ɔ hwenu lɛ́ é bǐ sín kún wɛ è ná sú dó mlɛ́mlɛ́ bɔ nukúnɖíɖó fínfɔ́n sín kú tɔn ɖě ma sɔ́ ná tíin ná ǎ a? Mawuxówéma ɔ ɖe xlɛ́ nyi wɛn ɖɔ mɛ ɖěɖěe nɔ klán gbe xá Jexóva bǐ mlɛ́mlɛ́, bɔ Jexóva kpó ahwankpá tɔn lɛ́ kpó ná sú kún dó ná ɖo Aamagedɔ́ni hwenu lɛ́ é kún sɔ́ ná fɔ́n sín kú ó. (2 Tɛ. 1:6-10) Amɔ̌, nɛ̌ mɛ ɖěɖěe é sixú nyí adla j’ayǐ, alitawoví alǒ mɛ ɖěvo lɛ́ wɛ zɔ́n bɔ yě kú lɛ́ é tɔn ka ná wá nyí gbɔn lo? (Nǔt. 9:11, nwt; Zak. 14:13) Mɛɖé lɛ́ sixú ɖo mɛ énɛ́ lɛ́ mɛ bo ná ɖo nǔagɔwatɔ́ ɖěɖěe è ná fɔ́n sín kú ɖo gbɛ yɔ̌yɔ́ ɔ mɛ lɛ́ é mɛ wɛ a? Mǐ tuun ǎ kpowun bɔ xó fó.
NǓ ÐĚÐĚE MǏ TUUN LƐ́ É
11. Étɛ́ jí è ka ná zɔn dó dó ɖɔ hwɛ xá gbɛtɔ́ lɛ́ ɖo Aamagedɔ́ni hwenu?
11 Mǐ tuun nǔ gěgé dó nǔ ɖěɖěe ná wá jɛ ɖo sɔgúdo lɛ́ é wú. Ði kpɔ́ndéwú ɔ, mǐ tuun ɖɔ ɖo Aamagedɔ́ni hwenu ɔ, è ná zɔn dó lěe gbɛtɔ́ lɛ́ wa nǔ xá nɔví Klísu tɔn lɛ́ gbɔn é wú dó ɖɔ hwɛ xá yě. (Mat. 25:40) Mɛ ɖěɖěe è ɖɔ hwɛ xá bo ɖɔ yě nyí lɛ̌ngbɔ́ lɛ́ é ná ko ɖe xlɛ́ ɖɔ émí ɖo gǔdo nú mɛ ɖěɖěe gbigbɔ mímɛ́ sɔ́ lɛ́ é kpó Klísu kpó. Mǐ lɛ́ tuun ɖɔ nɔví Klísu tɔn ɖé lɛ́ ná kpo ɖo ayǐkúngban ɔ jí káká jɛ hwenu e wǔvɛ́ ɖaxó ɔ ná bɛ́ é, bɔ táan kléwún ɖé jɛ nukɔn nú hwenu e Aamagedɔ́ni ná bɛ́ é jɛ́n è ná sɔ́ yě yi jǐxwé. Ényí nɔví Klísu tɔn lɛ́ kpo ɖo ayǐkúngban jí jɛ́n wɛ ɔ, ali hɛn ɔ, é ná hun nú ayijlɔ́jlɔ́nɔ lɛ́ bɔ yě ná nɔ gǔdo nú yě, bo lɛ́ nɔ gǔdo nú azɔ̌ e wa wɛ yě ɖe é. (Mat. 25:31, 32; Nǔɖe. 12:17) Étɛ́wú nǔgbó énɛ́ lɛ́ ka ɖo tají?
12-13. Nɛ̌ mɛɖé lɛ́ ka sixú wa nǔ gbɔn hwenu e yě ná mɔ bɔ è ná sú “Babilɔ́nu ɖaxó ɔ” sín kún dó gúdo é? (Kpɔ́n fɔtóo lɛ́ lɔmɔ̌.)
12 É ná bo tlɛ nyí hwenu e wǔvɛ́ ɖaxó ɔ ná bɛ́ gúdo é ɔ, mɛ ɖěɖěe mɔ bɔ è sú “Babilɔ́nu ɖaxó ɔ” sín kún dó lɛ́ é ɖé lɛ́ hɛn ɔ, yě ná flín ɖɔ Kúnnuɖetɔ́ Jexóva tɔn lɛ́ ko ɖɔ nǔ énɛ́ sín xó azɔn mɔ̌kpán. Mɛ ɖěɖěe mɔ nǔ énɛ́ lɛ́ é ɖé lɛ́ sixú ɖi nǔ nú Jexóva wɛ a?—Nǔɖe. 17:5; Ezek. 33:33.
13 Ényí nǔ mɔ̌hun jɛ ɔ, é ná cí nǔ e jɛ ɖo Ejípu ɖo Mɔyízi hwenu é ɖɔhun. Flín ɖɔ “akɔta tɛnmɛ tɛnmɛ lɛ́” nyi ahwan bo xwedó Izlayɛ́li ví lɛ́ bo tɔ́n sín Ejípu. (Tín. 12:38) Yě mɛ ɖé lɛ́ sixú ko jɛ nǔ ɖi jí hwenu e yě mɔ bɔ Awě wǒ e sín akpá Mɔyízi gba nú mɛ lɛ́ é jɛnu é. Ényí nǔ mɔ̌hun ɖé jɛ hwenu e è sú Babilɔ́nu ɖaxó ɔ sín kún dó gúdo é ɔ, mǐ ka ná lin ɖɔ kpé e mɛ lɛ́ kpé wú bo wá xo kpóɖó nú mǐ, bɔ mɔ̌ mɛ ɔ, ali hun nú yě bɔ yě ná byɔ́ gbɛ yɔ̌yɔ́ ɔ mɛ táan kpɛɖé jɛ nukɔn nú Aamagedɔ́ni é kún sɔgbe ó wɛ a? Ðěbǔ lɔ ǎ! Mǐ ba ná wa nǔ Tɔ́ mǐtɔn jǐxwé tɔn ɔ ɖɔhun; é ɖɔ un nyí “Mawu nǔbláwǔkúnúmɛtɔ́, Mawu xomɛfátɔ́, un nɔ yá wǔ sin xomɛ ǎ, un nyí Mawu xomɛnyɔ́tɔ́, un nyí Mawu gbejínɔtɔ́.” b—Tín. 34:6.
Mɛ ɖěɖěe ná mɔ bɔ è ná sú kún dó nú “Babilɔ́nu ɖaxó ɔ” lɛ́ é ná flín ɖɔ Kúnnuɖetɔ́ Jexóva tɔn lɛ́ ko ɖɔ xó dó nǔ énɛ́ wú nú hwenu línlín (Kpɔ́n akpáxwé 12-13) d
14-15. Gbɛ e mɛɖé ná nɔ káká sɔ́yi ɖo sɔgúdo é nɔ sín dó hwenu e mɛ ɔ kú dó é alǒ fí e mɛ ɔ nɔ nɔ é wú wɛ a? Tínmɛ. (Ðɛhan 33:4, 5)
14 Hweɖélɛ́nu ɔ, mǐ nɔ se bɔ mɛ lɛ́ nɔ ɖɔ: “Ényí hɛ̌nnumɔ ce kú cóbónú wǔvɛ́ ɖaxó ɔ bɛ́ ɔ, é ná ɖibla nyɔ́ hú gǎn, énɛ́ ɔ, nukúnɖíɖó fínfɔ́n sín kú tɔn ná tíin n’i.” É ɖo wɛn ɖɔ hwɛjijɔ ɖagbe lɛ́ wú wɛ yě nɔ ɖɔ xó mɔ̌hun lɛ́. Amɔ̌, gbɛ e mɛɖé ná nɔ káká sɔ́yi ɖo sɔgúdo é nɔ sín hwenu e é kú dó é wú ǎ. Hwɛɖɔtɔ́ e nǔ bǐ vɔ ɖ’é wú é wɛ Jexóva nyí, tínmɛ tɔn wɛ nyí ɖɔ é nɔ wá gbeta e sɔgbe lɛ́ é kɔn hwebǐnu. (Xa Ðɛhan 33:4, 5.) Mǐ sixú kú d’é jí ɖɔ “hwɛɖɔtɔ́ gbɛ ɔ bǐ tɔn” ná wa nǔ e sɔgbe é.—Bǐb. 18:25.
15 É lɛ́ sɔgbe ɖɔ è ní wá gbeta ɔ kɔn ɖɔ gbɛ e mɛɖé ná nɔ káká sɔ́yi ɖo sɔgúdo é kún nɔ sín fí e é nɔ nɔ é wú ó. Jexóva ná ɖó hwɛ nú gbɛtɔ́ lǐvi mɔ̌kpán bo ɖɔ ɖɔ yě nyí “gbɔ̌” ɖó yě nɔ nɔ xá ɖěɖěe mɛ wɛn Axɔ́súɖuto ɔ tɔn ma yi ǎ lɛ́ é wútu kpowun gbeɖé ǎ. (Mat. 25:46) Nǔ mɛ énɛ́ lɛ́ tɔn tlɛ nɔ ɖu ayi mɛ nú Hwɛɖɔtɔ́ gbɛ ɔ bǐ tɔn e nɔ ɖɔ hwɛ jlɔ́jlɔ́ é hú gǎn lěe é sixú ɖu ayi mɛ nú mǐ gbɔn é. Mǐ tuun lěe Jexóva ná wa nǔ lɛ́ gbɔn ɖo wǔvɛ́ ɖaxó ɔ hwenu é ǎ. Bóyá, ali ná hun nú mɛɖé lɛ́ ɖo mɛ énɛ́ lɛ́ mɛ bɔ yě ná kplɔ́n nǔ dó Jexóva wú, bo ɖi nǔ n’i hwenu e Jexóva ná klɔ́ cí sín nyǐkɔ tɔn wú ɖo akɔta lɛ́ bǐ nukɔn é.—Ezek. 38:16.
Ényí wǔvɛ́ ɖaxó ɔ bɛ́ gúdo ɔ, . . . mɛ ɖěɖěe mɔ nǔ énɛ́ lɛ́ é ɖé lɛ́ sixú ɖi nǔ nú Jexóva wɛ a?
16. Étɛ́ mǐ ka wá tuun dó Jexóva wú? (Kpɔ́n ɖiɖe ɔ lɔmɔ̌.)
16 Biblu kplɔ́nkplɔ́n zɔ́n bɔ mǐ mɔ lě do gbɛ gbɛtɔ́ tɔn xɔ akwɛ́ nú Jexóva sɔ é. É sɔ́ gbɛ Vǐ tɔn tɔn jó bónú ali ná sixú hun nú mǐ mɛ bǐ nú mǐ ná nɔ gbɛ káká sɔ́yi. (Jaan 3:16) Mǐ mɛ bǐ wɛ nɔ mɔ ɖɔ Jexóva nɔ ɖe xlɛ́ mǐ ɖɔ émí yí wǎn nú mǐ tawun. (Eza. 49:15) É tuun nyǐkɔ mǐ mɛ ɖokpó ɖokpó tɔn. É tuun mǐ sɔmɔ̌ bɔ ényí mǐ ná bo tlɛ kú ɔ, é sixú fɔ́n mǐ, ɖó é nɔ flín gǒflɛ́mɛ e kunkplá mǐ lɛ́ é kpó nǔ e mǐ ko tuun lɛ́ é kpó bǐ! (Mat. 10:29-31) É ɖo wɛn ɖɔ, mǐ ɖó hwɛjijɔ ɖagbe e wú mǐ ná ɖeji ɖɔ Tɔ́ mǐtɔn wǎnyíyínɔ jǐxwé tɔn ɔ, ná ɖɔ hwɛ mɛ ɖokpó ɖokpó tɔn bɔ nǔ bǐ ná vɔ ɖ’é wú, ɖɔ hwɛ jlɔ́jlɔ́ lobo lɛ́ wa mɔ̌ kpó nǔbláwǔkúnúmɛ kpó é.—Ja. 2:13.
Mǐ sixú ɖeji ɖɔ Jexóva ná ɖɔ hwɛ mɛ ɖokpó ɖokpó tɔn bɔ nǔ bǐ ná vɔ ɖ’é wú, ɖɔ hwɛ jlɔ́jlɔ́ lobo lɛ́ wa mɔ̌ kpó nǔbláwǔkúnúmɛ kpó (Kpɔ́n akpáxwé 16)
17. Étɛ́ lɛ́ jí mǐ ka ná ɖɔ xó dó ɖo xóta e bɔ d’é wú é mɛ?
17 Mɔjɛmɛ énɛ́ lɛ́ e mǐ wá ɖó é zɔ́n bɔ mǐ mɔ ɖɔ wɛnɖagbejíjlázɔ́ mǐtɔn myá nukún tawun din hú ɖ’ayǐ tɔn. Étɛ́wú mǐ ka sixú ɖɔ mɔ̌? Étɛ́ ka nɔ sísɛ́ mǐ bɔ mǐ ma nɔ dɔn yonu dó gǔdo ǎ bo nɔ kpo ɖo wɛn ɖagbe ɔ jlá wɛ? Mǐ ná ɖɔ xó dó xósin nǔkanbyɔ́ énɛ́ lɛ́ tɔn lɛ́ jí ganjí ɖo xóta e bɔ d’é wú é mɛ.
HAN 76 Nɛ̌ nǔ nɔ cí nú we?
a Bo ná dó mɔ tínmɛ ɖé dó nǔ e wú è bló hǔzúhúzú énɛ́ é wú hǔn, kpɔ́n xóta “Hiẹ Mọdọ E Yọ́n Nado Yinuwa to Aliho Ehe Mẹ” ɖo Atɔxwɛ (Gungbe) 15 mars 2015 mɛ, wěx. 7-11.
b Ényí è sú Babilɔ́nu ɖaxó ɔ sín kún dó gúdo ɔ, è ná tɛ́n mɛsɛntɔ́ Jexóva tɔn lɛ́ bǐ kpɔ́n ɖo Gɔ̌gu Magɔ́gu tɔn sín ahwantɔ́nmɛ hwenu. È ná lɛ́ tɛ́n mɛ ɖěbǔ e ná xo kpóɖó nú togun Mawu tɔn ɖo hwenu e è ná ko sú kún dó nú Babilɔ́nu ɖaxó ɔ gúdo é kpɔ́n.
c ÐIÐE LƐ́ SÍN TÍNMƐ,: Fɔtóo kpɛví kpɛví atɔn ɖo nǔ e wú mǐ ma sixú kpé wú bo jlá wɛn ɖagbe e jlá wɛ mǐ ɖe gbɔn gbɛ ɔ bǐ mɛ é mɛɖé lɛ́ ǎ é xlɛ́ wɛ: (1) Nǎwe ɖé nɔ nɔ fí e sinsɛn e kpa zinkpo ɖo ayǐ ɔ jí é zɔ́n bɔ Kúnnuɖetɔ́ lɛ́ ma sixú nɔ ayijayǐ mɛ bo jlá wɛn ɔ ɖe ǎ é ɖé, (2) asú kpó asi kpó ɖé nɔ nɔ fí e ali ma hun nú yě gbeɖé ɖe, bónú yě ná se wɛn ɖagbe ɔ ǎ é, ɖó acɛkpikpa e ɖo to ɔ nu é gbɛ́ azɔ̌ Kúnnuɖetɔ́ Jexóva tɔn lɛ́ tɔn, bɔ yě nɔ sixú nɔ ayijayǐ mɛ bo jlá wɛn ɔ ǎ, bɔ (3) dǎwe ɖé nɔ nɔ fí e jɛ zɔ tawun bɔ mɛɖé ma sixú nɔ kpé wú bo nɔ yi ǎ é ɖé.
d ÐIÐE Ɔ SÍN TÍNMƐ: Ðyɔ̌vǐ e ko jó nǔgbó ɔ dó ɖ’ayǐ é ɖé flín nǔ e é kplɔ́n dó kún e è ná sú dó nú “Babilɔ́nu ɖaxó ɔ” é wú lɛ́ é. É wá gbeta ɔ kɔn bo lɛ́ kɔ wá Jexóva kpó mɛjitɔ́ tɔn lɛ́ kpó gɔ́n. Ényí nǔ mɔ̌hun jɛ ɔ, mǐ ba ná kú nǔbláwǔ nú mɛ, bo lɛ́ se wǔvɛ́ xá mɛ Tɔ́ mǐtɔn jǐxwé tɔn ɔ ɖɔhun lobo jɛ awǎ ɖɔ hwɛhutɔ́ ɖé lɛ́ kɔ wá
