TE KAONGORA IBUKIN TE REIREI 19
ANENE 22 E a Tei Ana Tautaeka n Uea!
Tera te Bae ti Ataia Ibukin Ana Motikitaeka Iehova n te Tai ae E na Roko?
“Iehova . . . e aki tangira kamaunaan temanna.”—2BET. 3:9.
TE BOTO N IANGO
Ti kona ni kakoauaa raoi ae e na bon raoiroi ao n riai ana motikitaeka Iehova n te tai ae e na roko.
1. Bukin tera ngkai ti kona n taekinna ae ti a maeka n taai aika okoro?
TI A maeka n taai aika okoro! Ti a nori kakororaoan taetae ni burabeti man te Baibara ni katoabong. N te katoto, a uaia ni kaiangatoa “ueani meang” ao “ueani maiaki” ibukini kan tautaekanakin te aonnaba. (Tan. 11:40, kbn.) Ti noria bwa e a tataekinaki te rongorongo ae raoiroi ibukin Ana Tautaeka n Uea te Atua ni kabutaa te aonnaba, ao mirion ma mirion aomata aika butimwaeia. (Ita. 60:22; Mat. 24:14) Ao ti karekei amwarake n taamnei aika bati “n te tai ae riai.”—Mat. 24:45-47.
2. Tera ae ti kona ni kakoauaa raoi, ma tera ae ti riai n ataia?
2 E teimatoa Iehova ni buokira ni karekea otara ae mataata riki ibukini baika kakawaki aika a na riki n taai aika imwaira. (TaeRab. 4:18; Tan. 2:28) Ti kona ni kakoauaa raoi ae n te tai are e moanaki iai te rawawata ae korakora, ti na bon atai bwaai ni kabane aika ti riai n atai bwa ti aonga ni kakaonimaki n nanomwaaka ao n teimatoa ni katiteuanaaki n te tai ae karawawata anne. Ma ti riai n ataia ae iai bwaai tabeua ae ti aki atai ibukin taai aika a na roko. N te kaongora aei ti na maroroakina moa bukina ngkai ti a manga rinanoi baike ti a tia n taekin ibukini bwaai tabeua aika a na riki. Imwina ti na rinanoi bwaai tabeua aika ti bon atai ibukin taai aika a na roko ao aron Tamara are i karawa ni karaoi bwaai.
TE BAE TI AKI ATAIA
3. Tera ae ti iangoia ngkoa bwa e na riki nakoia naake a aki onimaki ngkana e a moanaki te rawawata ae korakora, ao bukin tera ngkai ti iangoa anne?
3 Ti taekinna n taai ake rimoa, ae ngkana e a moanaki te rawawata ae korakora, ao a nang aki kona n tei ibukin Iehova ao ni kamaiuaki n Aremaketon naake a aki onimaki. Ti taekina aei ibukina bwa ti ataia ae rongorongon te Ieka e tei ibukin te taetae ni burabeti. N te katoto, ti iangoia ae e na akea ae e na kona n onimakina Iehova ao ni kamaiuaki ngkana e a moanaki te rawawata ae korakora, n ai aron are akea ae kona n rin n te aake ngke e tia Iehova ni kaina mataroana.—Mat. 24:37-39.
4. Ti iangoa ngkai rongorongon te Ieka bwa te taetae ni burabeti? Kabwarabwaraa.
4 Ti riai n iangoa rongorongon te Ieka bwa te taetae ni burabeti? Ti aki. Bukin tera? Ibukina bwa e aki taekinaki aei n te Baibara. a E koaua ae e kabotaua Iesu “ana bong Noa” ma te tai are e na oki ma n tiku iai. Ma e aki taekinna ae bwaai ni kabane ake a riki n ana tai Noa, e na iai kakororaoana ae kakawaki riki nakon taai aika a na roko, n aron are ngke e kaina mataroan te aake Iehova. Ma tiaki nanona bwa ti a aki kona ni karekei reireiara man rongorongon Noa ao te Ieka.
5. (a) Tera are e karaoia Noa imwain te Ieka? (Ebera 11:7; 1 Betero 3:20) (b) Tera ae titeboo iai ana uarongorongo Noa ma ara uarongorongo n ara bong aikai?
5 Ngke e ongo Noa ana kauring Iehova, ao e kaotia bwa iai ana onimaki ngke e katea te aake. (Wareka Ebera 11:7; 1 Betero 3:20.) N aron naba anne, a riai ni mwakuria aia onimaki aomata aika ongo te rongorongo ae raoiroi ibukin Ana Tautaeka n Uea te Atua. (Mwa. 3:17-20) E arana Noa Betero bwa “te tia uarongorongoa taekan te raoiroi.” (2Bet. 2:5) Ma n aron are e maroroakinaki n te kaongora are mai mwaina, ti aki ataia ngkana e kaira te mwakuri n uarongorongo Noa ni karoko irouia aomata nako n te aonnaba imwain te Ieka ke aki. N ara bong aikai ti karaoa te mwakuri n uarongorongo ni katobibia te aonnaba, ao ti kakorakoraira n uataboia ma te ingainga. Ma n aki ongea ara kakorakora, ti bon aki kona ni karokoa te rongorongo ae raoiroi irouia aomata nako n te aonnaba, imwain rokon te toki. Bukin tera?
6-7. Bukin tera ngkai ti kona n taekinna ae ti na aki kona ni karokoa te rongorongo ae raoiroi irouia aomata nako n te aonnaba imwain rokon te toki? Kabwarabwaraa.
6 Iangoa ana taeka Iesu ibukin raababan ara mwakuri n uarongorongo. E a kaman taekinna ae e na tataekinaki te rongorongo ae raoiroi “n te aonnaba ni kabutaa bwa te bwai ni kaotioti nakoia botannaomata ni kabane.” (Mat. 24:14) E a kakororaoaki riki te taetae ni burabeti anne n ara bong aikai nakon are mai mwaina. E boreetiaki rongorongon te Tautaeka n Uea n taetae aika e raka i aon 1,000 ao e tauraoi nakoia angia kaain te aonnaba rinanon te atureti n te intanete ae jw.org.
7 Ma e tuangia naba taan rimwina Iesu ae a na aki “buta . . . kaawa” irouia, ke a na aki uarongorongo nakoia aomata nako imwain rokona. (Mat. 10:23; 25:31-33) E na oti naba koauan ana taeka Iesu n ara bong aikai. Mirion ma mirion aomata ni boong aikai aika maeka n taabo ake e rangi ni korakora iai katabuakan te mwakuri n uarongorongo. Irarikin anne, irabubua ataei aika bungiaki ni katoa miniti. Ti kabanea ara konaa ni karokoa te rongorongo ae raoiroi irouia aomata man “natannaomata nako ao baronga ao taian taetae.” (TeKao. 14:6) Ma ni koauana, ti na bon aki kona n tibwaa te rongorongo ae raoiroi nakon temanna ma temanna n te aonnaba imwain rokon te toki.
8. Tera te titiraki ae ti kona n tabekia ibukin ana motikitaeka Iehova n te tai ae e na roko? (Nori naba taamnei.)
8 Ngaia are e rio te titiraki aei: Tera aroia te koraki ake a aki reke aia tai n ongora te rongorongo ae raoiroi imwaini moanakin te rawawata ae korakora? A na kangaa Iehova ao Natina are e mwiokoia n te motikitaeka, ni motiki taekaia naakai? (Ioa. 5:19, 22, 27; Mwa. 17:31) E taekinaki n te kibu ae aana te kaongora aei bwa “e aki tangira kamaunaan temanna” Iehova. Ma e tangiriia “aomata nako bwa a na rairi nanoia.” (2Bet. 3:9; 1Tim. 2:4) Ibukin anne, ti riai n ataia ae e tuai moa kaotia Iehova nakoira bwa tera ae e na karaoia ibukini kaekaan te titiraki aei. Ni koauana, e bon aki kabaeaki bwa e na tuangira te baere e a tia ni karaoia ke ae e na karaoia.
E na kangaa Iehova ni motiki taekaia naake a aki reke aia tai n ongora n te rongorongo ae raoiroi imwaini moanakin te rawawata ae korakora? (Nora barakirabe 8) c
9. Tera ae e a tia ni kaotia Iehova nakoira n te Baibara?
9 E a tia Iehova ni kaotia nakoira n ana Taeka bwaai tabeua aika e na karaoi. N te katoto, ti tuangaki n te Baibara bwa e na manga kautiia Iehova “akana aki raoiroi,” ake a aki reke aia tai n ongora n te rongorongo ae raoiroi ao ni bitii aroia. (Mwa. 24:15; Ruka 23:42, 43) A a manga rio titiraki aika kakawaki riki tabeua man anne.
10. Baikara riki titiraki aika a manga rio?
10 A na kamaunaaki n aki toki aomata ni kabane ake a mate n tain te rawawata ae korakora, n akea kantaningaan te mangauti irouia? E kamatataaki n te Baibara bwa a na bon aki kautaki taani kakaaitara ake e na kamaunaia Iehova n Aremaketon ma ana taanga ni buaka. (2Tet. 1:6-10) Ma tera aroia ake tabeman, tao n aroia ake a mate man te aoraki ke te kara, te kabuanibwai, ke a tiringaki irouia tabeman? (TeMin. 9:11; Tek. 14:13) A kona tabeman i buakoia te koraki aikai ni mena i buakoia “akana aki raoiroi” aika a na kautaki n te aonnaba ae boou? Ti bon aki ataia.
TE BAE TI BON ATAIA
11. E boto i aon tera motikan taekaia aomata n Aremaketon?
11 Ti bon atai bwaai tabeua aika a na riki n te tai ae e na roko. N te katoto, ti ataia ae n Aremaketon, a na motikaki taekaia aomata ni kaineti ma aroia nakoia tarini Kristo. (Mat. 25:40) A na boni kaota aia boutoka ibukia aika kabiraki ao ibukini Kristo, naake a motikaki taekaia bwa tiibu. Ti ataia naba ae a na teimatoa n tiku i aon te aonnaba tabeman tarini Kristo imwini moanakin te rawawata ae korakora, ao a na anaaki nako karawa teutana te tai imwain raoi moanakin Aremaketon. Ngkai a teimatoa n tiku i aon te aba tarini Kristo, e na reke aia tai aomata aika raoiroi nanoia ni boutokaiia ao ni karaoa te mwakuri ae a karaoia. (Mat. 25:31, 32; TeKao. 12:17) Bukin tera bwa a kakawaki koaua aikai?
12-13. E na tera aroia tabeman imwin norani kamaunaani “Baburon ae Kakannato”? (Nori naba taamnei.)
12 Imwin naba moanakin te rawawata ae korakora, a kona tabeman ake a nora kamaunaani “Baburon ae Kakannato,” n uringnga are a a kaman tataekina te bae e na riki aei Ana Tia Kakoaua Iehova. A kona tabeman aika nori baika riki aikai ni manga bitaki nanoia?—TeKao. 17:5; Etek. 33:33.
13 Ngkana e riki anne, e na bon titeboo ma te baere riki i Aikubita n ana bong Mote. Uringnga are iai “aomata aika kakaokoro nako” ake a airi ma tibun Iteraera ni kitana Aikubita. E bae ni moan rikirake aia onimaki tabeman i buakoia naakai ngke a nori kakoroani bukin ana kauring Mote ni kaineti ma Rekenikai Ake Tebwina. (TeOti. 12:38) Ngkana arona bwa e riki naba ae aron anne imwini kamaunaani Baburon ae Kakannato, te koaua bwa ti na un irouia aomata ake a a manga raonira imwain raoi rokon te toki? Ti na aki! Ti kani kaotiota aroaron Tamara are i karawa, “ae te Atua ae nanoanga ao e atataiaomata, ae iremwe n un ao e bati irouna te tangira ae koaua ao e bwabwaina te koaua.” b—TeOti. 34:6.
Tabeman aika a na nora kamaunaani “Baburon ae Kakannato” a na uringnga ae a a kaman tataekina te bae e na riki aei Ana Tia Kakoaua Iehova (Nora barakirabe 12-13) d
14-15. E boto reken te maiu are aki toki iroun te aomata n te tai are e mate iai ke n te tabo are e maeka iai? Kabwarabwaraa. (Taian Areru 33:4, 5)
14 N tabetai ti kona n ongo bwa e kangai temanna, “E na raoiroi riki ngkana e mate au koraki imwain ae moanaki te rawawata ae korakora bwa e kona riki iai ni manga kautaki.” Iai bukina aika raoiroi ngkai a taekin taeka akanne. Ma e aki boto reken te maiu are aki toki iroun te aomata, n te tai are e mate iai. Bon te tia motikitaeka ae kororaoi Iehova ao a riai ma n raoiroi ana babaire. (Wareka Taian Areru 33:4, 5.) Ti kona ni kakoauaa ae e na karaoa ae raoiroi “te tia motika taekan te aonnaba ni kabutaa.”—KBwaai 18:25.
15 E kona naba n eti kakoauaan ae e aki boto reken te maiu are aki toki iroun te aomata, n te tabo are e maeka iai. E na bon aki kona Iehova n arania bwa “kooti” aomata aika mirion ma mirion aika a maeka n aaba ake a tuai n reke aia tai n ongora n rongorongon te Tautaeka n Uea. (Mat. 25:46) E rangi n tabeakinia riki aomata aikai te tia motika taekan te aonnaba ni kabutaa ae raoiroi. Ti aki ataia bwa e na kangaa Iehova ni kaangaraoi bwaai n tain te rawawata ae korakora. Tao iai tabeman i buakoia aomata aikai ae e na reke aia tai n reiakina taekan Iehova, n onimakinna, ao n tei n ana itera Iehova ngkana e a katabua i mataia natannaomata nako.—Etek. 38:16.
Imwini moanakin te rawawata ae korakora, . . . a kona tabeman aika nori baika riki aikai ni manga bitaki nanoia?
16. Tera ae ti a ataia ibukin Iehova? (Nora naba te taamnei.)
16 Man ara ukeuke n reirei n te Baibara, ti a ataia iai ae rangi ni kakawaki maiuia aomata iroun Iehova. E anga maiun Natina bwa ti aonga ni karekea te maiu are aki toki ngaira ni kabane. (Ioa. 3:16) Ti a bane n tia n namakina ana tangira Iehova. (Ita. 49:15) E kinaira n tatabemanira nako n arara. E rangi ni kinaira raoi n te aro are ngkana ti mate, e kona ni manga kautiira ibukina bwa e uringi raoi bwaai ni kabane ibukira n ikotaki ma ara ururing ni kabane! (Mat. 10:29-31) Ti boni kakoauaa raoi bwa Tamara are i karawa ae tatangira, e na boni motiki taekaia aomata n tatabemania nako n te aro ae kororaoi ibukina bwa e wanawana, e raoiroi, ao e nanoanga.—Iak. 2:13.
Ti kona ni kakoauaa raoi ae e na boni motiki taekaia aomata n tatabemania nako Iehova n te aro ae kororaoi ibukina bwa e wanawana, e raoiroi, ao e nanoanga (Nora barakirabe 16)
17. Tera ae ti na maroroakinna n te kaongora are imwina?
17 Ngkai e a kaetaki otara n aikai, ti a ataia iai ae e a rangi ni kaumakaki riki te mwakuri n uarongorongo nakon are mai mwaina. E aera bwa ti kona n taekina anne? Ao tera ae kairira bwa ti na teimatoa n tataekina te rongorongo ae raoiroi ma te aki bwarannano? Ti na maroroakini kaekaan titiraki aikai n te kaongora are imwina.
ANENE 76 Tera Am Namakin Iai?
a Ibukini kabwarabwaraana bwa e aera ngkai e karaoaki te bitaki aei, nora te kaongora ae “Aei ae Boraoi ma Nanom” n Te Taua-n-Tantani ae bwaini Maati 15, 2015, i. 7-11.
b Imwini kamaunaani Baburon ae Kakannato, a na kataaki ana toro ni kabane Iehova ngkana e a buaka Koka mai Makoka. A na kataaki naba naake a raonia ana aomata te Atua imwini kamaunaani Baburon ae Kakannato.
c KABWARABWARAAN TAAMNEI: Taamnei aika tenua aika kaotia ae iai tabeman aika a na aki kona ni kawaraki n te mwakuri n uarongorongo: (1) Te aine ae maeka n te tabo ae karuanikai iai te uarongorongo ibukin te Aro ae taabangaki ikanne, (2) taanga aika maeka n te tabo ae e katabuakaki iai i aan te tua ao e karuanikai ibukin te tautaeka ikanne, ao (3) te mwaane ae maeka n te tabo ae rangi n tionako ao e kangaanga te roko iai.
d KABWARABWARAAN TE TAAMNEI: Te aine ae ataei are e kitana te koaua ae e uringa te baere e reiakinna ibukini kamaunaani “Baburon ae Kakannato.” E a manga bitaki nanona ao n okiriia ana karo aika Kristian. Ngkana a riki bwaai aika ai aron akanne, ti kani kaotiota aroaron Tamara are i karawa ae nananoanga ao n atataiaomata, ao ni kimwareirei ngkai e a manga oki te tia bure.
