OBHEASACHO LEKH 19
GIT 22 Sorgar Raj Suru Zalem—Begin Ieum!
Jehova Koso Neai Kortolo Tea Vixim Ami Kitem Zannant?
“Konnanchoch nas zalʼlo [Jehovak] naka.”—2 PED. 3:9.
MUKHEL MUDʼDO
Fuddarak Jehova lokancho neai kortolo tednam, to sarkem tench kortolo ani konnacheach sangata onʼneai korchona mhunn ami kiteak khatri dovrunk zata tem zannam zaum-ia.
1. Ami jietat to kall ekdom khas asa oxem ami kiteak mhunnonk zata?
AMI jietat to kall ekdom khas asa! Karonn Bible-antleo bhasaunneo purnn zatat tem ami amchea dolleam mukhar polloitat. Zoxem, ‘utʼtorecho ani dokxinnecho raza’ eka-meka add zhuztat. Karonn te sonvsaracher tabo cholounk sodhtat. (Dan. 11:40, NW) Toxench, Devachea Rajeachi bori khobor, akʼkhea sonvsaracher porgott zata ani lakʼkhamnim lok Jehovachi seva korunk vinchun kaddttat. (Iz. 60:22; Mt. 24:14) Tea bhair, Jehova sangata amchi ixttagot ghott korunk amkam “sarkea vellar” goroz tem soglem melltta.—Mt. 24:45-47.
2. Ami kosli khatri dovrunk zata, punn ami kitem vollkhon gheunk zai?
2 Beginuch ghoddcheo asat tea mhotvachea ghoddnneam vixim, Jehova amkam spoxtt somzonni di-it asa. (Mho. 4:18; Dan. 2:28) Ani vhodd sonkoxtt suru zata mhunnosor, visvaxiponnan Jehovachi seva korunk ani tea kotthin vellar amchea modem ekvott samballunk ami jem kitem zannam zaunk zai, tem Jehova amkam kolloitolo mhunn ami khatri dovrunk zata. Punn fuddara vixim amkam thoddeo vostu khobor nant mhunn ami vollkhon gheunk zai. Tor hea lekhant, fuddarachea thoddea ghoddnneam vixim ami jem mhunnttlolem tantunt ami kiteak bodol kela tem ami zannam zatolim. Toxench, fuddara vixim amkam khobor asat teo thoddeo vostu ani Jehova tea vellar kitem kortolo tem-ui ami polloitolim.
AMKAM KITEM KHOBOR NA?
3. Vhodd sonkoxtt suru zalea uprant lokanchem kitem zatolem oxem ami mhunnttalim, ani amkam toxem kiteak distalem?
3 Adim amchi somzonni oxi asli ki vhodd sonkoxtt suru zalea uprant, konnakuch Jehova vixim xikonk mellchem na ani tim Armageddonachea zhuzant salvar zaunchimnant. Kiteak? Karonn Noah-chea buddtte vellar zalʼlem toxench, vhodd sonkoxttachea vellar zatolem oxem ami somzotalim. Udharonnak, buddtti ieunchea poilim Jehovan arkpettichem dar bond kelem ani tea uprant konnakuch bhitor soronk mellonk na. Teach bhaxen, vhodd sonkoxtt suru zalea uprant, konnakuch Jehovacher bhavarth dovrun salvar zaunk sondhi mellchina oxem ami chintʼtalim.—Mt. 24:37-39.
4. Fuddarak soglem buddtte vellar ghoddlolem toxench ghoddttolem, oxem ami atam kiteak mhunnonant? Somzaiat.
4 Punn buddtte vellar jem kitem ghoddlem toxench vhodd sonkoxttachea vellar ghoddttolem, oxem mhunnop sarkem zaunchem na. Karonn Bible-ant toxem sangonk na. a Hem khorem ki Jezun ‘Noah-chea disank,’ munxacho Put hajir asa tea vellak sor kelʼlo. Punn buddtte vellar ghoddloli ekan-ek ghoddnni, fuddarak ghoddttoli oxem tannem sangonk na. Torui ami Noah koddlean ani buddtte vellar jem ghoddlem tantuntlean zaitim lisanvam xikonk zatat.
5. (a) Buddtti ieunchea adim Noah-n aplo bhavarth koso dakhoilo? (Hebrevank 11:7; 1 Pedru 3:20) (b) Porgottnnechea kama vixim Noah-chea kallar ani aichea kallar kitem ek-sarkem asa?
5 Jehova Devan Noah-k buddtte vixim kolloilem tednam, tannem arkpett bandun aplo bhavarth dakhoun dilo. (Hebrevank 11:7; 1 Pedru 3:20 vachat.) Teach bhaxen, aiz jim bori khobor aikotat tannim aplo bhavarth korneamnim dakhoun diunk zai. (D.I. 3:17-20) Apostl Pedrun, Noah-k “nitivontponn porgott korpi” oxem mhunnttlem. (2 Ped. 2:5) Noah-n porgott korunk khub vavr kelo tem khorem. Punn zoxem ami fattlea lekhant xiklim, Noah-chea kallar jietolea dor eka munxak to porgott korunk pavlo mhunn Bible amkam sangona. Teach bhaxen, aiz ami sonvsarbhor lokank porgott korunk urben vavr kortat. Tori astana, hea prithumer jietolea dor eka munxak ami porgottunk pavchimnant. Oxem kiteak?
6-7. Xevott ieunchea poilim prithumer aslolea sogleank ami porgottunk pavchimnant oxem ami kiteak mhunnonk zata?
6 Porgottnnechea kama vixim Jezun kitem sanglolem tem ugddas korum-ia. Tannem mhunnttlolem: “Soglea raxttrank govai mellche khatir Rajeachi bori khobor akʼkhea sonvsarant porgott zatoli.” (Mt. 24:14) Ani aiz porgottnnechem kam nettan zata tem ami polloitat. Aiz lokank 1,000-am poros chodd bhasamnim amchim prokaxonam vachunk mellttat. Toxench, sonvsarantlea choddxea lokank, jw.org hi amchi website pollounk melltta.
7 Punn Jezun aplea xisank oxem-i sanglolem ki munxacho Put ieunchea adim, ‘soglea xaramnim tanchem bhonvon zaunchem na’ vo te sogleank porgottunk pavchenant. (Mt. 10:23; 25:31-33) Tannem mhunnttlolim him utram amchea disamnim pasun lagu zatat. Karonn aiz koroddamnim lok oslea vattaramnim ravtat, zoim amkam ukteponnim porgottnni korunk mellona. Toxench, dor minttak xemboramnim bhurgim zolmotat. Ami ‘dor eka raxttrachea, kullachea, ani bhaxechea’ lokank porgottunk amchean ghoddtta tem soglem kortat tem khorem. (Prok. 14:6) Punn xevott ieunchea poilim, hea prithumer aslolea dor eka munxak ami porgottunk pavchimnant.
8. Fuddarak Jehova Dev lokancho koso neai kortolo hea vixim ami kitem chintit? (Chitram pasun polloiat.)
8 Tor ami ghoddie chintit: Zankam vhodd sonkoxtt suru zaunchea adim bori khobor aikonk sondhi mellonk na, tanchem kitem zatolem? Jehova Dev ani tannem neai korunk nemlolo tacho Put tancho neai koso kortole? (Ju. 5:19, 22, 27; D.I. 17:31) Hea lekhachem mukhel vers sangta tea pormonnem, “konnanchoch nas zalʼlo [Jehovak] naka. Tachea bodlek, sogleank poschatap korunk sondhi mellʼlloli taka zai.” (2 Ped. 3:9; 1 Tim. 2:4) Hem ami Jehova Deva vixim zannant tem khorem. Punn zankam bori khobor aikonk mellonk na, tancho to koso neai kortolo tem tannem amkam azun poriant sangonk na. Khorem mhunnttlear, tancho neai korunk tannem kitem kelam vo to kitem kortolo tem tannem amkam sangchi goroz na.
Vhodd sonkoxtt suru zaunchea poilim bori khobor aikonk sondhi mellonk na tea lokancho Jehova koso neai kortolo? (Peregraf 8 polloiat) c
9. Jehova kitem kortolo mhunn Bible-ant sanglam?
9 Jehova fuddarak kitem kortolo tem soglench Bible-ant sangonk na. Punn thoddeo vostu sangloleo asat. Udharonnak, Jehova vixim xikon aplea jivitant bodol korunk mellonk na tea “onitivont munxank” to jivont kortolo mhunn Bible sangta. (D.I. 24:15; Luk. 23:42, 43) Tor hem zannam zalʼlean, amchea monant anikui mhotvache prosn ietat.
10. Amchea monant kosle prosn ieunk xoktat?
10 Vhodd sonkoxtta vellar jim konn mortat tim fuddem jivont zatolim kai? Bible-antlean amkam kollon ieta ki Jehova ani tachi soin Armageddona vellar aplea virodheancho nas kortole ani te jivont zaunchenant. (2 Tes. 1:6-10) Punn heram vixim kitem? Udharonnak, thoddim ghoddie vhodd sonkoxtta vellar duensak lagon, zanntteponnak lagon, vo opghatak lagon moronk xoktat, vo thoddeank konnui jivexim marunk xokta. (Up. 9:11; Zek. 14:13) Tor novea sonvsarant jivont zatolea ‘onitivont munxam’ modem him-ui astolim kai? Hea vixim amkam khobor na.
AMKAM KITEM KHOBOR ASA?
11. Jehova kiteacher adarit Armageddonachea vellar lokancho neai kortolo?
11 Fuddarak zatolea zaitea ghoddnneam vixim amkam khobor asa. Udharonnak, ami zannant ki lok Kristachea bhavam sovem koxe vagleat, tea pormonnem Armageddonachea vellar tancho neai zatolo. (Mt. 25:40) Tor je konn makhlolea Kristanvank ani Jezu Kristak tenko ditat tankam menddre mhunn tharaitole. Toxench, ami hem-ui zannant ki vhodd sonkoxtt suru zalea uprant pasun, Kristache he thodde bhav prithumecher astole. Punn Armageddon suru zaunchea thoddeach vella poilim tankam sorgar vhortole. Tor he makhlole bhav hea prithumer asat tea meren tankam tenko diunk ani te kortat tea kamant adar diunk, khaltea kallzachea lokank sondhi mellttoli. (Mt. 25:31, 32; Prok. 12:17) Hem soglem zannam zavop kiteak mhotvachem?
12-13. ‘Bollixtt Babilonacho’ nas zala tem polloun thoddim kitem korit? (Chitram pasun polloiat.)
12 Vhodd sonkoxtta uprant pasun, thoddea zannanchem mon bodlonk xokta. Karonn “Bollixtt Babilon” nas zatolem tem tim polloitolim ani Jehovachim Sakxi zaitea vorsam thaun hem sangtalim mhunn tankam ugddas ietolo.—Prok. 17:5; Ez. 33:33.
13 Oxench kitem Ejipttant Moizesachea disamnim ghoddlem. Izraelitkaram Ejiptt soddun bhair ietalim tednam, ‘jinʼnosvar vo veg-vegllea torechea lokanchi ek vhodd urponz’ tanchea sangata bhair soron aili. Hantuntlea thoddea zannamnim, Moizesan Dha Khasti vixim jem sanglolem tem tanchea dolleam mukhar ghoddtta tem polloilem tednam, Jehovacher visvas dovrunk suru kelem astolem. (Sutt. 12:38) Tor fuddarak Bollixtt Babilonacho nas zalea uprant thoddea zannamnim Jehovacher bhavarth dovrunk suru kelem zalear, tankam xevott ieunchea thoddeach vella poilim salvar zaunk sondhi mellʼlli mhunn chintun ami bejar zatolim kai? Na. Karonn ami amchea sorginchea Bapachi dekh gheunk sodhtat, zo “doiall-movall Kallzacho Dev! . . . rokddoch ragar zaina, punn bhov dulob ani visvaxi.” b—Sutt. 34:6.
‘Bollixtt Babilonacho’ nas zata tem polloun, thoddim zannam ugddas kortolim ki Jehovachim Sakxi hea ghoddnneam vixim zaitea vorsam thaun porgott kortalim (Peregraf 12-13 polloiat) d
14-15. Eka munxak sasnachem jivit mellttolem kai na, tem to kednam morta vo to khoim ravta tacher tharlolem asa kai? Somzaiat. (Stotr 33:4, 5)
14 Thodde pavtti, thoddim zannam oxem mhunnttat tem ami aikolam astolem: “Mhozo ghorcho, vhodd sonkoxtt suru zaunchea adim melo zalear borem zatolem. Karonn toxem zalem zalear taka jivontponnacho bhorvonso asa.” Tim oxem mhunnonk borem karonn asa mhunn dubhav na. Punn ami ugddas dovrunk zai ki eka munxak fuddarak sasnachem jivit mellttolem kai na, tem to kednam morta tacher tharlolem na. Jehova Dev sodanch sarko neai korta. To kednanch onit vo onʼneai korina. (Stotr 33:4, 5 vachat.) Tor ‘akʼkhe prithumecho Monsubidar vo Neai Korpi’ sarkem tench kortolo mhunn ami khatri dovrunk zata.—Ut. 18:25.
15 Toxench, eka munxak fuddarak sasnachem jivit mellttolem kai na, tem to khoim ravta tacher tharlolem na. Jea desantlea lokank bori khobor aikonk kednanch sondhi mellonk na, thoinchea lakʼkhamnim lokank Jehova Dev ‘bokdde’ mhunn tharaitolo oxem ami kednanch chintunk favona. (Mt. 25:46) Karonn neai ani niticho Dev Jehovak, hea lokanchi amchea poros chodd kallji asa. To hea lokank vhodd sonkoxttachea vellar, apleacher bhavarth dovrunk koso sondhi ditolo tem ami nokllo. Punn to soglea raxttram mukhar aplem nanv gazoitolo tednam, ghoddie hea lokam modlim thoddim zannam tachea vixim xikonk, tacher bhavarth dovrunk ani tachi bazu gheunk suru kortolim.—Ez. 38:16.
Vhodd sonkoxtt suru zalea uprant thoddim teo ghoddnneo polloun aplem mon bodoltolim kai?
16. Amkam Jehova Deva vixim kitem khobor asa? (Chitr pasun polloiat.)
16 Bible-acho obheas kelʼlean amkam kollon ailam ki Jehovak munxachem jivit khub valorachem asa. Taka lagon, amkam sasnachem jivit mellonk tannem aplea ekleach Putak amchea pasot dilo. (Ju. 3:16) Ani Jehova amchi kitli porva korta, amcho kitlo mog korta tem ami svota onnbhovlam. (Iz. 49:15) Toxench to amkam dor ekleak nanvan vollkhota. Khorem mhunnttlear amcho sobhav, amchim chintnam, amchea motint asat teo iadi, to itle bore toren zannam ki ami melim zalear pasun, ami aslim toxinch to amkam porot jivont korunk xokta! (Mt. 10:29-31) Tor amcho zannvaien bhorlolo, nitivont ani doiall Dev Jehova, dor ekleachi sarke toren nit kortolo mhunn amkam kosloch dubhav na!—Jak. 2:13.
Amcho zannvaien bhorlolo, nitivont ani doiall Bap Jehova, dor ekleacho sarke toren neai kortolo mhunn amkam kosloch dubhav na! (Peregraf 16 polloiat)
17. Fuddlea lekhant amkam khoinchea prosnanche zobab mellttole?
17 Amchea somzonnent ho bodol zalʼlean, ami aiz anikui urben porgott korpachi goroz asa. Ami oxem kiteak mhunnonk zata? Bori khobor porgott korit ravonk amkam koxi urba melltta? Hea prosnanche zobab amkam fuddlea lekhant mellttole.
GIT 76 Kalliz Khuxal Zata
a Ho bodol kiteak kelʼlo tem zannam zaunk, Mars 15, 2015-chea Pahrogopur-ant, p. 7-11-cher, “This Is the Way You Approved” ho lekh polloiat.
b Bollixtt Babilonacho nas zalea uprant, Jehovachea soglea sevokanchi, toxench tea vellar tanchi bazu ghetat tea lokanchea bhavarthachi pasun porikxa zatoli.
c CHITRANCHI MAHITI: Khoinchea karonnank lagon ghoddie thoddea lokank bori khobor aikonk sondhi mellona tem hea chitramnim dakhoilam: (1) Ek bail oslea desant ravta, zoim khub thoddo lok Kristanv dhormantlo asa ani thoim bori khobor porgottop dhokeachem asa. (2) ek zoddpem oslea desant ravta, zoim amchea kamacher bondi asa ani porgottnnechem kam korop dhokeachem asa, ani (3) ek dadlo oslea zagear ravta, zoim vochonk ekdom kotthin asa.
d CHITRACHI MAHITI: Sot soddun gelʼli ek tornnatti bail, ‘Bollixtt Babilonacho’ nas zala tem polloita ani tea vixim apunn poili xikloli mhunn tika ugddas ieta. Ti poschatap korta ani aplea mummy-daddy lagim porot ieta, jim Jehovachim Sakxi asat. Oxem fuddem konnachea-i sangata ghoddtta zalear, ami amcho Bap Jehovachi dekh gheun tankam doia-maia ani mog dakhoitolim, ani tim porot Jehova lagim aileant mhunn ami khuxal zatolim.
