EKIRAJAAYA 19
JAYEECHI 22 Aikaleʼennüitpa Nuluwataaya Maleiwa
Watüjaka sünainjee tü naaʼinrajatkat Jehová süsalapa saainjala wayuu nutuma
«Nnojoishi nia ashapajaain suulia amüloulin jia» (2 PED. 3:9).
TÜ WATÜJEETKAT
Loteerü sukuwaʼipa nutuma Jehová süsalapa saainjala wayuu nutuma.
1. ¿Kasa weʼraka ekeraajüin maaʼulu?
ANATAʼALEESÜJAʼA maʼin wakuwaʼipa süka weʼrüin shikeraajüin maaʼulu tü süküjatüjütkalia tü Bibliakat. Weʼrüin peʼipaain «chi aluwataai palaajeʼewaikai» nümaa «chi aluwataai uuchijeʼewaikai» süpüla naluwataainjanain saaʼu tü mmakat (Dan. 11:40, noota). Otta müsia weʼrüin süküjünüin maʼin sainküinpünaa tü mmakat süchiki nuluwataainjachin Maleiwa jee watta naalii na wayuu achekakana naʼyataain nümüin Jehová (Is. 60:22; Mat. 24:14). Aapünüsiaʼaya wamüin tü choʼujaakat süpüla icheinjatüin wanoula (Mat. 24:45-47).
2. (1) ¿Kasa watüjaajeetka aaʼu soʼu tü kaʼi shiʼreetkat maʼin oʼu wayuu müliaa? (2) ¿Kasa jülüjainjatka waaʼin?
2 Ayatüshiʼiya nükaalinjain waya Jehová süpüla wayaawatüin maʼin saaʼu tü alateetkat soʼu palit kaʼi (Prov. 4:18; Dan. 2:28). Soʼu tü kaʼi shiʼreetkalü oʼu wayuu müliaa watüjaajeerü aaʼu tü waaʼinrajatkat süpüla waneepiain waya nümaa Jehová otta süpüla paaʼinwajiraain waya. Jülüjainjatpejeʼe waaʼin nnojoluin watüjaain saaʼu süpüshuaʼa tü alatüinjatkat mapeena. Sünain ekirajaayakat tüü wekirajaajeerü anain süchiki jamüin wanoutaka waneirua kasa jülüjapuʼuka waaʼin süchiki tü alatüinjatkat mapeena. Ekirajaajeenaʼaya waya sünain waneirua kasa watüjaaka aaʼu süchiki tü alatüinjatkat mapeena otta tü naaʼinreetkat chi Washi iipünaajachikai.
TÜ KASA NNOJOTKAT WATÜJAAIN AAʼU
3. (1) ¿Kasa wanoujapuʼuka anain süchiki tü alatüinjatkat namüin na wayuukana soʼu tü kaʼi shiʼrüinjatkat maʼin oʼu wayuu müliaa? (2) ¿Jamüsü jülüjapuʼukaʼa waaʼin tia?
3 Wanoujapuʼu anainrü iseerüin nachiki na manoujainkana naʼyataain nümüin Jehová süntapeena tü kaʼi shiʼreetkat maʼin oʼu wayuu müliaa jaʼitainna narütkaweein nünainmüin otta nnojoleena oʼttaain naya süchikumüin Armagedón. Tü alatakat nükalioʼu Noé shiayaa shiyaawaseka waaʼinruʼu tü alateetkat mapeena, mapuʼusü tü jülüjakat waaʼin süchiki tia. Soʼu nükalia Noé nüsürülüin Jehová soʼu tü anuwakat süpülapünaa shiʼitüin tü juya miyoʼukat maʼin süpüla nnojoluinjatüin jaralüin ekerotuin suluʼumüin. Müinjatia waaʼinruʼu tü naaʼinrajatkat Jehová naka na wayuu manoujainsaliikana süntapa tü kaʼi shiʼreetkat maʼin oʼu wayuu müliaa. Nnojotkalaka jaralüinjatüin oʼttaain waaʼinruʼu soʼu kaʼikat tia (Mat. 24:37-39).
4. ¿Kasa wayaawataka akajee nnojoleerüin shikeraajüin maaʼulu waneʼewai sukua tü alatakat nükalioʼu Noé?
4 Tü alatakat nükalioʼu Noé nnojotsü shiyaawasein tü alateetkat mapeena, a nnojotsü süküjain tia tü Bibliakat. Anuu nünüiki Jesús: «Maʼakaapuʼu sülatüin wanee kasa nükalioʼu Noé, meeria neʼe sukuwaʼipa yaapa chi Süchonkai Wayuu». Nnojotsü nüküjeein Jesús sülatüinjatüin waneʼewai sukua tü kasa alatakat nükalioʼu Noé. Nnojotsü nüküjain achiki Jesús meerüin nüsürütkai aaʼin Jehová wanee puettoʼu soʼunnaa tü kaʼi shiʼreetkat maʼin oʼu wayuu müliaa. Eepejeʼe tü kasa watüjakat sünainjee tü alatakat nükalioʼu Noé.
5. (1) ¿Kasa naaʼinraka Noé süpülapünaa shiʼitüin tü juya miyoʼushaatakat? (Hebreokana 11:7; 1 Pedro 3:20). (2) ¿Kasa iseetka wachiki waaʼinrüin?
5 Süka kanoulain Noé nünain Jehová nukumajüin tü anuwakat naapapa süchiki tü naaʼinrajatkat (paashajeʼera Hebreokana 11:7; 1 Pedro 3:20). Akaataajaʼa neʼe tü naaʼinrajatkat wanee wayuu naapapa süchiki tü pütchi anakat maʼin süchiki nuluwataainjachin Maleiwa, jaʼyainjatü saaʼu nukuwaʼipa kanoulain nia (Aluw. 3:17-20). Anuu nünüiki Pedro nüchiki Noé: «Chi wayuu aküjakai süchiki kasa eekai lotuin sukuwaʼipa» (2 Ped. 2:5). Wekirajaaitpa anain sünain ekirajaaya 18 nnojoluin watüjaain aaʼu naapirüle Noé napüshuaʼa na wayuukana süchiki shiʼitüinjatüin wanee juya miyoʼushaata. Maaʼulu yaa aküjashii waya pütchi sainküinpünaa mmakat, iseetpejeʼe wachiki waküjain pütchi sümüin wayuu süpüshuaʼa süpülapünaa najaʼttirüin Maleiwa tü kasa eekai mojuin.
6, 7. ¿Jamüsü iseetkaʼa wachiki waküjain pütchi sümüin wayuu süpüshuaʼa süpülapünaa najaʼttirüin Maleiwa tü kasa mojusükat?
6 Nüküjain Jesús süküjüneerüin «sainküin mma tü pütchi anakat maʼin süchiki nuluwataainjachin Maleiwa süpüla saapüinjatüin shia wayuu maʼleekalia» (Mat. 24:14). Ekeraajüsü maaʼulu tia pütchikat. Alatüsü suulia 1.000 anüikii süküjünakalü aluʼu tia pütchikat otta eesü süpüla saapüin wayuu süchiki tü pütchi anakat maʼin sükajee tü paajinakat jw.org.
7 Anuu nünüiki Jesús namüin na nikirajüinkana: «Antajachi chi Süchonkai Wayuu nnojoliiwaʼaya juʼunuin suluʼupünaa süpüshuaʼa tü pueulo yaakat Israel». Tü nüküjeekalü achiki Jesús namüin na nikirajüinkana shia iseerüin nachiki naküjain pütchi sümüin wayuu waneʼewai sukua süpülapünaa nüntüin nüchikuaʼa (Mat. 10:23; 25:31-33). Müsia maaʼulu yaa watüjaa aaʼulu shikeraajüin tü nümakat Jesús. Jaʼitairü wachajaain maʼin sukuwaʼipa süpüla waküjain pütchi «sümüin wayuu saʼakajeejatü eʼirukuukat süpüshuaʼa, wayuu naatayaa maka nanüiki, sainküinjeejatü pueulo süpüshuaʼa jee sainküinjeejatü tü mmakat», ayateeria isain wachiki waküjain pütchi namüin waneʼewai nakua süpülapünaa najaʼttirüin Maleiwa tü kasa eekai mojuin, jama wattain saalii wayuu kepiaka eere süpülajünüin woulia waküjain pütchi otta wattain naalii na tepichi joʼuukana sainküinpünaa mma (Apoc. 14:6).
8. ¿Kasa eeka süpüla jülüjain waaʼin? (Piirakaa sümüin tü ayaakuaakat).
8 Eesüjaʼa jülüjale waaʼin tüü: «¿Jameerü nakuwaʼipa na wayuu nnojoliikana aküjünüin amüin tü pütchikat süpülapünaa süntüin tü kaʼi shiʼrüinjatkat maʼin oʼu wayuu müliaa? ¿Kaseerü naaʼinraka Jehová nümaa chi Nüchonkai napüleerua?». Naapüin Jehová laülawaa nümüin Jesús süpüla süsalainjatüin saainjala wayuu nutuma (Juan 5:19, 22, 27; Aluw. 17:31). Nnojotsü ashapajaain naaʼin Jehová suulia amüloulin wayuu maʼaka süküjain tü pütchi ayuʼnnakalü anainjee sünülia ekirajaayakat tüü, «aluʼu shiainjaʼa nücheküin shiyaawajaainjatüin wayuu süpüshuaʼa suulia saainjala» (2 Ped. 3:9; 1 Tim. 2:4). Nnojotyülia nüküjain wamüin Jehová tü naaʼinrajatkat napüleerua naya wayuukana. Nnojotpejeʼe choʼujaain nüküjain wamüin tia.
¿Kaseerü naaʼinraka Jehová napüleerua na wayuu nnojoliikana aküjünüin amüin pütchi süpülapünaa süntüin tü kaʼi shiʼrüinjatkat maʼin oʼu wayuu müliaa? (Paashajeʼera tü pütchikat 8). c
9. ¿Kasa nüküjaka Jehová suluʼu tü Bibliakat süchiki tü naaʼinrajatkat?
9 Nüküjain Jehová suluʼu tü Bibliakat waneirua kasa naaʼinrajatka. Nüsoʼireʼerüinjatü naaʼin süchikijee outaa «na wayuu nnojoliikana lotuin akuwaʼipa», naya na nnojoliikana eeʼiratüin nakuwaʼipa süka nnojoliin nekirajünüin nüchiki Jehová (Aluw. 24:15; Luc. 23:42, 43). Wekirajaa süchiki waneirua kasa eeka süpüla jülüjain waaʼin.
10. ¿Kasa amaa eeka süpüla wasakirüin anain waaʼin?
10 ¿Jameetche nakuwaʼipa na wayuu outeenakana soʼu tü kaʼi shiʼrüinjatkat maʼin oʼu wayuu müliaa? ¿Nnojoleenache asoʼiraain aaʼin süchikijee outaa? Shiaʼala neʼe süküjaka tü Bibliakat nnojoliinjanain nasoʼiraain aaʼin na wayuu ajaʼttinneenakana nutuma Jehová otta natuma na nusurulaatsekana Jehová soʼu Armagedón (2 Tes. 1:6-10). ¿Jama na wayuu outeenakana soʼu tü kaʼi shiʼrüinjatkat maʼin oʼu wayuu müliaa sutuma ayuulii, sutuma pasiruaain naya jee sutuma noʼutunuin aaʼin? (Ecl. 9:11; Zac. 14:13). ¿Asoʼireʼenneenache aaʼin namaa «na wayuu nnojoliikana lotuin akuwaʼipa»? Nnojotsü watüjaain aaʼu tia.
TÜ KASA WATÜJAAKALÜ AAʼU
11. ¿Kaseerü jülüjaka naaʼin Jehová süsalapeena saainjala wayuu nutuma soʼu Armagedón?
11 Eesü waneirua kasa watüjaaka aaʼu süchiki tü alatüinjatkat mapeena. Watüjaa aaʼulu süsaleenain naainjala na wayuukana nutuma Maleiwa soʼu Armagedón wanaapünaa sümaa tü naaʼinrakat napüleerua na anoujashii chainjanakana iipünaamüin (Mat. 25:40). Nükataleena Maleiwa na wayuu akaalinjakana Cristo jee na akaalinjakana na anoujashii chainjanakana iipünaa süka meerüin nakuwaʼipa maʼaka saaʼin sukuwaʼipa anneerü. Asaajaaneena na anoujashii chainjanakana iipünaamüin süpülapünaa Armagedón, watüjaakalaka saaʼu eejeenain mmapaʼa waneinnua anoujashii chainjanakana iipünaamüin soʼu tü kaʼi shiʼrüinjatkat maʼin oʼu wayuu müliaa. Eekalaka süpüla nakaalinjünüin na anoujashii chainjanakana iipünaa natuma naya wayuukana (Mat. 25:31, 32; Apoc. 12:17).
12, 13. ¿Kasa eeka süpüla naaʼinrüin waneinnua wayuu neʼrapa sajaʼttinnüin Babilonia tü kojutukalü atumawaa? (Piirakaa sümüin tü ayaakuaakat).
12 Soʼunnaa tü kaʼi shiʼreetkat maʼin oʼu müliaa wayuu eeshiijaʼa eejeenale waneinnua wayuu soteenaka aaʼin kakaliainnain na aküjaliikana pütchi nüchiki Jehová naapirüin na wayuukana süchiki sajaʼttinnüinjatüin Babilonia tü kojutukalü atumawaa. Neʼrapa tia, ¿eejeenache na anoujakana nünain Jehová? (Apoc. 17:5; Ezeq. 33:33).
13 Jülüjataa waaʼin tü alatakat soʼu nükalioʼu Moisés. Noʼunapa na israelitakana Egiptojee watta naalii na wayuu nnojoliikana israelitain oʼunakana namaa. Eeshiijaʼa nanoujale nünain Jehová waneinnua wayuu neʼrapa shikeraajüin tü nümakat Moisés süchiki tü kasa alatüinjatkat namüin na wayuu chajanakana Egipto (Éx. 12:38). Mülejeʼeya nakuwaʼipa waneinnua wayuu sajaʼttinnapeena Babilonia tü kojutukalü atumawaa, ¿mojushiijeetche wamüin nanoujale waneinnua wayuu nünain Jehová süpülapünaa sajaʼttinnüin tü kasa eekai mojuin? Nnojoleerü mojushiin wamüin, müinjatü wakuwaʼipa maʼaka nukuwaʼipa chi Washi iipünaajachikai, «amüliajüi nia, anamia maʼin nia, nnojoishi aashichijaamaatüin, miyoʼu maʼin saalin wayuu nüpüla otta nüküjain tü shiimainkat waneepia» (Éx. 34:6). b
Neʼrapa waneinnua wayuu sajaʼttinnüin Babilonia tü kojutukalü atumawaa, soteerü naaʼin kakaliainnain na aküjaliikana pütchi nüchiki Jehová naapirüin na wayuukana süchiki tia. (Paashajeʼera tü pütchikat 12, 13). d
14, 15. ¿Kasa nnojotka jülüjain naaʼin Jehová süpüla katüinjatüin noʼu wanee wayuu süpüla kaʼikat süpüshuaʼa? (Salmo 33:4, 5).
14 «Eeshijaʼa nüsoʼiraajeechire aaʼin chi tapüshikai nutuma Jehová süchikijee outaa, jama outatüjülin nia süpülapünaa süntüin tü kaʼi shiʼrüinjatkat maʼin oʼu wayuu müliaa», eeshijaʼa nümüle wanee wayuu nüchiki wanee nüpüshi manoujainkai nünain Maleiwa. Nüsoʼirapeena Jehová naaʼin wanee wayuu süchikijee outaa nnojoleerü jülüjain naaʼin nünaajaale chia wayuukai jekenainka jee kakaliaichire nia. Watüjaapejeʼe saaʼu lotuin sukuwaʼipa süpüshuaʼa tü kasa naaʼinrakat (paashajeʼera Salmo 33:4, 5; Gén. 18:25).
15 Jaʼitashi jalain kepiain wanee wayuu eesü süpüla katüin noʼu nutuma Jehová süpüla kaʼikat süpüshuaʼa. Nnojorüle süküjünüin pütchi nümüin wanee wayuu kepiakai suluʼu wanee mma, nnojoleerü jülüjain naaʼin Jehová müin nukuwaʼipa chia wayuukai maʼaka saaʼin sukuwaʼipa kaaʼula (Mat. 25:46). Kojutushi chia wayuukai wamüin maʼaka kojutuin nia nümüin Jehová. Nnojotsü watüjaain saaʼu süpüshuaʼa tü naaʼinrajatkat Jehová soʼunnaa tü kaʼi shiʼrüinjatkat maʼin oʼu wayuu müliaa. Eesüjaʼa sunoujale wayuu nünain Jehová shiʼrapa tü alatüinjatkat soʼu tia kaʼikat jee kojutupa nia atumawaa (Ezeq. 38:16).
¿Eejeenache na anoujakana nünain Jehová soʼunnaa tü kaʼi shiʼreetkat maʼin oʼu wayuu müliaa?
16. ¿Kasa watüjaka nüchiki Jehová? (Piirakaa sümüin tü ayaakuaakat).
16 Sükajee tü sümakat tü Bibliakat watüjaa aaʼulu nnojoluin nücheküin Jehová outuin wayuu. «Naapüinjeseʼe nikii chi waneeshikai Nüchon süpüla nnojoliinjanain amüloulin na wayuu anoujakana nünain» (Juan 3:16). Wainma kasa naaʼinraka Jehová wapüleerua wayaawataka akajee alin waya nüpüla (Is. 49:15). Niʼraajüin wakuwaʼipa waneʼewai wakua. Jamüshiijaʼa outule waya eesü süpüla nüsoʼireʼerüin waaʼin maʼaka tü wakuwaʼipapuʼukat paala (Mat. 10:29-31). Sünainjee tü wekirajaaitpakalü anain watüjaa aaʼulu aneerüin tü naaʼinrakat Jehová süsalapa naainjala na wayuukana nutuma, jama kekiin nia, lotuin nukuwaʼipa jee nümüliajülin (Sant. 2:13).
Watüjaa aaʼulu aneerüin tü naaʼinrakat Jehová süsalapa saainjala wayuu nutuma süka kekiin nia, lotuin nukuwaʼipa jee nümüliajülin. (Paashajeʼera tü pütchikat 16).
17. ¿Kasa wekirajaainjatka anain sünain tü wane ekirajaayakat?
17 Süka süpansaajünüin wamüin waneirua pütchi wayaawata aaʼu choʼujaain maʼin waaʼinmaainjatüin tü aküjaakat pütchi. ¿Jamüsü waaʼinrajatkaʼa tia? ¿Kasa waaʼinrajatka süpüla ayatüin waküjain pütchi? Wekirajaajeerü anain tia sünain tü wane ekirajaayakat.
JAYEECHI 76 ¿Aashin talatüin paaʼin?
a Pütüjeere sooʼomüin paashajeʼera tü pütchikat «Mapüleesat sukuwaʼipa nikirajia Jehová», ojuʼitaka suluʼu Aapiria Wayuu maatsoʼu 1 soʼu 2015 süpana 8-12.
b Sajaʼttinnapa Babilonia tü kojutukalü atumawaa ashuteechi Gog chi chejeʼewaikai Magog naaʼu na aʼyataashiikana nümüin Jehová. Soʼu tia atüjaaneerü aaʼu waneepiale naya nümaa Maleiwa. Nunoujale wanee wayuu süchikijee sajaʼttinnüin Babilonia tü kojutukalü atumawaa, ooʼulaküneeriaʼaya naaʼin.
c SÜCHIKI TÜ AYAAKUAAKAT: Apünüinsü ayaakuaa eere weʼrüin jamüin iseetka wachiki waküjain pütchi sümüin wayuu süpüshuaʼa. (1) Weʼrüin wanee wayuu kepiaka suluʼu wanee mma eere palitchoin na wayuu anoujakana nünain Jesucristo. (2) Weʼrüin wanee wayuu sümaa nuʼwayuuse kepiaka suluʼu wanee mma eere süpülajünüin noulia naküjain pütchi. Eeshii süpüla jamajüin naya atumawaa nekirajüle wayuu. (3) Weʼrüin wanee wayuu kepiakai wünaʼapü eere isain wachiki waküjain pütchi nümüin.
d SÜCHIKI TÜ AYAAKUAAKAT: Weʼrüin wanee wayuu ooʼulaaka suulia anoujaa. Jülüjasü saaʼin tü sümakat tü Bibliakat süchiki tü alatüinjatkat sümüin Babilonia tü kojutukalü atumawaa. Sutuma jülüjain saaʼin tia, anoujasü süchikuaʼa nünain Jehová otta antüsü nepialuʼumüin na wayuu kachooinkana shia. Sülatülejeʼeya tia, wamüliaja naaʼin na ayaawajaakana suulia naainjala jee talata waaʼin namaa maʼaka saaʼin nutuma chi Washi iipünaajachikai.
