1. ¿Mbaʼérepa ikatu jaʼe jaikoha peteĩ tiémpo ijojahaʼỹvape?

 KOʼÁG̃A ningo jaiko peteĩ tiémpo ijojahaʼỹvape. Káda día jahecha mbaʼéichapa oñekumpli umi profesía oĩva la Bíbliape. Por ehémplo jahecha mbaʼéichapa “pe rréi del sur ha pe rréi del nórte” oñorairõ odominaségui ko múndo (Dan. 11:40). Avei umi notísia porã oñeʼẽva Ñandejára Rréinore ojepredika oparupiete ko múndo tuichakuére, ha hetaiterei persóna oñepyrũ oservi Jehovápe (Is. 60:22; Mat. 24:14). Avei jarresivi “hiʼoraitépe” hetaiterei mbaʼe ñamombarete hag̃ua ñande jerovia (Mat. 24:​45-47).

2. ¿Mbaʼéguipa ikatu ñaime segúro, péro mbaʼépa ñarrekonose vaʼerã?

² Jehová osegi ñanepytyvõ ñantende porãve hag̃ua umi mbaʼe iñimportánteva oikótava koʼẽrõite (Prov. 4:18; Dan. 2:28). Ág̃a oñepyrũ vove pe jehasa asy guasu, ¿mbaʼéguipa ikatu ñaime segúro? Ndajadudái jaikuaataha entéro mbaʼe ñaikotevẽva ñaaguanta hag̃ua fiélmente ha jasegi hag̃ua ñaime en unida upe tiémpo ijetuʼuetétavape. Upéicharõ jepe, ñarrekonose vaʼerã umi mbaʼe oikótava apytégui oĩha umi mbaʼe ndajaikuaáiva. Ko artíkulope jahecháta mbaʼérepa tekotevẽ kuri ñakambiaʼimi la jagueroviáva. Upéi jahecháta unos kuánto mbaʼe si jaikuaáva umi mbaʼe oikótavagui koʼẽrõite ha mbaʼépa ñande Ru yvagapegua ojapóta.

¿MBAʼÉPA NDAJAIKUAÁI?

3. ¿Mbaʼépa jaguerovia vaʼekue ha mbaʼérepa?

³ Yma jaguerovia vaʼekue pe jehasa asy guasu oñepyrũvo, la hénte ndorekomoʼãveimaha la oportunida oñemoĩvo Jehová ykére ha ohasa pe Armagedón. ¿Mbaʼérepa jaguerovia vaʼekue upéva? Pórke ñapensa vaʼekue la oikóva guive pe  dilúvio tiémpope orrepresentaha álgo oikótava koʼẽrõitéma. Por ehémplo Jehová omboty rire pe árka rokẽ, avavéma ndaikatuvéi vaʼekue oike upépe. Ñapensa kuri upéva heʼiseha avave ndaikatumoʼãveimaha ojerovia Jehováre ha ojesalva pe jehasa asy guasu oñepyrũ rire (Mat. 24:​37-39).

4. ¿Mbaʼérepa ndajagueroviavéima oñekumpli jeytaha koʼág̃arupi entéro mbaʼe oiko vaʼekue Noé tiémpope?

⁴ ¿Oĩ porã piko jaʼe káda kósa oiko vaʼekue pe dilúvio tiémpope heʼiseha álgo oñekumplítava upe rire? Nahániri. ¿Mbaʼérepa? Pórke la Biblia ndeʼíri upéva. a Jaikuaa ningo Jesús oñeʼẽrõ guare pe tiémpo haʼe oñepyrũha guive ogoverna okompara hague Noé tiémpore. Péro haʼe ndeʼíri vaʼekue entéro mbaʼe oiko vaʼekue Noé tiémpope orrepresentaha álgo oñekumplítava amo gotyove, por ehémplo Jehová omboty hague pe árka rokẽ. Péro upéva ndeʼiséi ndaikatumoʼãiha ñaaprende mbaʼeve pe rreláto oñeʼẽvagui Noére ha pe dilúviore.

5. a) ¿Mbaʼépa ojapo vaʼekue Noé ou mboyve pe dilúvio? (Hebreos 11:7; 1 Pedro 3:20). b) Ñañeʼẽvo pe predikasiónre, ¿mbaʼérepa ikatu jaʼe ñane situasión ojoguaha Noé tiémpope?

⁵ Jehová oavisárõ guare Noépe la oikótava, haʼe ohechauka ojeroviaha hese omopuʼãvo pe árka (elee Hebreos 11:7; 1 Pedro 3:20). Upéicha avei la hénte ohendúvo umi notísia porã oñeʼẽva Ñandejára Rréinore, ohechauka vaʼerã umi mbaʼe ojapóva rupive ojeroviaha Jehováre (Hech.  3:​17-20). Apóstol Pedro heʼi vaʼekue Noére ‘opredika hague umi mbaʼe ihústova’ (2 Ped. 2:5). Péro jahecháma haguéicha pe artíkulo ohasa vaʼekuépe, ndajaikuaái Noépa ikatu raʼe opredika entéro persóna oikóvape ko yvy ape ári pe dilúvio mboyve. Koʼág̃arupi ñande ñañehaʼãmbaite japredika kyreʼỹme entéro umi persóna oĩvape ko yvy ape ári, péro ñañehaʼãmbaitéramo jepe, ndaikatumoʼãi japredika káda uno oikóva ko yvy ape ári ou mboyve pe fin. ¿Mbaʼérepa?

6, 7. Emombeʼu mbaʼérepa ndaikatumoʼãi japredika enteroite héntepe ou mboyve pe fin.

⁶ Ñapensamína la Jesús heʼi vaʼekuére ñane predikasiónre. Haʼe oprofetisa vaʼekue umi notísia porã ‘oñemombeʼutaha oparupiete ko yvy ape ári ha upe mensáhe ojekuaataha entéro tetãrupi’ (Mat. 24:14). Ko profesía ningo núnka noñekumplíri vaʼekue la koʼág̃a oñekumpliháicha. Ko tiémpope jaikuaauka upe mensáhe oñeʼẽva Ñandejára Rréinore mas de 1.000 idiómape. Ha jareko rupi Internétpe ñande sítio jw.org hetaiterei hénte ikatu oikuaa umi notísia porã.

⁷ Péro jareko vaʼerã avei enkuénta Jesús heʼi hague idisipulokuérape ‘ndaikatumoʼãiha voínte opredika hikuái kompletoite umi siuda oĩvape’ (Mat. 10:23; 25:​31-33). Upéicharõ ndaikatumoʼãi japredika enterovépe Jesús ou jey mboyve. La haʼe heʼi vaʼekue oñekumpli hína koʼág̃a. Por ehémplo hetaiterei hénte ningo oiko umi lugár ojeproivihápe ñandehegui japredika. Avei káda día oĩ hetaiterei mitã onaséva. Entónse ñañehaʼãmbaitéramo jepe japredika ‘entéro tetã, trívu ha umi oñeʼẽvape diferénte idióma’, ndaikatumoʼãi voínte japredika entéro persóna oikóvape ko yvy ape ári ou mboyve pe fin (Apoc. 14:6).

8. ¿Mbaʼépa ikatu hína jaikuaase? (Ehecha pe taʼanga).

⁸ Péro ikatu ñañeporandu: “Oñepyrũ vove pe jehasa asy guasu, ¿mbaʼépa upéicharõ ojehúta umi hénte ndojepredikái vaʼekuépe? ¿Mbaʼéichapa ohusgáta chupekuéra Jehová ha Itaʼýra, onkarga vaʼekuépe ojapo hag̃ua upéva?” (Juan 5:​19, 22, 27; Hech. 17:31). Pe téxto omopyendáva ko artíkulo heʼi voi Jehová ‘ndoipotaiha avave oñehundi, síno oipota enterove oñarrepenti’ (2 Ped. 3:9; 1 Tim. 2:4). Ñande ningo jaikuaa Jehová peichaha. Péro ñarrekonose vaʼerã haʼe neʼĩraha heʼi ñandéve mbaʼéichapa ohusgáta umi hénte ndorekói vaʼekuépe la oportunida ohendu hag̃ua umi notísia porã. Ha legálmente haʼe ndorekói la ovligasión omombeʼupávo ñandéve mbaʼépa ojapo vaʼekue ni mbaʼépa ojapóta.

9. ¿Mbaʼépa Jehová oikuaauka ñandéve Iñeʼẽ rupive?

⁹ Iñeʼẽ rupive ningo oĩ algúna kósa Jehová omombeʼúva ñandéve ojapotaha. Por ehémplo la Biblia heʼi Jehová omoingove jeytaha umi “iñinhústovape”. Umíva hína umi hénte ndorekói vaʼekue la oportunida ohendúvo umi notísia porã ha okambia la oiko lája (Hech. 24:15; Luc. 23:​42, 43). Péro koʼág̃a ikatu oime ñañeporandu ótra kósa.

10. ¿Mbaʼe ótra kósapa ikatu ñañeporandu?

¹⁰ Enterove umi omanóva pe jehasa asy guasu aja, ¿oñehundítapa pára siémpre ha ndorekomoʼãvéima esperánsa orresusitávo? La Biblia heʼi ndorresusitamoʼãiha umi oñemoĩva Jehová kóntrape ha haʼe voi ohundítava pe Armagedónpe (2 Tes. 1:​6-10). Péro ñamoĩ chupe pe jehasa asy guasu aja oĩha omanóva hasykatu, oñaksidenta térã oĩ rupi ojukáva chupe, ¿mbaʼépa oikóta chuguikuéra? (Ecl. 9:11; Zac. 14:13). ¿Ikatúpa jaʼe koʼãva  oĩtaha umi ‘iñinhústova’ apytépe oikove jeýtava pe múndo pyahúpe? Legálmente ñande ndajaikuaái upéva.

¿MBAʼÉPA SI JAIKUAA?

11. ¿Mbaʼépa ojerekóta enkuénta ojehusga hag̃ua umi héntepe Armagedónpe?

¹¹ Oĩ ningo unas kuánta kósa ñande si jaikuaáva oikotaha. Por ehémplo jaikuaa Armagedónpe ojehusgataha umi héntepe asegún mbaʼéichapa otrata raʼe Jesús ermanokuérape (Mat. 25:40). ¿Mávarepa ojeʼéta ojoguaha ovechápe? Umi oapoja vaʼekue umi unhído ha Crístope. Jaikuaa avei unos kuánto Cristo ermanokuéra oĩtaha gueteri ko yvy ape ári pe jehasa asy guasu oñepyrũ rire. Haʼekuéra ohopáta yvágape oñepyrũ mboyvemíntema Armagedón. Cristo ermanokuéra oĩ aja gueteri ko yvy ape ári, posívlemente umi hénte isinsérova oguerekóta oportunida oapojávo chupekuéra, ha oipytyvõvo pe traváho ojapóvape hikuái (Mat. 25:​31, 32; Apoc. 12:17). ¿Mbaʼérepa ikatu jaʼe koʼã mbaʼe iñimportanteha?

12, 13. ¿Mbaʼépa ikatu oĩ odesidíva ojapo oñehundi rire Babilonia Guasu? (Ehecha pe taʼanga).

¹² Oñepyrũ rire pe jehasa asy guasu oĩta umi ohecháva oñehundiha “Babilonia Guasu”. Upéva oiko vove ikatu oĩ hína imanduʼáva testígo de Jehová are guivéma heʼi hague oikotaha upéva. ¿Oĩtapa umíva apytégui okambiáva ha oñepyrũva ojerovia Jehováre? (Apoc. 17:5; Ezeq. 33:33).

¹³ Oikóramo upéva ojoguáta la oiko vaʼekuépe Moisés tiémpope Egíptope. Upérõ “heta extranhéro” oho vaʼekue umi israelítandi osẽrõ guare Egíptogui. Koʼãva apytégui ikatu oĩ umi oñepyrũ vaʼekue ojerovia Jehováre ohecha rire oñekumpli hague umi diez plága Moisés heʼi vaʼekue oikotaha (Éx. 12:38). Ñamoĩ chupe oikoha avei upéicha Babilonia Guasu oñehundi riremi, ¿ñandepochýtapa oĩ haguére umi ñanemoirũva pe fin ou mboyvemínte? ¡Ni mbaʼevéicharõ! Ñande jajoguase ñande Ru yvagapeguápe, pórke haʼe “peteĩ Dios oporoporiahuverekóva ha oporombyasýva, ndaipochyreíriva,  oporohayhuetereíva ha nopyrũiva iñeʼẽre” (Éx. 34:6). b

14, 15. Peteĩ persóna oreko hag̃ua la oportunida oikovévo pára siémpre, ¿odependépa mbaʼe tiémpopepa haʼe omano térã moõpa haʼe oiko? Emyesakã. (Salmo 33:​4, 5).

¹⁴ Sapyʼánte oĩ umi ermáno imanduʼáva ihentekuéra ndahaʼéivare Testígo ha heʼíva: “Ikuentave vaʼerã ningo omanóramo pe jehasa asy guasu oñepyrũ mboyve. Upéicharõ orekóta la esperánsa oikove jeývo ág̃a”. Ñapensa porãrõ, imbaʼeporãguinte heʼi hikuái upéicha. Péro peteĩ persóna oreko hag̃ua la oportunida oikovévo pára siémpre, nodependéi mbaʼe tiémpopepa omano. Ani avei ñanderesarái Jehová haʼeha pe Hués ijojahaʼỹva, haʼe ningo ihústo ha núnka ndodesidimoʼãi peteĩ mbaʼe noĩporãiva (elee Salmo 33:​4, 5). Ikatu jajerovia “pe Hués ohusgáva ko yvy kompletoite” katuete ojapotaha iporãva (Gén. 18:25).

¹⁵ Ikatu avei jaʼe peteĩ persóna oreko hag̃ua la oportunida oikove hag̃ua pára siémpre nodependeiha moõpa haʼe oiko. Jehová ningo núnka ndeʼimoʼãi hetaiterei héntere ojoguaha ‘kavarápe’ oiko haguérente peteĩ lugár ndaikatuihápe ojepredika chupekuéra (Mat. 25:46). Ñande jepe ñambyasýramo koʼã héntepe, koʼytevéntema pe Hués ijojahaʼỹva ojapóta upéva. Ndajaikuaái ningo entéro mbaʼe Jehová ojapótava pe jehasa asy guasu aja, ¿péro mbaʼépa ikatu oiko ág̃a Jehová oñesantifika vove enterove renondépe? Ikatu hína oĩ umi hénte apytégui orekóva la oportunida oikuaávo  Jehovápe ha ojerovia hese (Ezeq. 38:16).

16. ¿Mbaʼépa jaikuaa Jehovágui jastudia rupi la Biblia? (Ehecha pe taʼanga).

¹⁶ Jastudia rupi la Biblia jaikuaa Jehová ovaloraha entéro persóna rekove. Haʼe omeʼẽ vaʼekue Itaʼýra ñanderehehápe ikatu hag̃uáicha jareko la oportunida jaikovévo pára siémpre (Juan 3:16). Katuete ningo enterove jahechakuaáma mbaʼeichaitépa Jehová ñandetrata mborayhúpe (Is. 49:15). Haʼe ñandekuaa porãiterei káda únope, oikuaa ñande réra ha opa mbaʼe jahasa vaʼekue. Upévare ñamanóramo haʼe ikatu ñanemoingove jey peichaite ha omeʼẽ ñandéve umi rrekuérdo jarekóva (Mat. 10:​29-31). Ani jaduda ñande Ru yvagapegua ohusgataha hekoitépe, pórke haʼe iñarandu, ihústo ha oporoporiahuvereko (Sant. 2:13).

17. ¿Mbaʼépa jahecháta pe artíkulo oúvape?

¹⁷ Ñantende porãve rire ko téma, jahechakuaa koʼág̃a iñimportanteventemaha japredika japerdeʼỹre tiémpo. ¿Mbaʼérepa jaʼe upéva? ¿Ha mbaʼépa ñanemomýi vaʼerã jasegi hag̃ua japredika kyreʼỹme? Pe artíkulo oúvape ñakontestáta upéva.