ZASEŊƆ 19
YUUNƐ 22 The Kingdom Is in Place—Let It Come! (Naayinɛ Na’am La Pɔsɛ Bisega, Bu Wan Wa’an Kalam!)
Yehowa Wan Ta Gãkɛ Nɛreba La Wani Beere Sa’am?
‘Yehowa ka boti nɛreba nyɛ sa’aŋɔ.’—2 PE. 3:9.
YELEKPINE
To wan ta’an tara puti’irɛ ti Yehowa san ta gãkera nɛreba beere sa’am, a wan tum sɛla n de tontɔɔ.
1. Beni n sɔi ti to wan ta’an yeti to nyɛti la yelesoma ba’asegɔ dabesa wa poan?
TO KƆ’ƆN nyɛta la yelesoma ba’asegɔ dabesa wa poan! Dabeserɛ woo, Baabule yetɔɣebiŋ’a kɔ’ɔn tuna la tuuma. Makerɛ, ‘saazuo bɔba naba la,’ la ‘tiŋanɔɔrɛ bɔba naba la’ kɔ’ɔn zabera mɛ ti ba nyɛ kpe’eŋo. (Da. 11:40.) To kɔ’ɔn mɔɔla la Naayinɛ Na’am la yelesoma tingɔŋɔ wa poan ti nɛreba zo’e zo’e nyaa dɛna podɔleba. (Isa. 60:22; Mt. 24:14) To me kɔ’ɔn nyɛta la vo’osum poan dia ‘sansɛka n nari.’—Mt. 24:45-47.
2. To wan ta’an tara suure lua la bem poan ge bem ti la nara ti to tɛ̃ra?
2 Yehowa kɔ’ɔn soŋera to mɛ ti to bɔkera yelese’a n wan ta eŋɛ beere sa’am la. (Mag. 4:18; Da. 2:28) To tari puti’irɛ ti Yehowa wan basɛ ti to baŋɛ sɛla woo ge ti mɛlesekãtɛ la nyaa pɔsɛ. Wana wa wan soŋɛ tɔ ti to ta’an ŋmibe ge me tara nɔyinɛ biɣi biɣi sankaŋa poan. Ge la nari ti to tɛ̃ra ti beere sa’am yɛla ase’a n boi ti to ka mina. Zaseŋɔ wa poan, to wan sɔsɛ sɛla n sɔi ti to malum demese to puti’irɛ yɛla ase’a poan. Leyɛ’ɛsa, to wan bisɛ beere sa’am yelese’a ti to mina la to saazuo Sɔ la n wan ta ita a yɛla se’em.
TON KA MI SƐLA
3. To gɔnɔ la yuun yeti bem la nɛresɛba n kan le nyɛ yɔ’ɔ tara sakerɛ Yehowa poan ta’an nyɛ faarɛ la ge beni n sɔi ti to yuun yele bala?
3 Yuunse’a n tole la to yuun yeti mɛlesekãtɛ la san ta pɔsɛ, nɛreba kan le nyɛ yɔ’ɔ tara sakerɛ Yehowa poan nyɛ faarɛ Armagedon poan. Sɛla n sɔi ti to yuun yele bala dela, to yuun ti’isɛ ti yelese’a n yuun eŋɛ Noah Kokemɔ saŋa la dela yetɔɣebiŋere n tɔɣeri sɛla n wan ta eŋɛ beere sa’am. Makerɛ, to yuun yeti wuu Yehowa n yuun yu ɔɔreŋɔ la ti nɛreba yuun ka ta’an le kɛ̃ bim se’em la, bala mea nɔɔ ti mɛlesekãtɛ la san pɔsɛ, Yehowa ‘kan le bo nɛreba yɔ’ɔ’ ti ba ta’an tara sakerɛ a poan nyɛ faarɛ.—Mt. 24:37-39.
4. Noah Kokemɔ saŋa la dela yetɔɣebiŋere n pa’alɛ sɛla n wan ta eŋɛ beere sa’am yoi? Tɔɣɛ pa’alɛ.
4 To wan ta’an yeti sɛla n yuun eŋɛ Noah Kokemɔ saŋa la dela yetɔɣebiŋere n pa’alɛ sɛla n wan ta eŋɛ beere sa’am? Lebesego la dela aayi. Beni n sɔi? Se’ere n sɔi la Baabule la ka yele bala. a La boi bim ti, Yezu yuun dekɛ a debeserɛ la makɛ mɛ la ‘Noah dabesa la’ ge a yuun ka yeti sɛla n yuun eŋɛ Noah dabesa la dela yetɔɣebiŋere n pa’alɛ sɛla n wan ta eŋɛ beere sa’am. Bala mea nɔɔ ti Yehowa n yuun yu daka la daɣena yetɔɣebiŋere n pa’alɛ sɛla n wan ta eŋɛ beere sa’am. Ge yele ana wa za’a ka pa’alɛ ti to kan ta’an zamesɛ sɛla Noah Kokemɔ saŋa la poan.
5. (a) Noah yuun eŋɛ la bem ge ti Kokemɔ la nyaa wa’ana? (Hebru 11:7; 1 Peter 3:20) (b) Noah dabesa la, la tomam zina beere wa na’am mɔɔlegɔ tuuma la makɛ taaba la wani?
5 Yehowa n yuun yele Noah ti a wan sa’am tiŋa la, Noah yuun kpa la ɔɔreŋɔ ti la pa’alɛ ti a tari sakerɛ. (Kaalɛ Hebru 11:7; 1 Peter 3:20.) Bala mea nɔɔ ti sɛba ti to ni mɔɔlɛ Naayinɛ Na’am yelesoma la bo ba la nara ti ba dekɛ ban wum sɛla la tum tuuma. (Tm. 3:17-20) Peter yuun yeti, ‘Noah dela se’em n yuun mɔɔli yelemɛŋɛrɛ yɛla.’ (2 Pe. 2:5) Ge wuu ton puɣum zamesɛ sɛla zaseŋɔ seko n tole la poan la, to ka mi nyaa Noah yuun laɣesɛ a deodoma mɛ ti ba mɔɔlɛ bo nɛreba tingole wa za’a poan ge ti Kokemɔ la nyaa wa’ana. Zina beere wa, to me kɔ’ɔn tiregera mɛ ti to mɔɔlɛ yelesoma la bo nɛra woo. La me dela to kɔ’ɔn tuulegera tuunɛ wa poan. Ge to san puɣum tiregɛ la se’em me, to kan ta’an mɔɔlɛ bo nɛra woo tingole wa za’a poan ge ti ba’asegɔ la nyaa wa’ana. Beni n sɔi?
6-7. Beni n sɔi ti to wan ta’an yeti to kan nyaŋɛ mɔɔlɛ yelesoma la bo nɛra woo tingole wa za’a poan ge ti ba’asegɔ la nyaa wa’ana? Tɔɣɛ pa’alɛ.
6 Ti’isɛ bisɛ Yezu n yuun pa’alɛ tomam na’am mɔɔlegɔ tuuma la n wan yalegɛ se’em. A yuun yeti, ba wan mɔɔlɛ na’am yelesoma la tinparɛ wa za’a poan ti ‘la di sɛɛra bo tisi la za’a.’ (Mt. 24:14) Yetɔɣebiŋere wa kɔ’ɔn tuna la tuuma zina beere wa ti la ka tara makerɛ. To kɔ’ɔn mɔɔla na’am yelesoma wa la yetɔɣum n gaŋɛ 1,000 poan. To jw.org intanɛt tuuma zɛ’an la me kɔ’ɔn basɛ ti nɛreba zo’e zo’e n wuna yelesoma la tingole wa za’a poan.
7 Yezu yuun le yele a podɔleba la ti, ba ‘kan nyaŋɛ doose tisi la za’a’ bii ba nyaŋɛ mɔɔlɛ bo nɛra woo ge ti a nyaa wa’ana. (Mt. 10:23; 25:31-33) Yezu n yuun yele sɛla la wan tum tuuma tomam dabesa wa poan. Nɛreba tusa tusa boi la tinse’esi poan ti ba gu to tuuma la. Leyɛ’ɛsa, nɛreba kɔ’ɔn dɔɣera mɛ saŋa woo. To kɔ’ɔn tiregera mɛ ti to mɔɔlɛ yelesoma la bo nɛreba ‘tisi woo, buuri woo la yetɔɣum woo’ poan. (Lil. 14:6) Ge yelemɛŋɛrɛ la dela to kan nyaŋɛ mɔɔlɛ yelesoma la bo nɛra woo ge ti ba’asegɔ la nyaa wa’ana.
8. Ge to san ti’isa Yehowa n wan ta gãkɛ nɛreba se’em beere sa’am la, bem sokere ti to nyaa ni sɔkera? (Bisɛ foote la.)
8 Ge sokere la dela, bem n wan paɛ nɛresɛba n ka nyɛ yɔ’ɔ wum yelesoma la ge ti mɛlesekãtɛ la nyaa pɔsɛ la? Yehowa la a Dayɔa la ti a amea loe ti a gãkera la, wan gãkɛ nɛrebana wa la wani? (Yon 5:19, 22, 27; Tm. 17:31) Zaseŋɔ wa zuo gulesegɔ la yeti, Yehowa ‘ka boti nɛreba nyɛ sa’aŋɔ’ ge a tuɣum ‘bɔta la nɛra woo eŋɛ teere.’ (2 Pe. 3:9; 1 Tim. 2:4) La boi bim ti gulesegɔ la yele la bala ge la nari ti to tɛ̃ra ti Yehowa nan ka yele to eŋa n wan gãkɛ nɛresɛba n yuun ka wum yelesoma la se’em. Yelemɛŋɛrɛ la dela, la daɣɛ pɛregerɛ ti Yehowa pa’alɛ tɔ eŋa n eŋɛ sɛla bii eŋa n wan ta eŋɛ sɛla.
Yehowa wan ta gãkɛ sɛba n yuun ka wum yelesoma la ge ti mɛlesekãtɛ la pɔsɛ la, la wani? (Bisɛ kaalegɔ zɛ’an 8) c
9. Yehowa pa’alɛ to la bem ti la bɔna Baabule la poan?
9 Baabule la poan, Yehowa pa’alɛ to yɛla ase’a ti a wan ta eŋɛ. Makerɛ, Baabule la yeti Yehowa wan ta isige nɛresɛba ‘n daɣɛ tontɔɔdoma’ la. Nɛrebana wa yuun ka nyɛ yɔ’ɔ wum yelesoma la ta’an tee. (Tm. 24:15; Lu. 23:42, 43) Wana wa basɛ ti sokere ase’a n le bɔna.
10. Soke ani n le bɔna?
10 Nɛresɛba n ki mɛlesekãtɛ la poan la kan le isige kum poan yoi? Gulesegɔ la basɛ ti la niɛ peelumi ti, sɛba n wan giisɛ Yehowa Armagedon poan ti Yehowa wan ta sa’am ba la kan isige. (2 Tes. 1:6-10) Ge nɛreba basɛba la me? Makerɛ, nɛresɛba ti yeledi’ire paɛ ba, bii ba lui mɛ ki, bii ba tadaandoma n ku ba la me? (Pa.9:11; Zek. 14:13) Daanse’ere ba wan isige nɛrebana wa ti ba pa’asɛ nɛresɛba ‘n daɣɛ tontɔɔdoma’ la poan? To ka mi.
TON MI SƐLA
11. Naayinɛ wan bisɛ la bem gãkɛ nɛreba Armagedon poan?
11 To mi ti yɛla zo’e zo’e wan ta eŋɛ beere sa’am. Makerɛ, to mi ti Armagedon poan Naayinɛ wan ta gãkɛ nɛreba doose la ban iti looredoma la se’em. (Mt. 25:40) Sɛba ti ba wan ta gãkɛ ba ti piisi la puɣum eŋɛ pa’alɛ ti ba soŋeri la Krista la looredoma la. To me mi ti looredoma la basɛba wan kelum bɔna tiŋa wa zuo mɛlesekãtɛ la san pɔsɛ. Ba me kan keŋɛ san daɣena la Armagedon n pɔ̃ri. Looredoma la basɛba san kelum bɔna tiŋa wa zuo, daanse’ere susonɛdoma la wan kelum nyɛ yɔ’ɔ ti ba soŋera ba ti ba tuna ba tuuma la. (Mt. 25:31, 32; Lil. 12:17) Beni n sɔi ti yele ana wa pakɛ?
12-13. Nɛreba basɛba san ta nyɛ ti ba sa’ani ‘Babilon Kãtɛ La’ ba wan eŋɛ la bem? (Bisɛ fɔɔra la.)
12 Hali mɛlesekãtɛ la poan, sɛba n nyɛ ti ba sa’ani ‘Babilon Kãtɛ La’ se’em la wan tiɛ ti Yehowa Sɛɛradoma puɣum tɔɣɛ yele ana wa mɛ. Daanse’ere sɛba n nyɛ yele ana wa la wan tara sakerɛ Naayinɛ poan?—Lil. 17:5; Eze. 33:33.
13 La san ta dɛna bala la wan ana wuu sɛla n yuun eŋɛ Egypt, Moses saŋa la. Tɛ̃ra ti nɛresɛba n yuun ‘daɣɛ Israel buuri’ n yuun doose Israel nɛreba la yese Egypt tiŋa. Daanse’ere nɛrebana wa n yuun nyɛ Too Pia la ti Moses tɔɣɛ de yele la n yuun basɛ ti ba sakɛ bo Naayinɛ. (Yɛh. 12:38) Sɛla n yuun eŋɛ Moses saŋa la san ta ita se’em ma’a ti ba sa’ana Babilon Kãtɛ La, to suure wan sa’am la nɛreba n nyaa naɛ la tɔ ge ti Armagedon pɔsɛ la? Aayi. To boti la to tɔɣesa to saazuo Sɔ la n ‘tari nimbɔzore la giile ti a sunsɔa ka isigera kalam kalam ge tara yelemɛŋɛrɛ nɔŋerɛ la yelemɛŋɛrɛ tuuma’ la. b—Yɛh. 34:6.
Sɛba n nyɛ ti ba sa’ani ‘Babilon Kãtɛ La’ se’em la wan tiɛ ti Yehowa Sɛɛradoma puɣum tɔɣɛ yele ana wa mɛ (Bisɛ kaalegɔ zɛ’ɛsi 12-13) d
14-15. Nɛra n ki sansɛka bii n kɛ̃’ɛri zɛ’an n wan ta pa’alɛ Yehowa n wan gãkɛ en se’em beere sa’am? Tɔɣɛ pa’alɛ. (Yooma 33:4, 5)
14 Saŋa ase’a to ni wum ti nɛreba yeti, ‘La wan ana soŋa ti mam yire nɛreba ki ge ti mɛlesekãtɛ la nyaa pɔsɛ, lan wan eŋɛ se’em ti ba ta’an isige ba.’ Ba tari buurɔ la ba yele bala. Ge nɛra n wan ki sansɛka kan pa’alɛ Naayinɛ n wan gãkɛ en se’em beere sa’am. Yehowa n de Gakerɛ za’adaana n ni kɔ’ɛ a puti’irɛ se’em la n de tontɔɔ. (Kaalɛ Yooma 33:4, 5.) To tari suure lua ti ‘tiŋa wa za’a Gakerɛdaana la’ wan tum sɛla n de tontɔɔ.—Pin. 18:25.
15 Yɛm boi bim ti to yeti, nɛra n kɛ̃’ɛri zɛ’an la kan pa’alɛ Naayinɛ n wan ta gãkɛ en se’em beere sa’am. Nɛreba tusa tusa n kɛ̃’ɛri tinse’esi poan ti ba ka nyɛ yɔ’ɔ wum Na’am yelesoma la, kan basɛ ti Yehowa gãkɛ ba ti ba dela ‘buusi.’ (Mt. 25:46) Tiŋa wa za’a Gãkerɛdaana la fabeli nɛrebana wa yele mɛ hali gana tomam. To ka mi Yehowa n wan ta ita a yɛla se’em mɛlesekãtɛ la poan. Daanse’ere yelese’a n wan ta ita mɛlesekãtɛ la poan la wan basɛ ti nɛreba wa basɛba ta nyɛ yɔ’ɔ ti ba zamesɛ Yehowa yɛla tara sakerɛ a poan, a san ta basɛ ti nɛra woo baŋɛ eŋa n de mina.—Eze. 38:16.
Hali mɛlesekãtɛ la poan . . . , daanse’ere sɛba n nyɛ yele ana wa la wan tara sakerɛ Naayinɛ poan?
16. To zamesɛ baŋɛ Yehowa yele la wani? (Bisɛ foote la.)
16 To zamesɛ Baabule la poan baŋɛ nɛresaala vom n de tuulum se’em bo Yehowa. A yuun basɛ ti a Dayɔa n wa’ana ki bo to ti to ta’an ta vɔna daarewoo. (Yon 3:16) To za’a baŋɛ Yehowa n tari to giile se’em. (Isa. 49:15) A mi tomam ayima ayima woo yu’ura. Eŋa n mi tomam soŋa soŋa la zuo, to san ki a wan ta’an le naam tɔ ti to ana wuu ton yuun puɣum ana se’em la ge tɛ̃ra yɛla! (Mt. 10:29-31) Bala la, to mi soŋa soŋa ti to saazuo Sɔ wa wan gãkɛ nɛra woo tontɔɔ sore poan. A wan tara nimbɔzore a san gãkera tɔ.—Yam. 2:13.
To mi soŋa soŋa ti Yehowa wan gãkɛ nɛra woo tontɔɔ sore poan ge me tara nimbɔzore a san gãkera tɔ (Bisɛ kaalegɔ zɛ’an 16)
17. To wan sɔsɛ la bem zaseŋɔ seko n taɣelɛ la poan?
17 Ton malum demese ton yuun bɔkɛ yɛla se’em la basɛ ti na’am mɔɔlegɔ tuuma la dɛna la atɔtɔ yele nananawa. Beni n sɔi ti to wan ta’an yele bala? Bem n wan soŋɛ tɔ ti to kɔ’ɔn tuulegera na’am mɔɔlegɔ tuuma la poan? To wan sɔsɛ soke ana wa zaseŋɔ seko n taɣelɛ la poan.
YUUNƐ 76 How Does It Make You Feel? (La Dela Pupeelum Yele)
a Ho san bɔta ti ho baŋɛ sɛla n sɔi ti to malum demese ton yuun bɔkɛ de se’em la, bisɛ zaseŋɔ yele la zuo n de “This Is the Way You Approved” (Naayinɛ N Sakɛ Bo Sɛla N Wana), n boi March 15, 2015 The Watchtower, gɔn. 7-11 poan.
b Ba san ta sa’am Babilon Kãtɛ La ti Gog n boi Magog me san ta isige giisa tɔ, Yehowa yamesi za’a wan ta eŋɛ pa’alɛ ban tari yelemɛŋɛrɛ se’em. Sɛba woo n wan ta naɛ la Naayinɛ nɛreba Babilon Kãtɛ sa’aŋɔ la pooren la me wan eŋɛ pa’alɛ ban tari yelemɛŋɛrɛ se’em.
c FƆƆRA LA VUURƐ: Fɔɔra atã n pa’alɛ sɛla n sɔi ti to kan ta’an mɔɔlɛ bo nɛra woo tingole wa za’a poan: (1) Pɔka n kɛ̃’ɛri tinsɛka poan ti ba ka bɔta Yehowa Sɛɛradoma yele, (2) nɛra la a pɔɣa n boi tiŋa kayima poan ti ba gu to tuuma la, la (3) buraa n kɛ̃’ɛri tinkpɛŋa poan ti nɛra kan ta’an paɛ bim.
d FOOTE LA VUURƐ: Pugela n yuun basɛ yelemɛŋɛrɛ la ge nyaa tiɛ ban wan ta sa’am ‘Babilon Kãtɛ La’ se’em. A nyaa lebe la Yehowa zɛ’an na ge naɛ la a dɔɣereba n de Sɛɛradoma bɔna. Yɛla san ta ana bala, to wan bɔta ti to tɔɣesa to saazuo Sɔ la n tari giile la nimbɔzore, ti to puurɛ la nɛreba n eŋɛ teere la.
