HOSỌ OPLỌN TỌN 19
OHÀN 22 Ahọluduta lọ Ko Bẹ—E Ni Wá!
Etẹwẹ Mí Yọnẹn Gando Whẹdida Jehovah Tọn He to Nukọn Ja lẹ Go?
“Jehovah . . . ma jlo dọ mẹdepope ni yin vivasudo.”—2 PITA 3:9.
NUHE E BẸHẸN
Mí gán kudeji dọ whẹdida Jehovah tọn he to nukọn ja lẹ na yin dodo bosọ sọgbe.
1. Naegbọn mí gán dọ dọ ojlẹ ayidego tọn lẹ mẹ wẹ mí to gbẹnọ te?
MÍ TO gbẹnọ to ojlẹ ayidego tọn lẹ mẹ! Egbesọegbesọ, dọdai Biblu tọn lẹ nọ to hẹndi mọ to nukun mítọn mẹ. Di apajlẹ, mí mọ bọ “ahọlu agewaji tọn” po “ahọlu hùwaji tọn” po to agbàwhlẹn nado paṣẹ do aihọn lọ ji. (Dan. 11:40, Odò.) Mí mọ bọ yẹwheho wẹndagbe Ahọluduta Jiwheyẹwhe tọn lọ tọn to yinyin didọ hugan gbede pọ́n, bọ gbẹtọ livi susu lẹ sọ to alọkẹyi i. (Isa. 60:22; Mat. 24:14) Podọ, mí nọ mọ núdùdù gbigbọmẹ tọn susugege “to ojlẹ sisọ mẹ.”—Mat. 24:45-47.
2. Nujikudo tẹwẹ mí gán do, amọ́ etẹwẹ mí dona kẹalọyi?
2 Jehovah zindonukọn nado to alọgọna mí nado do nukunnumọjẹnumẹ he họnwun dogọ gando nujijọ ayidego tọn he to nukọn ja lẹ go. (Howh. 4:18; Dan. 2:28) Mí gán kudeji dọ to whenue nukunbibia daho lọ na bẹjẹeji, mí na yọ́n nuhe mí dona yọnẹn lẹpo nado sọgan doakọnnanu po nugbonọ-yinyin po bosọ gbọṣi pọninọ mẹ to ojlẹ awusinyẹn tọn enẹ mẹ. Etomọṣo, mí dona yigbe dọ nudelẹ tin he mí ma yọnẹn gando sọgodo go. To hosọ ehe mẹ, jẹnukọn whẹ́, mí na dọhodo nuhewutu mí do basi vọjlado gando nuhe mí ko dọ wayi delẹ go ji. Enẹgodo, mí na gbadopọnna delẹ to nuhe mí yọnẹn gando sọgodo go lẹ mẹ gọna aliho he mẹ Otọ́ olọn mẹ tọn mítọn na yinuwa te.
NUHE MÍ MA YỌNẸN
3. To ojlẹ de mẹ wayi, etẹwẹ mí lẹndọ e na jọ do mayisenọ lẹ go to whenue nukunbibia daho lọ na ko bẹjẹeji, podọ naegbọn mí do wá tadona mọnkọ kọ̀n?
3 To dai, mí dọ dọ whenue nukunbibia daho lọ na ko bẹjẹeji, mayisenọ depope ma na penugo bo do yise hia to Jehovah mẹ bosọ luntọ́n to Amagẹdọni. Mí wá tadona enẹ kọ̀n na mí lẹndọ kandai he gando Singigọ lọ go yin dọdai nuhe na wá jọ to nukọn mẹ tọn. Di apajlẹ, mí dọ dọ kẹdẹdile Jehovah sú ohọ̀n Aki lọ tọn whẹpo Singigọ lọ do bẹjẹeji do, mọdopolọ to bẹjẹeji nukunbibia daho lọ tọn, e na “sú ohọ̀n” do titonu Satani tọn, bo gbọnmọ dali glọnalina mẹdevo depope nado yin whinwhlẹngán.—Mat. 24:37-39.
4. Be mí nọ pọ́n kandai he gando Singigọ go hlan todin taidi nujijọ de he do zẹẹmẹ to dọdai-liho wẹ ya? Basi zẹẹmẹ.
4 Be mí dona pọ́n kandai he gando Singigọ lọ go hlan taidi dọdai nuhe na wá jọ to nukọn mẹ tọn wẹ ya? Lala. Etẹwutu? Na Owe-wiwe lẹ ma dọ mọ tlọlọ wutu. a Jesu yí “azán Noa tọn lẹ” jlẹdo ojlẹ tintin tofi etọn tọn go, amọ́ e ma dọ dọ Singigọ lọ yin dọdai nuhe na jọ to nukọn mẹ lẹ tọn, bọ mẹhe nujijọ lọ bẹhẹn dopodopo nọtena nuhe na wá jọ to nukọn mẹ de; mọ e ma dọ dọ ohọ̀n aki lọ tọn he yin súsú na tindo zẹẹmẹ de to dọdai-liho. Etomọṣo, ehe ma dohia dọ mí ma gán plọnnu sọn kandai he gando Noa po Singigọ lọ po go mẹ.
5. (a) Afọdide tẹwẹ Noa ze jẹnukọnna Singigọ lọ? (Heblu lẹ 11:7; 1 Pita 3:20) (b) Na nuhe dù azọ́n yẹwhehodidọ tọn lọ, nawẹ ninọmẹ mítọn to egbehe gán yin yiyijlẹdo ninọmẹ ojlẹ Noa tọn mẹ tọn go gbọn?
5 Whenue Noa sè owẹ̀n avase tọn Jehovah tọn, e dohia dọ emi tindo yise bo gbá aki lọ. (Hia Heblu lẹ 11:7; 1 Pita 3:20.) Mọdopolọ, mẹhe nọ sè wẹndagbe he gando Ahọluduta Jiwheyẹwhe tọn go lẹ dona nọ yinuwa sọgbe hẹ nuhe yé sè. (Owalọ 3:17-20) Pita ylọ Noa dọ “yẹwhehodọtọ dodo tọn.” (2 Pita 2:5) Amọ́ dile mí dọ do to hosọ he wayi mẹ, mí ma yọnẹn eyin vlavo Noa tẹnpọn nado dọyẹwheho na mẹhe nọgbẹ̀ to aigba ji jẹnukọnna Singigọ lẹpo. To egbehe, mí nọ doalọ to azọ́n yẹwhehodidọ lẹdo aihọn pé tọn de mẹ, bo nọ tẹnpọn nado do mahẹ zohunhun tọn to e mẹ. Amọ́, mahopọnna vivẹnudido mítọn lẹpo, mí ma na penugo nado dọyẹwheho na mẹlẹpo whẹpo opodo lọ nido wá. Etẹwutu?
6, 7. Naegbọn mí gán wá tadona kọ̀n dọ mí ma na lá owẹ̀n lọ na gbẹtọvi lẹpo whẹpo opodo lọ nido wá? Basi zẹẹmẹ.
6 Lẹnnupọndo nuhe Jesu dọ gando obá he mẹ azọ́n yẹwhehodidọ tọn mítọn na gbloada jẹ go ji. E dọ dọdai dọ yẹwheho wẹndagbe lọ tọn na yin didọ “to aigba fininọ lẹpo ji taidi okunnu de na akọta lẹpo.” (Mat. 24:14) Dọdai ehe to hẹndi mọ to egbehe hugan gbede pọ́n. Mí to wẹndagbe lọ lá lẹdo aihọn pé to ogbè 1000 linlán mẹ, podọ to nọtẹn Intẹnẹt tọn jw.org ji, e sọ tin-to-aimẹ na suhugan gbẹtọvi lẹ tọn.
7 Etomọṣo, Jesu sọ dọna devi etọn lẹ dọ yé ma na ‘gbọn tòdaho lẹpo mẹ lẹdo pé,’ kavi dọyẹwheho na mẹlẹpo whẹpo emi nido wá. (Mat. 10:23; 25:31-33) Nuhe Jesu dọ lẹ nasọ yin nugbo to egbehe ga. Gbẹtọ livi susu lẹ to egbehe wẹ nọ nọ̀ lẹdo he mẹ azọ́n yẹwhehodidọ tọn lọ yin alọhẹndotena sinsinyẹn te lẹ. Humọ, viyẹyẹ fọtọ́n susu lẹ wẹ nọ yin jiji to nukunwhiwhe dopodopo mẹ. Mí nọ wà nuhe go mí pé lẹpo nado hẹn wẹndagbe lọ jẹ gbẹtọ he wá sọn “akọta lẹpo, hẹnnu lẹpo, ogbè lẹpo podọ gbẹtọ lẹpo” mẹ lẹ dè. (Osọ. 14:6) Amọ́ nugbo lọ wẹ yindọ mí ma na penugo nado dọyẹwheho na gbẹtọvi dopodopo to aigba ji whẹpo opodo lọ nido wá.
8. Kanbiọ tẹwẹ mí gán kanse gando whẹdida Jehovah tọn he to nukọn ja lẹ go? (Sọ pọ́n yẹdide lọ lẹ.)
8 Enẹwutu, kanbiọ he fọndote lọ wẹ yindọ: Nawẹ Jehovah po Visunnu etọn he sin alọmẹ e ze whẹdida do po na yinuwa hẹ mẹhe gán nọma tindo dotẹnmẹ nado sè wẹndagbe lọ whẹpo nukunbibia daho lọ nido gbajẹgbonu lẹ gbọn? (Joh. 5:19, 22, 27; Owalọ 17:31) Wefọ he ji hosọ ehe sinai do dọ dọ Jehovah “ma jlo dọ mẹdepope ni yin vivasudo.” Kakatimọ, e jlo dọ “mẹlẹpo ni wá lẹnvọjọ kọ̀n.” (2 Pita 3:9; 1 Tim. 2:4) Po enẹ po, mí dona kẹalọyi dọ Jehovah ma ko de gblọndo kanbiọ enẹ tọn hia mí. Na nugbo tọn, e ma to dandannu glọ nado dọ nudepope na mí gando nuhe e ko wà kavi nuhe e na wá wà lẹ go.
Nawẹ Jehovah na yinuwa hẹ mẹhe gán nọma tindo dotẹnmẹ nado sè wẹndagbe lọ whẹpo nukunbibia daho lọ nido gbajẹgbonu lẹ gbọn? (Pọ́n hukan 8tọ) c
9. Etẹwẹ Jehovah ko dehia mí to Biblu mẹ?
9 To Ohó etọn mẹ, Jehovah ko de nudelẹ he e na wà hia mí. Di apajlẹ, Biblu dọna mí dọ Jehovah na hẹn “mawadodonọ” he ma do dotẹnmẹ nado kẹalọyi wẹndagbe lọ bo diọ aliho gbẹninọ tọn yetọn lẹ gọwá ogbẹ̀. (Owalọ 24:15; Luku 23:42, 43) Enẹ fọ́n kanbiọ titengbe devo lẹ dote.
10. Kanbiọ devo tẹlẹ wẹ fọndote?
10 Be mẹhe kú to nujijọ he na wá aimẹ to nukunbibia daho lọ whenu lẹpo na yin vivasudo kakadoi bo ma na do todido fọnsọnku tọn wẹ ya? Owe-wiwe lẹ hẹn ẹn họnwun dọ mẹhe diọnukunsọ Jehovah po awhànpa etọn lẹ po tlọlọ to Amagẹdọni whenu lẹ ma na yin finfọnsọnku. (2 Tẹs. 1:6-10) Amọ́, etẹwẹ dogbọn mẹhe gán ko kú to nujijọ jọwamọ tọn, kavi asidan de whenu lẹ, kavi gbọn alọ gbẹtọvi devo lẹ tọn gblamẹ lẹ dali? (Yẹwh. 9:11; Zek. 14:13) Be delẹ to omẹ ehelẹ mẹ gán tin to “mawadodonọ” he na yin finfọnsọnku to aihọn yọyọ lọ mẹ lẹ mẹ ya? Mí ma gán dọ taun.
NUHE MÍ YỌNẸN
11. Dodonu titengbe tẹ ji wẹ Jesu na dawhẹna gbẹtọvi lẹ te?
11 Nususu wẹ mí yọnẹn gando nujijọ sọgodo tọn lẹ go. Di apajlẹ, mí yọnẹn dọ Jesu na dawhẹna gbẹtọvi lẹ taidi lẹngbọ kavi gbọgbọẹ lẹ sinai do lehe yé yinuwa hẹ mẹmẹsunnu Klisti tọn lẹ do ji. (Mat. 25:40) Mẹhe yin whẹdana taidi lẹngbọ lẹ na ko do godonọnamẹ yetọn hia mẹyiamisisadode lẹ po Klisti po. Mí sọ yọnẹn ga dọ delẹ to mẹmẹsunnu Klisti tọn lẹ mẹ na pò to aigba ji to whenue nukunbibia daho lọ na ko bẹjẹeji godo, podọ yé na yin bibẹyi olọn mẹ ojlẹ kleun de jẹnukọnna Amagẹdọni. Dile e na dẹnsọ bọ mẹmẹsunnu Klisti tọn lẹ na pò to aigba ji, e yọnbasi dọ ahunjijlọnọ lẹ ni do dotẹnmẹ lọ nado nọgodona yewlẹ po azọ́n he wà yé te lọ po. (Mat. 25:31, 32; Osọ. 12:17) Naegbọn nugbo ehelẹ do jẹna ayidego?
12, 13. Nawẹ mẹdelẹ gán yinuwa gbọn whenue yé mọ vasudo “Babilọni Daho lọ” tọn godo? (Sọ pọ́n yẹdide lọ lẹ.)
12 Etlẹ yin to whenue nukunbibia daho lọ ko bẹjẹeji godo, e yọnbasi dọ mẹdelẹ he mọ vasudo “Babilọni Daho lọ” tọn ni flindọ Kunnudetọ Jehovah tọn lẹ ko dọho gando nujijọ ehe go na ojlẹ dindẹn. Be e yọnbasi dọ mẹdelẹ he mọ nujijọ ehelẹ ni tindo yise to Jehovah mẹ to whenẹnu ya?—Osọ. 17:5; Ezek. 33:33.
13 Eyin enẹ jọ, e na taidi nujijọ he wá aimẹ to Egipti to ojlẹ Mose tọn mẹ. Flindọ “gbẹtọgun daho flusọ́ de” kọnawudopọ hẹ Islaelivi lẹ whenue yé tọ́n sọn Egipti. Delẹ to omẹ ehelẹ mẹ gán ko jẹ yise dohia ji whenue yé mọdọ avase Mose tọn lẹ gando Azọ̀nylankan Ao lẹ go yin nugbo. (Eks. 12:38) Eyin onú mọnkọ de jọ to vasudo Babilọni Daho lọ tọn godo, be e na vẹna mí dọ omẹ ehelẹ penugo bo kọnawudopọ hẹ mí ojlẹ vude whẹpo opodo lọ do wá wẹ ya? Paali! Mí jlo na do jẹhẹnu Otọ́ olọn mẹ tọn mítọn tọn lẹ hia, yèdọ “Jiwheyẹwhe lẹblanunọ podọ awuvẹmẹtọ, mẹhe nọ whleawu nado gblehomẹ bosọ gọ́ na owanyi nugbo po nugbo po.” b—Eks. 34:6.
Mẹdelẹ he na mọ vasudo “Babilọni Daho lọ” tọn na flindọ Kunnudetọ Jehovah tọn lẹ ko nọ dọho gando nujijọ ehe go na ojlẹ dindẹn (Pọ́n hukan 12, 13tọ) d
14, 15. Be sọgodo madopodo mẹde tọn nọ sinai do whenue mẹlọ kú te kavi fihe e nọgbẹ̀ te ji wẹ ya? Basi zẹẹmẹ. (Salmu lẹ 33:4, 5)
14 To whedelẹnu, mí nọ sè bọ mẹdelẹ nọ dọ gando hẹnnumẹ yetọn he ko kú de go dọmọ “E pọnte hugan dọ e kú jẹnukọnna nukunbibia daho lọ, na todido tin dọ e na yin finfọnsọnku.” Ayihaawe ma tin dọ mẹwhinwhàn dagbe lẹ wẹ to godo na linlẹn mọnkọ lẹ. Amọ́, sọgodo madopodo mẹde tọn ma nọ sinai do ojlẹ he mẹ mẹlọ kú te ji gba. Whẹdatọ pipé de wẹ Jehovah, e nọ basi nudide he sọgbe bosọ yin dodo lẹ. (Hia Salmu lẹ 33:4, 5.) Mí gán kudeji dọ “Whẹdatọ aigba lẹpo tọn” na wà nuhe jlọ.—Jen. 18:25.
15 E sọ sọgbe hẹ lẹnpọn dagbe nado wá tadona kọ̀n dọ sọgodo madopodo mẹde tọn ma sinai do fihe e nọgbẹ̀ te ji. E ma sọgan wá linlẹn mẹ gbede dọ Jehovah na dawhẹna gbẹtọ livi susu lẹ taidi “gbọgbọẹ lẹ,” na yé nọ nọ̀ fie yé ma do dotẹnmẹ lọ te nado kẹalọyi owẹ̀n Ahọluduta lọ tọn poun wutu. (Mat. 25:46) Whẹdatọ dodo aigba lẹpo tọn tlẹ sọ nọ hò omẹ ehelẹ tọn pọ́n tlala hugan lehe mí gán wà do. Mí ma yọ́n lehe Jehovah na deanana nujijọ lẹ do to nukunbibia daho lọ whenu. Vlavo delẹ to omẹ ehelẹ mẹ na do dotẹnmẹ lọ nado plọnnu gando Jehovah go, do yise hia to ewọ mẹ, bosọ de nado nọ adà etọn mẹ whenue ewọ na klan ede do wiwe to nukun akọta lẹpo tọn mẹ.—Ezek. 38:16.
Whenue nukunbibia daho lọ na ko bẹjẹeji godo, . . . be e yọnbasi dọ mẹdelẹ he mọ nujijọ ehelẹ ni tindo yise to Jehovah mẹ ya?
16. Etẹwẹ mí ko wá yọnẹn gando Jehovah go? (Sọ pọ́n yẹdide lọ.)
16 To Biblu pinplọn mítọn whenu, mí ko wá yọ́n obá he mẹ ogbẹ̀ gbẹtọvi lẹ tọn nọ họakuẹ to nukun Jehovah tọn mẹ jẹ. E ze ogbẹ̀ Visunnu etọn tọn jo na mímẹpo nido do todido nado nọgbẹ̀ kakadoi. (Joh. 3:16) Mímẹpo wẹ nọ do numimọ owanyi sisosiso Jehovah tọn. (Isa. 49:15) E yọ́n yinkọ dopodopo mítọn tọn. Na nugbo tọn, e yọ́n dopodopo mítọn sọmọ bọ eyin mí tlẹ kú, ewọ gán fọ́n mí sọnku, na e nọ flin nulẹpo gando mí go wutu! (Mat. 10:29-31) Matin ayihaawe, mí do whẹwhinwhẹ́n lẹpo nado kudeji dọ Otọ́ olọn mẹ tọn owanyinọ mítọn na dawhẹna mẹdopodopo to aliho he yin pipé, dodo bosọ gọ́ na lẹblanu de mẹ.—Jak. 2:13.
Mí gán kudeji dọ Jehovah na dawhẹna mẹdopodopo to aliho pipé, dodo po lẹblanu po tọn mẹ (Pọ́n hukan 16tọ)
17. Etẹwẹ mí na gbadopọnna to hosọ he bọdego mẹ?
17 Na nugbo tọn, nukunnumọjẹnumẹ ehelẹ hẹn azọ́n yẹwhehodidọ tọn mítọn zun onú niyaniya tọn hugan gbede pọ́n. Naegbọn mí gán dọ mọ? Podọ, etẹwẹ nọ whàn mí nado zindonukọn bo to wẹndagbe lọ lá po zohunhun po? Mí na dọhodo gblọndo kanbiọ ehelẹ tọn ji to gigọ́ mẹ to hosọ he bọdego mẹ.
OHÀN 76 Na E Nọ te Na We?
a Nado mọ nudọnamẹ dogọ gando nuhewutu diọdo ehe do yin bibasi go, pọ́n hosọ lọ “Hiẹ Mọdọ E Yọ́n Nado Yinuwa to Aliho Ehe Mẹ” to Atọ̀họ̀-Nuhihọ́ lọ Tọn 15 mars 2015 tọn mẹ, w. 7-11.
b Whenue Babilọni Daho lọ na ko yin vivasudo godo, devizọnwatọ Jehovah tọn lẹpo wẹ na yin whiwhlepọn to mẹgbeyinyan Gọgi Magọgi tọn whenu. Mẹdepope he kọnawudopọ hẹ omẹ Jiwheyẹwhe tọn lẹ to vasudo Babilọni Daho lọ tọn godo lẹ na yin whiwhlepọn ga.
c ZẸẸMẸ YẸDIDE LẸ TỌN: Nujijọ atọ̀n delẹ he do nuhewutu azọ́n yẹwhehodidọ lẹdo aihọn pé tọn mítọn gán nọma jẹ mẹdelẹ dè hia: (1) Nawe de to lẹdo he mẹ sinsẹ̀n he tọ́nta hugan lọ nọ hẹn ẹn vẹawu nado dọyẹwheho te, (2) asu po asi po de nọ nọ̀ fie aṣẹpipa dosẹ́n gando azọ́n yẹwhehodidọ tọn go, bọ e sọ yin owùnu nado dọyẹwheho te, podọ (3) dawe de to lẹdo he to olá taun bọ e ma yọnbasi nado yì de mẹ.
d ZẸẸMẸ YẸDIDE TỌN: Awhli de he jo nugbo do wayi flin nuhe e ko plọn gando vasudo “Babilọni Daho lọ” tọn go. E diọlinlẹn bo lẹkọyi mẹjitọ etọn he yin Klistiani lẹ dè. Whenue nujijọ enẹlẹ na wá aimẹ, ojlo mítọn wẹ nado hodo apajlẹ lẹblanu po awuvẹmẹ Otọ́ olọn mẹ tọn mítọn po tọn bosọ jaya dọ ylandonọ de ko lẹkọwa.
