MWAZI G’OKUYIGA 19
OLWIMPO 22 Obwami Bwarhondere Kurhegeka—Bujage Bwayinja Lero!
Bichi Rhumenyere oku Bilolere Emanja za Yehova z’Amango Mayinjire?
“Yehova . . . arhalonzeze oku habe n’omuntu n’omuguma walimbulwa.”—2 PE. 3:9.
EBIRHWAYIGA
Rhwabona gurhe rhwakachizera okw’amango Yehova nj’achira abantu olubanja omu mango mayinjire, nj’ajira ntyo omu njira nyinja.
1. Bulagurhe rhwakaderha oku rhulamire omu kasanzi kasimisize?
RHULAMIRE omu kasanzi kasimisize! Buli mango rhuli rhwabona gurhe ebye Biblia yabaga yalebere bili byayenera. Omufano, rhuli rhwabona gurhe ‘omwami w’enoro n’owe side’ bali bahirikana, buli muguma yalonza yebage murhegesi w’egulu lyoshi. (Da. 11:40, amahugulo m’eshishi) Rhuli rhwabona gurhe emyazi minja y’Obwami bwa Mungu yi yahubiribwa omu gulu lyoshi, n’amamiliyoni m’abantu mali machishoga kukolera Yehova. (Isa. 60:22; Mt. 24:14) Kandi rhuli rhwapata ‘ebilyo kamama by’ekiroho omu kasanzi kakwanene.’—Mt. 24:45-47.
2. Bichi rhukwanene kuchizera, aliko na bichi rhukwanene kumenya?
2 Yehova ali agenderera kurhurhabala yi rhupata amafasiriyo mahyahya oku bilolere ebihe by’akamaro byarhengerera hanola hofi-hofi. (Mez. 4:18; Da. 2:28) Rhwakachizera okw’amango amalibuko makulu marhondera nji rhwamenya byoshi rhukenere kumenya, n’okuyorha omu buguma mw’amola mango makomere. Aliko, rhukwanene kurhegera oku hali ebintu rhurhamenyere oku bilolere amango mayinjire hano hofi. Mu gunola mwazi rhwarhanga kubona bulagurhe rhwahindamwire okuntu rhwabaga rhwaderhere oku bilolere bihe biguma mw’ebyola. Buzinda rhwashuba kugalukira biguma omu bintu rhumenyere oku bilolere amango mayinjire n’okuntu Darha w’embingu nj’ajira.
EBI RHURHAMENYERE
3. Bichi rhwabaga rhwaderhere oku bilolere amango abantu barhakachipata orozo l’okugwarha obwemere mu Yehova, na bulagurhe rhwaliwazize ntyo?
3 Omu mango magerere, rhwaliderhere ok’ omu mango m’amalibuko makulu abantu barhakachipata orozo l’okugwarha obwemere mu Yehova, n’okufuma evita ly’Armagedoni. Rhwaliri rhwawaza ntyo, bulala rhwalimenyere okw’engani y’Echihonzi gwaliri mufano g’obulebi bw’ebintu byakarhengerere mu ganola mango merhu. Omufano, rhwaliri rhwawaza oku nka kulala nta muntu wakachijire omu safina amango Yehova amala “kuchinga omulyango”, konakuguma, ntaye nji wachigala kugwarha obwemere mu Yehova n’okuyokolwa amango amalibuko makulu nji mahwanza.—Mt. 24:37-39.
4. Bulagurhe rhurhachili rhwawaza oku buli byoshi byarhengereraga omu siku za Nowa, bye byanarhengerera mu manola mango merhu? Fasiriya.
4 Ka buli bukweri okuwaza oku buli chintu charhengereraga amango m’Echihonzi chishushanyize chintu chilebe charhengerera omu mango mayinjire? Echishubizo ali nanga. Bulagurhe? Bulala ntacho Ebiblia ebiderhereko. a Buli bukweri oku Yesu alihuzenye esiku za Nowa n’echihe ch’okubaho kwage. Aliko arhaliderhere oku buli chintu charhengereraga omu mango ma Nowa chakanarhengerere ntyo k’onoko omu mango mayinjire; konakuguma n’amango Yehova achingaga omulyango gw’esafina. Aliko, echola chirhalonzeze kuderha oku ntacho rhwakayiga omu ngani ya Nowa n’Echihonzi.
5. Gurhe Nowa aliyerekene obwemere embere w’Echihonzi? (Waebrania 11:7; 1 Petro 3:20) b) Oku bilolere akasi k’okuhubiri, nka gurhe ehali ya mu ganola mango yakahuzanywa n’eyo mu siku za Nowa?
5 Amango Nowa ayunva oburhumwa bwa Yehova b’omukonge, ayerekana okw’agwerhe obwemere omu kuyumbaka esafina. (Osome Waebrania 11:7; 1 Petro 3:20.) Intyo k’onoko, abantu banayunva emyazi minja y’Obwami bwa Mungu bakwanene kukolesa ebi bayunvirhe. (Mdo. 3:17-20) Petro aliyirikire Nowa “muhubiri w’okunali.” (2 Pe. 2:5) Aliko, nk’oku rhwaganiraga omu mwazi gwageraga, rhurhakamenya akaba Nowa alihubirire buli muntu oku gulu embere Echihonzi chihwanze. Zene rhuli rhwachihangana kuhubiri abantu oku gulu lyoshi, rhunali rhwajira ntyo oku bushiru. Aliko chiro rhwajira okwerhu koshi, rhurhakagala kuhubiri emyazi minja oku bantu boshi oku gulu embere obuzinda buyinje. Bulagurhe rhwakaderha ntyo?
6-7. Bulagurhe rhwakaderha oku birhakagalikana rhuhubiri emyazi minja ku buli muntu oli oku gulu embere obuzinda buyinje.
6 Waza oku bi Yesu aderhaga. Alilebere okw’emyazi minja nji yahubiribwa oku “gulu lyoshi abantu balamireko yi buba buhamirizi oku mashanja moshi.” (Mt. 24:14) Obola bulebi yi bwayenera zene bwenene kulusha mira. Oburhumwa b’Obwami yi bwahubiribwa omu ndimi zirhalukire 1 000 na kugerera esite yerhu ya jw.org, bantu banene oku gulu bakayiga oku bilolere emyazi minja y’Obwami bwa Mungu.
7 Aliko, kandi Yesu aliderhere okw’abanafunzi bage barhakamalire kuzunguluka ama vile changwa kuhubiri buli muntu, embere ayinje. (Mt. 10:23; 25:31-33) Ebinwa bya Yesu yi byabonekana oku bili by’okuli na mu ganola mango gerhu. Bantu banene zene balamire ahantu rhurhakagala kuhubiri n’obuhuru. Echindi, abantu kamama bali baburhwa buli muniti. Bobola rhurhakagala kuhubiri buli muntu oku gulu embere obuzinda buyinje. Chiro akaba ntyo rhwakajira okwerhu koshi yi rhuhubiri abantu ba “buli shanja, buli buko na buli lulimi embere obuzinda buyinje.”—Ufu. 14:6.
8. Chibazo chihe rhwakachibaza oku bilolere okuntu Yehova nj’achira abantu olubanja omu mango mayinjire? (Olole n’efoto.)
8 Oku bilolere ebi rhwaganirireko, rhwakachibaza ntya: Gurhe si oku bilolere balala barhapataga orozo l’okuyunviriza emyazi minja embere amalibuko makulu mahwanze? Gurhe Yehova n’Omugala ey’ahere engabane y’okucha olubanja, nji babakolera? (Yoh. 5:19, 22, 27; Mdo. 17:31) Olwandiko gunola mwazi guyimangireko luderhere oku Yehova arhalonzeze “oku habe omuntu n’omuguma walimbulwa.” Ahali hantyo, alonzeze “boshi bahikire kuhungama.” (2 Pe. 3:9; 1 Ti. 2:4) Chiro akaba oku rhumenyere ebyola byoshi oku bilolere Yehova, arhasaga kurhubwira gurhe nj’achira abantu olubanja barhapataga orozo l’okuyunva emyazi minja. Kweri, ntaye wakamuseza arhubwire buli chintu ajirire changwa bichi nj’ajira.
Gurhe Yehova nj’akolera balala barhapataga orozo l’okuyiga emyazi minja embere amalibuko makulu mahwanze? (Olole echifungo cha 8) c
9. Bichi Yehova arhubishulire omu Biblia?
9 Omu Chinwa chage, Yehova arhubishulire bintu bilebe omu binj’ajira. Omufano, Yehova arhubwirire oku nj’afuula abantu “barhali banya-kunali” barhapataga orozo l’okumenya emyazi minja n’okuhindamula olugenzi lwabo. (Mdo. 24:15; Lu. 23:42, 43) Echola chirhumire rhwachibaza ebindi bibazo by’akamaro.
10. Bindi bibazo bihe rhwakachibaza?
10 Balala boshi nji bafa amango m’amalibuko makulu, nji balimbulwa loshi loshi buzira kugwarha obulangalire b’okufuka si? Amandiko marhubwirire oku balala banapinga Yehova nʼengabo zage, nji balimbulwa oku Armagedoni, barhakanafuuka. (2 Te. 1:6-10) Aliko si, gurhe oku bilolere abandi bantu? Omufano, nkabaga baguma nji bakafa omu mango m’amalibuko makulu eju y’obulwala, obushaja, omu agisida, changwa owindi muntu anabayirha? (Muh. 9:11; Zek. 14:13) Baguma mw’abola bantu nji bafuuka omu barhali banya-kunali befuuke amango m’egulu lihyahya si? Ntacho rhumenyere oku bibalolere.
EBI RHUMENYERE
11. Bichi nji byayerekana okuntu omuntu nj’achibirwa olubanja oku Armagedoni?
11 Rhumenyere binene oku bilolere ebihe by’amango mayinjire. Omufano, rhumenyere okw’amango m’evita ly’Armagedoni abantu nji bachibirwa olubanja omu kukulikiza ebi baliri bakolera bene-babo Kristu. (Mt. 25:40) Aba nji bachibirwa olubanja oku bali ntama nji baba eyi bayerekene oku bashigikire abashigwa na Kristu. Kandi rhumenyere oku baguma mu bene-babo Yesu b’abashigwa nji baba bachili oku gulu embere amalibuko makulu marhondere, n’oku nji bahekwa embingu kasanzi kageke embere Armagedoni erhondere. Amango moshi baguma mu bene-babo Yesu baba bachili oku gulu, byakashobokana okw’abantu b’emirhima minja baba eyi bachigwerhe orozo l’okubashigikira n’okubarhabala oku kasi bali bajira. (Mt. 25:31, 32; Ufu. 12:17) Bulagurhe obula bukweri buli bw’akamaro?
12-13. Nkabaga gurhe bantu baguma nji bajira amango nji babona “Babiloni Mukulu” amalimbulwa? (Olole n’efoto.)
12 Chiro n’embere amalibuko makulu mahwanze, byakashobokana oku bantu baguma babwene okuntu “Babiloni Mukulu” alimbulwa, nji bayibuka oku mu myaka minene Abahamirizi ba Yehova baliri baderha oku ebyola byakarhengerere. Hali baguma mubo si nji babona gurhe Babiloni Mukulu amalimbulwa, banaja bagwarha obwemere mu Mungu?—Ufu. 17:5; Eze. 33:33.
13 Nk’ebyola birhengerere byakaba kuguma n’ebyarhengereraga omu Misri omu mango ma Musa. Oyibuke okw’abantu banene ba buli lubero baliherekeze Abaizraeli amango barhenga e Misri. Bantu baguma mw’abola, nkabaga barhonderaga kugwarha obwemere mu Mungu amango babona gurhe ebi Musa aderhaga oku bilolere mapigo ekumi byayenera. (Kut. 12:38) Amango ebili nk’ebyola byamarhengerera, ka rhwakavunika omurhima okubona abantu bachihirire oku lunda lwerhu kasanzi kageke embere obuzinda buyinje? Nanga arhali ntyo! Rhulonzeze kuba kuguma na Darha w’embingu “w’obonjo n’akababaro, orhagwarha burhe juba-juba, ogwerhe obuzigire bunene bwimana, n’okuli.” b—Kut. 34:6.
Abantu baguma nji babona gurhe Babiloni Mukulu alimbulwa nji bayibuka okw’Abahamirizi ba Yehova baliderhere eju y’echola mu siku zinene (Olole echifungo che 12-13) d
14-15. Okuderha ok’omuntu apate orozo l’okulama esiku n’amango si, nji byarhengerera n’amango omuntu afaga changwa ah’alilamire? Fasiriya. (Zaburi 33:4, 5)
14 Mango maguma, hali bene-berhu changwa bali-berhu bakaderha ntya oku bilolere muntu mulebe w’omulala gwabo orhali wakolera Yehova: “Nka chiro ahubwe afaga embere amalibuko makulu mahwanze kwakabere kwinja, bulala akanihira oku nj’afuuka.” Kweri hali empanvu zinja zakarhuma abantu baderha ntyo. Aliko, akalamo k’esiku n’amango k’omuntu karharhengene n’echihe afiremo. Yehova aba Muzuzi oshinganene k’okuderha amango moshi esimikiro zage ziba zinja eyi zinali z’ehaki. (Osome Zaburi 33:4, 5.) Rhwakachizera oku “Omuzuzi w’egulu lyoshi” amango moshi nj’ajira ebikwanene.—Mwa. 18:25.
15 Biyunvikene okuderha oku y’omuntu apata orozo l’okulama esiku n’amango, birhayumangire oku hantu alilamire. Yehova arhakachira amamiliyoni m’abantu olubanja oku bali “mpene” bulala balilamire ahabarhapataga orozo l’okuyunva oku bilolere oburhumwa b’Obwami. (Mt. 25:46) Omuzuzi w’okunali w’egulu lyoshi alagire bwenene kw’abola bantu kulusha nk’oku rhwakabalagako. Rhurhamenyere gurhe Yehova nj’ayerekeza ebintu omu mango m’amalibuko makulu. Eby’abantu nji babona byarhengerera amango m’amalibuko makulu, nkabaga nji byabashunika kugwarha obwemere mu Yehova amango nj’amenyisa ezino lyage oku bantu boshi balamire oku gulu.—Eze. 38:16.
Amalibuko makulu mamala kuhwanza, . . . ka bantu baguma nji babona ebyola byarhengerera banahindamula emirhima yabo?
16. Bichi rhwayigire oku bilolere Yehova? (Olole n’efoto.)
16 Kugerera efunzo lyerhu lye Biblia rhwamenyere oku Yehova abalagire oku bantu bwenene. Aliyemerere chiro n’Omugala afe yi rhupata orozo l’okulama esiku n’amango. (Yoh. 3:16) Rhweshi rhwachibwenere obuzigire bw’akasisi bwa Yehova. (Isa. 49:15) Ayinji ezino lya buli muguma werhu. Arhuyinji bwinja bwinja na chiro rhwafa, akarhufula bulala ayibukire buli kantu koshi oku birhulolere, na buli choshi rhwaligwerhe omu bwenge bwerhu! (Mt. 10:29-31) Kweri, rhugwerhe empanvu nyinja y’okuchizera oku Darha w’embingu w’obuzigire nj’achira buli muntu olubanja omu njira eshinganene, y’okunali, enali y’obubabale.—Yak. 2:13.
Rhwakachizera oku Yehova nj’achira buli muntu olubanja omu njira eshinganene, y’okunali, enali y’obubabale (olole echifungo che 16)
17. Bichi rhwaganirako omu mwazi gwakulikiraho?
17 Amala mafasiriyo mahyahya marhurhabere kubona okw’akasi kerhu k’amahubiri kali kakukolwa juba-juba kulusha mira. Bulagurhe rhuderhere ntyo? Bindi bichi bili byarhushunika kuhubiri emyazi minja juba-juba buzira kuleka? Omu mwazi gwakulikiraho rhwaganira bwenene oku bishubizo by’ebyola bibazo.
OLWIMPO 76 Gurhe Onachiyunva?
a Y’opata amandi mafasiriyo mayerekene bulagurhe rhwahindamwire ebila bintu, olole omwazi guli omu Munara g’Omulanzi g’okuyiga gwa Siku 15 Mwezi gwa 3, 2015 guderhere ntya: “Hii Ndiyo Njia Iliyo Kubaliwa Nawe” (Eyila ye Njira Oyemerere).
b Enyuma w’okulimbulwa kwa Babiloni Mukulu, abakozi ba Yehova boshi nji bageregezwa amango Gogu wa Magogu nj’abarhera. Balala boshi nji baja oku lunda lwa Mungu enyuma y’okulimbulwa kwa Babiloni Mukulu, nabo nji bageregezwa.
c AMAFASIRIYO M’EFOTO : Foto esharhu ziyerekene bulagurhe amahubiri marhakagera oku bantu boshi oku gulu: 1) Mukazi muguma alamire omu eneo bantu banene bali mu dini liguma, n’echola chirhumire byakomera kugeza y’emyazi minja, 2) omulume na mukage balamire omu eneo esheriya z’echihugo zilahize akasi kerhu, na 3) omulume olamire omu mizirhu ya halele-hale emunda birhayorohere kuhika.
d AMAFASIRIYO M’EFOTO: Mwali-werhu ochili musole, walekaga kukolera Yehova ali ayibuka ebi ayigaga oku bilolere okulimbulwa kwa “Babiloni Mukulu.” Amachishoga kugalukira Yehova n’abazere bage b’Abakristu. Nk’ebintu bili nk’ebyola byamarhengerera, rhulonzeze kuba kuguma na Darha w’embingu ojira obonjo, akababaro, n’okugwarha obusime ok’omunya-byaha agalukire.
