1. Omena raye tji matu yenene okutja eṱe tu hupa moruveze orunanambango?

 EṰE tu hupa moruveze orunanambango. Eyuva arihe, eṱe tu muna omaprofetero wOmbeibela amaye yenenisiwa. Otjotjihorera, eṱe tu muna “ombara yokomanene wehi” ‘nombara yokomamuho wehi’ tji maze ru kumwe mena rokutja aihe yayo mai vanga okuhonaparera po ouye. (Dan. 11:​40, NWT) Eṱe tu muna ombuze ombwa yOuhona wa Mukuru amai zuvarisiwa mouye auhe, nu omangete omengi wovandu ye toorora okukarera Jehova. (Jes. 60:22; Mat. 24:14) Nu “moruveze ndwa tuwa po,” Jehova u tu pa oviṋa ovingi mbi tu vatera okukurisa oupanga wetu ku na ye.—Mat. 24:​45-47.

2. Ovikeṋa mbi matu yenene okukambura mo, posi ya otjikeṋa tji matu sokuyakura?

² Jehova u kayenda komurungu okutuvatera okuzuva nawa ovitjitwa ovinanḓengu mbi mavi tjitwa moruyaveze rwopopezu. (Omiano 4:18; Dan. 2:28) Eṱe tu nongamburiro kutja indu ondatumisire ondirise tji ya utu, eṱe matu tjiwa oviṋa avihe mbi matu hepa okutjiwa kokutja tu kare nonḓarorure, nokukara nombwaneno moruveze oruzeu ndwo. Nungwari, eṱe matu sokuyakura kutja pe noviṋa tjiva mbi tu hi nokutjiwa ohunga na imbi mbi mavi katjitwa moruyaveze rwopopezu. Morupa ndwi, rutenga matu kahungira kutja ongwaye tji twa rundurura oviṋa mbi twa hungira ohunga novitjitwa tjiva mbyo. Nu okuzambo, eṱe matu kahungirira koviṋa tjiva mbi matu tjiwa ohunga noruyaveze, nokutja Tate wetu womeyuru ma katjita vi.

 OVIṊA MBI TU HI NOKUTJIWA

3. Omena raye tjaatu munu kutja ovandu kave nokukara nongamburiro mu Jehova indu ondatumisire ondirise tji ya utu, nu ongwaye tjaatu ripura nao?

³ Morukapitaveze, eṱe twa tja indu ondatumisire ondirise tji ya utu, kaku nomundu ngu ha karere Jehova ngu ma yenene okukara nouyara wokukambura mu Jehova nokutuurunga ovita vya Armagedon. Eṱe twa tja nao mena rokutja aatu munu kutja omundu auhe notjitjitwa atjihe moruveze rwOmupupo, aavi kuramena po oviṋa mbi mavi katjitwa moruyaveze. Otjotjihorera, mena rokutja kape nomundu ngwaa yandjerwa okuhita motjitendeze kombunda yaindu Jehova tja pata omuvero, eṱe aatu ripura kutja kape nomundu ngu ma yenene okukara nongamburiro mu Jehova nu ngu ma yenene okuyamwa indu ondatumisire ondirise tji ya utu.—Mat. 24:​37-39.

4. Ongwaye tji tu ha tja oviṋa avihe mbya tjitwa moruveze rwa Noa vi nomayenenisiro omanene ndino?

⁴ Hapo onawa okutja otjiṋa atjihe tji tja tjitwa moruveze rwOmupupo matji kuramene po otjitjitwa tji matji katjitwa moruyaveze? Kako. Omena raye? Mena rokutja Ombeibela kai hungire otjiṋa ho. a Otjiperi kutja Jesus wa sasaneka ‘omayuva waNoa’ ku nomeero we. Posi yokutja, eye katjere oviṋa avihe mbya tjitwa moruveze rwa Noa vi nomayenenisiro kaaṋi omanene moruyaveze, tjimuna indu Jehova tja pata omuvero wotjitendeze. Posi yokutja, ihi katji nokuheya kutja katu nokuyenena okurihongera kehungi ra Noa nOmupupo.

5. (a) Otjikeṋa Noa tja tjita komurungu wOmupupo? (Ovaheberi 11:7; 1 Petrus 3:20) (b) Omomuano uṋe otjiungura tjetu tjokuzuvarisa mu tji ri tjimuna ihi tjoruveze rwa Noa?

 ⁵ Indu Noa tja zuva erakiza ra Jehova, eye wa raisa kutja wa ri nongamburiro indu tja tunga otjitendeze. (Lesa Ovaheberi 11:7; 1 Petrus 3:20.) Momuano tjingewo, ovandu mba zuu ombuze ombwa yOuhona mave sokutoorera ko omukambo ku imbi mbi va zuu. (Oviung. 3:​17-20) Petrus wa tja Noa wa ri “omuzuvarise wousemba.” (2 Petr. 2:5) Nungwari, otja tji twa hungire rukuru morupa ndwa kapita, eṱe katu nokutjiwa kutja Noa wa kondja okuzuvarisa kovandu avehe mba turire kombanda yehi komurungu wOmupupo. Ndino, eṱe tu kondja okuzuvarisa kovandu avehe mouye nu tu nonḓero okutjita nao. Posi yokutja, nandarire kutja twa kondjo pu pe ṱa pi, eṱe kamaatu yenene okuzuvarisa komundu auhe mouye ngunda omaandero aye hi ye ya. Ongwaye?

6-7. Omena raye tji matu tja kamaatu yenene okuzuvarisa ombuze ombwa komundu auhe kombanda yehi ngunda omaandero aye hi ye ya?

⁶ Ripura noviṋa Jesus mbya hungira ohunga notjiungura tjetu tjokuzuvarisa. Eye wa hunganeka kutja ombuze ombwa mai zuvarisiwa “mouye auhe i rire omahongononeno koviwaṋa avihe.” (Mat. 24:14) Ndino, omaprofetero ngo ye yenenisiwa tjinene. Ombuze yOuhona i pitisiwa momaraka wokombanda 1 000, nu mena rorungovi rwetu ndwi jw.org, ovandu ovengi mouye ndino ve yenena okurihonga ohunga nombuze ombwa yOuhona wa Mukuru.

⁷ Posi yokutja, Jesus wina wa raera ovahongewa ve kutja “kamaamu mana oviungura vyeṋu movirongo avihe,” ngunda eye e hi ye ya. (Mat. 10:23; 25:​31-33) Ku nao, eṱe kamaatu yenene okuzuvarisa komundu auhe ngunda Jesus e hi ye ya okupangura ovandu. Ovandu omangete omengi ndino va tura motuveze oviungura vyetu vyokuzuvarisa mu vi ha yandjerwa. Nu wina, ounatje ouingi u pandukwa mominute aihe. Eṱe tu kondja pu matu yenene okuzuvarisa ombuze ombwa “komihoko avihe na komaraka aehe na koviwaṋa avihe.” (Omavan. 14:6) Nungwari epu orondi rokutja, eṱe kamaatu yenene okuzuvarisa ombuze ombwa komundu auhe kombanda yehi ngunda omaandero aye hi ye ya.

8. Epuriro riṋe ndi mape ya atu pura ohunga nomuano Jehova mu ma kapangura ovandu moruyaveze? (Wina tara koviperendero.)

⁸ Eṱe mape ya atu ripura kutja: Hapo Jehova ma katjita vi ku imba mbe ha ri noruveze okuzuva ombuze ombwa ngunda ondatumisire ondirise ai hi ya uta? Omomuano uṋe Jehova nOmuna we, kayandja ko ousemba wokupangura, mu me ve pangura? (Joh. 5:​19, 22, 27; Oviung. 17:31) Epu rorupa rwomakonḓononeno ndwi, maru tja Jehova ka “vanga kutja omundu nangarire umwe a yandekwe.” Nungwari, eye u “vanga kutja avehe ve ritanaure komauvi wawo.” (2 Petr. 3:9; 1 Tim. 2:4) Kainatja kutja matu tjiwa oviṋa mbi ohunga na Jehova, eye ngunda kee tu raera omuano mu ma kapangura ovandu mbe hi na va ri noruveze okuzuva ombuze ombwa. Otjiperi kutja eye ke nokuhepa okuturaera oviṋa avihe mbi ma katjita.

9. Jehova we tu raera tjike mOmbeibela?

⁹ Jehova we tu raera oviṋa tjiva mbi ma katjita mEmbo re. Ombeibela i tu raera kutja, Jehova ma kakotora ovandu ‘ovavi’ poo ovahasemba komuinyo, okutja owomba mbe hi na va muna oruveze rwokurihonga ohunga nombuze ombwa kokutja ve rundurure ongaro yawo. (Oviung. 24:15; Luk. 23:​42, 43) Iho matji etisa omapuriro warwe omananḓengu.

10. Omapuriro yeṋe warwe ngu tu na wo?

¹⁰ Hapo ovandu avehe mbu mave ṱu moruveze rwondatumisire ondirise mave nyonwa  nga aruhe nokuhinomaundjiro wombendukiro? Omatjangwa ye raisa oukahu kutja imba mbu mave pirukire Jehova norupa rwe rwovita, mave nyonwa movita vya Armagedon nu kave nokukapendurwa. (2 Tes. 1:​6-10) Posi yokutja maku katjitwa tjike kovandu tjiva mbu mave ṱu moruveze rwondatumisire ondirise, mena roviṋa tjimuna omitjise poo oukurundu, poo mena rokuzepewa moumba kaaṋi poo i yomundu warwe? (Omuzuv. 9:11; Sak. 14:13) Hapo ovandu tjiva mbo mave kara mokati kaimba ‘ovavi’ mbu mave pendurwa mouye oupe? Eṱe katu nokutjiwa.

OVIṊA MBI MATU TJIWA

11. Ovandu mave kapangurirwa ku ye movita vya Armagedon?

¹¹ Eṱe tu tjiwa oviṋa tjiva ohunga novitjitwa vyoruyaveze. Otjotjihorera, eṱe matu tjiwa kutja movita vya Armagedon, ovandu mave pangurwa otja komuano mu va tjinda ovangu va Kristus. (Mat. 25:40) Imba mbu mave pangurwa otjozonḓu va raisa oruvara rwawo kovatwirisiwa na Kristus. Eṱe wina matu tjiwa kutja ovangu va Kristus tjiva mave kara kombanda yehi indu ondatumisire ondirise tji ya utu, nu mave twarewa keyuru ousupi komurungu wovita vya Armagedon. Ngunda ovangu va Kristus tjiva ave ri kombanda yehi, ovandu vomitima omiwa mave yenene okukara noruveze okuyandja oruvara ku wo na koviungura mbi ve ungura. (Mat. 25:​31, 32; Omavan. 12:17) Ongwaye omapu ngo tje ri omanahepero?

12-13. Hapo tjiva mave tjiti vi indu tji mave munu “Babilon otjinene” amatji nyonwa? (Wina tara koviperendero.)

¹² Nandarire indu ondatumisire ondirise tji ya utu, mape ya tjiva mbu mave munu “Babilon otjinene” amatji nyonwa, mave zemburuka kutja oure wozombura ozengi Ovahongonone va Jehova aave tja otjiṋa ho matji tjitwa. Nu hapo ovitjitwa mbyo mape ya avi tjiti kutja tjiva ve ute okukara nongamburiro mu Jehova?—Omavan. 17:5; Esek. 33:33.

¹³ Indu otjiṋa ho tji tja tjitwa, matji sana ku ihi tji tja tjitwa moEngipte momayuva wa Moses. Zemburuka kutja, otjimbumba “tjovandu varwe vozonganda” tje ri kuta kumwe nOvaisrael tji va pita moEngipte. Tjiva vawo mape ya va uta okukara nongamburiro mu Jehova  tji va muna kutja Oviwonga omurongo Moses mbya rakiza vya tjitwa. (Eks. 12:38) Indu otjiṋa tjimuna ho tji tja tjitwa kombunda yaindu Babilon otjinene tji tja nyonwa, hapo eṱe matu munu kutja kanawa ovandu okuyekurikuta ku na eṱe ngunda omaandero aye hi ye ya? Kako katjiperi. Eṱe matu vanga okukara tjimuna Tate wetu womeyuru, “Ndjambi ngu ri omunaunyaṋutima nomunatjari, ngu nomuretima, nu ngwa tumba otjari nouṱakame.” b—Eks. 34:6.

14-15. Hapo omundu kutja ma kahupe nga aruhe ku za mokutja oruṋe tja ṱu, poo kutja wa tura pi? Kahurura. (Epsalme 33:​4, 5)

¹⁴ Povikando tjiva, ovakambure ovakwetu mape ya ave tja nai ohunga nomuzamumwe wawo ngu ha karere Jehova: “Indu eye tja ṱu ngunda ondatumisire ondirise ai hi ya uta ma rire nawa ku ye, mena rokutja eye ma kara nomaundjiro wokukapendurwa.” Otjiperi kutja ovandu tjiva ve muna nao. Posi yokutja, okukahupa nga aruhe kai nokuza kokutja omundu wa ṱa ruṋe. Jehova eye Omupangure omusemba, nozondando ze aruhe ozosemba. (Lesa Epsalme 33:​4, 5.) Tjiri eṱe matu yenene okukara nongamburiro yokutja “Omupangure wehi arihe” ma tjiti imbi ovisemba.—Gen. 18:25.

¹⁵ Nu wina kanavi okutja okukahupa nga aruhe kai nokuza kokutja omundu u kara pi. Jehova kamaa pangura ovandu ovengi ‘otjozongombo’ mena rokutja ve kara momahi mu ve hi na va muna oruveze okuzuva ombuze yOuhona. (Mat. 25:46) Omupangure omusemba wouye mbwi u rikendera kovandu mbo tjinene  okukapita eṱe. Eṱe katu nokutjiwa omuano Jehova mu ma kayenenisa ovitjitwa mbyo moruveze rwondatumisire ondirise. Mape ya imbi mbi mave munu mondatumisire ondirise, mavi tjiti kutja owo ve kare nongamburiro mu Jehova indu eye tji ma tjiti kutja ovandu avehe mouye auhe ve tjiwe ena re.—Esek. 38:16.

16. Ovikwaye mbi twe rihonga ohunga na Jehova? (Wina tara kotjiperendero.)

¹⁶ Okupitira momerihongero wetu wOmbeibela, eṱe twe rihonga kutja ovandu ovaingona tjinene ku Jehova. Eye we tu pa Omuna we kokutja eṱe atuhe tu kare nomaundjiro wokukahupa nga aruhe. (Joh. 3:16) Eṱe atuhe twa muna omuano Jehova me tu suvera. (Jes. 49:15) Eye u tjiwa auhe wetu kena. Nu u tu tjiwa nawa nandarire indu tji twa ṱu, eye ma yenene okutupendura mena rokutja u zemburuka oviṋa avihe ohunga na eṱe, nomeripura aehe ngu twa ri na wo. (Mat. 10:​29-31) Tjiri, eṱe matu yenene okukara nongamburiro kutja Tate wetu worusuvero womeyuru ma pangura omundu auhe momuano omusemba, mena rokutja eye onongo, omusemba nu u notjari.—Jak. 2:13.

17. Ovikwaye mbi matu kahungirira ko morupa ndu maru kongorere ko?

¹⁷ Omazuviro omakahu nga, ye tjita kutja tu vare otjiungura tjetu tjokuzuvarisa otjotjiṋa otjinanḓengu tjinene moruveze ndwi. Ongwaye tji matu tja nao? Nu otjikwaye tji tji tu tunduuza kutja tu zuvarise ombuze ombwa noupyuke? Eṱe matu kahungirira komaziriro womapuriro ngo morupa ndu maru kongorere ko.