1. Ịyẹ tị́ du kahị ka jẹ́-ẹ ya nyori ahị jam hịhị ụka ọkpịpyọ-kpịpyọ?

 ỤKA ọlẹ kahị lẹẹ hịhị kpịpyọ lụmẹ! Chajị ẹnụ myị́ ẹnụ, ahị wẹẹ yẹ ọ-họ jịra nya ala ịlẹ ká ịBayịbụụ ya. Ọ-chụ pwokwita, ahị wẹẹ yẹ jaabwọ ká “adịrahụ nya oye ẹtẹ” bala “adịrahụ nya oye edii” wẹẹ ju awụlẹ ju nya ọngọ ka la ọngịrị gụ odehe. (Dan. 11:40, NW) Ahị tị́ wẹẹ yẹ jaabwọ ká ẹrụ ọnyịịla nya Ịpyị-Adịrahụ nya Ohe wẹẹ chị odehe ọnụ wuu, du ká ụnọ uku-uku nya angịnyị wẹẹ wẹ ka gbịgba ha iJihova. (Ayị. 60:22; Mat. 24:14) Ang oriri nya olegu tị dịda hahị ahị wẹẹ ye “ri lụka ọchịla-chịla” ịnyịnyị.—Mat. 24:45-47.

2. Ẹlịyẹ ahị tị́ jẹ́ myịmyị? Ẹlịyẹ ahị tị́ ka kpa i-irya?

² IJihova wẹẹ wụrụ ang ịlẹ kị ja ka họ ị-ịlahị gbada hahị lẹẹlẹẹ. (Etu 4:18; Dan. 2:28) Ahị la ọ-jẹ́ myịmyị nyori ụka ká akama ọtụka okpelego ka dọmwụ wẹẹ, ahị ka jẹ́ ang ịlẹ kahị baba nyọka jẹ́ wuu, chajị kahị ka jẹ́-ẹ yẹjụ lawụlẹ dayị giri-giri ụka olujwo ọwẹ lẹ. Ma, ahị kpịtịya nyori a-ang myị́ ang wuu ịlẹ kị wẹẹ ka họ ị-ịlahị ahị ka jẹ́-ẹ jẹ́ ka. Ẹ-ẹpwụ nya ang ọjẹ́jẹ ọlẹ, ahị ka jene ya ẹla u-uhye nya ang odudu kahị nwụ ang họ u-uhye nya ala ịhyẹ ịlẹ kahị ya u-uhye nya ẹla ịla ịlahị. Ahị tị ka ya ẹla u-uhye nya ang ịlẹ kahị jẹ́ u-uhye nya ijuju bala ang ọlẹ ká Adahị ọla epwoohe wẹẹ ka họ ịnyịnyị.

ANG ỌLẸ KAHỊ JẸ́ KA

3. Ẹlịyẹ ahị tịị ya ene-ene u-uhye nya ụka ọlẹ ká iJihova wẹẹ ka ya da ha angịnyị ba nyọka wẹ ka jọ́ọ? Ịyẹ tị́ du kahị ya ịnyị?

³ Lụka ọkẹkpẹ, ahị ya nyori ụka ka akama ọtụka okpelego á dọmwụ lẹ, angịnyị-ị́ ka jẹ́-ẹ la ọmyịmyị ẹ-ẹga nya Ohe kpụ ị ka jẹ́-ẹ bé akama ọtụka okpelego kaka. Ahị ya ịnyị  chajị ahị me nyori ọngọngọọng bala ang ịlẹ kị họ ụka nya ukpenyi kụ ọmwakpa nya ang ịlẹ kị ka họ ụka nyahị. Ọ-chụ pwokwita, ahị kwọọ nyori jaabwọ ká iJihova tụ́ ụgbẹyị nya ụmwụ ku ene ká ukpenyi-i dọmwụ, ịnyịnyị ọ ka “tụ́ ụgbẹyị ku” odehe nya Olegu Onyobyi ụka ká akama ọtụka okpelego á dọmwụ bwaa lẹ, ọọwa ri, angị ihihi wuu á ka yé ọchịda kaka.—Mat. 24:37-39.

4. Ahị kaa ya nyori ang ịlẹ wụụ kị họ ụka nya iNuwa ka la ọ-họ jịra ọtụka ụka nyahị wẹẹ? Wụlẹ wẹẹ.

⁴ Ọ ka há nyọka ya nyori ang ịlẹ kị họ ụka nya ukpenyi wuu kụ ọmwakpa nya ang ịlẹ kị ja ka họ ị-ịlahị? Ọwẹwẹ ri ehe. Ịyẹ tị́ du kahị ya ịnyị? Chajị ịBayịbụụ-ụ́ ya ịnyị ka. a IJisọsị chụ ụka “nya odehe nya iNuwa” kaka pwoku ụka nya ọmwẹẹkpẹ nyamwụ, ma ọ́ tị ya nyori ang ịlẹ kị họ ụka nya iNuwa wuu nyị ka la ọ-họ jịra ọkịla ọ-gụ ọwa gụ ị-ịlahị ka, lee o-ya nyori ụmwụ nya iNuwa ọlẹ ká iJihova tụ́ ku nyị la ọ-họ jịra ị-ịlahị ka ịnyịnyị. Ọọwa ri, áhị ka jẹ́-ẹ jẹ́ ang bwu oja nya iNuwa bala ukpenyi ka lẹ ka.

5. (a) Ịyẹ iNuwa à tị́ họ ene nya Ukpenyi? (Ala iHiburu 11:7; 1 iPita 3:20) (b) Ányị ẹrụ ọnyịịla ọ-kpa pyẹ ọla ụka nya iNuwa à tị́ me ịnyahị ọla ọlẹẹlẹẹ?

⁵ Ụka ká iNuwa wo ọna ọlẹ ká iJihova da, ọ mẹjẹ nyori ọ la ọmyịmyị bwula ọ-kọ ụmwụ. (Wa Ala iHiburu 11:7; 1 iPita 3:20.) Ịnyịnyị, angịlẹ kị wo oja ọnyịịla nya Ịpyị-Adịrahụ ọlẹ ka kpa họ ụkụrwọ pyii. (Ụkụr. 3:17-20) IPita wụrụ iNuwa nya ọngọ “ya ẹla nya Ohe Oluhye ju alodehe.” (2 Pit. 2:5)  Jaabwọ ká ang ojẹ́je ọlẹ kọ jene nya ọlẹ ya, áhị jẹ́ kori ka iNuwa á ya ẹla nya Ohe ju ọngọngọọng chọnụ wuu odehe ene ká ukpenyi-i wẹ ka. Ahị la ụkụrwọ nyọka ya ẹla nya Ohe je angịnyị chị odehe ọnụ wuu alẹ, ahị tị wẹẹ họ ụkụrwọ ọọwa la ila ọchịchị. Ma jaabwọ myị́ abwọ kahị maga ka ba, áhị ka jẹ́-ẹ ya ẹla ju ọng myị́ ọng wuu chọnụ ene ká ocheju nya odehe ka wẹ kaka. Ịyẹ tị́ du kahị ya ịnyị?

6-7. Ịyẹ tị́ du kahị ya nyori ahị ka jẹ́-ẹ kpa ẹrụ ọnyịịla wu ọng myị́ ọng ọyị wuu chọnụ ene ká ocheju ka wẹ ka?

⁶ Kụ irya u-uhye nya ẹla ọlẹ ká iJisọsị ya u-uhye ẹga ọlẹ ká ẹrụ ọnyịịla ka pwụ́ wẹẹ. O ya nyori nyị ka kpa ẹrụ ọnyịịla ọlẹ “pyẹ ẹ-ẹga myị́ ẹga nya odehe ọlẹ wuu. Chajị kọ ka ri ang nya ibeenu ha alepwoja myị́ epwoja wuu.” (Mat. 24:14) Ọmwụ ọyẹyẹ ọwẹ wẹẹ họ jịra lẹẹlẹẹ gụ olene. Oja nya nya ẹrụ ọnyịịla ọlẹ ji ị-ị̀ja lala 1,000 da uhye, bwula ịwẹbsayịtị nya jw.org nyahị, angịnyị lụmẹ-lụmẹ odehe wuu jẹ́ wẹẹ wo oja nya ẹrụ ọnyịịla nya Ịpyị-Adịrahụ.

⁷ Ma, iJisọsị tị byi angịjụgbẹyị nyamwụ nyori nyị́ ja chị “epweji myị́ epweji nya ala Isirẹlụ ọlẹ ọnụ wuu kpá,” lee ọ-ya ẹla nya Ohe ju ọng myị́ ọng wuu ene kọ ka wẹ ka. (Mat. 10:23; 25:31-33) Ẹla nya iJisọsị ọwẹ ja họ jịra ụka nyahị ọlẹ ịnyịnyị. Ụnọ uku-uku nya angịnyị alẹ kụ ẹga ọlẹ ká ehile nya ala ụwa á ya iwe da ẹrụ ọnyịịla ka waa ọyị ka. Da ọọwa u-uhye, ẹ-ẹpwụ nya iminiti ọnyị myị́ ọnyị angịnyị wẹẹ ma anyị inyeewe myang-myang. Ahị maga kahị wu ala “epwoja myị́ epwoja wuu bala alụpwọma myị́ ụpwọma wuu bala aloja myị́ oja” ọyị la ẹrụ ọnyịla mẹ. (Ọwụ. 14:6) Ma ẹlịlẹhị ri áhị ka jẹ́-ẹ wụ ọngọ myị́ ọng ọyị la ẹrụ ọnyịịla wuu ene ká ocheju ka wẹ ka.

8. Ịtọ ọlányị a tị́ ka wẹ irya nyahị myị́ u-uhye nya abwọlẹ ká iJihova wẹẹ ka la angịnyị eje ị-ịlahị? (Yẹ ifoto ịnyịnyị.)

⁸ Lẹ, ịtọ ọhẹ lẹẹ ị-ịlẹ: Angịlẹ kị la iwe nyọka wo oja nya ẹrụ ọnyịịla ene ka gbee ká akama ọtuka okpelego ka dọmwụ bẹẹ? Ányị iJihova bala Ọnyị nyamwụ, ọlẹ kọ ya ụkụrwọ nya eje ọlala ju ụ-ụbwọ, à tị́ ka họ u-uhye nyaa? (Jọn. 5:19, 22, 27; Ụkụr. 17:31) ỊBayịbụụ ọlẹ kị gba ang ọjẹ́jẹ ọlẹ bwụ ya nyori iJihova nyị́ “tịtọ ká ọngọngọhẹ ka ta ayịreji ẹ-ẹpwụ nya ọhọbịrị ọhọhọ kpong-kpong ka.” Ọkọkọ nya ọọwa, ọ tịtọ ká “ọng myị́ ọng wuu ka yẹ irya da ha Ohe Oluhye ịnyị.” (2 Pit. 3:9; 1 Tim. 2:4) Ịlẹhị lẹ, ahị jẹ́ ịngịịwẹ wuu u-uhye nya iJihova, ma ọ́ ya jehi jaabwọ kọ ka bwụ la eje u-uhye nya angịlẹ ká ẹrụ ọnyịịla á wu ọyị ka lẹ ka. Ó ri opyii ọ ka ya ang ịlẹ kọ họ lụka ọkẹkpẹ lee ịlẹ kọ ka ka họ ị-ịlahị jehi ka.

9. Ịyẹ iJihova à tị́ mẹjẹ́ẹhị ẹ-ẹpwụ nya ịBayịbụụ?

⁹ Ẹ-ẹpwụ nya ịBayịbụụ, iJihova ya ang ịhyẹ ịlẹ kọ ka họ jehi. Ọ-chụ pwokwita, ịBayịbụụ ya nyori iJihova nyị ka wule “alabwẹla onyobyi” ịlẹ kị la iwe nyọka jọ́ọ kpụ ị ka yẹda ka eji bwula igu wẹ ọhịhị. (Ụkụr. 24:15; Luk. 23:42, 43) Ẹlẹwẹ gba ịtọ ịkpọnchị ịkịla ịhyẹ kpehe.

10. Ịtọ ịkịla iyina à tị́ ji?

¹⁰ Angịlẹ wuu kị gbu lụka nya akama ọtụka okpelego ka ta ayịreji gbangbang la ọ-ka la iwe nya owuleji bwula igu kaka? ỊBayịbụụ ya gbagbịla nyori angịlẹ wuu kị ba iJihova ẹtẹ, ká ọwa bala ala ẹwụ nyamwụ wẹẹ ka tayịreji wẹẹ á ka la iwe nya owuleji bwula igu kaka. (2 Tẹs. 1:6-10) Ma angị ihihi tị bẹẹ? Ọ-chụ pwokwita, angịlẹ kị ka gbu lụka nya akama ọtụka okpelego ọlaajị nya ẹdụrụ lee ọngọgbahị oriri, lee ẹla obwagaga ọ-họ taa, lee angịlẹ ká ọngịnyị  ehe ọọnaa kpa ụbwọ nya ịlaa nwụ bẹẹ? (Ọngọ. 9:11; Sẹk. 14:13) Angịhyẹ ẹ-ẹpwụ nya angịwẹ ji ẹpwụ nya “alabwẹla onyobyi” ịlẹ kị ka wuleji bwula igu odehe onyeewe? Ahị ka jẹ́-ẹ ya ka.

ANG ỌLẸ KAHỊ JẸ́

11. U-uhye nya ịyẹ kpangga iJihova à tị́ wẹẹ ka kpa la angịnyị eje ụka nya Amagẹdọn?

¹¹ Ahị jẹ́ ang ịhyẹ lụmẹ-lụmẹ ịlẹ kị ja ka họ ị-ịlahị. Ọ-chụ pwokwita, ahị jẹ́ nyori ụka nya Amagedọn, ị ka la ọngọngọọng eje u-uhye nya abwọlẹ kọ bwu họ ẹ-ẹga nya aanịna nya ịKịrayịsị. (Mat. 25:40) Angịlẹ ká Ohe ka wa nya ịkpịlọ ka ri angịlẹ kị chẹkpẹ ju iJisọsị bala aanamwụ ịlẹ ká Ohe ya ida wụ́. Ahị tị jẹ́ ịnyịnyị nyori aanịna nya iJisọsị ịhyẹ ka jam odehe pwụ́ ụka nya akama ọtụka okpelego, gbee da ka ụka ká Amagedon á ja ka dọmwụ, ene ká Ohe ka kpaa rụ ka epwoohe. Nyọlẹ ká aanịna nya ịKịrayịsị wẹẹ ka jam odehe da ụka ọlịịwẹ wẹẹ, ọ chịkpẹẹ angị la irya ọnyịịla ka chẹkpẹ jwaa bala ụkụrwọ ọlẹ kịị họ myị́. (Mat. 25:31, 32; Ọwụ. 12:17) Ịyẹ tị́ du ká ẹlịlẹhị ịwẹ baba yẹẹyẹẹ?

12-13. Ịyẹ ayịreji nya “ịBabịlọn ọtụka” à tị́ ka gu angịnyị gbịla kaka họ myị́? (Yẹ ifoto ịnyịnyị.)

¹² Ụka ká akama ọtụka okpelego á myị́ kpá, ọ chịkpẹẹ myị́ angịlẹ kị yẹ ayịreji ọtata nya “ịBabịlọn ọtụka” ka kpịtịya nyori Alibeenu nya iJihova nyị ya ẹla u-uhye nya ẹlẹwẹ tata lẹ. Angịhyẹ nyaa ka yẹ irya da kpụ ị ka gbịgba ha iJihova myị́?—Ọwụ. 17:5; Isi. 33:33.

¹³ Kori kọ lịnyị, ọ ka lala ụka nya iMosisi ụ-ụwa Ijipiti. Kpịtịya nyori “iru nya angịkịla datị-datị” ba ala Isirẹlụ rụ kpehe bwu Ijipiti. Angịhyẹ ẹ-ẹpwụ nyaa dọmwụ nyọka la ọmyịmyị ụka kị yẹ nyori akama ịlẹ wuu ká iMosisi ya u-uhye nya Ijipiti họ jịra. (Ehe. 12:38) Kori kọ la ịnyịnyị ụka kị ta ịBabịlọn ọtụka ayịreji kpá bẹẹ? Ọ ka wụụhị ẹjẹ nyọlẹ ká angịkịla jẹ́ wẹ ka julahị lụka o-kpii ene nya Amagẹdọn? Eheehe! Ahị tị́ tịtọ kahị ka la abwụma nya Adahị olepwoohe, ko ri “Ohe Oluhye ọlahyẹẹrwẹrwa bala ọlọnahị ọlẹ koo ju agbama hyaa ka, kọ la  ọháha o-gbu enyi-ka bala o-ju ọdahịhile.” b—Ehe. 34:6.

14-15. Ẹga ọlẹ ká ọngịnyị kụ lee ụka ọlẹ ká ọngịnyị gbụ à dudu ká ọngịnyị ka yé ọhịhị ọmyịmyị-ka lẹ? Wụlẹ wẹẹ. (Eje Ọnyịịla 33:4, 5)

¹⁴ Ụka ọhẹ, ahị kaa wo ká angịnyị ka ya nyori, “Ọ ka hám gụ kori ká alugbiyegu nyam ịlẹ kị jẹ́ ẹlịlẹhị ka á gbu ene ká akama ọtụka okpelego ka dọmwụ chajị ká ẹhị ọrịrịị-rịrị nya owuleji bwula igu ka ji haa.” Ahyẹẹrwẹrwa à du ká angịhyẹ kaa ya ẹla ụma ọlịịwẹ lẹ. Ma ọngịnyị ọ-ka ye ọhịhị ọmyịmyị-ka á kpụpnịrọ uka ọlẹ kọ gbu ka. IJihova ri ọngọ la eje ọkpẹẹkpẹẹ—ọ ja cheje ọnyịịla ọlẹ kọ la kpakpa. (Wa Eje Ọnyịịla 33:4, 5.) Ahị la ahị ọdahile nyori “Agaba ọ-cheje ọtụka-ọtụka nya alodehe wuu” ka cheje ọlẹ kọ chịla pyii lẹ.—Ọmwụ. 18:25.

¹⁵ Ahị tị ka jẹ́-ẹ ya ịnyịnyị nyori ọngịnyị ọ-ka yé ọhịhị ọmyịmyị-ka á kpụnịrọ ẹga ọlẹ kọ kụ ka. IJihova á ka myị-ị la ala ẹpwụma lee epweji ịlẹ ká ẹrụ ọnyịịla á wu ọyị lẹka eje nya “embiri” ẹnẹnẹhẹ ka. (Mat. 25:46) Agaba ọ-cheje ọtụka-ọtụka nya alodehe wuu kpahị ju angịlịnyị gụ́ụhị ahị wẹẹ. Áhị jẹ́ jaabwọ ká iJihova ka họ ụka nya akama ọtụka okpelego kpangga ka. Ma angịhyẹ ka la iwe nyọka jẹ́ ang u-uhye nya iJihova, la ọmyịmyị ẹ-ẹga nyamwụ, bala ọ-ka ji oye nyamwụ ụka kọ ka chị ịgọgọ ju ẹnyị nyamwụ ẹ-ẹhị nya alodehe wuu.—Isi. 38:16.

16. Ẹlịyẹ ahị tị́ jẹ́ u-uhye nya iJihova? (Yẹ ifoto ịnyịnyị.)

 ¹⁶ Bwụla ịBayịbụụ ọjẹ́jẹ, ahị wẹ ka jẹ́ nyori ọhịhị nya angịnyị ehe kpịnya yẹẹyẹẹ ẹ-ẹhị nya iJihova. Ọ hụ Ọnyẹwẹ nyamwụ kịlịya chajị kahị ka jẹ́-ẹ yé ọhịhị ọmyịmyị-ka. (Jọn. 3:16) Ahị wuu yé apyobwuna bwu ọháha nya iJihova. (Ayị. 49:15) Ọ jẹ́ ẹnyị nya ọngọngọọng nyahị wuu. Kori kahị dọmwụ gbu wẹwẹ, Ọ jẹ́ẹhị yẹẹyẹẹ kpụ ọ ka jẹ́-ẹ wuleehi eji tịrẹkpẹ chajị ọ kpịtịya nya ang myị́ ang wuu u-uhye nyahị, tụ́ ala ịla irya nya ọngọngọọng! (Mat. 10:29-31) Ahị ọdahile nyahị la kpakpa, chajị Adahị ọla epwoohe ka kpa ahyẹẹrwẹrwa la ọngọngọng eje ọlẹ kọ la kpakpa bala o-hiigu.—Jem. 2:13.

17. Ẹlịyẹ ahị tị́ wẹ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁷ Ọnwuhọ ọgbadaa ọwẹ dudu ká ẹrụ ọnyịịla ọ-kpa pyẹ nyahị ju agaga gụ olene. Ịyẹ tị́ du kahị ya ịnyị? Ịyẹ à tị́ ka guhi gbịla nyọka kịnyaa la ẹrụ ọnyịịla ọ-kpa pyẹ la abwọ ọ-ka chị́ịhị pyẹpyẹ ka? Ahị ka yé ọwẹwẹ nya ịtọ ịwẹ ẹ-ẹpwụ nya ang ọjẹ́jẹ ọkịla.