DI LESN FI STODI 19
SANG 22 Prie Fi Di Kindom Fi Kom!
Wa Wi Nuo Bout Ou Jeuova A-Go Joj Piipl Iina Di Fyuucha?
“Jeuova . . . no waahn fi kil aaf nobadi.”—2 PII. 3:9, NWT.
A DIS WI A-GO LUK PAN
Wi kyan nuo fi shuor se iina di fyuucha wen Jeuova joj piipl im a-go du wa rait an wa fier.
1. Wa a som a di big ting dem we wi si a gwaan iina fi wi taim?
A NOF big tingz wi si a gwaan ya nou. Kaa evridie wi si di sitn dem we di Baibl se wuda gwaan iina fi wi taim a apm. Laik wi si di “king a di naat” an di “king a di sout” a fait wid dem wan aneda fi si uu kyan ron tingz iina di worl. (Dan. 11:40.) An wi si di gud nyuuz bout Gad Kindom govament a priich nou muo dan no ada taim. An wi av wol iip a miliyan a piipl a lisn an a du di sitn dem we dem lorn. (Aiz. 60:22; Mat. 24:14) An wi a get nof tingz ‘a di rait taim’ we elp wi fi chos iina Jeuova muo.—Mat. 24:45-47.
2. Wa wi nuo fi shuor se, bot wa wi fi memba se?
2 Jeuova no tap elp wi fi andastan di big ting dem we a-go apm iina di fyuucha. (Pr. 4:18; Dan. 2:28) An wi kyan nuo fi shuor se wen di wos sofarieshan staat, wi a-go nuo evriting we wi niid fi nuo so dat wi kyan tan op chrang an gwaan sorv Jeuova iina dem aad taim de. Bot wi fi memba se wi no nuo evriting bout wa a-go apm iina di fyuucha. Iina da lesn ya, wi a-go luk pan wa mek wi tap biliiv som a di sitn dem we wi yuus tu biliiv, an wi a-go luk pan som a di ting dem we wi nuo bout wa a-go apm iina di fyuucha, an som a di sitn dem we Jeuova a-go du.
DI SITN DEM WE WI NO NUO
3. Wa wi yuus tu tiich se Jeuova a-go du, an wa mek wi yuus tu biliiv dat?
3 Wan taim wi yuus tu biliiv se wen di wos sofarieshan staat, nobadi naa go get di chaans agen fi staat sorv Jeuova an go chuu Aamagedan. Wi yuus tu biliiv dat kaaz a wa did apm iina di Flod iina Nowa taim. Wi did fiil se evriting we apm wid di Flod did av fi du wid sitn we a-go apm. Laik wi yuus tu biliiv se jos laik ou Jeuova did lak di aak duor bifuo di Flod staat, a siem so wen di wos sofarieshan staat it wuda komiin laik se im wuda “lak di duor” pan di piipl dem we a du wa Sietan waahn dem fi du. So nobadi els wudn get di chaans fi get siev.—Mat. 24:37-39.
4. Wi stil fiil se wa did gwaan iina di taim a di Flod av sitn fi du wid wa a-go apm iina di fyuucha? Tel wi wa mek yu se so.
4 Wi no fi fiil se evriting we did apm iina di taim a di Flod av sitn fi du wid wa a-go apm iina di fyuucha, kaaz a no dat di Baibl tiich. a Aalduo Jiizas did se di taim wen im staat fi ruul wuda komiin laik “Nowa taim,” im neva se evribadi we did liv iina Nowa taim an evriting we apm did a tel wi bout sitn we a-go apm iina di fyuucha iina wan biga wie. An im neva se di lak we Gad did lak di aak duor av notn fi du wid sitn we a-go apm iina di fyuucha niida. Bot dis no miin tu se wi kyaahn lorn notn fram wa di Baibl tel wi bout Nowa an di Flod.
5. (a) Wa Nowa did du bifuo di Flod? (Iibruu 11:7; 1 Piita 3:20) (b) A ou di priichin wok we wi a du komiin laik di priichin wok we Nowa did du?
5 Wen Nowa ier se Jeuova a-go get rid a wikid piipl, im shuo se im chos iina Jeuova wen im go mek di aak. (Riid Iibruu 11:7; 1 Piita 3:20.) A siem so tide, wen wi ier di gud nyuuz bout Gad Kindom govament, wi fi du di sitn dem we it se wi fi du. (Aks 3:17-20) Piita did se Nowa a “wan priicha we priich bout di rait wie.” (2 Pii. 2:5) Bot laik wa wi did luk pan iina di ada lesn, wi no nuo ef Nowa an im fambili did priich tu evribadi we did a liv pan di ort dem taim de bifuo di Flod. An a siem so tide, wi a wok aad fi priich tu piipl bot wi naa go get fi priich di gud nyuuz tu evribadi we de pan di ort bifuo da worl ya don. Wa mek wi se so?
6-7. Tel wi wa mek wi nuo se wi naa go get fi priich tu evribadi bifuo di worl don.
6 Tingk bout wa Jiizas did se bout di priichin wok we wi a du. Im se di gud nyuuz wuda priich “aal uova di worl. So evribadi wi get di chaans fi ier di chuut.” (Mat. 24:14) An wa im se wuda apm a apm rait ya nou muor dan no ada taim, kaa di mesij bout Gad Kindom a priich iina muo dan 1,000 langwij an piipl fram aal uova di worl kyan go pan di jw.org websait fi lorn bout it.
7 An Jiizas did tel im falara dem se dem naa go “go chuu aal a di toun dem” an get fi priich tu evribadi bifuo di worl don. (Mat. 10:23; 25:31-33) An a di siem ting fi wi tu, kaa wol iip a piipl liv iina som ieriya we wi kyaahn get fi go priich. An pan tap a dat, wol iip a biebi a baan evri minit. Aalduo wi chrai aad fi priich tu piipl iina “evri konchri, chraib, . . . an evri langwij,” wi nuo se wi naa go get fi priich tu evri singgl suol pan di ort bifuo di worl don.—Rev. 14:6.
8. Wa wi mait-a a wanda bout ou Jeuova a-go joj piipl iina di fyuucha? (Luk pan di picha dem tu.)
8 Bot wi mait-a a wanda se: A wa a-go apm tu di wan dem we neva ier di gud nyuuz bifuo di wos sofarieshan staat? An a ou Jeuova an im Bwai Pikni a-go joj dem? (Jan 5:19, 22, 27; Aks 17:31) Di mien skripcha fi da lesn ya se: “Jeuova . . . no waahn fi kil aaf nobadi. Bot wa im riili waahn a fi evribadi ton we fram dem sin an staat du wa rait.” (2 Pii. 3:9, NWT; 1 Tim. 2:4) So aalduo wi nuo dem sitn ya bout Jeuova, im no mek wi nuo wa im a-go du bout di piipl dem we no ier di gud nyuuz bifuo di wos sofarieshan staat. An im no boun fi tel wi notn niida.
A ou Jeuova a-go joj di wan dem we neva ier di gud nyuuz bifuo di wos sofarieshan staat? (Luk iina paragraaf 8) c
9. A wa Jeuova yuuz di Baibl fi mek wi nuo se?
9 Iina di Baibl, Jeuova mek wi nuo som a di ting dem we im a-go du. Laik im mek wi nuo se im a-go mek piipl we “bad” get di chaans fi kom bak alaiv tu. Som a dem piipl de neva get di chaans fi du di sitn dem we dem a lorn, an som a dem neva get di chaans fi ier di gud nyuuz. (Aks 24:15; Luuk 23:42, 43) So dis mek wi waahn di ansa fi som ada big kwestiyan.
10. Wa a som ada kwestiyan we wi mait-a aks?
10 A aal a di piipl dem we ded wen di wos sofarieshan a gwaan a-go don fa fi eva an naa go get di chaans fi kom bak alaiv? Di Baibl mek wi nuo se di piipl dem we mek op dem main fi fait gens Jeuova wen di Aamagedan waar a gwaan naa go kom bak alaiv agen. (2 Tes. 1:6-10) Bot wa bout di ada piipl dem we mait-a ded kaa dem get sik, ar kaaz a aksident, ar kaaz sumadi kil dem? (Iik. 9:11; Zak. 14:13) Dem piipl ya a-go de mongks di ‘bad piipl dem’ we Gad a-go mek kom bak alaiv? Wi no nuo.
DI SITN DEM WE WI NUO
11. A wa Jiizas a-go luk pan wen im a joj piipl wen di Aamagedan waar a gwaan?
11 Wi nuo som a di ting dem we a-go apm iina di fyuucha duo. Laik wi nuo se wen di Aamagedan waar a gwaan, Jiizas a-go luk pan di sitn dem we piipl du, laik ou dem yuus tu chriit Jiizas breda dem we get pik fi go a evn. (Mat. 25:40) Di piipl dem we Jiizas joj an se dem a shiip a-go a du tingz fi shuo se dem a bak Jiizas Krais an di wan dem we get pik fi go a evn. An wi nuo se som a di wan dem we get pik fi go a evn a-go stil de pan ort wen di wos sofarieshan staat. An dem naa go go a evn til likl bifuo di Aamagedan waar staat. So az lang az dem de pan di ort nou, di piipl dem we riili waahn fi du wa Jeuova waahn dem fi du kyan du tingz fi shuo se a dem dem a bak. (Mat. 25:31, 32; Rev. 12:17) Wa mek dis a wan big ting?
12-13. Wa som piipl mait-a du afta dem si se “Powaful Babilan” get mash dong? (Luk pan di picha dem tu.)
12 Aal afta di wos sofarieshan staat, som a di piipl dem we si se “Powaful Babilan” get mash dong a-go memba se di Jeuova Witnis dem yuus tu priich se dis a-go apm. An wen som a dem piipl de si dem sitn ya a apm, dem mait-a waahn fi staat sorv Jeuova.—Rev. 17:5; Izii. 33:33.
13 Ef piipl du dat, it wuda komiin laik wa did apm iina Iijip iina Muoziz taim. Kaa dem taim de a wol iip a piipl we a neehn Izrelait did jain op wid dem wen dem a lef Iijip. Som a dem piipl ya mait-a did dis staat fi chos iina Jeuova wen dem si se wa Muoziz se wuda apm did apm wen di Ten Plieg Dem did gwaan. (Ek. 12:38) Ef sopm laik dat apm afta Powaful Babilan get mash dong, wi a-go beks se dem piipl de kom jain op wid wi? Nuo sa! Kaa wi waahn fi mek shuor se wi a du tingz laik ou wi Faada, Jeuova wuda dwi’it. Kaa im a “wan Gad we gud an kain. Im no kwik fi get beks an im a-go lov yu an stik tu yu fi eva, an im aalwiez du wa im se im a-go du.” b—Ek. 34:6.
Som piipl we si wen “Powaful Babilan” get mash dong a-go memba se di Jeuova Witnis dem yuus tu tiich se dis did a-go apm (Luk iina paragraaf 12-13) d
14-15. Sumadi a-go get fi liv fi eva dis kaaz a wen dem ded, ar kaaz a wich paat dem did liv? Tel wi wa mek yu se so. (Saam 33:4, 5)
14 Somtaim wi mait-a ier wi breda an sista dem se, “It wuda beta ef mi fambili dem we naa sorv Jeuova ded bifuo di wos sofarieshan staat kaa dem wuda get di chaans fi kom bak alaiv agen.” Wi nuo se a kaa dem lov dem fambili mek dem se dat. Bot wa a-go apm tu sumadi iina di fyuucha na’av notn fi du wid di taim wen dem ded. Jeuova a di porfek joj, an im aalwiez du wa rait an du tingz iina wan fier wie tu. (Riid Saam 33:4, 5.) So wi kyan nuo fi shuor se “di Wan we joj evribadi” a-go du wa rait.—Jen. 18:25.
15 An wi nuo se sumadi naa go get di chaans fi liv fi eva jos kaaz a wich paat dem liv niida. So Jeuova naa go se uol iip a piipl a guot kaa dem liv iina som plies we dem neva get di chaans fi ier di gud nyuuz bout Gad Kindom. (Mat. 25:46) Wi nuo se Jeuova a di joj we aalwiez du wa rait, an im kier bout dem piipl de wol iip muor dan wi kuda eva kier bout dem. Wi no nuo ou Jeuova a-go du tingz wen di wos sofarieshan a gwaan, kaa im mait-a mek som piipl get di chaans fi lorn bout im dem taim de so dat dem kyan chos iina im an shuo se dem waahn fi de pan fi im said wen im mek evribadi pan di ort nuo se a im a Jeuova.—Izii. 38:16.
Afta di wos sofarieshan staat, wen som piipl si di sitn dem we di Baibl se wuda apm a apm, dem mait-a waahn fi staat sorv Jeuova.
16. Wa wi get fi nuo se bout Jeuova? (Luk pan di picha tu.)
16 Wen wi stodi di Baibl, wi get fi si se laif wot nof tu Jeuova. An a das wai im sen im Bwai Pikni fi kom ded fi wi so dat wi kyan get di chaans fi liv fi eva. (Jan 3:16) Aal a wi si umoch Jeuova lov wi. (Aiz. 49:15) Im nuo aal a wi bai wi niem. Bot no onggl dat, im nuo evriting bout wi. So ef wi ded, im a-go mek wi kom bak alaiv wid di siem wiez we wi did av, an piipl a-go kyan luk pan wi an nuo se a wi. An im a-go mek wi memba di ting dem we wi did nuo bifuo wi ded. (Mat. 10:29-31) So dis mek wi si se wi kyan nuo fi shuor se wi Faada, Jeuova a-go joj evribadi di rait wie, an im redi fi paadn piipl.—Jmz. 2:13.
Wi kyan nuo fi shuor se wi Faada, Jeuova a-go joj evribadi di rait wie, an im redi fi paadn piipl (Luk iina paragraaf 16)
17. Wa a di kwestiyan dem we wi a-go get di ansa fa iina di neda lesn?
17 Nou dat wi get fi nuo di chuut bout sortn tingz we wi yuus tu biliiv, it mek wi si se wi fi a wok aad fi du di priichin wok. Wa mek wi se dat? An wa push wi fi du di priichin wok no mata wa? Wi a-go get di ansa fi dem kwestiyan ya iina di neda lesn.
SANG 76 Duohn Yu Aat Fiil Gud?
a Fi fain out wa mek wi no stil biliiv se evriting we did gwaan wid di Flod av sopm fi du wid fi wi taim, luk iina The Watchtower fi Maach 15, 2015 pan di paat we niem “This Is the Way You Approved” p. 7-11.
b Afta Powaful Babilan get mash dong, aal a Jeuova piipl a-go get tes wen Gag we kom fram Miegag a chrai fi fait gens Jeuova. An enibadi we jain op wid Jeuova piipl afta Powaful Babilan get mash dong a-go get tes dem taim de tu.
c DIS A WA DI PICHA DEM A SHUO WI: Chrii picha we mek wi si wa mek a no evribadi a-go ier di mesij we wi a priich: (1) Wan uman we liv somwe we di mien rilijan we a ron tingz mek it no sief fi shi ier di mesij bout Gad Kindom govament, (2) kaa di govament put wi wok anda lak dong, it no sief fi wan man an im waif we liv iina da konchri de ier di mesij, an (3) wan man liv iina wan faar plies we mek it riili aad fi nobadi riich de fi priich tu im.
d DIS A WA DI PICHA A SHUO WI: Wan yong uman we tap sorv Jeuova a memba di ting dem we shi yuus tu lorn bout ou “Powaful Babilan” wuda get mash dong. Shi go bak tu ar mada an faada kaa shi waahn fi staat sorv Jeuova agen. Ef wi si dem sopm ya a apm, wi waahn fi du laik Jeuova we redi fi paadn piipl an we a shuo se im fiil it fi dem. So wi fi api ef sumadi staat fi sorv Jeuova agen.
