1. Myit kahpra hpa aten hta asak hkrung nga ai ngu hpa majaw lu tsun ai kun?

 GRAI myit kahpra hpa aten hta anhte asak hkrung nga ai. Chyum myihtoi ga ni hpring tsup ai hpe, shani shagu mu lu nga ai. Ga shadawn, mungkan hta n-gun ja htum byin na matu, “dingdung hkawhkam” hte “dingda hkawhkam” htim gasat ai hpe mu lu nga ai. (Dan 11:40) Mungdan kabu gara shiga hpe mungkan ting hta hkaw tsun ai, wan hku law ai masha ni hkap la ai hpe mu lu nga ai. (Esa 60:22; Mat 24:14) “Aten dep, NWT” wenyi malu masha hpe nhpaw n-ya lu sha nga ai.—Mat 24:45-47.

2. Hpa hpe kam mai ai kun? Raitim, hpa hpe hkap la ra ai kun?

² Kade n na yang byin na ahkyak ai mabyin ni hte seng nna anhte grau chye na hkra, Yehowa matut karum ya nga ai. (Gsh 4:18; Dan 2:28) Ru tsang kaba hpang ai aten hta, chye ging ai lam yawng, anhte chye nga na hpe kam mai ai. Dai zawn yakhkak ai aten hta pyi, matut nna gara hku sadi dung lu na, matut gara hku kahkyin gumdin lu na ngu ai lam ni hpe chye na re. Raitim, anhte n chye ai lam ni mung nga na hpe hkap la ra ai. Mabyin nkau hte seng nna moi de sanglang dan wa ai lam hpe, hpa majaw bai galai shai ra ai lam, ndai sumhpa  hta bawngban na re. Htawm hpang hta, sumsing Kawa gara hku galaw ya na ngu ai hte seng nna chye da ai lam nkau hpe mung bawngban mat na re.

ANHTE HPA NI N CHYE AI KUN?

3. Yehowa hpe n kamsham ai ni gaw shi a maga tsap na matu gara aten hta ahkaw ahkang n nga sai ngu, moi de sanglang dan wa ai kun? Hpa majaw kun?

³ Ru tsang kaba hpang ai shaloi, Yehowa hpe n kamsham ai ni gaw shi a maga tsap na matu, Hara Magedon kaw na lawt na matu, ahkaw ahkang n nga sai ngu, moi de sanglang dan wa ai. Hka sha-u ing ai labau gaw, htawm hpang mabyin ni a shingnip shingna ngu sawn la nna, dai zawn sanglang dan wa ai re. Ga shadawn, Hka Sha-u Garai N Ing shi yang, sanghpaw chyinghka hpe Yehowa pat dat ai zawn, ru tsang kaba hpang ai shaloi, masha ni Yehowa maga tsap na matu, Hara Magedon hta lawt na matu ahkaw ahkang n lu sai ngu sawn la wa ai.—Mat 24:37-39.

4. Hka sha-u ing ai labau gaw, htawm hpang mabyin ni a shingnip shingna re ngu hpa majaw n sawn la ging ai kun?

⁴ Hka sha-u ing ai labau gaw, htawm hpang mabyin ni a shingnip shingna re ngu sawn la ging ai kun? N sawn la ging ai. Hpa majaw kun? Chyum Laika hta ding tawk n tsun da ai majaw re. a Yesu gaw shi du wa na aten hpe “Noa a ban” hte shingdaw da ai. Raitim, sanghpaw chyinghka hpe Yehowa pat dat ai zawn re ai mabyin ni gaw, htawm hpang mabyin ni a  shingnip shingna re ngu n tsun ai. Raitim, Noa a lam, hka sha-u ing ai lam kaw na sharin la hpa lam ni naw nga ai.

5. (a) Hka Sha-u Garai N Ing shi yang, Noa hpa galaw ai kun? (Hebre 11:7; 1 Petru 3:20) (b) Noa a hkaw tsun bungli hte anhte a prat na hkaw tsun bungli gaw gara hku bung ai kun?

⁵ Yehowa a sadi jaw ai lam hpe na ai shaloi, makam masham a majaw Noa sanghpaw gap ai. (Hebre 11:7; 1 Petru 3:20 hpe hti u.) Dai zawn sha, Mungdan kabu gara shiga hpe na ai ni gaw, na ai hpe kam ai lam tatut madun ra ai. (Kas 3:17-20) Noa hpe “ding hpring ai tara hkaw dan ai sara” ngu Petru tsun ai. (2 Pe 2:5) Raitim, shawng na sumhpa hta bawngban wa ai hte maren, Hka Sha-u Garai N Ing shi yang, masha yawng hpe Noa hkaw tsun wa ai, n hkaw tsun wa ai hpe anhte n chye ai. Dai ni aten, mungkan ting hta myit rawt let anhte hkaw tsun nga ai. Raitim, jahtum n du shi yang, masha shagu kaw kabu gara shiga du lu na n re. Hpa majaw kun?

6-7. Jahtum n du shi yang, mungkan ting na masha shagu hpe hpa majaw kabu gara shiga hkaw tsun lu na n re ai kun?

⁶ “Masha amyu baw shagu a matu mara sakse tai lu u ga, mungkan ting hta” kabu gara shiga hkaw tsun ra na ngu Yesu tsun da ai. (Mat 24:14) Dai ni aten hta dai myihtoi ga gaw, shawoi na hta grau nna hpring tsup taw ai. Mungdan kabu gara shiga hte seng ai laili laika ni hpe, amyu ga hkying mi jan hte lu mai sai. jw.org website a majaw, masha law malawng kabu gara shiga chye lu sai.

⁷ “Mare ni hpe garai n htum lu yang” (sh) masha shagu hpe kabu gara shiga n hkaw tsun ngut shi yang, shi du wa na ngu sape ni hpe Yesu tsun ai. (Mat 10:23; 25:31-33) Anhte a prat hta, dai ga ni hpring tsup wa na re. Hkaw tsun bungli hkum pat da ai shara ni hta, masha wan hku nga ai. Minit shagu hta, tsa lam hku law ai ma ni shangai wa ai. “Amyu baw shagu, baw lakung shagu, ga amyu shagu” tsun ai ni hpang de, kabu gara shiga hkaw tsun lu na matu, anhte dang lu ai made shakut ai. (Shr 14:6) Raitim, jahtum n du shi yang, mungkan ting hta nga ai masha yawng hpe kabu gara shiga hkaw tsun lu na n re.

8. Htawm hpang tara jeyang ai lam hte seng nna hpa myit hkrup chye ai kun? (Sumla ni hpe mung yu u.)

⁸ Ru tsang kaba n du shi yang, kabu gara shiga n na lu dat ai ni hpe Yehowa hte tara jeyang na ahkang lu da ai Kasha gaw, gara hku tara jeyang na kun? ngu nna myit hkrup na re. (Yhn 5:19, 22, 27; Kas 17:31) Ndai sumhpa a madung chyum daw hta tsun da ai hte maren, Yehowa gaw, “yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai.” (2 Pe 3:9; 1 Tm 2:4) Raitim, kabu gara shiga n na shi ai ni hpe gara hku tara jeyang na lam n tsun dan shi ai. Tsun dan na lit mung n nga ai.

9. Chyum Laika kaw nna anhte hpe Yehowa hpa tsun da ai kun?

⁹ Yehowa gaw, shi galaw na lam nkau hpe Chyum Laika kaw nna tsun dan da ai. Ga shadawn, kabu gara shiga na lu na matu, akyang lailen galai shai na matu ahkaw ahkang n lu dat ai “n ding n man ai ni” hpe bai jahkrung sharawt ya na re. (Kas 24:15; Luk 23:42, 43) Dai lam a majaw ahkyak ai ga san ni pru wa ai.

10. Gara ga san ni pru wa ai kun?

¹⁰ Ru tsang kaba laman, si mat ai ni yawng htani htana jahten hkrum na kun? Bai hkrung rawt wa na matu myit mada lam n nga sai kun? Hara Magedon hta, Yehowa hte shi a hpyen dap jahten kau na hpyen ni gaw, bai hkrung rawt wa na n re ngu Chyum Laika hta asan sha tsun da ai. (2 Ht 1:6-10) Raitim, ru tsang kaba laman, machyi makaw ai majaw,  asak kaba ai majaw, ang katut mabyin a majaw, masha a majaw si mat ai ni mung nga chye ai. (Hpj 9:11; Zeh 14:13) Mungkan nnan hta, bai hkrung rawt wa na “n ding n man ai” ni hta shanhte kaw na nkau lawm na kun? anhte n chye ai.

ANHTE HPA HPE CHYE AI KUN?

11. Hara Magedon hta masha ni gaw, hpa hpe madung tawn nna tara jeyang hkrum na kun?

¹¹ Htawm hpang mabyin ni hte seng ai lam law law hpe anhte chye da ai. Ga shadawn, Hkristu a kanau ni hpe gara hku kanawn mazum ai hta madung nna Hara Magedon hta tara jeyang hkrum na. (Mat 25:40) Sagu hku nna tara jeyang hkrum ai ni gaw, namman chya hkam ai ni hte Hkristu hpe madi shadaw ai lam madun nga na. Ru tsang kaba hpang ai aten hta, Hkristu a kanau nkau gaw, mungkan ga hta matut nga nga na. Hara Magedon hpang na mahka hta, sumsing lamu de shaga la hkrum na. Dai majaw, Hkristu a kanau nkau mungkan ga hta nga nga ai laman, shanhte hte shanhte a bungli hpe madi shadaw ai lam madun na ahkaw ahkang mung nga na re. (Mat 25:31, 32; Shr 12:17) Dai lam gaw hpa majaw ahkyak ai kun?

12-13. “Galu kaba ai Babelon” jahten hkrum ai hpe mu ai hpang, nkau gara hku bai htang wa chye ai kun? (Sumla ni hpe mung yu u.)

¹² Ru tsang kaba hpang ai hpang, “galu kaba ai Babelon” jahten hkrum ai hpe mu ai shaloi, ndai lam hte seng nna Yehowa Sakse ni tsun dan ga ai lam, nkau bai dum wa chye ai. Dai mabyin ni hpe mu nna nkau myit galai shai wa na kun?—Shr 17:5; Eze 33:33.

¹³ Mawshe a prat hta, Egutu mung kaw hpa byin wa ai lam myit yu u. Egutu mung kaw na Israela ni pru wa ai shaloi, “amyu kaga law law ni mung” hkan nang wa ai. Shanhte kaw na nkau gaw, Mawshe tsun ai hte maren, ari zinli 10 byin wa ai hpe mu ngut ai hpang, Yehowa hpe kam wa ai rai na re. (Pru 12:38) Galu Kaba Ai Babelon jahten hkrum ngut ai hpang, dai zawn byin wa yang, jahtum du na mahka hta she, anhte hte sa matut mahkai taw ai ngu myit nna, pawt na kun? Pawt na n re. “Sumnung ai myit hte chyeju hpring ai,  myit galu ai hte n-gaw nwai re ai, matsan dum ai hte sadi sahka hpring ai” sumsing Kawa Yehowa hpe anhte kasi la mayu ai. b—Pru 34:6.

14-15. Masha langai htani htana asak hkrung na, n hkrung na ngu ai gaw, shi gara aten hta si ai, gara shara hta nga ai ngu ai hta madung ai kun? Sanglang dan u. (Shakawn 33:4, 5)

¹⁴ N kamsham ai nta masha nkau hte seng nna, ‘ru tsang kaba n hpang shi yang shanhte si mat yang kaja na re. Rai yang she, bai hkrung rawt wa na myit mada lam nga na’ ngu hpunau nauna nkau tsun chye ai. Tsawra ai majaw tsun ai re. Raitim, masha langai htani htana asak hkrung na, n hkrung na ngu ai gaw, shi gara aten hta si ai ngu ai hta n madung ai. Yehowa gaw hkum tsup ai Tara Agyi re. Dai majaw, Karai a tara jeyang ai lam ni gaw, galoi mung dingman nna tara rap ra ai. (Shakawn 33:4, 5 hpe hti u.) “Ga ningtsa ting a Tara agyi” gaw, dingman ai hku galaw na hpe kam mai ai.—Nin 18:25.

¹⁵ Masha langai htani htana asak hkrung na, n hkrung na ngu ai gaw, gara shara hta nga ai ngu ai hta mung n madung ai. Mungdan shiga hpe kalang mung n na ga ai shara hta nga ai wan hku law ai masha ni hpe “bainam” hku nna Yehowa kalang ta n masat kau ai. (Mat 25:46) Shanhte a matu anhte myit ya ai hta na, ga ningtsa ting a dingman ai Tara Agyi gaw, grau nna pyi myit ya ai. Ru tsang kaba laman, Yehowa galaw na mauhpa  mabyin ni hpe anhte n chye ai. Yehowa gaw, shi a mying hpe chyoi pra hkra galaw ai shaloi, mu lu ai lam ni a majaw, shi a lam masha nkau chye mayu wa na, kamsham wa na, shi maga tsap mayu wa na re.—Eze 38:16.

16. Yehowa a lam anhte hpa ni chye da ai kun? (Sumla hpe mung yu u.)

¹⁶ Masha asak hpe Yehowa kade daram manu shadan ai lam, Chyum Laika hkaja ai shaloi chye wa ai. Anhte yawng htani htana asak lu na matu, Kasha a asak hpe jaw wa ai. (Yhn 3:16) Anhte hpe tsawra matsan dum ai. (Esa 49:15) Langai hpra hpe mying hte nan chye ai. Si mat yang pyi, anhte a laklai ai lam ni, matsing nyan ni bang nna jahkrung sharawt ya lu ai du hkra, langai hpra a lam atsawm chye ai. (Mat 10:29-31) Dai majaw, langai hpra hpe, rap ra ai hku, dingman ai hku, tsawra myit hte tara jeyang na ngu ai hpe kam mai ai.—Yak 2:13.

17. Hpang na sumhpa hta hpa lam bawngban na kun?

¹⁷ Ya na zawn, chye na ai lam galai shai dat ai majaw, hkaw tsun bungli shawoi na hta grau ahkyak ai lam chye na wa ai. Hpa majaw kun? Kabu gara shiga hpe myit rawt let matut hkaw tsun na matu hpa gaw shadut ya ai kun? Dai ga san hpe hpang na sumhpa hta bawngban na re.