TƆM ÑƲƲ ŊGƲ ÐƖKPƐLƖKƖƔ YƆ 19
HENDU 22 Kewiyaɣ paɣzɩ ka-tʋmɩyɛ —Kɔkɔɔ lɔŋ!
Tɔm ndʋ ɖɩsɩma pɩlɩɩnɩ ɛzɩma Yehowa kaɣ ɛyaa tɔm hʋnʋʋ cee wayɩ yɔ pɩ-yɔɔ?
«Yehowa . . . [tɩsɔɔlɩ] se paɖɩzɩ nɔɔyʋ.»—2 PƖY. 3:9.
MBƲ PƖ-YƆƆ PƖWƐƐ SE ŊKA ÑA-LƖMAƔZA YƆ
Ða-taa pɩzɩɣ nɛ pɩtɛ se ɛzɩma Yehowa kaɣ ɛyaa tɔm hʋnʋʋ cee wayɩ yɔ, pɩkaɣ wɛʋ siɣsiɣ nɛ ɛɛkaɣ muluu nɔɔyʋ.
1. Ɛbɛ yɔɔ ɖɩpɩzɩɣ nɛ ɖɩyɔɔdɩ se ɖɩwɛ alɩwaatʋ kɩbandʋ taa kpem?
ÐƖWƐ alɩwaatʋ kɩbandʋ taa kpem. Paa evemiye nɖɩ, ɖɩnaɣ ɛzɩma Bibl taa natʋ tɔm wɛɛ nɛ tɩlakɩ yɔ. Ðɩna kɩɖaŋ nɩɩyɩ: Ðɩnaɣ se «hayo kiŋ wiyaʋ» nɛ «hadɛ kiŋ wiyaʋ» pɛwɛɛ nɛ palʋkɩnɩ ɖama mbʋ pʋyɔɔ yɔ, pa-taa paa weyi wɛɛ nɛ ɛñakɩ pana se e-kewiyaɣ ɛkɩlɩnɩ ɖoŋ ɛjaɖɛ yɔɔ. (Dan. 11:40, pɩ-tɛɛ tɔm) Ðɩnaɣ ɖɔɖɔ ɛzɩma pɛwɛɛ nɛ posusuu Kewiyaɣ tɔm kɩbandʋ tɛtʋ kpeekpe yɔɔ nɛ ɛyaa miiliyɔɔwaa sakɩyɛ lɩzɩɣ se pɛsɛɣ Yehowa yɔ. (Iza. 60:22; Mat. 24:14) Pɩtasɩ lɛ, ɖɩwɛɛ nɛ ɖihikiɣ fezuu taa tɔɔnaɣ sakɩyɛ «alɩwaatʋ ndʋ tɩmʋnaa yɔ tɩ-yɔɔ.»—Mat. 24:45-47.
2. (a) Tɔm ndʋ ɖa-taa pɩzɩɣ nɛ pɩtɛmna? (b) Tɔm ndʋ pɩwɛɛ se ɖiɖiɣzina?
2 Yehowa wɛɛ nɛ ɛsɩɣnɩ-ɖʋ se ɖɩnɩɩ lakasɩ sɔsɔsɩ nzɩ sɩkaɣ labʋ nɛ ɛsɩndaa yɔ sɩ-taa nɛ pɩkɩlɩ. (Adu. 4:18; Dan. 2:28) Ða-taa pɩzɩɣ nɛ pɩtɛ se kʋñɔŋ sɔsɔʋ kaapaɣzɩɣ lɛ, ɖɩtɩlɩ tɔm ndʋ payɩ pɩpɔzʋʋ se ɖɩtɩlɩ yɔ se pɩsa nɛ ɖɩɖɔkɩ ɖa-laŋɩyɛ kpam nɛ ɖɩwɛɛ nɔɔ kʋɖʋmaɣ taa kaɖɛ alɩwaatʋ ndʋ tɩ-taa. Ɛlɛ, pɩwɛɛ se ɖiɖiɣzina se ɖɩɩsɩŋ tɔm tɩŋa mbʋ pɩkaɣ labʋ nɛ ɛsɩndaa yɔ pɩ-yɔɔ. Tɔm ñʋʋ kʋnɛ kɩ-taa, kajalaɣ lɛ ɖɩkaɣ naʋ mbʋ pʋyɔɔ ɖɩlɛɣzɩ tɔm ndʋ ɖɩɩyɔɔdɩ lakasɩ nzɩ sɩ-taa nasɩyɩ yɔɔ yɔ. Pʋwayɩ lɛ, ɖɩkaɣ naʋ tɔm ndʋ ɖɩsɩm mbʋ pɩkaɣ labʋ cee wayɩ yɔ pɩ-yɔɔ yɔ nɛ ndʋ ɖɩsɩm mbʋ ɖa-Caa weyi ɛwɛ ɛsɔdaa yɔ ɛkaɣ labʋ yɔ.
TƆM NDƲ ÐƖƖSƖŊ YƆ
3. (a) Ðɩɩyɔɔdaa se ɛyaa mba kʋñɔŋ sɔsɔʋ paɣzɩɣ nɛ patɩkpaɣtɩ lɩmaɣzɩyɛ se pɛsɛɣ Yehowa yɔ, waɖɛ nɖɩ paatasɩɣ-wɛ haʋ? (b) Ɛbɛ yɔɔ ɖɩɩyɔɔdɩ tɔm ndʋ?
3 Ðooo lɛ, ɖɩɩyɔɔdaa se kʋñɔŋ sɔsɔʋ ñɩtɩɣ nɛ kɩpaɣzɩ lɛ, Yehowa ɛɛtasɩɣ haʋ ɛyaa waɖɛ se pɛwɛɛnɩ tisuu ɛ-yɔɔ nɛ pehiɣ ñʋʋ yabʋ Armaagedɔɔ you taa. Ðɩɩyɔɔdɩ tɔm ndʋ mbʋ pʋyɔɔ yɔ ɖɩɩnɩ pɩ-taa se mbʋ pɩɩlabɩ Tɛʋ Sɔsɔʋ alɩwaatʋ taa yɔ, pɩsɩŋnɩ mbʋ pɩkaɣ labʋ cee wayɩ yɔ pɩ-taa nabʋyʋ. Ðɩmaɣzaɣ se ɛzɩ Yehowa kaaɖɩɣʋ aɖakaɣ nɔnɔɔ pʋcɔ nɛ Tɛʋ Sɔsɔʋ paɣzɩ nɩʋ yɔ, mbʋ ɖɔɖɔ «ɛkaɣ ɖɩɣʋ nɔnɔɔ» alɩwaatʋ ndʋ kʋñɔŋ sɔsɔʋ paɣzɩɣ yɔ se Sataŋ ɛjaɖɛ ɖɩnɛ ɖɩ-taa ɛyaa mba pɛfɛyɩnɩ tisuu yɔ pataahiɣ ñʋʋ yabʋ.—Mat. 24:37-39.
4. Ɛbɛ yɔɔ ɖɩɩtasɩɣ maɣzʋʋ se mbʋ payɩ pɩlabɩ Tɛʋ Sɔsɔʋ alɩwaatʋ taa yɔ, pɩ-taa paa ɛyʋ weyi nɛ paa wonuu ŋgʋ lɛ kɩsɩŋnɩ mbʋ pɩkaɣ labʋ cee wayɩ yɔ pɩ-taa paa mbʋ?
4 Pɩmʋnɩ mbʋ se ɖɩyɔɔdɩ se mbʋ pɩɩlabɩ Tɛʋ Sɔsɔʋ alɩwaatʋ taa yɔ, pɩsɩŋnɩ mbʋ pɩkaɣ labʋ cee wayɩ yɔ pɩ-taa nabʋyʋ yaa we? Aayɩ. Ɛbɛ yɔɔ? Mbʋ pʋyɔɔ yɔ Bibl tɩyɔɔdɩ mbʋ. a Yesu kpaɣ «Noowa alɩwaatʋ» nɛ ɛmaɣzɩnɩ ɛ-wɛʋ alɩwaatʋ, ɛlɛ ɛtɩyɔɔdɩ se mbʋ payɩ pɩɩlabɩ Tɛʋ Sɔsɔʋ alɩwaatʋ taa yɔ, pɩ-taa paa ɛyʋ weyi nɛ paa wonuu ŋgʋ lɛ kɩsɩŋnɩ mbʋ pɩkaɣ labʋ cee wayɩ yɔ pɩ-taa paa mbʋ, nɛ ɛtɩyɔɔdɩ ɖɔɖɔ se ɛzɩma Yehowa ɖɩɣ aɖakaɣ nɔnɔɔ yɔ, pɩsɩŋnɩ ɖɔɖɔ mbʋ pɩkaɣ labʋ cee wayɩ yɔ pɩ-taa nabʋyʋ. Ɛlɛ pɩtɩwɩlɩ se ɖɩɩpɩzɩɣ nɛ ɖɩkpɛlɩkɩ lɔŋ Noowa nɛ Tɛʋ Sɔsɔʋ kɛdaɣ taa.
5. (a) Pʋcɔ nɛ Tɛʋ Sɔsɔʋ nɩɣ lɛ, ɛbɛ Noowa kaalaba? (Ebree mba 11:7; 1 Pɩyɛɛrɩ 3:20) (b) Tɔm susuu tʋmɩyɛ hɔɔlʋʋ taa lɛ, ɛzɩma tɩyɛ ɖɛ-wɛtʋ nɩɣzɩnɩ Noowa ñɩndʋ?
5 Alɩwaatʋ ndʋ Noowa nɩ Yehowa nɩŋgbaŋʋʋ hɔm tɔm yɔ, ɛsaɣ aɖakaɣ nɛ pɩwɩlɩ se ɛɛwɛnɩ tisuu. (Kalɩ Ebree mba 11:7; 1 Pɩyɛɛrɩ 3:20.) Mbʋ ɖɔɖɔ ɛyaa mba pewelisiɣ Ɛsɔ Kewiyaɣ tɔm kɩbandʋ yɔ, pɩwɛɛ se pɔɖɔ tɔm ndʋ panɩwa yɔ tɩ-yɔɔ. (Tʋma 3:17-20) Pɩyɛɛrɩ ya Noowa se «siɣsiɣ wɛtʋ tɔm susuyu.» (2 Pɩy. 2:5) Ɛlɛ, ɛzɩ ɖɩyɔɔdʋʋ tɔm ñʋʋ ŋgʋ kɩɖɛwa yɔ kɩ-taa yɔ, ɖɩɩsɩŋ se Noowa kaañaɣ pana se esusi tɔm ɛyaa mba payɩ paawɛ tɛtʋ yɔɔ yɔ pʋcɔ nɛ Tɛʋ Sɔsɔʋ nɩɣ yaa ɛtɩla mbʋ. Sɔnɔ ɖɩwɛɛ nɛ ɖɩñakɩ pana se ɖisusi tɔm ɛjaɖɛ kpeekpe yɔɔ ɛyaa, nɛ ɖɩwɛɛ nɛ ɖɩlakɩ tʋmɩyɛ nɖɩ nɛ kpekpeka. Ɛlɛ, paa ɖɩtɩɩñaɣ pana ɛzɩma yɔ, ɖɩɩkaɣ pɩzʋʋ nɛ ɖisusi tɔm kɩbandʋ ɛyaa mba payɩ pɛwɛ tɛtʋ yɔɔ yɔ pʋcɔ nɛ ɛjaɖɛ tɛm talɩ. Ɛbɛ yɔɔ?
6-7. Ɛbɛ yɔɔ ɖɩpɩzɩɣ nɛ ɖɩyɔɔdɩ se ɖɩɩkaɣ pɩzʋʋ nɛ ɖisusi tɔm kɩbandʋ paa ɛyʋ weyi tɛtʋ kpeekpe yɔɔ pʋcɔ nɛ ɛjaɖɛ tɛm talɩ?
6 Maɣzɩ tɔm ndʋ Yesu yɔɔdɩ ɖɔ-tɔm susuu tʋmɩyɛ yɔɔ yɔ tɩ-yɔɔ. Ɛɛyɔɔdaa se pakaɣ susuu tɔm kɩbandʋ «tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe.» (Mat. 24:14) Sɔnɔ kpem natʋ tɔm ndʋ tɩwɛɛ nɛ tɩlakɩ nɛ pɩkɩlɩɣ. Pɛɖɛzɩ Kewiyaɣ tɔm kʋnʋmɩŋ weyi ɩ-taa yɔ, ɩcɛzɩ 1000; nɛ ɖɛ-tɛ intɛrnɛɛtɩ lone jw.org wɛɛ nɛ ɖɩsɩɣnɩ ɛjaɖɛ yɔɔ ɛyaa hɔɔlʋʋ sɔsɔʋ se panɩɩ Kewiyaɣ tɔm.
7 Paa mbʋ yɔ, Yesu kaaheyi ɛ-tɔmkpɛlɩkɩyaa se paakaɣ ‘cɔʋ tɛtʋ tɩŋa nɛ pɛtɛ’ yaa paakaɣ pɩzʋʋ nɛ posusi ɛyaa tɩŋa tɔm pʋcɔ nɛ pɩtalɩ alɩwaatʋ ndʋ ɛkɔŋ yɔ. (Mat. 10:23; 25:31-33) Yesu tɔm ndʋ, tɩkaɣ labʋ ɖɔɖɔ ɖa-alɩwaatʋ tʋnɛ tɩ-taa. Sɔnɔ ɛyaa miiliyɔɔwaa sakɩyɛ wɛ lona wena a-taa paɖɩɣ ɖɔ-tɔm susuu tʋmɩyɛ nʋmɔʋ yɔ. Pɩtasɩ lɛ, paa cɛcɛyaɣ kʋɖʋmaɣ ŋga ka-taa lɛ, palʋlʋʋ piya mɩnɩŋ sakɩyɛ. Ðɩlakɩ ɖo-ɖoŋ ɖeɖe se ɖɩtanɩ tɔm kɩbandʋ «ajɛɛ kpeekpe nɛ cejewe kpeekpe nɛ kʋnʋmɩŋ kpeekpe» taa ɛyaa. (Natʋ 14:6) Ɛlɛ tɔm lɛ se ɖɩɩkaɣ pɩzʋʋ nɛ ɖisusi tɔm kɩbandʋ paa ɛyʋ weyi tɛtʋ kpeekpe yɔɔ pʋcɔ nɛ ɛjaɖɛ tɛm talɩ.
8. Tɔm ndʋ ɖɩpɩzɩɣ nɛ ɖɩpɔzɩ ɖa-tɩ pɩlɩɩnɩ ɛzɩma Yehowa kaɣ ɛyaa tɔm hʋnʋʋ cee wayɩ yɔ pɩ-yɔɔ? (Cɔnɩ ɖɔɖɔ kɩlɛmɩŋ.)
8 Pʋyɔɔ lɛ, ɖɩpɩzɩɣ nɛ ɖɩpɔzɩ ɖa-tɩ tɔm tʋnɛ: Ɛbɛ pɩkaɣ tɛmnʋʋ ɛyaa mba patihiɣ waɖɛ nɛ panɩɩ tɔm kɩbandʋ pʋcɔ nɛ kʋñɔŋ sɔsɔʋ paɣzɩ yɔ? Ɛbɛ Yehowa nɛ ɛ-Pɩyalʋ weyi ɛlɩzaa se ɛhʋʋnɩ ɛyaa tɔm yɔ pakaɣ-wɛ labʋ? (Yoh. 5:19, 22, 27; Tʋma 17:31) Tɔm ñʋʋ kʋnɛ kɩ-mayaɣ yɔɔdʋʋ se Yehowa ‘tɩsɔɔlɩ se paɖɩzɩ nɔɔyʋ.’ Ɛlɛ, «ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.» (2 Pɩy. 3:9; 1 Tim. 2:4) Paa mbʋ yɔ, pɩwɛɛ se ɖɩtɩlɩ se Yehowa tɩwɩlɩtɩ-ɖʋ mbʋ ɛkaɣ labʋ ɛyaa mba patihiɣ waɖɛ nɛ panɩɩ tɔm kɩbandʋ pʋcɔ nɛ kʋñɔŋ sɔsɔʋ paɣzɩ yɔ. Pɩkɛ toovenim se pɩtɩkɛnɩ-ɩ kɩjɛyʋʋ se eheyi-ɖʋ mbʋ ɛlaba yaa mbʋ ɛkaɣ labʋ yɔ.
Ɛbɛ Yehowa kaɣ labʋ ɛyaa mba patihiɣ waɖɛ nɛ panɩɩ tɔm kɩbandʋ pʋcɔ nɛ kʋñɔŋ sɔsɔʋ paɣzɩ yɔ? (Cɔnɩ tayʋʋ 8) c
9. Tɔm ndʋ Yehowa wɩlɩ-ɖʋ Bibl taa?
9 Yehowa wɩlɩ-ɖʋ mbʋ ɛkaɣ labʋ yɔ pɩ-taa nabʋyʋ Bibl taa. Bibl heyiɣ-ɖʋ se Yehowa kaɣ fezuu ɛyaa «mba pɛfɛyɩ siɣsiɣ yɔ,» mba pataahiɣ waɖɛ se panɩɩ tɔm kɩbandʋ nɛ pɛlɛɣzɩ pe-wezuu caɣʋ yɔ. (Tʋma 24:15; Luka 23:42, 43) Piyeki se ɖɩpɔzɩ ɖa-tɩ tɔm kɩcɛyɩtʋ lɛɛtʋ.
10. Tɔm lɛɛtʋ ndʋ ɖɩpɩzɩɣ nɛ ɖɩpɔzɩ ɖa-tɩ?
10 Mba payɩ pasɩkɩ kʋñɔŋ sɔsɔʋ alɩwaatʋ taa yɔ, pakaɣ-wɛ ɖɩzʋʋ kpaagbaa ɖɩzʋʋ nɛ paatasɩɣ wɛnʋʋ lidaʋ se pefeziɣ-wɛ yaa we? Masɩ wɩlɩɣ kpayɩ kpayɩ se mba pakaɖɩɣnɩ Yehowa nɛ ɛ-sɔɔjanaa yɔ, pakaɣ-wɛ ɖɩzʋʋ Armaagedɔɔ you taa nɛ paakaɣ-wɛ fezuu. (2 Tes. 1:6-10) Piyele nɛ ɛyaa lalaa yɔ, ɛbɛ pɩkaɣ-wɛ tɛmnʋʋ? Pɩtɩla nabɛyɛ sɩbɩ asɛyɩŋ taa, kɛgbɛdɩsasɩ taa yaa ɛyaa kʋnɩ-wɛ. (Ekl. 9:11; Zak. 14:13) Ɛzɩ ɛyaa mba pa-taa nabɛyɛ kaɣ wɛʋ «mba pɛfɛyɩ siɣsiɣ» nɛ pakaɣ-wɛ fezuu ɛjaɖɛ kɩfaɖɛ taa yɔ pa-taa? Tobi lɛ, ɖɩɩsɩŋ.
TƆM NDƲ ÐƖSƖMA YƆ
11. Ɛbɛ yɔɔ pakaɣ tɩŋnʋʋ nɛ pahʋʋnɩ ɛyaa tɔm Armaagedɔɔ wiye?
11 Ðɩsɩm tɔm sakɩyɛ mbʋ pɩkaɣ labʋ cee wayɩ yɔ pɩ-yɔɔ. Ðɩnawa se Armaagedɔɔ wiye pakaɣ ɛyaa tɔm hʋnʋʋ pɩlɩɩnɩ mbʋ palabɩ Krɩstʋ koobiya yɔ pɩ-yɔɔ. (Mat. 25:40) Mba pakaɣ-wɛ kpaɣʋ se pɛkɛ heŋ yɔ, mba lɛ mba pasɩnɩ patam numwaa nɛ Krɩstʋ yɔ. Ðɩnawa ɖɔɖɔ se Krɩstʋ koobiya nabɛyɛ kaɣ wɛʋ tɛtʋ yɔɔ alɩwaatʋ ndʋ kʋñɔŋ sɔsɔʋ paɣzɩɣ yɔ, nɛ pɩkazɩɣ alɩwaatʋ pazɩ se Armaagedɔɔ you ɛpaɣzɩ lɛ pakpaɣ ɛsɔdaa. Alɩwaatʋ ndʋ Krɩstʋ koobiya nabɛyɛ kpɛndɩ pɛwɛ tɛtʋ yɔɔ yɔ, pɩpɩzɩɣ pɩla se laŋa kɩbana tɩnaa kaɣ wɛnʋʋ waɖɛ se paɖʋ-wɛ nesi nɛ pasɩnɩ-wɛ tʋmɩyɛ nɖɩ palakɩ yɔ ɖɩ-taa. (Mat. 25:31, 32; Natʋ 12:17) Ɛbɛ yɔɔ pɩcɛyaa se ɖɩnɩɩ toovenim tɔm ndʋ tɩ-taa?
12-13. Ɛbɛ ɛyaa nabɛyɛ pɩzɩɣ nɛ pala alɩwaatʋ ndʋ panaɣ se paɖɩzɩ «Babilɔɔnɩ Sɔsɔʋ» yɔ? (Cɔnɩ ɖɔɖɔ kɩlɛmɩŋ.)
12 Halɩ alɩwaatʋ ndʋ kʋñɔŋ sɔsɔʋ paɣzɩɣ yɔ, pɩpɩzɩɣ pɩla se ɛyaa mba panaɣ ɛzɩma paɖɩzɩɣ «Babilɔɔnɩ Sɔsɔʋ» yɔ, pa-taa nabɛyɛ kaɣ tɔzʋʋ se Yehowa Aseɣɖe Tɩnaa wɛʋ nɛ pɔyɔɔdʋʋ se lakasɩ nzɩ sɩkaɣ labʋ yɔ pɩlakɩ alɩwaatʋ sakɩyɛ yɔ. Ɛyaa mba panaɣ lakasɩ nzɩ yɔ, ɛzɩ pa-taa nabɛyɛ kaɣ tisuu Yehowa yɔɔ?—Natʋ 17:5; Ezek. 33:33.
13 Ye pɩlabɩ mbʋ yɔ, pɩkaɣ wɛʋ ɛzɩ mbʋ pɩɩlabɩ Ejipiti ɛjaɖɛ taa Moyizi alɩwaatʋ taa yɔ. Tɔzɩ se «ɛyaa ndɩ ndɩ» kaakpɛndɩ Izrayɛɛlɩ mba yɔɔ alɩwaatʋ ndʋ palɩɣaɣ Ejipiti ɛjaɖɛ taa yɔ. Pʋtɔma ɛyaa mba pa-taa nabɛyɛ kaapaɣzɩ wɛnʋʋ tisuu Yehowa yɔɔ alɩwaatʋ ndʋ panawa se asɛyɩŋ 10 weyi ɩ-tɔm Moyizi kaayɔɔdaa yɔ ɩlaba yɔ. (Ejl. 12:38) Ye pɩlabɩ mbʋ Babilɔɔnɩ Sɔsɔʋ ɖɩzʋʋ wayɩ, ɛzɩ pɩkaɣ-ɖʋ tibu yɔɔɔ mbʋ pʋyɔɔ yɔ pɩkazɩ pazɩ se ɛjaɖɛ ɛtɛ lɛ, ɛyaa nabɛyɛ kpɛndɩ ɖɔ-yɔɔ? Aayɩ. Ðɩsɔɔlaa se ɖɩmaɣzɩnɩ ɖa-Caa weyi ɛwɛ ɛsɔdaa yɔ ɛ-wɛtʋ kɩbandʋ; ɛkɛ «Ɛsɔ weyi ɛnaɣ ɛyaa pʋtɔdɩyɛ nɛ ɛnɩɣ ɛyaa wɩzasɩ yɔ, weyi ɛɛkɔʋ pana lɛɛ lɛɛ, nɛ weyi ɛ-sɔɔlɩm siɣsiɣ ñɩmbʋ nɛ e-toovenim ɖɔ pɩdɩɩfɛyɩ yɔ.» b—Ejl. 34:6.
Ɛyaa mba panaɣ ɛzɩma paɖɩzɩɣ «Babilɔɔnɩ Sɔsɔʋ» yɔ pa-taa nabɛyɛ kaɣ tɔzʋʋ se Yehowa Aseɣɖe Tɩnaa wɛʋ nɛ pɔyɔɔdʋʋ se lakasɩ nzɩ sɩkaɣ labʋ yɔ pɩlakɩ alɩwaatʋ sakɩyɛ yɔ (Cɔnɩ tayʋʋ 12-13) d
14-15. Ɛzɩ lidaʋ ŋgʋ ɛyʋ wɛnɩ cee wayɩ yɔɔ yɔ kɩlɩɣnɩ alɩwaatʋ ndʋ ɛsɩba yɔ yaa ɖenɖe ɛwɛɛ yɔ pɩ-cɔlɔ? Lɩzɩ pɩ-taa. (Keɣa 33:4, 5)
14 Nabʋyʋ taa ɖɩnɩɣ ɛyaa nabɛyɛ yɔɔdʋʋ se: «Ye mɔ-hɔʋ taa tʋ ɛnɛ ɛɛsɩkaɣ pʋcɔ nɛ kʋñɔŋ sɔsɔʋ paɣzɩ yɔ pɩɩkɩlɩ ɖeu; pʋbʋ lɛ lidaʋ wɛɣ se pɩtɩla yɔ, pakaɣ-ɩ fezuu.» Pɩtʋʋ fɛyɩ se lɩmaɣza kɩbana naayɛ yɔɔ pɔyɔɔdʋʋ mbʋ. Ɛlɛ lidaʋ ŋgʋ ɛyʋ wɛnɩ cee wayɩ yɔɔ yɔ, kɩɩlɩɣnɩ alɩwaatʋ ndʋ ɛsɩkɩ yɔ tɩ-cɔlɔ. Yehowa kɛ Tɔm Hʋyʋ weyi ɛtalɩ pilim yɔ, ɛhʋʋ tɔm siɣsiɣ nɛ eemuluu nɔɔyʋ. (Kalɩ Keɣa 33:4, 5.) Ða-taa pɩzɩɣ nɛ pɩtɛ se «tɛtʋ kpeekpe Tɔm Hʋyʋ» kaɣ labʋ mbʋ pɩtʋʋzaa yɔ.—Kiɖe 18:25.
15 Ðɩpɩzɩɣ ɖɔɖɔ nɛ ɖɩyɔɔdɩ se lidaʋ ŋgʋ ɛyʋ wɛnɩ cee wayɩ yɔɔ yɔ, kɩɩlɩɣnɩ ɖenɖe ɛyʋ ɛnʋ ɛwɛɛ yɔ pɩ-cɔlɔ. Yehowa ɛɛkaɣ kpaɣʋ ɛyaa miiliyɔɔwaa sakɩyɛ kpa se pɛkɛ «pʋŋ» mbʋ pʋyɔɔ yɔ pɛwɛ ajɛɛ wena a-taa pɩɩhaɣ-wɛ nʋmɔʋ se panɩɩ Kewiyaɣ tɔm yɔ. (Mat. 25:46) Tɛtʋ kpeekpe Tɔm Hʋyʋ siɣsiɣ tʋ maɣzɩɣ ɛyaa mba pɔ-yɔɔ siŋŋ nɛ pɩkɩlɩ ɛzɩma ɖɩmaɣzɩɣ pɔ-yɔɔ yɔ. Ðɩɩsɩŋ ɛzɩma ɖeyi ɖeyi pɩkaɣ ɖɔm kʋñɔŋ sɔsɔʋ alɩwaatʋ taa yɔ. Pɩtɩla, ɛyaa mba pa-taa nabɛyɛ kaɣ hiɣu waɖɛ nɛ pɛkpɛlɩkɩ Yehowa tɔm, pɛwɛɛnɩ tisuu ɛ-yɔɔ nɛ pɛwɛɛ ɛ-hɔɔlʋʋ yɔɔ alɩwaatʋ ndʋ ɛpɩsɩɣ ɛ-tɩ kiɖeɖeu ajɛɛ kpeekpe ɛsɩndaa yɔ.—Ezek. 38:16.
Alɩwaatʋ ndʋ kʋñɔŋ sɔsɔʋ paɣzɩɣ yɔ, . . . ɛyaa mba panaɣ lakasɩ nzɩ yɔ, ɛzɩ pa-taa nabɛyɛ kaɣ tisuu Yehowa yɔɔ?
16. Tɔm ndʋ ɖɩkpɛlɩkaa nɛ ɖɩtɩlɩ Yehowa yɔɔ? (Cɔnɩ ɖɔɖɔ kɩlɛmʋʋ.)
16 Ðɩkpɛlɩkɩ Bibl lɛ, ɖiɖiɣzina se ɛyaa mʋ ñɩm siŋŋ Yehowa ɛsɩndaa. Ɛla ɛ-Pɩyalʋ ɖɔ-yɔɔ se pɩsa nɛ ɖa-tɩŋa payɩ ɖihiɣ waɖɛ nɛ ɖɩcaɣ wezuu tam. (Yoh. 3:16) Ða-tɩŋa ɖɩna ɛzɩma Yehowa sɔɔlɩ-ɖʋ siŋŋ yɔ. (Iza. 49:15) Ɛsɩm ɖa-taa paa weyi lɛ ɛ-hɩɖɛ. Halɩ ɛsɩm ɖa-taa paa weyi camɩyɛ nɛ pʋyɔɔ lɛ paa ɖɩsɩba yɔ, ɛpɩzɩɣ nɛ efezi-ɖʋ mbʋ pʋyɔɔ yɔ ɛtɔzʋʋ ɖɛ-wɛtʋ tɩŋa yɔɔ tete nɛ mbʋ payɩ pɩɩwɛ ɖa-lɩmaɣza taa yɔ pɩ-yɔɔ. (Mat. 10:29-31) Pʋyɔɔ lɛ, ɖa-taa pɩzɩɣ nɛ pɩtɛ se ɖa-Caa sɔɔlɩm tʋ weyi ɛwɛ ɛsɔdaa yɔ, ɛkaɣ paa ɛyʋ weyi lɛ ɛ-tɔm hʋʋ camɩyɛ mbʋ pʋyɔɔ yɔ ɛwɛnɩ lɔŋsɩnɖɛ, ɛwɛ siɣsiɣ nɛ ɛnaɣ ɛyaa pʋtɔdɩyɛ.—Yak. 2:13.
Ða-taa pɩzɩɣ nɛ pɩtɛ se Yehowa kaɣ paa ɛyʋ weyi lɛ ɛ-tɔm hʋʋ camɩyɛ mbʋ pʋyɔɔ yɔ ɛwɛnɩ lɔŋsɩnɖɛ, ɛwɛ siɣsiɣ nɛ ɛnaɣ ɛyaa pʋtɔdɩyɛ (Cɔnɩ tayʋʋ 16)
17. Tɔm ndʋ yɔɔ ɖɩkaɣ cosuu ñʋʋ ŋgʋ kɩkɔŋ yɔ kɩ-taa?
17 Lɛɛlɛɛyɔ ɖɩnɩʋ tɔm tʋnɛ tɩ-taa nɛ pɩkɩlɩ yɔ, ɖiɖiɣzinaa se ɖɔ-tɔm susuu tʋmɩyɛ tɔm cɛyɩ siŋŋ nɛ pɩkɩlɩ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Nɛ ɛbɛ seɣtiɣ-ɖʋ se ɖiwolo pɩ-yɔɔ nɛ ɖisusuu tɔm kɩbandʋ nɛ kpekpeka? Ðɩkaɣ cosuu tɔm pɔzʋʋ mbʋ pɩ-yɔɔ tete tɔm ñʋʋ ŋgʋ kɩkɔŋ yɔ kɩ-taa.
HENDU 76 Ɛzɩma pɩlakɩ-ŋ?
a Pɩsa nɛ ŋna mbʋ pʋyɔɔ pɛlɛɣzɩ ɛzɩma ɖɩnɩɣaɣ tɔm tʋnɛ tɩ-taa yɔ lɛ, kalɩ tɔm ñʋʋ «Mbʋ pɩkɛdɩnɩ-ŋ lɛ lɛ,» kɩwɛ Feŋuu Tilimiye 15 mars 2015 hɔɔlɩŋ 8-12 yɔɔ.
b Paɖɩzɩɣ Babilɔɔnɩ Sɔsɔʋ nɛ pɩtɛ lɛ, pɩkaɣ takʋʋ Yehowa sɛyaa tɩŋa alɩwaatʋ ndʋ Gɔɔgɩ weyi ɛlɩnɩ Maagɔɔgɩ yɔ ɛkʋyʋʋ pɔ-yɔɔ yɔ. Pɩtasɩ lɛ, mba payɩ pakaɣ kpɛndʋʋ Ɛsɔ samaɣ yɔɔ yɔ pɩkaɣ-wɛ takʋʋ ɖɔɖɔ.
c KƖLƐMƖŊ YƆƆ TƆM: Kɩlɛmɩŋ 3 wɛɛ nɛ ɩwɩlɩɣ mbʋ pʋyɔɔ pɩtɩla, ɛyaa nabɛyɛ tɩnɩɩ tɔm ndʋ ɖisusi ɛjaɖɛ kpeekpe yɔɔ yɔ: (1) Halʋ nɔɔyʋ wɛ ɖenɖe Ɛsɔ sɛtʋ natʋyʋ tɔyaa nɛ pɩɩhaɣ ɛyaa nʋmɔʋ se panɩɩ tɔm kɩbandʋ yɔ, (2) halʋ nɔɔyʋ nɛ ɛ-walʋ pɛwɛ ɖenɖe komina tɩha-ɖʋ nʋmɔʋ se ɖɩla ɖɛ-Ɛsɔ sɛtʋ tʋmɩyɛ nɛ kɩmaɣzɩɣ se ɖɔ-tɔm wɛ kaɖɛ yɔ, nɛ (3) abalʋ nɔɔyʋ wɛ lone nɖɩ ɖiposaa siŋŋ nɛ ɖɩ-taa wobu fɛyɩ kɛlɛʋ yɔ ɖɩ-taa.
d KƖLƐMƲƲ YƆƆ TƆM: Halʋ nɔɔyʋ kaayebi Yehowa sɛʋ, ɛwɛɛ nɛ ɛtɔzʋʋ tɔm ndʋ ɛɛkpɛlɩkɩ «Babilɔɔnɩ Sɔsɔʋ» ɖɩzʋʋ yɔɔ yɔ tɩ-yɔɔ. Ɛkpaɣ lɩmaɣzɩyɛ se ɛpɩsɩɣ Yehowa cɔlɔ, nɛ ɛpɩsɩ ɛ-lʋlɩyaa cɔlɔ; paba kɛ Yehowa Aseɣɖe Tɩnaa. Ye pɩlabɩ mbʋ yɔ, ɖɩsɔɔlaa se ɖɩmaɣzɩnɩ ɖa-Caa Yehowa weyi ɛnaɣ ɛyaa pʋtɔdɩyɛ nɛ ɛnɩɣ pe-siziŋ yɔ nɛ ɖa-taa la leleŋ se kɩwɛɛkɩm laɖʋ nɔɔyʋ pɩsɩ Yehowa cɔlɔ.
