STUDU 19
KÁNTIKU 22 Faze bu Reinu ben!
Kuzê ki nu sabe sobri modi ki Jeová ta ben julga na futuru?
“Jeová... ka krê pa ningen ser distruídu”. — 2 PEDRU 3:9.
ASUNTU PRINSIPAL
Nu pode ten serteza ma óras ki Jeová ta ben julga pesoas, el ta faze kel ki é dretu i justu.
1. Pamodi ki nu pode fla ma nu sta vive na un ténpu spesial?
NU STA vive na un ténpu spesial! Kada dia nu sta ta odja profesias di Bíblia ta kunpri. Pur izénplu, nu sta ta odja ‘rei di nórti’ i ‘rei di sul’ ta konpiti ku kunpanheru pamodi kada un di es krê domina mundu. (Dan. 11:40, nóta di rodapé.) Nu sta ta odja notísias sábi di Deus ta pregadu na téra interu i milhons di algen sta ta skodje sirbi Jeová. (Isa. 60:22; Mat. 24:14) Tanbê, nu sta ta resebe txeu kumida spritual “na ténpu sértu”. — Mat. 24:45-47.
2. Di kuzê ki nu ten serteza, má kuzê ki nu debe rekonhese?
2 Jeová sta kontinua ta djuda-nu intende más klaru kes kuza inportanti ki ta ben kontise já-já. (Pro. 4:18; Dan. 2:28) Nu pode ten serteza ma antis di grandi tribulason kumesa, nu ta ben sabe tudu kel ki nu meste sabe pa nu kontinua lial i pa nu mante unidu duránti kel ténpu difísil. Má, nu meste rekonhese ma ten alguns kuza ki nu ka sabe sobri kuzê ki ta ben kontise. Na kel artigu li, primeru nu ta ben odja pamodi ki nu muda kuzê ki dja nu flaba sobri alguns di kes kuza ki ta ben kontise. Dipôs, nu ta ben odja alguns kuza ki dja nu sabe sobri futuru i modi ki nos Pai na séu ta ben aji.
KUZÊ KI NU KA SABE
3. Na pasadu kuzê ki nu ta flaba sobri oportunidadi di salva dipôs ki grandi tribulason kumesa, i pamodi ki nu ta pensaba si?
3 Na pasadu nu ta flaba ma dipôs ki grandi tribulason kumesa, ningen más ka ta ben ten oportunidadi di skodje sirbi Jeová i salva na Armajedon. Nu ta flaba kel-li pamodi nu ta pensaba ma kada algen i kada kuza ki kontise na ténpu di Dilúviu ta reprizentaba algun kuza ki ta ben kontiseba na nos ténpu. Pur izénplu, nu ta pensaba ma sima ningen más ka konsigi entra na arka dipôs ki Jeová ‘fitxa pórta’, tanbê ningen más ka ta pode ben skodje sirbi Jeová i salva dipôs ki grandi tribulason kumesa. — Mat. 24:37-39.
4. Pamodi ki nu ka ta fla más ma tudu kuza ki kontise na ténpu di Nué ten un kunprimentu más grandi oji?
4 Nu pode fla ma kada kuza ki kontise na ténpu di Dilúviu ta reprizenta algun kuza ki ta ben kontise na futuru? Respósta é nau. Pamodi? Pamodi ka ten nada na Bíblia ki ta fla kel-li. a É verdadi ma Jizus konpara “ténpu di Nué” ku se prezénsa, má el ka fla ma tudu kuza ki kontise na kel ténpu ta ben tinha un kunprimentu más grandi na futuru, sima pur izénplu kantu Jeová fitxa pórta di arka. Má, kel-li ka krê fla ma nu ka ta prende nada ku kel stória di Nué i kuzê ki kontise na Dilúviu.
5. (a) Modi ki Nué mostra fé antis di Dilúviu? (Ebreus 11:7; 1 Pedru 3:20) (b) Kuzê ki ten igual entri trabadju di pregason ki Nué faze i nos trabadju di pregason?
5 Kantu Nué obi avizu di Jeová, el prova ma el tinha fé kantu el kumesa ta faze arka. (Lé Ebreus 11:7; 1 Pedru 3:20.) Di mésmu manera, kes algen ki ta obi notísias sábi sobri Reinu di Deus meste faze sima es prende. (Atus 3:17-20) Pedru fla ma Nué éra “pregador di justisa”. (2 Ped. 2:5) Má sima nu prende na kel studu ki pasa, nu ka sabe si Nué prega pa kada algen ki staba na téra na kel ténpu. Oji, nu sta ta tenta prega pa tudu algen na mundu i nu sta faze kel trabadju li ku zelu. Má, ka ta inporta kantu sforsu ki nu faze, nu ka ta ben konsigi prega pa tudu algen antis di fin. Pamodi?
6-7. Pamodi ki nu pode fla ma nu ka ta ben konsigi prega notísias sábi pa kada algen antis di fin ben? Splika.
6 Pensa na kuzê ki Jizus fla sobri nos trabadju di pregason. El fla ma notísias sábi ta ben ser pregadu “na mundu interu pa sirbi di tistimunhu pa tudu nason”. (Mat. 24:14) Oji, más di ki nunka nu sta ta odja kel profesia li ta kunpri. Mensajen di Reinu sta disponível na más di mil língua, i pamodi jw.org maioria di algen na mundu oji pode prende sobri notísias sábi di Reinu di Deus.
7 Má, Jizus tanbê fla se disiplus ma es ka ta konsigi “tirmina di prega na tudu sidadi”, ô pa tudu algen, antis di el ben. (Mat. 10:23; 25:31-33) Kes palavra di Jizus li, tanbê é verdadi na nos ténpu. Txeu algen oji ta vive na lugaris ki nu ka ta konsigi prega di manera livri. Tanbê, txeu bebé ta nase kada minutu. Nu ta faze nos midjór pa nu prega notísias sábi pa pesoas di “tudu nason, língua, tribu i povu.” (Apo. 14:6) Má nu ka ta ben konsigi prega notísias sábi pa kada algen na téra antis di fin ben.
8. Ki pergunta talvês nu ta faze sobri modi ki Jeová ta ben julga pesoas na futuru? (Odja fotus.)
8 Ku bazi na kel ki dja nu pâpia di el, talvês nu pode pergunta: I kes algen ki ka tevi oportunidadi di obi notísias sábi antis di grandi tribulason kumesa? Modi ki Jeová i se Fidju, kel ki el da autoridadi pa julga, ta ben julga-s? (Juan 5:19, 22, 27; Atus 17:31) Testu ki tradu téma di kel artigu li ta fla ma Jeová “ka krê pa ningen ser distruídu”. Má envês di kel-li, “el krê pa tudu algen rapende.” (2 Ped. 3:9; 1 Tim. 2:4) Enbóra nu sabe kes kuza li sobri Jeová, inda el ka fla-nu modi ki el ta ben julga pesoas ki nunka ka tevi oportunidadi di obi notísias sábi. Má, é klaru ki el é ka obrigadu fla-nu tudu kuza ki dja el faze i ki el ta ben faze.
Modi ki Jeová ta ben julga kes algen ki ka tevi oportunidadi di obi notísias sábi antis di grandi tribulason kumesa? (Odja parágrafu 8.) c
9. Kuzê ki Jeová fla-nu na Bíblia?
9 Na se Palavra, Jeová ta fla-nu alguns di kes kuza ki el ta ben faze. Pur izénplu, Bíblia ta fla-nu ma Jeová ta ben resusita “kes algen injustu”, ki é kes algen ki ka tevi oportunidadi di prende sobri notísias sábi i muda ses konportamentu. (Atus 24:15; Luk. 23:42, 43) Kel-li ta pô-nu ta faze otus pergunta inportanti.
10. Ki otus pergunta talvês nu pode ten?
10 Tudu kes algen ki ben móre duránti grandi tribulason ta ben distruídu pa tudu ténpu sen speransa di resureison? Bíblia ta mostra klaru ma kes ki fika kóntra Jeová i ki el i se trópas ta ben distrui, ka ta ben resusitadu. (2 Tes. 1:6-10) Má i kes otu algen? Pur izénplu, alguns algen pode ben móre duránti grandi tribulason pamodi duénsa, idadi ô pamodi un asidenti ô un otu algen mata-s. (Ecl. 9:11; Zac. 14:13) Alguns di kes algen li ta ben sta entri “kes algen injustu” ki ta ben resusitadu na mundu novu? Nu ka sabe.
KUZÊ KI NU SABE
11. Di akordu ku kuzê ki pesoas ta ben julgadu na Armajedon?
11 Nu sabe txeu kuza ki ta ben kontise na futuru. Pur izénplu, nu sabe ma na Armajedon pesoas ta ben julgadu pa manera ki es trata irmons di Kristu. (Mat. 25:40) Kes algen ki djuda kes irmon di Kristu ta ben julgadu sima ovelhas. Tanbê, nu sabe ma alguns di kes irmon di Kristu inda ta ben sta na téra dipôs ki grandi tribulason kumesa i es ta ben lebadu pa séu poku ténpu antis di Armajedon kumesa. Timenti alguns di kes irmon di Kristu inda sta na téra, alguns algen ki ten un korason sinseru pode ben ten oportunidadi di djuda-s i di djuda na kel trabadju ki es sta faze. (Mat. 25:31, 32; Apo. 12:17) Pamodi ki kes kuza li é inportanti?
12-13. Modi ki alguns algen pode reaji dipôs ki es odja “Babilónia Grandi” ta distruídu? (Odja fotus.)
12 Mésmu dipôs ki grandi tribulason kumesa, alguns algen pode ben odja “Babilónia Grandi” ta distruídu i es ta ben lenbra ma Tistimunhas di Jeová dja tinha txeu ténpu ta flaba ma kel-li ta ben kontiseba. Alguns algen ki ben odja “Babilónia Grandi” ta ser distruídu talvês pode ben sirbi Jeová? — Apo. 17:5; Eze. 33:33.
13 Si kel-li kontise ta ben ser sima kuzê ki kontise na Ijitu na ténpu di Muizés. Lenbra ma ‘un monti di algen’ djunta ku israelitas kantu es sai di Ijitu. Alguns di kes algen mostra fé na Jeová kantu es odja kes avizu di Muizés sobri kes 10 praga ta kunpri. (Êxo. 12:38) Si kontise un kuza sima kel-li dipôs ki Babilónia Grandi distruídu, nu ta atxaba ma ka éra justu pa kes algen djuntaba ku nos poku ténpu antis di fin ben? Klaru ki nau! Nu krê ser sima nos Pai na séu ki é un ‘Deus di mizerikórdia i konpaxon, ki ten paxénxa i ki sta xeiu di amor lial i di verdadi’. b — Êxo. 34:6.
Alguns algen pode ben odja “Babilónia Grandi” ta distruídu i es ta ben lenbra ma Tistimunhas di Jeová dja tinha txeu ténpu ta flaba ma kel-li ta ben kontiseba (Odja parágrafus 12 i 13.) d
14-15. Pa un algen ben vive pa tudu ténpu, ta dipende di ki ténpu ki el móre ô di undi ki el ta vive? Splika. (Salmo 33:4, 5)
14 Alvês nu ta obi un irmon ô un irman ta fla ma ta sérba midjór si se família ki ka ta sirbi Jeová móre antis di grandi tribulason kumesa, asi el ta tinha speransa di resureison. Di serteza es ta fla kel-li ku bon intenson. Má pa un algen vive pa tudu ténpu, kel-li ka ta dipende na ki ténpu ki el móre. Jeová é kel Juís perfeitu, pur isu se disizons sénpri é dretu i justu. (Lé Salmo 33:4, 5.) Nu pode ten serteza ma ‘Juís di téra interu’ sénpri ta ben faze kel ki é dretu. — Gén. 18:25.
15 Tanbê, ta faze sentidu fla ma si un algen ta ben ten oportunidadi di ben vive pa tudu ténpu ô nau, ka ta dipende di undi ki el ta vive. Jeová nunka ka ta julgaba milhons di algen sima “kabritus” sô pamodi es vive na lugaris undi nunka es ka tevi oportunidadi di prende mensajen sobri Reinu di Deus. (Mat. 25:46) Kel Juís justu di téra interu ta preokupa ku kes algen li mutu más di ki nos. Nu ka sabe modi ki Jeová ta ben faze kuzas duránti grandi tribulason. Talvês, alguns di kes algen ta ben ten oportunidadi di prende sobri Jeová, di mostra fé na el i di ben fika na se ladu óras ki el ben poi tudu algen na téra ta konxe se nómi. — Eze. 38:16.
Dipôs ki grandi tribulason kumesa, ... alguns algen ki ben odja “Babilónia Grandi” ta ser distruídu talvês pode ben sirbi Jeová?
16. Kuzê ki nu sabe sobri Jeová? (Odja dizenhu.)
16 Através di nos studu di Bíblia, nu ta prende ma Jeová ta da txeu valor pa nos vida. El da vida di se Fidju, asi pa nos tudu pode ten oportunidadi di vive pa tudu ténpu. (Juan 3:16) Nos tudu nu ta xinti ma Jeová ta ama-nu txeu. (Isa. 49:15) El konxe kada un di nos pa nos nómi. Na verdadi, el konxe-nu di tal manera ki sikrê nu móre, el pode ben resusita-nu. El ta lenbra di kada kuza pikinoti sobri nos i di kes lenbransa ki ta pô-nu ta ser ken ki nos é! (Mat. 10:29-31) Di serteza, nu ten bons motivu pa kunfia ma nos Pai na séu ki ta ama-nu txeu ta ben julga kada algen di manera perfeitu, pamodi el é sábiu, justu i el ten mizerikórdia. — Tia. 2:13.
Nu ten bons motivu pa kunfia ma nos Pai na séu ki ta ama-nu txeu ta ben julga kada algen di manera perfeitu, pamodi el é sábiu, justu i el ten mizerikórdia. (Odja parágrafu 16.)
17. Kuzê ki nu sta ben odja na kel otu studu?
17 Gósi ki dja nu intende kel asuntu li midjór, nu ta odja ma nos trabadju di pregason é más urjenti di ki antis. Pamodi ki nu ta fla kel-li? I kuzê ki ta pô-nu ta krê kontinua ta prega notísias sábi sen dizisti? Nu ta ben odja respósta pa kes pergunta li na kel otu studu.
KÁNTIKU 76 N sta kontenti ti dimás!
a Pa bu sabe pamodi ki nu faze kel mudansa li, odja artigu ku téma “Esse é o modo aprovado por ti”, na Sentinéla di 15 di marsu di 2015, pájinas 7-11.
b Dipôs ki Babilónia Grandi ben distruídu, tudu sérvus di Jeová ta ben podu na próva óras ki Gogi di Magogi ben ataka-s. Kalker algen ki ben fika di ladu di povu di Deus dipôs ki Babilónia Grandi distruídu, tanbê ta ben pasa pa próva.
c SPLIKASON DI FOTU: Três izénplu ki ta mostra pamodi ki talvês nu ka ta konsigi prega pa tudu algen na téra: (1) Un mudjer ta vive na un lugar ki maioria di algen é ka kriston i é prigozu pa Tistimunhas di Jeová prega la, (2) un kazal ta vive na un país ki govérnu ta proíbi trabadju di Tistimunhas di Jeová i é prigozu es prega la i (3) un ómi ta vive na un lugar ki é txeu lonji i é difísil dimás pa algen txiga la.
d SPLIKASON DI FOTUS: Un mudjer jóven ki para di sirbi Jeová lenbra kuzê ki el prende sobri distruison di “Babilónia Grandi”. El disidi volta pa Jeová i pa se pai ku se mai, ki é Tistimunha di Jeová. Si kontise un kuza sima kel-li, nu krê ser sima nos Pai na séu, Jeová, ki ta mostra mizerikórdia i konpaxon, i nu debe fika kontenti pamodi un pekador volta.
