DISOLO YA KULONGUKA 19
NKUNGA 22 Kimfumu Ke Yala—Bika Yo Kwisa!
Inki Beto Me Zaba Sambu na Balusambisu ya Yehowa na Bilumbu Ke Kwisa?
“Yehowa . . . ke zola ve nde ata muntu mosi kufwa.”—2 PIE. 3:9.
NA BUNKUFI
Beto ke ndima kibeni nde ntangu Yehowa ta sambisa bantu na bilumbu ke kwisa, yandi ta sala mambu ya mbote mpi ya lunungu.
1. Sambu na nki beto ke tuba nde beto ke zinga na bantangu ya kuyituka kibeni?
BETO ke zinga na bantangu ya kuyituka kibeni. Konso kilumbu, beto ke mona mutindu baprofesi ya Biblia ke lungana. Mu mbandu, beto ke mona mutindu “ntotila ya nordi” ti “ntotila ya sudi” ke nwana sambu na kuyala ntoto. (Dan. 11:40, noti na nsi ya lutiti.) Beto ke longa nsangu ya mbote na ntoto ya mvimba mpi bamilio ya bantu ke ndima nsangu yango. (Yez. 60:22; Mat. 24:14) Mpi beto ke baka madia mingi ya kimpeve “na ntangu ya me fwana.”—Mat. 24:45-47.
2. Inki beto ke ndima kibeni, kansi nki beto fwete vila ve?
2 Yehowa ke landa kusadisa beto na kubakisa mbote-mbote mambu ya mfunu yina ta salama ntama mingi ve. (Bing. 4:18; Dan. 2:28) Beto ke ndima kibeni nde ntangu mpasi ya nene ta yantika, beto ta zaba mambu yonso yina yo ke lomba nde beto zaba sambu na kulanda kukanga ntima mpi kulanda kuvanda na bumosi na ntangu yina ya mpasi. Kansi beto fwete ndima nde kele ti mambu ya nkaka ya beto ke zaba ve yina ta salama ntama mingi ve. Na disolo yai, beto ta tubila ntete sambu na nki beto me soba mambu yina beto tubaka sambu na mambu ya nkaka yina ta salama na bilumbu ke kwisa. Na nima, beto ta tadila diaka mwa mambu ya nkaka yina beto ke zaba sambu na bilumbu ke kwisa mpi mutindu Tata na beto ya zulu ta sala mambu.
MAMBU YINA BETO ME ZABA VE
3. Ntete beto vandaka kuyindula nde nki ta kumina bantu yina ke kwikilaka ve na Yehowa ntangu mpasi ya nene ta yantika mpi sambu na nki beto vandaka kuyindula mutindu yina?
3 Ntete beto vandaka kutuba nde ntangu mpasi ya nene ta yantika, bantu yina ke sambilaka ve Yehowa ta vanda diaka ve ti dibaku ya kukwikila na yandi mpi ya kuguluka na Armagedoni. Beto tubaka mutindu yina sambu beto vandaka kuyindula nde konso muntu mpi konso kima yina salamaka na ntangu ya Mvula ya Ngolo vandaka kumonisa kima mosi yina ta salama na bilumbu ke kwisa. Mu mbandu, beto vandaka kuyindula nde kaka mutindu Yehowa kangaka kielo ya maswa na ntwala nde Mvula ya Ngolo kuyantika, yandi ta sala mpi mutindu mosi ntangu mpasi ya nene ta yantika, disongidila nde bantu yina ke sambilaka yandi ve ta vanda diaka ve ti dibaku ya kukwikila na yandi mpi ya kuguluka.—Mat. 24:37-39.
4. Sambu na nki beto ke tuba diaka ve nde konso kima yina salamaka na ntangu ya Noa ke monisa kima mosi yina ta salama na bilumbu ke kwisa?
4 Keti beto fwete tuba nde konso kima yina salamaka na ntangu ya Noa ke monisa kima mosi yina ta salama na bilumbu ke kwisa? Mpidina ve. Sambu na nki? Sambu Biblia ke tuba ve mutindu yina. a Yezu fwanisaka “bilumbu ya Noa” ti ntangu ya kukala na yandi. Kansi yandi tubaka ve nde konso kima yina salamaka na ntangu ya Noa ke monisa kima mosi yina ta salama na bilumbu ke kwisa. Mu mbandu, mutindu Yehowa kangaka kielo ya maswa ke tendula ve nde yandi ta sala mpi kima ya mutindu mosi na bilumbu ke kwisa. Kansi yo ke tendula ve nde beto lenda baka ve malongi na disolo ya Noa mpi ya Mvula ya Ngolo.
5. (a) Inki mutindu Noa monisaka lukwikilu na ntwala nde Mvula ya Ngolo kunoka? (Baebreo 11:7; 1 Piere 3:20) (b) Inki mutindu kisalu na beto ya kulonga nsangu ya mbote bubu yai me fwanana ti ya Noa?
5 Ntangu Noa waka nsangu ya lukebisu yina Yehowa songaka yandi, yandi monisaka nde yandi vandaka ti lukwikilu ntangu yandi tungaka maswa. (Tanga Baebreo 11:7; 1 Piere 3:20.) Mutindu mosi mpi, bantu yina ke wa nsangu ya mbote ya Kimfumu ya Nzambi fwete monisa lukwikilu na mambu yina bo ke sala. (Bis. 3:17-20) Piere bingaka Noa nde “nsamuni ya lunungu.” (2 Pie. 2:5) Kansi mutindu beto tubilaka yo na disolo ya me luta, beto ke zaba ve kana Noa songaka bantu yonso na ntoto ya mvimba nsangu yina ya lukebisu na ntwala nde Mvula ya Ngolo kunoka. Bubu yai, beto ke kudipesaka na kulonga bantu nsangu ya mbote na ntoto ya mvimba mpi beto ke salaka yo na kikesa yonso. Kansi ata beto sala nki mutindu, beto ta kuka ve kulonga konso muntu na ntoto ya mvimba nsangu ya mbote na ntwala nde nsuka kukwisa. Sambu na nki?
6-7. Sambu na nki beto ke tuba nde beto ta kuka ve kulonga konso muntu na ntoto nsangu ya mbote na ntwala nde nsuka kukwisa?
6 Beto tala mambu yina Yezu tubaka sambu na kisalu na beto ya kulonga nsangu ya mbote. Yandi tubaka nde beto ta longa nsangu ya mbote “na ntoto ya mvimba sambu na kuta kimbangi na makanda yonso.” (Mat. 24:14) Profesi yina ke lungana mingi kibeni bubu yai kuluta na ntangu ya ntama. Beto ke longa nsangu ya mbote ya Kimfumu na bandinga kuluta 1 000 mpi bantu mingi na ntoto ya mvimba lenda wa nsangu yango na nzila ya site Internet na beto jw.org.
7 Kansi, Yezu songaka mpi balongoki na yandi nde bo “ta manisa ve kukwenda na bambanza yonso” to nde bo ta longa ve bantu yonso na ntwala nde yandi kwisa. (Mat. 10:23; 25:31-33) Mambu yina Yezu tubaka ta lungana na bilumbu na beto. Bantu mingi bubu yai ke zinga na bisika yina bo me buyisaka ngolo kibeni kisalu na beto ya kulonga nsangu ya mbote. Diaka, bana mingi ke butuka konso ntangu. Beto ke salaka yonso sambu na kulonga nsangu ya mbote “na makanda yonso, na mabuta yonso, na bandinga yonso.” (Kus. 14:6) Kansi diambu ya kieleka kele nde beto ta kuka ve kulonga bantu yonso na ntoto nsangu ya mbote na ntwala nde nsuka kukwisa.
8. Inki ngiufula beto lenda kudiyula na yina me tala mutindu Yehowa ta sambisa bantu na bilumbu ke kwisa? (Tala mpi bifwanisu ya ke wakana ti paragrafe yai.)
8 Kansi, beto lenda kudiyula nde: Inki Yehowa ti Mwana na yandi yina yandi me pesaka mukumba ya kusambisa ta sala sambu na bantu yina mbala ya nkaka zwaka ve dibaku ya kuwa nsangu ya mbote na ntwala nde mpasi ya nene kuyantika? (Yoa. 5:19, 22, 27; Bis. 17:31) Verse ya me simba disolo yai ke tuba nde Yehowa “ke zola ve nde ata muntu mosi kufwa,” kansi yandi ke zola nde “bantu yonso kubalula ntima.” (2 Pie. 3:9; 1 Tim. 2:4) Ata beto me zaba mambu yina ya me tala Yehowa, yandi me songa beto ntete ve mutindu yandi ta sambisa bantu yina zwaka ve dibaku ya kuwa nsangu ya mbote na ntwala nde mpasi ya nene kuyantika. Ya kieleka, yo ke lomba kaka ve nde yandi songa beto konso kima yina yandi me salaka to yina yandi ta sala.
Inki Yehowa ta sala sambu na bantu yina mbala ya nkaka zwaka ve dibaku ya kuwa nsangu ya mbote na ntwala nde mpasi ya nene kuyantika? (Tala paragrafe 8) c
9. Inki Yehowa me songaka beto na Biblia?
9 Yehowa me songaka beto na Ndinga na yandi mambu ya nkaka yina yandi ta sala. Mu mbandu, Biblia ke tuba nde Yehowa ta futumuna “bantu ya kukonda lunungu” yina zwaka ve dibaku ya kuwa nsangu ya mbote mpi ya kusoba bikalulu na bo. (Bis. 24:15; Luka 23:42, 43) Yo ke basisa bangiufula ya nkaka ya mfunu.
10. Inki bangiufula ya nkaka beto lenda kudiyula?
10 Keti bantu yonso yina ta fwa na mpasi ya nene ta fwa kimakulu? Biblia ke tuba pwelele nde bambeni ya Yehowa, yina yandi ti basoda na yandi ta fwa na Armagedoni, ta futumuka ve. (2 Bate. 1:6-10) Ebuna bantu ya nkaka, mu mbandu bayina lenda fwa sambu na maladi, sambu na kimununu, sambu na aksida to sambu bantu ya nkaka me fwa bo? (Lon. 9:11; Zek. 14:13) Keti bankaka na kati na bo lenda vanda na kati ya “bantu ya kukonda lunungu” yina ta futumuka na nsi-ntoto ya mpa? Beto me zaba ve.
MAMBU YINA BETO ME ZABA
11. Bo ta sambisa bantu na kutadila nki na Armagedoni?
11 Beto ke zaba mambu mingi yina ta salama na bilumbu ke kwisa. Mu mbandu beto ke zaba nde na Armagedoni, bo ta sambisa bantu na kutadila mutindu bo sadilaka bampangi ya Kristu mambu. (Mat. 25:40) Bayina ta vanda na ndonga ya mameme kele bantu yina sadisaka Bakristu yina bo me tulaka mafuta mpi Kristu. Beto me zaba mpi nde bampangi ya nkaka ya Kristu ta vanda na ntoto na luyantiku ya mpasi ya nene mpi bo ta mata na zulu ntangu fioti na ntwala nde Armagedoni kuyantika. Mutindu bampangi ya nkaka ya Kristu ta vanda na ntoto, bantu ya ntima-masonga ta vanda ti dibaku ya kusadisa bo mpi ya kupesa maboko na kisalu yina bo ke sala. (Mat. 25:31, 32; Kus. 12:17) Sambu na nki mambu yina ke benda dikebi?
12-13. Inki bantu ya nkaka lenda sala na nima ya kumona lufwa ya “Babilone ya Nene”? (Tala mpi bifwanisu ya ke wakana ti paragrafe yai.)
12 Ata na nima ya luyantiku ya mpasi ya nene, bantu ya nkaka yina ta mona lufwa ya “Babilone ya Nene” ta yibuka nde Bambangi ya Yehowa me tubilaka yo dezia banda ntama. Keti bantu ya nkaka yina ta mona mambu yina ta salama lenda balula bantima na bo?—Kus. 17:5; Ezek. 33:33.
13 Kana yo salama mutindu yina, yo ta vanda bonso mambu yina salamaka na Ezipte na bilumbu ya Moize. Kuvila ve nde “kimvuka mosi ya nene ya bantu ya mutindu na mutindu” vukanaka ti bantu ya Izraele ntangu bo basikaka na Ezipte. Yo ke monana nde bantu ya nkaka na kati na bo yantikaka kukwikila na Yehowa ntangu bo monaka nde mambu yina Moize tubaka sambu na Bandola Kumi lunganaka. (Kub. 12:38) Kana mambu ya mutindu mosi kusalama na nima ya lufwa ya Babilone ya Nene, keti beto ta mona mbi kana bantu ya nkaka kuvukana ti beto ntangu fioti na ntwala nde Armagedoni kuyantika? Ve. Beto ke zolaka kuvanda bonso Tata na beto ya zulu yina kele “Nzambi yina ke wilaka bantu mawa mpi ke fwilaka bo nkenda, yandi ke waka makasi nswalu ve mpi kele ya kufuluka na zola ya kwikama mpi kieleka.” b—Kub. 34:6.
Bantu ya nkaka yina ta mona lufwa ya “Babilone ya Nene” lenda yibuka nde Bambangi ya Yehowa me tubilaka yo dezia banda ntama (Tala baparagrafe 12-13) d
14-15. Keti ntangu yina muntu me fwa to kisika yina yandi ke zingaka ke monisaka kibeni kana yandi ta zinga mvula na mvula to ve? Tendula. (Nkunga 33:4, 5)
14 Bantangu ya nkaka, mpangi mosi lenda tuba sambu na muntu mosi ya dibuta na bo yina kele ve Mbangi ya Yehowa nde: “Yo ta vanda mbote kana yandi fwa na ntwala nde mpasi ya nene kuyantika, sambu yandi lenda futumuka.” Yo kele ve mbi na kuyindula mutindu yina. Kansi ntangu yina muntu ke fwaka ke monisaka ve kana yandi ta zinga mvula na mvula to ve. Yehowa kele Zuzi ya kukuka, balukanu yonso yina yandi ke bakaka ke vandaka ya mbote mpi ya lunungu. (Tanga Nkunga 33:4, 5.) Beto ke ndima kibeni nde “Zuzi ya ntoto ya mvimba” ta sala mambu ya mbote.—Kuy. 18:25.
15 Yo me fwana mpi na kutuba nde kisika yina muntu ke zinga ke monisa ve kana yandi ta zinga mvula na mvula to ve. Yehowa ta tula ve ata fioti na ndonga ya “bankombo,” bamilio ya bantu yina ke zingaka na bansi yina bo zwaka ve dibaku ya kuwa nsangu ya mbote ya Kimfumu. (Mat. 25:46) Zuzi ya lunungu ya ntoto ya mvimba ke zolaka bantu yina mingi kibeni kuluta mutindu beto ke zolaka bo. Beto ke zaba ve kibeni mutindu Yehowa ta sala mambu na mpasi ya nene. Mbala ya nkaka, bankaka na kati na bo ta vanda ti dibaku ya kulonguka mambu ya Yehowa, ya kukwikila na yandi mpi ya kukuma na lweka na yandi ntangu yandi ta santisa zina na yandi na ntwala ya makanda yonso.—Ezek. 38:16.
Na nima ya luyantiku ya mpasi ya nene, . . . keti bantu ya nkaka yina ta mona mambu yina ta salama lenda balula bantima na bo?
16. Inki mambu beto me zabaka sambu na Yehowa? (Tala mpi kifwanisu ya ke wakana ti paragrafe yai.)
16 Ntangu beto vandaka kulonguka Biblia, beto bakisaka nde luzingu ya bantu kele ti valere mingi na meso ya Yehowa. Yandi me pesaka luzingu ya Mwana na yandi sambu beto yonso kukuma ti dibaku ya kuzinga mvula na mvula. (Yoa. 3:16) Beto yonso me bakisaka nde Yehowa ke zolaka beto mingi. (Yez. 49:15) Yandi ke zabaka konso muntu na zina na yandi. Ya kieleka, yandi me zaba beto mbote kibeni. Yo yina ata kana beto me fwa, yandi ta futumuna beto sambu yandi ke zaba mambu yonso ya me tala beto mpi mambu yonso ya beto me zaba. (Mat. 10:29-31) Beto kele ti bikuma ya mbote ya kundima kibeni nde Tata na beto ya zulu yina ke zolaka beto ta sambisa konso muntu na mutindu ya kukuka sambu yandi kele mayele, lunungu mpi Nzambi ya mawa.—Yak. 2:13.
Beto ke ndima kibeni nde Yehowa ta sambisa konso muntu na mutindu ya kukuka sambu yandi ke vandaka ti bukati-kati, yandi kele lunungu mpi yandi ke wilaka bantu mawa (Tala paragrafe 16)
17. Inki beto ta tubila na disolo ya ke landa?
17 Bantendula yai ya mpa me sadisa beto na kubakisa kibeni nde kisalu ya kulonga nsangu ya mbote fwete salama nswalu kibeni. Sambu na nki beto ke tuba mutindu yina? Mpi nki ke salaka nde beto landa kaka kulonga nsangu ya mbote na kikesa yonso? Beto ta tubila na bunda bamvutu na bangiufula yina na disolo ya ke landa.
NKUNGA 76 Nge Ke Kudiwaka Nki Mutindu?
a Sambu na kuzaba sambu na nki beto me soba ntendula yina, tala disolo “Nge Ndimaka nde Yo Vanda Mutindu Yai” na Nzozulu ya Nkengi ya 15 mars 2015, balut. 7-11.
b Na nima ya lufwa ya Babilone ya Nene, bansadi yonso ya Yehowa ta mekama ntangu Gogi ya Magogi ta nwanisa bo. Muntu yonso yina ta vukana ti bansadi ya Nzambi na nima ya lufwa ya Babilone ya Nene ta mekama mpi.
c NTENDULA YA BIFWANISU: Bifwanisu tatu ya ke monisa sambu na nki bantu ya nkaka lenda vanda ve ti dibaku ya kuwa nsangu ya mbote ya Kimfumu yina beto ke longaka na ntoto ya mvimba: (1) Nkento mosi me waka ntete ve nsangu ya mbote sambu yandi ke zingaka kisika yina dibundu mosi ya nene ke pesaka ve bantu nzila ya kuwa kieleka mpi kulonga yo ke vandaka kigonsa (2) bakala mosi ti nkento na yandi me waka ntete ve nsangu ya mbote sambu bo ke zingaka kisika yina guvernema me buyisaka kisalu ya kulonga nsangu ya mbote mpi kulonga yo ke vandaka kigonsa, mpi (3) bakala mosi ke zingaka ntama mingi kibeni mpi mpila ya kukuma kuna ke vandaka ve.
d NTENDULA YA KIFWANISU: Leke mosi ya nkento yina yambulaka kieleka ke yibuka mambu yina yandi longukaka ya me tala lufwa ya “Babilone ya Nene.” Yandi me balula ntima mpi yandi me vutuka na bibuti na yandi yina kele Bambangi ya Yehowa. Kana mambu ya mutindu yina kusalama, beto fwete monisa bikalulu ya Tata na beto ya zulu ya kuwila bantu mawa mpi ya kuditula na kisika na bo, mpi beto sepela sambu muntu ya masumu me balula ntima.
