GĨCUNJĨ KĨA WĨRUTI GĨA 19
RWĨMBO NA. 22 Ũthamaki nĩ Ũhandĩtwo, Nĩ Ũũke!
Ũrĩa Tũĩ Igũrũ Rĩgiĩ Matuĩro ma Jehova ma Ihinda Rĩũkĩte
“Jehova . . . ndendaga mũndũ o na ũmwe akaaniinwo.”—2 PET. 3:9.
ŨNDŨ ŨRĨA WARĨRĨIRIO
No tũkorũo na ma atĩ matuĩro ma Jehova ma ihinda rĩũkĩte magaakorũo marĩ ma kĩhooto na ũthingu.
1. Nĩ kĩĩ kĩngĩtũma tuuge atĩ tũratũũra mahinda ma mwanya?
TŨRATŨŨRA mahinda ma mwanya! O mũthenya nĩ twĩyonagĩra morathi ma Bibilia makĩhinga. Kwa ngerekano, nĩ tũrona ũrĩa “mũthamaki wa mwena wa rũgongo” na “mũthamaki wa mwena wa mũhuro” maragucanĩria wathani wa thĩ. (Dan. 11:40) Ningĩ nĩ tũreyonera ũhoro ũrĩa mwega wa Ũthamaki wa Ngai ũkĩhunjio na gĩkĩro kĩnene, na andũ milioni nyingĩ makawĩtĩkĩra. (Isa. 60:22; Mat. 24:14) Na nĩ tũheagwo irio nyingĩ cia kĩĩroho “ihinda rĩrĩa rĩagĩrĩire.”—Mat. 24:45-47.
2. Nĩ ũndũ ũrĩkũ tũngĩkorũo na ma naguo, na nĩ atĩa tũbatiĩ kũririkana?
2 Jehova no arathiĩ na mbere gũtũteithia gũtaũkĩrũo wega makĩria nĩ maũndũ ma bata marĩa megwĩkĩka ica ikuhĩ. (Thim. 4:18; Dan. 2:28) No tũkorũo na ma atĩ gũkinyĩria rĩrĩa thĩna ũrĩa mũnene ũkaambĩrĩria, nĩ tũgaakorũo tũĩ maũndũ mothe marĩa tũrabatara kũmenya nĩguo tũhote gũkirĩrĩria tũrĩ ehokeku na tũtũũrie ũrũmwe mahinda-inĩ macio maritũ. O na kũrĩ ũguo, nĩ tũbatiĩ kũririkana atĩ nĩ kũrĩ maũndũ mamwe tũtoĩ megiĩ ihinda rĩũkĩte. Gĩcunjĩ-inĩ gĩkĩ, tũkwamba kwarĩrĩria kĩrĩa gĩtũmĩte tũgarũrĩre ũtaũku witũ wĩgiĩ maũndũ mamwe mageekĩka ihinda rĩũkĩte. Thutha ũcio nĩ tũkwarĩrĩria maũndũ mamwe tũĩ megiĩ ihinda rĩũkĩte na ũrĩa Ithe witũ wa igũrũ ageeka.
MAŨNDŨ MARĨA TŨTOĨ
3. Twetĩkĩtie mweke wa kũmenya Jehova ũgaathira rĩ, na nĩ kĩĩ gĩatũmĩte twĩcirie ũguo?
3 Ihinda ihĩtũku twetĩkĩtie atĩ rĩrĩa thĩna ũrĩa mũnene ũkaambĩrĩria, andũ arĩa matoĩ Jehova matikagĩa na mweke wa kũmũmenya nĩguo mahonokio hĩndĩ ya Hari–Magedoni. Twetĩkĩtie ũguo tondũ tweciragia atĩ rũgano rwa Mũiyũro wa hĩndĩ ya Nuhu rwarĩ kĩĩruru kĩa ũndũ ũngĩ ũgeekĩka. Kwa ngerekano, twaugaga atĩ o ta ũrĩa Jehova aahingire mũrango wa thabina Mũiyũro ũtanambĩrĩria, noguo kĩambĩrĩria-inĩ gĩa thĩna ũrĩa mũnene akaahingĩrĩria na njĩra ya mũhaano andũ arĩa marĩ thĩinĩ wa mũtabarĩre ũyũ wa Shaitani, na kwoguo mage mweke wa kũhonokio.—Mat. 24:37-39.
4. Nĩ kĩĩ gĩtũmĩte tũtige kuuga atĩ rũgano rwa Mũiyũro wa hĩndĩ ya Nuhu nĩ kĩĩruru kĩa ũndũ ũngĩ ũgeekĩka ihinda rĩũkĩte?
4 Hihi nĩ tũbatiĩ kuuga atĩ rũgano rũu rwĩgiĩ Mũiyũro nĩ kĩĩruru kĩa ũndũ ũngĩ? Aca, tondũ Bibilia ndiugaga ũndũ ta ũcio. a Nĩ ma Jesu nĩ aaringithanirie ihinda rĩa gũkorũo kuo gwake na “matukũ ma Nuhu,” no ndoonanirie atĩ maũndũ marĩa meekĩkire hĩndĩ ĩyo maarĩ kĩĩruru kĩa ũndũ ũngĩ. Kwa ngerekano, ndaaugire atĩ ũrĩa mũrango wa thabina wahingirũo warĩ kĩĩruru kĩa ũndũ ũngĩ ũgeekĩka. No ũguo ti kuuga atĩ gũtirĩ maũndũ tũngĩĩruta kuumana na rũgano rwa Mũiyũro wa hĩndĩ ya Nuhu.
5. (a) Nĩ ũndũ ũrĩkũ Nuhu eekire Mũiyũro ũtanambĩrĩria? (Ahibirania 11:7; 1 Petero 3:20) (b) Nĩ ũndũ ũrĩkũ wĩgiĩ wĩra witũ wa kũhunjia ũhaanaine na wa matukũ ma Nuhu?
5 Rĩrĩa Nuhu aaiguire ndũmĩrĩri ya Jehova ya kũheana mũkaana, nĩ oonanirie wĩtĩkio na njĩra ya gwaka thabina. (Thoma Ahibirania 11:7; 1 Petero 3:20.) Ũndũ ũmwe na ũcio, andũ arĩa maiguaga ũhoro ũrĩa mwega wĩgiĩ Ũthamaki wa Ngai mabatiĩ gũkorũo mehaarĩirie kũwathĩkĩra. (Atũm. 3:17-20) Petero eetire Nuhu “mũhunjia wa ũthingu.” (2 Pet. 2:5) No o ta ũrĩa tuoonire gĩcunjĩ-inĩ kĩrĩa kĩhĩtũku, tũtiũĩ kana Nuhu nĩ aahotire kũhunjĩria andũ othe thĩinĩ wa thĩ Mũiyũro ũtanambĩrĩria. Ũmũthĩ tũrĩ na wĩra wa kũhunjia thĩinĩ wa thĩ yothe, na nĩ twĩrutanagĩria biũ kũũhingia. No o na tũngĩĩrutanĩria atĩa, tũtingĩhota kũhunjĩria mũndũ wothe thĩinĩ wa thĩ mũico ũtanakinya. Tũngiuga ũguo nĩkĩ?
6-7. Nĩ kĩĩ kĩngĩtũma tuuge atĩ tũtingĩhota gũkorũo tũhunjĩirie andũ othe thĩinĩ wa thĩ ũhoro ũrĩa mwega mũico ũtakinyĩte?
6 Ta wĩcirie ũrĩa Jesu aaugire ũhoro-inĩ wĩgiĩ wĩra witũ wa kũhunjia. Aarathĩte atĩ ũhoro ũrĩa mwega nĩ ũngĩkaahunjio “thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe.” (Mat. 24:14) Ũrathi ũcio nĩ ũrahinga ũmũthĩ na gĩkĩro kĩnene gũkĩra hĩndĩ ĩngĩ o yothe. Rĩu ndũmĩrĩri ya Ũthamaki ĩroneka na thiomi makĩria ma 1,000, na andũ aingĩ no mathome ndũmĩrĩri ĩyo kũgerera Website ya jw.org.
7 O na kũrĩ ũguo, Jesu nĩ eerire arutwo ake atĩ rĩrĩa agooka, agaakora “[matarĩkĩtie] gũthiũrũrũka matũũra-inĩ mothe,” kana matarĩkĩtie kũhunjĩria andũ othe. (Mat. 10:23; 25:31-33) Ciugo icio cia Jesu nĩ iratũhutia o na mahinda-inĩ maya. Andũ milioni nyingĩ maikaraga icigo-inĩ wĩra witũ wa kũhunjia wĩkĩrĩirũo mĩkaana. Makĩria ma ũguo, ciana nyingĩ nĩ iraciarũo o mũthenya. Nĩ twĩrutanagĩria ũrĩa wothe tũngĩhota kũhunjia ũhoro ũrĩa mwega kũrĩ andũ a “ndũrĩrĩ ciothe na mĩhĩrĩga na thiomi.” (Kũg. 14:6) No ma nĩ atĩ tũtingĩhota gũkorũo tũhunjĩirie andũ othe thĩinĩ wa thĩ mũico ũtakinyĩte.
8. Nĩ kĩũria kĩrĩkũ tũngĩĩyũria kĩgiĩ matuĩro ma Jehova ma ihinda rĩũkĩte? (Ningĩ rora mbica.)
8 Ũndũ ũcio no ũtũme twĩyũrie ũũ: Gũgaathiĩ atĩa harĩ andũ arĩa matagaakorũo magĩte mweke wa kũigua ũhoro ũrĩa mwega mbere ya thĩna ũrĩa mũnene kwambĩrĩria? Hihi Jehova na Mũrũwe ũrĩa aheete wĩra wa gũtuanĩra makaarũmbũyania nao atĩa? (Joh. 5:19, 22, 27; Atũm. 17:31) Rĩandĩko rĩa mũthingi rĩa gĩcunjĩ gĩkĩ rĩroiga atĩ Jehova “ndendaga mũndũ o na ũmwe akaaniinwo,” ĩndĩ “endaga othe merire.” (2 Pet. 3:9; 1 Tim. 2:4) O na gũtuĩka Jehova nĩ atũmenyithĩtie ũndũ ũcio, ndatũguũrĩirie ũrĩa agaatuĩra andũ arĩa matagaakorũo magĩte na mweke wa kũigua ũhoro ũrĩa mwega. Na ũrĩa kũrĩ nĩ atĩ ndarabatara gũtũtaarĩria maũndũ marĩa ekĩte kana marĩa arabanga gwĩka.
Jehova agaatuĩra atĩa andũ arĩa matagaakorũo magĩte na mweke wa kũigua ũhoro ũrĩa mwega mbere ya thĩna ũrĩa mũnene kwambĩrĩria? (Rora kĩbungo gĩa 8) c
9. Nĩ ũndũ ũrĩkũ Jehova atũguũrĩirie thĩinĩ wa Bibilia?
9 Jehova nĩ atũguũrĩirie Kiugo-inĩ gĩake maũndũ mamwe marĩa ageeka. Kwa ngerekano, Bibilia nĩ ĩtwĩraga atĩ Jehova nĩ akaariũkia andũ “matarĩ athingu” arĩa mataagĩire na mweke wa kũigua ũhoro ũrĩa mwega nĩguo magarũrĩre mĩthiĩre yao. (Atũm. 24:15; Luk. 23:42, 43) Ũndũ ũcio ũratũma twĩyũrie ciũria ingĩ cia bata.
10. Nĩ ciũria irĩkũ ingĩ tũngĩĩyũria?
10 Hihi andũ arĩa othe magaakua hĩndĩ ya thĩna ũrĩa mũnene magaakorũo matuĩrĩirũo kũniinwo tene na tene ũndũ matarĩ na kĩĩrĩgĩrĩro gĩa gũkaariũkio? Maandĩko monanagia wega atĩ akararia arĩa makaaniinwo nĩ Jehova na mbũtũ ciake hĩndĩ ya Hari–Magedoni matikaariũkio. (2 Thes. 1:6-10) Ĩ nao andũ arĩa hihi magaakua hĩndĩ ya thĩna ũcio mũnene nĩ ũndũ wa icanjama cia ndũire, aksidenti, kana kũũragwo nĩ andũ angĩ? (Koh. 9:11; Zek. 14:13) Hihi amwe ao nĩ magaakorũo gatagatĩ-inĩ ka andũ “matarĩ athingu” arĩa makaariũkio thĩinĩ wa thĩ njerũ? Tũtiũĩ.
MAŨNDŨ MARĨA TŨĨ
11. Andũ magaatuĩrũo kũringana na ũndũ ũrĩkũ hĩndĩ ya Hari–Magedoni?
11 Nĩ tũĩ maũndũ maigana ũna marĩa mageekĩka ihinda rĩũkĩte. Kwa ngerekano, nĩ tũĩ atĩ hĩndĩ ya Hari–Magedoni andũ magaatuĩrũo kũringana na ũrĩa maarũmbũyanirie na ariũ a Ithe na Kristo. (Mat. 25:40) Arĩa magaatuĩrũo atĩ nĩ a mũhaano wa ngʼondu, nĩ magaakorũo monanĩtie atĩ nĩ manyitaga mbaru arĩa aitĩrĩrie maguta o hamwe na Kristo. Ningĩ nĩ tũĩ atĩ Akristiano amwe aitĩrĩrie maguta no magaakorũo gũkũ thĩ o na thutha wa thĩna ũrĩa mũnene kwambĩrĩria, na magaathiĩ igũrũ ihinda inini mbere ya Hari–Magedoni kwambĩrĩria. Kwoguo ihinda-inĩ rĩrĩa rĩothe ariũ a Ithe na Kristo magaakorũo gũkũ thĩ, no kũhoteke andũ a ngoro njega no magaakorũo na mweke wa kũmanyita mbaru o hamwe na wĩra ũrĩa mararuta. (Mat. 25:31, 32; Kũg. 12:17) Kũmenya ũguo nĩ kwa bata nĩkĩ?
12-13. Kwahoteka andũ amwe mageeka atĩa thutha wa kuona “Babuloni Ũrĩa Mũnene” aniinwo? (Ningĩ rora mbica.)
12 O na thutha wa thĩna ũrĩa mũnene kwambĩrĩria, no kũhoteke andũ amwe arĩa makoona atĩ “Babuloni Ũrĩa Mũnene” nĩ anangwo, nĩ makaaririkana atĩ kwa ihinda iraihu Aira a Jehova nĩ maaugaga atĩ ũndũ ũcio nĩ ũngĩkahaanĩka. Hihi andũ amwe arĩa makoona ũndũ ũcio ũgĩkĩka nĩ magaacenjia mwerekera wao?—Kũg. 17:5; Ezek. 33:33.
13 Kũngĩgaathiĩ ũguo, ũndũ ũcio ũgaakorũo ũhaanaine na ũrĩa wekĩkire Misiri matukũ-inĩ ma Musa. No tũririkane atĩ hĩndĩ ĩyo kwarĩ na ‘andũ aingĩ matukanĩte’ maathiire hamwe na Aisiraeli makiuma Misiri. No kũhoteke amwe ao maakũririe wĩtĩkio thutha wa kuona Mahũũra Marĩa Ikũmi Musa aarĩtie ũhoro wamo makĩhinga. (Tham. 12:38) Ũndũ ta ũcio ũngĩkahaanĩka thutha wa Babuloni Ũrĩa Mũnene kũniinwo-rĩ, hihi nĩ tũkaigua ũũru kuona atĩ andũ amwe moka ithondeka-inĩ ndagĩka ya mũthia mũico ũtanakinya? Aca tũtibatiĩ kũigua ũũru! Handũ ha ũguo tũbatiĩ gũkegerekania na Ithe witũ wa igũrũ, o we “Ngai mũigua tha na mũcayanĩri, ndahiũhaga kũrakara na nĩ aiyũirũo nĩ wendo mwĩhokeku na ũhoro wa ma.” b—Tham. 34:6.
Andũ amwe arĩa makoona atĩ “Babuloni Ũrĩa Mũnene” nĩ aniinwo, nĩ makaaririkana atĩ kwa ihinda iraihu Aira a Jehova nĩ maaugaga atĩ ũndũ ũcio nĩ ũngĩkahaanĩka (Rora kĩbungo gĩa 12-13) d
14-15. Hihi mũndũ nĩ agaatuĩrũo kũringana na rĩrĩa aakuire kana kũrĩa aaikaraga? Taarĩria. (Thaburi 33:4, 5)
14 Rĩmwe andũ amwe no mauge, “O na kaba ngʼania witũ ndagakorererũo nĩ thĩna ũrĩa mũnene arĩ muoyo, nĩguo akaagĩa na mweke wa kũriũkio.” Ma nĩ atĩ mũndũ ndakoragwo na muoroto mũũru akiuga ũndũ ta ũcio. No mũndũ ndagaatuĩrũo kũringana na rĩrĩa aakuire. Jehova atuanagĩra na njĩra nginyanĩru, na kwoguo hingo ciothe matua make makoragwo marĩ ma kĩhooto na magĩrĩru. (Thoma Thaburi 33:4, 5.) Nĩ ũndũ ũcio no tũkorũo na ma atĩ “Mũtuanĩri Ciira wa thĩ yothe” ageeka ũndũ ũrĩa wagĩrĩire.—Kĩam. 18:25.
15 Ningĩ no tuuge atĩ mũndũ ndagaatuĩrũo kũringana na kũrĩa aaikaraga. Tũtingĩrĩgĩrĩra atĩ nĩ kũrĩ andũ Jehova agaatuĩra atĩ nĩ a mũhaano wa “mbũri” atĩ tondũ tu maaikaraga kũndũ mataagĩire na mweke wa kũigua ndũmĩrĩri ya Ũthamaki. (Mat. 25:46) Tondũ we atuanagĩra na njĩra ya kĩhooto, twĩ na ma atĩ nĩ arũmbũyagia andũ ta acio na njĩra nene gũkĩra ũrĩa ithuĩ tũngĩhota. Tũtiũĩ ũrĩa Jehova agaatongoria maũndũ hĩndĩ ya thĩna ũrĩa mũnene. No kũhoteke andũ amwe ta acio nĩ makaagĩa na mweke wa kũmenya Jehova na marũgame mwena wake rĩrĩa agaatheria rĩĩtwa rĩake ndũrĩrĩ-inĩ ciothe.—Ezek. 38:16.
Thutha wa thĩna ũrĩa mũnene kwambĩrĩria-rĩ, . . . hihi andũ amwe arĩa makoona ũndũ ũcio ũgĩkĩka nĩ magaacenjia mwerekera wao?
16. Bibilia ĩtũteithĩtie kũmenya ũndũ ũrĩkũ wĩgiĩ Jehova? (Ningĩ rora mbica.)
16 Gũthuthuria Bibilia nĩ gũtũteithĩtie kũmenya ũrĩa Jehova onaga muoyo wa mũndũ ũrĩ wa bata. Aarutire Mũrũ wake arĩ igongona nĩguo ithuothe tũgĩe na kĩĩrĩgĩrĩro gĩa gũgaatũũra tene na tene. (Joh. 3:16) Ithuothe nĩ twĩyoneire ũrĩa Jehova atwendete na njĩra nene. (Isa. 49:15) Nĩ oĩ o ũmwe witũ na rĩĩtwa. Atũĩ wega ũũ atĩ o na tũngĩkua, agaatũriũkia o ũrĩa twatariĩ tondũ nĩ akaaririkana kaũndũ o gothe gatwĩgiĩ. (Mat. 10:29-31) Hatarĩ nganja, tũrĩ na gĩtũmi kĩega gĩa gwĩtĩkia atĩ Ithe witũ wa igũrũ ũtwendete agaatuĩra o ũmwe witũ na njĩra nginyanĩru arĩ na kĩhooto na tha nyingĩ.—Jak. 2:13.
No tũkorũo na ma atĩ Jehova agaatuĩra o ũmwe witũ na njĩra nginyanĩru arĩ na kĩhooto na tha nyingĩ (Rora kĩbungo gĩa 16)
17. Nĩ ciũria irĩkũ tũkaarĩrĩria gĩcunjĩ-inĩ kĩrĩa kĩrũmĩrĩire?
17 Kũgĩa na ũtaũku ũcio mwerũ nĩ kũratũteithia kuona atĩ wĩra wa kũhunjia nĩ ũrabatara kũrutwo na ihenya gũkĩra hĩndĩ ĩngĩ o yothe. Tũngiuga ũguo nĩkĩ? Na nĩ kĩĩ gĩtũtindĩkaga gũthiĩ na mbere kũhunjia ũhoro ũrĩa mwega tũtegũkua ngoro? Ciũria icio nĩ ciarĩrĩirio na njĩra ndikĩru gĩcunjĩ-inĩ kĩrĩa kĩrũmĩrĩire.
RWĨMBO NA. 76 Wee Ũiguaga Atĩa?
a Nĩguo wone kĩrĩa gĩtũmĩte kũgĩe na ũgarũrũku ũcio, rora gĩcunjĩ kĩa “Ũguo Nĩguo Woonire Kwagĩrĩire,” thĩinĩ wa ngathĩti ya Mũrangĩri ya Machi 15, 2015, kar. 7-11.
b Thutha wa Babuloni Ũrĩa Mũnene kũniinwo, ndungata ciothe cia Jehova nĩ ikaagerio hĩndĩ ya tharĩkĩro ya Gogu wa Magogu. O na mũndũ wothe ũgooka ithondeka-inĩ rĩa Jehova thutha wa Babuloni Ũrĩa Mũnene kũniinwo nĩ akaagerio.
c GŨTAARĨRIA MBICA: Mbica ithatũ ironania kĩrĩa kĩngĩtũma andũ amwe mage kũgĩa na mweke wa kũhunjĩrio: (1) Mũtumia ũikaraga kũndũ ndini ĩrĩa nene yakuo ĩtũmaga ũkorũo ũrĩ ũgwati kũhunjia kuo, (2) mũthuri na mũtumia wake maikaraga bũrũri-inĩ wĩra witũ ũhũũrĩtwo marubuku, na (3) mũndũrũme ũikaraga kũndũ thĩinĩ mũno gũtangĩkinyĩrĩka.
d GŨTAARĨRIA MBICA: Mũirĩtu watigire ũhoro wa ma akĩririkana maũndũ marĩa eerutĩte megiĩ kũniinwo kwa “Babuloni Ũrĩa Mũnene.” Akagarũrĩra mwerekera wake na agacoka kũrĩ aciari ake Akristiano. Ũndũ ta ũcio ũngĩkahaanĩka, tũbatiĩ gũkegerekania na tha na ũcayanĩri wa Ithe witũ wa igũrũ na tũkene tondũ mũndũ ũcio nĩ acokerera Jehova.
