19-زەرتتەۋ ماقالاسى
22-ٵن قۇداي پاتشالىعى كەلسىن!
ەحوبا زور الاپاتتا ادامداردى قالاي سوتتايدى؟
«ول بىردە-ٴبىر ادامنىڭ جويىلماعانىن... قالايدى» (پەت. 2-ح. 3:9).
نەگىزگى وي
ەحوبا بولاشاقتا ادامداردى سوتتاعاندا، دۇرىس ٵرى ٵدىل شەشىم شىعاراتىنىنا سەنىمدى بولساق بولادى.
1. نەگە ٴبىز ەرەكشە ۋاقىتتا ٶمىر ٴسۇرىپ جاتىرمىز؟
ٴبىز قازىر ەرەكشە ۋاقىتتا ٶمىر ٴسۇرىپ جاتىرمىز! ويتكەنى كيەلى كىتاپ پايعامبارلىقتارى كۇن سايىن كوز الدىمىزدا ورىندالىپ جاتىر. مىسالى، «سولتۇستىك پاتشاسى» مەن «وڭتۇستىك پاتشاسىنىڭ» بۇكىل الەمگە ۇستەمدىك ەتۋ ٷشىن ٴبىر-بىرىمەن تەكەتىرەسىپ جاتقانىن كورىپ ٴجۇرمىز (دان. 11:40). قۇداي پاتشالىعى جايلى ىزگى حاباردىڭ دا بۇرىن-سوڭدى بولماعانداي كەڭ كولەمدە ۋاعىزدالىپ، ميلليونداعان ادامنىڭ سوعان قۇلاق اسىپ جاتقانىنا كۋامىز (يشايا 60:22؛ مات. 24:14). سونداي-اق اعىل-تەگىل مول رۋحاني اس-سۋدى «ۋاقتىلى» الىپ جاتىرمىز (مات. 24:45—47).
2. ٴبىز نە نارسەگە سەنىمدى بولا الامىز جانە نەنى مويىنداۋىمىز كەرەك؟
2 ەحوبا الدا بولاتىن ماڭىزدى جايتتارعا قاتىستى تۇسىنىگىمىزدى بارعان سايىن ارتتىرىپ جاتىر (ناق. س. 4:18؛ دان. 2:28). زور الاپات باستالعاندا بىرلىگىمىز بۇزىلماي، ادال بولىپ قالۋ ٷشىن نەنى ٴبىلۋىمىز قاجەت بولسا، سونىڭ ٴبارىن ٶز ۋاقىتىندا بىلەتىنىمىزگە سەنىمدى بولساق بولادى. ٴبىراق الدا بولاتىن كەيبىر جايتتاردى قازىر بىلمەيتىنىمىزدى مويىنداۋىمىز كەرەك. ٴبىز بۇل ماقالادا، الدىمەن، كەيبىر وقيعالارعا قاتىستى تۇسىنىگىمىزدى نە ٷشىن وزگەرتۋ قاجەت بولعانىن قاراستىرامىز. ال كەيىن بولاشاققا قاتىستى جانە سول كەزدە ەحوبا قالاي ارەكەت ەتەتىنىنە قاتىستى ٴبىز بىلەتىن جايتتاردى قاراستىرىپ وتەمىز.
ٴبىز نەنى بىلمەيمىز؟
3. بۇرىن ٴبىز زور الاپات باستالعاندا ەحوباعا سەنبەيتىندەرمەن نە بولادى دەپ ويلادىق جانە بۇلاي تۇجىرىمداۋعا نە سەبەپ بولدى؟
3 بۇرىن ٴبىز زور الاپات باستالعاندا ەحوباعا سەنبەيتىندەر ٷشىن ونىڭ جاعىنا شىعىپ، ارماگەددوننان امان وتۋگە تىم كەش بولادى دەپ ويلادىق. بۇلاي تۇجىرىمداعان سەبەبىمىز، توپان سۋ كەزىن ٴبىز تۇپبەينە دەپ قاراستىرىپ كەلدىك. مىسالى، ەحوبا توپان سۋ باستالار الدىندا كەمەنىڭ ەسىگىن جاۋىپ قويعانىنداي، زور الاپات باستالعاندا دا شايتاننىڭ دۇنيەسى ٷشىن «ەسىكتى جاۋىپ قويادى»، ياعني سول ساتتەن باستاپ ادامداردا قۇتقارىلۋعا مۇمكىندىك بولمايدى دەپ ويلادىق (مات. 24:37—39).
4. قازىر توپان سۋ وقيعاسىن تۇپبەينە دەپ قاراستىرامىز با؟ ٴتۇسىندىرىڭىز.
4 توپان سۋ وقيعاسىن تۇپبەينە دەپ قاراستىرۋىمىز كەرەك پە؟ جوق. ويتكەنى كيەلى كىتاپتىڭ ٶزى بۇلاي دەپ قاراستىرمايدى a. يسا «نۇح پايعامباردىڭ زامانىن» ٶزىنىڭ «وسىندا بولاتىن» كەزىمەن سالىستىرعان. ٴبىراق ول توپان سۋ وقيعاسىن تۇپبەينە دەپ، ياعني ٵربىر ادام نە ٵربىر جاعداي بىردەڭەنى بەينەلەيدى دەپ ايتپاعان جانە كەمە ەسىگىنىڭ جابىلۋىنىڭ دا قانداي دا ٴبىر پايعامبارلىق ٴمانى بار دەمەگەن. ٴبىراق بۇل نۇحتىڭ وزىنەن جانە توپان سۋ وقيعاسىنان ەشقانداي ٴتالىم الا المايمىز دەگەن ٴسوز ەمەس.
5. ا) توپان سۋدىڭ الدىندا نۇح نە ىستەدى؟ (ەۆرەيلەرگە 11:7؛ پەتىردىڭ 1-حاتى 3:20) ٵ) نۇحتىڭ ۋاعىزى مەن ٴبىزدىڭ ۋاعىزىمىز قاي جاعىنان ۇقساس؟
5 ەحوبانىڭ ەسكەرتۋ حابارىن ەستىگەن سوڭ، نۇح سەنىمىن كورسەتىپ، كەمە سوعا باستادى (ەۆرەيلەرگە 11:7؛ پەتىردىڭ 1-حاتى 3:20 وقىڭىز). سول سياقتى قۇداي پاتشالىعى جايلى ىزگى حاباردى ەستىگەن ادامدار دا سەنىم تانىتىپ، ارەكەت ەتۋلەرى كەرەك (ەل. ٸس. 3:17—20). پەتىر نۇحتى «ادىلدىكتى ۋاعىزداۋشى» دەپ اتاعان (پەت. 2-ح. 2:5). ٴبىراق الدىڭعى ماقالادا ايتىلعانداي، نۇح توپان سۋعا دەيىن جەر بەتىندەگى ٵربىر ادامعا ۋاعىزداعان با، جوق پا — ونى بىلمەيمىز. بۇگىندە ٴبىز ىزگى حاباردى دۇنيەجۇزى بويىنشا ۋاعىزداپ ٴجۇرمىز جانە ونى زور قۇلشىنىسپەن اتقارۋدامىز. ٴبىراق قانشا كۇش سالمايىق، وسى زاماننىڭ سوڭى كەلگەنشە جەر بەتىندەگى ٵربىر ادامعا ىزگى حاباردى جەتكىزە المايمىز. نەگە ولاي دەيمىز؟
6، 7. وسى دۇنيەنىڭ سوڭى كەلگەنشە ٴبىز جەر بەتىندەگى ٵربىر ادامعا ىزگى حاباردى جەتكىزە المايمىز دەپ تۇجىرىمداۋ نەگە ورىندى؟ ٴتۇسىندىرىڭىز.
6 ۋاعىز ٸسىنىڭ اۋقىمى جايلى يسانىڭ نە دەگەنىن قاراستىرايىق. ول «ىزگى حابار بارلىق حالىقتار ەستۋ ٷشىن بۇكىل جەر بەتىندە ۋاعىزدالاتىنىن» ايتقان (مات. 24:14). بۇل پايعامبارلىق قازىر بۇرىن-سوڭدى بولماعانداي كەڭ كولەمدە ورىندالىپ جاتىر. مىسال ٷشىن، پاتشالىق جايلى ىزگى حاباردى ادامدار 1000 نان استام تىلدە ەستي الادى. بۇل حابار jw.org سايتىمىزدىڭ ارقاسىندا دۇنيەدەگى حالىقتاردىڭ باسىم بولىگىنە قولجەتىمدى.
7 الايدا يسا شاكىرتتەرىنە: «ادام ۇلى كەلگەنشە، ٴيسرايلدىڭ بارلىق قالالارىن ارالاپ ۇلگەرمەيسىڭدەر»،— دەگەن، ياعني ولاردىڭ ٵربىر ادامعا ۋاعىزداۋعا مۇمكىندىگى بولمايتىنىنا مەڭزەگەن (مات. 10:23؛ 25:31—33). يسانىڭ ايتقان سوزدەرى ٴبىزدىڭ كۇندەرىمىزگە دە قاتىستى. بۇگىندە ميلليونداعان ادام ۋاعىز ىسىنە قاتاڭ تيىم سالىنعان ەلدەردە تۇرادى. ونىڭ ۇستىنە، ٵر مينۋت سايىن جۇزدەگەن بالا دۇنيەگە كەلەدى. ارينە، ٴبىز «ٵربىر ۇلت، رۋ، ٴتىل جانە حالىققا» ىزگى حاباردى جەتكىزۋ ٷشىن بارىمىزدى سالامىز (ايان 14:6). ٴبىراق وسى دۇنيەنىڭ سوڭى كەلگەنشە ٴبىز ىزگى حاباردى جەر بەتىندەگى ٵربىر ادامعا جەتكىزىپ ۇلگەرە المايمىز.
8. ەحوبانىڭ بولاشاقتا ادامداردى قالاي سوتتايتىنىنا قاتىستى قانداي سۇراق تۋىندايدى؟ (سۋرەتتەردى دە قاراڭىز.)
8 وسى ورايدا سۇراق تۋىندايدى: «زور الاپات باستالعانعا دەيىن ىزگى حاباردى ەستۋگە مۇمكىندىگى بولماعان ادامدارمەن نە بولادى؟ ەحوبا مەن بارلىق سوتتى جۇرگىزەتىن ونىڭ ۇلى سول ادامدارعا قاتىستى قانداي شەشىم شىعارادى؟» (جوح. 5:19، 22، 27؛ ەل. ٸس. 17:31) وسى ماقالانىڭ نەگىزگى تارماعىندا ايتىلعانداي، ەحوبا «بىردە-ٴبىر ادامنىڭ جويىلماي، ٴبارىنىڭ وكىنگەنىن قالايدى» (پەت. 2-ح. 3:9؛ ٴتىم. 1-ح. 2:4). دەسە دە كوتەرىلگەن وسى سۇراققا قاتىستى ەحوبا ەشتەڭە ايتپاعانىن مويىنداۋىمىز كەرەك. نەگىزى، ول ٶزىنىڭ نە ىستەگەنىن، نە ىستەيتىنىن بىزگە ايتۋعا مىندەتتى ەمەس.
زور الاپات باستالعانعا دەيىن ىزگى حاباردى ەستۋگە مۇمكىندىگى بولماعان ادامدارعا قاتىستى ەحوبا قانداي شەشىم شىعارادى؟ (8-ابزاستى قاراڭىز) c
9. ەحوبا ٶز سوزىندە بىزگە نەنى اشقان؟
9 ەحوبا ٶز سوزىندە بولاشاقتا نە ىستەيتىنىنە قاتىستى كەيبىر جايتتاردى اشقان. مىسالى، كيەلى كىتاپتا ول «ادىلەتسىزدەردى»، ياعني ىزگى حاباردى ەستىپ، ومىرلەرىن وزگەرتۋگە مۇمكىندىگى بولماعان ادامداردى قايتا تىرىلتەتىنى ايتىلعان (ەل. ٸس. 24:15؛ لۇقا 23:42، 43). بۇل ورايدا تاعى دا باسقا ماڭىزدى سۇراقتار تۋىندايدى.
10. بىزدە تاعى قانداي سۇراقتار تۋىندايدى؟
10 زور الاپات كەزىندە قايتىس بولعان ادامداردىڭ ٴبارى ماڭگىگە جويىلا ما؟ ولاردىڭ قايتا تىرىلۋگە ەش ٷمىتى بولماي ما؟ كيەلى كىتاپتان ناقتى بىلەتىنىمىز، ەحوبا مەن ونىڭ ەركىنە قارسى شىققان ادامدار ارماگەددوندا ٴبىرجولا جويىلىپ، قايتا تىرىلمەيدى (سال. 2-ح. 1:6—10). ال زور الاپات كەزىندە اۋرۋدان، قارتتىقتان، وقىس وقيعادان نە بىرەۋدىڭ قولىنان ولگەندەر جايلى نە دەۋگە بولادى؟ (ۋاع. 9:11؛ زاك. 14:13) ولاردىڭ كەيبىرى جاڭا دۇنيەدە «ادىلەتسىزدەرمەن» بىرگە قايتا تىرىلە مە؟ ٴبىز بۇنى بىلمەيمىز.
ٴبىز نەنى بىلەمىز؟
11. ادامدار ارماگەددوندا نە نارسەگە قاراپ سوتتالادى؟
11 بولاشاقتا بولاتىن وقيعالارعا قاتىستى كەيبىر جايتتار بىزگە ٴمالىم. مىسالى، ٴبىز ادامدار ارماگەددوندا ٴماسىحتىڭ باۋىرلارىن قولدادى ما، جوق پا — سوعان قاراپ سوتتالاتىنىن بىلەمىز (مات. 25:40). مايلانعاندار مەن ٴماسىحتى قولدايتىندار بولاشاقتا «قوي» دەپ تابىلادى. تاعى ٴبىر بىلەتىنىمىز — ٴماسىحتىڭ باۋىرلارىنىڭ كەيبىرى زور الاپات باستالعاندا ٵلى دە جەر بەتىندە بولادى. ولار كوككە ارماگەددوننىڭ ٴدال الدىندا عانا اكەتىلەدى. دەمەك، ٴماسىحتىڭ باۋىرلارى جەر بەتىندە جۇرگەن كەزدىڭ بارىندە اقجۇرەكتى ادامداردىڭ ولاردى جانە ولاردىڭ ٸسىن قولداۋعا مۇمكىندىكتەرى بولاتىنعا ۇقسايدى (مات. 25:31، 32؛ ايان 12:17). بۇل جايتتاردى ەسكەرۋ نەگە ماڭىزدى؟
12، 13. «ۇلى بابىلدىڭ» قۇلاعانىن كورىپ كەيبىرەۋلەر نە ىستەۋى مۇمكىن؟ (سۋرەتتەردى دە قاراڭىز.)
12 ٴتىپتى زور الاپات باستالعاننان كەيىن، كەيبىر ادامدار «ۇلى بابىلدىڭ» قۇلاعانىن كورىپ «ەحوبا كۋاگەرلەرى بۇل جايلى باياعىدان ايتىپ جۇرگەن ەدى عوي» دەپ ەسكە الۋى مۇمكىن. وسى كەزدە كەيبىرەۋلەر ەحوباعا سەنە باستاۋى مۇمكىن بە؟ (ايان 17:5؛ ەزەك. 33:33).
13 ەگەر بۇل سولاي بولسا، بۇل مىسىرداعى جاعدايعا ۇقسايتىن بولادى. يسرايلدىكتەر مىسىردان شىققاندا، «ولارمەن بىرگە كوپتەگەن جاتجۇرتتىقتار دا شىققان». ەرىپ شىققان سول ادامداردىڭ كەيبىرى مۇسا ايتقان ون جازانىڭ ورىندالعانىن كورىپ ەحوباعا سەنگەن بولۋى مۇمكىن (مۇس. 2-ج. 12:38). ۇلى بابىل قۇلاعاندا دا جاعداي وسىلاي بولىپ جاتسا، نە ىستەيمىز؟ ارامىزعا ارماگەددون ٴدال تاقالعان ساتتە قوسىلعاندارى ٷشىن ولاردى جازعىرىپ، «بۇل ادىلەتسىزدىك قوي!» دەيمىز بە؟ ارينە، جوق! ويتكەنى ٴبىز كوكتەگى اكەمىزگە ەلىكتەيمىز. ول — «مەيىرىمدى دە جاناشىر، اشۋلانۋعا اسىقپايتىن، اينىماس سۇيىسپەنشىلىگى مول جانە ٵردايىم سوزىنە ادال قۇداي» b (مۇس. 2-ج. 34:6).
كەيبىر ادامدار «ۇلى بابىلدىڭ» قۇلاعانىن كورگەندە، «ەحوبا كۋاگەرلەرى بۇل جايلى باياعىدان ايتىپ جۇرگەن ەدى عوي» دەپ ەسكە الاتىن بولادى (12، 13-ابزاستاردى قاراڭىز) d
14، 15. ادامنىڭ بولاشاقتا ماڭگى ٶمىر ٴسۇرۋى ونىڭ قاشان ولەتىنىنە نەمەسە قاي جەردە تۇراتىنىنا بايلانىستى ما؟ ٴتۇسىندىرىڭىز. (ٴزابۇر 33:4، 5)
14 كەيبىر باۋىرلاستاردىڭ: «تۋىستارىم زور الاپاتقا دەيىن قايتىس بولسا، قايتا تىرىلۋگە ٷمىتى بولار ەدى»،— دەگەنىن ەستىپ جاتامىز. ارينە، ولار بۇنداي سوزدەردى يگى نيەتپەن ايتادى. ٴبىراق ادامنىڭ بولاشاقتا ماڭگى ٶمىر ٴسۇرۋى ونىڭ قاشان ولەتىنىنە بايلانىستى ەمەس. ەحوبا — كەمەلدى تورەشى، ول ۇنەمى دۇرىس ٵرى ٵدىل شەشىم شىعارادى (ٴزابۇر 33:4، 5 وقىڭىز). سوندىقتان «بۇكىل الەمنىڭ تورەشىسى» بولاشاقتا دا ٵدىل ارەكەت ەتەتىنىنە سەنىمدى بولا الامىز (مۇس. 1-ج. 18:25).
15 ادامنىڭ بولاشاقتا ماڭگى ٶمىر ٴسۇرۋى ونىڭ قاي جەردە تۇراتىنىنا دا بايلانىستى ەمەس دەۋ قيسىندى. بۇگىندە كەيبىر ادامدار پاتشالىق حابارىن ەستۋ مۇمكىن ەمەس جەرلەردە تۇرادى. سونداي جەرلەردە تۇراتىن ميلليونداعان ادامدى ەحوبا بولاشاقتا اۆتوماتتى تۇردە «سەركەلەرگە» جاتقىزا سالادى دەۋ مۇلدەم قيسىنسىز (مات. 25:46). بىزگە سول ادامداردى ۋايىمداۋعا ەش سەبەپ جوق. بۇكىل الەمنىڭ تورەشىسى ولاردى بىزدەن دە قاتتى جاقسى كورەتىنىن ۇمىتپايىق. زور الاپاتتا ەحوبا جاعدايدى قالاي باعىتتايتىنىن ٴبىز بىلمەيمىز. ول بارلىق حالىقتارعا ٶز كيەلىلىگىن پاش ەتكەندە، بالكىم، كەيبىر ادامداردىڭ ول جايلى ٴبىلىپ، وعان سەنىم دامىتىپ، ونىڭ جاعىنا شىعۋعا مۇمكىندىكتەرى بولار (ەزەك. 38:16).
زور الاپات باستالعاننان كەيىن... كەيبىرەۋلەر ەحوباعا سەنە باستاۋى مۇمكىن بە؟
16. ٴبىز ەحوبا جايلى نە بىلەمىز؟ (سۋرەتتى دە قاراڭىز.)
16 ٴبىز كيەلى كىتاپتان ادامنىڭ ٶمىرى ەحوبا ٷشىن قانشالىقتى باعالى ەكەنىن بىلەمىز. ٴارقايسىسىمىزدا ماڭگى ٶمىر سۇرۋگە ٷمىت بولۋ ٷشىن ول ٶزىنىڭ ۇلىن قۇربان ەتكەن (جوح. 3:16). ٴبارىمىز ەحوبانىڭ سۇيىسپەنشىلىگىن سەزىنىپ ٴجۇرمىز (يشايا 49:15). ەحوبا ٴارقايسىسىمىزدى جەكە-جەكە تانيدى. ول ٴبىزدى جاقسى بىلەتىنى سونشا — ومىردەن ٶتىپ جاتساق، ٴبىزدىڭ وزىمىزگە ٴتان ەرەكشەلىكتەرىمىزدى جانە جادىمىزداعى ەستەلىكتەردى تۇگەل قالپىنا كەلتىرە الادى! (مات. 10:29—31). مۇنىڭ ٴبارى كوكتەگى ٴسۇيۋشى اكەمىز ەحوبانىڭ ٵربىر ادامدى دانالىقپەن، ادىلدىكپەن جانە مەيىرىمدىلىكپەن سوتتايتىنىنا سەنىمدىلىك بەرەدى (جاق. 2:13).
ەحوبانىڭ ٵربىر ادامدى دانالىقپەن، ادىلدىكپەن جانە مەيىرىمدىلىكپەن سوتتايتىنىنا سەنىمدى بولساق بولادى (16-ابزاستى قاراڭىز)
17. كەلەسى ماقالادا نە قاراستىرامىز؟
17 وسى ايقىندالا تۇسكەن تۇسىنىكتەر ۋاعىز ٸسىنىڭ قازىر بۇرىن-سوڭدى بولماعانداي شۇعىل ەكەنىن كورسەتەدى. نەگە ولاي دەيمىز؟ بىزگە ىزگى حاباردى كەيىنگە قالدىرماي، ۋاعىزداي بەرۋگە نە قوزعاۋ سالادى؟ بۇل سۇراقتاردى كەلەسى ماقالادا ەگجەي-تەگجەيلى قاراستىرامىز.
76-ٵن ماداقتاۋ قۇرباندىعىن ۇسىنامىز
a نەگە بۇنداي وزگەرىس بولعانى جايلى ٴبىلۋ ٷشىن «ويتكەنى سەنىڭ قالاۋىڭ وسى ەدى» دەگەن ماقالانى قاراڭىز («كۇزەت مۇناراسى»، 2015 جىل، 15-ناۋرىز، 7—11 ب.).
b ۇلى بابىل جويىلعان سوڭ، ماگوگ جەرىندەگى گوگ قۇداي حالقىنا شابۋىلداعاندا، ەحوبانىڭ بارلىق قىزمەتشىلەرى سىنالادى. سول كەزدە ۇلى بابىل جويىلعان سوڭ قۇداي حالقىنا قوسىلعاندار دا سىنالادى.
c سۋرەت سيپاتتاماسى : دۇنيەجۇزىندە كەڭ تارالعان ۋاعىز ٸسى جايلى نەگە كەيبىرەۋلەر ەستىمەۋى مۇمكىن ەكەنى ٷش سۋرەتتە كورسەتىلگەن: 1) ايەل ٴدىني ەلدە تۇراتىندىقتان، وندا ۋاعىزداۋ قاۋىپتى؛ 2) ەرلى-زايىپتى تۇراتىن ەلدە ساياسي جۇيەگە بايلانىستى ۋاعىزداۋ زاڭسىز ٵرى قاۋىپتى؛ 3) ەر جىگىت جەتۋ قيىن وتە شالعاي جەردە تۇرادى.
d سۋرەت سيپاتتاماسى: كەزىندە شىندىقتان كەتىپ قالعان ايەل «ۇلى بابىلدىڭ» جويىلۋى جايلى ەسكە ٴتۇسىرىپ جاتىر. ول ەحوباعا قايتا ورالۋدى شەشىپ، ٴماسىحشى اتا-اناسىنىڭ ۇيىنە كەلدى. وسىنداي جاعدايلار ورىن الىپ جاتسا، كوكتەگى اكەمىزگە ەلىكتەپ، مەيىرىمدىلىك پەن جاناشىرلىق تانىتامىز ٵرى باۋىرلاسىمىزدىڭ ورالعانىنا قۋانامىز.
