ATUAQQISSAAGASSAQ 19
ERINARSUUT 22 Guutip naalagaaffia nunamut tikiulli!
Jehovap siunissami eqqartuussinissaa pillugu suut ilisimavagut?
‘Jehovap inuit tamaasa suujunnaarsitaanatik peqqissiminissamut periarfissikkusuppai.’ – PET 2. 3:9.
SAMMISAQ
Jehova annikilliornartussarsuarmi eqqortumik naapertuilluartumillu eqqartuussissasoq upperilluinnarsinnaavarput.
1. Sooq oqarsinnaavugut piffissami pissanganartumi inuusugut?
PIFFISSAMI pissanganartumi inuuvugut! Ullut tamaasa Biibilimi siulittuutit eqquunneri takusarpagut. Assersuutigalugu ‘Kujalliup kunngiata Avannarliullu kunngiata’ nunarsuarmi pissaaneqarnerpaajuniarlutik aporaannerat takusarparput. (Dan 11:40) Guutip kunngeqarfianik nutaarsiassat nuannersut aatsaat taama oqaluussissutigineqartigaat, Jehovamullu kiffartortunngortut amerlaqaat. (Es 60:22; Mat 24:14) Aamma “piffissaq eqqorlugu” anersaakkut inuussutissarpassuarnik tunineqartarpugut. – Mat 24:45-47.
2. Suna upperilluinnarsinnaavarput, aammali suna akuerisariaqarparput?
2 Jehovap ikiortarpaatigut qanittukkut pisussat pingaarutillit pillugit paasisaqarneruniassagatta. (Uss 4:18; Dan 2:28) Upperilluinnarsinnaavarput annikilliornartussarsuaq aallartippat aalajaalluta pinertusaarniassagatta – allaallu anersaakkut ingerlalluarniassagatta – pisariaqartitatsinnik ilisimasaqassasugut. Aammali akuerisariaqarparput qanittukkut pisussat ilaannik ilisimasaqarnata. Allaaserisami matumani sammeqqaassavarput sooq pisussat ilaat pillugit paasinnittaaserput allanngortittariaqaripput. Taava siunissaq pillugu aamma Jehovap qanoq iliorumaarnera pillugu ilisimasagut sammissavagut.
ILISIMANNGISAGUT
3. Annikilliornartussarsuaq aallartippat Jehovamut uppinngitsut suneqarnissaat pillugu qanoq isumaqarsimavugut, aamma sooq?
3 Siornatigut isumaqarsimavugut annikilliornartussarsuaq aallartippat inuit Jehovamut uppertunngornissamut Harmagedonnimilu aniguinissamut periarfissaarutissasut. Taamatut isummersimavugut isumaqarsimagatta ulersuarmut tunngatillugu pisimasut tamarmik siunissami pisussanut assersuutaasut. Assersuutigalugu isumaqarsimavugut annikilliornartussarsuaq aallartereerpat inuit Jehovamut uppertunngorsinnaanatillu annaanneqarnavianngitsut, soorlu ulersuaqannginnerani Jehovap umiarsuup matua matummagu inuit tassunga ikisinnaajunnaartut. – Mat 24:37-39.
4. Suli isumaqarpugut ulersuarmut tunngatillugu pisut tamarmik siunissamut pisussanut assersuutaasut? Nassuiaruk.
4 Suli isumaqassaagut ulersuarmut tunngatillugu pisimasut tamarmik siunissami pisussanut assersuutaasut? Naamik. Sooq taama isumaqassanngilagut? Biibili tunngavigalugu taama oqarsinnaannginnatta. a Ilumoorpoq Jiisusi oqartoq najuunnissani ‘Nooap nalaatut’ issasoq. Taamali oqarami pinngilaa Nooap nalaani pisimasut suut tamarmik siunissami pisussanut assersuutaasut. Aamma oqanngilaq Jehovap umiarsuup matuanik matusinera siunissami pisussamut assersuutaasoq. Taamaakkaluartoq suli Nooa ulersuarlu pillugit oqaluttuaq ilinniarfigisinnaavarput.
5. (a) Ulersuaqannginnerani Nooap uppernini qanoq ersersippaa? (Hebræerit 11:7; Petrusimit 1. 3:20) (b) Nooap oqaluussinera uagullu oqaluussinerput sumik assigiissuteqarpat?
5 Jehovap mianersoqqussutaa Nooap tusaramiuk uppernini ersersippaa umiarsualiornermigut. (Hebræerit 11:7; Petrusimit 1. 3:20 atuakkit). Taamatuttaaq nalitsinni Guutip kunngeqarfia pillugu tusartut uppernertik iliuutsimikkut ersersittariaqarpaat. (ApS 3:17-20) Petrusip Nooa ‘naapertuilluassutsimik oqaluussisartutut’ allaatigaa. (Pet 2. 2:5) Kisianni soorlu allaaserisap siuliani sammigipput, Nooa sapinngisaminik oqaluussigaluartoq naluarput nunarsuarmi inuit tamaasa anguniarsimanerai. Uaguttaaq sapinngisarput tamaat nunarsuaq tamakkerlugu oqaluussisarpugut. Taamaattorli qanorluunniit tamaviaartigigaluarutta naggatissap nalliutinnginnerani inuit tamaasa angunavianngilagut. Sooq taamaappa?
6-7. Sooq isummersinnaavugut naggatissap nalliutinnginnerani nunarsuarmi inuit tamaasa oqaluussiffiginissaat angumerinaviarnagu?
6 Jiisusi oqaluussinerput pillugu qanoq oqarpa? Siulittuivoq nutaarsiassat nuannersut ‘inuiaqatigiinnit tamanit tusarneqarniassammata nunarsuaq tamakkerlugu oqaluussissutigineqassasut’. (Mat 24:14) Siulittuutillu tamatuma eqquunnera aatsaat taama ersaritsigaaq. Oqaatsinimi 1.000-nit amerlanerusuni oqaluussisartoqartarpoq. Nittartagarpullu jw.org aqqutigalugu nunarsuup inuisa amerlanerpaartaat nutaarsiassat nuannersut pillugit paasisaqarsinnaapput.
7 Kisianni Jiisusip ilinniartitani oqarfigai tikiutinnginnermini ‘illoqarfiit oqaluussiffigalugit tamakkissanngikkaat’. (Mat 10:23; 25:31-33) Tassa Jiisusip tikiutinnginnerani inuit tamaasa oqaluussiffigalugit angunavianngilagut. Inuit millionillit nunani oqaluussinermik killilersuiffiusuni najugaqarput. Aamma minutsit tamaasa nunarsuaq tamakkerlugu naalungiarsuppassuit inunngortarput. Sapinngisarput tamaat ‘inuiaqatigiinnut, naggueqatigiinnut qanorluunniillu oqaasilinnut tamanut’ oqaluussiniartarpugut. (Saqq 14:6) Kisianni naggatissap nalliutinnginnerani kikkut tamaasa angumerinavianngilagut.
8. Jehovap siunissami eqqartuussinissaa pillugu suna apeqqutaalerpa? (Aamma assit takukkit).
8 Sammeriikkagut eqqarsaatigalugit una apeqqutaalerpoq: Annikilliornartussarsuup aallartinnginnerani nutaarsiassanik nuannersunik tusagaqarnissaminnut periarfissaqarsimanngitsut Jehovamit eqqartuussisunngortitaanillu, Jiisusimit, qanoq pineqassappat? (Joh 5:19, 22, 27; ApS 17:31) Allaaserisami matumani allassimaffimmi najoqqutarineqartumi allassimavoq Jehovap ‘inuit tamaasa suujunnaarsitaanatik peqqissiminissamut periarfissikkusukkai’. (Pet 2. 3:9; Tim 1. 2:4) Tamanna nalunngikkaluarlugu Jehovamit paasitinneqanngilagut inuit taakku qanoq pissanerai. Soorunamilu Jehovap iliuuserisimasani iliuuserisassanilu pillugit paasitittariaqanngilaatigut.
Annikilliornartussarsuup nalliutinnginnerani nutaarsiassanik nuannersunik tusagaqarnissamut periarfissaqarsimanngitsut Jehovap qanoq pissavai? (Immikkoortoq 8 takuuk) c
9. Biibilimi Jehovap sunik paasitippaatigut?
9 Biibilimi Jehovap iliuuserisassami ilaannik paasitippaatigut. Assersuutigalugu allassimavoq Jehovap ‘naapertuilluanngitsut’ – tassa nutaarsiassanik nuannersunik ilinniarnissamut inooriaatsiminnillu allannguinissaminnut periarfissaqarsimanngitsut – makitissagai. (ApS 24:15; Luk 23:42, 43) Tamanna eqqarsaatigalugu pingaarutilinnik allanik apeqqutissaqalerpugut.
10. Suut ilisimanngilagut?
10 Annikilliornartussarsuup nalaani toqusut tamarmik makititaanissamik neriuutissaqarnatik qaqugorsuarmut piuneerussaassappat? Biibilimi ersarissumik allassimavoq akerlilersuisut Harmagedonnimi Jehovap sakkutuuisalu suujunnaarsitaat makititaassanngitsut. (Tes 2. 1:6-10) Kisianni taavami annikilliornartussarsuarmi allanik peqquteqarlutik toqusut? Assersuutigalugu ilaasa nappaatit imaluunniit utoqqalineq toqussutigisinnaavaat, allallu ajunaarlutik inunnilluunniit allanit toqutaasinnaapput. (Jaak 4:13, 14; Zak 14:13) Taakkua ilaat ‘naapertuilluanngitsunut’ paratiisissami toqusunit makititaasussanut ilaassappat? Naluarput.
ILISIMASAGUT
11. Inuit suna tunngavigalugu eqqartuunneqassappat?
11 Siunissami pisussat ilaat pillugit ilisimasaqarpugut. Assersuutigalugu nalunngilarput inuit Kristusip qatanngutaanut pissusilersornertik tunngavigalugu eqqartuunneqarumaartut. (Mat 25:40) Jiisusimik tanitanillu tapersersuinermik ersersitsisimasut savatut nalilerneqassapput. Aamma nalunngilarput Jiisusip qatanngutaasa tanitat ilaat annikilliornartussarsuup nalaani suli nunarsuarmiissasut Harmagedonnillu nalliutinngilaarnerani qilaliartinneqassasut. Tanitat suli nunarsuarmiitillugit inuit taakkuninnga suliaannillu tapersersuilernissamut periarfissaqassapput. (Mat 25:31, 32; Saqq 12:17) Tamanna sooq soqutiginarpa?
12-13. Babylonnersuup suujunnaarsitaanera takugunikku ilaat immaqa qanoq qisuariassappat? (Aamma assit takukkit).
12 Annikilliornartussarsuaq aallartippat Babylonnersuarlu suujunnaarsitaappat imaassinnaavoq inuit ilaasa eqqaalissagaat Jehovap Nalunaajaasuisa ukiorpassuarni taama pisoqassasoq oqaluussissutigisimagaat. Tamakkuninnga takunnittut ilaat allamik isiginnittaaseqalerlutik Jehovamut kiffartorusulersinnaassappat? – Saqq 17:5; Ez 33:33.
13 Taama pissappat tamanna Moorsisip nalaani Egyptenimi pisunut assingussaaq. Taamani Israalikkut Egypteni qimammassuk “peqataaniartorpassuit assigiinngeqisut” aallaqataapput. (Mos 2. 12:38) Imaassinnaavoq taakkua ilaasa Moorsisip perluit qulit pillugit mianersoqqussutai piviusunngortut takugamikkit Jehovamut uppertunngortut. Babylonnersuup suujunnaarsitaanerata kingorna assingusumik pisoqassappat Harmagedonnip nalliutinngilaarnerani inuit uagutsinnut ilanngussinnaanerat ajorissavarput? Soorunami naamik! Ataatarpummi qilammiusoq ‘Guuti nallittuisuusoq saammaasorlu, kamajaatsoq ilumoornermik sallusuissummillu peqangaartoq’ ilaarusupparput. b – Mos 2. 34:6.
Babylonnersuup suujunnaarsitaaneranik takunnittut ilaasa immaqa eqqaalissavaat Jehovap Nalunaajaasuisa ukiorpassuarni tamanna oqaluussissutigisimagaat (Immikkoortut 12-13 takukkit) d
14-15. Inuup ulloq toquffia najugaqarfialuunniit naassaanngitsumik inuunissamik periarfissinneqarnissaanut aalajangiisuua? Nassuiaruk. (Tussiaat 33:4, 5)
14 Ilaannikkut ima isummertumik tusartarpugut: “Qujanartumik annikilliornartussarsuup nalliutinnginnerani ilaqutara toqusimammat, taava imaallaat makititaanissaanut neriuuteqarsinnaavunga.” Qularnanngitsumik ajunngitsumik isumaqarluni taama isummertoqartarpoq. Inuulli naassaanngitsumik inuunissamik periarfissinneqarnissaanut ulloq toquffia aalajangiisuunngilaq. Eqqaamajuk Jehova Eqqartuussisuusoq naammalluinnartoq naapertuilluartumillu aalajangiisartoq. (Tussiaat 33:4, 5 atuakkit). Upperilluinnarsinnaavarput “nunarsuarmik tamarmik eqqartuussisuusoq” tamatigut eqqortuliortuaannassasoq. – Mos 1. 18:25.
15 Aamma isummersinnaavugut inuup naassaanngitsumik inuuneqarnissamik periarfissinneqarnisaanut najugaqarfia aalajangiisuunavianngitsoq. Ilimananngivippoq inuit millionillit nunani Guutip kunngeqarfia pillugu tusagaqarnissaminnut periarfissaqarfiunngitsuni najugaqarnerat pissutigiinnarlugu Jehovap ‘savaasatut’ nalilissagai. (Mat 25:46) Nunarsuarmik tamarmik Eqqartuussisuusup naapertuilluartup inunnik taakkuninnga asanninnera isumassuineralu uagut misigissutsitsinnut naleqqiullugit annerungaarput. Naluarput Jehova annikilliornartussarsuup nalaani qanorpiaq iliussanersoq. Jehovap inuiaat tamaasa isigitillugit illernassutsini saqqummersippagu imaassinnaavoq inuit taakkua ilaat Jehova pillugu ilinniarnissaminnut, uppertunngornissaminnut tapersersuinissaminnullu periarfissinneqassasut. – Ez 38:16.
Annikilliornartussarsuaq aallartereerpat ilaat allamik isiginnittaaseqalissappat?
16. Jehova pillugu sumik ilisimasaqarpugut? (Aamma asseq takuuk).
16 Biibilimik misissuinitsinni paasivarput Jehovap inuit naleqartingaarai. Inuit naassaanngitsumik inuunissamik periarfissinniarlugit ernini pilliutigaa. (Joh 3:16) Tamattalu Jehovap asanningaarnera misigisimavarput. (Es 49:15) Tamatta ataasiakkaatut maluginiarlutalu ilisarisimavaatigut. Allaat toqussagaluarutta makitikkunisigut sumininnguit eqqaamasagullu tamaasa pinngorteqqissinnaavai! (Mat 10:29-31) Ataatarput qilammiusoq ilisimassuseqangaarmat, naapertuilluartuummat nallittuisuummallu upperilluinnarsinnaavarput inunnik eqqartuussiguni eqqoqqissaartumik naliliissasoq. – Jaak 2:13.
Upperilluinnarsinnaavarput Jehova inunnik eqqartuussiguni eqqoqqissaartumik naliliissasoq (Immikkoortoq 16 takuuk)
17. Allaaserisap tulliani suna sammissavarput?
17 Paasinnittaatsitsinnik erseqqissaanerit pissutigalugit paasivarput oqaluussinerput aatsaat taama nukinginnartigisoq. Sooq taamaappa? Aamma nutaarsiassanik nuannersunik oqaluussiuarnissamut suna kajumississutigaarput? Tamakku allaaserisap tulliani akissutissarsissavagut.
ERINARSUUT 76 Aallussigatta pilluarpugut
a Paasinnittaatsitsinnik allannguineq pillugu nassuiaat uani atuarsinnaavat: Napasuliaq Alapernaarsuiffik marsip 15-iat 2015-imoortumi allaaserisaq “Illit piumasat taamaappoq”, qupp. 3-8.
b Babylonnersuaq suujunnaarsitaareerpat Jehovamut kiffartortut tamarmik Gogimit Magogimeersumit saassussinermi uppernikkut misilinneqassapput. Aamma Babylonnersuup suujunnaarsitaanerata kingorna Guutip innuttaanut ilannguttut uppernikkut misilinneqassapput.
c ASSIMI MALUGISASSAT: Assini pingasuni takutinneqarput inuit ilaat oqaluussiffigalugit angusinnaanngisagut: (1) Upperisarsioqatigiit pingaarnerit pissutigalugit oqaluussinissamik navianartorsiorfiusumi arnaq najugalik, (2) oqartussaasut pissutigalugit oqaluussinissamik inerteqqutaaffiusumi navianartumilu aappariit najugallit, aamma (3) avinngarusimasumi angujuminaatsumi angut najugalik.
d ASSIMI MALUGISASSAT: Arnap inuusuttup Jehovamut kiffartorunnaarsimasup Babylonnersuup suujunnaarsitaanera pillugu ilikkarsimasani eqqaavai. Aalajangerpoq Jehovamut angajoqqaaminullu Nalunaajaasuusunut uterniarluni. Taama pisoqassappat Ataatarput qilammiusoq nallittuisoq misiginneqataasorlu ilaarusupparput nuannaarutigalugulu utertoqarmat.