MBANDU YAKUDILONGA 19
MWIMBU 22 Utuminu wa Nzambi Wíze!
Kyebhi Jihova Kyanda Fundisa o Athu ku Hadya?
“Jihova . . . kamesena kwila kukala muthu ufwa.”—2 PH. 3:9
ITWANDADILONGA
Tutena kudyelela kwila kyoso Jihova kyanda fundisa o athu ku hadya, mwene wanda kwafundisa ni kuyuka.
1. Mukonda dyahi twamba kwila o izuwa yetu ya katunda?
O IZUWA yetu ya katunda! O ikanenu ya Bibidya, yene mudikumbidila izuwa yoso. Mu kifika, twene mumona kwila o ‘sobha ya thunda’ ni ‘sobha ya lwiji’ene muzoka phala kumona se nanyi wanda tumina o ixi. (Dan. 11:40) Twamumona we kwila o jimbu ya mbote ya utuminu wa Nzambi a mwibokela ku mundu woso, mazunda athu amusidivila Jihova. (Iza. 60:22; Mat. 24:14) Twamutambula kudya kwavulu mu nzumbi mu “kithangana kyatokala.”—Mat. 24:45-47.
2. Kidyelelu kyebhi kitwala nakyu, maji ihi itwatokala kwijiya?
2 Jihova wamusuluka mu kutukwatekesa kutendela o ima yanda bhita ku hádya. (Jisa. 4:18; Dan. 2:28) Twadyelela kwila kyoso o hadi yadikota yanda mateka, twanda kwijiya o ima itwanda bhindamena phala kukala fiyele kwa Jihova ni kukala ni muxima umoxi. Maji, twatokala kwijiya kwila kitwejiya o ima yoso yanda bhita ku hádya. Mu milongi yiyi, twanda dilonga o ima itweijiya dingi kyambote, mu ukulu twexile mu itendela mu ukexilu wengi. Mu kusuluka twanda mona se ihi itwejiya yanda bhita ku hádya, ni ima yanda bhanga Tat’etu ya dyulu.
IHI I TWAKAMBE O KWIJIYA?
3. Twafikile kwila sé-ku muthu wanda tena dingi kwijiya Jihova ni kubhuluka mu kithangana kyahi? Mukonda dyahi twexile mu banza kiki?
3 Mu ukulu twakexile muzwela kwila o yo wa kambe o kixikanu ku hadi ya dikota kandatena kuzukama ku mbandu ya Jihova anga ubhuluka. Twexile mu zwela kiki mukonda twa tendela kwila o musoso wa Dilúvyu kyexile kikanenu. Mu kifika, ande dya kumateka o Dilúvyu, Jihova wajika o dibhitu dya álaka, kyoso mwene kyabhange kiki sé-ku muthu watenene dingi kubokona-mu. Mu kyenyiki, twafikile kwila ku dimatekenu dya hadi ya dikota, sé-ku muthu wanda tena dingi kwijiya Jihova ni kubhuluka.—Mat. 24:37-39.
4. Mukonda dyahi kitwene mubanza dingi kwila yoso yabhiti mu izuwa ya Nowé, kijimbwete kya ima yanda bhita ku hádya? Jimbulula.
4 O kwila kima kyambote kuxinganeka kuma yoso yabhiti mu kithangana kya Dilúvyu yexile kijimbwete kya kima kyanda bhita ku hádya? Kana. Mukonda dyahi? Mukonda ki kyene kilonga o Bibidya. a Kidi kwila Jezú wasokesa o “izuwa ya Nowé” ni kutukuluka kwê, maji kambe kwila yoso yabhiti mu izuwa ya Nowé yene we yeji bhita ku hádya. Mu kifika mwene kambe kwila kyoso Jihova kya jika o dibhitu kyexile kijimbwete kya kima kyeji bhita ku hádya. Maji kiki ki kilombolola kwila kitutena kudilonga ni ima yabhiti mu izuwa ya Nowé mba ku Dilúvyu.
5. (a) Kyebhi Nowé kyalondekesa kixikanu ande dya Dilúvyu? (Jihebelewu 11:7; 1 Phetele 3:20) (b) Kala kyabhiti ni Nowé, o kwila etu twanda tena kubokela o athu oso ku mundu?
5 Kyoso Nowé kyevu o kima kyeji bhanga Jihova ku athu, mu kutunga o álaka, mwene walondekesa kwila wexile ni kixikanu. (Tanga Jihebelewu 11:7; 1 Phetele 3:20.) Kyene we kimoxi, o athu evwa o njimbu yambote ya Utuminu wa Nzambi, atokala kukumbidila o ima yamudilonga. (Ika. 3:17-20) Poxolo Phetele wambe kwila Nowé wexile “muboki wa maka mayuka.” (2 Ph. 2:5) Maji kala kitwadilongo mu milongi yatundu-mu, kitwejiya se Nowé wasoto kubokela o athu oso ku mundu, ande dya Dilúvyu. Lelu ni kuswina kwoso, twene musota kubokela o athu atungu mu ngongo yoso. Maji né mwene se tubhanga nguzu yavulu, kitwanda tena kubokela athu oso mu ngongo ande dya dizubhilu. Mukonda dyahi?
6-7. Kyebhi kitwejiya kwila kitwanda tena kubokela o athu oso ande dya dizubhilu? Jimbulula.
6 Xinganeka yazwela Jezú yalungu ni kuboka kwetu. Mwene wambe kwila o njimbu yambote eji “ku iboka mu ngongo yoso, mu kubhana umbangi ku akwa jixi joso.” (Mat. 24:14) O kikanenu kiki kya mudikumbidila dingi lelu, mu ukulu ndenge. O njimbu yambote a mu iboka mu 1.000 ya madimi ndenge, ni kwila bhukaxi ka kijimbwete kyetu, athu avulu mu ngongo yoso amudilonga yalungu ni Jihova.
7 Maji Jezú wambe we ku maxibulu mê kwila ene keji tena ku “zubha kubokela o jimbanza joso” mba kubokela o athu oso ande dya mwene kwiza. (Mat. 10:23; 25:31-33) O izwelu ya Jezú yanda dikumbidila we mu izuwa yetu. Athu avulu atungu mu jixi kitwala ni ufôlo wavulu wa kuboka. Izuwa yoso, athu avulu amuvwala. Sumbala kitwanda tena kubokela o athu oso ande dya dizubhilu, twene mubhanga yoso ni yoso phala kubokela o athu akwa “ifuxi yoso, mu miji yoso, mu madimi moso.”—Dij. 14:6.
8. Ihi itutena kudibhwidisa yalungu ni kyebhi Jihova kyanda fundisa o athu ku hadya? (Tala we o jifoto.)
8 Nange tudibhwidisa: Ihi yanda bhita ni athu kanda tena kwivwa o njimbu yambote ande dya kumateka o hadi ya dikota? Jihova ni Mon’ê Kidistu, anda kyebhi ni athu yá? (Nzw. 5:19, 22, 27; Ika. 17:31) O kibatulu kya milongi yiyi kyamba kuma Jihova “kamesena kwila kukala muthu ufwa. Maji wamesena kwila athu oso adyela o ituxi yâ.” (2 Ph. 3:9; 1 Ti. 2:4) Sumbala twejiya o ima yiyi yalungu ni Jihova, mwene katutangela luwa se kyebhi kyanda fundisa o athu kanda tena kwivwa o njimbu yambote ande dya hadi ya dikota. Mu kidi, sé-ku muthu utena ku mujijidika kututangela o kima kyene mubhanga mba o kima kyanda bhanga.
Ihi yanda bhanga Jihova ni yó katena kwivwa o njimbu yambote anda dya hadi ya dikota? (Tala okaxi 8) c
9. Ihi itutangela Jihova bhu kaxi ka Bibidya?
9 Mu maka me, Jihova ututangela sayi ima yanda bhanga. Mu kifika o Bibidya yamba kwila Jihova wanda fukununa o “athu akambe o kuyuka.” Yo katena kwivwa o njimbu yambote ni kulungulula o ukexilu wa mwenyu wa. (Ika. 24:15; Luk. 23:42, 43) Kiki kitena kutubhangesa ku dibhanga ibhwidisu yengi.
10. Ibhwidisu yebhi ya kamukwa itwala nayu?
10 O kwila o athu oso anda fwa mu kithangana kya hadi ya dikota kanda kala dingi ni kidyelelu kya kwafukununa? O Bibidya yamba kwila o yo anda kwa bwika kwa Jihova ni kifuxi kye mu Alumajedone, kanda fukunuka. (2 Te. 1:6-10) Maji ihi yanda bhita ni athu engi? Mu kifika mu kithangana kya hadi ya dikota athu avulu anda fwa mukilwezu kya makalu, mukonda dya mauhaxi mba anda kwa jibha ku athu engi. (Ndo. 9:11; Zak. 14:13) O kwila sayi athu mudya anda kala mwaxaxi ka “athu akambe o kuyuka” anda kwa fukununa kumundu wa ubhe? Kitwejiya o maka ya.
IHI I TWEJIYA KYA?
11. Mu Alumajedone, o athu anda kwafundisa mu ukexilu webhi?
11 Twejiya ima yavulu yanda bhita ku hádya. Mu kifika, twejiya kwila ku Alumajedone, o athu anda kwafundisa mu ukexilu atalatala o jiphange ja Kidistu. (Mat. 25:40) O jimbudi, o athu yó akwatekesa o jikidistá ja undu ni Kidistu. Twejiya we kwila sayi jiphange ja Kidistu anda kala hanji mu ixi kyoso kyanda mateka o hadi ya dikota ni kwila anda kwa ambata ku dyulu ande dya kumateka o Alumajedone. Kyoso amoxi ku jiphange ja Kidistu kyanda kala hanji mu ixi, nange sayi athu anda kala ni kithangana kya kudilonga yalungu ni Jihova ni kukwatekesa o kikalakalu kyamubhanga o jiphange ja Kidistu. (Mat. 25:31, 32; Dij. 12:17) Mukonda dyahi kima kyambote kwijiya o maka enyá?
12-13. Nange sayi athu anda bhanga ihi mu kumona kwila “Babilonya ya dikota” a ibwika? (Tala we o jifoto.)
12 Né mwene kyoso o hadi ya dikota kyanda mateka, nange sayi athu kyanda mona o kibwikilu kya “Babilonya ya dikota” anda lembalala kwila o Jimbangi ja Jihova akexile kyá muzwela kuma o ima yiyi yanda bhita. O kwila ku athu enyá kwanda kala muthu wanda kala ni kixikanu kwa Jihova?—Dij. 17:5; Ize. 33:33.
13 Se kiki kibhita, kyanda kala, kala kyabhiti ku Ijitu mu izuwa ya Mozé. “Mundu wavulu kexile akwa Izalayele,” atundu ku Ijitu kumoxi ni akwa Izalayele. Nange amoxi mudyâ amateka kukala ni kixikanu kwa Jihova kyoso kya mono kwila yoso yazwelele Mozé yalungu ni dikwinyi dya mabhebhu, yadikumbidila. (Mak. 12:38) Se kiki kibhita kyoso Babilonya ya dikota kyanda ku ibwika, o kwila twanda futuluka mukonda dya athu kumateka ngó kusidivila Jihova ande dya dizubhilu kubhixila? Kana ngana! Twamesena kukayela o idifwa ya Tat’etu ya dyulu, mwene “Nzambi ya jihenda, ukokoloka mu kuthathamana, mukwa mwanyu, wezala ni henda yakidi, uzwela ngó o kidi.” b—Mak. 34:6.
Sayi athu kyanda mona o dizubhilu dya “Babilonya ya dikota” anda lembalala kwila o Jimbangi ja Jihova akexile kyá muzwela kuma o ima yiyi yanda bhita (Tala ojikaxi 12-13) d
14-15. Kyebhi ki twejiya kwila o difukunukinu dya muthu ki dijila ku kithangana kyafu, mba bhu kididi bhwatungu? (Jisálamu 33:4, 5)
14 Nange sayi jiphange azwela kiki yalungu ni jindandu jâ: “Kyeji kala kima kyambote se ene afwa ande dya hadi ya dikota, nange kiki kyanda kwabhangesa kukala ni kidyelelu kya kwafukununa.” O jiphange azwela kiki mukonda azolo o jindandu jâ. O difukunukinu ki dijila ku kithangana mba kizuwa kifwa o muthu, maji dijila kwa Jihova, o Mufundixi wayuka. (Tanga Jisálamu 33:4, 5.) Twadyelela ni kidi kyoso kwila o “Mufundixi wa ngongo yoso” wanda fundisa ni kuyuka kwoso.—Dim. 18:25.
15 Twejiya we kwila o difukunukinu ki dyanda kwijila bhu kididi bhwatungu o muthu. Jihova nuka wanda fundisa o mazunda a athu kala “jihombo” mukonda atungu mu jixi katena kwivwa o njimbu ya Utuminu. (Mat. 25:46) O Mufundixi wa ngongo yoso wabeta dingi mu kusuwa o athu, etu ndenge. Ki twejiya kyambote yoso yanda bhanga Jihova mu hadi ya dikota. Nange sayi athu anda tena kudilonga yalungu ni Jihova, ku mukala ni kixikanu, ni kukwatekesa mu kuzelesa o dijina dyê.—Ize. 38:16.
Kyoso kyanda mateka o hadi ya dikota, . . . o kwila ku athu enyá kwanda kala muthu wanda kala ni kixikanu kwa Jihova?
16. Ihi itwejiya yalungu ni Jihova? (Tala we ofoto.)
16 Mu kudilonga o Bibidya, twamono kwila Jihova wazolo kyavulu o athu. Mwene wabhana o mwenyu wa Mon’ê phala athu oso atene kukala ni mwenyu wakalelaku. (Nzw. 3:16) Ku mwenyu wetu, etu enyoso twamono kyá kwila Jihova watuzolo. (Iza. 49:15) Katé mwene o majina metu, Jihova wa ejiya. Kuma mwene watwijiya kyambote, né mwene se tufwa wanda tufukununa mukonda wejiya katé mwene o ixinganeku yetu! (Mat. 10:29-31) Ni kidi kyoso, tutena kudyelela kwila o Tat’etu ya henda wala ku dyulu, wanda fundisa o athu oso ni unjimu, ni henda ni kuyuka kwoso.—Tiy. 2:13.
Tutena kudyelela kwila Jihova wanda fundisa o athu oso ni unjimu, henda ni kuyuka kwoso (Tala okaxi 16)
17. Ihi itwanda dilonga mu milongi ya kayela?
17 Kindala kitwejiya kya o kidi kiki, twatokala kuboka ni lusolo lwoso, mu ukulu ndenge. Mukonda dyahi twamba kiki? Ihi itubhangesa kuboka o njimbu yambote sé kufula? Mu milongi ya kayela twanda tambwijila o ibhwidisu yiyi.
MWIMBU 76 Kyebhi ki u Divwa?
a Phala kwijiya dingi se mukonda dyahi twalungulula o ukexilu wa kutendela o maka yá, tanga o milongi ni dyambu ‘Mukonda Kiene Kia ku Uabhela o ku Bhanga’, mu Mulangidi wa mbeji ya Katanu ka 2015, mba. 3-8.
b Kyoso o Babilonya ya dikota anda ku ibwika, o jiselevende joso ja Jihova, anda kwa polovala mu kizukutisu kya Ngongo dya Mangongo. Athu oso anda sidivila Jihova kyoso kyanda bwika o Babilonya ya dikota, anda kwa polovala we.
c KILOMBOLWELU KYA FOTO: Foto jitatu jilondekesa se mukonda dyahi sayi athu kanda tena kwivwa o njimbu itwene muboka: (1) O ngeleja ya ixi mwatungu o muhatu yú, yene mufidisa o athu kudilonga o Bibidya, (2) dikaza atungu mu ixi, o jinguvulu kehela o athu kudilonga o Bibidya, ni (3) diyala watungu ku maxokololo, kubhonza kyavulu kubhixila-ku.
d KILOMBOLWELU KYA FOTO: Muhatu weha kusidivila Jihova wamulembalala yadilongo yalungu ni kibwikilu kya “Babilonya ya dikota.” Mwene walungulula o ukexilu wa mwenyu wê, yu wavutuka ku jiphange amulongele o Bibidya. Se kiki kibhita, twamesena kukayela o idifwa ya Tat’etu ya dyulu kala o henda, ni kusanguluka ni muthu wadyela o kituxi kyê.
