OMWATSI W’ERIGHA 19
OLHWIMBO 22 Obwami Buneho—Bwase!
Ni Byahi Ebya Thwasi okw’Itswera lya Yehova ery’Obuthuku Obukasa?
“Omukama [Yehova] . . . sianzire omundu n’omughuma akahera.”—2 PET. 3:9.
EKIGHENDERERWA
Thwangana yikethera ngoku eritswera lya Yehova ery’obuthuku obukasa likendi syabya erithunganene kandi ery’obulingirirania.
1. Busana naki thwangana bugha thuthi thuli omwa buthuku obukasisimulha?
THULI omwa buthuku obukasisimulha! Obuli kiro, thukayilhangirira amaminyereri we Biblia akabererera. Ng’eky’erileberyako, thukalhangira “Omwami w’elhuthambi lhw’endatha” “n’Omwami w’elhuthambi lhw’eyikwa” ibane omw’isukumana ly’erianza eribya muthabathabali w’ekihugho kyosi. (Dan. 11:40, NTW) Thunemulhangira engulhu yuwene y’obwami yikathulhughanibwa kutsibu, kandi esyomiliyoni sy’abandu banemulighayo. (Isa. 60:22; Mt. 24:14) Kandi thune muhebwa ebyalya by’obunyakirimu “okwa mughulhu atholere.”—Mt. 24:45-47.
2. Thutholere ithwayikethera kyahi, aliwe thutholere ithwaminya kyahi?
2 Yehova akalholha embere erithuwathikya eriyitheghererya ndeke emyatsi mikulhu-mikulhu ey’obuthuku obukasa. (Emi. 4:18; Dan. 2:28) Thwangana yikethera ngoku aho obulighe bunene bukendi syatsukira, thukendi syaminya ebyo thukayithagha eriminya erithoka eriyiyinia buthaleghulha n’eribya ithune ndeke omwa buthuku obukalire obo. Aliwe thutholere ithwaminya ngoku hane ebyo thuthasi ebihambire okwa buthuku obukasa. Omwa mwatsi ono, thukendi tsuka erilebya nga ni busana naki thwabiribya ithunem’uwania ebyo thwabiribugha okwa mighuma y’okwa myatsi eyi. Neryo thukendi lebya ebindu birebe ebyo thwasi okwa buthuku obukasa kandi Thatha wethu w’elhubulha ng’akendisya bikolha athi.
EBYO THUTHASI
3. Thwabya ithwabiribugha thuthiki okwa buthuku obo Yehova akendi syaghunziraho akaghisa k’abandu erithuyiyungako, kandi busana naki muthwaghunzerera thuthya?
3 Kera, ithukabugha thuthi sihali n’omughuma oyuthikirirye oyukendi syathoka erisuba oku Yehova n’erilhama okwa Harmagedoni. Muthwaghunzerera thuthya, kundi muthwayithegherya thuthi omwatsi w’Erighunga ly’amaghetse ni buminyereri. Ng’eky’erileberyako, muthwalengekania thuthi ngoku Yehova anakinga olhukyo erighunga ly’amaghetse lithe lyabya, kw’anemwendi syakolha athya obulighe bunene bukatsuka, “asyakinga olhukyo” omwa mughulhu mubi wa sitani ono, nuku sihabye abandi bandu abakalhamibawa.—Mt. 24:37-39.
4. Mbwino thukinalhangira omwatsi w’erighunga ly’amaghetse ng’obuminyereri? Soborera.
4 Thunatholere ithwalhangira omwatsi w’erighunga ly’amaghetse nga ni buminyereri? Eyihi. Busana naki? Kundi sihali risako erikasighika ekyo. a Ni kwenene, Yesu mwalinganisya “ebiro bya Noa” n’ebiro by’erihika liwe, aliwe syamanyisaya athi abandu n’ebyabya omwa buthuku obo byabya ibiwithe ekya bik’imanibira; kutse syamanyisaya athi erikinga olhukyo lhw’obwathu liwithe obuminyereri bwosi-bwosi obo likendi syaberererya. Nomwabine, ekyo sikirimanyisaya kithi sithwang’ighira okwa mwatsi wa Noa n’erighunga ly’amaghetsi.
5. (a) Noa mwakolhaki enyuma w’erighunga ly’amaghetse? (Abaebrania 11:7; 1 Pet. 3:20) (b) Bikahika okwa mubiiri w’erithulira, emibere eyo thulimo munabwire yilingene yithi n’ebiro bya Noa?
5 Noa abere ak’owa erikunga lya Yehova, mwakangania kw’awithe erikirirya akahimba obwathu. (Soma Abaebrania 11:7; 1 Petero 3:20.) Kuthya, abandu abak’owa engulhu yuwene eyihambire okwa Bwami bwa Nyamuhanga batholere ibaghendera okwa bya bak’owa. (Emib. 3:17-20) Petero mwabugha athi Noa abya “muthuli w’erithunganene.” (2 Pet. 2:5) Aliwe ngoku thwakanaya omo mwatsi w’ahanyuma, sithwasi Noa nga mwanalengaho erithulira obuli mundu okwa kihugho erighunga ly’amaghetse lithe lyabya. Munabwire thunemusangira omwa mubiiri w’erithulira omwa kihugho kyosi, kandi thukalengaho erisangira mugho n’omuhwa. Nomwabine, nomuthwanga lengaho thuthi, sithwanga thoka erihikya okwa buli mundu kw’engulhu yuwene enduli yithe yasa. Busana naki?
6-7. Busana naki ithwabugha thuthi sithwanga thoka eribwira obuli mundu okwa kihugho y’engulhu yuwene enduli yithe yasa? Soborera.
6 Thalengekania okwa kya Yesu aby’abuyire okwa mubiiri w’erithulira. Mwalhaghulha ngoku engulhu yuwene yanga thulhughanibirwe “omwa kihugho kyosi busana n’eriminyisya ebihanda byosi.” (Mt. 24:14) Obuminyereri obu bunemubererera munabwire kwilhaba kera. Omwatsi w’Obwami anemuthulhughanibwa omwa mibughe eyilhabire omu 1,000, n’erilhabira okwa muthahulha we jw.org, abandu bangyi omwa kihugho banemw’owagho.
7 Nomwabine, Yesu mwabwira abigha biwe athi “simwendisyalhaba omwa miyi yosi ye Israeli,” kutse erithulira obuli mundu, athali asa. (Mt. 10:23; 25:31-33) Ebinywe bya Yesu bikendi bererera n’omwa buthuku bwethu buno. Esyomiliyoni syabandu munabwire b’ikere omwa myanya eyo omubiiri wethu w’erithulira abirihirwako olhukako. Eryongera okw’ekyo, esyongumi sy’esyomekeke sikabuthawa obuli dakika. Thukalengaho eribwira abandu omwa “buli kihanda, n’obuli mubughe” b’engulhu yuwene. (Erib. 14:6) Aliwe okwenene kuli kuthi sithwanga thoka eribwira obuli mundu y’engulhu yuwene enduli yithe yasa.
8. Ni kibulyo kyahi ekyo thwanga yibulya okw’itswera lya Yehova ery’obuthuku obukasa? (Lebaya n’ebisasani.)
8 Ekyo kikaleka ihabya ekibulyo kino: Kandi ibbwa abangabya imuthabana akaghisa k’eriowa engulhu yuwene obulighe bunene buthe bwatsuka? Yehova haghuma na Mughalha wiwe, oyo abirisombolha eritswera, bakendi syabakoleraki? (Yn. 5:19, 22, 27; Emib. 17:31) Erisako erihirikirire omwatsi ono likabugha lithi Yehova “sianzire omundu n’omughuma akahera.” Omwakanya k’ekyo, anzire “ibabindulha emithima yabu n’erileka ebibi.” (2 Pet. 3:9; 1 Tim. 2:4) Ekyo kine aho, thutholere ithwaminya ngoku Yehova syali athubisulira eky’akendi syakolha. Omo kwenene, si buthekwa-buthekwa indi atholere iniathubwira obuli ekyo abirikolha kutse ekyo akendi kolha.
Ni kyahi ekyo Yehova akendi syakolera abathabana akaghisa k’eriowa engulhu yuwene obulighe bunene buthe bwatsuka? (Lebaya enungu 8) c
9. Ni byahi ebyo Yehova abirithubisulira omwa Biblia?
9 Omwa kinywe kiwe, Yehova abirithubisulira ebighuma by’okwa by’akendi syakolha. Ng’eky’erileberyako, e Biblia yikathubwira yithi Yehova akendi syalhubukya “abathathunganene” abathabana akaghisa k’eriligha engulhu yuwene n’erikolha esyombinduka. (Emib. 24:15; Lk. 23:42, 43) Ekyo kikaleka ihabya ebindi bibulyo bikulhu.
10. Ni bindi bibulyo byahi ebikabuthukaho?
10 Mbwino abosi abakendi syaholha omwa bulighe bunene bakendi syathoghothibirwa ighuma ahathe amaha w’erisyalhubuka? Amasako akakanganaya ndeke-ndeke ngoku abahakanisaya Yehova n’amahe wiwe bakendi syathoghothibwa okwa Harmagedoni ahathe erilhubukibwa. (2 Tes. 1:6-10) Kandi ibbwa abandi, ng’eky’erileberyako, abangabya ibakaholha olhuholho lhw’obuli kiro, omwa aksidenti, kutse abak’ithawa? (Omu. 9:11; Zek. 14:13) Mbwino aba banganabya baghuma b’okwa “bathathunganene” abakendi syalhubukibwa omwa kihugho kihya-kihya? Sithwasi.
EBYO THWASI
11. Eritswerwa ly’abandu okwa Harmagedoni likendi syaseghemera okuki?
11 Thunasi bingyi ebihambire okwa buthuku obukasa. Ng’eky’erileberyako, thunasi ngoku okwa Harmagedoni, abandu bakendi syasuyirwa erikwamana n’emibere bathwaliramo baghalha b’obu Kristo. (Mt. 25:40) Abakatswerawa ng’esyombuli bakendisyabya ibabirikangania ngoku bakasighika abahakabibwa na Kristo. Kandi thunasi ngoku abaghuma b’okwa baghalha b’obu Kristo bakendisyabya ibakine okwa kihugho obulighe bunene bwalitsukire kandi bakendi syathwalhua elhubulha buthuku buke e Harmagedoni yithe yatsuka. Baghalha b’obu Kristo bakendisyabya bakine okwa kihugho, ab’emithima myolho bakendisyabya ibakinawithe akaghisa k’eribasighika n’omubiiri ogho bakakolha. (Mt. 25:31, 32; Erib. 12:17) Busana naki ekwenene eyi ni ngulhu kutsibu?
12-13. Abandi bangana syakolhaki bakalhangira erithoghothibwa lya “Babeli Mukulhu”? (Lebaya n’ebisasani.)
12 Nibya n’obulighe bunene ibwabiritsuka, abaghuma b’okwa bakendi syalhangira “Babeli Mukulhu” akathoghothibwa bakendi sy’ibuka ngoku Abema ba Yehova bamabirighunza mughulhu muuli ibanemukania okwa mwatsi oyo. Mbwino abaghuma b’okwa bakendi syalhangira ebindu ebi bikabya bangana syakolha esyombinduka omwa ngebe syabu?—Erib. 17:5; Eze. 33:33.
13 Ekyo kyamabya, ikikendibya ng’ekyabya Emisiri omwa biro bya Musa. Wibuke ngoku n’abandi bandu bangyi mubayiyunga okwa Baisraeli bakalhua Emisiri. Abaghuma b’okwa bandu aba bangabya imubathunga erikirirya bakalhangira erikunga lya Musa erihambire okwa bithiko-thiko ikumi likabererera. (Eri. 12:38) Ekiri ng’eki kyamabya Babeli Mukulhu yabirithoghothibwa, mbwino ikikendi syaponesya, abandu bakathuyiyungako enduli yikayahika? Eyihi nahake! Thwanzire ithwagherererya Thatha wethu w’elhubulha, “Omwami Mukulhu Nyamuhanga oyo woswire n’erighanyira n’ow’olhukogho, sianguhire okw’ihithana, oyo woswire n’obwenge bw’olhwanzo n’omwatsi w’ekwenene.” b—Eri. 34:6.
Abaghuma b’okwa bakendi syalhangira “Babeli Mukulhu” akathoghothibwa bakendi sy’ibuka ngoku Abema ba Yehova bamabirighunza mughulhu muuli ibanemukania okwa mwatsi oyo (Lebaya enungu 12-13) d
14-15. Mbwino engebe y’omundu ey’erikotha yikendi syaseghemera okwa mughulhu ogho aholeramo kutse aho aby’ikere? Soborerera. (Esyonyimbo 33:4, 5)
14 Hakanayira, ithw’owa abandi bakabugha bathi, “Kyuwene omuhughu waghe amaholha obulighe bunene buthe bwatsuka, hanabya amaha w’iyo erisyalhubuka.” Ahathe erithika-thika, ebinywe ebi bikakanganaya eriyisunza eryuwene. Aliwe engebe y’omundu ey’erikotha ey’obuthuku obukasa siyiseghemere okwa mughulhu ogho akaholeramo. Yehova ni mutsweri oyuhikene—erithwamu liwe ni ry’obulingirirania kandi lithunganene. (Soma Esyonyimbo 33:4, 5.) Thwangana yikethera ngoku “Omutsweri w’ekihugho kyosi” akendi kolha ekihikire.—Enz. 18:25.
15 Kandi kihikire eribugha thuthi engebe y’omundu ey’erikotha siyiseghemere okwa mwanya ow’akendi syabya in’ikeremo. Sikihikire erilengekania thuthi Yehova iniasyatswera abandu abali omwa kitsweka eyo bathe bathabana akaghisa k’eriowa omwatsi w’Obwami mwa “syombene-hene”. (Mt. 25:46) Omutsweri oyuthunganene ow’ekihugho kyosi atsomene kutsibu abandu aba kwilhaba ngoku thwanga lengekania. Sithwasi Yehova ng’akendisya bindulha athi emyatsi omwa bulighe bunene. Obundi abaghuma b’okwa bandu aba bakendi syabana akaghisa k’erigha oku Yehova, ibamuyikethera, kandi ibakakangania ku bali okwa lhuhandi lhwiwe omughulhu ak’eraya erina liwe embere sy’ebihanda byosi.—Eze. 38:16.
Obulighe bunene bukendisyabya bwabiritsuka, . . . mbwino abaghuma b’okwa bakendisya lhangira ebi banganasya bindulha emithima yabu?
16. Ni byahi ebyo thwabiriminya oku Yehova? (Lebaya n’ekisasani.)
16 Omw’igha lyethu lye Biblia, thwabiriminya ngoku Yehova akalhangira abandu mwa b’obughuli. Mwahayo engebe ya Mughalha wiwe ithwe erithoka eribya n’engebe y’erikotha. (Yn. 3:16) Ithwe bosi thwabiriyilhangirira olhwanzo lhwa Yehova. (Isa. 49:15) Anasi erina ly’obuli mughuma w’okw’ithwe. Omo kwenene, asi ndeke obuli mughuma w’okw’ithwe nibya n’omuthwanga holha, akendisya suba-subania obuli katotorera akathuhambireko n’erisubya obuli kindu ekihambire okwa bulengekania bwethu ekikaleka ithwabya ngoku thuli! (Mt. 10:29-31) Ahathe erithika-thika, thuwithe esyonzumwa mbuya esyanga leka ithwayikethera ngoku Thatha wethu ow’elhubulha ow’olhwanzo akendi syatswera obuli mughuma omwa nzira eyihikene, eyithunganene, kandi omwa lhukeri.—Yak. 2:13.
Thwangana yikethera ngoku Yehova akendi syatswera obuli mughuma omwa nzira eyihikene, eyithunganene, kandi omwa lhukeri (Lebaya enungu 16)
17. Thukendi syakania okuki omo mwatsi owakakwamako?
17 Eriyitheghererya eri likaleka omubiiri wethu w’erithulira iniayithaghisibwa omwa byalhuba kwilhaba kera. Busana naki ithwabugha ekyo? Ni kyahi ekikathuhira mw’omuhwa w’erilholha embere erithulha engulhu yuwene ahathe erilhuhirira? Thukendi syakania buuli okwa by’erisubirya by’ebibulyo ebi omo mwatsi owakakwamako.
OLHWIMBO 76 Kikaleka Iwayowa Wuthi?
a Eribana erisoberera erikakanganaya eky’aleka embinduka eyi iyakolhwa, lebaya omwatsi ‘Ku Kyakutsemesaya Kithya omo Meso Wawu,’ omwa Kaleberyo ak’Okwakasathu 1, 2015, olhup. 8-12.
b Babeli Mukulhu akendisyabya abirithoghothibwa, abaghombe ba Yehova abosi bakendisya lengesibwa Gogi we Magogi akababambira. N’owundi wosi-wosi oyukendisyabya okwa lhuhandi lhw’abandu Nyamuhanga akendisya lengesibwa.
c ERISOBORERA EBISASANI: Ebisasani bisathu ebikakanganaya ekyangaleka ikyakalha erihika okwa bosi omwa mubiiri wethu w’ekihugho kyosi ow’erithulira: (1) Omukali ikire eyiri edini ndebe eyikumayire, (2) abathahenie b’ikere eyo eby’ekipolitiki by’eyo bikaleka ikyabya in’ithwa ebilhaghiro kandi ini ky’akabi, na (3) omulhume oyuw’ikere eyikalire erihikwa busana n’emikwikire y’obulhambu bwayu.
d ERISOBORERA EKISASANI: Omukali oyuwasighanaya ekwenene ak’ibuka eby’igha okw’ithoghothibwa lya “Babeli Mukulhu.” Akabindulha omuthima wiwe n’erisuba eyiri ababuthi biwe Abakristayo. Ebiri ng’ebi byamabya, kyuwene erigherererya obughanyiri n’olhukeri lhwa Thatha wethu w’elhubulha n’eritsema omukolha-nabi akasubulha.
