STƆDI ATIKUL 19
SIŊ 22 Di Kiŋdɔm Dɔn De Rul —Lɛ I Kam!
Wetin Wi No bɔt di We Aw Jiova Go Jɔj Pipul dɛn Tumara Bambay?
“Jiova . . . nɔ want fɔ dɔnawe wit ɛnibɔdi.”—2 PIT. 3:9.
MEN PƆYNT
Dis atikul go ɛp wi fɔ gɛt kɔnfidɛns se we Jiova de jɔj pipul dɛn tumara bambay, i go du wetin rayt ɛn i go jɔj dɛn fia wan.
1. Wetin mek wi go se di tɛm we wi de naw rili wɔndaful?
DI TƐM we wi de naw rili wɔndaful! Wi de si we Baybul prɔfɛsi dɛn de kam tru. Fɔ ɛgzampul, wi de si “di kiŋ na di nɔt” ɛn “di kiŋ na di sawt” de fɛt dɛnsɛf fɔ rul di wɔl. (Dan. 11:40) Wi de si we dɛn de prich di gud nyuz naw pas ɛni ɔda tɛm ɛn bɔku bɔku pipul dɛn de disayd fɔ sav Jiova. (Ayz. 60:22; Mat. 24:14) Ɛn wi de gɛt bɔku spirichwal it “di rayt tɛm.”—Mat. 24:45-47.
2. Wetin wi shɔ bɔt? Wetin wi nid fɔ no?
2 Jiova de kɔntinyu fɔ ɛp wi fɔ ɔndastand klia wan di impɔtant tin dɛn we go apin jisnɔ. (Prɔv. 4:18; Dan. 2:28) Wi gɛt kɔnfidɛns se bifo da big big trɔbul bigin, wi go no ɔl wetin wi nid fɔ no fɔ bia fetful wan ɛn kɔntinyu fɔ gɛt wanwɔd insay da tɛm de we tin nɔ go izi. Bɔt wi fɔ no se tin dɛn de we wi nɔ no bɔt tumara bambay we gɛt fɔ apin. Insay dis atikul, wi go tɔk fɔs bɔt wetin mek wi dɔn ajɔst wetin wi bin dɔn tɔk bɔt sɔm pan di tin dɛn we gɛt fɔ apin. Dɔn, wi go tɔk bɔt sɔm pan di tin dɛn we wi no se go apin tumara bambay ɛn wetin wi Papa we de na ɛvin go du.
DI TIN DƐN WE WI NƆ NO
3. Wetin wi bin dɔn tɔk bɔt di tɛm we pipul dɛn nɔ go gɛt chans igen fɔ put fet pan Jiova? Wetin mek wi bin tɔk dat?
3 Trade, wi bin tɔk se we da big big trɔbul bigin, pipul dɛn nɔ go gɛt chans igen fɔ put fet pan Jiova ɛn sev di tɛm fɔ Amagɛdɔn. Wi bin tɔk dat bikɔs wi bin tink se ɔl di pipul dɛn ɛn di tin dɛn we apin di tɛm fɔ di Flɔd, tinap fɔ tin dɛn we gɛt fɔ apin insay wi yon tɛm. Fɔ ɛgzampul, wi bin tink se jɔs lɛk aw nɔbɔdi nɔ bin ebul fɔ go insay di ak afta Jiova lɔk di domɔt, na so nɔbɔdi nɔ go ebul fɔ put fet pan Jiova ɛn sev we da big big trɔbul bigin.—Mat. 24:37-39.
4. Wetin mek wi nɔ go se igen ɔl di tin dɛn we apin di tɛm fɔ di Flɔd tinap fɔ tin dɛn we gɛt fɔ apin tumara bambay? Ɛksplen.
4 Fɔ se wi fɔ tink se ɔl di tin dɛn we apin di tɛm fɔ di Flɔd tinap fɔ tin dɛn we gɛt fɔ apin tumara bambay? Nɔ. Wetin mek? Na bikɔs di Baybul nɔ tɔk natin lɛk dat. a Na tru se Jizɔs bin kɔmpia “Noa in tɛm” to di tɛm we i gɛt fɔ kam, bɔt i nɔ tɔk se ɔltin we apin insay Noa in tɛm tinap fɔ tin dɛn we gɛt fɔ apin tumara bambay, lɛk di tɛm we Jiova lɔk di ak. Bɔt dis nɔ min se wi nɔ ebul lan ɛnitin frɔm di akawnt bɔt Noa ɛn di Flɔd.
5. (a) Wetin Noa bin du bifo di Flɔd? (Ibruz 11:7; 1 Pita 3:20) (b) Aw di prichin wok we wi de du naw tan lɛk di wan we Noa bin du?
5 We Noa yɛri Jiova in wɔnin mɛsej, i bin sho se i gɛt fet bay we i bil di ak. (Rid Ibruz 11:7; 1 Pita 3:20.) Semweso, we pipul dɛn yɛri di gud nyuz bɔt Gɔd in Kiŋdɔm, dɛn nid fɔ du sɔntin bɔt wetin dɛn yɛri. (Akt 3:17-20) Pita bin se Noa na pɔsin we “bin de prich bɔt wetin rayt.” (2 Pit. 2:5) Bɔt as wi bin dɔn tɔk na di atikul bifo dis wan, wi nɔ no if Noa bin tray fɔ prich to ɔlman bifo di Flɔd kam. Tide, wi de tray fɔ prich to ɔlman na di wɔl ɛn wi de du am wit zil. Bɔt stil, pan ɔl we wi de tray tranga wan, i nɔ go pɔsibul fɔ lɛ wi prich to ɔlman na di wɔl bifo di ɛnd kam. Wetin mek?
6-7. Wetin mek wi go se wi nɔ go ebul fɔ prich di gud nyuz to ɔlman na di wɔl bifo di ɛnd kam? Ɛksplen.
6 Tink bɔt wetin Jizɔs bin tɔk bɔt wi prichin wok. I bin tɔk se dɛn go prich di gud nyuz “na di wan ol wɔl so dat ɔl di neshɔn dɛn go gɛt chans fɔ yɛri.” (Mat. 24:14) Da prɔfɛsi de de kam tru tide pas ɛni ɔda tɛm. Di gud nyuz bɔt di Kiŋdɔm de insay pas 1,000 langwej dɛn, ɛn di jw.org wɛbsayt dɔn mek bɔku bɔku pipul dɛn ebul fɔ yɛri bɔt di gud nyuz ɔlsay na di wɔl.
7 Bɔt Jizɔs bin tɛl in disaypul dɛn bak se dɛn nɔ go “dɔn fɔ travul na di siti dɛn,” ɔ prich to ɔlman bifo i kam fɔ jɔj mɔtalman. (Mat. 10:23; 25:31-33) Di wɔd dɛn we Jizɔs tɔk go kam tru bak insay wi yon tɛm. Bɔku bɔku pipul dɛn de na eria dɛn usay wi nɔ gɛt fridɔm fɔ prich. Pan tap dat, dɛn de bɔn bɔku pikin dɛn ɛni minit. Wi de du wi bɛst fɔ prich di gud nyuz to “ɔl di neshɔn dɛn, . . . trayb dɛn, ɛn pipul dɛn we de tɔk difrɛn difrɛn langwej dɛn.” (Rɛv. 14:6) Bɔt di tru na dat wi nɔ go ebul fɔ prich di gud nyuz to ɔlman na di wɔl bifo di ɛnd kam.
8. Us kwɛstyɔn sɔntɛm go kam na wi maynd bɔt aw Jiova go jɔj pipul dɛn tumara bambay? (Luk bak di pikchɔ dɛn.)
8 Bikɔs ɔf wetin wi dɔn tɔk bɔt, sɔntɛm wi go de wɔnda: Aw Jiova ɛn in Bɔypikin we i dɔn pik fɔ jɔj, go jɔj di pipul dɛn we nɔ bin gɛt chans fɔ yɛri di gud nyuz bifo da big big trɔbul bigin? Wetin go apin to dɛn? (Jɔn 5:19, 22, 27; Akt 17:31) Di tim skripchɔ fɔ dis atikul tɔk se Jiova “nɔ want fɔ dɔnawe wit ɛnibɔdi.” Bifo dat, i want “mek ɔlman ripɛnt.” (2 Pit. 3:9; 1 Tim. 2:4) Pan ɔl we wi no sɔm tin dɛn bɔt Jiova, i nɔ tɛl wi yet aw i go jɔj di pipul dɛn we nɔ bin gɛt chans fɔ yɛri di gud nyuz. Ɛn di tru na dat, i nɔ nid fɔ tɛl wi bɔt ɛnitin we i dɔn du ɔ we i go du.
Wetin Jiova go du to di wan dɛn we nɔ gɛt chans fɔ yɛri di gud nyuz bifo di big big trɔbul bigin? (Luk na paregraf 8) c
9. Wetin Jiova dɔn sho wi insay di Baybul?
9 Insay in Wɔd di Baybul, Jiova dɔn sho wi sɔm pan di tin dɛn we i go du. Fɔ ɛgzampul, di Baybul tɛl wi se Jiova go gi layf bak to pipul dɛn we “nɔ du wetin rayt,” dat na pipul dɛn we nɔ bin gɛt chans fɔ yɛri di gud nyuz ɛn chenj di we aw dɛn de liv dɛn layf. (Akt 24:15; Lyuk 23:42, 43) Dis go mek wi aks ɔda impɔtant kwɛstyɔn dɛn.
10. Us ɔda kwɛstyɔn dɛn wi go aks?
10 Fɔ se ɔl di wan dɛn we go day di tɛm fɔ da big big trɔbul nɔ go ɛva gɛt op fɔ gɛt layf bak? Di Baybul mek wi no klia wan se di wan dɛn we de agens Jiova we in ɛn in ami go dɔnawe wit di tɛm fɔ Amagɛdɔn nɔ go gɛt layf bak. (2 Tɛs. 1:6-10) Bɔt wetin go apin to di ɔda pipul dɛn? Fɔ ɛgzampul, sɔntɛm sɔm go day di tɛm fɔ da big big trɔbul bikɔs dɛn sik, ol, gɛt aksidɛnt, ɔ bikɔs ɔda pipul dɛn kil dɛn. (Ɛkli. 9:11; Zɛk. 14:13) Fɔ se sɔm pan dɛn pipul dɛn de go de pat pan di wan dɛn we “nɔ du wetin rayt” we go gɛt layf bak na di nyu wɔl? Wi nɔ no.
DI TIN DƐN WE WI NO
11. Wetin Jiova go pe atɛnshɔn pan we i de jɔj pipul dɛn di tɛm fɔ Amagɛdɔn?
11 Wi no bɔku tin dɛn bɔt wetin gɛt fɔ apin tumara bambay. Fɔ ɛgzampul, wi no se di tɛm fɔ Amagɛdɔn, Jiova go pe atɛnshɔn pan aw pipul dɛn bin trit Krays in brɔda dɛn, ɛn na dat i go yuz fɔ jɔj dɛn. (Mat. 25:40) Di wan dɛn we dɛn go jɔj as ship dɛn na pipul dɛn we bin dɔn sɔpɔt Krays ɛn di anɔyntɛd dɛn. Wi no bak se sɔm pan Krays in brɔda dɛn go stil de na dis wɔl afta da big big trɔbul bigin ɛn dɛn go go na ɛvin jɔs bifo Amagɛdɔn bigin. Wans Krays in brɔda dɛn stil de na dis wɔl, i pɔsibul se sɔm pipul dɛn we rili want fɔ no di trut go gɛt chans fɔ sɔpɔt dɛn ɛn di wok we dɛn de du. (Mat. 25:31, 32; Rɛv. 12:17) Wetin mek dɛn pɔynt dɛn ya rili impɔtant?
12-13. Wetin sɔntɛm sɔm pipul dɛn go du we dɛn si we dɛn de dɔnawe wit “Babilɔn di Gret”? (Luk bak di pikchɔ dɛn.)
12 Ivin afta da big big trɔbul bigin, i pɔsibul se we sɔm pipul dɛn si we dɛn de dɔnawe wit “Babilɔn di Gret” dat go mek dɛn mɛmba se fɔ lɔng tɛm Jiova Witnɛs dɛn bin dɔn de tɔk se dat go apin. Fɔ se sɔm pan di pipul dɛn we go si we dɛn de dɔnawe wit “Babilɔn di Gret” di tɛm fɔ da big big trɔbul go put fet pan Jiova?—Rɛv. 17:5; Izi. 33:33.
13 If dis kayn tin apin, i go fiba wetin bin apin na Ijipt insay Mozis in tɛm. Mɛmba se “bɔku ɔda pipul dɛn” bin jɔyn di Izrɛlayt dɛn fɔ kɔmɔt na Ijipt. Sɔntɛm sɔm pan dɛn bin dɔn stat fɔ gɛt fet pan Jiova we dɛn si se di Tɛn Bad Tin Dɛn we Mozis bin tɔk bɔt bin apin. (Ɛks. 12:38) If da kayn tin de apin we dɛn dɔnawe wit Babilɔn di Gret, fɔ se wi at go pwɛl bikɔs ɔda pipul dɛn jɔyn wi jɔs bifo di ɛnd kam? Nɔ, wi at nɔ go pwɛl! Wi want fɔ falamakata wi Papa we de na ɛvin we ‘na Gɔd we de sho masi ɛn sɔri-at, we nɔ de vɛks kwik, we in lɔv nɔ de dɔn, ɛn we de tɔk tru ɔltɛm.’ b—Ɛks. 34:6.
Sɔm pipul dɛn we go si we dɛn de dɔnawe wit “Babilɔn di Gret” go mɛmba se fɔ lɔng tɛm Jiova Witnɛs dɛn bin dɔn de tɔk se dat go apin (Luk na paregraf 12 ɛn 13) d
14-15. Fɔ se di chans we pɔsin go gɛt fɔ de sote go gɛt sɔntin fɔ du wit ustɛm i day ɔ usay i de? Ɛksplen. (Sams 33:4, 5)
14 Sɔntɛnde, wi kin yɛri we pipul dɛn kin se, “I go bɛtɛ if mi fambul day bifo da big big trɔbul bigin so dat i go gɛt op fɔ gɛt layf bak.” Na tru se dɛn nɔ kin min bad we dɛn kin tɔk dat. Bɔt di chans we pɔsin go gɛt fɔ de sote go nɔ gɛt sɔntin fɔ du wit ustɛm i day. Jiova na jɔj we pafɛkt. Di tin dɛn we i de disayd fɔ du rayt ɔltɛm ɛn i de jɔj fia wan. (Rid Sams 33:4, 5.) Wi fɔ gɛt kɔnfidɛns se “di Jɔj fɔ di wan ol wɔl” go du wetin rayt.—Jɛn. 18:25.
15 I fayn fɔ mɛmba bak se nɔto usay pɔsin de go mek i gɛt chans fɔ de sote go. Jiova nɔ go ɛva jɔj bɔku bɔku pipul dɛn as “got dɛn” jɔs bikɔs dɛn de na say usay dɛn nɔ gɛt chans fɔ yɛri di gud nyuz bɔt di Kiŋdɔm. (Mat. 25:46) Di wan we de Jɔj di wan ol wɔl ɛn we de du wetin rayt bisin mɔ bɔt dɛn pipul dɛn de pas aw wi bisin bɔt dɛn. Wi nɔ no wetin Jiova go du di tɛm fɔ da big big trɔbul. Sɔntɛm sɔm pan dɛn pipul dɛn de go gɛt chans fɔ lan bɔt Jiova, put fet pan am, ɛn sho se dɛn de sɔpɔt am di tɛm we i go mek ɔlman na di wɔl no in nem.—Izi. 38:16.
Afta da big big trɔbul bigin, . . . fɔ se sɔm pan di pipul dɛn we si di tin dɛn we apin go gɛt fet pan Jiova?
16. Wetin wi dɔn kam fɔ no bɔt Jiova? (Luk bak di pikchɔ.)
16 Di stɔdi we wi de stɔdi di Baybul dɔn ɛp wi fɔ no se mɔtalman layf rili valyu to Jiova. I mek in Bɔypikin day so dat wi ɔl go gɛt chans fɔ de sote go. (Jɔn 3:16) Wi ɔl dɔn si aw Jiova rili lɛk wi. (Ayz. 49:15) I sabi wi ɔl bay nem. Infakt, bikɔs i rili sabi wi, ivin if wi day, i go ebul fɔ gi wi layf bak bikɔs i ebul mɛmba ɔltin bɔt wi ɛn ivin di tin dɛn we mek wi bi udat wi bi! (Mat. 10:29-31) Fɔ tru, wi gɛt gud rizin fɔ gɛt kɔnfidɛns se wi Papa we de na ɛvin we lɛk wi go jɔj ɔlman di kayn we we de sho se i pafɛkt, i de du wetin rayt, ɛn i gɛt sɔri-at.—Jems 2:13.
Wi gɛt kɔnfidɛns se Jiova go jɔj ɔlman di kayn we we de sho se i pafɛkt, i de du wetin rayt, ɛn i gɛt sɔri-at (Luk na paregraf 16)
17. Wetin wi go tɔk bɔt insay di nɛks atikul?
17 Dɛn nyu we dɛn ya aw wi dɔn ɔndastand dɛn tɔpik dɛn ya dɔn ɛp wi fɔ no se di prichin wok ɔjɛnt naw pas ɛni ɔda tɛm. Wetin mek wi se dat? Ɛn wetin go mek wi kɔntinyu fɔ prich di gud nyuz wit zil? Wi go tɔk bɔt di ansa to dɛn kwɛstyɔn dɛn ya insay di nɛks atikul.
SIŊ 76 Aw Dat Kin Mek Yu Fil?
a Fɔ no mɔ bɔt wetin mek dɛn mek dis chenj, luk di atikul we gɛt di taytul “Na Dat Yu Want” na di Mach 1, 2015 Wachtawa, pej 8 to 10.
b Afta dɛn dɔnawe wit Babilɔn di Gret, dɛn go tɛst ɔl Jiova in savant dɛn insay di tɛm we Gɔg we de na Megɔg go atak dɛn. Dɛn go tɛst bak ɛnibɔdi we jɔyn Gɔd in pipul dɛn afta dɛn go dɔn dɔnawe wit Babilɔn di Gret.
c SMƆL TIN BƆT DI PIKCHƆ: Tri pikchɔ dɛn we de sho wetin mek di prichin wok we de apin ɔlsay na di wɔl nɔ go rich na sɔm say dɛn: (1) Wan uman de na say we nɔ sef fɔ prich di gud nyuz bikɔs ɔf di men rilijɔn we de de, (2) wan man ɛn in wɛf de na say we nɔ sef ɛn we i nɔ ligal fɔ prich di gud nyuz bikɔs ɔf di pɔlitiks biznɛs we de de, ɛn (3) wan man de na say we rili fa ɛn nɔ izi fɔ go.
d SMƆL TIN BƆT DI PIKCHƆ: Wan yɔŋ uman we bin lɛf di trut de mɛmba wetin i bin dɔn lan bɔt di dɔnawe we dɛn go dɔnawe wit “Babilɔn di Gret.” I disayd fɔ kam bak to in mama ɛn papa we na Kristian dɛn. If dɛn kayn tin dɛn ya apin, wi want fɔ bi lɛk wi Papa we de na ɛvin we gɛt sɔri-at ɛn gladi we pɔsin we bin dɔn kɔmɔt biɛn am kam bak to am.
