LONGI DIA 19
NKUNGA WA 22 Kintinu Kiayadikwa—Yambula Kiza!
Nkia Mambu Tuzeye mu Kuma kia Mfundisa za Yave Kuna Sentu?
“O Yave . . . kazolele ko vo vafwa kana muntu mosi.”—2 PET. 3:9.
DIAMBU DIASINA TULONGOKA
Tulenda kala ye ziku vo vava Yave kefundisa wantu kuna sentu, ovanga edi diambote ye diansongi.
1. Ekuma tulenda vovela vo mu kolo kiamfunu tuzingilanga?
MU KOLO kiamfunu kikilu tuzingilanga. Konso lumbu kiviokanga, o ungunza wa Bibila ulungananga ova ntadisi a meso meto. Kasikil’owu, tumonanga “ntinu a node” yo “ntinu a sude” benuananga kadi yau awole bazolele tumina e nza. (Dan. 11:40, mvovo vana yand’a lukaya.) Tumonanga mpe e nsangu zambote za Kintinu zisamunuanga mu mpila ina ke zisidi samunuinua ko ye mafunda ma wantu betambulwilanga e nsangu zazi. (Yes. 60:22; Mat. 24:14) Tutambulanga ulolo wa madia ma kimwanda “muna ntangwa ifwene.”—Mat. 24:45-47.
2. Nkia diambu tulenda kadila ye ziku? Nkia diambu tufwete sungamena?
2 Yave okwamanananga kutusadisa mu kala ye umbakuzi wakia wa mambu mevangama ke kolo ko. (Nga. 4:18; Dan. 2:28) Ozevo, tulenda kala ye ziku vo vava e mpasi zayingi ziyantika, tuzaya mawonso tufwete vanga muna zindalala ye kwikizi yo kala twayikakiana muna kolo kiokio kiampasi. Kansi, tufwete sungamena vo vena ye mambu ke tuzeye ko mu kuma kia mpasi zayingi. Mu longi diadi, entete tubadika e kuma tusingikidi umbakuzi weto muna maka mambu mevangama. I bosi, tufimpa maka mambu tuzeye mu kuma kia kusentu ye mpila ina Se dieto dia zulu kevangila mambu.
NKIA MAMBU KE TUZEYE KO?
3. Muna mvu miavioka, adieyi twavovanga dibwila mindembi kwikila muna kolo kia mpasi zayingi? Ekuma twavovelanga dio?
3 Muna mvu miavioka, twavovanga vo vava e mpasi zayingi ziyantika, e mindembi kwikila ke bekala diaka ye lau ko dia songa kwikizi muna Yave yo vuluka muna Armangedo. Twavovanga wo kadi twayindulanga vo e mambu mavangama muna kolo kia Kizalu, makala se kini kia mana mevangama kuna sentu. Kasikil’owu, twayindulanga vo wauna wantu ke balenda diaka kota mu nzaza ko vava Yave kakanga e kielo kia nzaza vitila kizalu kiayantika, i diau mpe dibwa vitila lubantiku lwa mpasi zayingi. Nzambi ‘okanga e kielo’ kia nza ya Satana, i sia vo, wantu ke bekala diaka ye lau ko dia songa lukwikilu muna Yave yo vuluzwa.—Mat. 24:37-39.
4. Nga diansongi mu vova vo mawonso mavangama muna kolo kia kizalu makala se kini kia mana mevangama kuna sentu? Sasila.
4 Nga diansongi mu vova vo mawonso mavangama muna kolo kia kizalu makala se kini kia mana mevangama kuna sentu? Ve! Ekuma? Kadi e Bibila ke kisasilanga diambu diadi ko. a Dialudi vo Yesu watezanesa e “lumbu ya Noa” ye kolo kia ngiz’andi, kansi kayika ko vo mawonso mavangama muna kolo kia Kizalu mevangama mpe kuna sentu nze vava Yave kakanga o mwelo a nzaza. Kansi e diadi ke disongele ko vo ke tulendi longoka diambu ko muna lusansu lwa Noa ye Kizalu.
5. (a) Adieyi Noa kavanga vitila Kizalu? (Ayibere 11:7; 1 Petelo 3:20) (b) Muna diambu ditadidi e salu kia samuna e nsangu zambote, aweyi e lumbu yeto ifwananene ye lumbu ya Noa?
5 Vava Noa kawa e nsangu za lulukisu za Yave, wasonga vo wakala ye lukwikilu muna tunga e nzaza. (Tanga Ayibere 11:7; 1 Petelo 3:20.) Diau dimosi mpe, awana bewanga e nsangu zambote za Kintinu kia Nzambi bafwete songa lukwikilu muna sadila mana belongokanga. (Mav. 3:17-20) Petelo wayikila Noa vo: “Nteleki a unsongi.” (2 Pet. 2:5) Kansi, nze una twavovele muna longi diaviokele, ke tuzeye ko kana vo Noa kalenda sila umbangi kwa wantu awonso bazingilanga ova nza vitila Kizalu. Yeto mpe o unu tuvanganga mawonso muna sila umbangi kwa wantu awonso ova nza ye tusamunanga e nsangu zambote kuna vema kwawonso. Kansi, kana nkutu tuvangidi mawonso, ke tulenda samuna e nsangu zambote ko kwa konso muntu ova nza vitila e mbaninu a nza yayi yiza. Ekuma?
6-7. Ekuma tulenda vovela vo ke tulenda samuna e nsangu zambote ko kwa konso muntu ova nza vitila mbaninu yiza? Sasila.
6 Badika dina Yesu kavova mu kuma kia salu kieto kia umbangi. Wasakula vo e nsangu zambote zisamunua “mu nza yawonso muna umbangi kwa zula yawonso.” (Mat. 24:14) O unu, ungunza wau ulungananga una ufwene ke mu mvu miavioka ko. E nsangu zambote za Kintinu zisamunuanga mu vioka 1.000 dia ndinga. Wantu ayingi ova nza bena ye lau dia wá e nsangu zambote za Kintinu kia Nzambi muna nzil’eto jw.org.
7 Kansi, Yesu mpe wavovesa alongoki andi vo ke ‘bemanisa mbanza zawonso ko’ vitila keza fundisa e nza yayi. (Mat. 10:23; 25:31-33) Ediadi disongele vo ke belenda sila umbangi ko kwa konso muntu vitila keza fundisa o wantu. Wantu ayingi o unu bezingilanga muna zunga ina vo e salu kia samuna e nsangu zambote kiasimwa. Vana ntandu, konso miniti nsedia miayingi miwutukanga. Ozevo, ke tulenda samuna e nsangu zambote ko kwa konso muntu ova nza vitila mbaninu yiza. Kana una vo i wau, tuvanganga mawonso tulenda muna samuna e nsangu zambote kwa “zula yawonso, makanda ye ndinga.”—Lus. 14:6.
8. Nkia kiuvu tulenda yuvula mu kuma kia mpila ina Yave kefundisila o wantu kuna sentu? (Tala mpe mafoto.)
8 Landila mana tubadikidi, tulenda yuvula vo: Adieyi Yave yo Yesu bevanga kwa awana ke bekala ye lau dia wá e nsangu zambote ko vitila mpasi zayingi zayantika? (Yoa. 5:19, 22, 27; Mav. 17:31) E sono kibongelo e longi diadi kivovanga vo Yave “kazolele ko vo vafwa kana muntu mosi.” Kansi edi kazolele vo “awonso balwaka muna luviluku lwa ntima.” (2 Pet. 3:9; 1 Tim. 2:4) Kana una vo tuzeye mambu mama mu kuma kia Yave, katuzayisi ntete ko una ke fundisila wantu ana ke bekala ye lau dia wá e nsangu zambote ko. Dialudi vo, kena ye mbebe ko ya kutuzayisa mana kavangidi kala ye mana kesinga vanga.
Adieyi Yave kevanga kwa wantu ana ke bekala ye lau dia wá e nsangu zambote ko vitila mpasi zayingi zayantika? (Tala e tini kia 8) c
9. Nkia mambu o Yave kekutuzayisanga muna Bibila?
9 Muna Bibila, Yave okutuzayisanga maka mambu kevanga. Kasikil’owu, Bibila kikutuzayisanga vo Yave ofutumuna “awana bena vo ke ansongi ko,” i sia vo, wantu ana ke bekala ye lau dia wá e nsangu zambote ko yo soba e fu yau. (Mav. 24:15; Luka 23:42, 43) Ediadi divaikisi yuvu yankaka ya mfunu.
10. Nkia yuvu yankaka tulenda yuvula?
10 Nga awana befwa muna kolo kia mpasi zayingi ke bekala ye vuvu kia lufuluku ko? E Bibila kitoma kiesesanga vo mbeni za Yave ana befwaswa muna vita ya Armangedo ke befuluka ko. (2 Tes. 1:6-10) Kansi adieyi tuvova mu kuma kia akaka ana befwila muna sumbula, mayela yovo ana bevondwa kwa wantu ankaka? Akaka muna wantu awaya, nga bekala muna buka kia “awana bena vo ke ansongi ko” ana befuluka muna nz’ampa? Ke tuzeye ko.
NKIA MAMBU TUZEYE?
11. Aweyi wantu befundisilwa muna vita ya Armangedo?
11 Vena ye mambu mayingi tuzeye mevangama kuna sentu. Kasikil’owu, tuzeye wo vo muna Armangedo wantu befundisilwa muna mpila bekadilanga ye mpangi za Kristu. (Mat. 25:40) Awana beyikama Akristu akuswa yo Kristu, bebadikilwa vo mameme. Tuzeye wo vo akaka muna mpangi za Kristu bekala ova ntoto vava e mpasi zayingi ziyantika ye benatwa kuna zulu vitila vita ya Armangedo yayantika. Ekolo mpangi za Kristu bekala ova ntoto, nanga akwa luzolo lwambote bekala ye lau dia kubayikama mu salu kiau. (Mat. 25:31, 32; Lus. 12:17) Ekuma mambu mama menena o mfunu?
12-13. Adieyi akaka bevanga vava bemona lufwasu lwa “Babele Anene”? (Tala mpe mafoto.)
12 Kana nkutu vava e mpasi zayingi ziyantika, nanga akaka muna awana bemona lufwasu lwa “Babele Anene” besungamena vo Mbangi za Yave tuka kolo bavovelanga e diambu diadi. Akaka muna awana bemona mambu mama, nga beviluka o ntima?—Lus. 17:5; Yez. 33:33.
13 Avo e diadi divangama, dikala e betela ye dina diavangama muna Engipito muna lumbu ya Mose. Sungamena wo vo “ndonga mun’awana ke bakala Aneyisaele ko” bayikama Aneyisaele vava bavaika muna Engipito. (Luv. 12:38) Nanga akaka muna wantu awaya bayantika kwikila muna Yave vava bamona vo lulukisu lwa Mose mu kuma kia vuku kumi lwalungana. Avo ediadi divangamene kuna nim’a lufwasu lwa Babele Anene, nga tukendalala wau vo wantu awaya bekutuyikama vitila mbaninu? Ve kikilu. Tuzolele tanginina kiwuntu kia Se dieto dia zulu una vo “Nzambi a nkenda ye ngemba, ke funganga makasi mu nzaki ko, ozele yo walakazi ye ludi.” b—Luv. 34:6.
Akaka muna awana bemona lufwasu lwa “Babele Anene” besungamena vo Mbangi za Yave tuka kolo bavovelanga e diambu diadi (Tala e tini kia 12-13) d
14-15. Nga e ntangwa kefwa o muntu yovo fulu kezingilanga i kiau kikumvana e lau dia zinga yakwele mvu? Sasila. (Nkunga 33:4, 5)
14 Ezak’e ntangwa, mpangi olenda vova mu kuma kia yitu kiandi una vo ke Mbangi a Yave ko vo: “Avo fwidi kwandi vitila mpasi zayingi zayantika diambote dikala, kadi olenda kala ye lau dia fuluka.” Dialudi vo, mu kuma kia zola o muntu kalenda vovela e diambu diadi. Kansi, ke ntangwa ko ina kefwa o muntu ikumvana e lau dia zinga yakwele mvu kuna sentu. Wau vo Yave mfundisi a lunga, obaka e nzengo zansongi. (Tanga Nkunga 33:4, 5.) Tulenda kala ye vuvu vo “o Mfundisi a nza yawonso” ovanga edi diansongi.—Tuku 18:25.
15 Diau dimosi mpe, tulenda vova vo e fulu kezingilanga o muntu ke kiau ko kikumvana e lau dia zinga yakwele mvu kuna sentu. Vena ye mafunda ye mafunda ma wantu bezingilanga muna nsi zina vo ke bena ye lau dia wá e nsangu za Kintinu ko. Ke diansongi ko kwa Yave mu badikila wantu awaya vo “nkombo.” (Mat. 25:46) O Mfundisi a nsongi a nza yawonso otokanenanga wantu awaya lutila yeto. Ke tuzeye ko una Yave kevangila mambu muna kolo kia mpasi zayingi. Nanga akaka muna wantu awaya bekala ye lau dia longoka oma ma Yave, bekwikila muna yandi yo kuyisia kuna sambu diandi vava ketundidika e nkumbu andi vana ntadisi a zula yawonso.—Yez. 38:16.
Vava mpasi zayingi ziyantika, . . . akaka muna awana bemona mambu mama, nga beviluka o ntima?
16. Ameyi tuzeye mu kuma kia Yave? (Tala mpe e fwaniswa.)
16 Muna toma longokanga e Bibila, tubakulanga vo Yave ovuanga wantu o mfunu. Wavana moyo a Mwan’andi kimana twakala ye lau dia zinga yakwele mvu. (Yoa. 3:16) Yeto awonso twamona kala o zola kwa Yave. (Yes. 49:15) Ozeye konso muntu mu yeto muna nkumbu. Wau vo otomene kutuzaya, kana nkutu tufwidi okutufula yo vutula mawonso ma zingu kieto ye makani meto. (Mat. 10:29-31) Kieleka, tuvuidi kuma kiasikila mu kala ye vuvu vo, Se dieto dia zulu ofundisa konso muntu mu yeto mu mpila yalunga, ya unsongi ye nkenda.—Yak. 2:13.
Tulenda kala ye vuvu vo, Yave ofundisa konso muntu mu yeto mu mpila yalunga, yansongi ye nkenda (Tala e tini kia 16)
17. Nkia yuvu tubakila e mvutu muna longi dilanda?
17 Wau tutomene singika umbakuzi wau, tumwene vo e salu kia umbangi kifwete salwa mu nzaki zawonso ke mu lumbu yavioka ko. Ekuma tuvovele diadi? Nki kikutufilanga mu kwamanana samuna e nsangu zambote yo vema kwawonso? Tubaka e mvutu za yuvu yayi muna longi dilanda.
NKUNGA WA 76 Aweyi Omonanga?
a Muna toma zaya e kuma kivangilu e nsobani yayi, tala e longi dina yo ntu a diambu, ‘I Wau Oyangalelanga’ muna Eyingidilu dia 15 kia Malusu, 2015 lukaya lwa 7-11.
b Kuna nim’a lufwasu lwa Babele Anene, e selo yawonso ya Yave tontwa betontwa vava benuaniswa kwa Ngonge a Mangonge. Konso muntu oyikama nkangu a Nzambi kuna nim’a lufwasu lwa Babele Anene, tontwa mpe ketontwa.
c MAFOTO: Mambu tatu mesonganga e kuma wantu ankaka ke bewila nsangu zambote ko tusamunanga mu nza yawonso: (1) Nkento ozingilanga muna nsi ina vo e nsambil’a Kikristu ke itondwanga ko, (2) akazi bezingilanga muna nsi ina vo e salu kieto kia umbangi kiasimwa, ye (3) yakala dimosi ozingilanga muna zunga kina kwanda ye diampasi mu lwaka ko.
d MAFOTO: Mwan’a ndumba ona wayambula e ludi osungamene mana kalongoka mu kuma kia lufwasu lwa “Babele Anene.” Owau ovilukidi o ntima yo vutuka kwa mase mandi bena vo Akristu. Avo diambu diadi divangamene, tuzolele sungamena vo Se dieto dia zulu nkwa nkenda yo walakazi ye oyangalalanga vava nsumuki kevilukanga o ntima.
