1. Mu bungu dia nti tulendi têla ti mu ntangu ya nzitukulu twena?

 MU NTANGU ya nzitukulu twena bwawu bu! Bilumbu biabiansoni mbikululu za Bibila ha meso meto zilunganaka. Mu tifwani, “mutinu wa ku nore” na “mutinu wa ku side” tumonaka bata nwana, mu bungu ti muna muntu mu bawu zololo mu yâla nza. (Dan. 11:40) Nsangu za mbote za Timfumu tia Nzambi tuta mona bata samuna mu nza yayansoni, mpe milio za bantu bata bonga nzengolo ya sarila Yehova. (Iza. 60:22; Mat. 24:14) Mpe, bidia bibingi bia timpeve tabakiri “mu ntangu yifwanane.”—Mat. 24:​45-47, NWT.

2. Mu nti tulendi bêla na lukwikulu, kâ nti tufweti tambula?

² Yehova beto kata tatamana mu bakisa mu tomo bakula misamu mia mfunu mitûla ntamana. (Bin. 4:18; Dan. 2:28) Tulendi bâ na lukwikulu ti mpasi ziyôkele bu zibatika, mbo tuzaba mio miamiansoni mi tufweti zaba mu korela na kwikama kwakwansoni, na mu tatamana mu bâ mu bumosi mu ntangu yo ya mpasi. Kâ, tufweti tambula ti misamu mie kô tulembolo zaba mitariri bilumbu bita kwiza. Mu timoko ti, mbo tutoko tala misamu miasiri ti tadelakasa mabanza meto mu misamu miakaka mitûla. Ha manima mbo tumona misamu mi tuzebi mu bungu dia bilumbu bita kwiza, na mpila Yehova yi kayirikila misamu.

NGANO NTI TULEMBOLO ZABA

3. Bwe tayizi tâ mu bungu dia ntangu Yehova yi kalembo vutu hana bantu bweso bwa bâ na timinu mu Yandi, mpe mu bungu dia nti tayizi têla bo?

³ Mu ntama, beto tweri tâka ti mpasi ziyôkele bu zibatika,  bantu ka bavutu’â bâ na bweso ko bwa sarila timinu mu Yehova na bwa vuka mu Armagedo. Tala ti ni bo tayizi tâ mu bungu ti tayizi bakula ti bantu na misamu mia mu ntangu ya delize, mbikululu yabâ ya misamu miyôka ku matu. Mu tifwani, Yehova bu kamana kanga mwelo, muntu kâni wabâ na lenda dia kota mu nzaza. Mpila mosi mpe muntu kâni wubâ na lenda dia tûla timinu mu Yehova na mu vuka, mpasi ziyôkele bu zibatika.—Mat. 24:​37-39.

4. Mu bungu dia nti tufweti lembo tâ ti misamu miayôka mu ntangu ya delize mimonekese misamu mi tula mu ntangu yita kwiza? Bangula.

⁴ Ngano wudelakane mu tâ ti misamu miayôka mu ntangu ya delize misamu mikwiza mimonekesaka? Kâni. Mu bungu dia nti? Mu bungu ti Bibila ka ditâka bo ko. a Diangana Yezu wafwanakasa “bilumbu bia Noa” na ntangu yi kabâ wô, kâ ka tâ ko ti misamu miamiansoni miayilama mu ntangu ya Noa mbo mitomo yilama mu bilumbu bita kwiza; ntiana mu ntangu Yehova yi kakanga mwelo wa nzaza. Kâ ka wuta zolo tâ ko ti ka tulendi’â talongoka misamu ko mu tinsamu tia Noa na tia delize.

5. a) Bwe Noa kasongela timinu ntete delize? (Bahebre 11:7; 1 Piere 3:20) b) Bwe tisalu tia samuna tia Noa ti delakane na tia beto lumbu ti?

⁵ Noa bu kawâ nsangu za ndwengosolo za Yehova, wasongela ti timinu tiabâ nandi bu katunga nzaza. (Tanga Bahebre 11:7;  1 Piere 3:20.) Mpila mosi mpe, bantu bawâka nsangu za mbote za Timfumu tia Nzambi bafweti songela timinu mu nsalulu zawu. (Bis. 3:17-20) Piere watâ Noa ‘tisamuni tia buderede.’ (2 Pi. 2:5) Kâ ntiana bu tamweni wo mu timoko tiayôkele, ka tuzebi’â ko tala ti Noa wayêla mu samunina bantu babansoni babâ ha mutoto, ntete delize. Lumbu ti mpe bantu babansoni bê ha mutoto tuyêlaka mu samunina, mpe na luhemo lwalwansoni tusilaka bo. Kâ ntono ngolo zazansoni zi tusarilaka mu samuna, ka tulendi’â tasamuna nsangu za mbote ko kwe bantu babansoni babâka ha mutoto ntete nsuka yatula. Mu bungu dia nti?

6-7. Mu bungu dia nti tulendi têla ti ka tulenda ko mu samuna nsangu za mbote kwe muna muntu ha mutoto ntete nsuka yatula? Bangula.

⁶ Tataluzuleno misamu mia tâ Yezu mu bunene bwa tisalu tieto tia samuna. Yandi watâ ti nsangu za mbote za Timfumu tia Nzambi mbo basamuna zo “ha mutoto wawansoni mu tâ timbangi kwe makanda mamansoni.” (Mat. 24:​14, NWT) Mbikululu yo ya yita tomo lungana lumbu ti, yôka mu ntama. Nsangu za Timfumu, mu mazu yôka 1000 tusamuninaka zo, mpe mu nzila ya site’eto jw.org, bantu babingi ha mutoto balendi longoka nsangu za mbote za Timfumu tia Nzambi.

⁷ Kâ, Yezu watâ mpe kwe milongoki miandi ti ‘ka baketi’â sa lungisa mimvuka ko,’ peleko ka baketi’â samunina muna muntu ko, ntete kiza kafundisa bantu. (Mat. 10:23; 25:​31-33) Misamu mia tâ Yezu mbo mimoneka mia matieleka mu ntangu ya beto. Bantu babingi lumbu ti babâka mu bizunga bi bayiminaka tisalu tieto tia samuna. Bala babingi babutukaka minite zazansoni. Ngolo tusarilaka mu samuna nsangu za mbote ‘mu nsi zazansoni, kwe mawa, kwe mazu na kwe makanda mamansoni.’ (Nza. 14:6) Kâ ka tulenda ko mu samuna nsangu za mbote kwe muna muntu ha mutoto ntete nsuka yatula.

8. Ntia tiyuvu tulendi tiyula mu bungu dia mfundusu za Yehova zita kwiza? (Tala mpe bifwani.)

⁸ Kâ tulendi tiyula: Bwe tutâ mu bungu dia bantu ba mbote balembo bâ na bweso bwa wâ nsangu za mbote ntete mpasi ziyôkele zabatika? Bwe Yehova kabafundisila? (Za 5:​19, 22, 27; Bis. 17:31) Verse’eto ya mutu-diambu yitêle ti Yehova “kazolo’â ko ti na kani wumosi wafuka.” Kâ, Yandi zololo ti “babansoni basoba mabanza.” (2 Pi. 3:​9, NWT; 1 Tim. 2:4) Ni bu sa ti misamu ni mio tuzebi mu Yehova, Yandi ka tutêla ko bwe kafundisila bantu balembo bâ na bweso bwa wâ nsangu za mbote. Diangana, Yandi kena na nsatu ko ya tutêla misamu miamiansoni mi kayirika, peleko mi kakwizi yirika.

9. Ntia misamu Yehova katutêla mu Bibila?

⁹ Mu Zu diandi, Yehova watutêla misamu miakaka mi kakwizi yirika. Mu tifwani, Bibila ditutêlele ti Yehova mbo kavumbula ‘bantu balembolo ba sungama,’ bô balembo bâ na bweso bwa wâ nsangu za mbote na bwa soba ndiatulu’awu. (Bis. 24:15; Like 23:​42, 43) Musamu wo wutulumuni biyuvu biakaka bia mfunu.

10. Ntia biyuvu biakaka bilendi bâ neto?

¹⁰ Ngano bô babansoni bafwa mu mpasi ziyôkele, mbo bafuka mankululu, na kondo kwa tivuvu tia mvumbukulu ya ba fwa? Matsonoko matomono songela ti bantu batelamanaka Yehova, mpe bafuka ha moko mandi na ha moko ma binwani biandi ku Armagedo, ka babaka mvumbukulu ya ba fwa ko. (2 Tes. 1:​6-10) Kâ bwe tutâ mu bungu dia bantu bakaka? Mu tifwani, bakaka balendi fwa mu ntangu ya mpasi ziyôkele, mu bungu  ti timbevo tie nawu, ba nuna bena, peleko mu bungu ti mu accident bafwiriri, peleko ha moko ma muntu wakaka. (Ekl. 9:11; Zka. 14:13) Ngano bantu bakaka ha kati diawu balendi bâ mu mulonga wa ‘bantu balembolo ba sungama’ bavumbuka mu nza ya môna? Diangana ka tuzebi’â ko.

NGANO NTI TUZEBI

11. Ngano mfundusu ya bantu ku Armagedo mu nti yitomo sikamana?

¹¹ Bima biabingi tuzebi mu bungu dia misamu mikwiza ku matu. Mu tifwani, tuzebi ti ku Armagedo, bantu mbo babafundisa mu mpila yi babongela mpangi za Kristo. (Mat. 25:40) Bô ba bakwizi bongela ntiana bimeme ni bantu bayikaka moko kwe Bakristo ba tumbu na kwe Kristo. Tuzebi mpe ti ha manima ma mbatukulu ya mpasi ziyôkele, Bakristo ba tumbu bakaka mbo babâ kwa ha mutoto. Mpe mbo bakwenda ku zulu ntangu fioti ntete mbatukulu ya Armagedo. Ntangu yayansoni yi bâ mpangi za Kristo ha mutoto, kulendi bâ bantu babâ na mitima mia sungama, bakwizi bâ na bweso bwa bakisa mpangi za Kristo, na bwa yika moko mu tisalu ti basala. (Mat. 25:​31, 32; Nza. 12:17) Mu bungu dia nti misamu mio mie mfunu?

12-13. Ha manima ma mfukulu ya “Babilone ya Yinene” ngano bantu bakaka nti balendi sa? (Tala mpe bifwani.)

¹² Ha manima ma mbatukulu ya mpasi ziyôkele, kampe bantu bamona mfukulu ya “Babilone ya Yinene” mbo babambuka ti mvula zazingi Mbangi za Yehova zeri tâka ti musamu wo mbo waketi lungana. Ngano bantu bamona mfukulu ya Babilone ya Yinene mu ntangu ya mpasi ziyôkele, mbo batûla timinu tiawu mu Yehova?—Nza. 17:5; Ezk. 33:33.

¹³ Wamana bêla buna, mbo mibâ ntiana misamu miayôka ku Ezipte mu ntangu ya Mose. Tabambuka ti “bantu babingi ba mpila na mpila” babâ ha timosi na bala ba Israele bu badûka ku Ezipte. Kampe bantu bakaka babatika mu kurisa timinu tiawu mu Yehova bu bayizi mona ti ndwengosolo za hana Mose, mu musamu wutariri mputa 10, zalungana. (Ndu. 12:38) Musamu wa mpila yo wamana tula ha manima ma mfukulu ya Babilone ya  Yinene, ngano mbo tunionga mu bungu ti bantu bo babakiri bweso bwabâ tintwari na beto ntete nsuka yatula? Diangana kâni! Tuzololo tabâ ntiana Tata’eto die ku zulu, “Nzambi yifwilaka tiari mpe ye na tiari tia mutima, yilembo kulu bakaka nkesi, mpe ye ya fuluka mu luzolo lwa kwikama na mu matieleka.” b—Ndu. 34:​6, NWT.

14-15. Ngano ni ntangu yi fwa muntu peleko mbuka yi kabâka yisa ti kabaka luzingu lwa mankululu? Bangula. (Mikunga 33:​4, 5)

¹⁴ Ntangu zakaka, mpangi ze kô zitâka mu bungu dia bantu ba kanda diawu balembo sarilaka Yehova: “Bubote bwingi kwe yandi tala ti fwiri ntete mpasi ziyôkele zabatika, mu bungu ti ha manima lendi bâ na bweso bwa mvumbukulu ya ba fwa.” Kampe mabanza ma mbote mabatumaka mu tâ bo. Kâ ka ntangu’â ko yi fwa muntu yisa ti kabaka mvumbukulu ya ba fwa. Yehova Mfundisi ya lunga yena—ntangu zazansoni, nzengolo za sungama na za buderede kabongaka. (Tanga Mikunga 33:​4, 5.) Buna tulendi bâ na lukwikulu ti “Mfundisi ya mutoto wa mukaka” mbo kayirika mio mia sungama.—Mba. 18:25.

¹⁵ Wudelakane mpe mu tâ ti ka mbuka ko yi bâka muntu yisa ti kabaka bweso bwa zinga mankululu. Ka tulendi’â tabanza ko ti mbala mosi Yehova kabongela bantu babâka mu nsi zi balembo bâ na bweso bwa zaba nsangu za Timfumu ntiana “bakombo.” (Mat. 25:46)  Mfundisi ya sungama ya mutoto wawansoni, bantu bo katomo belokelaka lwaka yôka beto. Ka tuzebi’â ko bwe Yehova katwarisila misamu mu ntangu ya mpasi ziyôkele. Kampe bakaka mbo babâ na bweso bwa longoka misamu miamingi mitariri Yehova, bwa tûla timinu tiawu mu Yandi na bwa bâ ku lwela lwandi bu katisantukisa ha meso ma makanda.—Ezk. 38:16.

16. Nti twizi longoka mu Yehova? (Tala mpe tifwani.)

¹⁶ Mu ndongokolo’eto ya Bibila, tubakuri ti bantu nkatika ntalu bena ha meso ma Yehova. Yandi wahana luzingu lwa Mwana’andi ngatu beto bansoni tabâ na bweso bwa zinga mankululu. (Za 3:16) Beto bansoni tumweni luzolo lwa Yehova. (Iza. 49:15) Yandi mu nkumbu kazabiri muna muntu mu beto. Diangana, Yandi tomono tu zaba; ntiangu, ni bu sa ti tufwiri, lendi tu vumbula kwe ba fwa, mu bungu ti misamu mieto miamiansoni mia timuntu tieto mia kazebi! (Mat. 10:​29-31) Dieka bo, misamu miamingi mita tu tuma mu kwikila ti Tata’eto die na luzolo, dia ku mazulu, mbo kafundisa muna muntu mu mpila ya delakana, mu buderede na tiari tia lemvokela.—Zaki 2:13.

17. Nti tuzonzela mu timoko tita kwiza?

¹⁷ Ngwilu yi ya môna yitubakiri beto yita tuma mu kulu sala tisalu tieto tia samuna. Mu bungu dia nti tuta têla bo? Ngano nti bita tu tuma mu tatamana mu samuna? Mbo tutaluzula mvutu za biyuvu bio mu timoko tita landa.