AWˬ LAWN 19
KʼA MUIˬ HKAWˇ 22 Gʼuiˬ sha ve mvuhˇ miˬ uˉ peunˍ chehˇ ve—Gaˬ la piˇ˗oˆ!
Awˬ gʼuˇ suhˍ hpawˇ Yaˬhoˉvaˬ suhˉ jehˬ tuˬ ve htaꞈ caˉ daꞈ ve ngaˬ hui aˬ htoꞈ ma shiˍ ve le?
‘Yaˬhoˉvaˬ chaw teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ ve yoˬ.’—2 PEˍTRUˆ 3:9.
A YEˇ UIˍ VE AWˬ LAWN
Yaˬhoˉvaˬ suhˉ jehˬ ve lehˬ hteˇ ve cawˇ ve hkʼaw te tuˬ yoˬ tehꞈ ngaˬ hui yonˍ gʼa ve yoˬ.
1. Aˬ htoꞈ ma te ngaˬ hui awˬ leh meuˇ ve awˬ yanˇ hkʼaw chehˇ ve tehꞈ kʼoˆ gʼa ve le?
Ngaˬ hui lehˬ awˬ leh meuˇ ve awˬ yanˇ hkʼaw chehˇ ve yoˬ. Teˇ nyi le le Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve htaꞈ awˬ tehˬ hpehꞈ la ve ngaˬ hui gʼa mawˬ ve yoˬ. Tawˇ pa haˉ te kʼo, ‘awˬ na hpawˇ ve jawˇ mawˇ’ leh ‘awˬ hawˉ hpawˇ ve jawˇ mawˇ’ miˬ guiˬ hkʼoˆ lo uˉ peunˍ tuˬ kanˇ paˆ veh daꞈ chehˇ ve htaꞈ ngaˬ hui gʼa mawˬ ve yoˬ. (Daˍyeˍlaˆ 11:40) Ngaˬ hui Gʼuiˬ sha ve mvuhˇ miˬ daꞈ ve awˬ lawn sha tanˇ miˬ guiˬ hkʼoˆ teˇ kaˬ le le lo hto toˇ chehˇ ve htaꞈ kaꞈ gʼa mawˬ ve yoˬ. Leh laiˉ lanˬ gʼaˇ Gʼuiˬ sha ve kanˉ hkʼaˇ hkʼaw chehˇ la ve htaꞈ ngaˬ hui gʼa mawˬ ve yoˬ. (Iˉsaˍyaˆ 60:22; Maꞈhtehˍ 24:14) Chi hkʼoˆ kaꞈ, ngaˬ hui co ha hpawˇ ve caˇ tuˬ “awˬ yanˇ cawˇ lehˍ” gʼa chehˇ ve yoˬ.—Maꞈhtehˍ 24:45-47.
2. Ngaˬ hui aˬ htoꞈ ma awˬ lawn htaꞈ yonˍ gʼa ve le? Leh ngaˬ hui aˬ htoꞈ ma htaꞈ gʼa haꞈ yuˬ cawˇ ve le?
2 Awˬ gʼuˇ suhˍ hpawˇ a yeˇ uiˍ jaˇ ve aˬ htoꞈ ma hpehꞈ la chehˇ ve htaꞈ ngaˬ hui hkʼa dehꞈ na gʼa tuˬ Yaˬhoˉvaˬ ga laˇ ve yoˬ. (Tawˇ naˉ ve 4:18; Daˍyeˍlaˆ 2:28) Tuꞈ jaˇ hkanˍ jaˇ ve tanˬ htaˇ, chi ve hkʼaw ngaˬ hui ka tiꞈ yeˬ ve hkʼaw yeunˇ hkanˍ gʼaˇ tuˬ leh awˬ viˉ awˬ nyi geh teˇ moˍ tiˉ hpehꞈ gʼa tuˬ, ngaˬ hui shiˍ cawˇ ve awˬ ceuˬ htaꞈ gʼa cawˬ cawˇ ve tehꞈ yonˍ gʼa ve yoˬ. Yaꞈ hkʼaˇ, awˬ gʼuˇ suhˍ hpawˇ ve htaꞈ caˉ daꞈ ve ngaˬ hui teˇ ceuˬ ceuˬ maˇ shiˍ gʼa ve tehꞈ haꞈ yuˬ cawˇ ve yoˬ. Awˬ gʼuˇ suhˍ hpawˇ ve awˬ heˆ teˇ hpaˍ htaꞈ caˉ daꞈ ve na gʼa ve awˬ suhˉ aˬ htoꞈ ma te kʼawꞈ pa ve awˬ lawn chi ve hkʼaw teˇ geh henˇ tuˬ yoˬ. Awˬ gʼuˇ suhˍ hpawˇ ve htaꞈ caˉ daꞈ ve ngaˬ hui shiˍ gʼa ve aˬ htoꞈ ma cawˬ ve leh Yaˬhoˉvaˬ te tuˬ ve awˬ ceuˬ htaꞈ caˉ daꞈ ve kaꞈ teˇ geh henˇ tuˬ yoˬ.
NGAˬ HUI MAˇ SHIˍ VE Aˬ HTOꞈ MA CAWˬ VE LE?
3. Yaˬhoˉvaˬ htaꞈ oˉ kʼoˍ maˇ pui ve chaw yawˇ maˇ ponˬ piˇ ve htaꞈ caˉ daꞈ ve, oˇ htaˇ ngaˬ hui hkʼaˬ hkʼe na gʼa jaw ve le? Leh aˬ htoꞈ ma te ngaˬ hui chi hkʼe kʼoˆ ve le?
3 Tuꞈ jaˇ hkanˍ jaˇ ve hkʼaˬ hkʼe htaˇ tanˬ ve kʼo, Yaˬhoˉvaˬ hpawˇ maˇ chehˇ ve chaw maˇ gʼa ponˬ leh Aˍmaˍgeˍdonˍ hkʼaw te luˬ tuˬ yoˬ tehꞈ oˇ htaˇ ngaˬ hui na gʼa jaw ve yoˬ. Ngaˬ hui chi hkʼe na gʼa ve lehˬ, miˬ guiˬ hkʼoˆ lo Noˉaꞈ ve awˬ co˗e htaˇ, iˉ kaˆ htonˍ ve htaꞈ ngaˬ hui dawˇ mawˬ ve pa taw yoˬ. Tawˇ pa haˉ te kʼo, miˬ guiˬ hkʼoˆ lo iˉ kaˆ maˇ htonˍ sheˍ htaˇ, Yaˬhoˉvaˬ haw loꞈ kʼoˍ lonˉ ve “yehˬ miˉ hoˆ piˇ ve” hkʼa shuˍ hpehꞈ ve tehꞈ ngaˬ hui dawˇ ve yoˬ. Tuꞈ jaˇ hkanˍ jaˇ ve tanˬ htaˇ, Saˍtanˍ ve awˬ yanˇ hkʼaw chehˇ ve haiˬ jaˇ ve chaw htaꞈ Yaˬhoˉvaˬ maˇ ponˬ piˇ tuˬ yoˬ. Chaw chi teˇ hpaˍ lehˬ gʼa ponˬ tuˬ awˬ hkʼaˇ maˇ cawˬ.—Maꞈhtehˍ 24:37-39.
4. Miˬ guiˬ hkʼoˆ lo iˉ kaˆ htonˍ htaˇ ve awˬ lawn htaꞈ pa taw, awˬ gʼuˇ suhˍ hpawˇ ve awˬ ceuˬ htaꞈ dawˇ mawˬ tuˬ te laˇ˗aw laˇ? Tawˇ pa haˉ kʼoˆ maˍ laˇ sheˍ.
4 Miˬ guiˬ hkʼoˆ lo iˉ kaˆ htonˍ htaˇ ve awˬ lawn htaꞈ pa taw, awˬ gʼuˇ suhˍ hpawˇ ve awˬ ceuˬ htaꞈ dawˇ mawˬ ve laˇ? Maˇ dawˇ mawˬ. Awˬ lawn kʼo, chi hkʼe ve Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˍ. a Chaw yaˇ ve Yaˇ hpu kʼawꞈ yaꞈ la tuˬ ve lehˬ, “Noˉaꞈ ve awˬ co˗e htaˇ” hkʼa shuˍ shuˍ hpehꞈ tuˬ yoˬ tehꞈ, Yeˍsuˆ tehˆ taˍ ve yoˬ. Yaꞈ hkʼaˇ, awˬ gʼuˇ suhˍ hpawˇ hpehꞈ la tuˬ ve teˇ ceuˬ ceuˬ Noˉaꞈ ve awˬ co˗e htaˇ, teˇ gʼaˇ leh teˇ gʼaˇ maˇ heˆ leh teˇ lawn leh teˇ lawn htaꞈ aˬ htoꞈ ma kʼoˆ gaˇ ve Yeˍsuˆ maˇ gʼa tehˆ daꞈ jaw. Tawˇ pa haˉ te kʼo, haw loꞈ kʼoˍ lonˉ ve yehˬ miˉ hoˆ ve awˬ lawn hpehꞈ ve yoˬ. Chi hkʼe hpehꞈ ve htawˇ, Noˉaꞈ ve awˬ lawn leh miˬ guiˬ hkʼoˆ lo iˉ kaˆ htonˍ ve ngaˬ hui htaꞈ laiˉ ceuˬ maˍ laˇ ve yoˬ.
5. (a) Miˬ guiˬ hkʼoˆ lo iˉ kaˆ maˇ htonˍ sheˍ htaˇ Noˉaꞈ aˬ htoꞈ ma te ve le? (Heˍbrehˇ 11:7; 1 Peˍtruˆ 3:20) (b) Noˉaꞈ bon maˍ ve leh chi beuꞈ teˇ co˗e ngaˬ hui hto toˇ ve hkʼaˬ hkʼe te shuˍ daꞈ ve le?
5 Yaˬhoˉvaˬ shaˍ tiꞈ piˇ ve htaꞈ Noˉaꞈ gʼa kaˇ htaˇ, yawˇ yonˍ ve tehꞈ hpeuꞈ maw laˇ ve lehˬ haw loꞈ kʼoˍ lonˉ te ve yoˬ. (Heˍbrehˇ 11:7; 1 Peˍtruˆ 3:20 gʼaw sheˍ.) Chi ve hkʼa shuˍ shuˍ, Gʼuiˬ sha ve mvuhˇ miˬ daꞈ ve awˬ lawn sha tanˇ gʼa kaˇ ve chaw kaꞈ yonˍ ve tehꞈ hpeuꞈ maw piˇ tuˬ, teˇ ceuˬ ceuˬ gʼa te ve yoˬ. (Tcuh yaˇ 3:17-20) Peˍtruˆ lehˬ Noˉaꞈ htaꞈ kʼoˆ ve, “hteˇ ve cawˇ ve awˬ lawn htaꞈ bon maˍ ve” yoˬ. (2 Peˍtruˆ 2:5) Yaꞈ hkʼaˇ, ponˬ taˉ ve teˇ lawn hkʼaw ngaˬ hui gʼa henˇ˗oˬ ve, Noˉaꞈ ve awˬ co˗e htaˇ teˇ gʼaˇ le le htaꞈ yawˇ bon gʼa maˍ piˇ˗oˬ ve le naˍ ngaˬ hui maˇ shiˍ gʼa. Chi beuꞈ teˇ co˗e daꞈ ve awˬ lawn sha tanˇ miˬ guiˬ chi hkʼoˆ lo teˇ gʼaˇ le le htaꞈ hkʼa dehꞈ maˍ piˇ gʼa tuˬ ngaˬ hui hto toˇ˗e ve yoˬ. Yaꞈ hkʼaˇ, ngaˬ hui hkʼaˬ hkʼe taw coˇ caˇ ve htawˇ, awˬ leh meuˇ ve awˬ yanˇ gaˬ la htaˇ hkʼa gaˬ, ngaˬ hui teˇ gʼaˇ le le htaꞈ hto maˍ piˇ maˇ gʼa. Aˬ htoꞈ ma te chi hkʼe hpehꞈ ve le?
6-7. Aˬ htoꞈ ma te awˬ leh meuˇ ve awˬ yanˇ maˇ gaˬ la sheˍ htaˇ, ngaˬ hui teˇ gʼaˇ le le htaꞈ daꞈ ve awˬ lawn sha tanˇ maˇ hto maˍ piˇ gʼa ve le? Tawˇ pa haˉ kʼoˆ maˍ laˇ sheˍ.
6 Yeˍsuˆ kʼoˆ ve, ngaˬ hui hkʼaˬ hkʼe taw taw gʼa hto toˇ kʼai cawˇ ve le? Yawˇ awˬ gʼuˇ suhˍ htaˇ kaꞈ kʼoˆ taˍ ve, “chaw ceuˬ hkʼa peu˗eˬ awˬ pon shaˉ hkiˆ hpehꞈ tuˬ, Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ.” (Maꞈhtehˍ 24:14) Tcuh kaˍ paˍ ve tawˇ hkawˇ chi teˇ co˗e peuˬ teˇ co˗e maˇ hpehꞈ la jaw sheˍ. Yaꞈ hkʼaˇ, chi teˇ hkui awˬ tehˬ hpehꞈ la chehˇ ve yoˬ. Miˬ guiˬ chi hkʼoˆ lo 1,000 chaw ceuˬ tawˇ hkawˇ hpaˆ daꞈ ve awˬ lawn sha tanˇ hto toˇ chehˇ leh Gʼuiˬ sha ve mvuhˇ miˬ daꞈ ve awˬ lawn sha tanˇ htaꞈ caˉ daꞈ ve miˬ guiˬ chi hkʼoˆ lo maˇ˗awˍ ve chaw vehˆsaiˉ jw. org hkʼaw henˇ gʼa ve yoˬ.
7 Chi hkʼe hpehꞈ ve htawˇ, Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve, “venˇ teˇ hpaˍ lo nawˬ hui ca toˇ maˇ zuhˇ sheˍ htaˇ” maˇ heˆ leh, chaw yaˇ teˇ gʼaˇ le le htaꞈ hto maˍ piˇ maˇ gʼa sheˍ htaˇ kaꞈ yawˇ laˬ tuˬ yoˬ. (Maꞈhtehˍ 10:23; 25:31-33) Yeˍsuˆ ve tawˇ hkawˇ chi ngaˬ hui ve awˬ co˗e htaˇ hpehꞈ ve yoˬ. Laiˉ mvuhˇ miˬ hkʼaw chehˇ ve laiˉ lanˬ gʼaˇ htaꞈ ngaˬ hui maˇ hto maˍ piˇ gʼa ve yoˬ. Chi hkʼoˆ kaꞈ, teˇ miꞈ niꞈ ve hkʼaw yaˇ ehˉ laiˉ ha gʼaˇ paw la ve yoˬ. Chi htaꞈ pa taw, ngaˬ hui coˇ caˇ jaˇ ve htawˇ, awˬ leh meuˇ ve awˬ yanˇ maˇ gaˬ la sheˍ htaˇ, “mvuhˇ miˬ teˇ peˆ le le htaꞈ maˇ kʼoˆ, awˬ ceuˬ awˬ hkʼaˇ teˇ ceuˬ le le htaꞈ maˇ kʼoˆ, tawˇ hkawˇ teˇ cehˬ le le htaꞈ maˇ kʼoˆ,” ngaˬ hui teˇ gʼaˇ le le htaꞈ daꞈ ve awˬ lawn sha tanˇ maˇ hto maˍ piˇ gʼa.—Hpeuꞈ maˍ ve 14:6.
8. Awˬ gʼuˇ suhˍ hpawˇ Yaˬhoˉvaˬ suhˉ jehˬ ve htaꞈ caˉ daꞈ ve ngaˬ hui aˬ htoꞈ ma ve na hkawˇ cawˬ la ve le? (Awˬ han htaꞈ nyi sheˍ.)
8 Chi htaꞈ pa taw, tuꞈ jaˇ hkanˍ jaˇ ve awˬ yanˇ maˇ tanˬ sheˍ htaˇ, daꞈ ve awˬ lawn sha tanˇ maˇ gʼa kaˇ sheˍ ve chaw htaꞈ hkʼaˬ hkʼe hpehꞈ la tuˬ le? Yaˬhoˉvaˬ lehˬ Yeˍsuˆ htaꞈ suhˉ jehˬ tuˬ awˬ vuiˬ piˇ leh yawˇ huiˉ maˬ lehˬ yawˇ hui htaꞈ hkʼaˬ hkʼe te piˇ tuˬ le? Na hkawˇ chi teˇ hpaˍ cawˬ la ve yoˬ. (Yoˇhanˬ 5:19, 22, 27; Tcuh yaˇ 17:31) Awˬ lawn chi hkʼaw a yeˇ uiˍ ve Liꞈ hpu awˬ tawn hkʼaw kʼoˆ ve, ‘Yaˬhoˉvaˬ chaw teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ ve yoˬ.’ (2 Peˍtruˆ 3:9; 1 Tiˆmoˉseˍ 2:4) Chaw chi teˇ hpaˍ htaꞈ Yaˬhoˉvaˬ hkʼaˬ hkʼe te piˇ tuˬ yawˇ maˇ kʼoˆ laˇ sheˍ ve htaꞈ ngaˬ hui gʼa haꞈ yuˬ cawˇ ve yoˬ. Yaˬhoˉvaˬ aˬ htoꞈ ma te˗oˬ ve, maˇ heˆ leh awˬ gʼuˇ suhˍ hpawˇ aˬ htoꞈ ma te tuˬ ve, yawˇ ngaˬ hui htaꞈ hkʼa peu˗eˬ kʼoˆ laˇ tuˬ maˇ loˍ.
Tuꞈ jaˇ hkanˍ jaˇ ve maˇ gaˬ sheˍ htaˇ, daꞈ ve awˬ lawn sha tanˇ maˇ gʼa kaˇ jaw ve chaw htaꞈ Yaˬhoˉvaˬ hkʼaˬ hkʼe te piˇ tuˬ le? (Awˬ tawn 8 nyi sheˍ) c
9. Yaˬhoˉvaˬ lehˬ ngaˬ hui shiˍ tuˬ Liꞈ hpu hkʼaw aˬ htoꞈ ma kʼoˆ laˇ ve le?
9 Yaˬhoˉvaˬ yawˇ aˬ htoꞈ ma te tuˬ Liꞈ hpu hkʼaw ngaˬ hui shiˍ tuˬ teˇ ceuˬ ceuˬ kʼoˆ maˍ laˇ taˍ ve yoˬ. Tawˇ pa haˉ te kʼo, “maˇ hteˇ ve chaw” daꞈ ve awˬ lawn sha tanˇ htaꞈ gʼa kaˇ tuˬ, leh te hkʼaˇ dawˇ hkʼaˇ pa tuˬ, yawˇ hui htaꞈ Yaˬhoˉvaˬ kʼawꞈ teꞈ tu la tcuh piˇ tuˬ yoˬ tehꞈ Liꞈ hpu hkʼaw kʼoˆ taˍ ve yoˬ. (Tcuh yaˇ 24:15; Luˉkaꞈ 23:42, 43) Chi lehˬ a yeˇ uiˍ ve na hkawˇ teˇ hpaˍ cawˬ tuˬ te laˇ ve yoˬ.
10. Aˬ htoꞈ ma ve na hkawˇ cawˬ la ve le?
10 Tuꞈ jaˇ hkanˍ jaˇ ve awˬ yanˇ htaˇ suh˗e ve chaw teˇ gʼaˇ le le lehˬ, co co taiˍ taiˍ te luˬ piˇ leh kʼawꞈ teꞈ lu la ve dawˇ law kuiˬ maˇ cawˬ˗o ve laˇ? Yaˬhoˉvaˬ htaꞈ tawˍ ve chaw, maˇ heˆ leh Yaˬhoˉvaˬ leh yawˇ ve maꞈ yaˇ Aˍmaˍgeˍdon ve awˬ nyi hkʼaw te luˬ piˇ ve chaw htaꞈ maˇ kʼawꞈ teꞈ la piˇ˗o ve tehꞈ, Liꞈ hpu hkʼaw hkʼa tawˍ lehˆ kʼoˆ laˇ taˍ ve yoˬ. (2 Hteˇsaˍlawˇniˆ 1:6-10) Yaꞈ hkʼaˇ, Tuꞈ jaˇ hkanˍ jaˇ ve awˬ yanˇ htaˇ, naˬ suh˗e ve, mawˇ suh˗e ve, maˇ dawˇ maˇ gaˇ ve hkʼaw suh˗e ve, maˇ heˆ leh shu tiˇ pehˍ piˇ ve chaw, chi teˇ hpaˍ kʼawꞈ teꞈ tu la tuˬ ve laˇ? (Cuˇ yiˍ piˇ ve 9:11; Zaˍhkaˍriˆ 14:13) Chaw chi teˇ hpaˍ miˬ guiˬ awˬ suhˉ hkʼaw “maˇ hteˇ ve chaw” awˬ moˍ hkʼaw kʼawꞈ teꞈ tu la piˇ tuˬ ve laˇ? Ngaˬ hui maˇ shiˍ.
NGAˬ HUI SHIˍ VE Aˬ HTOꞈ MA CAWˬ VE LE?
11. Aˍmaˍgeˍdonˍ ve awˬ nyi htaˇ chaw yaˇ htaꞈ suhˉ jehˬ piˇ tuˬ aˬ htoꞈ ma htaꞈ nyi ve le?
11 Awˬ gʼuˇ suhˍ hpawˇ hpehꞈ la tuˬ ve teˇ ceuˬ ceuˬ htaꞈ ngaˬ hui shiˍ gʼa ve yoˬ. Tawˇ pa haˉ te kʼo, chaw yaˇ Yeˍsuˆ ve awˬ viˉ awˬ nyi htaꞈ te piˇ ve awˬ ceuˬ htaꞈ nyi leh suhˉ jehˬ piˇ tuˬ yoˬ tehꞈ Aˍmaˍgeˍdonˍ ve awˬ nyi htaˇ, ngaˬ hui shiˍ gʼa ve yoˬ. (Maꞈhtehˍ 25:40) Leuˆ yuˬ taˍ ve chaw hpawˇ chehˇ ve chaw htaꞈ Yeˍsuˆ Hkriꞈ yawˇ hui htaꞈ yawˬ hpehꞈ ve tehꞈ suhˉ jehˬ cheˆ piˇ tuˬ yoˬ. Tuꞈ jaˇ hkanˍ jaˇ ve awˬ yanˇ tanˬ peuˬ hkʼawꞈ nawˉ, Yeˍsuˆ Hkriꞈ ve awˬ viˉ awˬ nyi teˇ hpaˍ miˬ guiˬ hkʼoˆ lo chehˇ sheˍ leh Aˍmaˍgeˍdonˍ maˇ gaˬ sheˍ htaˇ, mvuhˇ naw ma hkʼoˆ lo taˆ˗e tuˬ yoˬ tehꞈ ngaˬ hui shiˍ ve yoˬ. Chi kʼoˆ gaˇ ve lehˬ, nyi ma nuˇ nehˬ ve chaw teˇ hpaˍ Yeˍsuˆ ve awˬ viˉ awˬ nyi hpawˇ chehˇ leh yawˇ hui miˬ guiˬ hkʼoˆ lo chehˇ htaˇ kaꞈ Yeˍsuˆ ve kanˉ te chehˇ ve yoˬ. (Maꞈhtehˍ 25:31, 32; Hpeuꞈ maˍ ve 12:17) Aˬ htoꞈ ma te awˬ lawn chi a yeˇ uiˍ jaˇ ve le?
12-13. Chaw teˇ hpaˍ “Uiˍ ve Baˍbuˍlonˍ” te luˬ ve htaꞈ gʼa mawˬ htaˇ hkʼaˬ hkʼe kʼai le? (Awˬ han htaꞈ nyi sheˍ.)
12 Tuꞈ jaˇ hkanˍ jaˇ ve awˬ yanˇ tanˬ˗oˬ ve htawˇ, chaw teˇ hpaˍ “Uiˍ ve Baˍbuˍlonˍ” htaꞈ te luˬ ve gʼa mawˬ htaˇ, Yaˬhoˉvaˬ ve Shaˉhkiˆhkanˍ ve chaw kʼoˆ piˇ jaw ve htaꞈ dawˇ nawˇ la ve yoˬ. Chaw chi teˇ hpaˍ Yaˬhoˉvaˬ htaꞈ yonˍ la gʼa ve tehꞈ hpeuꞈ maw piˇ tuˬ hpehꞈ kʼai gʼa˗aw laˇ?—Hpeuꞈ maˍ ve 17:5; Yeˍsaˍkeˍlaˆ 33:33.
13 Awˬ lawn chi awˬ tehˬ hpehꞈ la gʼa ve kʼo, chi kaꞈ Moˉseˍ ve awˬ co˗e htaˇ hpehꞈ la ve htaꞈ maˇ peun daꞈ. Oˇ ve teˇ yanˇ Iˉsaˍreˍlaˆ chaw Eˇjiˇtuꞈ mvuhˇ miˬ lo tawˆ˗e htaˇ “awˬ nu ve chaw teˇ hpaˍ htawˇ” yawˇ hui geh kʼai ve yoˬ. Moˉseˍ kʼoˆ taˍ ve hkʼe kawˆ tuˬ uiˍ ve a naˍ 10 ceuˬ htaꞈ gʼa mawˬ peuˬ hkʼawꞈ nawˉ, chaw chi teˇ hpaˍ yonˍ ve cawˬ la ve yoˬ. (Tawˆ kʼai ve 12:38) Chaw yaˇ Uiˍ ve Baˍbuˍlonˍ htaꞈ te luˬ ve gʼa mawˬ htaˇ, yonˍ ve cawˬ la ve yoˬ. Chaw chi teˇ hpaˍ awˬ leh meuˇ gaˬ la yoˬ te htaˇ yonˍ hkʼaˇ cawˬ la ve kʼo, ngaˬ hui nyi ma luˬ leh maˇ hteˇ maˇ cawˇ tehꞈ dawˇ˗aw laˇ? Ngaˬ hui chi hkʼe maˇ dawˇ cawˇ. Ngaˬ hui htaꞈ haꞈ ve Awˬ pa ‘Gʼuiˬ sha lehˬ ha kʼaˉ puiˉ leh awˬ bon te piˇ puiˉ ve, nyi ma dawˇ zuhˬ gaˇ zuhˬ ve, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve yoˬ.’ b Chi ve htaꞈ ngaˬ hui henˇ yuˬ gaˇ ve yoˬ.—Tawˆ kʼai ve 34:6.
Chaw teˇ hpaˍ “Uiˍ ve Baˍbuˍlonˍ” htaꞈ te luˬ ve gʼa mawˬ htaˇ, Yaˬhoˉvaˬ ve Shaˉhkiˆhkanˍ ve chaw kʼoˆ piˇ jaw ve htaꞈ dawˇ nawˇ la ve (Awˬ tawn 12-13 nyi sheˍ) d
14-15. Awˬ gʼuˇ suhˍ hpawˇ teˇ gʼaˇ leh teˇ gʼaˇ co co taiˍ taiˍ ve a shaꞈ gʼa tuˬ dawˇ law kuiˬ lehˬ yawˇ hkʼaˬ hkʼe htaˇ suh˗e ve maˇ heˆ leh hkʼaˬ kaˬ lo chehˇ ve htaꞈ cawˬ ve laˇ? Tawˇ pa haˉ kʼoˆ maˍ laˇ sheˍ. (Chiˇ mvuh ve 33:4, 5)
14 Teˇ pawˆ pawˆ kʼo, awˬ viˉ awˬ nyi teˇ hpaˍ kʼoˆ ve, yawˇ hui ve awˬ viˉ awˬ nyi Shaˉhkiˆhkanˍ ve chaw maˇ hpehꞈ ve “tuꞈ jaˇ hkanˍ jaˇ ve maˇ tanˬ sheˍ htaˇ suh˗e ve kʼo daꞈ ve yoˬ. Yawˇ htaꞈ kʼawꞈ teꞈ tu la piˇ tuˬ yoˬ tehꞈ dawˇ ve yoˬ hehˉ.” Awˬ tehˬ kʼo yawˇ chi hkʼe dawˇ ve lehˬ yawˇ ve awˬ viˉ awˬ nyi htaꞈ dawˇ haˍ ve yoˬ. Yaꞈ hkʼaˇ, awˬ gʼuˇ suhˍ hpawˇ teˇ gʼaˇ leh teˇ gʼaˇ co co taiˍ taiˍ ve a shaꞈ gʼa tuˬ dawˇ law kuiˬ lehˬ, hkʼaˬ hkʼe htaˇ suh˗e ve htaꞈ cawˬ ve maˇ heˆ tehꞈ tawnˇ taˍ sheˍ. Yaˬhoˉvaˬ lehˬ biˇ jaˇ ve suhˉ jehˬ shehˍ hpaˇ hpehꞈ ve yoˬ. Yawˇ suhˉ jehˬ ve lehˬ hteˇ jaˇ cawˇ jaˇ ve yoˬ. (Chiˇ mvuh ve 33:4, 5 gʼaw sheˍ.) ‘Miˬ guiˬ hkʼoˆ ve suhˉ jehˬ shehˍ hpaˇ Gʼuiˬ sha hteˇ ve cawˇ ve hkʼaw ceh tiˉ suhˉ jehˬ ve’ tehꞈ ngaˬ hui yonˍ gʼa ve yoˬ.—Awˬ hkuiˉ puiˍ 18:25.
15 Ngaˬ hui kʼoˆ gʼa ve awˬ hkʼaˇ lehˬ, chaw teˇ gʼaˇ co co taiˍ taiˍ ve a shaꞈ gʼa tuˬ ve dawˇ law kuiˬ yawˇ hkʼaˬ kaˬ lo chehˇ ve htaꞈ cawˬ ve maˇ heˆ. Awˬ lawn kʼo, chaw laiˉ lanˬ gʼaˇ daꞈ ve awˬ lawn sha tanˇ maˇ gʼa kaˇ jaw kuiˬ mvuhˇ miˬ lo chehˇ ve pa taw, Yaˬhoˉvaˬ lehˬ yawˇ htaꞈ “aˉ cheꞈ” hpehꞈ ve tehꞈ dawˇ cheˆ piˇ tuˬ ve maˇ heˆ. (Maꞈhtehˍ 25:46) Miˬ guiˬ hkʼoˆ lo hteˇ ve cawˇ ve hkʼaw suhˉ jehˬ shehˍ hpaˇ Gʼuiˬ sha chaw chi teˇ hpaˍ htaꞈ dawˇ haˍ jaˇ ve yoˬ. Yaˬhoˉvaˬ lehˬ tuꞈ jaˇ hkanˍ jaˇ ve awˬ yanˇ hkʼaw aˬ htoꞈ ma hpehꞈ la tcuh tuˬ ve naˍ ngaˬ hui maˇ shiˍ. Chaw chi teˇ hpaˍ Yaˬhoˉvaˬ htaꞈ caˉ daꞈ ve henˇ tuˬ awˬ yanˇ cawˬ leh, yawˇ htaꞈ yonˍ ve tehꞈ hpeuꞈ maw piˇ tuˬ yoˬ hehˉ. Miˬ guiˬ hkʼoˆ lo ve chaw teˇ gʼaˇ le le htaꞈ Yaˬhoˉvaˬ ve awˬ meh shiˍ tuˬ te piˇ htaˇ, yawˇ hpawˇ chehˇ la tuˬ leuˆ ve yoˬ hehˉ.
Tuꞈ jaˇ hkanˍ jaˇ ve tanˬ htaˇ, chaw teˇ hpaˍ yawˇ hui awˬ heˆ mawˬ ve htaꞈ nyi ma pa tuˬ te piˇ˗aw laˇ?
16. Yaˬhoˉvaˬ htaꞈ caˉ daꞈ ve ngaˬ hui aˬ htoꞈ ma gʼa shiˍ ve le? (Awˬ han htaꞈ nyi sheˍ.)
16 Ngaˬ hui Liꞈ hpu henˇ htaˇ, Yaˬhoˉvaˬ lehˬ chaw yaˇ teˇ gʼaˇ le le ve a shaꞈ htaꞈ awˬ hpfuhˇ hkʼaˆ ve tehꞈ, shawˍ ve ngaˬ hui shiˍ la ve yoˬ. Ngaˬ hui teˇ gʼaˇ le le co co taiˍ taiˍ ve a shaꞈ gʼa tuˬ, yawˇ ve Yaˇ paˍ a shaꞈ tanˇ laˇ ve yoˬ. (Yoˇhanˬ 3:16) Yaˬhoˉvaˬ ngaˬ hui htaꞈ haꞈ ve, ha kʼaˉ laˇ ve, tehꞈ shiˍ gʼa ve yoˬ. (Iˉsaˍyaˆ 49:15) Yaˬhoˉvaˬ lehˬ ngaˬ hui teˇ gʼaˇ le le ve awˬ meh shiˍ ve yoˬ. Yaˬhoˉvaˬ lehˬ ngaˬ hui suh˗e ve kʼo, awˉ lawˉ htaˇ hkʼe kʼawꞈ teꞈ tu la tcuh laˇ leh teˇ ceuˬ le le htaꞈ tawnˇ gʼa tcuh laˇ ve yoˬ. (Maꞈhtehˍ 10:29-31) Chi htaꞈ pa taw, ngaˬ hui htaꞈ haꞈ ve Awˬ pa Yaˬhoˉvaˬ lehˬ, teˇ gʼaˇ le le htaꞈ cawˇ ve hkʼaw suhˉ jehˬ piˇ tuˬ yoˬ tehꞈ ngaˬ hui yonˍ gʼa ve yoˬ. Awˬ lawn kʼo, yawˇ cuˇ yiˍ cawˬ ve, hteˇ ve cawˇ ve, leh ha kʼaˉ puiˉ ve tehꞈ hpeuꞈ maw laˇ ve yoˬ.—Yaˍkoˆ 2:13.
Yaˬhoˉvaˬ teˇ gʼaˇ leh teˇ gʼaˇ htaꞈ suhˉ jehˬ piˇ ve lehˬ, cuˇ yiˍ cawˬ ve, hteˇ ve cawˇ ve, leh ha kʼaˉ puiˉ ve hpeuꞈ maw piˇ tuˬ tehꞈ ngaˬ hui yonˍ gʼa ve (Awˬ tawn 16 nyi sheˍ)
17. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?
17 Na gʼa ve awˬ suhˉ chi ve lehˬ, ngaˬ hui hto toˇ ve haˆ haˆ te cawˇ ve tehꞈ shiˍ tuˬ te laˇ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le? Leh ngaˬ hui kaiˬ ve hkʼaw hto toˇ tuˬ aˬ htoꞈ ma te laˇ ve le? Na hkawˇ chi teˇ hpaˍ htaꞈ hkʼawꞈ laˇ tuˬ, gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 76 Nawˬ hkʼaˬ hkʼe dawˇ ve le?
a Aˬ htoꞈ ma te awˬ lawn chi awˬ suhˉ kʼawꞈ pa ve kʼoˆ maˍ laˇ taˍ ve, Shaw nyi kuiˬ Taꞈ yehˬ Ha pa 3 maˬ 15 nyi 2015 hkʼawꞈ liꞈ mehˆ hpfuhˇ 7-11 hkʼaw “Yawˇ chi hkʼe te ve htaꞈ dawˇ cawˇ ve” htaꞈ nyi sheˍ. (Laˇhuˍ hkawˇ maˇ cawˬ.)
b Uiˍ ve Baˍbuˍlonˍ te luˬ peuˬ hkʼawꞈ nawˉ, Gawˇgaˆ leh Maˍgawˇgaˆ ca bawˆ la htaˇ, Yaˬhoˉvaˬ ve kanˉ te ve chaw teˇ gʼaˇ le le beˬ ve lawˇ ve gʼa hpuˇ tuˬ yoˬ. Uiˍ ve Baˍbuˍlonˍ te luˬ peuˬ hkʼawꞈ nawˉ, Yaˬhoˉvaˬ ve chaw geh pawnˇ daꞈ la ve chaw kaꞈ beˬ ve lawˇ ve gʼa hpuˇ tuˬ yoˬ.
c AWˬ HAN HTAꞈ KʼOˆ MAˍ TAˍ VE: Awˬ han chi ve 3 maˬ hkʼaw aˬ htoꞈ ma te chaw teˇ hpaˍ daꞈ ve awˬ lawn sha tanˇ maˇ gʼa kaˇ jaw ve hpeuꞈ maw laˇ ve: (1) Yaˇ miˇ teˇ gʼaˇ yawˇ ve mvuhˇ miˬ hkʼaw bon liˇ hehnˇ jaˇ ve pa taw, hto toˇ ve kawˆ tuˬ cawˬ ve pa taw, maˇ hto toˇ gʼa. (2) Awˬ hpawˇ awˬ miˇ ma teˇ ca ngaˬ hui ve kanˉ maˇ hto toˇ tcuh laˇ ve mvuhˇ miˬ hkʼaw chehˇ ve, leh a shu teˇ gʼaˇ hto toˇ ve kʼo kawˆ tuˬ cawˬ ve, (3) hawˉ hkʼaˆ teˇ gʼaˇ vuiˇ jaˇ kuiˬ lo chehˇ leh yawˇ chehˇ kuiˬ lo hto toˇ˗e gʼa tuˬ haˍ jaˇ.
d AWˬ HAN HTAꞈ KʼOˆ MAˍ TAˍ VE: Yaˇ miˇ haˉ teˇ gʼaˇ Shaˉhkiˆhkanˍ ve chaw hpehꞈ jaw ve “Uiˍ ve Baˍbuˍlonˍ” htaꞈ te luˬ tuˬ yoˬ tehꞈ Liꞈ hpu hkʼaw kʼoˆ taˍ ve htaꞈ tawnˇ gʼa ve. Yawˇ venˇ baˆ dawˇ hpfuhˆ leh awˬ pa awˬ e Shaˉhkiˆhkanˍ ve chaw hpehꞈ ve geh kʼoꞈ˗e ve. Ngaˬ hui chi hkʼe mawˬ ve kʼo, Yaˬhoˉvaˬ hkʼa shuˍ ngaˬ hui kaꞈ shu htaꞈ ha kʼaˉ piˇ gaˇ leh venˇ baˆ yaˇ yawˇ geh kʼawꞈ la ve htaꞈ ha lehˬ jaˇ.
