MURU OFUNJEDHA 19
NYUMBO 22 Ufumu Umene Ukulamulira Ubwere
N’nga ninoidhiwan’ni vamwasa oonga mwemo Yohova munofuna liye dhatongela atu sogolou?
“Yohova . . . kanofuna ira mutu uliwethene adhanongiwe.” —2 PE. 3:9.
VINOFUNA I-YO FUNJEDHA
Yofunjedha yei inonikami-a ira ninororomelenga vyoi Yohova unodha tonga atu mwalongomano.
1. Mwasiwa ngwan’ni ninooda onga ira va-eeni ninokala muhora yosangalali-a?
NINOKALA muhora yosangalali-a maningi. Dambo nlilothene ninoona maulosi a Bibilyani takwakwaneli-edhiwanga. Mofwanafwani-a, ninoona “mwene wa norte” na “mwene wa suli” takanganelanga utongi. (Dan. 11:40) Ninoona milanyu yapama ilaleeliwanga vailambo yothene yavathi thitho atu mamiliyau manjinji tasakulanga m’labela Nlungu. (Esa. 60:22; Mat. 24:14) Ninowachela thitho yodya yauzimu yoinjiva “vahora yofwanelela.”—Mat. 24:45-47.
2. N’nga ninooda kala osikimizelan’ni? N’nga ninofwanela zindiyelan’ni?
2 Yohova unaadhowanave nikami-a ira nivwecheche pama vyongo vyofuneeleya vyevyo vinofuna dhaireya vo-odembuwava. (San. 4:18; Dan. 2:28) Kaninokaikela ira nyarwa ilukulu yadharoma, ninodha kala ningamadhi idhiwa vyongo vyothene vyofuneeleya ira nidhakaleve ororomeleya vahora yoruchila. Mbwenye ninofwanela zindiyela ira vatokala vyongo vinango vyoonga vyasogolo vyevyo vya-anoviidhiwa i-yo. Muyofunjedha yei, yoroma ninotapanyani mwasee uchinjele i-yo moda mwaongela i-yo vyongo vinango mwavyongo vyevi. Namala ninotapanyani vyongo vinoidhiwa i-yo vyevyo vinofuna dhaireya sogolou na mwemo Babi-u wadhulu Yohova munofuna liye dhairela vyongo.
VYONGO VYA-ANOIDHIWA I-YO
3. N’nga voroma naonga ira Yohova unodha i-ya e-lini velela ngari waatu ira takale uikhunduyee, n’nga mwasiwa ngwan’ni nanoonga vyevi?
3 Voromavene naongecha ira nyarwa ilukulu yadharoma, atu katinodha kaana ngari yoi tarome m’roromela Yohova ira tadhavulumuwe va Arumagedo. Nanoonga vyongo vyevi namwasa oi nathuulela ira yongo iliyothene yokuza igumula, yaimelela yongo inango muhori-uila. Mofwanafwani-a, nathuulela ira ninga mwemo Yohova mwafungele liye suwo wa mwadiya igumula ya-anarome, va nyarwa ilukulu unodha funga thitho “suwo” venango ira kanodha rumeli-a ira mutu uliwethene wa muilambo ya Satanila adharome m’labela.—Mat. 24:37-39.
4. N’nga va-eeni ninoona ira mwasa oonga vya igumula unoimelela yongo inagwee? Muongemo.
4 N’nga nionenga ira yongo iliyothene ya muhora ya igumula ya Nowa, yanooimelela vyongo vinangovyee? Yowakula choi kabe kinoimelela yongo inangoyee. Mwasiwa ngwan’ni ninoonga ee-no? Namwasa oi kavali malemba anoonga vyevyo. a Pyaimbarimbari ira Yesu atoofwanafwani-edha “malambo a Nowa” na vyoireya vya malambo omari-a. Mbwenye kaathonyi-edha ira yongo iliyothene yaireile muhora ya Nowa, ninga fungiwa wa suwo wa mwadiya watokaana yothapulela. Mbwenye vyevi kavinothapulela ira kaninooda funjedhavo yongo vamwasa oonga vya igumula ya muhora ya Nowa.
5. (a) N’nga Nowa airilen’ni igumula ya-anaireye? (Aebere 11:7; 1 Pedru 3:20) (b) Vamwasa olaleela, n’nga vyoireya vya malamboano vinolandana a-vi na muhora ya Nowa?
5 Nowa angavwide milanyu yowenjeli-a ya Yohova, atoothonyi-edha ira atokaana iroromelo vosaka-edha mwadiya. (Muleri Aebere 11:7; 1 Pedru 3:20.) Mofwanafwana na vyevi, atu enao anovwa milanyu yapama ya Umwene wa Nlungu anofwanela a-relanga vinofunjedha aliwa. (May. 3:17-20) Pedru atoonga ira Nowa “anoolaleela vya longomano la Nlungu.” (2 Pe. 2:5) Mbwenye ninga muonele i-yo muyofunjedha ivirile, kaninoidhiwa akala liye atoodhilimbi-edha laleela wa mutu uliwethene vailambo yavathi igumula ya-anaireye. Malamboano thitho ninolaba basa yolaleela mwathindhi yeniyo inoireya vailambo yothene yavathi. Mbwenye masiki nivilimbi-edhe moi a-vi, kaninaode wandela mutu uliwethene milanyu yapama komoni wa ilambo yothakala ya Satanila wa-anafiye. Mwasiwa ngwan’ni ninoonga ee-no?
6-7. Mwasiwa ngwan’ni kai vyoodeya wandela mutu uliwethene milanyu yapama komoni wa-anafiye? Muongemo.
6 Kathuulelani vyongo vyaongile Yesu vyokuza basa yolaleela. Yesu atoongelatu ira milanyu yapama inodha laleeliwa “vailambo yothene yavathi weo uli atu ira ukale umboni waatu amaziza othene.” (Mat. 24:14) Malamboano ulosula unaakwakwaneli-edhiwa maningi kwaranya ndulimu. Milanyu ya Umwene inolaleeliwa muviongelo vyokwaranya 1.000 thitho saiti-u ya jw.org inaakami-a atu anjinji vailambo yothene yavathi ira tavwe milanyu yapama.
7 Yesu atoowandela anamafunjedhee ira katinodha “rungunuwa masidadi othene” venango ira laleela wa mutu uliwethene liye a-anadhe dhatonga atu. (Mat. 10:23; 25:31-33) Madhu a Yeswala anaakwakwaneli-edhiwa thitho malamboano. Atu anjinji anokala muvilalambo mwemo munokondi-iwa basa li-u. Naa-ima anjinji enao anobaliwa mumaminutu aliothene. Ninoira yongo iliyothene inaode i-yo ira nilaleele waatu “amaziza othene, iongelo iliyothene na tundu uliwethene.” (Apk. 14:6) Mbwenye imbarimbari choi kaninaode wandela mutu uliwethene milanyu yapama komoni wa ilamboi wa-anafiye.
8. N’nga ninooda kaana yofuka iivi vamwasa wa mwemo Yohova munatongele liye atu sogolou? (Muone thitho viruthiruthi.)
8 Kumela vavyongo vitapanyileni i-yovi, venango munooda kaana vyofuka vyoi: N’nga a-vi vyaatu enao ta-ana ngari yovwa milanyu yapama nyarwa ilukulu yadharoma? N’nga Yohova na Mwanee wenuo um’va-idhe liye izo yotonga, unodha atonga moi a-vi? (Ju. 5:19, 22, 27; May. 17:31) Lemba li-indiwile muyofunjedha yei linoonga ira Yohova “kanofuna ira mutu uliwethene adhanongiwe.” Malomwee unofuna “ira atu othene tachinyuwe.” (2 Pe. 3:9; 1 Ti. 2:4) Ee-no ninofwanela idhiwa ira Yohova kaniwandenle vyongo vyothene vinofuna liye dhairana, vamwasa otonga atu ta-avwide milanyu yapama. Thitho kanofuneela niwandela vyongo viirile liye na vyongo vinofuna liye dhairana sogolou.
N’nga Yohova unodhairan’ni naatu enao ta-ana ngari yovwa milanyu yapama nyarwa ilukulu ya-anarome? (Muone ndima 8) c
9. N’nga Yohova uniwandele vyongo viivi dhela M’madhwee Bibilyani?
9 Dhela mumadhwee, Yohova utoniwandela vyongo vinango vinofuna liye dhaira sogolou. Mofwanafwani-a, Bibilya linoniwandela ira Yohova unodha venyathi-a “atu o-olongomana” enao ta-ana ngari yovwa milanyu yapama ira tachinje vyoira viwa. (May. 24:15; Luk. 23:42, 43) Mbwenye vyevi vinoiri-a ira atu enango takaengana vyofuka vinango.
10. N’nga ndi vyofuka viivi vinakaena i-yo?
10 N’nga atu othene anofuna dhakwa va nyarwa ilukulu katinodha kaana idedi-edho yodha venyathi-iwa? Malemba anoonga movweya pama ira atu oruni-a anofuna dhaphiwa na Yohova na gurupulee lakondo va Arumagedo, katinodha venyathi-iwa. (2 At. 1:6-10) N’nga a-vi vyaatu anofuna dhakwa namwasa oulula, marenda, ngovi venango phiwa naatu afwiwa? (Nam. 9:11; Zka. 14:13) N’nga enango mwaatwala anodha kala mugurupu “laatu o-olongomana” anofuna dhavenyathi-iwa muilambo ipya? Kaninoidhiwa.
VYONGO VINOIDHIWA I-YO
11. N’nga vakhondo ya Arumagedo atu anodha tongiwa votukulelan’ni?
11 Nitoidhiwa vyongo vinjinji vinofuna dhaireya sogolou. Mofwanafwani-a, ninoidhiwa ira va Arumagedo, atu anodha tongiwa votukulela mwemo mwairela aliwa vyongo na abalee a Kristu. (Mat. 25:40) Atu anofuna dhatongiwa ira ndi mabila, mbenao akami-a ozoziwa thitho Kristu. Ninoidhiwa ira enango mwaabalee a Kristu anodha kala vailamboi fiyedha nyarwa ilukulu yadharoma thitho anodha tukuliwa dhowa dhulu kondo ya Arumagedo ya-ala vang’ono ira iireye. Vahora abalee a Yeswala vili aliwa vailambo yavathila, pyooneelatu ira atu ana mirima yapama tatokaana ngari yokami-a basa inolaba aliwa. (Mat. 25:31, 32; Apk. 12:17) Mwasiwa ngwan’ni idhiwa vyongo vyevi kofuneya maningi?
12-13. N’nga atu enango anodha iran’ni tadhaona ira “Babulo Nlukulu” utonongiwa? (Muone thitho viruthiruthi.)
12 Nyarwa ilukulu yadharoma, pyooneelatu ira atu enango enao anofuna dhaona nongiwa wa “Babulo Nlukulu,” anodha thuulelanga ira Amboni dha Yohova tatoonganga vyongo vyevi. N’nga atu anofuna dhaona vyongo vyevi anodha chinja mirimiwa?—Apk. 17:5; Zak. 33:33.
13 Vyevi vinodha kala vyolandana na vyaireile wu Iguputu muhora ya Mose. Muthuulele ira “gurupu laatu amaziza o-iyana i-yana” tatookuma wu Iguputu vambo-i na Aisraeli. Pyooneelatu ira enango mwaatu enala tatooroma m’roromela Yohova tangaoni vyongo vyawenjeli-idhe Mose vyoonga misau 10 viireyanga. (Eki. 12:38) N’nga vyongo vyevi vyadhaireyanga Babulo Nlukulu angamadhi nongiwa, ninodha sukwala voona ira atu atoroma m’labela Nlungu unga-adhi hora yoyeva ira komoni ufiye? Kabe. Ninofuna m’sazi-edha Babi-u wadhulu wenuo “uli wa tangaranga na oriya rima, o-onyanyuwa mombaranya, waudhivela ulukulu, ororomeleya na waimbarimbari.” b—Eki. 34:6.
Atu enango enao anofuna dhaona nongiwa wa “Babulo Nlukuu,” anodha thuulela ira a Mboni dha Yohova tatoonganga vyongo vyevi (Muone ndima 12-13) d
14-15. N’nga venyathi-iwa wa mutu unonyindela ira ukwide e-lini venango akalecha wani? Muongemo. (Salimo 33:4, 5)
14 Hora dhinango ninovwecha atu enango taonganga ira, “vingakanle pama balanga akwe nyarwa ilukulu ya-anarome ira akaena idedi-edho yodha venyathi-iwa.” Venango aliwa anoonga vyevi tangana vifunelo vyapama. Mbwenye venyathi-iwa waatu kunonyindela ira ukwide hora iivi. Yohova ngunamatonga olongomana thitho hora dhothene unotonga molongomana. (Muleri Salimo 33:4, 5.) Ee-no ninooda kala osikimizela ira “Namatonga wa ilambo yothene yavathi” unodha irana vyongo mofwanelela.—Mar. 18:25.
15 Pyovweya thitho onga ira venyathi-iwa wa mutu ira akaena ingumi yo-omala, kavinonyindela weo unokala liye. Pyo-ovweya ira Yohova unodha tonga atu anjinji ira ndi “mbudi” namwasa oi takalecha muilambo yoi katana ngari yovwa milanyu yapama ya Umwene wa Nlungu. (Mat. 25:46) Namatonga olongomana wa ilambo yothene, unoathuulela maningi atu enala kwaranya i-yo. Kaninoidhiwa mwemo Yohova munairele liye vyongo vahora ya nyarwa ilukulu. Pyooneelatu ira enango mwaatu enala anodha kaana ngari yofunjedha vyoonga Yohova, m’roromela thitho roma m’labela vahora inofuna liye dhacheni-anga dhinalee.—Zak. 38:16.
N’nga nyarwa ilukulu yadharoma . . . atu anofuna dhaona vyoireyavyo vahora yeniyo, anodha chinja mathuulelwiwa?
16. N’nga ndi vyongo viivi vinoidhiwa i-yo vyokuza Yohova? (Muone thitho iruthiruthi.)
16 Funjedha Bibilya utonikami-a idhiwa ira Yohova unoana atu kala apereso yavadhulu. Yohova atoovelela ingumi ya Mwanee ira i-yo othene nidhakaena ingumi yokalao modhowa nodhowa. (Ju. 3:16) Yohova unonidhiveliwana maningi i-yo othene. (Esa. 49:15) Yohova unoidhiwa dhina la mutu uliwethene vaekene. Thitho unoniidhiwa pama masiki nakwa, unodha nivenyathi-a namwasa oi unoidhiwa yongo iliyothene yokuza i-yo. (Mat. 10:29-31) Ee-no nitokaana myasa yovweya yororomela ira Babi-u waudhivela unodha tonga mutu uliwethene mwalongomano namwasa oi liye ngwazelu, olongomana thitho wa tangaranga.—Yak. 2:13.
Ninooda kala osikimizela ira Yohova unodha tonga mutu uliwethene mwalongomano namwasa oi liye ngwazelu, olongomana thitho wa tangaranga (Muone ndima 16)
17. N’nga ninodha tapanyan’ni muyofunjedha yo-arela?
17 Voi va-eeni nitovwechecha pama makundo enala, nionenga ira basi-u yolaleela chofuneya labiwa mombaranya kwaranya ndulimu. Mwasiwa ngwan’ni ninoonga ee-no? N’nga chini inanilimbi-e ira nilaleelenga milanyu yapama mwathindhi? Ninodha tapanyani vyowakula vya vyofuka vyevi muyofunjedha yo-arela.
NYUMBO 76 Kodi Mumamva Bwanji?
a Ira muidhiwe mwasiwa ngwan’ni vatokala machinjo, muone mwasa wa muru oi “Munavomereza Kuti Zimenezi Zichitike,” mu Nsanja ya Olonda ya 15 wa Março wa 2015 thakuru 7 fiyedha 11.
b Babulo Nlukulu adhanongiwa, arumiwi othene a Yohova anodha wesedhiwa vodhimbinueliwa na Gogi wa Magogi. Mutu uliwethene unofuna dhasakula kala uikhundu ya atu a Nlungu vasogolo vonongiwa wa Babulo Nlukulu, unodha thitho wesedhiwa.
c MADHU OONGA VYA IRUTHIRUTHI Yavathakuru 9: Vyongo vyevi vinothonyi-edha ira atu enango katinodha kaana ngari yovwa milanyu inolaleeliwa vailambo yothene: (1) M’ma unokala muilambo yeniyo muli religiau nlukulu lelo linoimwanani-a atu uvwa milanyu inolaleela i-yo, (2) Banja linokala muilambo mwemo munoireya vyongo vya ndale vinoiri-a ira funjedha vyoonga Yohova ukale okondi-iwa thitho oopi-a maningi, (3) Baba unokala uilambo yorucha fiyao.
d MADHU AIRUTHIRUTHI: Sikana wenuo a-iidhe imbarimbari athuulelanga vyafunjedhile liye vyoonga nongiwa wa “Babulo Nlukulu.” Liye atoochinja mathuulelo nowelela wa anamabalee enao ali Amboni. Vyongo vyolandana na vyevi vyadhaireya ni-arelenga Babi-u wadhulu wenuo uli watangaranga na oriya rima nosangalalanga ira mutu odawa utochinyuwa.
