ບົດຄວາມສຶກສາທີ 19
ເພງທີ 22 ລັດຖະບານຂອງພະເຈົ້າກໍ່ຕັ້ງແລ້ວ—ຂໍໃຫ້ມາເຖີດ!
ເຮົາຮູ້ຫຍັງແດ່ກ່ຽວກັບການຕັດສິນຂອງພະເຢໂຫວາໃນອະນາຄົດ?
“ພະເຢໂຫວາ . . . ບໍ່ຢາກໃຫ້ຜູ້ໃດຕ້ອງຖືກທຳລາຍ.”—2ປຕ. 3:9
ຈຸດສຳຄັນ
ເຮົາໝັ້ນໃຈໄດ້ວ່າການຕັດສິນຂອງພະເຢໂຫວາໃນອະນາຄົດຈະຖືກຕ້ອງແລະຍຸຕິທຳ.
1. ເປັນຫຍັງຈຶ່ງເວົ້າວ່າເຮົາກຳລັງມີຊີວິດຢູ່ໃນເວລາທີ່ໜ້າຕື່ນເຕັ້ນແທ້ໆ?
ເຮົາກຳລັງມີຊີວິດຢູ່ໃນເວລາທີ່ໜ້າຕື່ນເຕັ້ນແທ້ໆ! ໃນແຕ່ລະມື້ເຮົາໄດ້ເຫັນຄຳພະຍາກອນໃນຄຳພີໄບເບິນເກີດຂຶ້ນແທ້. ຕົວຢ່າງເຊັ່ນ: ເຮົາໄດ້ເຫັນ “ກະສັດທິດເໜືອ” ແລະ “ກະສັດທິດໃຕ້” ກຳລັງຍາດກັນປົກຄອງໂລກ. (ດນອ. 11:40) ເຮົາໄດ້ເຫັນການປະກາດຂ່າວດີເລື່ອງການປົກຄອງຂອງພະເຈົ້າກຳລັງແຜ່ຂະຫຍາຍໄປທົ່ວໂລກແລະຫຼາຍລ້ານຄົນໄດ້ເຂົ້າມານະມັດສະການພະເຢໂຫວາ. (ອຊຢ. 60:22; ມທ. 24:14) ນອກຈາກນັ້ນ ເຮົາຍັງໄດ້ຮັບອາຫານທີ່ເສີມຄວາມເຊື່ອຢ່າງຫຼວງຫຼາຍ “ຕາມເວລາທີ່ເໝາະສົມ.”—ມທ. 24:45-47
2. ເຮົາໝັ້ນໃຈໄດ້ໃນເລື່ອງໃດ ແຕ່ເຮົາຕ້ອງຍອມຮັບຫຍັງ?
2 ພະເຢໂຫວາຍັງຊ່ວຍເຮົາໃຫ້ເຂົ້າໃຈແຈ້ງຂຶ້ນເລື້ອຍໆວ່າຈະມີເຫດການສຳຄັນຫຍັງແດ່ເກີດຂຶ້ນໃນອະນາຄົດ. (ສພສ. 4:18; ດນອ. 2:28) ເຮົາໝັ້ນໃຈວ່າເມື່ອຄວາມທຸກລຳບາກຄັ້ງໃຫຍ່ເລີ່ມຕົ້ນ ເຮົາຈະໄດ້ຮູ້ສິ່ງທີ່ເຮົາຈຳເປັນຕ້ອງຮູ້ເພື່ອຈະອົດທົນຢ່າງສັດຊື່ແລະຍັງເປັນນ້ຳໜຶ່ງໃຈດຽວກັນກັບພີ່ນ້ອງຕໍ່ໆໄປ. ແຕ່ເຮົາຕ້ອງຍອມຮັບວ່າມີບາງຢ່າງທີ່ເຮົາບໍ່ຮູ້ກ່ຽວກັບອະນາຄົດ. ໃນບົດນີ້ ເຮົາຈະເບິ່ງວ່າເປັນຫຍັງເຮົາຈຶ່ງປັບປ່ຽນຄວາມເຂົ້າໃຈກ່ຽວກັບບາງເຫດການໃນອະນາຄົດ. ຈາກນັ້ນ ເຮົາຈະເບິ່ງວ່າມີຫຍັງແດ່ທີ່ເຮົາຮູ້ກ່ຽວກັບອະນາຄົດແລະສິ່ງທີ່ພະເຢໂຫວາຈະເຮັດ.
ມີຫຍັງແດ່ທີ່ເຮົາບໍ່ຮູ້
3. ເຮົາເຄີຍເວົ້າແນວໃດກ່ຽວກັບຄົນທີ່ບໍ່ເຊື່ອໃນພະເຢໂຫວາເມື່ອຄວາມທຸກລຳບາກຄັ້ງໃຫຍ່ເລີ່ມຕົ້ນ? ແລະເປັນຫຍັງເຮົາຈຶ່ງເວົ້າແບບນັ້ນ?
3 ແຕ່ກີ້ເຮົາເຂົ້າໃຈວ່າເມື່ອຄວາມທຸກລຳບາກຄັ້ງໃຫຍ່ເລີ່ມຕົ້ນ ຄົນທີ່ບໍ່ເຊື່ອໃນພະເຢໂຫວາຈະບໍ່ມີໂອກາດໄດ້ສະແດງຄວາມເຊື່ອໃນເພິ່ນ ແລະຈະຖືກທຳລາຍໃນສົງຄາມອາມາເຄໂດນ. ເຮົາເວົ້າແບບນັ້ນຍ້ອນເຮົາຄິດວ່າແຕ່ລະຄົນແລະແຕ່ລະເຫດການໃນສະໄໝນ້ຳຖ້ວມໂລກໝາຍເຖິງບາງຢ່າງທີ່ຈະເກີດຂຶ້ນໃນອະນາຄົດ. ຕົວຢ່າງເຊັ່ນ: ເຮົາຄິດວ່າຄືກັບທີ່ພະເຢໂຫວາປິດປະຕູເຮືອໃຫຍ່ຕອນນ້ຳຖ້ວມໂລກ ເພິ່ນກໍຈະປິດໂອກາດຄົນໃນໂລກຊົ່ວຂອງຊາຕານເມື່ອຄວາມທຸກລຳບາກຄັ້ງໃຫຍ່ເລີ່ມຕົ້ນ ຄົນເຫຼົ່ານັ້ນຈະບໍ່ມີໃຜລອດ.—ມທ. 24:37-39
4. ຖືກບໍທີ່ຈະເວົ້າວ່າສິ່ງທີ່ເກີດຂຶ້ນໃນສະໄໝນ້ຳຖ້ວມໂລກໝາຍເຖິງບາງຢ່າງທີ່ຈະເກີດຂຶ້ນໃນອະນາຄົດ? ຂໍໃຫ້ອະທິບາຍ.
4 ຖືກບໍທີ່ຈະເວົ້າວ່າສິ່ງທີ່ເກີດຂຶ້ນໃນສະໄໝນ້ຳຖ້ວມໂລກໝາຍເຖິງບາງຢ່າງທີ່ຈະເກີດຂຶ້ນໃນອະນາຄົດ? ບໍ່ຖືກ. ຍ້ອນບໍ່ມີບ່ອນໃດໃນຄຳພີໄບເບິນເວົ້າແບບນັ້ນ. a ກະແມ່ນຢູ່ທີ່ພະເຢຊູສົມທຽບ “ສະໄໝຂອງໂນອາ” ວ່າຄືກັບການມາຂອງເພິ່ນ. ແຕ່ພະເຢຊູບໍ່ເຄີຍສົມທຽບວ່າແຕ່ລະຄົນຫຼືແຕ່ລະເຫດການໃນສະໄໝຂອງໂນອາໝາຍເຖິງບາງຢ່າງທີ່ຈະເກີດຂຶ້ນໃນອະນາຄົດ ເຊັ່ນ ເລື່ອງທີ່ພະເຢໂຫວາປິດປະຕູເຮືອໃຫຍ່. ເຖິງຈະເປັນແນວນັ້ນ ເຮົາກໍໄດ້ບົດຮຽນຫຼາຍຢ່າງຈາກເລື່ອງຂອງໂນອາແລະເລື່ອງນ້ຳຖ້ວມໂລກ.
5. (ກ) ໂນອາໄດ້ເຮັດຫຍັງກ່ອນນ້ຳຖ້ວມໂລກ? (ເຮັບເຣີ 11:7; 1 ເປໂຕ 3:20) (ຂ) ວຽກປະກາດຂອງໂນອາກັບວຽກປະກາດຂອງເຮົາໃນທຸກມື້ນີ້ຄ້າຍຄືກັນແນວໃດ?
5 ຕອນທີ່ໂນອາໄດ້ຍິນຄຳເຕືອນຈາກພະເຢໂຫວາ ລາວສະແດງຄວາມເຊື່ອໂດຍສ້າງເຮືອໃຫຍ່. (ອ່ານເຮັບເຣີ 11:7; 1 ເປໂຕ 3:20) ຄ້າຍຄືກັນ ຄົນທີ່ໄດ້ຍິນຂ່າວດີເລື່ອງການປົກຄອງຂອງພະເຈົ້າກໍຕ້ອງສະແດງຄວາມເຊື່ອໂດຍເຮັດຕາມສິ່ງທີ່ເຂົາເຈົ້າໄດ້ຮຽນ. (ກຈກ. 3:17-20) ເປໂຕເອີ້ນໂນອາວ່າ: “ຜູ້ປະກາດແນວທາງທີ່ຖືກຕ້ອງ.” (2ປຕ. 2:5) ເຖິງວ່າໂນອາພະຍາຍາມເຕັມທີທີ່ຈະປະກາດ ແຕ່ຄືກັບທີ່ເຮົາໄດ້ຮຽນໃນບົດກ່ອນ ຄຳພີໄບເບິນບໍ່ໄດ້ບອກວ່າລາວສາມາດປະກາດກັບທຸກຄົນໃນໂລກກ່ອນນ້ຳຖ້ວມໂລກ. ໃນທຸກມື້ນີ້ ເຮົາກໍພະຍາຍາມເຕັມທີທີ່ຈະປະກາດກັບທຸກຄົນຢູ່ທົ່ວໂລກ ແຕ່ບໍ່ວ່າເຮົາຈະພະຍາຍາມຫຼາຍສ່ຳໃດ ເຮົາກໍບໍ່ສາມາດປະກາດກັບທຸກຄົນໃນໂລກໄດ້ກ່ອນຈຸດຈົບຈະມາຮອດ. ເປັນຫຍັງຈຶ່ງເປັນແບບນັ້ນ?
6-7. ເປັນຫຍັງເຮົາບໍ່ສາມາດປະກາດຂ່າວດີໃຫ້ຄົບທຸກຄົນໄດ້ກ່ອນຈຸດຈົບຈະມາຮອດ?
6 ໃຫ້ຄິດເຖິງສິ່ງທີ່ພະເຢຊູເວົ້າກ່ຽວກັບຂອບເຂດຂອງການປະກາດ. ເພິ່ນບອກລ່ວງໜ້າວ່າ: “ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ ເພື່ອໃຫ້ຄົນທຸກຊາດມີໂອກາດໄດ້ຍິນ.” (ມທ. 24:14) ຄຳພະຍາກອນນີ້ກຳລັງເກີດຂຶ້ນແທ້ໃນທຸກມື້ນີ້ໃນແບບທີ່ບໍ່ເຄີຍເກີດຂຶ້ນມາກ່ອນ. ພວກເຮົາປະກາດຂ່າວດີໄປທົ່ວໂລກໃນຫຼາຍກວ່າ 1.000 ພາສາ ແລະໂດຍທາງເວັບໄຊ jw.org ຄົນສ່ວນຫຼາຍໃນໂລກສາມາດຮຽນຮູ້ກ່ຽວກັບຂ່າວດີນີ້ໄດ້.
7 ເຖິງຈະເປັນແນວນັ້ນ ພະເຢຊູບອກພວກລູກສິດຂອງເພິ່ນວ່າ ເຂົາເຈົ້າຈະ “ປະກາດບໍ່ທັນຄົບທຸກເມືອງ” ຫຼືປະກາດບໍ່ຄົບທຸກຄົນກ່ອນທີ່ເພິ່ນຈະມາ. (ມທ. 10:23; 25:31-33) ຄຳເວົ້າຂອງພະເຢຊູຈະເກີດຂຶ້ນແທ້ໃນສະໄໝຂອງເຮົາຄືກັນ. ໃນທຸກມື້ນີ້ຫຼາຍລ້ານຄົນຢູ່ໃນປະເທດທີ່ເຮົາບໍ່ສາມາດປະກາດໄດ້ຢ່າງເສລີ. ນອກຈາກນັ້ນ ໃນທຸກໆນາທີມີຫຼາຍຮ້ອຍຄົນເກີດມາ. ສະນັ້ນ ເຮົາບໍ່ສາມາດປະກາດກັບທຸກຄົນໃນໂລກໄດ້ກ່ອນຈຸດຈົບຈະມາຮອດ ເຖິງວ່າເຮົາຈະພະຍາຍາມສຸດຄວາມສາມາດທີ່ຈະປະກາດກັບຄົນ “ທຸກປະເທດ ທຸກຕະກູນ [ແລະ] ທຸກພາສາ.”—ພນມ. 14:6
8. ເຮົາອາດສົງໄສເລື່ອງຫຍັງກ່ຽວກັບການຕັດສິນຂອງພະເຢໂຫວາໃນອະນາຄົດ? (ເບິ່ງຮູບນຳ)
8 ຕາມທີ່ເຮົາຫາກໍໄດ້ເບິ່ງໃນຂໍ້ 7 ເຮົາອາດສົງໄສວ່າ: ‘ພະເຢໂຫວາແລະພະເຢຊູຜູ້ທີ່ເພິ່ນເລືອກໃຫ້ຕັດສິນຈະເຮັດແນວໃດກັບຄົນທີ່ອາດຈະບໍ່ມີໂອກາດໄດ້ຍິນຂ່າວດີກ່ອນຄວາມທຸກລຳບາກຄັ້ງໃຫຍ່ເລີ່ມຕົ້ນ?’ (ຢຮ. 5:19, 22, 27; ກຈກ. 17:31) ຂໍ້ຄຳພີຫຼັກໃນບົດນີ້ບອກວ່າ ພະເຢໂຫວາ “ບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.” (2ປຕ. 3:9; 1ຕມ. 2:4) ເຖິງວ່າເຮົາຮູ້ແລ້ວວ່າພະເຢໂຫວາຢາກໃຫ້ເປັນແບບນີ້ ແຕ່ເພິ່ນຍັງບໍ່ທັນບອກໃຫ້ເຮົາຮູ້ວ່າເພິ່ນຈະເຮັດແນວໃດກັບຄົນທີ່ຍັງບໍ່ມີໂອກາດໄດ້ຍິນຂ່າວດີ. ເພິ່ນບໍ່ຈຳເປັນຕ້ອງບອກໃຫ້ເຮົາຮູ້ທຸກຢ່າງວ່າເພິ່ນໄດ້ເຮັດຫຍັງແດ່ແລ້ວຫຼືຈະເຮັດຫຍັງໃນອະນາຄົດ.
ພະເຢໂຫວາຈະເຮັດແນວໃດກັບຄົນທີ່ອາດຈະບໍ່ມີໂອກາດໄດ້ຍິນຂ່າວດີກ່ອນຄວາມທຸກລຳບາກຄັ້ງໃຫຍ່ເລີ່ມຕົ້ນ? (ເບິ່ງຂໍ້ 8) c
9. ໃນຄຳພີໄບເບິນ ພະເຢໂຫວາບອກໃຫ້ເຮົາຮູ້ຫຍັງ?
9 ໃນຄຳພີໄບເບິນ ພະເຢໂຫວາບອກໃຫ້ເຮົາຮູ້ບາງຢ່າງກ່ຽວກັບສິ່ງທີ່ເພິ່ນຈະເຮັດ. ຕົວຢ່າງເຊັ່ນ: ຄຳພີໄບເບິນບອກວ່າພະເຢໂຫວາຈະປຸກ “ຄົນຊົ່ວ” ໃຫ້ຄືນມາຈາກຕາຍເພື່ອເຂົາເຈົ້າຈະມີໂອກາດໄດ້ຮຽນຮູ້ເລື່ອງຂ່າວດີແລະປ່ຽນແປງໂຕເອງ. (ກຈກ. 24:15; ລກ. 23:42, 43) ຍ້ອນແນວນີ້ຈຶ່ງມີຄຳຖາມສຳຄັນອື່ນໆຕື່ມອີກ.
10. ມີຄຳຖາມຫຍັງຕື່ມອີກ?
10 ທຸກຄົນທີ່ຕາຍໃນໄລຍະຄວາມທຸກລຳບາກຄັ້ງໃຫຍ່ຈະຖືກທຳລາຍຕະຫຼອດໄປແລະບໍ່ມີຄວາມຫວັງທີ່ຈະຖືກປຸກໃຫ້ຄືນມາຈາກຕາຍບໍ? ຄຳພີໄບເບິນບອກຢ່າງຈະແຈ້ງວ່າຄົນທີ່ຕັ້ງໃຈຕໍ່ຕ້ານພະເຢໂຫວາແລະຄົນທີ່ພະເຢໂຫວາກັບກອງທັບຂອງເພິ່ນທຳລາຍໃນສົງຄາມອາມາເຄໂດນຈະບໍ່ຖືກປຸກໃຫ້ຄືນມາຈາກຕາຍ. (2ທຊ. 1:6-10) ແຕ່ບາງຄົນທີ່ຕາຍໃນໄລຍະຄວາມທຸກລຳບາກຄັ້ງໃຫຍ່ ເຊັ່ນ: ຕາຍຍ້ອນເຈັບປ່ວຍ ຍ້ອນເຖົ້າແກ່ ຍ້ອນອຸບັດຕິເຫດ ຫຼືຍ້ອນຖືກຂ້າ. (ປຍຈ. 9:11; ຊຄຢ. 14:13) ຄົນເຫຼົ່ານີ້ຢູ່ໃນກຸ່ມ “ຄົນຊົ່ວ” ທີ່ຈະຖືກປຸກໃຫ້ຄືນມາຈາກຕາຍໃນໂລກໃໝ່ບໍ? ເຮົາບໍ່ຮູ້.
ມີຫຍັງແດ່ທີ່ເຮົາຮູ້
11. ໃນສົງຄາມອາມາເຄໂດນ ຄົນຈະຖືກຕັດສິນໂດຍເບິ່ງຈາກຫຍັງ?
11 ເຮົາຮູ້ບາງຢ່າງທີ່ຈະເກີດຂຶ້ນໃນອະນາຄົດ ເຊັ່ນ ເຮົາຮູ້ວ່າພະເຢຊູຈະຕັດສິນວ່າໃຜເປັນແກະຫຼືເປັນແບ້ໂດຍເບິ່ງຈາກສິ່ງທີ່ເຂົາເຈົ້າເຮັດຕໍ່ພີ່ນ້ອງຂອງເພິ່ນ. (ມທ. 25:40) ຄົນທີ່ສະໜັບສະໜູນຜູ້ຖືກເລືອກແລະພະເຢຊູຈະຖືກຕັດສິນວ່າເປັນແກະ. ເຮົາຫຍັງຮູ້ອີກວ່າຫຼັງຈາກຄວາມທຸກລຳບາກຄັ້ງໃຫຍ່ເລີ່ມຕົ້ນ ພີ່ນ້ອງຂອງພະຄລິດບາງຄົນຈະຍັງຢູ່ໃນໂລກນີ້ແລະຈະຂຶ້ນໄປສະຫວັນບໍ່ດົນກ່ອນຈະເກີດສົງຄາມອາມາເຄໂດນ. ນີ້ໝາຍຄວາມວ່າເປັນໄປໄດ້ທີ່ບາງຄົນເຊິ່ງມີຫົວໃຈທີ່ດີຈະມີໂອກາດສະໜັບສະໜູນພີ່ນ້ອງຂອງພະຄລິດແລະວຽກທີ່ເຂົາເຈົ້າເຮັດຕອນຢູ່ໂລກນີ້. (ມທ. 25:31, 32; ພນມ. 12:17) ເປັນຫຍັງເລື່ອງນີ້ຈຶ່ງສຳຄັນ?
12-13. ບາງຄົນອາດເຮັດແນວໃດຫຼັງຈາກທີ່ເຫັນ “ບາບີໂລນໃຫຍ່” ຖືກທຳລາຍ? (ເບິ່ງຮູບນຳ)
12 ເຖິງວ່າຄວາມທຸກລຳບາກຄັ້ງໃຫຍ່ເລີ່ມຕົ້ນແລ້ວ ອາດມີບາງຄົນທີ່ເຫັນ “ບາບີໂລນໃຫຍ່” ຖືກທຳລາຍຈະຄິດເຖິງສິ່ງທີ່ພະຍານພະເຢໂຫວາເຄີຍເວົ້າມາດົນແລ້ວ. ຄົນເຫຼົ່ານີ້ອາດປ່ຽນແປງໂຕເອງແລະເຂົ້າມານະມັດສະການພະເຢໂຫວານຳກັນກັບຄົນຂອງເພິ່ນກໍໄດ້.—ພນມ. 17:5; ອຊກ. 33:33
13 ຖ້າເປັນແບບນັ້ນ ມັນກໍຈະຄ້າຍຄືກັບສິ່ງທີ່ເກີດຂຶ້ນຢູ່ເອຢິບໃນສະໄໝຂອງໂມເຊ. ໃນຕອນນັ້ນ “ມີຄົນຕ່າງຊາດກຸ່ມໃຫຍ່” ໄປກັບພວກອິດສະຣາເອນຕອນທີ່ອອກຈາກເອຢິບ. (ອພຍ. 12:38) ເຂົາເຈົ້າບາງຄົນອາດຫາກໍເລີ່ມມີຄວາມເຊື່ອໃນພະເຢໂຫວາຫຼັງຈາກທີ່ໄດ້ເຫັນໄພພິບັດ 10 ຢ່າງເກີດຂຶ້ນແທ້ຕາມທີ່ໂມເຊບອກ. ຖ້າເລື່ອງຄ້າຍໆກັນນີ້ເກີດຂຶ້ນຫຼັງຈາກທີ່ຄົນເຫັນ “ບາບີໂລນໃຫຍ່” ຖືກທຳລາຍ ເຮົາຄວນຜິດຫວັງແລະຮູ້ສຶກວ່າບໍ່ຍຸຕິທຳບໍທີ່ຄົນເຫຼົ່ານີ້ໄດ້ເຂົ້າມານະມັດສະການພະເຢໂຫວາບໍ່ດົນກ່ອນຈຸດຈົບຈະມາຮອດ ແລ້ວມີໂອກາດເຂົ້າໄປໃນໂລກໃໝ່? ເຮົາບໍ່ຄວນຄິດແບບນັ້ນ! ເຮົາຢາກຮຽນແບບພະເຢໂຫວາພໍ່ຂອງເຮົາທີ່ຢູ່ໃນສະຫວັນທີ່ເປັນ “ພະເຈົ້າທີ່ມີຄວາມເມດຕາ ໃຈດີ ບໍ່ໃຈຮ້າຍງ່າຍ ມີຄວາມຮັກທີ່ໝັ້ນຄົງຫຼາຍທີ່ສຸດ ແລະເວົ້າແຕ່ຄວາມຈິງ.” b—ອພຍ. 34:6
ບາງຄົນທີ່ເຫັນ “ບາບີໂລນໃຫຍ່” ຖືກທຳລາຍຈະຄິດເຖິງສິ່ງທີ່ພະຍານພະເຢໂຫວາເຄີຍເວົ້າມາດົນແລ້ວກ່ຽວກັບເລື່ອງນີ້ (ເບິ່ງຂໍ້ 12-13) d
14-15. ຄວາມຫວັງໃນອະນາຄົດຂອງຜູ້ໃດຜູ້ໜຶ່ງທີ່ຈະມີຊີວິດຕະຫຼອດໄປຂຶ້ນກັບວ່າລາວຕາຍຕອນໃດຫຼືລາວຢູ່ໃສບໍ? ຂໍໃຫ້ອະທິບາຍ. (ເພງສັນລະເສີນ 33:4, 5)
14 ບາງເທື່ອເຮົາອາດໄດ້ຍິນພີ່ນ້ອງບາງຄົນເວົ້າເຖິງຍາດຕິພີ່ນ້ອງຫຼືຄົນໃນຄອບຄົວທີ່ບໍ່ໄດ້ເປັນພະຍານພະເຢໂຫວາວ່າ: “ຖ້າລາວຕາຍກ່ອນຄວາມທຸກລຳບາກຄັ້ງໃຫຍ່ເລີ່ມຕົ້ນກະຄືຊິດີກວ່າ ລາວຈຶ່ງຊິມີໂອກາດຖືກປຸກໃຫ້ຄືນມາຈາກຕາຍ.” ພີ່ນ້ອງເວົ້າແບບນີ້ກໍຍ້ອນເປັນຫ່ວງຜູ້ນັ້ນ. ແຕ່ຂໍໃຫ້ຈື່ໄວ້ວ່າຄວາມຫວັງໃນອະນາຄົດຂອງຜູ້ໃດຜູ້ໜຶ່ງທີ່ຈະມີຊີວິດຕະຫຼອດໄປບໍ່ໄດ້ຂຶ້ນກັບວ່າລາວຕາຍຕອນໃດ. ພະເຢໂຫວາເປັນຜູ້ຕັດສິນທີ່ດີທີ່ສຸດ ເພິ່ນຈະຕັດສິນຢ່າງຖືກຕ້ອງແລະຍຸຕິທຳ. (ອ່ານເພງສັນລະເສີນ 33:4, 5) ເຮົາໝັ້ນໃຈໄດ້ວ່າ “ຜູ້ຕັດສິນທົ່ວໂລກ” ຈະເຮັດສິ່ງທີ່ຖືກຕ້ອງສະເໝີ.—ປຖກ. 18:25
15 ມີເຫດຜົນຄືກັນທີ່ຈະເວົ້າວ່າຄວາມຫວັງໃນອະນາຄົດຂອງຜູ້ໃດຜູ້ໜຶ່ງທີ່ຈະມີຊີວິດຕະຫຼອດໄປບໍ່ໄດ້ຂຶ້ນກັບວ່າລາວຢູ່ໃສ. ພະເຢໂຫວາຈະບໍ່ມີທາງຕັດສິນຄົນຫຼາຍລ້ານວ່າເປັນແບ້ຍ້ອນເຂົາເຈົ້າຢູ່ໃນປະເທດທີ່ບໍ່ມີໂອກາດໄດ້ຮູ້ຈັກຂ່າວດີ. (ມທ. 25:46) ຜູ້ຕັດສິນທົ່ວໂລກທີ່ຍຸຕິທຳເປັນຫ່ວງຄົນເຫຼົ່ານີ້ຫຼາຍກວ່າເຮົາອີກ. ເຮົາບໍ່ຮູ້ວ່າໃນໄລຍະຄວາມທຸກລຳບາກຄັ້ງໃຫຍ່ພະເຢໂຫວາຈະໃຫ້ມີເຫດການຫຍັງເກີດຂຶ້ນ. ບາງເທື່ອຄົນເຫຼົ່ານີ້ອາດມີໂອກາດໄດ້ຮຽນຮູ້ກ່ຽວກັບພະເຢໂຫວາ ສະແດງຄວາມເຊື່ອໃນເພິ່ນ ແລະເລືອກຢູ່ຝ່າຍພະເຢໂຫວາຕອນທີ່ເພິ່ນເຮັດໃຫ້ທຸກຄົນໃນໂລກຮູ້ຈັກຊື່ຂອງເພິ່ນ.—ອຊກ. 38:16
ຫຼັງຈາກຄວາມທຸກລຳບາກຄັ້ງໃຫຍ່ເລີ່ມຕົ້ນແລ້ວ ເປັນໄປໄດ້ບໍທີ່ບາງຄົນຈະສະແດງຄວາມເຊື່ອໃນພະເຢໂຫວາ?
16. ເຮົາໄດ້ຮູ້ຫຍັງກ່ຽວກັບພະເຢໂຫວາ? (ເບິ່ງຮູບນຳ)
16 ເມື່ອເຮົາຮຽນຄຳພີໄບເບິນ ເຮົາກໍໄດ້ຮູ້ວ່າພະເຢໂຫວາເຫັນວ່າມະນຸດທຸກຄົນມີຄ່າຫຼາຍແທ້ໆສຳລັບເພິ່ນ. ເພິ່ນຈຶ່ງໃຫ້ລູກຊາຍມາຕາຍເປັນຄ່າໄຖ່ເພື່ອພວກເຮົາທຸກຄົນຈະມີໂອກາດມີຊີວິດຕະຫຼອດໄປ. (ຢຮ. 3:16) ພວກເຮົາທຸກຄົນຮູ້ສຶກໄດ້ເຖິງຄວາມຮັກຂອງພະເຢໂຫວາທີ່ມີຕໍ່ເຮົາ. (ອຊຢ. 49:15) ພະເຢໂຫວາຮູ້ຈັກຊື່ຂອງເຮົາແຕ່ລະຄົນ. ທີ່ຈິງ ເພິ່ນຮູ້ຈັກເຮົາດີແທ້ໆເຖິງຂັ້ນວ່າຖ້າເຮົາຕາຍ ເພິ່ນກໍສາມາດປຸກເຮົາໃຫ້ຄືນມາເປັນຄົນເກົ່າທີ່ມີຄວາມຊົງຈຳແບບເກົ່າ ຍ້ອນເພິ່ນຈື່ລາຍລະອຽດທຸກຢ່າງກ່ຽວກັບໂຕເຮົາໄດ້! (ມທ. 10:29-31) ດັ່ງນັ້ນ ເຮົາໝັ້ນໃຈໄດ້ວ່າພະເຢໂຫວາພໍ່ຂອງເຮົາທີ່ຢູ່ໃນສະຫວັນຈະຕັດສິນແຕ່ລະຄົນຢ່າງຖືກຕ້ອງຍ້ອນເພິ່ນສະຫຼາດ ຍຸຕິທຳ ແລະມີຄວາມເມດຕາ.—ຢກບ. 2:13
ເຮົາໝັ້ນໃຈໄດ້ວ່າພະເຢໂຫວາຈະຕັດສິນແຕ່ລະຄົນຢ່າງຖືກຕ້ອງຍ້ອນເພິ່ນສະຫຼາດ ຍຸຕິທຳ ແລະມີຄວາມເມດຕາ (ເບິ່ງຂໍ້ 16)
17. ເຮົາຈະຮຽນຫຍັງໃນບົດຕໍ່ໄປ?
17 ການປັບປ່ຽນຄວາມເຂົ້າໃຈໃໝ່ນີ້ແຮ່ງເຮັດໃຫ້ເຮົາເຫັນວ່າວຽກປະກາດເປັນວຽກທີ່ດ່ວນຫຼາຍກວ່າທີ່ຜ່ານມາ. ເປັນຫຍັງຈຶ່ງເວົ້າແບບນັ້ນ? ແລະສິ່ງໃດກະຕຸ້ນເຮົາໃຫ້ປະກາດຂ່າວດີຢ່າງກະຕືລືລົ້ນຕໍ່ໆໄປ? ເຮົາຈະຕອບຄຳຖາມເຫຼົ່ານີ້ໃນບົດຕໍ່ໄປ.
ເພງທີ 76 ເຈົ້າຮູ້ສຶກແນວໃດ?
a ສຳລັບຄຳອະທິບາຍວ່າເປັນຫຍັງຈຶ່ງມີການປັບປ່ຽນໃນເລື່ອງນີ້ ເບິ່ງບົດຄວາມ “ພະອົງພໍໃຈທີ່ເຮັດແບບນັ້ນ” ໃນຫໍສັງເກດການ 15 ມີນາ 2015 ໜ້າ 7-11. (ພາສາໄທ)
b ຫຼັງຈາກບາບີໂລນໃຫຍ່ຖືກທຳລາຍ ຜູ້ຮັບໃຊ້ຂອງພະເຢໂຫວາທຸກຄົນຈະຖືກທົດສອບຕອນທີ່ໂຄກແຫ່ງມາໂຄກມາໂຈມຕີ. ຜູ້ໃດກໍຕາມທີ່ເຂົ້າມານະມັດສະການພະເຢໂຫວານຳກັນກັບຄົນຂອງເພິ່ນຫຼັງຈາກບາບີໂລນໃຫຍ່ຖືກທຳລາຍກໍຈະຖືກທົດສອບຄືກັນ.
c ຄຳອະທິບາຍຮູບ: ສາມຮູບນີ້ສະແດງໃຫ້ເຫັນວ່າເປັນຫຍັງວຽກປະກາດຂອງເຮົາຢູ່ທົ່ວໂລກອາດຈະເຂົ້າເຖິງບາງຄົນບໍ່ໄດ້. (1) ຜູ້ຍິງຄົນໜຶ່ງຢູ່ໃນປະເທດທີ່ສາສະໜາປະຈຳຊາດບໍ່ແມ່ນສາສະໜາຄລິດສະຕຽນ ມັນຈຶ່ງບໍ່ປອດໄພທີ່ພະຍານພະເຢໂຫວາຈະປະກາດຢູ່ຫັ້ນ (2) ຜົວເມຍຄູ່ໜຶ່ງຢູ່ໃນປະເທດທີ່ລັດຖະບານຫ້າມວຽກປະກາດຂອງພະຍານພະເຢໂຫວາ ແລະຖ້າປະກາດກໍຈະເປັນອັນຕະລາຍ (3) ຜູ້ຊາຍຄົນໜຶ່ງຢູ່ໃນເຂດທີ່ຫ່າງໄກແລະບໍ່ສາມາດເຂົ້າເຖິງໄດ້.
d ຄຳອະທິບາຍຮູບ: ໄວລຸ້ນຜູ້ຍິງຄົນໜຶ່ງທີ່ອອກຈາກຄວາມຈິງຈື່ສິ່ງທີ່ລາວໄດ້ຮຽນໃນຄຳພີໄບເບິນທີ່ວ່າ “ບາບີໂລນໃຫຍ່” ຈະຖືກທຳລາຍ. ລາວຈຶ່ງຕັດສິນໃຈກັບມາຫາພະເຢໂຫວາແລະພໍ່ແມ່ທີ່ເປັນພະຍານ. ຖ້າເລື່ອງແບບນີ້ເກີດຂຶ້ນ ເຮົາຢາກສະແດງຄວາມເມດຕາແລະຄວາມເຫັນອົກເຫັນໃຈຄືກັບພະເຢໂຫວາແລະດີໃຈທີ່ຄົນທີ່ເຮັດຜິດກັບຄືນມາ.
