1. Ki kabakalañi halukona kubulela kuli lupila mwa linako zetabisa luli?

 LUPILA mwa linako zetabisa luli! Zazi ni zazi luiponela bupolofita bwa mwa Bibele habunze butalelezwa. Ka mutala, lwaiponela “mulena wa kwa mutulo” ni “mulena wa kwa mboela” habanze balwanisana kuli babe ni maata a kubusa lifasi. (Dan. 11:​40, litaluso ze kwatasi) Lwaiponela taba yende ya Mubuso wa Mulimu inze ikutazwa hahulu kufita kwamulaho, mi batu babañata basweli baamuhela taba yeo. (Isa. 60:22; Mat. 24:14) Mi lusweli kufiwa lico za kwa moya zeñata “ka nako yeswanela.”—Mat. 24:​45-47.

2. Ki buikolwiso mañi bolukona kuba ni bona, kono luswanela kuhupulañi?

² Jehova uzwelapili kulutusa kuutwisisa hande likezahalo za butokwa zetuha liezahala. (Liprov. 4:18; Dan. 2:28) Lwakona kukolwa kuli pili ñalelwa yetuna isika kalisa kale, lukaziba lika kaufela zelutokwa kuziba kuli luzwelepili kuitiisa ka busepahali ni kuzwelapili kuswalisana ka nako yetaata yeo. Nihakulicwalo, luswanela kuhupula kuli kunani lika zeñwi zelusa zibi ka za lika zekaezahala kwapili. Mwa taba ye, lukakala ka kunyakisisa libaka halucincize kutwisiso yaluna ka za zeñwi za likezahalo zeo. Hasamulaho, lukanyakisisa lika zeñwi zeluziba ka za lika zekaezahala kwapili ni zakaeza Ndataa luna wa kwa lihalimu.

 ZELUSA ZIBI

3. Neluutwisisa kuli Jehova ukatuhela lili kufa batu kolo ya kuli baswalisane ni luna, mi ki kabakalañi hane lunahana cwalo?

³ Kwamulaho, nelulumela kuli ñalelwa yetuna haika kalisa, batu babasa lapeli Jehova habana kuba ni kolo ya kuunga muhato wa kuba kwa lineku lahae ni kupunyuha Armagedoni. Nelubile ni kutwisiso yeo bakeñisa kuli nelunahana kuli likande lelibulela za Muunda neli bupolofita bone busupa kwa nto yeñwi. Ka mutala, nelunahana kuli sina feela Jehova hanaakwalile sikwalo sa aleka pili Muunda usika taha kale, ukakwala sikwalo ka mubulelelo wa swanisezo kwa makalelo a ñalelwa yetuna, ilikuli kusike kwaba ni batu babañwi hape mwa lifasi la Satani babaka piliswa.—Mat. 24:​37-39.

4. Ki kabakalañi halutuhezi kunahana kuli likande lelibulela za Muunda ki bupolofita bobusupa kwa nto yeñwi? Mutaluse.

⁴ Kana lwaswanela kuunga likande lelibulela za Muunda sina bupolofita bobusupa kwa nto yeñwi? Batili. Kabakalañi? Kakuli Bibele haibuleli cwalo. a Jesu naabapanyize nako ya kubateñi kwahae kwa “mazazi a Nuwe,” kono naasatalusi kuli likande lelibulela za Muunda neli bupolofita bone busupa kwa nto yeñwi, ni kuli batu kaufela ni likezahalo kaufela neliyemela nto yeñwi; mi naasika bulela kuli kukwaliwa kwa sikwalo sa aleka neli bupolofita bobuyemela nto yeñwi ya butokwa yeneka talelezwa kwapili. Nihakulicwalo, taba yeo  haitalusi kuli hakuna zelukona kuituta kwa likande lelibulela za Nuwe ni za Muunda.

5. (a) Ki lika mañi zanaaezize Nuwe pili Muunda usika taha kale? (Maheberu 11:7; 1 Pitrosi 3:20) (b) Musebezi wa kukutaza wanaaezize Nuwe, uswana cwañi ni musebezi olusweli kueza kacenu?

⁵ Nuwe hanaautwile lushango lwa Jehova lwa temuso, naabonisize kuli naanani tumelo ka kuyaha aleka. (Mubale Maheberu 11:7; 1 Pitrosi 3:20.) Ka nzila yeswana, batu habautwa taba yende ya Mubuso wa Mulimu baswanela kusebelisa zebaituta. (Lik. 3:​17-20) Pitrosi naabulezi kuli Nuwe naali “mukutazi wa kuluka.” (2 Pit. 2:5) Kono sina molunyakisiselize mwa taba yefelile, haluzibi haiba Nuwe naalikile kukutaza kwa batu kaufela bane bapila fa lifasi pili Muunda usika taha kale. Kacenu, lueza musebezi wa kukutaza oezwa mwa lifasi kaufela mi luueza ka kutukufalelwa. Niteñi, kusina taba ni buikatazo bolukona kueza, halukoni kukutaza taba yende kwa batu kaufela fa lifasi pili mafelelezo asika taha kale. Kabakalañi?

6-7. Ki kabakalañi halukona kubulela kuli haluna kukona kukutaza taba yende kwa batu kaufela fa lifasi pili mafelelezo asika taha kale? Mutaluse.

⁶ Halunyakisiseñi zanaabulezi Jesu ka za musebezi waluna wa kukutaza. Naapolofitile kuli taba yende ya Mubuso ikakutazwa “mwa lifasi kaufela kuli ibe bupaki kwa macaba kaufela.” (Mat. 24:14) Bupolofita bo busweli kutalelezwa hahulu kacenu kufita kwamulaho. Lushango lwa Mubuso lufumaneha mwa lipuo zefitelela 1,000, mi kabakala webusaiti yaluna ya jw.org, batu babañata mwa lifasi kacenu bakona kuituta ka za taba yende ya Mubuso wa Mulimu.

⁷ Kono Jesu hape naabulelezi balutiwa bahae kuli nebasike bakona “kupotela mileneñi kaufela,” kamba kukutaza kwa batu kaufela, pili asika taha kale. (Mat. 10:23; 25:​31-33) Manzwi anaabulezi Jesu akatalelezwa ni mwa linako zaluna. Batu babañata kacenu bapila mwa libaka molusa koni kukutaza ka kulukuluha. Kutuha fo, zazi ni zazi limbututu zeñata lisweli zaapepiwa. Lueza molukonela kaufela kukutaza taba yende “kwa macaba kaufela ni mishobo ni malimi.” (Sin. 14:6) Kono niti kikuli, haluna kukona kukutaza taba yende ku mañi ni mañi fa lifasi pili mafelelezo asika taha kale.

8. Ki puzo mañi yelukona kuipuza ka za mwakaatulela batu kwapili Jehova? (Mubone ni maswaniso.)

⁸ Kacwalo, lukona kuipuza kuli: Ki lika mañi zekaezahala kwa batu ili bao mwendi habana kuba ni kolo ya kuutwa taba yende pili ñalelwa yetuna isika kalisa kale? Jehova ni Mwanaa hae, yena yafilwe musebezi wa kuatula, baka baatula cwañi? (Joa. 5:​19, 22, 27; Lik. 17:31) Liñolo foitomile taba ye, libulela kuli Jehova “hatabeli kuli mutu ufi kamba ufi atimezwe.” Kono utabela kuli “batu kaufela babake.” (2 Pit. 3:9; 1 Tim. 2:4) Kusina taba kuli lwaziba litaba zeo ka za Jehova, haasika lupatululela kale mwakaatulela batu babasike baba ni kolo ya kuutwa taba yende. Kono niti kikuli, haasika tameha kulutaluseza lika kaufela zaezize kamba zakaeza.

9. Ki lika mañi zalupatululezi Jehova mwa Bibele?

⁹ Mwa Linzwi lahae, Jehova ulupatululezi lika zeñwi zakaeza. Ka mutala, Bibele ilutaluseza kuli Jehova ukazusa batu “babasika luka,” ili batu bane basikaba ni kolo ya kuutwa taba yende ni kucinca mupilelo wabona. (Lik. 24:15; Luka 23:​42, 43) Taba yeo izusa lipuzo zeñwi za butokwa.

10. Ki lipuzo mañi zeñwi zelukona kuipuza?

¹⁰ Kana batu kaufela babaka shwa ka nako ya ñalelwa yetuna bakayundiswa kuya kuile mi habana kuzusiwa? Mañolo abulela ka kuutwahala kuli batu babalwanisa hahulu  Jehova, ili babaka bulaiwa ki yena ni mpi yahae fa Armagedoni, habana kuzusiwa. (2 Mates. 1:​6-10) Kono kucwañi ka za batu babaka shwa kabakala likezahalo za ka taho, likozi, kamba babaka bulaiwa ki batu babañwi? (Muek. 9:11; Zak. 14:13) Kana babañwi kwa batu bao bakazusiwa mwa lifasi lelinca ka nako ya zuho ya batu “babasika luka”? Haluzibi.

ZELUZIBA

11. Batu bakaatulwa cwañi fa Armagedoni?

¹¹ Lwaziba litaba zeñata ka za lika zekaezahala kwapili. Ka mutala, lwaziba kuli fa Armagedoni, batu bakaatulwa ka kuya ka mobaezeza banyani ba Kreste. (Mat. 25:40) Batu babaka atulwa sina lingu, ki bababonisize kuli ba kwa lineku la babatozizwe ni la Jesu. Hape lwaziba kuli babañwi kwa banyani ba Kreste bakaba fa lifasi ñalelwa yetuna haika kalisa mi bakaangelwa kwa lihalimu nakonyana pili ndwa ya Armagedoni isika kalisa kale. Ibile feela Bakreste babatozizwe basali teñi fa lifasi, batu ba lipilu zende bakaba ni kolo ya kusebelisana ni bona ni kubatusa mwa musebezi obaeza. (Mat. 25:​31, 32; Sin. 12:17) Ki kabakalañi kuziba litaba zeo hakuli kwa butokwa?

12-13. Batu babañwi mwendi bakaezañi habaka bona “Babilona Yomutuna” inzaa yundiswa? (Mubone ni maswaniso.)

¹² Mane ñalelwa yetuna niha seikalisize, mwendi batu babañwi habaka bona “Babilona Yomutuna” inzaa yundiswa, bakahupula kuli ka lilimo zeñata Lipaki za Jehova nebabulelanga kuli taba yeo ikaezahala. Kana batu babañwi habaka bona likezahalo zeo bakaba ni tumelo ku Jehova?—Sin. 17:5; Ezek. 33:33.

¹³ Haiba kuba cwalo, kukaswana ni mone kubezi mwa Egepita mwa mazazi a Mushe. Muhupule kuli “sikopekope sa batu” nesizwile mwa Egepita hamoho ni Maisilaele. Babañwi ba batu bao mwendi nebakalile kuba ni tumelo ku Jehova hane baboni kuli zanaabulezi Mushe ka za Likoto Zelishumi nelitalelelizwe. (Exo. 12:38) Haiba nto yeswana iezahala hamulaho wa kuyundiswa kwa Babilona  Yomutuna, kana lukaikutwa bumaswe kuli batu babañwi bakonile kuswalisana ni luna nakonyana pili mafelelezo asika taha kale? Batili! Lubata kulikanyisa Ndataa luna wa kwa lihalimu, yena “Mulimu yanani makeke ni mukekecima, yasaakufi kuhalifa ni yatezi lilato lelisa feli ni niti.” b—Exo. 34:6.

14-15. Kana kolo ya kupila kuya kuile iitingile fa nako yashwa mutu kamba sibaka kwapila? Mutaluse. (Samu 33:​4, 5)

¹⁴ Fokuñwi, lwautwanga batu babañwi hababulela kuli, “Neikaba hande wahabo na hanaaka shwa pili ñalelwa yetuna isika kalisa kale, kakuli fo mwendi kwakona kuba ni sepo ya kuli ukazusiwa.” Hakusika fosahala kuikutwa cwalo. Kono kolo ya kupila kuya kuile, haisika itinga fa nako yashwa mutu. Jehova ki Muatuli yapetahalile, mi kamita uezanga likatulo zelukile. (Mubale Samu 33:​4, 5.) Lwakona kukolwa kuli “Muatuli wa lifasi kaufela” ukaeza sesilukile.—Gen. 18:25.

¹⁵ Hape kwaswanela kubulela kuli kolo ya kupila kuya kuile, haisika itinga kwa sibaka kwapila mutu. Jehova haana kuatula batu babañata-ñata sina “lipuli” ka libaka feela la kuli nebapila mwa linaha mone basina kolo ya kuutwa lushango lwa Mubuso. (Mat. 25:46) Muatuli wa lifasi kaufela yalukile ulata hahulu batu bao kufita molu balatela. Haluzibi mwakazamaiseza lika Jehova ka nako ya ñalelwa yetuna. Mwendi babañwi kwa batu bao bakaba ni kolo ya kuituta ka za Jehova, kuba ni tumelo ku yena, ni kuba kwa lineku lahae  hakakenisa libizo lahae fapilaa macaba kaufela.—Ezek. 38:16.

16. Ki lika mañi zeluziba ka za Jehova? (Mubone ni siswaniso.)

¹⁶ Kuituta Bibele kulutusize kuziba kuli Jehova uunga bupilo bwa batu kuba bwa butokwa hahulu. Naafanile Mwanaa hae kuli ato lushwela, ilikuli kaufelaa luna lukone kuba ni kolo ya kupila kuya kuile. (Joa. 3:16) Kaufelaa luna luiponezi lilato la Jehova. (Isa. 49:15) Uluziba hande mi waziba libizo la mañi ni mañi waluna. Mane uziba hande hahulu mañi ni mañi waluna; mi haiba lushwa, wakona kuluzusa kwa bafu, kulutusa kuba sina mone luinezi, ni kulutusa kuhupula lika zene luziba! (Mat. 10:​29-31) Kaniti luli, lunani mabaka aswanela halukolwa kuli Ndataa luna yalilato ya kwa lihalimu, ukaatula mutu ni mutu ka nzila yende hahulu, ka kuluka, ni ka sishemo.—Jak. 2:13.

17. Lukanyakisisañi mwa taba yetatama?

¹⁷ Kutwisiso yenca ye ilutusa kulemuha kuli musebezi wa kukutaza uswanela kueziwa hahulu ka putako kufita kwamulaho. Ki kabakalañi halukona kubulela cwalo? Mi ki lika mañi zelususueza kuzwelapili kukutaza taba yende lusaliseli? Lipuzo zeo likaalabiwa ka butungi mwa taba yetatama.