TSHIENA-BUALU TSHIA KULONGA 19
MUSAMBU WA 22 Bukalenge bukadi bukokesha! Mbimpe bulue!
Ntshinyi tshitudi bamanye bua mualumbuluisha Yehowa bantu kumpala eku?
‘Yehowa ki mmusue bua muntu nansha umue abutudibue to.’—2 PET. 3:9.
LUNGENYI LUNENE
Mbimpe tuikale bamanye ne: palumbuluisha Yehowa bantu mu matuku makese kumpala eku, neenze anu tshidi tshiakane.
1. Bua tshinyi tudi tuamba ne: tudi mu tshikondo tshia dikema?
TUDI mu tshikondo tshia dikema! Dituku dionso edi tudi tumona mudi milayi ya mu Bible yenda ikumbana. Tshilejilu, tudi tumona mudi “mukalenge wa ku nord” ne “mukalenge wa ku sud” baluishangana, bualu yonso wa kudibu mmusue kukokesha buloba bujima. (Dan. 11:40, dim.) Tudi tumona mudi lumu luimpe lua Bukalenge bua Nzambi luyishibua pa buloba bujima ne mudi bantu miliyo ya bungi babuela mu ntendelelu mukezuke. (Yesh. 60:22; Mat. 24:14) Tudi kabidi tupeta biakudia bia mu nyuma bungi tshianana “mu tshikondo tshiakanyine.”—Mat. 24:45-47.
2. Mbimpe tuikale bamanye tshinyi? Kadi ntshinyi tshitudi ne bua kuvuluka?
2 Yehowa udi utuambuluisha bua tujingulule bimpe malu manene akadi pa kuenzeka. (Nsu. 4:18; Dan. 2:28) Tumanyayi ne: tshikondo tshiatuadija dikenga dinene, netumanye tshionso tshidi tshikengela kumanya bua tushale anu ne lulamatu ne tuikale mu buobumue mu tshikondo tshikole atshi. Nansha nanku, mbimpe tuvuluke ne: kudi malu atudi katuyi bamanye akadi pa kuenzeka. Mu tshiena-bualu etshi, netuanji kumona bua tshinyi tudi bakajilule tshituvua tuamba bua amue a kudiwu. Pashishe netuvuluijangane malu atudi bamanye enzeka kumpala eku ne tshienza Tatuetu wa mu diulu.
TSHITUDI KATUYI BAMANYE
3. Ntshinyi tshituvua tuamba bua tshikondo tshikala bantu kabatshiyi ne mpunga wa kubuela mu ntendelelu mulelela? Bua tshinyi tuvua tuamba nanku?
3 Tuvua tuamba ku kale ne: padi anu dikenga dinene dituadija, bantu badi kabayi batendelela Yehowa kabakubuela mu ntendelelu mukezuke ne kabakupanduka ku Armagedone to. Tuvua tuamba nanku bualu tuvua tuela meji ne: muntu yonso ne tshintu tshionso tshia mu tshikondo tshia Noa tshivua tshimfuanyi tshia bualu buonso buenzeka kumpala eku. Tshilejilu, tuvua tuela meji ne: anu muvua Yehowa mukange tshiibi tshia buatu kumpala kua Mvula wa kabutu kutuadija kuloka, ke ‘muakangaye kabidi tshiibi’ patuadija dikenga dinene, bienza bua muntu nansha umue udi kayi muena kuitabuja kapanduki to.—Mat. 24:37-39.
4. Bua tshinyi katutshiena tuamba ne: kaalu ne kaalu konso kavua kenzeke mu tshikondo tshia Noa kavua tshimfuanyi tshia malu enzeka kumpala eku? Umvuija.
4 Mbikumbane bua kuamba ne: tshintu tshionso tshivua tshienzeke mu tshikondo tshia Noa tshivua tshimfuanyi tshia bualu buenzeka kumpala eku anyi? Tòo. Bible kena wamba nanku to. a Yezu wakafuanyikija “matuku a Noa” ne tshikondo tshia dikalaku diende. Kadi kavua muambe ne: kaalu ne kaalu konso kavua kenzeke mu tshikondo tshia Noa kavua ne bua kukumbana mu mushindu mualabale kumpala eku, bu mudi dikanga dia tshiibi tshia buatu to. Kadi abi kabiena biumvuija ne: malu avua menzeke mu tshikondo tshia Noa kaena mua kutulongesha to.
5. a) Ntshinyi tshivua Noa muenze kumpala kua Mvula wa kabutu kuloka tshidi tshileja ne: uvua ne ditabuja? (Ebelu 11:7; 1 Petelo 3:20) b) Nku tshinyi kudi mudimu wetu wa buambi mufuanangane ne wa Noa?
5 Pakumvua Noa didimuija dia Yehowa, wakenza buatu, kulejabi muvuaye ne ditabuja. (Bala Ebelu 11:7; 1 Petelo 3:20.) Bia muomumue, bantu badi bateleja lumu luimpe lua Bukalenge bua Nzambi badi ne bua kutumikila malu atudi tubambila bua kuleja ne: badi ne ditabuja. (Bien. 3:17-20) Petelo wakabikila Noa ne: “muyishi wa buakane.” (2 Pet. 2:5) Nansha nanku, anu mutuvua bamone mu tshiena-bualu tshishale, katuena bamanye Noa ni uvua mudienzeje bua kuyisha muntu yonso uvuaku tshikondo atshi to. Lelu tudi tudienzeja bikole ne tshisumi bua kuyisha bantu bonso badi pa buloba. Kadi katuakukumbana bua kuyisha muntu yonso kumpala kua nshikidilu kuluaye to. Bua tshinyi?
6-7. Bua tshinyi tudi tuamba ne: katuakukumbana bua kuambila muntu yonso lumu luimpe kumpala kua nshikidilu kulua? Umvuija.
6 Tumonayi tshivua Yezu muambe bua mudimu wetu wa buambi. Uvua muambe ne: nebayishe lumu luimpe lua Bukalenge “pa buloba bujima budi bantu basombele bua luikale bujadiki kudi bisamba bionso.” (Mat. 24:14) Lelu eu ke udi dîyi dia buprofete edi dienda dikumbana bikole menemene. Tudi tumanyisha lumu luimpe lua Bukalenge elu mu miakulu mipite pa 1 000. Ne ku diambuluisha dia site wetu wa jw.org, bantu ba bungi badi mua kupeta lumu luimpe elu.
7 Kadi Yezu uvua muambile kabidi bayidi bende ne: kabavua mua ‘kutuangaja bimenga bionso,’ anyi kuyisha muntu yonso, kumpala kua yeye kulua to. (Mat. 10:23; 25:31-33) Bileja ne: katuakuyisha muntu yonso kumpala kua yeye kulua bua kulumbuluisha ba pa buloba to. Bantu ba bungi lelu mbasombele mu matunga mudibu belele mudimu wetu mikalu. Kupita apu, bana bungi kabuyi kubala badi baledibua matuku onso aa. Tudi tudienzeja bua kuambila bantu ba ‘tshisamba tshionso, tshisa tshionso, ne muakulu wonso’ lumu luimpe. (Buak. 14:6) Nansha nanku, katuakukumbana bua kuambila muntu yonso lumu luimpe kumpala kua nshikidilu kulua to.
8. Nnkonko kayi itudi mua kudiela bua mualumbuluisha Yehowa bantu kumpala eku? (Tangila kabidi bimfuanyi.)
8 Kadi tudi mua kudiebeja ne: Ntshinyi tshienzekela bantu bonso batuikala katuyi bambile lumu luimpe kumpala kua dikenga dinene kutuadija? Mmunyi muabalumbuluisha Yehowa ne Muanende udiye mupeshe dilumbuluisha dionso? (Yone 5:19, 22, 27; Bien. 17:31) Mvese wa nshindamenu wa tshiena-bualu etshi udi wamba ne: Yehowa ‘ki mmusue bua muntu nansha umue abutudibue to.’ Kadi ‘mmusue bua bantu bonso bafike ku dinyingalala bua mpekatu yabu.’ (2 Pet. 3:9; 1 Tim. 2:4) Nansha mutudi bamanye tshidi mvese eu wamba, Yehowa ki mmutuleje mualumbuluishaye bantu batuikala katuyi bambile lumu luimpe to. Mu bulelela, ki mmuenzejibue bua kutuambila muabalumbuluishaye to.
Ntshinyi tshienzela Yehowa bantu bavuabu pamuapa kabayi bambile lumu luimpe kumpala kua dikenga dinene kutuadija? (Tangila tshikoso tshia 8) c
9. Mbualu kayi budi Yehowa mutuleje mu Bible?
9 Yehowa mmutuambile mu Bible malu enzaye kumpala eku. Tshilejilu, mmuleje ne: neabishe bantu “badi kabayi bakane” ku lufu, bavuabu kabayi bambile lumu luimpe bua balekele bienzedi biabu bibi. (Bien. 24:15; Luka 23:42, 43) Kadi bualu ebu budi bujula nkonko mikuabu.
10. Nnkonko kayi mikuabu idi ijuka?
10 Bantu bonso bafua mu dikenga dinene kabakubishibua ku lufu anyi? Bible udi uleja patoke ne: bantu badi baluisha Yehowa, babutulaye yeye ne biluilu biende bia mu diulu ku mvita ya Armagedone, kabakubishibua ku lufu to. (2 Tes. 1:6-10) Kadi ntshinyi tshienzekela bantu bakuabu, tshilejilu bafua bua masama anyi bukulakaja, bafuila mu njiwu, anyi bashipabu kudi bantu nabu? (Muam. 9:11; Zek. 14:13) Bamue ba kudibu nebikale munkatshi mua bantu “badi kabayi bakane” babishibua ku lufu mu bulongolodi bupiabupia anyi? Katuena bamanye to.
TSHITUDI BAMANYE
11. Nebalumbuluishe bantu ku Armagedone bilondeshile malu kayi?
11 Kudi malu ndambu atudi bamanye enzeka kumpala eku. Tshilejilu, tudi bamanye ne: ku mvita ya Armagedone, Yezu nealumbuluishe bantu bilondeshile malu avuabu benzele bana babu ne Kristo. (Mat. 25:40) Bantu badi batua bela manyi ne Kristo mpanda, Yezu neabamone bu mikoko. Tudi bamanye kabidi ne: bamue bena Kristo bela manyi nebikale pa buloba mu dikenga dinene; nebalue kuya mu diulu katupa kakese kumpala kua mvita ya Armagedone kutuadija. Tshikondo tshionso tshikalabu pa buloba atshi, bidi mua kuenzeka bua bantu badi kabayi bena kuitabuja balue bena kuitabuja. (Mat. 25:31, 32; Buak. 12:17) Bua tshinyi malu aa adi ne mushinga?
12-13. Ntshinyi tshidi bamue bantu mua kuenza pamonabu dibutuka dia “Babilona Munene”? (Tangila kabidi bimfuanyi.)
12 Nansha dikenga dinene dimane kutuadija, bidi mua kuenzeka bua bamue bantu bamona dibutuka dia “Babilona Munene” bavuluke ne: kukavua bidimu bia bungi bivua Bantemu ba Yehowa bakule bua bualu buadi. Bamue bantu bamona malu au, nebabuele mu ntendelelu mulelela anyi?—Buak. 17:5; Yeh. 33:33.
13 Bobu bamuitabuje, nebienzeke anu muvuabi bienzeke mu Ejipitu mu matuku a Mose. Tuvulukayi ne: “tshisumbu tshinene tshia bantu basambakane” tshiakadisangisha ne bena Isalele pavuabu bumbuka mu Ejipitu. (Ekes. 12:38) Mu bantu abu muvua bakavua batuadije kuitabuja Yehowa pavuabu bamone ne: bipupu bionso dikumi bivua Mose mumanyishe biakabakuata. Bualu bua muomumue bobu mua kuenzeka pabutulabu Babilona Munene, mbibi bua kuela meji ne: bantu badi kabayi bena kuitabuja badi mua kudisanga netu katupa kakese kumpala kua nshikidilu kulua anyi? Tòo. Tudi ne bua kufuana Tatuetu wa mu diulu, ‘Nzambi wa luse udi uditeka pa muaba wa bakuabu, kayi ukuata tshiji lukasa, mmuwule tente ne dinanga dia lulamatu ne bulelela.’ b—Ekes. 34:6.
Bamue bantu bamona dibutuka dia “Babilona Menene” nebavuluke ne: kukavua bidimu bia bungi bivua Bantemu ba Yehowa bakule bua bualu buadi (Tangila tshikoso tshia 12, 13) d
14-15. Bua muntu kushala ne muoyo kashidi, bidi bitangila dîba divuaye mufue anyi muaba uvuaye musombele anyi? Umvuija. (Misambu 33:4, 5)
14 Imue misangu, tudi mua kumvua bena Kristo netu bamba bua bena mu mêku abu badi kabayi Bantemu ba Yehowa ne: “Bobu ne bua kufua kumpala kua dikenga dinene kutuadija, mbimpe bualu nebikale ne ditekemena dia kubishibua ku lufu.” Mbimpe tumanye tshidi tshibasaka bua kuamba nanku. Kadi bua muntu kushale ne muoyo kashidi, kabiena bitangila dîba divuaye mufue to. Yehowa mmulumbuluishi muakane. Mapangadika ende atu anu makane ne malulame. (Bala Misambu 33:4, 5.) Tuikalayi batuishibue ne: “Mulumbuluishi wa buloba bujima” neenze anu tshidi tshiakane.—Gen. 18:25.
15 Tudi mua kuamba kabidi ne: bua muntu kushala ne muoyo kashidi, kabiena bitangila muaba uvuaye musombele to. Ki mbia meji bua kuamba ne: Yehowa neamone bantu miliyo ya bungi bu “mbuji” anu bualu bavua mu matunga muvuabu kabayi bapete mushindu wa kuteleja lumu luimpe to. (Mat. 25:46) Mulumbuluishi muakane wa buloba bujima udi ubatabalela bimpe kupita mutudi tuetu mua kubatabalela. Katuena bamanye muayaye ne malu mu dikenga dinene to. Pamuapa, bantu abu badi mua kupeta mpunga wa kulonga malu ende, kumuitabuja, ne kulua ku luseke lua bantu bende padijidilaye ku mêsu kua bisamba bionso.—Yeh. 38:16.
Dikenga dinene dimane kutuadija, . . . bamue bantu bamona malu enzeka nebitabuje Yehowa anyi?
16. Mmalu kayi a Yehowa atudi bafike ku dimanya mu dilonga dietu dia Bible? (Tangila kabidi tshimfuanyi.)
16 Dilonga dietu dia Bible ndituleje ne: bantu bonso badi ne mushinga wa bungi kudi Yehowa. Wakafila Muanende bua kutufuila, bua muntu yonso apete mushindu wa kushala ne muoyo kashidi. (Yone 3:16) Tuetu bonso tukadi bamone mudi Yehowa mutunange. (Yesh. 49:15) Mmumanye dîna dia yonso wa kutudi. Mu kuamba kuimpe, bu mudiye mutumanye bimpe menemene, nansha tuetu bafue, neabishe yonso wa kutudi ku lufu anu mudiye, bualu mmumanye kaalu ne kaalu konso ka mutudi ne malu onso atudi nawu mu mitu yetu. (Mat. 10:29-31) Nanku, tuikale batuishibue ne: Tatuetu wa mu diulu udi mutunange nealumbuluishe yonso wa kutudi bimpe menemene bualu mmulumbuluishi muakane, udi ne meji a bungi, ne mmubanji mu luse.—Yak. 2:13.
Tuikalayi batuishibue ne: Yehowa nealumbuluishe yonso wa kutudi bimpe menemene bualu mmulumbuluishi muakane udi ne meji ne luse lua bungi (Tangila tshikoso tshia 16)
17. Nnkonko kayi ituandamuna mu tshiena-bualu tshialonda?
17 Ngumvuilu muakajilula utudi bapete eu udi utusaka bua kuvudija mitalu yetu mu mudimu wa buambi. Bua tshinyi tudi tuamba nanku? Ntshinyi tshidi tshitusaka bua kutungunuka ne kuyisha ne tshisumi? Netuandamune nkonko eyi mu tshiena-bualu tshialonda.
MUSAMBU WA 76 Mmunyi muutu umvua?
a Wewe musue kumanya bua tshinyi tudi bashintulule dilongesha edi, tangila tshiena-bualu tshia “Mbienzeke nunku bualu wewe udi muanyishe” mu Tshibumba tshia Nsentedi tshia dia 15/3/2015, dib. 7-11.
b Pabutulabu Babilona Munene, bantu ba Nzambi nebatetshibue pababundabu kudi Goga wa ku Magoga. Muntu yonso walua kudisangisha kudi bantu ba Nzambi panyima pa dibutuka dia Babilona Munene, neatetshibue pende.
c DIUMVUIJA DIA BIMFUANYI BIDI MU : Bimfuanyi bisatu bidi bileja ne: katuena mua kuyisha muntu yonso lumu luimpe to. 1) Mamu udibu kabayi bayishe lumu luimpe bualu udi mu ditunga mudi kamuyi ntendelelu wa buena Kristo, mudi Bantemu kabayi mua kuyisha mu bukubi to. 2) Mulume ne mukajende badibu kabayi bambile lumu luimpe bualu badi mu ditunga didi mbulamatadi mukandike midimu yetu. 3) Muntu udi musombele muaba wa kule menemene udi lumu luimpe kaluyi mua kufika bipepele to.
d DIUMVUIJA DIA TSHIMFUANYI: Nsongakaji uvua mulekele kuenzela Yehowa mudimu uvuluka malu avuaye mulonge a dibutuka dia “Babilona Munene.” Ulekela malu mabi, upingana kudi Yehowa ne kudi baledi bende bena Kristo. Muenji wa mpekatu yeye mupingane kudi Yehowa, tudi ne bua kumunanga, kumuenzela malu ne luse anu bu Tatuetu wa mu diulu, ne kusanka nende
