1. Muloñadi wutukuhoshela netu tunakushakama mumpinji yinakumwekana yuma yayiwahi?

 TUNAKUSHAKAMA mumpinji yinakumwekana yuma yayiwahi! Tunakumona wuprofwetu wamuBayibolu chiwunakushikijewa hefuku-hefuku. Chakutalilahu, tunakumona “mwanta wakukabeta kakuchimunswa namwanta wakukabeta kakuchidiilu” chinakudishinjekawu muloña mwanta-himwanta nakufwila kwikala mwanta wañovu mukaayi. (Dan. 11:​40, tth.) Tunakumona nsañu yayiwahi yaWanta waNzambi chinakuyishimwinawu mwahita iseki dejima, nawa antu amavulu nankashi anakutambwila iyi nsañu. (Isa. 60:22; Mat. 24:14) Nawa tunakutambwila yakuda yakuspiritu yayivulu “hampinji yatelela.”—Mat. 24:​45-47.

2. Chumanyi chitwatela kukuhwelela, hanu dinu chumanyi chitwatela kwiluka?

² Yehova natwalekihu kutukwasha kutiyishisha yuma yamaneni yikukeña kumwekana katataka. (Yish. 4:18; Dan. 2:28) Tunakuhweleli netu chakatachikaña lukadi lwasweja, twakeluka yuma yejima yitwatela kwiluka kulonda twakatweshi kuumika nakashinshi nikwimika mushindu muniyi mpinji yayihuñu. Hela chochu, twatela kwiluka netu kudi yuma yikwawu yitwabula kwiluka kutalisha hayuma yikukeña kumwekana katataka kumbidi. Muchinu chibaaba, tukusambila ntahi kuhanjeka muloña waweni wunaleteshi tuhituluki muyuma yitwahosheli kutalisha haniyi yuma yikwawu yakamwekana. Kuhiñahu tukuhanjeka hayuma yimu yitweluka kutalisha hayuma yakamwekana kumbidi nichakelayi Tata yetu wamwiwulu.

 YUMA YITWABULA KWILUKA

3. Twahosheleña netudi kutalisha hampinji yakalekawu antu kwikala nakukooleka kwakudiza kulonda akamwiluki Yehova, nawa muloñadi wutwakunkulwilili muniyi njila?

³ Kunyima, twahosheleña netu neyi lukadi lwasweja lunatachiki, antu abula kwitiya hiyakekala nakukooleka kwakudiza hadi Yehova kulonda akapuluki haAmagedoniku. Twakunkulwili mwenimu muloña twatoñojokeleña netu muntu-himuntu nichuma-hichuma chamwekeni hampinji yaDibaji, jemeneneñaku yuma yakamwekana kumbidi. Chakutalilahu, twahosheleña netu neyi chashinkiliyi Yehova chiisu chakuwatu henohu Dibaji kanda ditachiki, ‘dichakashinkayi nichiisu’ chanshakaminu yamakonu yaSatana hampinji yakatachika lukadi lwasweja, kulonda akakañeshi antu anashali kupuluka.—Mat. 24:​37-39.

4. Muloñadi wutunalekeli kuhosha netu chuma chejima chamwekeni mumpinji yaNowa chinakushikija chuma cheneni makonu?.

⁴ Komana chidi hohu chiwahi kuhosha netu chuma-hichuma chamwekeni hampinji yaDibaji chemeneneñaku yuma yakamwekana kumbidi? Inehi. Muloñadi? Muloña hikudihu Nsona yikuletesha tukuhweleli muniyi njilaku. a Mwamweni, Yesu wesekejeli “mafuku aNowa” nampinji yakwikalahu kwindi, ilaña wahosheli wanyi nindi chuma chejima chamwekeneña mumpinji yaNowa chemeneneñaku kushikijewa kwachuma cheneni chakamwekana kumbidi, chidi neyi hampinji Yehova yashinkiliyi chiisu chakuwatu. Hela chochu, chumichi  hichinatalishi mukwila nawu hitwatela kudizila kunsañu yahosha hadi Nowa niDibajiku.

5. (a) Chumanyi cheliliyi Nowa henohu Dibaji kanda? (AHeberu 11:7; 1 Petulu 3:20) (b) Kudifwananyi kudi hachashimwinineñayi Nowa nachitwashimwinaña makonu?

⁵ Nowa chatiyiliyi nsañu yakusoñamisha yamulejeliwu kudi Yehova, wamwekesheli nindi wadiña nachikuhwelelu chelili atuñi watu. (Tañenu AHeberu 11:7; 1 Petulu 3:20.) Munjila yoyimu, antu anatiyi nsañu yayiwahi yaWanta waNzambi atela kuzatisha yuma yinatiyiwu. (Yilw. 3:​17-20) Petulu wamuteneni Nowa nindi “mukakushimwina kuloña.” (2 Pet. 2:5) Hela chochu, neyi chitwahanjekeli muchibaaba chinafumihu, tweluka wanyi neyi chakwila Nowa washiliku kampeni yakushimwina antu ejima ashakamineña heseki henohu Dibaji kanda. Makonu tunakudikita mumudimu wakushimwina, nawa tunakufwila kuzata nañovu muniwu mudimu. Hela chakwila tukweseka chamuchidinyi, hitukutwesha kuleja muntu wejima nsañu yayiwahi hanu heseki henohu kukuma kanda kwinziku. Muloñadi?

6-7. Muloñadi wutukukunkulwila netu hitwakatwesha kushimwina muntu wejima hanu heseki nsañu yayiwahi henohu kukuma kanda kwinziku? Lumbululenu.

⁶ Toñojokenu hachahosheliyi Yesu kutalisha hakutoha kwamudimu wetu wakushimwina. Washimwineñahu dehi nindi nsañu yayiwahi akayishimwina “mwahita iseki dejima mwashakamawu antu kulonda yakekali wunsahu kunyuza yejima.” (Mat. 24:14) Iwu wuprofwetu wunakushikijewa makonu chikupu. Nsañu yaWanta anakuyishimwina mumadimi kubadika 1,000, nawa muloña wawebusayiti ya jw.org, iyi nsañu yinakushika kudi antu amavulu nankashi mukaayi.

⁷ Hela chochu, Yesu walejeli cheñi atumbanji twindi nindi wakenza henohu wena kanda amanishi “[kushimwina] munyisumba nimunyikala,” hela kushimwina antu wejima. (Mat. 10:23; 25:​31-33) Mazu ahosheliyi Yesu akashikijewa nimumafuku itunakushakamamu. Antu amavulu ashakama mumaluña mwakaanishawu chikupu mudimu wetu wakushimwina. Kubombelahu, anyana amavulu asemukaña haminiti-haminiti. Twazataña hakumina ñovu jetu kushimwina nsañu yayiwahi kudi antu ‘akunyuza yejima, kunyichidi yejima, nikumadimi ejima.’ (Chim. 14:6) Ilaña chalala chidi chakwila nawu hitwakatwesha kushimwina nsañu yayiwahi kudi muntu wejima hanu heseki henohu kukuma kanda kwinziku.

8. Lwihwinyi lutunateli kudihula kutalisha hachakasompeshayi Yehova antu kumbidi? (Talenu cheñi nyevulu.)

⁸ Dichi, tunateli kudihula netu: Hanu dinu chumanyi chakayimwekena ana anateli kubula kwikala nakukooleka kwakutiya nsañu yayiwahi henohu lukadi lwasweja kanda lutachiki? Yehova niMwanindi enkayi mudimu wakusompesha akela ñahi nanawa antu? (Yow. 5:​19, 22, 27; Yilw. 17:31) Nsona hanashindameni achinu chibaaba yinakuhosha nawu Yehova “hakeñaña muntu hela wumu akakisikiku.” Ilaña, wakeñaña “antu ejima abalumuki munyichima.” (2 Pet. 3:9; 1 Tim. 2:4) Hela chakwila dichakeñañayi, twatela kwiluka netu Yehova kanda atuleji chuma chakelayi hakwila akakuli ilu lwihu. Hela chochu, Yehova wukweti wuswa wakubula kutuleja nsañu yidi yejima kutalisha hachuma chineliyi hela hachuma chakelayi.

9. Yumanyi yatulejayi Yehova muBayibolu?

⁹ Yehova watuleja Mwizu dindi yuma yikwawu yakelayi. Chakutalilahu, Yehova watuleja muBayibolu nindi wakasañula antu ‘abula kuloña’ abulili kwikala nakukooleka kwakwiluka nsañu yayiwahi nakuhimpa yilwilu yawu. (Yilw. 24:15; Luka 23:​42, 43) Chumichi chikuletesha tudihuli malwihu amakwawu alema.

10. Malwihwinyi amakwawu itunateli kudihula?

¹⁰ Komana antu ejima akafwa mumpinji yalukadi lwasweja akajilumuka haya nyaaka chakubula kwikala nakuchiñeja kwakusañuka? Nsona  yamwekesha hatooka nawu akakudimbulula akajilumunawu kudi Yehova niamashidika indi haAmagedoni, hiyakayisañulaku. (2 Tes. 1:​6-10) Indi antu amakwawu, chakutalilahu, akafwa nawubanji wadimwekenaña, namaposu, hela akajahawu kudi akwawu antu? (Mukwa. 9:11; Zek. 14:13) Komana tunateli kuhosha netu antu amu hakachi kanawa antu akekala hakachi kawantu ‘abula kuloña’ akasañulawu mukaayi kakaha? Tuneluki wanyi.

YUMA YITWELUKA

11. Chumanyi chakayisompeshelahu antu haAmagedoni?

¹¹ Tweluka yuma yayivulu kutalisha hayuma yikamwekana kumbidi. Chakutalilahu, tweluka netu haAmagedoni antu akayisompesha kwesekeja nanochu chayilañawu amana kwaKristu. (Mat. 25:40) Ana akasompeshawu neyi anyikoku diwu akwashileña awayishewa niKristu. Tweluka cheñi netu amana kwaKristu amakwawu akatwalekahu kwikala hanu hamaseki hanyima yakutachika kwalukadi lwasweja nawa hiyakayitwala mwiwuluku, sampu Amagedoni yidi kwakwihi nakutachika. Chakala hohu amana kwaKristu achidi heseki, chidi hohu chiwahi kuhosha netu antu akweti nyichima yashinshika akekala nakukooleka kwakukwasha amana kwaKristu nikukwasha mudimu wazatañawu. (Mat. 25:​31, 32; Chim. 12:17) Iyi nsañu yalemenadi?

12-13. Antu amakwawu akela ñahi hanyima yakumona kujilumuka ‘kwaBabiloni Muneni’? (Talenu cheñi nyevulu.)

¹² Nihampinji yakela lukadi lwasweja lunatachiki dehi, chakadi nikujina, antu amakwawu akamona kujilumuka ‘kwaBabiloni Muneni,’ akanuka nawu yaaka yayivulu yinahitihu aYinsahu jaYehova ahosheli nawu chumichi chakamwekana. Komana antu amakwawu akamona yumiyi yinakumwekana, akabalumuka munyichima yawu?—Chim. 17:5; Ezek. 33:33.

¹³ Chuma chakamwekana chakekala neyi chuma chamwekeni muEjipitu mumafuku aMosi. Anukenu nenu “antu amavulu ashiyashana” adibombeli nawaIsarela hafuminiwu muEjipitu. Antu amakwawu hakachi kanawa antu atela atachikili kukuhwelela chamweniwu nawu yuma yayilejeliwu kudi Mosi kutalisha  haYipupu 10, yashikijeweli. (Kwid. 12:38) Neyi chuma chochimu chimwekana hanyima yakujilumuka kwaBabiloni Muneni, komana twakaneña muloña wakwila antu anenzi nakudibomba hamu nanetu kwakwihi nakukuma? Inehi! Tunakukeña kwimbujola yilwilu yaTata yetu wamwiwulu, “Nzambi wukweti luwi niwushona, hazuwaña swayiku nawa wavulisha kukeña kwakashinshi nichalala.” b—Kwid. 34:6.

14-15. Komana chihandilu chamuntu chakushakama haya nyaaka kumbidi chashindamena hampinji yinateli kufwayi, indi kwiji kwiluña kwashakamañayi? Lumbululenu. (Isamu 33:​4, 5)

¹⁴ Mpinji jikwawu, twatiyaña muntu nakuhosha nindi, “Chadi kuwaha neyi ntaña yami afwa henohu lukadi lwasweja kanda lutachiki kulonda akamusañuli.” Chatama wanyi kutoñojoka muniyi njila. Ilaña chihandilu chamuntu chakushakama haya nyaaka hichashindamena hampinji yinateli kufwayiku. Yehova hiNsompeshi wamuwahi—wafuukulaña mwamuwahi nawa mwaloña. (Tañenu Isamu 33:​4, 5.) Twatela kukuhwelela chikupu netu “Nsompeshi yeseki dejima” wakela mwaloña.—Kutach. 18:25.

¹⁵ Chidi hohu chiwahi cheñi kukunkulula netu chihandilu chamuntu chakushakama haya nyaaka kumbidi hichashindamena kwiluña kwashakamañayiku. Yehova nateli wanyi kusompesha antu amavulu nindi ‘hiyampembi’ muloña hohu wakwila ashakamaña mumatuña mwabulawu dehi kwikala nakukooleka kwakwiluka nsañu yaWanta. (Mat. 25:46) Nsompeshi yeseki dejima waloña, wayakamenaña awa antu kubadika nichitunateli kuyakamena etu. Tweluka wanyi Yehova chakelayi yuma mumpinji  yalukadi lwasweja. Hadaha antu amu hakachi kanawa antu akekala nakukooleka kwakudiza kulonda akamwiluki Yehova, kumukuhwelela nikwikala kukabadi kindi hampinji yakadijilikañayi yomweni hamesu anyuza yejima.—Ezek. 38:16.

16. Chumanyi chituneluki kutalisha hadi Yehova? (Talenu cheñi mwevulu.)

¹⁶ Kuhitila mukudiza Bayibolu, tuneluki netu Yehova walemesha chikupu wumi wawantu. Wahanini wumi waMwanindi kulonda wejima wetu twakekali nakukooleka kwakushakama haya nyaaka. (Yow. 3:16) Wejima wetu tunamoni Yehova chatwakamenañayi. (Isa. 49:15) Wejima wetu watwiluka hejina-hejina. Kafwampi, watwiluka chiwahi nankashi chakwila neyi tufwa, nateli kutusañula muloña wanukaña yuma yejima hadi etu nikutufuntishila wuswa wejima wutwadiña nawu wakwanuka yuma! (Mat. 10:​29-31) Mwamweni, tukweti wunsahu wawuwahi wukutukwasha kukuhwelela netu Tata yetu wamwiwulu wukweti kukeña wakasompesha muntu-himuntu munjila yayiwahi, yaloña nawa yaluwi.—Yak. 2:13.

17. Yumanyi yitwakahanjekahu muchibaaba chinalondelihu?

¹⁷ Chineli tunatiyishishi iku kuhimpika kwayuma yitwakuhwelela, ichi tuneluki netu mudimu wetu wakushimwina twatela kuwuzata mukunyakashana. Muloñadi wutunahosheli muniyi njila? Nawa yumanyi yatusañumunaña kutwalekahu kushimwina nsañu yayiwahi chakadi kuleka? Twakahanjeka nsañu yayivulu kutalisha hañakwilu yanawa malwihu muchibaaba chinalondelihu.