KJOAʼMIYA XI CHOTʼAYA 19
KJOAJNDA 22 Katabatéxoma Chjotaxále Niná
Jméni xi ʼyaa josʼin kʼoendajinle kjoa Jeobá je chjota nichxin xi nroa
“Je Nainá [Jeobá] kaile nga jngo xi cha̱” (2 PED. 3:9).
XI TÍNCHJA̱NI
Ánni tjínjngoni tokoán nga kui xi kixi tíjna kʼoasʼin Jeobá kʼianga kʼoendajinle kjoa je chjota nichxin xi nroa.
1. Jméni xi tiʼyaa nga tíbitjoson nichxin xi tiyoaa ndʼaibi.
NICHXIN xi tiyoaa ndʼaibi kao xkoaan tiʼyañá josʼin tíbitjoson jmeni xi tso Biblia. Tobʼelañá, nga tjíokján je “rey xi norte tsʼe” kao “rey xi sur tsʼe” nga mele koanentsja sonʼnde (Dan. 11:40, nota). Tíʼmiyason Énle Niná jngo tjíjtsa Sonʼnde kʼoa millón mani chjota xi je Jeobá tjíosíxále (Is. 60:22; Mat. 24:14). Kʼoati tíʼmiyaná xi tʼatsʼe Niná “nga fichó choa̱le” (Mat. 24:45-47).
2. Jméni xi tjínjngo tokoán nga kʼoakoa̱n, kʼoa jméni xi tsín ʼyaa.
2 Je Jeobá tosi tonda tíbasenkaoná nga kjimajinná jmeni xi jeme kʼoakoa̱n (Prov. 4:18; Dan. 2:28). Tjínjngoo tokoán nga sʼe̱jinkoaan jmeni xi machjén nga jtín kuiyoaa kʼoa nga kixi koanngíntʼalee Jeobá kʼianga jekoaitsʼia kjoañʼai xi nʼio tse. Tonga kʼoati tjín jmeni xi tsín ʼyaa jokoa̱n nichxin xi nroa. I̱ kjoaʼmiya jebi kui chótʼayajiaan ánni tsʼantjaiyajinni josʼin majinná tsakai tʼatsʼe jokoa̱n nichxin xi nroa. Xijekoa̱n, kʼoati chótʼayajiaan jmeni xi ʼyaa kʼoa jmeni xi sʼin Jeobá.
XI TSÍN ʼYAA
3. Jósʼin koanjinná tsakai tʼatsʼe jokoa̱ntʼain chjota nga jekoaitsʼia kjoañʼai xi nʼio tse, kʼoa ánni nga kʼoatsakixónñá.
3 Kʼoasʼin koanjinná tsakai nga tsín titjóʼndenile je chjota nga je Jeobá koaitʼale kʼianga jekoaitsʼia kjoañʼai xi nʼio tse kʼoa nga tsín kuinje̱ngile yaole nga kjoaʼaí Armagedón. Kuinga kʼoatsakixónñá nga̱ kʼoasʼin koanjinná nga kui tsoyanile jokoan nga jaʼai Jtsínʼio jmeni xi koa̱n nichxin xi sʼa nroa. Kʼoatsakixoán nga tsín ʼya xi titsjoáʼndenile Jeobá nga skoe̱xkon nga jekoaitsʼia kjoañʼai xi nʼio tse kʼoa nga tsín tikuitjontjainile yaole tojo koan kʼianga jaʼai Jtsínʼio nga tsakʼéchjoa Jeobá je xo̱ntjoale arca (Mat. 24:37-39).
4. Ánni nga tsín tikʼoasʼin nikjaʼaitsjenñá nga kʼoakoa̱n ijngokʼa ndʼaibi jokoan nichxinle Noé.
4 Alikui koa̱n kʼoasʼin si̱kjaʼaitsjeen nga kʼoakoa̱n ijngokʼa ndʼaibi jokoan nga jaʼai Jtsínʼio nga̱ tsín jña kʼoatso Biblia. a Ningalani kui kisingósonkao Jesús jokoanchon nichxinle Noé kao jokjimachon nichxin xi tiyoaa ndʼaibi, alikui kui xi kitsonile nga kʼoakjoán tikoa̱n jokoan nichxinle Noé, jolani nga tsakʼéchjoa Jeobá je xo̱ntjoale arca. Tonga tsee xi bakóyaná jmeni xi koan nichxinle Noé.
5. 1) Jmé xi kisʼin Noé nga kjesa faʼaijin Jtsínʼio (Hebreos 11:7; 1 Pedro 3:20). 2) Jósʼin mangóson nga kitsoyason je Noé kao nga ʼmiyasoán ndʼaibi.
5 Je Noé koankjainle tʼatsʼe Niná kʼoa tsakʼéndaa je arca kʼianga kʼoatsakʼinle nga jngo Jtsínʼio kjoaʼaí (tʼexkiai Hebreos 11:7; b 1 Pedro 3:20 c). Tikʼoasʼinni, tsa sitjoson je chjota jmeni xi tso Énle Niná kʼoasʼin koakoni nga makjainle (Hech. 3:17-20). Je Pedro kʼoakitso nga je Noé “kinchja̱ya xi kjoakixi” (2 Ped. 2:5). Tonga tojosʼin tsaʼyaa ya kjoaʼmiya xi jaʼato, tsín ʼyaa tsa tsakájinkon nga jngó jngó chjota xi tsakatio nga kui nichxin nga jngo Jtsínʼio kjoaʼaí. Kʼoati tinʼia ndʼaibi, tiʼmiyasonñá Énle Niná jngo tjíjtsa Sonʼnde, tonga tsínjin kʼoakoa̱nná kʼuínyasonlee ngatsʼi chjota xi tjín nga kjesa fetʼajin jme xi chon sonʼnde. Ánni kʼoabixónsíñá.
6, 7. Ánni nga tsín kʼoakoa̱nniná kʼuínyasonlee ngatsʼi chjota xi tjín jngo tjíjtsa Sonʼnde nga kjesa fetʼajin jme xi chon sonʼnde.
6 Je Jesús kʼoakitso nga “je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde” nichxin xi tiyoaa ndʼaibi (Mat. 24:14). Tíbitjoson én jebi. Jetsʼato 1,000 én tíʼmiyason je Énle Niná kʼoa je chjota xi mele skoe̱ tʼatsʼe Niná ma kotʼa je página xi tíjnaná ya Internet ya jw.org.
7 Je Jesús kʼoati i̱ kitsole chjotatjenngile: “Kjoakixi xi xinno, nga títjon kjoaʼaí je ʼndíle chjota, tikje fetʼajinnino nga kuitsomao ngakijnda naxinandá xi tsʼe Israel”. Kui xi kitsonile nga tsín kʼoakoa̱nle je chjotatjenngile kuitsoyasonle ngatsʼi chjota nga kjesa faʼaijin Jesús nga kʼoendajinle kjoa chjota (Mat. 10:23; 25:31-33). Nichxin xi tiyoaa ndʼaibi, millón mani chjota xi ya tjío jñani tsín tjoʼndená ʼmiyasoán, kʼoa nga xki̱ minuto nkjín ʼndílee tsin. Kuinga tsín kʼoakoa̱nniná kʼuínyasonlee ngatsʼi chjota xi tjín jngo tjíjtsa Sonʼnde nga kjesa fetʼajin jme xi chon sonʼnde, ninga kʼoénelee yaoná jokji tjen kʼoakoa̱nná nga kʼuínyalee “ngayije ntje̱, kao ngayije én, kao ngayije naxinandá” (Apoc. 14:6).
8. Jméni xi sakʼoa bixoán (kʼoati chótsenlai sén xi faʼaitʼa).
8 Tsakui nichxin i̱ bixoán: “Jókoa̱nni je chjota xi tsín skoe̱ tʼatsʼe Niná kʼianga kjesa fitsʼiajin kjoañʼai xi nʼio tse. Jósikao Jeobá kao Jesús chjota jebi, nga̱ jé Jesús kitsjoale xá nga kʼoendajinle kjoa je chjota” (Juan 5:19, 22, 27; Hech. 17:31). Je texto xi yʼangini kjoaʼmiya jebi kʼoatso nga tsín mele Jeobá nga ʼya xi kjoeson, tosaa kui xi “mele nga ngatsʼi chjota kuitjontjai” (1 Tim. 2:4; 2 Ped. 3:9). Je Jeobá kje kʼoatsojinná jósikao chjota jebi. Tonga kʼoati majinná nga tsín tjínnele ñá kʼoakuitsoná.
Jósikao Jeobá je chjota xi tsín skoe̱ xi tʼatsʼe kʼianga kjesa fitsʼiajin kjoañʼai xi nʼio tse (Chótsenlai párrafo 8) f
9. Jméni xi tsoná je Jeobá.
9 Tjín jmeni xi kʼoatsoná je Jeobá. Jolani nga sikjaʼáyanile je xi “chjotatsʼen” ʼmile. Xi tsonile, je chjota xi tsín kisikʼantjaiya yaole nga tsín tsabe jotjínni je Énle Niná (Hech. 24:15; Luc. 23:42, 43). Kʼianga jeʼyaa jebi tsakui nichxin tjínsa jmeni xi mená jchaa.
10. Jmésani xi sakʼoa nikjaʼaitsjeen.
10 A tondiaa kjoeson je chjota xi kʼia kuiyá nga sʼe̱jna je kjoañʼai xi nʼio tse. Je xi tsín tikjoaʼáyanile jé chjota xi kontra koatiole Jeobá xi kʼia sikjeson nga kjoaʼaí Armagedón (2 Tes. 1:6-10). Kʼoa jókoa̱nni je chjota xi kʼia kuiyá nga tíjna kjoañʼai xi nʼio tse. Jolani xi chʼin kuiyáni, tsa jme kjoaxkón kuichone kʼoa tsa to chjota sikʼien (Ecl. 9:11; Zac. 14:13). A yaa koa̱nxki̱kao kʼa chjota jebi je xi “chjotatsʼen” ʼmile xi kjoaʼáyanile. Alikui ʼyaa.
XI ʼYAA
11. Jmé xi kuitsoni josʼin sʼe̱ndajinle kjoa nga jngó jngó chjota kʼianga sʼe̱jna Armagedón.
11 Nkjín koya xi ʼyaa jmeni xi koa̱n nichxin xi nroa. Tobʼelañá, kʼianga sʼe̱jna Armagedón kʼiaa sʼe̱ndajinle kjoa nga jngó jngó chjota kʼoa kui xi kuitsoni jósʼin tsabekon je ndsʼe̱ Cristo (Mat. 25:40). Barré sʼin jchatokon je xi kitsjoanganʼiole je Jesús kao chjotale xi ya ngʼajmi koai. Kʼoati ʼyaa nga i̱ sa sonʼnde tjíokʼa je chjotale Cristo xi ya ngʼajmi koai kʼianga koaitsʼia je kjoañʼai xi nʼio tse, kʼoa kʼiaa koai ngʼajmi nga kjesa fitsʼiajin je Armagedón. Kʼianga i̱ sa sonʼnde tjíokʼa je chjotale Cristo xi ya ngʼajmi koai, tsakui nichxin tjínkʼa chjota xi ndʼé tjío ni̱ma̱le xi tsjoánganʼiole (Mat. 25:31, 32; Apoc. 12:17). Ánni nga nʼio tjínnile kjoandosin jebi.
12, 13. Jmé xi sʼin kʼa chjota kʼianga skoe̱ nga ni̱kjeson “Babilonia xi nʼio je” (kʼoati chótsenlai sén xi faʼaitʼa).
12 Kʼianga ni̱kjeson “Babilonia xi nʼio je” nga jetíjna kjoañʼai xi nʼio tse, tsakui nichxin tjínkʼa xi kʼia kjoaʼaítsjenle nga nkjín nó tongini kʼoakitso je testigole Jeobá nga kʼoakoa̱n. A tjínkʼa xi kʼia koa̱nkjainle tʼatsʼe Niná (Apoc. 17:5; Ezeq. 33:33).
13 Si̱kjaʼaitsjenjinla jokoan nichxin nga tsakʼejna Moisés. Kʼianga kitjoni chjota israelita ya Egipto “nʼio nkjín chjota xi xinxin tsʼe kikao” (Éx. 12:38). Tsakui nichxin tjínkʼa xi kʼia koankjainle xi tʼatsʼe Jeobá kʼianga tsabe nga kitjoson jmeni xi kitso Moisés nga te kjoañʼai kichone chjota egipcio. Tsa kʼoati koa̱n nga jeni̱kjeson “Babilonia xi nʼio je”, a sa̱sénná tsa tjínkʼa chjota xi kʼia koa̱nkjainle xi tʼatsʼe Jeobá kʼianga tojeme kjoeson jme xi chon sonʼnde. Machjén nga chjénngilee Jeobá nga tjínle kjoamatokon kʼoa “mamake chjota, likui tokjoan síjtile yaole kʼoa nʼio tjínle kjoatsjoacha kʼoa ñaki kixi jmeni xi sʼín” (Éx. 34:6). d
Kʼianga ni̱kjeson “Babilonia xi nʼio je” tsakui nichxin tjínkʼa xi kʼia kjoaʼaítsjenle nga nkjín nó tongini kʼoakitso je testigole Jeobá nga kʼoakoa̱n (Chótsenlai párrafo 12, 13) g
14, 15. Ánni nga tsínkui xi kuitsoni jñáni ʼndele jngo chjota kʼoa kʼiáni kuiyá nga koa̱n sʼe̱le kjoabijnachon xi tsínkʼia fetʼa (Salmo 33:4, 5).
14 Tsakui nichxin tjínkʼa xi i̱ tso: “Tongisala nda tsa tongini kuiyá je xíngia xi tsín kotʼaya Énle Niná nga kjesa faʼaijin kjoañʼai xi nʼio tse ánni nga kjoaʼáyanile”. Kuijin kʼoatso kʼani nga tsín mele toya jchajin xínkjín. Tonga tsínkui xi kuitsoni kʼiáni kuiyá jngo chjota nga koa̱n sʼe̱le kjoabijnachon xi tsínkʼia fetʼa. Jé Jeobá xi kuitsoni ʼyáni xi sikjaʼáyanile nga̱ je Jeobá jngoo Juez xi kui kʼoasʼín ngantsjai xi kixi tíjna (tʼexkiai Salmo 33:4, 5). e Tjínjngoo tokoán nga kui kʼoasʼin xi kixi tíjna “je xi Juez tíjnale jngo tjíjtsa sonʼnde” (Gén. 18:25).
15 Kʼoati tsínkui xi kuitsoni jñáni ʼndele chjota kʼianga koa̱n kʼoéjna ngantsjai nichxin. Je Jeobá alikui “tindso” sʼin skoe̱kon je chjota xi millón mani xi ya tjío ya ʼnde jñani tsín tsakʼinyason je Énle Niná (Mat. 25:46). Nʼio mandosinle Jeobá xi tʼatsʼe chjota jebi. Alikui ʼyaa jósʼin kʼoendajinle kjoa Jeobá chjota jebi nga jetíjna kjoañʼai xi nʼio tse. Tsakui nichxin tjínkʼa xi kʼia koa̱nkjainle kʼianga kuitjojeya jaʼaínle Jeobá (Ezeq. 38:16).
Kʼianga jekoaitsʼia kjoañʼai xi nʼio tse, tsakui nichxin tjínkʼa xi kʼia sichriantʼale Jeobá nga skoe̱ jmeni xi koa̱n
16. Jméni xi ʼyaa xi tʼatsʼe Jeobá (kʼoati chótsenlai sén xi faʼaitʼa).
16 Tojo tso je Biblia, je Jeobá nʼio bechjí kjoabijnachonle chjota. Kisikasén ʼNdíle i̱ Sonʼnde nga kʼienntjainá ánni nga koa̱n kuiyosíñá ngantsjai nichxin (Juan 3:16). ʼYañá nga tsjoakená je Jeobá kʼoa mamakená (Is. 49:15). Be joʼminá nga jngó jngoá. Ningalani kuiyá, kʼoakjoánti sikjoan ijngokʼaniná kʼianga sikjaʼáyaniná jokoankjoaan kʼoa kjoaʼaítsjen ijngokʼaná jmeni xi kinʼia jokjitse tsakiyoaa (Mat. 10:29-31). Tjínjngoo tokoán nga ndasʼin kʼoendajinle kjoa Jeobá je chjota, nga̱ nʼio chjine, kui xi kixi tíjna kʼoasʼín kʼoa tjínle kjoamatokon (Sant. 2:13).
Tjínjngoo tokoán nga ndasʼin kʼoendajinle kjoa Jeobá je chjota, nga̱ nʼio chjine, kui xi kixi tíjna kʼoasʼín kʼoa tjínle kjoamatokon (Chótsenlai párrafo 16)
17. Jmé xi chótʼayajiaan ya kjoaʼmiya xi ijngo.
17 Kʼianga jengisa nda majinná jmeni xi koa̱n nichxin xi sʼa nroa. Machoyaná nga ngisa maxátíyale ndʼaibi nga kʼuínyasoán je Énle Niná. Yaa kjoaʼmiya xi ijngo kuitsoyaná ánni kʼoabixónsíñá kʼoa ánni nga tsín kjoájñánilee nga kʼuínyasoán.
KJOAJNDA 76 A tsí nʼio tsjoa sʼeli
a Yaa tsoyaná Xo̱n xi Bájinkonná xi tsʼe 1 sá marzo nó 2015, página 8 saʼnda 12, tʼatsʼe nga tsínti tjín xi tsoyanile jmeni xi tso je Biblia, jñani “Nʼio choa ñʼai tíjna josʼin bakóya je Jeobá” tso.
b Hebreos 11:7: “Kui nga koankjainle Noé, kʼoa nga kitsakjonke, tsakʼénda chitsoje. Kʼoasʼin jitjontjai ngatsʼi chjotaniʼyale, nga̱ kʼoasʼin tongini tsakʼinyale xi tʼatsʼe kjoa xi kje matsenjinsa. Tokui nga kʼoasʼin koankjainle Noé, tsakakó nga tsakinle kjoañʼai chjotasonʼnde, kʼoasʼin tsakʼaikjoatjaole kjoakixi, xi sʼe̱ná nga makjainná”.
c 1 Pedro 3:20: “Xi ngasʼa tsʼantjaikjoa koan. Niná kao kjoatsejta kisikjaínle je chjotatsʼantjaikjoabe kʼia nichxin nga Noé tíbʼénda je barco. Jaya barcobe tochoa chjota, tojin mani, xi jitjontjaijin nandá”.
d Kʼianga jeni̱kjeson “Babilonia xi nʼio je” kʼiaa chótʼayakao ngatsʼi choʼndale Niná kʼianga kʼoetʼale je Gog xi tsʼe Magog. Kʼoati chótʼayakao je chjota xi tokʼia koa̱nkjainle xi tʼatsʼe Jeobá nga jeni̱kjeson “Babilonia xi nʼio je”.
e Salmo 33:4, 5: “Nga̱ je énle Jeobá kixiní kʼoa ngayeje jmeni xi sʼín ñaki kʼoatjín. 5 Je Niná kui tsjoake xi kixi tíjna. Je sonʼnde kui kijnakitse je kjoatsjoacha xi bakó Jeobá”.
f XI TÍNCHJA̱NI SÉN XI FAʼAITʼA: Jan sén bakó ánni nga tsín kʼoakoa̱nniná kʼuínyalee Énle Niná ngatsʼi chjota. 1) Jngo chjoón xi ya tsʼe jñani tsín makjainle chjota tʼatsʼe Cristo kʼoa xkón chon nga ya ʼmiyasoán. 2) Jngo chjota kao chjoónle yaa tsʼe jñani xkón chon xi totʼatsʼe kjoa política kʼoa kuinga tsín ma ʼmiyasonñá. 3) Jngo chjota xi ya tíjna jñani nʼio kjintʼa kʼoa tsín ʼya xi nanda ma ya bichó.
g XI TÍNCHJA̱NI SÉN XI FAʼAITʼA: Jngo tsoti xi kisikjinle Niná kui tífaʼaitsjenle nga kʼoasʼin tsakʼinyale nga ni̱kjeson “Babilonia xi nʼio je” kʼoa yaa fikon ngindiale xijchále nga mele sichriantʼa ngindiale Jeobá. Tsa jngo xi kʼoasʼin, tsjoa kʼoé tokoán kʼoa chjénngilee je Jeobá nga tjínle kjoamatokon.
