ARTIKULO MËDIˈIBË YAˈËXPËJKP 19
ËY 22 ¡Waˈan tminyë Anaˈam Kutujkën!
¿Wiˈixë Jyobaa tpayeˈeyaˈanyë naxwinyëdë jäˈäy?
Jyobaa [ . . . ] kyaj ttsoky ets nituˈugë jäˈäy “kyutëgoytyët”(2 PEED. 3:9).
TI YAJNIMAYTYÄˈÄGÄÄMP
Ko mbäät nˈijtëm seguurë ko Jyobaa pyayeˈeyaambyë jäˈäy tëyˈäjtën myëët.
1. ¿Tiko njënäˈänëm ko yëˈë ndukjukyˈäjtëm ja tiempë mëdiˈibë jëjpkëxanëp?
TYAM, yëˈë ndukjukyˈäjtëm ja tiempë mëdiˈibë jëjpkëxanëp ets nˈijxëm ko ta yˈadëy mëdiˈibë Biiblyë ojts tnaskäjpxë. Extëm nˈokpëjktakëm, ta tsyiptundë “ja rey mëdiˈibë anikëjxytsyoow” mëët “ja rey mëdiˈibë abatkëˈëytsyoow” parë tˈanaˈamäˈändë naxwinyëdë jäˈäy (Dan. 11:40, notë). Nan ta nanduˈun yaˈëwäˈkx yajkäjpxwaˈkxy ja oybyë ääw ayuk mëdiˈibë nyimaytyakypy ja Diosë yˈAnaˈam Kyutujkën ets miyonkˈamë jäˈäy të tpëjktäˈäktë wyinmäˈäny parë tmëdunäˈändë Jyobaa (Is. 60:22; Mat. 24:14). Ets tyam, ta nyajmoˈoyëm ja käˈäy ukën mä meerë nyajtëgoyˈäjtëm (Mat. 24: 45-47).
2. Ko nety tsyondaˈaky ja mëj ayoˈon, ¿wiˈixë Jyobaa xypyudëkëyäˈänëm, ets ti mëdiˈibë mbäät njamyajtsëm?
2 Jyobaa xypyudëjkëm parë nnijäˈäwëm ti tim tsojk tunan jatanëp (Prov. 4:18; Dan. 2:28). Ijtëm seguurë ko nety tsyondaky ja mëj ayoˈon, Jyobaa duˈunyëm xymyoˈoyäˈänëm ja naybyudëkë parë tuˈugyë nnayaˈijtëmëty ets parë kyaj nmastutëm. Per tsojkëp njamyajtsëm ko taa mëdiˈibë kyaj nnijäˈäwëm wiˈix tijaty tyunany jyatäˈänyëty mä tiempë myiny kyëdaky. Mä yäˈädë artikulo yëˈë yajnimaytyäˈägäämp wiˈix tyam tijaty yajjaygyukë, ok, yëˈë nimaytyäˈägäˈänëm mëdiˈibë nnijäˈäwëm ets wiˈixë Jyobaa tpayeˈeyaˈanyë jäˈäy mä tiempë myiny kyëdaky.
MËDIˈIBË KYAJ NNIJÄˈÄWËM
3. ¿Wiˈixë nety nmëbëjkëm jyatäˈändë jäˈäyëty ko nety tsyondaˈaky ja mëj ayoˈon? ¿Ets tiko nety duˈun njënäˈänëm?
3 Näämnëm duˈun nety nmëbëjkëm ko mä tsyondäˈägäˈäny ja mëj ayoˈon, ja jäˈäyëty kyaj mbäät tˈokˈixyˈäjnëdë Jyobaa parë tsyokwëˈëmdët mä Armajedon. Päätyë nety duˈun njënäˈänëm mët ko duˈun tyuun jyäjtë ko myiiny ja mëj Ayoˈonduu, pesë Jyobaa ojts dyaˈˈadujknë ja tëjkˈääw. Ets päätyë nety nanduˈun njënäˈänëm ko Jyobaa yaˈˈadukaampy ja tëjkˈääw o ko kyaj nety tˈokˈnidiempëˈäjnë parë pën yˈixyˈatëdët mä nety tsyondaˈaky ja mëj ayoˈon (Mat. 24:37-39).
4. ¿Tiko njënäˈänëm ko tyam kyaj duˈun meerë tijaty tyunäˈäny jyatäˈänyë extëm ko Noé jyukyˈajty?
4 Extëm tijaty tyuun jyäjtë ko nyajxy ja mëj Ayoˈonduu, ¿yëˈëdaa yˈandijpy ko nanduˈun tijaty tyunäˈäny jyatäˈänyëty mä tiempë myiny kyëdaky? a Kyaj, Biiblyë kyaj duˈun jyënaˈany. Jesus ojts tˈijxkijpxyë ja tiempë mä Noé jyukyˈajty mëët ja tiempë mä nety jyëmbitäˈäny. Per kyaj dyajjaygyukëyanë ko nanduˈunën yˈadukäˈäny ja tëjkˈääw mä tiempë myiny kyëdaky extëm jyaty mä ja mëj Ayoˈonduu. Per extëm tyuun jyäjtë mbäät tijaty xytyukniˈˈijxëm.
5. 1) ¿Ti tyuunë Noé mä nety kyaminyëm ja Ayoˈonduu? (Ebreeʉsʉty 11:7; 1 Peedrʉ 3:20). 2) Extëmë Noé ojts yˈëwaˈkxy kyäjpxwäˈkx, ¿tiko njënäˈänëm ko nanduˈun tyam nˈëwäˈkx ngäjpxwäˈkxëm?
5 Ko Jyobaa ttukˈawäˈänë Noé ti nety tyunaampy, yëˈë netyë tniwäˈkë ja arkë. Ko duˈun ttuuny, ta dyajnigëxëˈky ko myëdäjtypyë nety ja mëbëjkën (käjpxë Ebreeʉsʉty 11:7; 1 Peedrʉ 3:20). Nanduˈunën tyam, pënaty yajtukmëtmaytyaktëp ja oybyë ääw ayuk, tsojkëbën dyajnigëxëˈëktët ko myëdäjtëbë mëbëjkën mä tijaty ttundë (Apos. 3:17-20). Pedro ojts jyënaˈany ko Noé käjpxwäˈkx (2 Peed. 2:5). Extëm të nˈijxëm mä jatuˈukpë artikulo, kyaj nnijäˈäwëm pënë Noé ojts niduˈuk niduˈugë jäˈäy ttimytyukˈawäänë ti netyë Dios tyunaampy. Mä kyaminyëm ja kutëgoˈoyën nanduˈun niˈamukë jäˈäy njatukmëtmaytyäˈägäˈänëm ja Diosë yˈääw yˈayuk, per kyaj niˈamukë jäˈäy ndukmëtmaytyaktäˈäyëm. ¿Wiˈix ko duˈun njënäˈänëm?
6, 7. ¿Tiko kyaj ndukmëtmaytyaktäˈäyäˈänëm niˈamukë jäˈäy ja Diosë oybyë ääw ayuk?
6 Min nˈokˈijxëm wiˈixë Jesus jyënany nˈëwäˈkxäˈän ngäjpxwäˈkxäˈänëm. Yëˈë ojts tnaskäjpxë ko yäˈädë oybyë ayuk “yajkäjpxwäˈkxäˈäny abëtsëmy nyaxwinyëdë parë yajtuknijawët tukëˈëyë nasionk” (Mat. 24:14). Extëmë Jesus jyënany taajën yˈadëy, pes jaˈa tyam nˈëwäˈkx ngäjpxwäˈkxëm ja Diosë yˈAnaˈam Kyutujkën, 1,000 naxy ayuk. Mä sitio jw.org, nan mbäät jap niˈigyë jäˈäy tnijawëdë ja Diosë yˈääw yˈayuk.
7 Jesus duˈun tˈanmääy ja yˈëxpëjkpëty: “Minäämbëts määnëmë nety miits xykyatukˈyoˈoytyaˈaytyënëm nidëgekyë yëˈë israelitë käjpnëty”. Yäˈädë yëˈë yˈandijpy ko kyajnëmë nety dyaˈˈabëtsëëmdäˈädënëm ja tuunk ko myinëdë Jesus (Mat. 10:23; 25:31-33). Tyam miyonkˈam nanduˈunë jäˈäy tsyëënëdë mä kyuboky yaˈëwäˈkx yajkäjpxwäˈkxëdë Diosë yˈääw yˈayuk. Nan mëgoˈpxˈamë ënäˈkuˈunk myaxuˈunkˈattë winduˈkminutëty. Pääty, oy nuˈun njatuˈunëmë mëjääw kyaj niˈamukë jäˈäy ndukmëtmaytyaktäˈäyäˈänëm ja oybyë ääw ayuk “mä tëgekyë nax käjpn, mä tëgekyë naxwinyëdë, es mä tëgekyë wiinkpë ayuk käjxpë” mä kyaminyëm ja kutëgoˈoyën (Diˈibʉ Jat. 14:6).
8. ¿Ti mëdiˈibë nnayajtëˈëwëm? (Ix nanduˈunë dibujë).
8 Ko duˈun të nnijäˈäwëm, waˈanë net nnayajtëˈëwëm ¿wiˈixë net jyatäˈändë ja jäˈäyëty mëdiˈibë kyajnëm yajtukmëtmaytyäˈäktë ja Diosë yˈääw yˈayuk mä kyatsondaˈakynyëm ja mëj ayoˈon? ¿Ti tyunaambyë Jyobaa mëdë Jesus ko nety tpayeˈeytyë yäˈädë jäˈäyëty? (Fwank 5:19, 22, 27; Apos. 17:31). Ja tekstë mëdiˈibë tuump mä tsyondaˈaky yäˈädë artikulo yëˈë xytyukjamyajtsëm ko Jyobaa kyaj ttsoky ets nipën kyakutëgoyët, mëdiˈibën yëˈë tsyojkypy, yëˈë ets ja pokyjyaˈay jyodëmbittët (2 Peed. 3:9; 1 Tim. 2:4). Kyaj nnijäˈäwëm wiˈixë Jyobaa dyaˈitäˈänyë yäˈädë jäˈäyëty ets nan kyaj tiko xytyukmëtmaytyakëm.
¿Wiˈix jyatäˈändë jäˈäyëty mëdiˈibë nety kyajnëm yajtukmëtmaytyäˈäktë ja Diosë yˈääw yˈayuk mä kyatsondaˈakynyëm ja mëj ayoˈon? (Ixë parrafo 8). c
9. ¿Ti Jyobaa të xytyuknijäˈäwëm?
9 Jyobaa xytyuknijäˈäwëm mä Biiblyë ti mëdiˈibë tyunaampy. Extëm nˈokpëjktakëm, të xytyuknijäˈäwëm ko yajjukypyëkaampy ja jäˈäyëty mëdiˈibë kyaj yajtukmëtmaytyaktë Diosë yˈääw yˈayuk ets mëdiˈibë kyaj dyajtëgäjtstë jyukyˈäjtën (Apos. 24:15; Luk. 23:42, 43). Ko duˈun nnijäˈäwëm, waˈan niˈigyë tijaty nˈaknayajtëˈëwëm.
10. ¿Tijaty nˈaknayajtëˈëwëm?
10 ¿Wiˈix jyatäˈändë ja jäˈäyëty mëdiˈibë oˈktëp mä tyuˈuyeˈey ja mëj ayoˈon? ¿Nëjkxëbëdaa jyukypyëktë? Biiblyë yajxon tnimaytyaˈaky ko pënaty kyaj yˈokjukypyëkanëdë, yëˈë ja jäˈäyëty mëdiˈibë Jyobaa yajkutëgoyanëdëp mä Armajedon mët ko nety të nyibëdëˈëgëdë (2 Tes. 1:6-10). Ets ¿wiˈix yˈitäˈändë ja jäˈäyëty mëdiˈibë yaˈoˈkëdëp ja yuu päˈäm, ko alokë yˈayoˈonbäättë o ko pën yaˈoogëdë? (Ecl. 9:11; Zac. 14:13). ¿Waˈandaa yëˈëjëty mëdiˈibë Biiblyë myaytyakypy ko kyaj oy të jyukyˈattë etsë net nëjkx jyukypyëktë? Kyaj nnijäˈäwëm.
MËDIˈIBË NNIJÄÄWËM
11. ¿Ti nëjkxë Jesus tˈixy ko netyë jäˈäy tpayeˈey mä Armajedon?
11 Nnijäˈäwëm tijaty tunan jatanëp mä tiempë myiny kyëdaˈaky. Extëm nˈokpëjktakëm, nnijäˈäwëm ko mä Armajedon, Kristë yëˈë yajnaxaampy extëmë borreegë ja jäˈäyëty mëdiˈibë nety të pyudëkëdë ets pënaty nëjkxandëp tsäjpotm (Mat. 25:40). Nnijäˈäwëm nanduˈun ko taanëmë nety yˈakjukyˈattë Naxwiiny, pënaty mëdë Jesus yˈanaˈamäˈändë tsäjpotm mä tyuˈuyeˈey ja mëj ayoˈon ets ko ja yajmënëjkxtäˈäyanëdë tsäjpotm mä nety tyim minanë ja kutëgoˈoyën. Mientrës yˈakjukyˈattënëm yä Naxwiiny pënaty nëjkxandëp tsäjpotm, waˈan nëjkx ja jäˈäyëty mëdiˈibë oyë jyot kyorasoon tpuwäˈägëdë Jyobaa ets ttundë ja tuunk mëdiˈibë ja yajtuump (Mat. 25:31,32; Diˈibʉ Jat. 12:17). ¿Tiko jyëjpˈamëty nnijäˈäwëm?
12, 13. ¿Ti näägë jäˈäy tyunandëp ko nety tˈixtë kyutëgoyë “Mëj Babilonia”? (Ix nanduˈunë dibujë).
12 Ko nety tsyondaˈaky ja mëj ayoˈon, waˈan näägë jäˈäyëty ko nety tˈixtë kyutëgoy ja “Mëj Babilonia” nëjkx tjamyatstë ko Jyobaa tyestiigëty kanäk jëmëjtë nety duˈun të tˈëwäˈkx të tkäjpxwäˈkxtë. ¿Waˈandaa näägë yäˈädë jäˈäyëty nëjkx tpuwäˈägëdë Jyobaa? (Diˈibʉ Jat. 17:5; Ezeq. 33:33).
13 Nˈokjamyajtsëm tii tuˈun jäjtë ko Moisés twoowbëtsëëmy ja israelitëty jap Egipto pes patsoˈonëdë “mayjyaay” (Éx.12:38, MNM). Waˈan näägëtyë yäˈädë jäˈäyëty tmëbëjktë Dios, ko tˈijxtë wiˈix yˈadëëwdääy ja mäjkpë ayoˈon mëdiˈibë netyë Moisés të tnigajpxy tyunäˈäny jyatäˈänyëty. Ko nety ja Mëj Babilonia kyutëgoy etsë jäˈäyëty tpuwäˈägëdëtyë Jyobaa, ¿nëjkxëbëdaa axëk nnayjyäˈäwëm? ¿Kyaj këdii? Pes duˈun njäˈäyˈatäˈänëm extëmë Jyobaa jyaˈayˈaty, “mëdiˈibë oyjyot oywyinmäˈäny myëëtˈäjtypyën. Ets mëdiˈibë paˈëyoop näjtsˈëyoˈowëbën, mëdiˈibë maˈkxtujkpën, ets mëj këjaa tsyoky jyawë, ets ak mëdëy winë ttuny” b (Éx. 34:6, MNM).
Ko nety kyutëgooynyë ja “Mëj Babilonia” waˈan nëjkxë jäˈäy tjamyatsë ko Jyobaa tyestiigëty të nety duˈun atsux kanäk jëmëjt tˈëwäˈkx tkäjpxwäˈkxnëdë ko duˈun tyunäˈäny jyatäˈänyëty. (Ixë parrafo 12 etsë 13). d
14, 15. ¿Wiˈix nnijäˈäwëm ko parë tuˈugë jäˈäy jyukyˈattët xëmëkyëjxm, kyaj yëˈë yaˈixäˈäny naa yˈoˈky ets mä tsyënääy? (Sal. 33:4, 5).
14 Waˈan të xyˈokmëdoobë pën jyënaˈany: “Nik oy pën oˈkpëtsë njëëky mëguˈuk mëdiˈibë kyaj yˈëxpëky mä kyatsondaˈakynyëm ja mëj ayoˈon ets duˈun nëjkxyë Jyobaa yajjukypyekyëty mä ja jembyë jukyˈäjtën”. Ets waˈan duˈun jyënäˈändë mët ko ttsoktë jyëëky myëguˈuk, perë Jyobaa kyaj yëˈë tˈixäˈäny näˈä pën yˈooky parë tˈixët pën yajjukypyejkypy. Pesë Jyobaa yëˈë tuˈugë Fes mëdiˈibë wäˈäts, oy tijaty ttuny ets mëdëy (käjpxë Salmo 33:4, 5). Ijtëm seguurë “ko ja Fes mëdiˈibë tuump abëtsëmy nyaxwinyëdë” oy tijaty ttunäˈäny (Gén. 18:25).
15 Jyobaa kyaj yëˈë tˈixäˈäny mä pën tsyëënë parë mbäät dyajjukyˈaty xëmëkyëjxm ets ninäˈä tkayajnaxäˈändë extëmë tsyiibë ja miyonkˈambë jäˈäyëty mëdiˈibë tsënääytyëp mä it lugäär mä ninäˈä të kyayajtukmëtmaytyäˈäktë ja Diosë yˈAnaˈam Kyutujkën (Mat. 25:46). Pen ëtsäjtëm nmëmäˈäy nmëdäjëmë yäˈädë jäˈäyëty mëdiˈibë kyaj të yajtukmëtmaytyäˈäktë Diosë yˈääw yˈayuk. Ijtëm seguurë “ko ja Fes mëdiˈibë tuump abëtsëmy nyaxwinyëdë” niˈigyë myëmay myëdäjëdë. Kyaj nnijäˈäwëm tiijënë Jyobaa tyunaampy ko nety tyuˈuyeˈey ja mëj ayoˈon. Waˈan näägë yäˈädë jäˈäyëty, nëjkx tmëbëktë Jyobaa ko nëjkx tˈijxnëdë wiˈix dyajwäˈätsyë xyëëw (Ezeq. 38:16).
Ko nëjkx tsyondaˈaky ja mëj ayoˈon ets ja jäˈäyëty tˈixtët wiˈix tijaty tyuny jyatyëty, ¿waˈandaa nëjkx nääk tpuwäˈägëdë Jyobaa?
16. ¿Nuˈunënë Jyobaa xyˈixyˈäjtëm? (Ix nanduˈunë dibujë).
16 Mä Biiblyë të nnijäˈäwëm ko Jyobaa yajtsobatypy mëjwiin kajaa ja naxwinyëdë jäˈäyë jyukyˈäjtën. Kyëyäjk ja yˈUˈunk parë mbäät njukyˈäjtëm xëmëkyëjxm (Fwank 3:16). Seguurë ko niˈamukë nˈijxëm nuˈunënë Jyobaa xypyaˈˈayoˈowëm ets xytsyojkëm (Is. 49:15). Yëˈë, wäˈäts xyˈixyˈäjtëm ets nyijäˈäwëp ti nxëëwˈäjtëm niduˈuk niduˈuk. Pääty pen oˈkëm, nëjkxëp jatëgok xyajjukypyëjkëm duˈun ta nety njäˈäyˈäjtëm ets extëmë nety nˈixëˈäjtëm (Mat. 10:29-31). Mbäät ndukjotkujkˈäjtëmë Jyobaa, ko pyayeˈeyaambyë jäˈäy tëyˈäjtën myëët, mët ko yëˈë tuˈugë Dios mëdiˈibë wijy, wäˈäts ets paˈˈayoop nasˈayoˈowëp (Sant. 2:13).
Mbäät nˈijtëm seguurë ko Jyobaa tëyˈäjtën myëët tpayeˈeyaˈanyë naxwinyëdë jäˈäy, pes yëˈë tuˈugë Dios mëdiˈibë wijy, wäˈäts ets paˈˈayoop nasˈayoˈowëp. (Ixë parrafo 16).
17. ¿Ti yajnimaytyäˈägäämp mä jatuˈukpë artikulo?
17 Ko të nnijäˈäwëm tëgokyë yäˈädë, ta nˈijxëm ko jëjpˈam ets niˈigyë nˈakˈëwäˈkx nˈakkäjpxwäˈkxëm. ¿Tiko duˈun njënäˈänëm? ¿Ets ti xypyudëkëyäˈänëm parë duˈunyëm nˈëwäˈkx ngäjpxwäˈkxëm? Yëˈë yajnimaytyäˈägäämp mä jatuˈukpë artikulo.
ËY 76 Tukmëtmaytyakëts wiˈix mnayjawëty
a Mä Diˈib Xytyukˈawäˈänëm 15 äämbë marsë 2015 mä ja artikulo mëdiˈibë xyëwˈäjtypy “Jyobaa xytyukniˈˈijxëm tijaty wingëjxy”, pajina 7 axtë 11, jap niˈigyë yajnimaytyaˈaky tiko kyaj tyam duˈun yˈokˈyajjaygyujkënë extëmë nety tëëyëp nmëbëjkëm.
b Ko nety të kyutëgooynyë Mëj Babilonia, ta xynyibëdëˈëgäˈänëmë Gog mëdiˈibë tsoˈomp Magog, ets ja mä nëjkx niˈamukë Diosmëduumbë yaˈijxmatstë. Pënaty pyuwäˈkëdëbë Jyobaa ko nety kyutëgoy ja Mëj Babilonia, nan nëjkxëp yaˈijxmatstë.
c YAJNIMAYTYAˈAGYË DIBUJË: Tëgëk pëky jyaˈˈatyë jotmay tiko kyaj mbäät ndukmëtmaytyaktäˈäyëmë jäˈäy ja Diosë yˈääw yˈayuk: 1) Tuˈugë toxytyëjk tsyëënë mä it lugäär mä kyaj yajkupëkyë wiinkpë relijyonk ets kutsëˈëgë jap ngäjpxwäˈkxëm. 2) Tuˈugë kasäädë jäˈäy tsyëënëdë mä gobiernë dyajkubokyë Diosë tyuunk ets kutsëˈëgë jap ngäjpxwäˈkxëm. 3) Tuˈugë jäˈäy tsyëënë mä it lugäärë jantsy nidëkëbë.
d YAJNIMAYTYAˈAGYË DIBUJË: Tuˈugë kiixy mëdiˈibë nety të tmëjagamgaknë Jyobaa tjamyetsy wiˈixë nety kyutëgoyaˈany ja “Mëj Babilonia”. Ta jatëgok nijëmbityë Jyobaa ets tninëjkxyë tyääk tyeety mëdiˈibë testiigëty. Ko nëjkx nˈijxëm ja jäˈäyëty nijëmbittë Jyobaa nanduˈun njäˈäyˈatäˈänëm extëmë Jyobaa, nëjkxëp ndukxondakëm ets nbaˈˈayoˈowëm ko jyëmbity tuˈugë pokyjyaˈay.
